Category: Lajme

Ministri në detyrë i Financave, Hekuran Murati, përmes një postimi në Faceobok ka shkruar se Kosova është ndër vendet më të sigurta për të jetuar, dhe kjo pasqyrohet edhe në raportin më të fundit nga instituti Gallup.

Ai në këtë postim ka thumbuar partitë tjera, duke thënë se këtij lajmi duhet t’i gëzoj edhe ato.

“Kosova është ndër vendet më të sigurta për të jetuar, dhe kjo pasqyrohet edhe në raportin më të fundit nga instituti Gallup. Ky është lajm që do duhej t’i gëzohej edhe opozita”, ka shkruar Murati.

Lëvizja Vetëvendosje përmes një postimi poashtu në Facebook ka shkruar se sipas raportit të organizatës amerikane Gallup “Siguria Globale 2025”, Kosova renditet e 1-ra në Evropë dhe e 3-ta në botë në Indeksin për Ligj dhe Rend, me gjithsej 94/100 pikë.

Policia e Kosovës ka marrë pjesë në Konferencën e 39-të Ndërkombëtare për Zbatimin e Ligjit kundër Drogave (IDEC), të mbajtur në Nashville, Tennessee, në Shtetet e Bashkuara të Amerikës.

Në një njoftim, Policia tha se nga 28 deri më 28 gusht, mori pjesë në këtë ngjarje “me mbështetjen dhe koordinimin e Programit Ndërkombëtar të Ndihmës për Trajnim në Hetimet Penale të Departamentit të Drejtësisë të SHBA-së (DOJ-ICITAP) dhe zyrës së Administratës për Zbatimin e Ligjit kundër Drogave (DEA) në Athinë”.

“Përfaqësues i Policisë së Kosovës ishte z. Reshat Murseli, Drejtor i Drejtorisë për Hetimin e Trafikimit të Narkotikëve (DHTN), dhe tre anëtarë të ekipit të tij hetimor. Pjesëmarrja e tyre u bë e mundur nëpërmjet mbështetjes së vazhdueshme të ICITAP, Ekipit të DEA-s në Athinë, dhe në partneritet me Ambasadën e SHBA-së në Pristinë dhe Byronë e Çështjeve Ndërkombëtare të Narkotikëve dhe Zbatimit të Ligjit (INL), ndihma e së cilës ka qenë instrumentale në forcimin e kapaciteteve të institucioneve të zbatimit të ligjit në Kosovë”, thuhet në njoftimin e Policisë.

Policia e Kosovës tha se në këtë konferencë ku u mblodhën zyrtarë të lartë nga mbi 130 vende, u adresuan kërcënime globale lidhur me disa çështje.

“Me temën “Uniteti Global për një të Ardhme më të Sigurt: Forcimi i Aleancave Kundër Krimit Transnacional”, konferenca mblodhi së bashku zyrtarë të lartë nga mbi 130 vende. Pjesëmarrësit adresuan kërcënimet globale në zhvillim për drogat sintetike, qarkullimi i paligjshëm financiar dhe sfidat më të gjera të krimit të organizuar transnacional”.

Gjatë konferencës, Policia tha se “delegacioni i Kosovës u takua me Administratorin e DEA-s, z. Terrance Cole, dhe ata diskutuan profesionalizmin dhe rolin në rritje të Policisë së Kosovës në bashkëpunimin rajonal dhe ndërkombëtar lidhur me sigurinë”.

“Të dyja palët theksuan rëndësinë e bashkëpunimit të vazhdueshëm në luftën kundër narkotikëve dhe rrjeteve të krimit të organizuar”.

“Përveç kësaj, përfaqësuesit e Policisë së Kosovës u angazhuan në diskutime me homologë nga agjenci të ndryshme ndërkombëtare të zbatimit të ligjit, duke shqyrtuar mundësitë për bashkëpunim më të thellë, në shkëmbim te informatave, praktikat më të mira dhe përpjekjet e përbashkëta operative për të luftuar trafikimin global të drogës”, thuhet në njoftim.

Policia e Kosovës thotë se mbetet “fort e përkushtuar ndaj bashkëpunimit ndërkombëtar në zbatim të ligjit dhe shpreh mirënjohje të thellë ndaj DOJ-ICITAP, INL dhe Ambasadës së SHBA-së në Prishtina për mbështetjen e tyre të palëkundur në ndërtimin e një të ardhmeje më të sigurt dhe më të qëndrueshme”./ATVLIVE/

Ka ndërruar jetë aktori dhe regjisori i njohur shqiptar, Enver Petrovci, një nga figurat më të rëndësishme të skenës dhe ekranit shqiptar, transmeton “ATV”.
Petrovci lindi më 28 shkurt 1954 në Prishtinë. Hapat e parë në aktrim i mori në Shkollën e Lartë Pedagogjike në Prishtinë, ndërsa studimet universitare për art dramatik i përfundoi në Fakultetin e Arteve Dramatike në Beograd.
Karriera e tij përfshin dhjetëra role në teatër, film dhe televizion, ku spikat interpretimi i fuqishëm dhe aftësia për të mishëruar karaktere të ndryshme. Përveç aktrimit, Petrovci ka lënë gjurmë edhe si regjisor dhe dramaturg, duke sjellë vepra të rëndësishme në skenë. Ai është gjithashtu autor i disa librave dhe dramave që kanë pasuruar letërsinë shqipe.
Pas viteve 90-të, Petrovci e zhvendosi karrierën në trojet shqiptare, ku u angazhua si aktor, regjisor dhe pedagog.
Enver Petrovci është themelues i disa institucioneve kulturore në Kosovë, ndër to edhe “Akademia e Arteve në Prishtinë” e “Teatri i Babës” ku ka dhënë një kontribut të madh në formimin e gjeneratave të reja të artistëve.
Me punën e tij të pandalshme dhe përkushtimin ndaj artit, Petrovci ka fituar respekt të gjerë si në Kosovë ashtu edhe në mbarë hapësirën shqiptare. Ai konsiderohet një ikonë e kulturës dhe një personalitet që ka ndikuar në ngritjen dhe zhvillimin e skenës artistike shqiptare ndër dekada.

John Duncan, britanik, ish-këshilltar i Wesley Clark, ka nisur dëshminë në Gjykatën Speciale të Hagës.

Ai do të dëshmojë pro-Thaçit.

Duncan është diplomat për 38 vite, dhe gjatë kohës 1998-2002 kishte qenë këshilltar i komandantit të NATO-s, Wesley Clark.

Ai vjen në Hagë pas dëshmisë së ish-ndihmësit të Sekretarit të Shtetit dhe zëdhënësit të Madeleine Albright, James Rubin, si dhe Paul Williams, ish-këshilltar i Kosovës në Rambuje.

Dëshmia e tij pritet të zgjasë tri ditë.

Dy dëshmitarët e parë kanë qenë James Rubin dhe Paul Williams.

“Ndërmarrja e Përbashkët Kriminale” do të jetë një prej akuzave e cila pritet të goditet në vazhdimësi nga avokatët e ish-krerëve të Ushtrisë Çlirimtare në Hagë.

Duke qenë se mbetet një prej pretendimeve më të rënda të Prokurorisë së Specializuar ndaj Thaçit, Krasniqit, Veselit e Selimit, edhe dy dëshmitarët e parë të mbrojtjes, në fokus patën strukturën e Ushtrisë Çlirimtare të Kosovës.

Kryesisht me pyetje nga gjyqtarët të cilët kishin për synim të merrnin informacione të detajizuara për strukturën e organizimin e UÇK-së.

James Rubin, ish-asistenti i sekretares Albright, u pyet për funksionimin e UÇK-së. E ai, theksoi se brenda UÇK-së nuk ka pasur batalione e brigada, apo njësi.

“Nuk ka pasur batalione, brigada, apo njësi në UÇK. Nuk ka ekzistuar nga pikëpamja ushtarake ky lloj organizimi. Asnjëherë nuk më bëri të mendoj se organizojnë gjëra të tilla”, tha Rubin, raporton Nacionale.

Gjyqtarët e pyetën Rubinin nëse UÇK-ja kishte apo jo polici ushtarake. E Rubin, deklaroi se shumë prej ushtarëve nuk kishin as uniforma.

“E di që kishin uniforma, disa kishin, disa nuk kishin. Ne nuk i konsideronim ata si polici ushtarake. Komandant të brigadave, apo shtab të përgjithshëm. Ne nuk kemi parë”, tha ai më tutje gjatë dëshmisë së tij 3-ditore në Hagë.

Rubin u pyet edhe për çështjen e komunikatave të UÇK-së, të cilat gjithashtu, janë përmendur shpesh qysh nga nisja e gjykimit. Diplomati i njohur theksoi se komunikatat kanë qenë veç mjete për manipulim.

“Kam lexuar shpesh, i kam konsideruar përpjekje për ta bërë UÇK-në më të rëndësishme se nga ishte në realitet. Ishin veç manipulime”, tha Rubin më tutje.

Gjyqtarët insistuan me pyetje, duke theksuar se si Rubin e kishte vërejtur se UÇK-ja nuk kishte organizim të duhur. Rubin u përgjigj se Ushtria Çlirimtare e Kosovës nuk ka pasur strukturë formale ushtarake, por ka qenë e krijuar më shumë në grupe e klane.

“Unë kam pasur shumë autoritet, nga sekretarja e shtetit. Dhe nëse do kërkoja këtë informacion nuk do ma mohonte askush. Unë kam parë shumë materiale, kam rishikuar, dhe këtë që po përshkruani do të ishin informacione prej zbulimit, dhe do të jem shumë i kujdesshëm. Nuk kam parë asnjë dokument që të përshkruante ndonjë analizë të strukturës, nuk po them që nuk ka ekzistuar fare strukturë, por kishin më shumë grupe, klane, por jo strukturë formale ushtarake. Nëse do të kishte ekzistuar informacion i tillë, analizë e aftësisë ushtarake, ky informacion do të ishte inteligjence që unë do ta kisha ditur”, tha Rubin gjatë dëshmisë në Hagë.

Për strukturën e UÇK-së foli edhe ish-këshilltari i ekipit të Kosovës në Rambuje, Paul Williams. Ai tha se struktura ishte e organizuar në formë rurale, e jo në rregulla.

“Nuk kam qenë në dijeni të kësaj dhe do të isha habitur shumë nëse do të kishte ekzistuar diçka me shkrim dhe është një strukturë mbi baza rurale dhe nuk iu vjen në mendje mendoj ky nivel ndërveprimi dhe do të kishte qenë shumë më normatve, kulturore më shumë autoritet dhe më pak e bazuar në rregulla”, tha dëshmitari.

Si rezultat, ai tha se ishte krejt e qartë, që komandantët duhej të bëheshin pjesë e procesit në Rambuje.

“U bë e qartë si drita e diellit se komandantët e zonës duheshin të bëheshin pjesë e procesit”, u shpreh Williams.