Category: Lajme

Gjykata Themelore në Prishtinë e ka refuzuar padinë e dorëzuar ndaj Zyrës së Rregullatorit të Energjisë, kundër vendimit për shtrenjtimin e rrymës për 16.1 përqind.

Këtë e ka bërë të ditur avokati, Ardian Bajraktari përmes një postimi në rrjetin social Facebook.

Ai ka paralajmëruar se do t’i drejtohet Gjykatës së Apelit për atakimin e këtij aktvendimi.

“Kam pranuar Aktvendimin e Gjykatës Themelore në Prishtinë, me të cilin refuzohet kërkesa për sigurimin e Padisë tonë ndaj Zyrës së Rregullatorit të Energjisë (ZRrE). Tashmë, gati është Ankesa për Gjykatën e Apelit ndaj këtij Aktvendimi. Beteja ligjore kundër vendimit të ZRrE-së për ngritjen e çmimit të energjisë vazhdon”, ka shkruar Bajraktari.

Shëndeti mendor nuk është çështje individuale, por përgjegjësi e komunitetit. Kështu u tha në tryezën e organizuar nga Ministria e Shëndetësisë me rastin e shënimit të Javës së Ndërgjegjësimit për Shëndetin Mendor, raporton KosovaPress.

Sekretari i Ministrisë së Shëndetësisë, Naim Bardiqi theksoi se si ministri e Shëndetësisë kanë punuar për përmirësimin e cilësisë së jetës së personave me çrregullime mendore.

Bardiqi tha se janë hartuar 7 udhërrëfyes klinikë, është draftuar projektligji për shëndet mendor, si dhe plani strategjik për shëndet mendor 2025-2030.

“Tema e javës së ndërgjegjësimit në këtë vit është komuniteti. Qëllimi është të festohet fuqia dhe rëndësia e komunitetit të qenurit pjesë e një komuniteti të sigurt dhe të pozitiv është jetik për shëndetin dhe mirëqenien tonë mendore. Shëndeti mendor është temë që prek secilin prej nesh nuk është çështje që duhet të mendohet dhe trajtohet si çështje individuale. Shëndeti mendor duhet menduar si një përgjegjësi e komunitetit….Ministria e Shëndetësisë vazhdon të jetë e përkushtuar për përmirësimin e cilësisë së jetës të personave me çrregullime mendore për të zvogëluar stigmën rreth shëndetit mendor ka ndërmarrë të gjitha veprimet për rritjen e rëndësisë së shëndetit mendor për trajtimin e barabartë pa diskriminim të personave me çrregullime mendore në funksion të respektimit të integritetit fizik dhe dinjiteti njerëzor”, tha ai.

Drejtori i Klinikës së Psikiatrisë, Faton Kutllovci u shpreh se janë duke punuar në profilizimin e kësaj klinike. Ai tha se kjo javë e ndërgjegjësimit për shëndetin mendor duhet të shfrytëzohet për të luftuar stigmën ndaj personave që vuajnë nga këto probleme.

“Të shfrytëzojmë këtë javë të ndërgjegjësimit që të bëhemi bashkë të luftojmë stigmën sepse nuk ka gjë më të fuqishme se sa komuniteti i cili dëgjon, mbështet dhe nuk paragjykon. Shëndeti mendor nuk është çështje individuale, por është çështje për të gjithë ne…. Kemi punuar që të profilizojmë klinikën, kemi bërë repartin për sëmundjet akute psikotike në repartin e psikiatrisë për fëmijë dhe adoleshentë në shtretër, kemi rritur kapacitetet në repartin për sëmundjet e varësisë dhe tani në drejtimin e MSH është edhe krijuar komisioni që po punon në hartimin e strategjisë së duhur për rritjen e kapaciteteve të mëtejme për repartin e varësisë dhe kjo është në procedurë“, theksoi Kutllovci.

13 maji deri më 19 maj njihet si Java e Ndërgjegjësimit të Shëndetit mendor. /kp

Kryetari i AAK-së, Ramush Haradinaj, ka bërë sot homazhe në Qyshk, Pavlan, Zahaq dhe Llabjan, në nderim të 102 civilëve shqiptarë të ekzekutuar barbarisht nga forcat serbe gjatë luftës në Kosovë.

Në këtë përvjetor, Haradinaj ka ndarë dhimbjen dhe kujtimin me familjarët e të rënëve, duke e quajtur këtë krim një akt të qëllimshëm të shfarosjes së shqiptarëve në tokën e tyre.

Përmes një postimi në Facebook, Haradinaj theksoi se këto masakra janë dëshmi e çmimit të lartë që populli i Kosovës ka paguar për lirinë dhe shtetin që gëzojmë sot. Ai nënvizoi se krimet e Serbisë nuk mund të harrohen e as të falen, duke kërkuar vendosjen e drejtësisë për viktimat.

“Sot, në përvjetorin e këtyre masakrave, kemi kujtuar e nderuar me pietet edhe eprorët dhe luftëtarët e kësaj ane, që ranë në beteja të ndryshme të Ushtrisë Çlirimtare të Kosovës në Dukagjin: Skënder Çeku nga Qyshku, Jahë Kabashi, Blerim e Bekim Kelmendi, dhe Rifat Veseli nga Llabjani,” shkroi Haradinaj.

Ai theksoi se Kosova është ende e mbushur me varre të shqiptarëve të ekzekutuar, ndërsa shumë të tjerë ende nuk janë gjetur. “Drejtësia për viktimat duhet të vihet në vend! I përjetshëm qoftë kujtimi për të rënët për liri!”, përfundoi ai.

GLPS ka reaguar pas mosdiskutimit të kërkesës së Kosovës për anëtarësim në Këshillin e Evropës gjatë takimit të Komitetit të Ministrave më 13-14 maj në Luksemburg.

Sipas organizatës, kjo është pasojë e drejtpërdrejtë e krizës institucionale dhe mungesës së një Kuvendi funksional, pas 15 tentimeve të pasuksesshme për zgjedhjen e kryetarit të Kuvendit.

GLPS thekson se dështimi për të trajtuar aplikimin tani e shtyn mundësinë për votim deri në majin e ardhshëm, kur rreziqet gjeopolitike, përfshirë rikthimin e mundshëm të Rusisë në KiE, mund ta pamundësojnë përfundimisht anëtarësimin e Kosovës.

Organizata kërkon urgjentisht përgjegjësi politike dhe formimin e institucioneve stabile për të mbrojtur interesin afatgjatë të vendit.

Policia e Kosovës njofton se një grua në Gjilan është zhdukur. Kjo grua është larguar nga shtëpia dy ditë më parë dhe nuk dihet vendndodhja e saj, raporton KP.

“Gjilan 12.05.2025, 07:40. Është raportuar se viktima femër kosovare është larguar nga shtëpia dhe nuk dihet për vendndodhjen e saj”, thuhet në raportin 24 orësh të policisë.

Sipas policisë, rasti është nën hetime.

Ambasadori i Gjermanisë në Kosovë, Jorn Rohde, tha se anulimi i konferencës për media e kryetares së Gjykatës Speciale, Ekaterina Trendafilova, pas presionit të veteranëve të UÇK-së, ngreh shqetësime të mëdha.

“Dhomat e Specializuara të Kosovës janë pjesë e sistemit ligjor të Kosovës dhe informimi i publikut është një shtyllë thelbësore mbi mandatin e saj. Anulimi i konferencës për media pas presionit nga veteranët e UÇK-së ngre shqetësime të mëdha. Autoritetet duhet të sigurojnë që gjykata të mund ta kryejë punën e saj pa pengesa”, shkroi në platformën e tij në “Bluesky”, ambasadori Rohde.

Një ditë më parë, një grup veteranësh të luftës së Ushtrisë Çlirimtare të Kosovës bashkë me udhëheqës të Organizatës së Veteranëve të Luftës së UÇK-së kanë protestuar kundër vizitës së kryetares së Gjykatës Speciale, Ekaterina Trendafilova në Kosovë.

Më pas, Trendafilova anuloi konferencën, siç u kumtua, për shkaqe sigurie.

Një person është arrestuar në Gjakovë pasi gjatë një kontrolli në shtëpinë e tij, Policia e Kosovës ka sekuestruar substanca të dyshuara narkotike. Sipas policisë, në shtëpinë e tij janë gjetur rreth 2.52 gram marihuanë dhe dy qese najloni me rreth 1.84 gram kokainë. Pas intervistimit, me vendim të prokurorit, i dyshuari është liruar në procedurë të rregullt, raporton KosovaPress.

“Rr. Domenik Përgegaj, Gjakovë 13.05.2025, 22:30. Është arrestuar i dyshuari mashkull kosovar pasi që gjatë kontrollit në shtëpinë e tij janë gjetur dhe sekuestruar substancë e dyshuar narkotike e llojit marihuanë me peshë rreth 2.52 gram si dhe dy qese najloni të mbushura me substancë të dyshuar narkotike të llojit kokainë me peshë rreth 1.84 gram. Pas intervistimit me vendim të prokurorit i dyshuari është liruar në procedurë të rregullt”, thuhet në raportin 24 orësh të Policisë së Kosovës.

Policia e Kosovës vazhdon angazhimin e saj në luftën kundër narkotikëve, duke realizuar aksione të koordinuara dhe duke bashkëpunuar me institucione të tjera për të garantuar sigurinë dhe rendin publik.

Avokati i Popullit, Naim Qelaj ka pritur në takim kryetaren e Gjykatës Speciale, Ekaterina Trendafilova, të martën në Prishtinë. Aty, Qelaj ka ngritur shqetësimin rreth punës së Speciales.

Sipas komunikatës, Avokati i Popullit ka ngritur shqetësimin nëse në Hagë po respektohen parimet për gjykim të drejtë dhe të paanshëm të të akuzuarve.

Takimi, sipas Avokatit të Popullit, u zhvillua me kërkesë të Trendafilovës.

“Fillimisht, Avokati i Popullit potencoi shqetësimin e tij nëse po garantohet një gjykim i drejtë dhe i paanshëm sipas standardeve të Gjykatës Evropiane për të Drejtat e Njeriut, lidhur me të drejtat e të akuzuarit në procedurë, e që janë të përcaktuara edhe me Kushtetutën e Republikës së Kosovës. Në këtë aspekt, Avokati i Popullit foli në lidhje me barazinë e armëve në raport me provat dhe mënyrën se si janë siguruar këto prova, e në veçanti duke iu referuar provave që sigurohen nga Republika e Serbisë, duke pasur parasysh që Serbia është një shtet që ka qëndrime armiqësore ndaj Ushtrisë Çlirimtare të Kosovës, pjesë e së cilës janë të akuzuarit”, thuhet në komunikatë.

Në komunikatë thuhet se është brengosëse mënyra se si funksionon gjykata dhe se “lë për të dyshuar në pavarësinë e gjykatave të niveleve që veprojnë brenda kësaj gjykate, dhe kjo nuk është në frymën e standardeve ndërkombëtare që garantojnë gjykimin e drejtë në raport me shkallëshmërinë e procedurës dhe që ndërlidhen pastaj me të drejtën për një mjet efektiv juridik”.

“Për më shumë, ma shqetësuese e bën faktin se Avokati i Popullit është pjesë e kësaj strukture e kjo është në kundërshtim me parimet e Parisit që përcaktojnë se Avokati i Popullit duhet të jetë institucion i pavarur, i themeluar me ligj ose Kushtetutë, i zgjedhur në një mënyrë transparente dhe ushtron mandatin e tij në mënyrë të pavarur dhe të pandikuar nga asnjë autoritet, gjë që Avokati i Popullit në Dhomat e Specializuara nuk duket që i plotëson këto standarde”, theksohet më tej në këtë shkrim.

Veç tjerash, në takimin e djeshëm me kryetaren e Speciales, Avokati i Popullit ka ngritur shqetësimin edhe për përgjimin e bisedave dhe vizitave në paraburgim.

“Konsiderojmë se përkundër faktit se këto mund të jenë të lejuara me ligj por cenojnë parimin e privatësisë, jetës familjare edhe cenojnë mbrojtjen efektive nëse këto përgjime ndodhin edhe në raport me ekip mbrojtëse të të akuzuarve. Avokati i Popullit e konsideron se problem në vete është kohëzgjatja e paraburgimit. Kjo kohëzgjatje dhe mos ndryshimi i masave me masa tjera alternative sikur Gjykata nuk u beson institucionet e Kosovës se ata mund të garantojnë respektimin e atyre masave dhe të garantojnë një proces të rregullt dhe të papenguar”, deklaron Institucioni i Avokatit të Popullit.

Avokati i Popullit theksoi edhe çështjen e “kompensimit të viktimave që nuk janë në standard të njëjtë për të dëmtuarit që te rastet që gjykohen në Republikën e Kosovës sepse të gjithë duhen trajtuar njësoj”.

Po ashtu, ritheksoi nevojën për më shumë transparencë publike dhe ruajtjen e ekuilibrit mes drejtësisë dhe të drejtave themelore të njeriut.

Gjykata Speciale ka seli në Hagë të Holandës dhe personel ndërkombëtar.

Atje po gjykohen për krime të pretenduara të luftës ish-eprorët e Ushtrisë Çlirimtare të Kosovës.

Specialja është kritikuar në vazhdimësi për mungesë të transparencës./KosovaPress

Blerësit morën një lehtësim të vogël këtë javë nga një tarifë gjigante për mallrat e lira dhe pa taksa nga Kina, të cilat më parë ishin të lira. Por tarifat që mbeten ende pritet të prishin zakonet e blerjeve të miliona amerikanëve që blejnë në faqet e tregtisë elektronike me çmime ultra të ulëta si Shein dhe Temu.

Administrata Trump ka ulur tarifën e saj për pakot “de minimis”, ose dërgesat e mallrave me vlerë tetëqind dollarë ose më pak, që vijnë nga Kina nga njëqind e njëzet për qind në pesëdhjetë e katër për qind dhe ka ulur normën nga nga njëqind e dyzet e pesë për qind në tridhjetë për qind për pakot nga transportuesit komercialë. Një opsion me tarifë fikse prej njëqind dollarësh gjithashtu nuk do të rritet në dyqind dollarë për artikull postar nga një qershori, siç ishte planifikuar më parë, sipas një urdhri ekzekutiv të lëshuar të hënën dhe i cili hyn në fuqi pas mesnatës së së mërkurës, shkruan CNN, transmeton KosovaPress.

Ndryshimi është simbolik i gjendjes së luftës tregtare SHBA-Kinë. Marrëdhënia po përmirësohet, por ka ende shumë për të bërë përpara se të kthehet në nivelet para janarit. Të mërkurën, Kina i uli tarifat e saj të përgjithshme mbi mallrat amerikane në dhjetë për qind për nëntëdhjetë ditë, ndërsa taksat amerikane mbi shumicën dërrmuese të produkteve kineze kanë rënë në tridhjetë për atë periudhë. Tarifat amerikane vijnë përveç taksave që ishin tashmë në fuqi përpara se Presidenti i SHBA-së Donald Trump të fillonte mandatin e tij të dytë.

Urdhri ekzekutiv i së hënës lehtëson tarifën prej njëqind e njëzet për qind për pakot postare de minimis. Norma e re prej pesëdhjetë e katër për qind zbatohet vetëm për dërgesat e trajtuara nga shërbimet postare si USPS. Dërgesat nga UPS, FedEx dhe kompani të tjera të dërgesave të shpejta do të përballen në vend të kësaj me tarifën bazë për mallrat kineze, të cilën SHBA-të e ulën në tridhjetë për qind, duke qenë ende dëmtuese për shumë biznese dhe konsumatorë.

Në Gjykatën Themelore në Prishtinë të mërkurën ka nisur rigjykimi në rastin e njohur si “53-milionëshi” ndaj të akuzuarve Pal Lekaj, Eset Berisha, Nebih Shatri dhe Besim Tahiri, të akuzuar për keqpërdorim të detyrës lidhur me autostradën “Arbën Xhaferi”.

Pal Lekaj, në cilësinë e ministrit të Ministrisë së Infrastrukturës (MI), Eset Berisha, në cilësinë e këshilltarit të lartë politik i tij, Nebih Shatri, si sekretar i Përgjithshëm në këtë ministri dhe Besim Tahiri, si drejtor i Prokurimit Publik në MI, ngarkohen nga Prokuroria për keqpërdorim të detyrës zyrtare në bashkëkryerje, raporton “Betimi për Drejtësi”.

Të pranishëm në seancë janë Lekaj me mbrojtësit e tij avokatët: Artan Qerkini, Musa Damati dhe Kaltrina Kodraliu, i akuzuari Tahiri me avokatin e tij Ardit Humolli, i akuzuari Shatri me avokatin e tij Driton Musliu dhe i akuzuari Berisha me avokaten e tij Teuta Xhema.Po ashtu, i pranishëm është edhe prokurori special, Atdhe Dema.Gjykata Themelore në Prishtinë më 31 janar 2024 i shpalli fajtorë dhe i dënoi me 10 vjet e 3 muaj burigm (së bashku): Pal Lekajn, Eset Berishën, Nebih Shatrin dhe Besim Tahirin për rastin e njohur si “53-milionëshi”.

Sipas aktgjykimit të Themelores, Pal Lekaj u dënua me 3 vite e 8 muaj burgim efektiv. Ndaj tij, gjykata shpalli edhe dënim plotësues, ndalimi i ushtrimit të funksionit publik në administratë publike ose në shërbimin publik në kohëzgjatje prej 3 vite e 6 muaj.

Nebih Shatri u dënua me 1 vit e 8 muaj burgim, kurse Besim Tahiri u dënua me 1 vit e 8 muaj burgim. Ndaj tyre u shpall edhe dënim plotësues, ndalim i ushtrimit të funksionit publik në administratë publike ose në shërbimin publik në kohëzgjatje prej 2 vitesh.

Ndërsa, Eset Berisha u dënua me 3 vite e 3 muaj burgim.Po ashtu, ndaj Berishës u shpall edhe dënimi plotësues ndalimi i ushtrimit të funksionit publik në administratë publike ose në shërbimin publik në kohëzgjatje prej 3 vitesh.

Por, Gjykata e Apelit e ka kthyer në rigjykim rastin ndaj Pal Lekajt, Eset Berishës, Nebih Shatrit dhe Besim Tahirit,“Betimi për Drejtësi” kishte raportuar lidhur me përmbajtjen e vendimi të plotë të përpiluar nga Themelorja në Prishtinë, duke publikuar gjetjet e gjykatës nga mbrojtja e të akuzuarve dhe gjetjet nga deklaratat e dëshmitarëve.

Po ashtu, edhe për gjetjet e Apelit.Sipas aktakuzës së ngritur më 4 shkurt 2022 nga Prokuroria Speciale e Republikës së Kosovës, Pal Lekaj, në cilësinë e ministrit të Ministrisë së Infrastrukturës (MI), Eset Berisha, këshilltar i lartë politik i tij, Nebih Shatri, si sekretar i Përgjithshëm në këtë ministri, në bashkëveprim dhe me dashje edhe me të pandehurin Besim Tahiri, drejtor i Prokurimit Publik në MI, akuzohen për keqpërdorim të detyrës zyrtare me rastin e ndarjes së 53 milionë eurove për konsorciumin “Bechtel &Enka”, për ndërtimin e autostradës Prishtinë – Hani i Elezit apo e njohur ndryshe si autostrada “Arbën Xhaferi”.