Category: Lajme

Aleanca Kosovare e Bizneseve (AKB) ka kërkuar nga krerët e shtetit që të deklarohen qartë në mbështetje të projekteve strategjike energjetike me Shtetet e Bashkuara të Amerikës, duke vlerësuar se furnizimi me gaz amerikan është një mundësi e rëndësishme për zhvillimin ekonomik dhe sigurinë energjetike të Kosovës.

Përmes një reagimi për Ekonomia Online, AKB ka theksuar se Kosova duhet ta trajtojë me seriozitet maksimal mundësinë e furnizimit me gaz amerikan dhe të mos mbetet jashtë zhvillimeve rajonale në sektorin e energjisë.

“Kosova duhet të trajtojë me seriozitet maksimal mundësinë e furnizimit me gaz amerikan, si një projekt strategjik për zhvillimin ekonomik, sigurinë energjetike dhe forcimin e partneritetit me Shtetet e Bashkuara të Amerikës. Në kohën kur shumë vende të Ballkanit Perëndimor, e në veçanti Serbia, po forcojnë bashkëpunimin strategjik me SHBA-në në sektorin e energjisë, Kosova nuk duhet të mbetet jashtë këtyre zhvillimeve”, thuhet në reagim.

AKB ka nënvizuar se furnizimi me gaz nuk duhet të kufizohet vetëm në zgjidhje afatshkurtra përmes transportit me cisterna, por të ndërtohet një infrastrukturë kombëtare e gazit, e lidhur me rrjetet rajonale dhe evropiane.

“Kosova duhet të ketë infrastrukturën e saj të gazit, përfshirë terminalin dhe rrjetin e nevojshëm të tubacioneve (gazsjellësve), të lidhur me rrjetet rajonale dhe evropiane. Një infrastrukturë e tillë do t’i mundësonte Kosovës furnizim më të qëndrueshëm, do të krijonte siguri për investime të reja, do të ndihmonte industrinë vendore dhe do të rriste konkurrueshmërinë e ekonomisë së vendit”, theksohet më tej.

Sipas AKB-së, deklarimet e udhëheqësve shtetërorë duhet të jenë të qarta në mbështetje të investimeve strategjike amerikane në sektorin e energjisë.

AKB tha se vendi ka nevojë për një strategji afatgjatë për gazin dhe për investime në infrastrukturën përkatëse.

“Kosova ka nevojë për gaz amerikan, por jo vetëm përmes transportit me cisterna. Ne duhet të ndërtojmë infrastrukturën tonë strategjike të gazit përmes tubacioneve, ashtu siç kanë bërë shumë vende të zhvilluara. Gazi amerikan është mundësi për investime të reja, zhvillim ekonomik dhe siguri energjetike. Deklarimet e shtetit duhet të jenë të qarta: Kosova duhet të ecë përpara me partnerët e saj strategjikë, veçanërisht me Shtetet e Bashkuara të Amerikës”, deklaroi AKB.

Sekretari amerikan i Shtetit, Marco Rubio, e ka përshkallëzuar ndjeshëm retorikën e tij kundër Gjykatës Penale Ndërkombëtare (GJPN) në Hagë. Kjo mund të ketë pasoja serioze për vetë gjykatën.

Në Hagë ndodhen dy gjykata të mëdha ndërkombëtare që shpesh ngatërrohen me njëra-tjetrën. Nga njëra anë është Gjykata Ndërkombëtare e Drejtësisë (GJND) e Kombeve të Bashkuara, e cila merret me mosmarrëveshjet midis shteteve dhe ndodhet në Pallatin historik të Paqes. Nga ana tjetër është Gjykata Penale Ndërkombëtare (GJPN), e cila ekziston që nga viti 2002dhe merret me ndjekjen penale të individëve përgjegjës për krime lufte. Ajo ndodhet në një ndërtesë moderne prej xhami dhe betoni.

Ndryshe nga OKB-ja, ku marrin pjesë 193 shtete, në GJPN janë anëtare vetëm 125 vende. Mes shteteve që nuk janë anëtare gjenden SHBA-ja, Rusia dhe Kina, si edhe disa vende të Azisë dhe Afrikës Veriore.

Kur Marco Rubio kërcënoi së fundmi se do ta shkatërronte gjykatën “tullë pas tulle”, ishte e qartë se ai po i referohej GJPN-së. Ministria e tij renditi masat që SHBA po shqyrton kundër gjykatës. Mes tyre janë: ndalimi i hyrjes në SHBA për punonjësit e GJPN-së; zgjerimi i sanksioneve kundër gjykatës dhe organizatave të lidhura me të; rishikimi më i rreptë i marrëdhënieve me vendet që nuk e hedhin poshtë autoritetin e GJPN-së dhe njëkohësisht përfitojnë ndihmë amerikane. SHBA-ja ka ushtruar edhe më parë presion ndaj gjykatës, por toni i ri ka tërhequr vëmendjen e ekspertëve të së drejtës ndërkombëtare në mbarë botën.

Andreas Schüller, bashkëdrejtues i programit për krimet ndërkombëtare dhe përgjegjësinë juridike në Qendrën Evropiane për të Drejtat Kushtetuese dhe të Njeriut (ECCHR) në Berlin, thotë: “SHBA-ja dhe Marco Rubio po bëjnë publike diçka që ka ndodhur prej më shumë se një viti: ushtrimin e presionit diplomatik ndaj shteteve të tjera për të ndryshuar qëndrimet dhe në disa raste edhe sjelljen e tyre të votimit në raport me GJPN-në.”

Sipas tij, fakti që tashmë flitet hapur për një “fushatë” tregon se bëhet fjalë për një strategji më të gjerë, e cila synon të përfshijë edhe shtete të tjera që nuk janë anëtare të GJPN-së.

Një gjykatë nga e cila askush nuk duhet t’i shpëtojë drejtësisë

SHBA-ja nuk është anëtare e Gjykatës Penale Ndërkombëtare. Kjo do të thotë se veprat e kryera në territorin amerikan nuk mund të gjykohen në Hagë. Megjithatë, GJPN-ja ka juridiksion edhe kur krime të rënda dyshohet se janë kryer në territorin e një shteti anëtar. Mbi këtë bazë janë lëshuar, ndër të tjera, urdhër-arrestet kundër presidentit rus Vladimir Putin dhe kryeministrit izraelit Benjamin Netanyahu.

Ekzistenca e GJPN-së lidhet me mësimet e nxjerra nga historia. Proceset e Nurembergut pas Luftës së Dytë Botërore konsiderohen si zanafilla e së drejtës penale ndërkombëtare. Më vonë, tribunalet për krimet e luftës në ish-Jugosllavi dhe për gjenocidin në Ruandë gjatë viteve 1990 forcuan kërkesën për një institucion të përhershëm ndërkombëtar.

Juristi i së drejtës ndërkombëtare Kai Ambos nga Universiteti i Göttingenit thekson: “Bëhet fjalë për çështjen themelore të përgjegjësisë, qoftë në Ukrainë, Iran apo Gaza. Nuk mund të ndodhë që krime kaq të rënda të kryhen dhe përgjegjësit kryesorë, veçanërisht udhëheqësit politikë, të mbeten pa u ndëshkuar.”

A duhet të përfundojnë qytetarët amerikanë në bankën e të akuzuarve?

Në një deklaratë video, Marco Rubio pretendoi se GJPN-ja kërcënon sistemin juridik amerikan: “Oficerët e kontrollit kufitar që largojnë kriminelët e dhunshëm nga vendi ynë. Ushtarët amerikanë që rrezikojnë jetën për të mbrojtur vendin tonë. Nëse qëndrojmë pasivë, të gjithë ata do të ishin në mëshirën e gjyqtarëve të huaj mijëra kilometra larg.”

Aktualisht nuk ka asnjë procedurë penale para GJPN-së kundër shtetasve amerikanë. Veprimet e agjentëve të emigracionit dhe kufirit zhvillohen kryesisht brenda SHBA-së, ku gjykata nuk ka juridiksion.

Megjithatë, situata është ndryshe për vrasjet e synuara të trafikantëve të dyshuar të drogës në Karaibe. Ish-prokurori i GJPN-së, Luis Moreno Ocampo, i cilësoi ato në nëntor si krime të mundshme kundër njerëzimit.

Si mund të mbrohet gjykata nga ky presion?

Kai Ambos druhet se mund të shtohet i ashtuquajturi “efekt ftohës” (chilling effect), pra që prokurorët e GJPN-së mund të tregohen më të kujdesshëm ose më të butë ndaj të dyshuarve amerikanë.

Ai përmend edhe fenomenin e “mbipërputhshmërisë” me sanksionet: “Kompanitë jashtë SHBA-së mund të vendosin të mos bashkëpunojnë më me gjykatën, sepse kanë frikë se kjo mund të dëmtojë biznesin e tyre në Amerikë.”

Që vitin e kaluar, Departamenti Amerikan i Shtetit vendosi një sërë sanksionesh ndaj GJPN-së dhe disa gjyqtarëve të saj.Si reagim, gjykata u përpoq të bëhej më pak e varur nga SHBA-ja dhe, për shembull, zëvendësoi disa aplikacione të Microsoft-it me një produkt gjerman me kod të hapur.

Mbështetja nga Evropa

Andreas Schüller mendon se shtetet anëtare mund ta ndihmojnë gjykatën përmes shumë veprimeve të vogla: “Kur fuqitë e mesme dhe shtetet më të vogla bashkohen për të mbështetur institucionet ndërkombëtare dhe për t’i rezistuar presionit amerikan, kjo është gjëja më e rëndësishme.”

Pas kërcënimeve të Rubios, Bashkimi Evropian u rreshtua menjëherë në mbështetje të GJPN-së.Edhe ministri i Jashtëm gjerman Johann Wadephul doli në mbrojtje të saj, duke deklaruar se gjykata e bën botën “më të sigurt dhe më të drejtë”.

Interesant është fakti se në vitin 2022, pas pushtimit rus të Ukrainës, edhe Senati amerikan kishte mbajtur një qëndrim të ngjashëm. Në një rezolutë, GJPN-ja u vlerësua si: “një tribunal ndërkombëtar që synon të mbrojë sundimin e ligjit”, ndërsa hetimet kundër Rusisë u përshëndetën. Një nga bashkësponsorët e asaj rezolute ishte pikërisht Marco Rubio, sot sekretar i Shtetit i SHBA-së. /DW

Shefja e stafit Susie Wiles, ndihmësja më e ngushtë e presidentit Donald Trump, dhe drejtori i FBI-së, Kash Patel ndihmuan personalisht në orkestrimin e një hetimi të gjerë javën e kaluar në Shtëpinë e Bardhë që synonte të përcaktonte se kush në qeveri kishte rrjedhur informacion në lidhje me mangësitë e sigurisë së një aeroplani të dhuruar nga Katari, i cili do të përdorej si Air Force One – me disa zyrtarëve që u është kërkuar t’ua dorëzojnë telefonat e tyre hetuesve në ambientet e Shtëpisë së Bardhë, thanë burime të njohura me çështjen për CNN.

Trump ishte i zemëruar për zbulimet në lidhje me aeroplanin e ri, thanë burimet, dhe qeveria e tij shpejt ngriti një hetim intensiv për rrjedhje informacioni që e trazoi qeverinë, transmeton Telegrafi.

Ndërsa hetimi zhvillohej, të paktën një agjenci federale u dërgoi email punonjësve duke i paralajmëruar se nëse do të kontaktoheshin nga agjenci të jashtme që kërkonin informacion dhe pajisje, ata duhej të kontaktonin menjëherë avokatët e agjencisë së tyre, tha një burim për CNN.

Burimet thanë se Patel – i cili ishte duke u përgatitur të udhëtonte për në Çikago – u devijua në Shtëpinë e Bardhë të premten për të marrë një rol praktik në drejtimin e hetimit, i cili u bë publik herët të nesërmen në mëngjes kur New York Times raportoi se Departamenti i Drejtësisë kishte lëshuar thirrje gjyqësore për katër gazetarë të tij që raportuan mbi shqetësimet e sigurisë rreth aeroplanit të ri.

Patel qëndroi në një zyrë pranë zyrës së Wiles për afërsisht shtatë orë, ndërsa të dy krijuan atë që një burim e quajti një “dhomë lufte” në Krahun Perëndimor.

Përveç kërkimit të telefonave celularë, hetuesit kërkuan informacion nga ata që udhëtonin me Trump ose kishin një rol në udhëtim, duke përfshirë zyrtarë në agjenci të ndryshme. Jo të gjithë zyrtarët që iu kërkua të dorëzonin pajisjet e tyre e bënë këtë, tha një nga burimet për CNN.

Përpjekja pasqyron shkallën në të cilën Shtëpia e Bardhë ishte e gatshme të ushtronte kontroll mbi një hetim të zbatimit të ligjit – një shkelje e rëndësishme e pavarësisë historike të Departamentit të Drejtësisë, megjithëse një që është bërë disi e zakonshme në administratën e Trump.

CNN ka raportuar më parë se Trump foli gjithashtu me Patel në telefon në lidhje me hetimin e rrjedhjes së informacionit. CNN i është drejtuar FBI-së për koment.

Një zyrtar i Shtëpisë së Bardhë tha: “Rrjedhjet e informacionit që rrezikojnë sigurinë e Presidentit, stafit të tij dhe grupit të shtypit udhëtues janë të rrezikshme dhe një kërcënim për sigurinë kombëtare. Shtëpia e Bardhë i merr seriozisht këto rrjedhje informacioni dhe do të bëjë gjithçka ligjërisht për të siguruar që individi ose individët të kapen dhe kjo të mos ndodhë përsëri”.

Gazetarët dhe avokatët e shtypit të lirë kanë kritikuar veprimin e Departamentit të Drejtësisë për të thirrur gazetarët e New York Times si një fyerje ndaj Amendamentit të Parë, dhe Times po kundërshton në gjykatë.

“Sot, The New York Times paraqiti një mocion për të anuluar thirrjet abuzive dhe të papërshtatshme të lëshuara për tre gazetarë tanë”, tha të mërkurën avokati kryesor i redaksisë së New York Times, David McCraw. /Telegrafi/

Shefja e Komisionit Evropian, Ursula von der Leyen, u detyrua të strehohej pasi u dha një alarm për sulm ajror gjatë vizitës së saj në Kiev.

Pamjet e treguara nga mediat kombëtare treguan shefen e BE-së dhe delegacionin e saj duke u drejtuar në një zonë të sigurt në kryeqytetin ukrainas.

Von der Leyen mbërriti në Kiev të mërkurën për të njoftuar hapa të rinj që integrojnë industritë e mbrojtjes të Bashkimit Evropian dhe Ukrainës, duke thelluar partneritetin ushtarak afatgjatë të bllokut me Kievin, ndërsa Ukraina ecën përpara me përpjekjen e saj për t’u bashkuar me BE-në.

Ajo gjithashtu pranoi një çmim nga Presidenti Volodymyr Zelenskyy.

Shqipëria përjeton sot një nga ditët më të nxehta të vitit, me temperaturat që pritet të arrijnë deri në 41 gradë celsius.

Këtë paralajmëroi meteororologia e A2 CNN Tanja Porja ku sipas saj, dita e sotme dhe ajo e nesërme do të jenë më të nxehtat e vitit 2026, me temperatura ekstreme në pothuajse të gjithë territorin.

“Ne sot dhe nesër presim ditët më të nxehta të 2026-s deri në këto momente që ne flasim dhe mund të ketë ndonjë ditë të nxehtë nga ë fillimi i gushtit. Po kaq e nxehtë sa këto ditë. Megjithatë sot presim një maksimum 41 gradë celsius. 31 maksimumi më i ulët sot në zonat e thella malore në juglindje të vendit. Pjesa tjetër e zonës malore mjaft e nxehtë. Zonat perëndimore 38-40 gradë celsius”.

Porja paralajmëroi gjithashtu se Shqipërinë e pret një teditor mjaft i nxehtë.

“Në fakt kjo është dita e parë që shënon 40-41 gradë. Presim dhe nesër dhe dy tre ditë të tjera mjaft të nxehta ë rriten dhe temperaturat më tej të vlerat minimale të mëngjesit. Na pret një treditor nga dita e sotme dhe të paktën deri të premten do të jemi në vlera ekstremisht të larta”.

Bashkimi Evropian do t’i sigurojë Ukrainës edhe 1 miliard euro të tjera për furnizimin me dronë, ka njoftuar presidentja e Komisionit Evropian, Ursula von der Leyen, gjatë vizitës së saj në Kiev.

Von der Leyen deklaroi se ky financim është vetëm hapi i parë në mbështetjen e re evropiane për kapacitetet ushtarake të Ukrainës.

Sipas saj, BE-ja ka miratuar gjithashtu një program me vlerë 10 miliardë euro, i cili synon të financojë prodhimin e dronëve, raketave dhe avionëve luftarakë.

“Ky është vetëm fillimi”, tha von der Leyen, duke theksuar se Evropa synon të rrisë aftësitë e saj të prodhimit në fushën e mbrojtjes dhe të forcojë mbështetjen për Ukrainën në luftën kundër Rusisë.

Financimi i ri vjen në një kohë kur dronët janë bërë një nga mjetet kryesore të luftës moderne në frontin ukrainas, me të dyja palët që përdorin mijëra mjete pa pilot për sulme dhe zbulim.

Kujtojmë se deri më tani, disa vende të BE-së kanë nënshkruar marrëveshje individuale me Ukrainën për të shfrytëzuar zgjuarsinë e saj teknologjike.

Marrëveshja e miratuar të mërkurën shton një dimension më të gjerë duke e bërë partneritetin të disponueshëm për të gjitha 27 shtetet anëtare.

🇪🇺🇺🇦 The EU will provide Ukraine with another €1 billion for drones

European Commission President Ursula von der Leyen announced the funding in Kyiv. She said this is only the beginning: the EU has also approved a €10 billion program to finance the production of drones,… https://t.co/M8Mw3WjxyK pic.twitter.com/Fkxbyzwjx7

— NEXTA (@nexta_tv) July 15, 2026

Disa nga vendet më të vogla të BE-së kanë normat më të larta të rritjes së popullsisë, ndërsa anëtarët e saj më të mëdhenj përbëjnë më shumë se dy të tretat e popullsisë së përgjithshme të bllokut.

Numri i evropianëve është aktualisht në rritje.

Që nga janari 2026, popullsia e BE-së vlerësohet të jetë rritur me 706,000 banorë që nga viti i kaluar, duke arritur në një total prej 452 milionë, sipas të dhënave të fundit nga Eurostat, shkruajnë mediat e huaja, përcjell Telegrafi.

Ky ishte viti i pestë radhazi i rritjes së popullsisë në BE, pas një rënieje në vitin 2021 gjatë pandemisë COVID-19.

Popullsia e bllokut është gjithashtu 8 milionë më e lartë se në vitin 2016. Kjo shifër dyfishohet nëse e zmadhojmë pamjen për të parë se si ka ndryshuar gjatë dy dekadave të fundit.

Kur shikojmë një periudhë edhe më të gjatë, popullsia e kombinuar e vendeve anëtare të BE-së sot u rrit nga 354.5 milionë njerëz në vitin 1960 në 452 milionë në fillim të këtij viti.

Rritja e popullsisë po ngadalësohet, megjithatë: mesatarisht, popullsia u rrit me 3 milionë njerëz në vit në vitet 1960, por kjo ka rënë në 600,000 njerëz në vit në vitet 2010.

Eurostat tha se, që nga viti 2012, ndryshimi negativ natyror në popullsinë e BE-së (më shumë vdekje sesa lindje) është kompensuar nga migrimi neto pozitiv.

Popullsia e vendeve specifike të BE-së varionte nga 83.5 milionë në Gjermani në 600,000 në Maltë.

Pesë vendet më të populluara përbënin dy të tretat e popullsisë së bllokut: Gjermania (18.5%), Franca (15.3%), Italia (13%), Spanja (11%) dhe Polonia (8%).

Gjermania regjistroi një popullsi prej 83.5 milionë në fillim të vitit, e ndjekur nga Franca me 69.1 milionë, Italia me 58.9 milionë, Spanja me 49.6 milionë dhe Polonia me 36.3 milionë.

Ato me popullsinë më të vogël ishin Malta (588,000), Luksemburgu (691,000) dhe Qiproja (997,000).

Megjithatë, këto kombe të vogla panë shkallën më të lartë të rritjes së popullsisë gjatë vitit të kaluar: Malta u rrit me 24 për një mijë banorë, Qiproja me 14 dhe Luksemburgu me 13. Ato ishin ndër 16 vendet e BE-së ku popullsia u rrit.

Nga ana tjetër, Letonia (-8), Estonia (-7) dhe Hungaria (-5) panë shkallët më të mprehta të rënies së popullsisë.

Pavarësisht rritjes së përgjithshme të popullsisë së BE-së këtë vit të kaluar, statistikat e mëparshme të Eurostat vlerësojnë se numri i qytetarëve në bllok do të tkurret deri në vitin 2100.

Zyra parashikon që popullsia e BE-së do të bjerë me 11.7%, ose 53 milionë njerëz, deri në fillim të shekullit të ardhshëm, me shkakun kryesor që është rënia e nivelit të lindjeve.

Disa vende kanë ndërmarrë tashmë veprime për të provuar ta përmbysin trendin: Presidenti francez Emmanuel Macron ka bërë thirrje për “riarmatim demografik” pasi Franca regjistroi më shumë vdekje sesa lindje për herë të parë që nga fundi i Luftës së Dytë Botërore në vitin 2025.

Qeveria që atëherë ka futur leje shtesë prindërore në përpjekje për të rritur normat e lindjeve, duke u lejuar prindërve të ndajnë një ose dy muaj pushim më shumë përveç të drejtave ekzistuese.

Ekspertët shqetësohen se një dështim për të përmbysur trendin përfundimisht do të çojë në më pak punëtorë dhe më shumë pensionistë në të gjithë Evropën, duke ushtruar presion të madh mbi sistemet e pensioneve dhe kujdesit shëndetësor.

Edhe këtë verë, Shqipëria po vazhdon të mbetet destinacioni kryesor për pushimet e qytetarëve të Kosovës.

Përfaqësues të sektorit të turizmit dhe biznesit thonë se interesimi nuk ka rënë, ndërsa vlerësojnë se pas një periudhe kur shumë qytetarë provuan destinacione të tjera evropiane pas liberalizimit të vizave, një pjesë e madhe janë rikthyer sërish drejt bregdetit shqiptar.

Krahas lidhjeve familjare e kombëtare, faktorë si çmimet, afërsia, infrastruktura rrugore dhe oferta turistike po përmenden si arsyet kryesore që Shqipëria vazhdon të tërheqë pushues nga Kosova.

Kryetari i Shoqatës së Turizmit në Kosovë, Ruzhdi Kurtishaj, vlerëson se qytetarët e Kosovës përbëjnë pjesën më të madhe të turistëve që vizitojnë Shqipërinë gjatë sezonit veror.

“Unë besoj që shqiptarët e Kosovës bëjnë mbi 50 për qind të numrit të përgjithshëm të turistëve në Shqipëri”.

Sipas tij, rikthimi i qytetarëve të Kosovës drejt Shqipërisë është bërë edhe më i dukshëm këtë vit.

“Mendoj dhe tashmë kjo është e argumentuar se qytetarët e Kosovës e kanë parë që askund më mirë nuk ka se në Shqipëri. Këtë po e themi, pasi në dy vitet e kaluara, në 2024 dhe 2025, qytetarët panë dhe shijuan disa vende të tjera, pasi kjo u mundësua me liberalizimin e vizave, por tash këtë vit përsëri janë kthyer te Shqipëria”, u shpreh ai.

Kurtishaj tha se zgjedhja e Shqipërisë nuk lidhet më vetëm me aspektin patriotik apo lidhjet familjare.

“Tashmë në Shqipëri po shkojnë për kualitet dhe çmime. Po flas me kompetencë për këtë që e them, sepse kemi të bëjmë çdo ditë me qytetarët. Diaspora e Kosovës dhe qytetarët rezidentë po e shohin vetëm Shqipërinë si destinacion. Çmimet në Shqipëri janë të përballueshme për çdo qytetar. Kjo varet edhe nga pakot që merren, por nëse flasim për All Inclusive, atëherë kjo pako është mbi 20 për qind më e lirë në krahasim me Greqinë, Turqinë, Malin e Zi apo edhe Kroacinë”.

Ai shtoi se qytetarët e Kosovës vazhdojnë të jenë ndër faktorët kryesorë të turizmit shqiptar.

“Shqiptarët e Kosovës janë faktor kryesor në turizmin e Shqipërisë. Nëse flasim për këtë periudhë, vetëm në Shëngjin janë mbi 70 për qind e pushuesve qytetarë të Kosovës. Kur flasim për pushime më të gjata, prej shtatë deri në dhjetë ditë, qytetarët e Kosovës po zgjedhin jugun”.

Edhe nga Unioni i Turizmit të Kosovës vlerësojnë se Shqipëria vazhdon të mbetet ndër destinacionet kryesore të pushuesve nga Kosova, pavarësisht zgjerimit të mundësive për udhëtime jashtë rajonit.

Baki Hoti nga Unioni i Turizmit të Kosovës tha se bregdeti shqiptar vazhdon të ruajë pozitën e tij si një prej zgjedhjeve kryesore për qytetarët e Kosovës.

“Lidhur me pyetjen tuaj mund t’ju them se, prapëseprapë, bregdeti shqiptar është njëri ndër destinacionet kryesore të pushuesve nga Kosova, pavarësisht opsioneve të shumta që tashmë janë në dispozicion për qytetarët e Kosovës”, deklaroi Hoti.

Po ashtu edhe drejtori i Dhomës së Tregtisë dhe Industrisë Kosovë, Kushtrim Ahmeti, thotë se Shqipëria vazhdon të jetë destinacioni kryesor për pushuesit nga Kosova.

“Shqipëria vazhdon të mbetet destinacioni kryesor i shqiptarëve të Kosovës. Nga ato që janë parë dhe raportuar, shihet që ka një organizim më të mirë, kontroll më të madh sa i përket çmimeve, sidomos të shezllonëve. Nuk ka prishje të objekteve pa leje siç ka ndodhur në sezonin e kaluar, ku pushuesit janë përballur me zhurmë e pluhur”.

Lidhur me numrin e pushuesve këtë vit, ai tha se është ende herët për të nxjerrë përfundime përfundimtare.

“Shqiptarët nga Kosova tashmë kanë nisur pushimet e gjata verore në Shqipëri. Për të dalë me një përfundim për rritje apo rënie të pushuesve, kjo mbetet të shihet në fund të sezonit. Por duhet ta kemi edhe një gjë të qartë, shumë shqiptarë të Kosovës tashmë kanë blerë patundshmëri në Shqipëri dhe përpos pushimeve verore, ata shkojnë shumë shpesh, gati në çdo stinë të vitit”, u shpreh ai.

Ahmeti përmendi edhe disa vështirësi që janë shfaqur gjatë sezonit.

“Megjithëse edhe këtë vit vlen marrëveshja për lehtësimin e kalimit kufitar, në këtë periudhë kur Shqipëria po përballet me protesta, ka pasur disa shqetësime për kontrolle të shtuara në kufi, të cilat kanë shkaktuar vonesa dhe kolona në kalimet kufitare mes dy vendeve”.

Sipas Ahmetit, Shqipëria vazhdon të jetë tërheqëse për pushuesit nga Kosova për shkak të një kombinimi faktorësh.

“Po mbi të gjitha është gjuha dhe gjaku që na lidh, është vendi i përbashkët i shqiptarëve. Pavarësisht rritjes së çmimeve, Shqipëria në përgjithësi i ka ende çmimet e përballueshme për xhepin e qytetarëve nga Kosova. Ofron ujin e pastër dhe një diell natyral. E mira që ofron Shqipëria është se ka plazhe me çmime të ndryshme, pra secili pushues e zgjedh plazhin sipas mundësisë ekonomike që e ka. Edhe akomodimi është me çmime të ndryshme, pra kemi hotele, apartamente, vila apo resorte të ndryshme. Edhe gastronomia ka pësuar përmirësime të ndjeshme dhe është përshtatur me kërkesat e pushuesve nga Kosova. Për ata që nuk e duan vetëm detin, Shqipëria ofron mundësinë e eksplorimeve të pafundme të objekteve historike, parqeve, maleve e bjeshkëve. Lidhja e Kosovës me Shqipërinë përmes autostradës e ka bërë më të lehtë turizmin, megjithëse çmimet e pagesës së autostradës janë të larta dhe, përkundër kërkesave të vazhdueshme, qeveria shqiptare nuk ka lëvizur që t’i ulë ato”.

Ndikimi i qytetarëve të Kosovës në ekonominë turistike të Shqipërisë evidentohet edhe në studimin më të fundit të Aleancës Kosovare të Bizneseve (AKB). Sipas këtij studimi, vetëm gjatë fundjavave të sezonit turistik, nga maji deri në tetor 2026, qytetarët e Kosovës pritet të shpenzojnë rreth 195 milionë euro në Shqipëri.

Studimi tregon se gjatë pesë fundjavëve të monitoruara, mesatarisht rreth 25 mijë qytetarë nga Kosova kanë kaluar fundjavën në Shqipëri.

Sipas AKB-së, për një qëndrim prej dy deri në tre netësh, secili pushues shpenzon mesatarisht të paktën 300 euro, duke përfshirë akomodimin, ushqimin dhe pijet, karburantin, taksën rrugore, transportin, argëtimin dhe blerjet.

Bazuar në këto të dhëna, vetëm gjatë një fundjave ekonomia shqiptare përfiton rreth 7.5 milionë euro nga vizitorët e Kosovës.

Aleanca vlerëson se, gjatë gjithë sezonit turistik nga 1 maji deri më 30 tetor, që përfshin 26 fundjava, shpenzimet arrijnë në rreth 195 milionë euro. Në këtë llogaritje nuk janë përfshirë pushimet njëjavore apo më të gjata, çka nënkupton se kontributi real financiar është edhe më i madh.

Kryetari i Aleancës Kosovare të Bizneseve, Agim Shahini, ka treguar se studimi dëshmon rëndësinë e qytetarëve të Kosovës për ekonominë shqiptare.

“Rreth 195 milionë euro që shpenzohen vetëm gjatë 26 fundjavave të sezonit maj–tetor përbëjnë një kontribut të jashtëzakonshëm për ekonominë e Shqipërisë. Ky partneritet ekonomik duhet të vlerësohet dhe të zhvillohet më tej përmes politikave të përbashkëta dhe investimeve strategjike. Kur fiton turizmi shqiptar, fitojnë edhe bizneset dhe qytetarët në të dy anët e kufirit”.

Fluksi i lartë i qytetarëve të Kosovës drejt Shqipërisë pasqyrohet edhe në të dhënat e autoriteteve kufitare shqiptare. Gjatë muajve maj dhe qershor janë regjistruar mbi 2 milionë hyrje-dalje në pikat kufitare mes qarkut të Kukësit dhe Kosovës.

Kurse, për muajin korrik, qe tashmë veç sa ka nisur, vetëm gjatë katër orëve të një dite të shtunë, përmes pikës kufitare Morinë kanë hyrë në Shqipëri mbi 12 mijë qytetarë nga Kosova me rreth 2 mijë e 900 automjete.

Për automjetet me targa të Kosovës vazhdon të zbatohet regjimi i kalimit të lehtësuar, ndërsa për automjetet me targa të huaja po zbatohen procedura të përshpejtuara për të shmangur vonesat.

Pas rënies në 2025-n, hyrjet e shtetasve nga Kosova rriten 10% për 5 mujorin

Edhe shifrat e publikuara nga INSTAT e konfirmojnë tendencën e rikthimit të shtetasve nga Kosova. Për periudhën janar-maj 2025, në Shqipëri janë shënuar gati 127 mijë hyrje të shtetasve nga Kosova, me një rritje prej 10% në krahasim me të njëjtën periudhë të një viti më parë.

Tendenca është e kundërt në raport me vitin 2025, kur turistët nga Kosova ranë me 7% në janar-maj, në krahasim me 2024-n, teksa shumë prej tyre filluan te eksploronin destinacione të tjera, si Greqia, apo dhe shtete të tjera të Europës.

Kosova vijon të mbajë peshën kryesore të turizmit në Shqipëri, me mesatarisht 34% të hyrjeve totale për 5 mujorin 2026, po sipas INSTAT. Shteti i dytë me më shumë hyrje është Italia, me rreth 11%, ose tre herë më pak se Kosova.

Pas dyshimeve se disa qytetarë kanë helmuar pas konsumimit të ushqimit, është intervistuar pronari i një lokali në Han të Elezit.

Policia në raportin 24 orësh bën të ditur se rasti u iniciua si “Prodhimi dhe vënia në qarkullim e artikujve të dëmshëm ushqimor”.

“Hani i Elezit 13.07.2026 – NN. Me 15.07.2026 në cilësinë e të dyshuarit, në stacion policor është intervistuar një mashkull kosovar për shkak të dyshimit se në lokalin e tij pas konsumimit të ushqimit janë helmuar disa persona. Rasti është duke u hetuar për të cilin është njoftuar prokurori i cili ka autorizuar të iniciohet lënda e rastit”, thuhet në njoftim.

Një ditë më parë, Policia njoftoi se rreth 80 persona janë trajtuar nga 13 deri më 15 korrik në Qendrën Kryesore të Mjekësisë Familjare në Han të Elezit me simptoma të diarresë dhe vjelljes.

Kryetari i Komunës së Shtimes, Qemajl Aliu, ka njoftuar për lejimin e shfrytëzimit të hapësirave publike për parkim nga qytetarët.

Sipas njoftimit, qëllimi është lehtësimi i qarkullimit dhe menaxhimit të automjeteve gjatë periudhës verore dhe bashkatdhetarëve në vendlindje.

Nga data 16 korrik deri më 15 gusht qytetarët do të kenë në dispozicion hapësirat te Tregu i Gjelbër dhe oborrin e Shkollës Fillore “Emin Duraku”.

Ndërsa, komuna rikujton se parkingu para objektit të komunës është ende në shfrytëzim. /Telegrafi