Category: Lajme

Ushtria izraelite tha se do të hapë një rrugë të re të përkohshme më 17 shtator, për t’iu mundësuar banorëve që të largohen nga Qyteti i Gazës, një ditë pasi nisi një ofensivë të madhe që synon shkatërrimin e Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian.

Ushtria izraelite nisi bombardime masive në Qytetin e Gazës mëngjesin e së martës dhe çoi trupat më thellë brenda qendrës më të madhe urbane në Rripin e Gazës.

Ofensiva vjen pasi një hetim i kryer nga Kombet e Bashkuara e akuzoi Izraelin për kryerje “të gjenocidit” në territorin palestinez, duke thënë se kryeministri izraelit, Benjamin Netanyahu, dhe zyrtarë të tjerë të lartë kanë nxitur këtë krim, transmeton Radio Evropa e Lirë.

Të mërkurën, ushtria izraelite tha se po hap “një rrugë të përkohshme transporti përmes rrugës Salah al-Din”.

Zëdhënësi i ushtrisë izraelite, koloneli Avichay Adraee, tha se korridori do të mbetet i hapur vetëm për 48 orë duke nisur nga mesnata e së enjtes, sipas kohës lokale.

Deri më tani, ushtria u kishte bërë thirrje banorëve që të largoheshin nga Qyteti i Gazës përmes rrugës buzë detit drejt asaj që e cilëson si “zonë humanitare” më në jug, përfshirë pjesë të Al-Mavasit.

Rruga Salah al-Din kalon përmes Rripit të Gazës nga veriu në jug.

Në gusht, OKB-ja vlerësoi se afër 1 milion banorë jetojnë në Qytetin e Gazës dhe rrethinën e qytetit.

Izraeli tha se ofensiva tokësore e nisur të martën synon që të largojë Hamasin nga një prej bastioneve të tij të fundit në Rripin e Gazës.

Lufta në Gazë nisi pasi Hamasi sulmoi jugun e Izraelit më 7 tetor 2023, duke vrarë afër 1.200 persona dhe duke rrëmbyer 251 të tjerë.

Ofensiva hakmarrëse e Izraelit ka vrarë më shumë se 64.000 palestinezë, sipas Ministrisë së Shëndetësisë në Gazë – shifra që konsiderohen të besueshme nga OKB-ja./REL

Instituti Hidrometeorologjik bën të ditur se sot do të mbajë mot me diell dhe vranësira.

IHK njofton se temperaturat minimale do të lëvizin ndërmjet 10-13°C, ndërsa maksimalet nga 20-22°C.

Era do të fryjë kryesisht nga veriperëndimi, e lehtë deri mesatare.

Përgatiti: Pranvera Krasniqi

Djalit të Feti e Lutfije Musliut, Lulzimit, kënga për atdheun iu ndalë më 13 prill, 1999.

Atë ditë lufte, të birin 11 vjeç ia vranë mizorisht forcat serbe në Llashticë të Gjilanit, teksa ruante bagëtinë.

Pas tre muajsh, Lulin e kishin gjetur ne një kodrinë.

Lirinë qe se pati Luli tashmë e gëzon çobani Hafiz Veseli.

Ky thotë se saherë lëshon bagëtinë për kullosje i kujtohet 11 vjeçari, por edhe shumë te tjerë që u vranë fushave.

Luli është ne mesin e 28 të vrarëve në Llashticë.

Nën dyshimet për pjesëmarrje në këtë masakër, të hënën u arrestua N.D, në pikëkalimin Dheu i Bardhë.

Emri i tij i plotë ende s’është bërë publik por në bazë të inicialeve, banorët thonë se mund të jetë serbi Dragan Nikoliq nga fshati Pasjanë. Nofka e tij, Roki, thonë se u dëgjua shpesh më fshat.

D.N., dyshohet se gjatë luftës në Kosovë, në periudhën nga 13 prilli deri më 30 prill 1999, në bashkëkryerje me pjesëtarë të forcave policore dhe ushtarake serbe, ka marrë pjesë në vrasjen e 25 civilëve shqiptarë.

Të mërkurën pritet të mbahet seanca për caktimin e masës së paraburgimit.

Më shumë detaje i gjeni në Edicionin Qendror të lajmeve në ATV, në videon më poshtë:

Përgatiti: Pranvera Krasniqi

Qe pesë ditë, ekskavatorët po punojnë pa ndalë ne Kozhlje të Novi Pazarit në Serbi, që të depërtojnë në një pjesë ku dyshohet se ka mbetje mortore, nga lufta e fundit në Kosovë.

Tereni është shumë i vështirë, andaj komisionin qeveritar thotë se nevojitet ende kohë të arrihet në perimetrin e dyshimtë.

Ditëve në vijim pritet të gërmohet edhe ne disa lokacione të tjera.

Autoritetet kosovare në vazhdimësi e kanë akuzuar Serbinë për pengim të procesit të gjetjes së mbetjeve mortore të të zhdukurve. Madje edhe në takimin e fundit në Bruksel, mes kryenegociatorëve, palët patën përplasje për dokumentin të cilin veçse ishin pajtuar në fund të vitit të kaluar.

Më shumë detaje i gjeni në Edicionin Qendror të lajmeve në ATV, në videon më poshtë:

Përgatiti: Armand Hoti

Prokuroria Themelore në Ferizaj, ka dorëzuar kërkesë për paraburgim ndaj të dyshuarit për vrasjen që ndodhi të hënën mbrëma, në fshatin Balaj të Ferizajt.

“Prokuroria Themelore në Ferizaj, njofton opinionin publik se ka kërkuar nga Gjykata Themelore në Ferizaj, caktimin e masës së paraburgimit në afat prej 30 ditësh ndaj të dyshuarit B.R, nga komuna e Ferizajt, për shkak të dyshimit të veprës penale “Vrasja e rëndë” sipas Kodit Penal të Republikës së Kosovës”, thuhet në njoftimin nga Prokuroria Themelore në Ferizaj.

Referuar kërkesës, vrasja ndodhi për shkaqe pronësore.

Prokuroria kumtoi se i dyshuari dhe viktima, kanë lidhje gjaku.

“I pandehuri me dashje e ka privuar nga jeta të dëmtuarin – djalin e axhës se tij, I.R., në atë mënyrë që pas një mosmarrëveshje te mëhershme qe kishin pasur si pasoje e problemeve në lidhje me një konflikt pronësor, me t’u takuar ne rrugën e fshatit me njeri-tjetrin, pas fjalosjes verbale, në atë moment i pandehuri B.R., e nxjerr revolen e tipit ZIG 14 TISAS dhe shtënë katër herë në drejtim të viktimës I.R., duke e goditur në pjesët e sipërme të trupit, me ç’rast viktima nga lëndimet e shkaktuara nga arma e zjarrit ka ndërruar jetë rrugës duke e dërguar për në Qendrën Emergjente”, thuhet më tej në njoftimin nga Prokuroria Themelore në Ferizaj.

Pas aktit, i dyshuari thirri policinë dhe i njoftoi për lokacionin e tij.

Autoritetet e gjetën armën me të cilën dyshojnë se u krye krimi, në oborrin e të dyshuarit.

“Nga hetuesit dhe krimteknikët është kryer ekzaminimi i vendit të ngjarjes, ndërsa edhe i trupit të viktimës, si dhe janë intervistuar dëshmitarët. Në vendin e ngjarjes janë gjetur katër (4) gëzhoja, ndërsa në oborrin e shtëpisë së të dyshuarit është gjetur arma e zjarrit (pistoletë), me të cilën dyshohet se është kryer vrasja”, thuhet në njoftimin nga Policia.

Në shtëpinë e tij, u gjetën edhe një pushkë gjuetie me 72 fishekë si dhe një pushkë ajrore.

Trupi i pajetë i viktimës, është dërguar për obduksion në Institutin e Mjekësisë Ligjore.

Më shumë detaje i gjeni në Edicionin Qendror të lajmeve në ATV, në videon më poshtë:

Përgatiti: Diellëza Krasniqi

E shoqëruar me masa të rrepta të Policisë dhe me pranga në duar, serbja Jelena Gjukanoviç u soll të martën në Gjykatën Themelore të Prishtinës.

Në seancën fillestare, Prokurori Special, Bekim Kodraliu, deklaroi se Gjukanoviç akuzohet për spiunazh në bashkëpunim me një person tjetër, i cili po ashtu është nën hetime.

‘’Me vetëdije të plotë dhe me dashje direkte ka kryer veprime të përsëritura që përbëjnë ndihmë aktive për veprimtarinë informative të një shërbimi të huaj, konkretisht të Agjencisë për Inteligjencë dhe Siguri të Republikës së Serbisë (e njohur si BIA), duke i ofruar të dhëna, dokumente dhe informacione të ndjeshme, të siguruara gjatë ushtrimit të detyrës së saj zyrtare në kuadër të aktivitetit të Misionit të OSBE-së’’, tha Kodraliu.

Sipas aktakuzës, informatat e transmetuara janë dërguar tek zyrtarë të lartë të BIA-së, përfshirë Aleksandër Vlajiqin përgjegjës për Novi Pazarin dhe një tjetër zyrtar të këtij shërbimi, me të cilin dyshohet se ajo zhvilloi takime në Beograd.

Me këto veprime Gjukanoviq ka cenuar rëndë rendin kushtetues dhe sigurinë kombëtare dhe ka vënë në rrezik serioz jetën dhe sigurinë personale të zyrtarëve shtetërorë, qytetarëve të vendit si dhe personelit ndërkombëtar të Misionit të OSBE-së në Kosovë”, tha Kodraliu.

Karshi aktakuzës së Prokurorisë, Gjukanivic u deklarua e pafajshme.

Gjykatësi Rrahman Beqiri informoi të akuzuarën Jelena Gjukanoviq dhe avokatin e saj, Predrag Milkoviq, se brenda një afati prej 15 ditësh kanë të drejtë të paraqesin kundërshtimet e tyre ndaj provave si dhe të dorëzojnë kërkesë për hedhjen e aktakuzës.

Avokati mbrojtës, Predrag Milkoviq, i kërkoi trupit gjykues që të rishqyrtojë masën e paraburgimit ndaj të akuzuarës.

Por kërkesën e mbrotjes e kundërshtoi Prokurori Kordaliu, me arsyetimin se ekziston rreziku i ikjes ose përsëritjes së veprës.

Për këtë kërkesë, kryetari i trupit gjykues, Rrahman Beqiri, tha se do të vendosë me aktvendim të veçantë.

Gjukanoviq, nga Mitrovica e Veriut, punonjëse e Organizatës për Siguri dhe Bashkëpunim në Evropë, u arrestua më 28 shkurt në pikën kufitare të Jarinjës, në veri të Kosovës, dhe prej asaj kohe ndodhet në paraburgim.

Më shumë detaje i gjeni në Edicionin Qendror të lajmeve në ATV, në videon më poshtë:

Përgatiti: Arian Hajdaraj

Nga Zvicra, Salih Bislimi erdhi në Hagë për të protestuar të dielën.

Por, veprimtari nuk e la me kaq, ai mori leje nga Gjykata, për ta përcjellë edhe gjykimin nga afër, për dy ditë me radhë.

Kështu, ky dëgjoi nga afër edhe dëshminë e James Rubinit, e cila i ka lenë jo pak mbresa.

“James rubin është një hero i kosoves. Ne mënyrë shume konkrete shpjegoi rolin e Thacit, dhe u distancu nga akuzat. Sot e dje u konststu se aktakuzat janë të pabaza”, tha Bislimi.

Bazuar në këtë dëshmi, Bislimi, me prejardhje nga Kamenica beson se ish-liderët e UÇK-së do dalin faqebardhe nga ky proces.

“Unë mendoj që tash jemi në fund të tunelit dhe po e shohim dritën. Dhe se shpejti besoj se do vjen edhe liria per udheheqesit tanë (Thaci).”, tha Bislimi.

Por derisa të krijohen kushtet qe t’i takojë fizikisht ata që i vlerëson shumë, Bislimi e shfrytëzoi rastin të paktën t’i përshëndetë nga dhoma që i ndante vetëm një xham.

“Unë e krijova një emocion sepse i përshëndeta të gjithë me dorë me shume respekt dhe dashuri”, shtoi Bislimi.

Përveç Bislimit, seancën e parë e kanë përcjellë nga galeria më shumë se 30 persona, ndërsa ne te dytën, kishte diçka më pak.

Më shumë detaje i gjeni në Edicionin Qendror të lajmeve në ATV, në videon më poshtë: