Category: Lajme

Kreu i AAK-së, Ramush Haradinaj ka reaguar pasi KESCO njoftoi se nga nesër do ta blejë pothuaj të gjithë rrymën që nevojiten për konsumatorët pasi KEK është në kolaps.

“Kosova sot flen në thëngjill e s’ka energji.

Sot ranë të gjitha blloqet, aktualisht ka zero prodhim të energjisë elektrike nga KEK. Kjo nuk është rastësi, është rezultat i një kolapsi të qëllimshëm, i diktuar nga direktiva politike dhe i ushqyer nga pazaret e tuxharëve të mafisë energjetike, të cilët sot kontrollojnë tregtinë me rrymë”, ka shkruar Haradinaj.

“Të njëjtët që sot i lanë qytetarët pa energji, dikur krenoheshin se e kishin ndalur ndërtimin e Termocentralit Kosova C dhe se kishin refuzuar gazsjellësin amerikan. I ndalën projektet strategjike për shtetin, për të hapur rrugën e abuzimit dhe të pasurimit për një grusht njerëzish të lidhur me qeverinë” ka thënë tutje ai.

Haradinaj ka thënë se pushteti po hetohet, por tashmë ka theksuar se përgjegjësit dihen.

“Prokuroria dhe do të hetojë dhe gjejë gjithçka, por një dihet; se ky është krim që i është bërë këtij vendi dhe askush nuk duhet të shkojë në përgjegjësi para Kryeministrit në detyrë”, ka thënë ai.

LEXONI EDHE:

Hoti: Kriza energjetike po dëmton rëndë ekonominë

Deputeti i Lidhjes Demokratike të Kosovës, Avdullah Hoti, ka kritikuar mosveprimin institucional përballë krizës energjetike në vend, duke paralajmëruar pasoja të mëdha për prodhuesit kosovarë.

Ai tha se mungesa e energjisë dhe çmimet e larta po e dëmtojnë ekonominë, ndërsa tenderët për rregullimin e termocentraleve po vonohen me vite.

Sipas tij, anulimi i projektit për centralin me gaz dhe mungesa e kushteve për tregun e hapur energjetik, rrezikojnë mbylljen e bizneseve dhe humbjen e mijëra vendeve të punës.

LEXONII EDHE:

Furnizimi energjetik në rrezik – KESCO bën thirrje për kursim

Nesër, më 21 qershor 2025, me fillim nga ora 10:00, do të mbahet Provimi i Maturës Shtetërore në të gjitha komunat e vendit. Lajmin e ka bërë të ditur Ministria e Arsimit, Shkencës, Teknologjisë dhe Inovacionit (MAShTI), duke njoftuar se në këtë provim do të marrin pjesë 18.800 maturantë nga i gjithë vendi.

MAShTI ka siguruar se janë ndërmarrë të gjitha masat për një proces të qetë dhe korrekt, përfshirë angazhimin e trupave mbikëqyrës, ekspertëve të IT-së dhe ekipeve lëvizëse, që do të monitorojnë vazhdimisht rrjedhën e testimit.

Në njoftim, MAShTI i ka bërë thirrje maturantëve që të respektojnë rregullat e përcaktuara – veçanërisht ndalimin e telefonave dhe pajisjeve të tjera elektronike brenda qendrave të testimit. Ata që do të tentojnë të hyjnë me pajisje të tilla nuk do të lejohen të marrin pjesë në provim.

Gjithashtu, MAShTI ka bërë të ditur se hyrja në qendrat e testimit do të mbyllet në ora 10:00, dhe pas kësaj ore nuk do të lejohet hyrja e asnjë personi të paautorizuar deri në përfundimin e testit.

“Çdo përpjekje për të dëmtuar apo shkelur rregullat e përcaktuara do të trajtohet me masa të menjëhershme ligjore,” thuhet në njoftim në Facebook.

Rezultatet e provimit pritet të publikohen më së largu deri më 30 qershor 2025, ndërsa MAShTI ka uruar të gjithë maturantët për sukses në këtë fazë të rëndësishme të arsimit.

Presidenti i Turqisë, Recep Tayyip Erdogan, ka paralajmëruar për pasojat e rënda që mund të sjellë konflikti mes Iranit dhe Izraelit, duke theksuar se një përshkallëzim i mëtejmë i situatës mund të shkaktojë një valë të madhe migrimi drejt Evropës.

Gjatë një bisede me liderin e partisë opozitare gjermane CDU, Friedrich Merz, Erdogan u shpreh se kriza në Lindjen e Mesme nuk është kërcënim vetëm për rajonin, por edhe për kontinentin evropian.

Sipas Anadolu Agency, Erdogan ka theksuar: “Konflikti mund të shkaktojë një rritje të madhe të migracionit që do të prekte Evropën dhe rajonin.”

Ai gjithashtu ka paralajmëruar për një tjetër rrezik të mundshëm, duke shtuar: “Spirali i dhunës i nxitur nga sulmet e Izraelit mund të dëmtojë rajonin dhe Evropën, si në aspektin e migrimit, ashtu edhe për mundësinë e rrjedhjes bërthamore.”

Këto deklarata vijnë në një kohë kur tensionet mes Izraelit dhe Iranit janë në rritje, ndërsa komuniteti ndërkombëtar po rrit përpjekjet për të shmangur një konflikt të hapur rajonal me pasoja globale.

Inspektoratit Policor i Kosovës (IPK) ka filluar sipas detyrës zyrtare një hetim preliminar pas pranimit të informacioneve nga mediat për një rast ku dyshohej se ishin përshirë dy zyrtarë policorë (një nënkolonel dhe një kapiten policor) në Drejtorinë Rajonale të Pejës.

Sipas njoftimit, hetuesit e IPK menjëherë i janë përgjigjur rastit dhe kanë ndërmarre veprime paraprake hetimore në konsultim me Prokurorinë e Shtetit.

“Pas ndërmarrjes dhe veprime paraprake, dyshohet se dy zyrtarët policorë janë të dyshuar për veprën penale “Keqpërdorim i pozitës apo autoritetit zyrtar”, thuhet në njoftim.

Sipas IPK-së “Incidenti fillestar raportohet të ketë ndodhur më 28.05.2025 kur disa zyrtarë policorë në Pejë ishin njoftuar për një aksident trafiku në rrugën “Shpëtim Bojku” dhe gjatë këqyrjes së vendit të ngjarjes kanë shoqëruar në stacion policor edhe një të dyshuar i cili nuk ishte përfshirë fare në aksident por që ka penguar zyrtarët policorë në realizimin e detyrave të tyre”.

Po ashtu sipas IPK-së, nënkoloneli dhe kapiteni policor dyshohet se kanë ndërhyrë në këtë rast (shoqërimin e të dyshuarit në stacion) duke mos përcjellë rastin për hetim dhe nuk është njoftuar Prokuroria për rast (në kundërshtim me procedurat standarde të veprimit të policisë në raste të tilla), duke i shqiptuar të dyshuarit një tiketë për kundërvajtje për prishje të rendit dhe qetësisë publike.

“Hetuesit e IPK-së në interes të hetimit kanë rekomanduar suspendimin e dy zyrtarëve policorë (nënkolonelit dhe kapitenit policor) përderisa pritet që në koordinim me Prokurorinë Themelore në Pejë të ndërmerren edhe veprime tjera hetimore drejt ndriçimit të plotë të të gjitha rrethanave që ndërlidhen me këtë rast”, thuhet në njoftim.

Drejtoria rajonale e policisë në Pejë ka shpallur në kërkim 20-vjeçarin Elton Gjevukaj, nga fshati Bllagajë.

Konform ligjit, policia ka publikuar fotografinë dhe përshkrimin e të dyshuarit, duke kërkuar nga qytetarët ndihmë për lokalizimin e tij.

I pandehuri është i kërkuar për veprat penale: “Dhunë nё familje”, “Mbajtje nё pronësi, kontroll dhe posedim i paautorizuar tё armëve, “Përdorim i armës apo mjetit tё rrezikshëm”.

“Policia e Kosovës kërkon nga qytetarët e Republikës së Kosovës që kushdo që ka informacion për vendndodhjen e personit të dyshuar në foton e bashkangjitur, të lajmërojë Policinë e Kosovës apo të lajmërohet në stacionin më të afërt policor”, thuhet në njoftimin e policisë.

Më 18 qershor 2025, Kancelarja e Arsimit në Nju Jork, Melissa Aviles-Ramos, njoftoi se gjuha shqipe është përfshirë zyrtarisht në listën e gjuhëve të përdorura për komunikimet shkollore nga Departamenti i Arsimit të Qytetit, shkruan Gazeta Sinjali.

Nga rreth 180 gjuhë që fliten në Nju Jork, deri tani vetëm 10 ishin pjesë e komunikimeve zyrtare në shkollat publike, ndërsa me vendimin e fundit, ky numër është rritur në 13, duke përfshirë edhe shqipen.

Kjo nismë do të lehtësojë ndjeshëm përfshirjen e familjeve shqiptare në jetën arsimore të fëmijëve të tyre, pasi çdo dokument, njoftim apo informacion i rëndësishëm do të jetë në gjuhën shqipe.

Prej vitesh, shumë prindër shqiptarë hasën vështirësi për shkak të barrierave gjuhësore, por tani do të mund të marrin pjesë më aktivisht dhe me vetëbesim në procesin arsimor.

Kjo përfshirje gjithashtu do të ndihmojë nxënësit shqiptarë që të ndihen të përfshirë dhe të përparojnë më mirë akademikisht dhe emocionalisht.

Përveç këtij vendimi, pak muaj më parë në Nju Jork u hap edhe një klasë e parë dygjuhëshe shqip-anglisht, duke forcuar mundësinë e ruajtjes së trashëgimisë kulturore dhe avancimit akademik.

Përdorimi i mundshëm i armëve taktike bërthamore nga Shtetet e Bashkuara në Iran do të ishte një zhvillim katastrofik.

Kështu tha zëdhënësi i Kremlinit, Dmitry Peskov, sipas agjencisë shtetërore të lajmeve ruse, Tass.

Peskov komentoi ato që i cilësoi si raportime spekulative mediale lidhur mundësinë e përdorimit të armëve të tilla. Por, zëdhënësi i Kremlinit nuk përmendi se cilat media kanë raportuar për këtë gjë, transmeton Radio Evropa e Lirë.

Gazeta The Guardian ka raportuar se zyrtarët amerikanë të mbrojtjes janë informuar se përdorimi i bombave konvencionale kundër ndërtesës nëntokësore për pasurimin e uraniumit Fordo në Iran, nuk do të mjaftonte për ta shkatërruar plotësisht këtë impiant. Sipas gazetës, për shkatërrimin e këtij centrali do të kërkohej që të kryheshin sulme, fillimisht me bomba konvencionale, e më pas bombarduesit B-2 do të mund të lëshonin armë taktike bërthamore.

Megjithatë, gazeta britanike tha se presidenti amerikan, Donald Trump, nuk po e shqyrton përdorimin e një arme taktike bërthamore në Fordo dhe se kjo mundësi nuk është paraqitur nga sekretari amerikan i Mbrojtjes, Pete Hegseth, dhe shefi i Shtabit të Përgjithshëm, gjenerali Dan Caine, gjatë takimeve në Shtëpinë e Bardhë.

Trump tha të enjten se çdo vendim për përfshirjen e mundshme të SHBA-së në konfliktin mes Izraelit dhe Iranit do të merret brenda dy javësh.

Rusia, e cila ka lidhje të ngushta me Iranin, ka paralajmëruar ashpër kundër një ndërhyrjeje ushtarake të SHBA-së në anën e Izraelit./REL