Category: Lajme

Ministria e Arsimit, Shkencës, Teknologjisë dhe Inovacionit (MAShTI) shpall thirrje për mbështetje financiare për pesë skema bursash për studentët e universiteteve publike në Kosovë dhe ato jashtë vendit, duke synuar mbështetjen e ekselencës akademike, përfshirjes dhe diversitetit.

Skemat e bursave;

1. Bursa për komunitetet Rom, Ashkali dhe Egjiptian – 1,000 € për studentët që regjistrohen për herë të parë në vitin e parë (bachelor) në universitetet publike të Kosovës.

2. Bursa për studimet jashtë vendit (niveli bachelor) – Deri në 5,000 € për studentët kosovarë që studiojnë në Top 100 universitetet botërore sipas “Times Higher Education”.

3. Bursa për studimet jashtë vendit (niveli master) – Deri në 7,000 € për studentët që vijojnë studime master në Top 200 universitetet botërore sipas “Times Higher Education”.

4. Bursa për studentet në fushat STEM – 1,000 € në vit për vajzat/gra në programet e Shkencës, Teknologjisë, Inxhinierisë dhe Matematikës në universitetet publike të Kosovës.

5. Bursa elitare për studentët në universitetet publike – Për studentët e nivelit bachelor dhe master me mesatare së paku 9 (ose 8 për komunitetet Rom, Ashkali dhe Egjiptian), si dhe mbështetje për studentët me aftësi të kufizuara. Aplikimi bëhet vetëm përmes platformës e-Kosova.

Konkursi për të gjitha skemat është i hapur nga 3 tetor deri më 18 tetor 2025, ora 16:00. Listat e përfituesve do të publikohen në faqen zyrtare të MAShTI. Kandidatët kanë të drejtë ankese brenda 7 ditësh nga shpallja e rezultateve.

Dokumentet e nevojshme dhe kushtet për aplikim i gjeni në faqen e MASHT-it.

Plani 20-pikësh që presidenti i Shteteve të Bashkuara, Donald Trump, e shpalosi këtë javë për t’i dhënë fund luftës në Rripin e Gazës, nuk përputhet me një draft që një grup vendesh me shumicë myslimane ia paraqitën atij, theksoi të premten ministri i Jashtëm i Pakistanit, Ishaq Dar.

Vendet myslimane kishin propozuar tërheqjen e plotë të Izraelit nga Gaza gjatë një takimi me Trumpin më 22 shtator, ndërsa plani i Trumpit parashikon tërheqjen e pjesshme të Izraelit për t’u përgatitur për lirimin e pengjeve të mbajtura nga Hamasi – grupi palestinez i shpallur terrorist nga SHBA-ja dhe BE-ja.

“E kam bërë të qartë se këto 20 pika që Trumpi i ka publikuar… nuk janë të njëjtat me tonat. Theksoj se në draftin tonë janë bërë disa ndryshime”, tha Dar para ligjvënësve pakistanezë.

Plani për t’i dhënë fund luftës mes Izraelit dhe Hamasit
Të hënën, Trump e publikoi një plan me 20 pika për përfundimin e luftës mes Izraelit dhe Hamasit, sipas të cilit të gjitha pengjet, të gjalla dhe të vdekura, do të ktheheshin brenda 72 orëve pas armëpushimit. Plani përmend gjithashtu një “Gazë të Re” në të ardhmen.

Ky plan lë shumë hollësi për t’u negociuar dhe varet nga vendimi i Hamasit, i cili vrau mbi 1.200 njerëz gjatë sulmit të 7 tetorit 2023 ndaj Izraelit dhe mori 251 pengje, sipas të dhënave izraelite. Lufta pasuese e Izraelit në Gazë ka vrarë mbi 66.000 palestinezë dhe ka shkatërruar gjerësisht enklavën e vogël, sipas autoriteteve shëndetësore të Gazës.

Kryeministri i Pakistanit, Shehbaz Sharif, e kishte përshëndetur më herët planin e Trumpit.

Dar tha se Sharifi, gjatë një udhëtimi, kishte dhënë përgjigje të përgjithshme ndaj një postimi më të gjerë të Trumpit në rrjetet sociale.

Trumpi e publikoi planin një javë pasi u takua me udhëheqësit e tetë vendeve myslimane – Arabisë Saudite, Emirateve të Bashkuara Arabe, Katarit, Egjiptit, Jordanisë, Turqisë, Indonezisë dhe Pakistanit – për të folur për gjendjen në Gazë.

Sipas raportimeve të Axios, administrata e Trumpit dëshiron që vendet arabe dhe myslimane të pajtohen për të dërguar forca ushtarake në Gazë, për ta mundësuar tërheqjen e Izraelit dhe për të siguruar fonde për periudhën e tranzicionit dhe programet e rindërtimit.

Vendet myslimane propozuan tërheqjen e plotë të Izraelit
Dar tha se tetë vendet morën një zotim nga Trumpi se ai nuk do ta lejonte Izraelin ta aneksojë Bregun Perëndimor, gjë për të cilën kanë bërë thirrje aleatët e ekstremit të djathtë të kryeministrit izraelit, Benjamin Netanyahu, në koalicionin e tij qeverisës.

Një draft konsensual i përgatitur nga vendet myslimane kërkonte “tërheqjen e plotë të Izraelit” dhe “një rrugë për një paqe të drejtë mbi bazën e zgjidhjes me dy shtete” për konfliktin izraelito-palestinez, tha Dar, duke lexuar nga një kopje e propozimit të tyre.

Krijimi i një shteti palestinez që bashkëjeton me Izraelin është politikë e Pakistanit, shtoi ai. Netanyahu ka përsëritur se është kundër shtetësisë palestineze, duke thënë se kjo do të rrezikonte Izraelin.

Plani i Trumpit parashikon që të gjitha operacionet ushtarake të pezullohen dhe vijat e frontit në Gazë të ngrihen deri sa të krijohen kushtet për “tërheqjen e plotë në faza” të forcave izraelite.

Sipas planit, Hamasi duhet të çarmatoset dhe të martën Trump i dha grupit islamik tri deri në katër ditë kohë për ta pranuar atë.

Plani përfshin krijimin e një “Bordi të Paqes” me mbikëqyrës ndërkombëtarë të udhëhequr nga vetë Trumpi dhe me pjesëmarrjen e ish-kryeministrit britanik, Tony Blair, në një rol të papërcaktuar.

Gaza do të ketë një qeveri të përkohshme kalimtare, e përbërë nga një komitet “teknokratësh, jopolitikë” që do të përfshinte palestinezë dhe ekspertë ndërkombëtarë./REL

Organizata e Kombeve të Bashkuara thotë se nuk ka strehë të sigurt për palestinezët e detyruar të largohen nga qyteti i Gazës dhe i kanë përshkruar “zonat e sigurisë” që Izraeli ka krijuar në sektorin jugor të enklavës palestineze si “vende vrasjeje”.

“Ideja e një zone sigurie në jug është një farsë”, tha James Elder, një përfaqësues i UNICEF-it në Gaza, duke folur me gazetarët në Gjenevë.

Në pjesën jugore të Rripit të Gazës, “bombat po bien me frekuencë alarmante, shkollat ​​e caktuara si strehimore të përkohshme janë shndërruar në rrënoja dhe tendat po shënjestrohen sistematikisht nga sulmet ajrore”, tha ai.

Nënat dhe të porsalindurit në Gaza po përballen me kushte të tmerrshme ndërsa Nasser…Spitali në Gazën jugore është i mbingarkuar nga pacientët që ikin nga veriu dhe furnizimet mjekësore po mbarojnë, paralajmëroi një zëdhënës i UNICEF-it.

“Situata për nënat dhe të porsalindurit në Gaza nuk ka qenë kurrë më e keqe. Në Spitalin Nasser, po shohim korridore plot me gra që sapo kanë lindur”, tha James Elder.

Organizata Botërore e Shëndetësisë paralajmëroi sot se sistemi shëndetësor është në prag të kolapsit.

Rick Pipercorn, përfaqësuesi i OBSH-së në territorin palestinez të pushtuar nga Izraeli, tha se nuk e kishte parë kurrë Spitalin Nasser kaq të mbushur, ndërsa pacientët nga Qyteti i Gazës, i cili po bombardohet nga ushtria izraelite, ikin në pjesën jugore të enklavës palestineze të rrethuar.

Izraeli i ka kërkuar popullsisë prej një milion banorësh të Qytetit të Gazës të shkojnë drejt jugut, ndërsa nis një nga sulmet më të rënda të luftës, me qëllim largimin e Hamasit nga ato që Tel Avivi i quan fortesat e tij të fundit të mbetura në zonën e madhe urbane të sektorit qendror të enklavës palestineze.

“Në çdo korridor shihni dyshekë dhe pacientë në dysheme. Ka një rritje të madhe të plagosurish”, tha Rick Peppercorn, duke shpjeguar se një numër i madh pacientësh po vijnë nga veriu.Vetëm 14 nga 36 spitalet e Gazës funksionojnë pjesërisht, sipas OBSH-së. James Elder tha se pa tre foshnje të parakohshme që ndanin të njëjtën makinë oksigjeni.

“Njëzet minuta secila. Dy foshnjat e tjera janë kur e treta ka makinën e oksigjenit për 20 minuta”, tha Elder.

Organizata Botërore e Shëndetësisë raporton se ka një mungesë të madhe të furnizimeve mjekësore.

“Po shohim një rritje të shpejtë të mungesës së artikujve thelbësorë si fasha, garza… por edhe në gjithçka që lidhet me furnizimet me gjak dhe kompletet e transfuzionit”, tha zëdhënësi i OBSH-së, duke u ankuar se problemet me hyrjen e furnizimeve në enklavë vazhdojnë.

Komandanti i Forcës së Sigurisë së Kosovës, Gjenerallejtënant Bashkim Jashari, ka pritur në takim Shefin e Mbrojtjes së Turqisë, Gjeneral Selçuk Bayraktaroglun.

Gjatë takimit, sipas njoftimit, të dy gjeneralët folën edhe për mundësitë e zgjerimit të bashkëpunimit në fushat e trajnimeve, edukimit dhe mbështetjes në ngritjen e kapaciteteve ushtarake të FSK-së.

“Gjithashtu Gjenerallejtënant Jashari e falënderoi Gjeneralin Bayraktaroğlu për mbështetjen e vazhdueshme që Republika e Turqisë i ka dhënë forcës sonë në ngritjen e kapaciteteve profesionale”.

“Nga ana e tij, Shefi i Mbrojtjes së Turqisë rikonfirmoi përkushtimin e vendit të tij për të vazhduar dhe thelluar bashkëpunimin me FSK-në, duke vlerësuar lartë zhvillimin dhe profesionalizmin e ushtrisë së Kosovës”, thuhet në njoftim.

Tutje, në njoftim u tha se të dy gjeneralët u pajtuan për vazhdimin e zgjerimit të mëtutjeshëm të bashkëpunimit bilateral në fushën e mbrojtjes.

Ministri i Sigurisë Kombëtare të Izraelit, Itamar Ben-Gvir, zhvilloi një vizitë tek aktivistët që janë ndaluar nga autoritetet izraelite pasi ishin pjesë e “Flotila Globale Sumud” – një nismë ndërkombëtare që synonte të sfidonte bllokadën ndaj Gazës dhe të sillte ndihma humanitare në këtë territor.

Gjatë vizitës së tij në vendin e ndalimit, Ben-Gvir përdori një gjuhë të ashpër ndaj aktivistëve, duke i etiketuar ata si armiq dhe mbështetës të terrorizmit.

Ai deklaroi se “këta janë terroristët. Janë terroristë. Shikojini mirë. Janë mbështetës të vrasësve. Kanë ardhur për Gazën, për të mbështetur terroristët”.

Këto deklarata pasqyrojnë qëndrimin e linjës së ashpër të qeverisë izraelite ndaj çdo përpjekjeje për të thyer bllokadën ndaj Rripit të Gazës, e cila konsiderohet nga Izraeli një çështje sigurie kombëtare.

Nga ana tjetër, aktivistët e flotës – të cilët përfshijnë qytetarë nga vende të ndryshme dhe organizata të të drejtave të njeriut – pretendojnë se veprimet e tyre janë paqësore dhe synojnë të tërheqin vëmendjen ndaj krizës humanitare në Gaza.

Kjo ngjarje ka shkaktuar reagime të ndryshme në arenën ndërkombëtare, me disa shtete dhe organizata që dënojnë ndalimin e aktivistëve dhe mbrojnë të drejtën e tyre për protestë paqësore, ndërsa të tjerë qëndrojnë në krah të Izraelit, duke theksuar të drejtën e tij për të garantuar sigurinë kombëtare.

Prokuroria kryesore e Stambollit ka hapur një hetim pasi komandot detare izraelite arrestuan shtetas turq në bord të flotës së ndihmave për Gazën.

Hetimi ka të bëjë me “shtetas turq të arrestuar pas sulmit të kryer nga elementë të marinës izraelite në ujëra ndërkombëtare ndaj flotës Global Sumud”, thuhet në një deklaratë.

U përmend Konventa e OKB-së për Ligjin e Detit dhe u tha se do të hetohen “plaçkitje e rëndë, dëmtime materiale dhe tortura”.

Mediat turke raportuan se në total 30 shtetas turq janë marrë nga forcat izraelite, raporton aljazeera.

Presidenti turk, Recep Tayyip Erdogan ka reaguar ashpër ndaj veprimeve të fundit të qeverisë së kryeministrit izraelit, Benjamin Netanyahu.

“E dënoj sulmin e Izraelit ndaj Flotës Global Sumud, e cila kishte nisur për të sjellë ndihma humanitare për palestinezët. Kjo tregon edhe një herë se qeveria e Netanyahu nuk mund të durojë as paqen. Flota ekspozoi tragjedinë e Gazës dhe krimet e Izraelit përballë botës. Ne po ndjekim nga afër situatën, duke siguruar sigurinë e aktivistëve dhe qytetarëve. Prioriteti ynë: ndalimi i derdhjes së gjakut në Gaza dhe shpërndarja e lirë e ndihmave”, tha ai.

Ndryshe, flota me 40 anije ndërkombëtare po përpiqet të dërgojë ndihma humanitare për popullin palestinez në Rripin e Gazës.

Artist i njohur kosovar, Petrit Halilaj, është shpallur fitues i çmimit prestigjioz “Nasher” për skulpturë, një nga njohjet më të larta në artin bashkëkohor. Lajmi u bë i ditur të enjten dhe u përhap nga mediat ndërkombëtare, përfshirë The New York Times.

Halilaj ka njoftuar se shpërblimin do ta rikthejë në vendlindjen e tij, duke e kthyer nga një mirënjohje personale në një ëndërr kolektive për komunitetin.

Për çfarë u vlerësua?

Petrit Halilaj, i lindur në Runik më 1986, mori çmimin për vitin 2027 nga Qendra e Skulpturës Nasher në Dallas. Juria vlerësoi veprat e tij për aftësinë të shndërrojë përvojat e dhimbshme të fëmijërisë dhe luftës në instalacione, performanca dhe skulptura që pasqyrojnë:

• butësinë njerëzore,

• gëzimin,

• thirrjet për paqe.

Një vlerësim ndërkombëtar

Juria ndërkombëtare, e përbërë nga emra të njohur si Sir Nicholas Serota, Pablo León de la Barra dhe Carolyn Christov-Bakargiev, përshkroi veprat e Halilajt si:

• të inovative,

• me ndikim emocional global,

• dhe me përdorim të simbolizmit dhe fantazisë si mjet për shërim dhe shprehje artistike.

Karriera dhe projektet kryesore

Halilaj ka bërë emër me veprat që lidhin Kosovën, kujtesën kolektive dhe përvojat personale me artin global, duke përfshirë:

• “Abetare” në Muzeun Metropolitan të Artit në New York,

• ekspozitat në Hamburger Bahnhof në Berlin,

• pjesëmarrjen në Biennalen e Lyonit.

Politikani shqiptar nga Maqedonia e Veriut, Ali Ahmeti, deklaroi se ka qenë subjekt përgjimesh nga shërbimet e sigurisë maqedonase.

Ai u shpreh se këto përgjime dëshmojnë përkushtimin e tij për të votuar Gjykatën Speciale me qëllimin e vetëm për të nxjerrë në dritë të vërtetën mbi luftën në Kosovë.

“Unë jam i përgjuar nga Maqedonia dhe në ato përgjime shihet qartë se si flas me deputetë për ta votuar Gjykatën Speciale, jo që ajo të devijojë apo të krijojë dëshmitarë të rremë, por që e vërteta të dalë në pah, e vërteta që është fshehur në librin e verdhë”, u shpreh Ahmeti për “Euronews”.

Ai theksoi se nuk pranon që Ushtria Çlirimtare e Kosovës të gjykohet për ngjarje që, sipas tij, janë të inskenuara nga vetë shërbimet serbe.

“Si mund ta gjykosh UÇK-në për rastin e Pejës, ku u vranë 9 serbë? Më vonë doli se ishte vetë organizim i shërbimeve serbe. Ashtu si rasti i Martinoviqit, që dhunoi veten dhe akuzoi shqiptarët”, deklaroi ai.

Ali Ahmeti ngriti shqetësimin se shumë prej akuzave që rëndojnë mbi shqiptarët janë pjesë e dezinformimit nga shërbimet e fshehta serbe.

Ai shtoi se qëllimi i tyre nuk ka qenë kurrë të bëjnë krime, por të ndërtojnë një strukturë të organizuar ushtarake për mbrojtje dhe çlirim, gjë që nuk u arrit plotësisht për shkak të dinamikave të kohës.

“Objektivi ynë ka qenë të ndërtojmë strukturën ushtarake, por nuk arritëm te ky objektiv, sepse zhvillimet ishin aq të forta sa gjithkush vepronte ku donte. Nuk u arrit të krijohej një hierarki për një ushtri të mirëfilltë”, tha Ahmeti.

Ndërsa në Maqedoninë e Veriut ka filluar fushata për zgjedhjet lokale të 19 tetorit, Ali Ahmeti, kreu i BDI-së, i cilësoi këto zgjedhje si një referendum shqiptaro-maqedonas, ndërsa shigjetoi kryeministrin Hristijan Mickoski duke thënë se ai nuk mund të bëjë sukses në politikë në kurriz të shqiptarëve dhe pa respektuar legjitimitetin e tyre.

Ai tha se i ka bërë thirrje VLEN-it që të tërhiqet nga koalicioni me Mickoskin për t’i dhënë fund politikave të degradimit të çështjes shqiptare dhe se ka propozuar që gjithë faktori shqiptar të bëhet bashkë rreth një platforme në mbrojtje paqësore të marrëveshjes së Ohrit.

“Tetori është referendum shqiptaro-maqedonas. Nuk mundet Hristjani të jetë i suksesshëm në politikë pa respektuar legjitimitetin e kombit shqiptar në Maqedoninë e Veriut. Këto politika të degradimit të çështjes shqiptare nuk i bëjnë mirë as Hristjan Mickoskit as shqiptarëve që ai ka aty të paligjshëm. Ne ju kemi bërë thirrje disa herë partive të VLEN-it që ta braktisin koalicionin dhe të bëhemi të gjithë bashkë rreth një platforme në mbrojtje në mënyrë paqësore të marrëveshjes së Ohrit. Politikat suksesshme bëhen me politika që kanë legjitimitet, përfshirja e drejtë, demokracia konsensuale janë baza e marrëveshjes së Ohrit. Ne nuk duam të bëhemi shkaktarë të krizave, duam të kontribuojmë dhe kemi kapacitetin që ta shtyjmë vendin përpara”, tha ai.

Ali Ahmeti tregoi një detaj të takimeve me Mickoskin, ku tha se ky i fundit fillimisht në një takim i kishte propozuar që në të njëjtën kohë me zgjedhjet lokale të tetorit të zhvilloheshin dhe zgjedhje të përgjithshme të parakohshme, ndërsa më pas kishte ndryshuar mendje.

Ahmeti tha se para këtyre zgjedhjeve Bashkimi Demokratik është shumë i fortë dhe mbështeti opsionin që bashkë me zgjedhjet lokale të mbaheshin edhe zgjedhjet e parakohshme të përgjithshme.

“Bashkimi Demokratik për Integrim është dhe shumë më i fortë. Sa u takon zgjedhjeve parlamentare, ato janë një domosdoshmëri që të ndodhin. Kemi biseduar më herët me zotin Mickoski dhe kemi patur një vendim për t’i përcjellë mendimet në partitë tona që bashkë me zgjedhjet lokale të zhvilloheshin edhe zgjedhjet e parakohshme parlamentare, mirëpo në takimin e dytë ai kishte bërë një tërheqje dhe kishte opsione të reja. Unë mbeta në opsionin e parë që ai më kishte propozuar mua, që të shkojmë edhe në zgjedhje lokale edhe të përgjithshme njëkohësisht”, tha Ali Ahmeti.

Pas 8 muajsh hetime, Policia e Shtetit, në bashkëpunim me partnerët ndërkombëtarë, ka finalizuar operacionin policor të koduar “Rrjeti”, duke shkatërruar një grup të strukturuar kriminal që merrej me trafikim të qenieve njerëzore me qëllim shfrytëzimin për prostitucion në Shqipëri.

Operacioni është zhvilluar nga Seksioni për Hetimin e Trafiqeve të Paligjshme në DVP Tiranë, nën drejtimin e prokurorisë dhe në bashkëpunim me Prokurorinë dhe Policinë Kombëtare të Kolumbisë, Policinë Kroate, EUROPOL dhe EUROJUST.

Rezultatet e operacionit:

9 masa sigurie në Shqipëri, prej të cilave 7 arrestime me burgim.
Arrestimi në Kolumbi i organizatorit kryesor të grupit, shtetasit kolumbian L.B., 25 vjeç.
2 shtetas të shpallur në kërkim.
48 shtetase të huaja të proceduara penalisht për ushtrim prostitucioni.
Zbulimi i një hoteli në rrugën “Reshit Collaku” në Tiranë, i cili përdorej për akomodimin dhe shfrytëzimin e viktimave.
Sekuestrimi i shumave të parave, 7 celularëve dhe provave të tjera materiale.

Organizatori L. B. rekrutonte vajza nga Amerika Latine dhe Azia Qendrore, duke i sjell në Shqipëri për t’i shfrytëzuar në prostitucion, nën kërcënime dhe presion ndaj tyre dhe familjeve të tyre.
Anëtarët e tjerë të grupit siguronin akomodim, klientë, shpërndarje të drogës dhe menaxhimin financiar të rrjetit përmes kriptovalutave.

Materialet janë referuar në Prokurorinë e Tiranës për hetime të mëtejshme, ndërsa Policia e Shtetit theksoi se ky është një shembull i qartë i bashkëpunimit të suksesshëm ndërkombëtar për goditjen e krimit të organizuar.