ATV

Category: Lajme

  • Rubin: Demaçi tha “o pavarësi, o të vdesim të gjithë”

    Rubin: Demaçi tha “o pavarësi, o të vdesim të gjithë”

    Për veprimtarin politik Adem Demaçi, James Rubin tha se pati një telefonatë të ashpër me Madeleine Albright, ku kishte thënë se ose do bëhej pavarësia ose do të vdisnin të gjithë.

    Përpara kësaj, Rubin ka thënë se pas Rambujesë me Madeleine Albright e kishin thirrur Adem Demaçin se mendonin që kishte influencë mbi Thaçin dhe jo anasjelltas, raporton “Betimi për Drejtësi”.

    Më pas, dëshmitarit iu prezantua një dokument i cili tregohej se ishte i Albrightit lidhur me bisedat që ajo i ka pasur me Adem Demaçin, ndaj të cilit ishte kërkuar që ’a mbështeste Thaçin.

    “Ai (Demaçi) tha se nuk më intereson se sa njerëz vdesin. Ka qenë biseda më e egër që kam dëgjuar ndonjëherë“, e kishte përshkruar Albright bisedën me Adem Demaçin.

    Dëshmitari tha se ka qenë i pranishëm kur ka ndodhur kjo bisedë telefonike.

    “Më kujtohet shumë mirë por na u duk se ishte një person që kishte autoritet jo fizik apo vertikal, por ideologjik. Hashim Thaçi mendonte se kishte nevojë për një person si Adem Demaçi që ta shtynim pak çështjen e pavarësisë. Ai nuk ka thënë që nuk duam pavarësi, por jo tani në këto momente dhe ai donte të tregonte se çështjen e pavarësisë mund ta diskojmë pak më vonë. Demaçi thoshte o pavarësi o le të vdesim”, tha Rubin.

    Rubin tha se sipas tij, kjo ishte shenjë që Thaçi kishte nevojë për Demaçin.

    “Sipas meje kjo ishte një shenjë që Thaçi kishte nevojë që Demaçi të thoshte që ta shtyjmë pak më vonë çështjen e pavarësisë. Prandaj, zoti Demaçi ishte eprori i tij nga vendimmarrja në këtë grup. Ai kishte nevojë për mbështetje ideologjike nga themeluesi apo personi kryesor ideologjik”, tha ai.

    James Rubin tha se kjo fjalë ‘o pavarësi, o do të vdesim të gjithë”, iu u duk e egër.

    “…dhe u përmend fjala ‘i etur për gjak”./ATVLIVE/

  • Hetuesit e OKB-së pretendojnë se Izraeli ka kryer gjenocid në Gaza

    Hetuesit e OKB-së pretendojnë se Izraeli ka kryer gjenocid në Gaza

    Hetuesit e Kombeve të Bashkuara akuzuan më 16 shtator Izraelin se ka kryer gjenocid në Rripin e Gazës me qëllim të “shkatërrimit të palestinezëve” dhe fajësuan kryeministrin izraelit dhe zyrtarë të tjerë të lartë për nxitje.

    Komisioni i Pavarur Ndërkombëtar i Hetimit i OKB-së (COI) – i cili nuk vepron në emër të organizatës botërore – konstatoi se “gjenocidi po ndodh në Gaza dhe vazhdon të ndodhë”, tha për agjencinë AFP kryetarja e komisionit, Navi Pillay.

    “Përgjegjësia bie mbi shtetin e Izraelit”, theksoi ajo.

    Komisioni, i ngarkuar të hetojë shkeljet e të drejtave në territoret palestineze të okupuara, publikoi raportin e tij më të fundit pothuajse dy vjet pas shpërthimit të luftës në Gaza, që nisi pas sulmit vdekjeprurës të Hamasit më 7 tetor 2023 brenda Izraelit.

    Shtetet e Bashkuara dhe Bashkimi Evropian e konsiderojnë Hamasin organizatë terroriste.

  • Uji nga Badoci ende nuk është i pijshëm, Mjeku: Niveli i manganit mbetet i lartë, pritet përmirësim i shpejtë i gjendjes

    Uji nga Badoci ende nuk është i pijshëm, Mjeku: Niveli i manganit mbetet i lartë, pritet përmirësim i shpejtë i gjendjes

    Niveli i manganit në ujin e Liqenit të Badocit vazhdon të jetë i lartë, duke pamundësuar furnizimin me ujë të pijshëm për qytetarët e Prishtinës dhe rrethinës.

    Mes shqetësimeve të qytetarëve, zëdhënësja e KRU “Prishtina”, Arjeta Mjeku, ka thënë për Telegrafin se janë duke u bërë përpjekje maksimale që gjendja të normalizohet sa më shpejt.

    “Analizat e fundit laboratorike tregojnë tendencë në rritje të përqendrimit të manganit si në ujin e liqenit, ashtu edhe në rrjetin shpërndarës. Edhe pse këto vlera e tejkalojnë kufirin e paraparë në Udhëzimin Administrativ nr. 10/2021. Cilësia e ujit për konsum nga njeriu, deri më sot ato nuk e kanë tejkaluar standardin shëndetësor që konsiderohet se mund të ndikojë shëndetin e njeriut”, tha Mjeku për Telegrafin.

    Ajo shtoi se as vlimi i ujit nuk e eliminon manganin.

    “Ndotja e ujit me mangan është ndotje kimike dhe se vlimi i ujit nuk e eliminon manganin. Uji mund të përdoret vetëm për pastrim, mirëmbajtjen e higjienës personale dhe të ambienteve të banimit”, potencoi Mjeku.

    Duke folur për masat që ka ndërmarrë kompania, ajo theksoi: “KRU ‘Prishtina’ ka ndërmarrë menjëherë masat e nevojshme duke zvogëluar sasinë e prodhimit për të ruajtur cilësinë e furnizimit, si dhe ka intensifikuar proceset e shpëlarjes së rrjetit shpërndarës, përfshirë edhe gypat magjistral dhe sekondar. Gjithashtu, për të siguruar furnizim të pandërprerë me ujë të pijshëm për zonat e prekura, KRU ‘Prishtina’ do të ofrojë ujë përmes autoboteve, në përputhje me orarin e përcaktuar dhe të prezantuar nga kompania”.

    Qytetarët tashmë janë njoftuar nga KRU “Prishtina” se janë në dispozicion autobotët që do t’u ofrojnë ujë të pijshëm sipas orareve që kanë publikuar në faqen e tyre zyrtare në Facebook.

    Në fund, Mjeku shprehu pritjen se gjendja do të përmirësohet së shpejti.

    “Gjendja pritet shpejt të përmirësohet, me uljen e temperaturave gjatë ditëve në vijim”, potencoi ajo.

    Ky fenomen, i cili u shfaq në fillim të shtatorit, ka prekur disa lagje të Prishtinës, Graçanicës, Hajvalisë, Veternikut, Matiqanit, Bregut të Diellit dhe zona të tjera që furnizohen nga Liqeni i Badocit.

  • Forcat Ushtarake Policore të KFOR-it me ushtrim të përbashkët zjarri në Kampin Bondsteel

    Forcat Ushtarake Policore të KFOR-it me ushtrim të përbashkët zjarri në Kampin Bondsteel

    Forcat Ushtarake Policore nga Shtetet e Bashkuara të Amerikës, Gjermania, Mbretëria e Bashkuar, Austria dhe Zvicra, të caktuara në Komandën Rajonale Lindje të misionit të udhëhequr nga NATO në Kosovë (KFOR), zhvilluan një ushtrim të përbashkët me armë zjarri në poligonin e Kampit Bondsteel.

    Siç thuhet në postimin e KFOR-it në Facebook, njësitë shumëkombëshe përdorën pistoletën shërbyese M17 për të ruajtur saktësinë, shpejtësinë dhe koordinimin taktik, duke forcuar njëkohësisht aftësitë e tyre në qitje dhe përgatitjen operacionale.

    Ushtrime të tilla, thuhet se shërbejnë për të forcuar ndërveprimin dhe bashkëpunimin profesional mes partnerëve të NATO-s, duke ndihmuar në rritjen e gatishmërisë për të reaguar në mënyrë efektive në çdo situatë të mundshme.

    “KFOR vazhdon të zbatojë mandatin e tij, i bazuar në Rezolutën 1244 të Këshillit të Sigurimit të Kombeve të Bashkuara të vitit 1999, për të kontribuar në një ambient të sigurt dhe të qetë për të gjithë njerëzit dhe komunitetet që jetojnë në Kosovë, si dhe për të siguruar lirinë e lëvizjes, në çdo kohë dhe në mënyrë të paanshme. KFOR bashkëpunon ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në rolet e tyre përkatëse si përgjegjës për sigurinë”.

  • Rubin: E padrejtë mbajtja pesëvjeçare në paraburgim e të akuzuarve që u dorëzuan vullnetarisht

    Rubin: E padrejtë mbajtja pesëvjeçare në paraburgim e të akuzuarve që u dorëzuan vullnetarisht

    James Rubin tregoi arsyet pse ai ka refuzuar të jetë dëshmitar i Prokurorisë në rastin gjyqësor ndaj Hashim Thaçit dhe të tjerëve, duke thënë se kjo ka të bëjë me pikëpamjet e tij për Gjykatën Speciale.

    Ai e quajti të padrejtë mbajtjen për pesë vjet në paraburgim të të akuzuarve, të cilët, sipas tij, u dorëzuan vullnetarisht.

    “Janë dorëzuar vullnetarisht dhe kanë bashkëpunuar me Prokurorinë, s’e kuptoj pse kanë qëndruar kaq gjatë në burg, kjo më shqetëson”, tha ai.

    Sipas Rubinit, kjo s’ka të bëjë me shtetin e së drejtës dhe, sipas tij, Madeleine Albright nuk ka pasur këtë në mendje kur ka formuar Tribunalin e Hagës për ish-Jugosllavinë.

    “Kjo ka qenë e gabuar, kjo nuk është drejtësi”, shtoi ai.

    “Mua kjo më është dukur si fajësim politik, për shkak se Hashim Thaçi ka qenë udhëheqës i UÇK-së”.

  • Osmani pret kryediplomaten franceze, flasin për zhvillimet e fundit në Kosovë

    Osmani pret kryediplomaten franceze, flasin për zhvillimet e fundit në Kosovë

    Presidentja e Republikës së Kosovës, Vjosa Osmani, ka mirëpritur sot në Prishtinë Ministren e Jashtme të Finlandës, njëherësh Kryesuese aktuale të OSBE-së, Elina Valtonen.

    Gjatë takimit, Presidentja Osmani shprehu mirënjohjen për mbështetjen e vazhdueshme të Finlandës ndaj Kosovës në çdo etapë të zhvillimit të saj, duke theksuar rëndësinë e kësaj përkrahjeje edhe në rrugëtimin euroatlantik të vendit.

    “Është kënaqësi ta mirëpres sërish në Kosovë znj. Valtonen. E falënderova për mbështetjen që Finlanda i ka dhënë vendit tonë ndër vite. Diskutuam për zhvillimet më të fundit në Kosovë, për rolin që OSBE-ja ka pasur ndër vite dhe për prioritetet aktuale të kësaj organizate në vendin tonë”, u shpreh Presidentja Osmani.

    Takimi u fokusua gjithashtu në rëndësinë e bashkëpunimit me OSBE-në dhe në avancimin e objektivave të përbashkëta për stabilitet dhe zhvillim demokratik në rajon.

  • Rubin: Raportet e OKB-së shpesh nuk pasqyronin saktë situatën në Kosovë

    Rubin: Raportet e OKB-së shpesh nuk pasqyronin saktë situatën në Kosovë

    Ish-zyrtari i lartë amerikan, James Rubin, u pyet në Gjykatën Speciale nëse ishte në dijeni për një raport të vitit 1998 të Organizatës së Kombeve të Bashkuara (OKB), ku flitej për gjoja rrëmbimin e civilëve serbë, shqiptarë dhe romë, dhe të oficerëve të policisë serbe, nga njerëz që besohej se i përkisnin UÇK-së.

    “Kam lexuar një raport të OKB-së për Kosovën, por kam qenë shumë skeptik për atë raport”, është shprehur Rubin.

    “Sepse, organet e OKB-së nuk e kanë përshkruar shumë mirë situatën shumë shpesh”, ka thënë ai.

    “Pra, kam qenë në dijeni të raportimit prej OKB-së, por jo domosdoshmërisht ka qenë i besueshëm raporti”, ka shtuar Rubin.

    Ai ka thënë se raportet e Kryqit të Kuq i konsideronte më të besueshme.

    Më herët, Rubin pohoi se mund të jetë në dijeni të raporteve nga Departamenti amerikan i Shtetit, të cilat shkruanin se UÇK-ja ishte përgjegjëse për vrasje, ndalime, rrëmbime edhe të civilve shqiptarë.

    Prokurori e pyeti për disa artikuj specifikë në gazetat e asaj kohe për vrasje dhe arrestime të disa individëve.

    Megjithëse ai shtoi se nuk i kujtohen raste specifike që janë shkruar në raprote apo në mediat ndërkombëtare pas më shumë se 20 vjetësh.

  • “Lojëra për të na dëmtuar”: Avokati i Thaçit alarmon se Prokuroria i ‘fshehu’ disa prova të rëndësishme për dëshmitarët e parë

    “Lojëra për të na dëmtuar”: Avokati i Thaçit alarmon se Prokuroria i ‘fshehu’ disa prova të rëndësishme për dëshmitarët e parë

    Akuza për taktizime, tentim-pengimi të mbrojtjes e lojëra në procesin gjyqësor, ka adresuar avokati i Hashim Thaçit, Luka Misetiq, në drejtim të Prokurorisë së Specializuar në Hagë.

    Në një parashtresë urgjente të publikuar së fundmi në faqen e Gjykatës Speciale e cila mban datën 13 shtator, Misetiq ka bërë të ditur se Prokuroria e Hagës, ka mbajtur të fshehta dokumentacione të cilat me parimet bazë në drejtësi, e ka pasur obligim t’ia dorëzojë mbrojtjes së Thaçit.

    Fjala është për dëshmitarët e parë të Thaçit, James Rubin dhe të tjerë, ku Prokuroria e Hagës, nuk ka dorëzuar disa dokumentacione me rëndësi për mbrojtjen, raporton gazeta Nacionale.

    “Vendimet taktike të miratuara nga ZPS-ja në prag të çështjes së Mbrojtjes kanë pasoja. Pajtueshmëria me kuadrin e zbulimit të Dhomës së Specializuar është një aspekt integral i një gjykimi të drejtë. Shkeljet kanë shkaktuar dëm në përgatitjen e Mbrojtjes. Mbrojtja nuk duhet të detyrohet të ridrejtojë burimet drejt rigjykimit të shkeljeve të zbulimit të ZPS-së në këtë fazë të vonë të gjykimit. Lojërat e vazhdueshme të ZPS-së padyshim që do të nxisin kërkesat e Mbrojtjes për shtyrjen e procedurave dhe përjashtimin e provave, dhe do të rrezikojnë paraqitjen në kohë të çështjes së Mbrojtjes. Rregulli 110 autorizon një Trup Gjykues të marrë masa pas mosrespektimit të detyrimeve të zbulimit nga një palë. Si i tillë, Mbrojtja bën kërkesën e tanishme për urdhrat e përcaktuar më poshtë në mënyrë që të sigurohet që kjo të mos ndodhë përsëri”, thuhet në kërkesën e avokatit Misetiq, raporton Nacionale.

    Por, cila është historia e këtij zhvillimi?

    Prokuroria e Specializuar e Hagës, me Rregulloren për Procedura dhe Prova, e ka obligim t’ia paraqesë mbrojtjes të gjithë dokumentet relevante për dëshmitarët. Për këtë, mbrojtja e Thaçit në korrik kishte dorëzuar listën me 21 emra për dëshmitarë, duke kërkuar që Prokuroria t’ia ofrojë të gjitha informacionet që ka për këta persona, që synonte t’i ftonte mbrojtja e Thaçit.

    Mes 4 korrikut e 11 shtatorit 2025, Prokuroria kishte zbuluar rreth 500 artikuj e dëshmi të përcaktuara, por një pjesë e tyre u dorëzuan krejtësisht në fund të afatit, kur avokatët e Thaçit veç kishin përfunduar me përgatitjen e dëshmitarëve të parë.

    “Më 12 shtator 2025, Mbrojtja i kërkoi ZPS-së të konfirmonte se të gjitha materialet e zbuluara në përputhje me Rregullën 102(3) që lidhen me 1DW-001 dhe 1DW-003 kishin ardhur në posedim të ZPS-së vetëm që nga 1 shtatori 2025, duke kërkuar që “nëse ndonjë nga materialet ishte në posedim tuaj më herët se ajo datë, ne kërkojmë që ju të zbuloni (1) cilat, nëse ka, nga materialet ishin në posedim tuaj para 4 korrikut 2025; dhe (2) nëse ka ndonjë material që ka ardhur në posedim tuaj midis 4 korrikut 2025 dhe 1 shtatorit 2025”, thuhet në parashtresë.

    Pra, Prokuroria e Hagës kishte pasur këto dokumente qysh më herët, dhe nu kia kishte dorëzuar mbrojtjes së Thaçit.

    “Përgjigja e ZPS-së zbuloi se ka shkelur detyrimin e saj sipas Rregullës 102(3) për të zbuluar dokumente relevante materiale “pa vonesë”. ZPS-ja fillimisht këmbënguli se 34 nga 36 artikujt që lidheshin me 1DW-001 dhe 1DW-003 ishin “të disponueshme publikisht” dhe dy “riprodhonin informacion të disponueshëm publikisht”. ZPS-ja më pas konfirmoi se 24 nga artikujt e disponueshëm publikisht ishin marrë që nga 1 shtatori 2025, dhe 10 të tjerët ishin marrë midis 19 dhe 26 gushtit 2025. Dy artikujt që riprodhojnë informacion të disponueshëm publikisht janë ekstrakte të raporteve nga artikuj të tjerë që ishin në posedim të ZPS-së para 4 korrikut 2025, por ekstraktet përkatëse u regjistruan më pas më 26 gusht 2025”, thuhet më tutje.

    Mbrojtja e Thaçit ka alarmuar se kjo ka qenë taktikë e Prokurorisë që të fitojë avantazh në gjykim.

    “ZPS-ja mbajti zbulimin me qëllim fitimin e një avantazhi në gjyq. Për shembull, ZPS-ja e pyeti gjerësisht 1DW-001 në lidhje me angazhimet e tij me Kosovën dhe përfaqësuesit e qeverisë kosovare që nga viti 1999. 12 Këto lidhje dhe puna e 1DW-001 përshkruhen në disa nga dokumentet e zbuluara në Paketën e Zbulimit 1773, duke përfshirë SPOE00393245-00393267, SPOE40010609-40010632, SPOE40010633-40010643, SPOE40010668-40010708, SPOE40010718-40010719. Të gjitha këto, përveç njërit, ishin në posedim të ZPS-së më 19 gusht 2025; Tjetra u mor më 26 gusht 2025. Të gjitha u përdorën si bazë për pyetjen 1DW-001 më 2 shtator 2025. Asnjëra nuk u zbulua deri më 11 shtator 2025”, thuhet në këtë ankesë.

    “Nuk mund të ketë bazë që ZPS-ja të arrijë në përfundimin se këto materiale ishin të rëndësishme për marrjen në pyetje të 1DW-001 dhe i nënshtroheshin detyrimeve të saj sipas Rregullës 102(3), megjithatë i mbajti ato të fshehura nga Mbrojtja për disa javë derisa i zbuloi përfundimisht vetëm disa ditë para dëshmisë së 1DW-001 dhe vetëm pasi Mbrojtja zbuloi urdhrin e saj të dëshmitarëve për javën e parë të çështjes së Mbrojtjes. Mbrojtja kishte përfunduar tashmë seancën përgatitore të 1DW-003 ditë më parë dhe tani nuk ka aftësi praktike për t’i përdorur ato”, përfundon ankesa.

    Pra, fjala është për prova të rëndësishme lidhur me dëshmitarin James Rubin.

  • E dehur, kanos nënën e saj – arrestohet e dyshuara në Prishtinë

    E dehur, kanos nënën e saj – arrestohet e dyshuara në Prishtinë

    Një rast i rëndë i dhunës në familje ka ndodhur mbrëmë në Prishtinë, ku një vajzë ka kanosur me thikë nënën e saj.

    Sipas raportit të Policisë, rreth orës 20:30 viktima ka raportuar në Polici se është kanosur nga vajza e saj.

    E dyshuara, që sipas nënës kishte konsumuar alkool, ka marrë një thikë kuzhine dhe me të ka kanosur viktimën. Testimi ka treguar se ajo kishte 1.16 promilë alkool në gjak.

    Me rastin është njoftuar Prokurori kujdestar, i cili ka urdhëruar që: rasti të iniciohet si Dhunë në Familje, e dyshuara të mbahet në stacion deri sa të jetë në gjendje të deklarohet, intervistimi i saj të bëhet vetëm në prani të avokatit mbrojtës.

    Hetimet për rastin janë duke vazhduar.

  • “Ishin kushërinj dhe kishin mosmarrëveshje të vazhdueshme” – Detaje nga vrasja e 38-vjeçarit në Ferizaj

    “Ishin kushërinj dhe kishin mosmarrëveshje të vazhdueshme” – Detaje nga vrasja e 38-vjeçarit në Ferizaj

    Policia e Kosovës ka dhënë detaje rreth vrasjes që ka ndodhur të hënën në fshatin Balaj të Ferizajt.

    Në njoftimin e policisë thuhet se vrasja e 38-vjeçarit ka ardhur si pasojë e mosmarrëveshjes së vazhdueshme mes tij dhe të dyshuarit.

    “Më datën 15.09.2025, rreth orës 19:42, Policia Rajonale e Ferizajt ka pranuar një informatë se në fshatin Balaj të Ferizajt ka ndodhur një rast i vrasjes. Menjëherë në vendin e ngjarjes kanë dalë njësitet e stacionit policor të Ferizajt, Njësiti i Reagimit të Shpejtë, hetuesit e Sektorit Rajonal të Hetimeve, si dhe krimteknikët. Po ashtu, në vendngjarje ka dalë edhe Prokurori i Shtetit dhe nën autorizimin e tij kanë nisur hetimet”, thuhet në njoftim.

    Po ashtu, policia thekson se nga hetuesit dhe krimteknikët është kryer ekzaminimi i vendit të ngjarjes, ndërsa edhe i trupit të viktimës, si dhe janë intervistuar dëshmitarët.

    Në vendin e ngjarjes janë gjetur katër (4) gëzhoja, ndërsa në oborrin e shtëpisë së të dyshuarit është gjetur arma e zjarrit (pistoletë), me të cilën dyshohet se është kryer vrasja.

    Gjatë bastisjes së shtëpisë së të dyshuarit janë gjetur dhe konfiskuar edhe: – Një pushkë gjahu me 72 fishekë; një pushkë ajrore.

    “Sipas hetimeve fillestare, vrasja ka ardhur si pasojë e mosmarrëveshjeve të vazhdueshme mes të dyshuarit dhe viktimës, të cilët ishin në lidhje gjaku (kushërinj). Në ditën kritike, pas një fjalosjeje, i dyshuari kishte nxjerrë pistoletën nga brezi dhe kishte shtënë katër herë mbi viktimën”, theksohet mes tjerash në njoftim.

    Pas kryerjes së veprës penale, i dyshuari ka thirrur policinë për rastin dhe vendndodhjen e tij. Ai është arrestuar më pas dhe është shoqëruar në stacionin policor në Ferizaj, në Sektorin Rajonal të Hetimeve.

    Me vendim të Prokurorit të Shtetit, trupi i pajetë i viktimës I.R. (M/K), i lindur në vitin 1987, është dërguar për obduksion në Institutin e Mjekësisë Ligjore në Prishtinë. Ndërsa i dyshuari B.R. (M/K), i lindur në vitin 1974, është ndaluar në mbajtje për 48 orë, për procedura të mëtejme hetimore.