Category: Lajme

Kreu i Grupit Parlamentar të Partisë Socialiste, Taulant Balla, sërish e ka dënuar deklaratën e ministres serbe, Snezhana Paunoviq, duke e cilësuar atë si të turpshme dhe të papranueshme.

Paunoviq, në një intervistë, ishte shprehur se nëse do të ishte në vend të Sllobodan Millosheviçit, do ta kishte “pastruar etnikisht” Kosovën në vitin 1998.

Balla që për këtë deklaratë kishte reaguar ditë më parë, kurse të enjten ka folur edhe në foltoren e Kuvendit të Shqipërisë.

Ai ka thënë se qeveria shqiptare ka reaguar në kohë dhe se Shqipëria nuk tallet me çështjet kombëtare.

“Një deklaratë jo vetëm e papërgjegjshme, por indinjuese, e rëndë. Reagimi i qeverisë shqiptare ka qenë në kohë. Ne nuk tallemi me çështjet kombëtare dhe me qëndrimin e mbajtur në nivelin e qeverisë nga ministri i Jashtëm dhe në nivel politik.”, ka thënë Balla.
Ai ka thënë se deklarata e ministres serbe është dënuar edhe nga autoritetet politike dhe përfaqësuesit me të cilët komunikojnë në Komisionin Evropian në të gjitha nivelet.

“Shqipëria, kur reagon, reagon bashkë me aleatët e vet.”, ka thënë Balla.
Ai ka thënë se Edi Rama mbetet i vetëm kryeministër që çështjen e Kosovës e ka ngritur edhe në mes të Beogradit.

“Sa i përket Edi Ramës, është i vetmi kryeministër i këtij vendi i cili çështjen e Kosovës e ka ngritur në mes të Beogradit, duke deklaruar se Kosova është shtet i pavarur dhe se Shqipëria mbështet fuqimisht pavarësinë dhe anëtarësimin e Kosovës në NATO dhe BE”, është shprehur Balla.

Kryeministri në detyrë i Kosovës, Albin Kurti, ka pritur në takim lamtumirës ambasadorin e Zvicrës në Kosovë, Jurg Sprecher, me rastin e përfundimit të mandatit të tij në Republikën e Kosovës.

Kurti ka falënderuar ambasadorin zviceran për bashkëpunimin dhe kontributin e tij në forcimin e marrëdhënieve ndërmjet Kosovës dhe Zvicrës.

“E falënderova për bashkëpunimin e afërt dhe kontributin e çmuar në kultivimin e marrëdhënieve të shkëlqyeshme dhe forcimin e partneritetit ndërmjet dy shteteve”, ka shkruar Kurti.

Kryeministri theksoi se Zvicra ka qenë një nga mbështetëset më të mëdha të Kosovës që nga periudha e çlirimit, pavarësisë dhe zhvillimit institucional të vendit.

“Zvicra mbetet një nga mbështetëset më të mëdha të Kosovës nga çlirimi, pavarësia e deri te zhvillimi dhe forcimi i institucioneve të Republikës sonë”, u shpreh Kurti.

Ai ka vlerësuar gjithashtu rolin e diasporës kosovare në Zvicër, duke e cilësuar atë si një urë të rëndësishme lidhëse mes dy vendeve.

Sipas Kurtit, bashkëpunimi ekonomik dhe shkëmbimet tregtare mes Kosovës dhe Zvicrës pritet të marrin një hov të ri pas ratifikimit të marrëveshjes për tregti të lirë në kuadër të EFTA-s.

“Mërgata jonë e dashur është themel i lidhjes së fortë mes dy shteteve tona, që gradualisht dhe vazhdimisht po rrisin bashkëpunimin ekonomik dhe shkëmbimet tregtare”, ka deklaruar ai.

Në takim, Kurti ka përmendur edhe kontributin e Zvicrës në kuadër të misionit të KFOR-it dhe programit të Agjencisë Zvicerane për Zhvillim dhe Bashkëpunim (SDC).

Ai bëri të ditur se për periudhën 2026-2029 janë zotuar më shumë se 64 milionë franga zvicerane (CHF) apo rreth 68 milionë euro për Kosovën, pas 88 milionë CHF të ndara për periudhën 2022-2025.

Nga Qendra Klinike dhe Univeristare e Kosovës kanë dhënë detaje lidhur me punëtorin e KEK-ut, Milazim Binaku, i cili ka vdekur si pasojë e lëndimeve që kishte marrë në vendin e punës.

Që nga lëndimi i rëndë i tij, para rreth një jave, ai ka qenë duke u mjekuar në kujdesin intensiv të QKUK-së.

Por, nga kjo klinikë kanë thënë për Klankosova.tv se pacienti nuk ka arritur t’u mbijetojë plagëve të marra dhe se ka vdekur gjatë natës së mbrëmshme.

“Po fatkeqësisht pacienti që ju i referoheni nuk ka arrit t’u mbijetojë plagëve dhe i njëjti gjatë natës ka ndërruar jetë”, ka thënë për Klankosova.tv, shefi i Mjekimit Intensiv Qendror, Shaqir Uka.

Për vdekjen e tij, ka njoftuar edhe Sindikata e KEK-ut.

“Njoftojmë të gjithë punëtorët e KEK-ut se, një javë pas lëndimit që pësoi në vendin e punës, u nda nga jeta shoku, kolegu dhe bashkëpunëtori ynë i nderuar, Milazim Binaku. Në këto çaste të rënda, shprehim ngushëllimet tona më të sinqerta familjes Binaku, të afërmve, miqve dhe të gjithë bashkëpunëtorëve të tij. Qoftë i përjetshëm kujtimi për të dhe u prehtë në paqe.”, thuhet në njoftimin e sindikatës.

Ndryshe, 60-vjeçari ishte lënduar rëndë, pasi ishte goditur në kokë nga një mjet i fortë, teksa ishte duke punuar në Kosovamont, në kuadër të Korporatës Energjetike të Kosovës.

Prokuroria Speciale ka ngritur aktakuzë kundër të pandehurit I.K. për veprën penale “Nxitje e përçarjes dhe mosdurimit”.

Sipas aktakuzës, më 16 prill 2026, i pandehuri, përmes rrjetit social Facebook, dyshohet se me dashje ka ndërmarrë veprime me qëllim të nxitjes dhe përhapjes publike të urrejtjes dhe mosdurimit ndërmjet grupeve fetare.

“Aktakuza pretendon se i pandehuri i I.K., përmes veprimeve të tij inkriminuese, ka përhapur publikisht urrejtje dhe mosdurim ndërmjet grupeve fetare, duke cenuar bashkëjetesën ndërfetare në Republikën e Kosovës dhe duke rrezikuar rendin dhe qetësinë publike”, thuhet në njoftimin e Prokurorisë.

Çështja penale do të shqyrtohet nga Gjykata Themelore në Prishtinë, e cila do të vendosë lidhur me akuzat e ngritura.

Komuna e Kamenicës ka vazhduar mbështetjen për familjet me foshnja të porsalindura, duke shpërndarë 13 pako “Baby Box” me vlerë të përgjithshme prej 4,452.50 euro.

Sipas njoftimit të komunës, pakot janë ndarë nga nënkryetarja e Komunës, Arta Bajralija, në kuadër të programit të mbështetjes për familjet dhe të porsalindurit.

Komuna bëri të ditur se secila pako përmban produkte cilësore dhe të nevojshme për nënën dhe foshnjën, të mjaftueshme për përdorim deri në moshën njëvjeçare të fëmijës.

Gjatë ceremonisë së shpërndarjes, Bajralija uroi familjet për lindjen e 13 foshnjeve të të dy gjinive, duke theksuar rëndësinë e mbështetjes institucionale në këtë periudhë.

“Komuna mbetet e përkushtuar në mbështetjen e familjeve dhe mirëqenien e fëmijëve, duke vazhduar iniciativa që kontribuojnë në përmirësimin e cilësisë së jetës së qytetarëve”, ka deklaruar nënkryetarja Bajralija.

Sipas Komunës së Kamenicës, iniciativa “Baby Box” synon të lehtësojë kujdesin për foshnjat në vitin e parë të jetës dhe të ofrojë mbështetje konkrete për familjet në fazat e para pas lindjes së fëmijës.

Një 55-vjeçar nga Gjakova është raportuar i zhdukur, ndërsa familjarët kanë kërkuar ndihmën e qytetarëve për të siguruar informacione që mund të çojnë në gjetjen e tij.

Bëhet e ditur se Shani Krasniqi është larguar nga shtëpia dje rreth orës 09:00, me një veturë të tipit Golf 3, me ngjyrë të kaltër, dhe nuk është kthyer më.

Sipas familjarëve, ai është larguar pa telefon, dokumente personale dhe para.

Rasti është paraqitur në Policinë e Gjakovës, e cila ka ndërmarrë veprimet e nevojshme për lokalizimin e personit të zhdukur dhe zbardhjen e rrethanave të rastit.

Familja u ka bërë apel qytetarëve që kanë ndonjë informacion për vendndodhjen e Shani Krasniqit që të lajmërojnë Policinë e Kosovës ose familjarët./Syritv/

Profesori universitar i shkencave politike, Valon Murati, ka vlerësuar se rezultati i zgjedhjeve të fundit nuk ka sjellë zgjidhje për ngërçin politik në Kosovë, ndërsa nuk e ka përjashtuar mundësinë që vendi të shkojë sërish në zgjedhje të reja parlamentare.

Në një prononcim për Ekonomia Online, Murati tha se zhvillimet paszgjedhore dhe takimet ndërmjet partive politike nuk kanë prodhuar optimizëm për krijimin e institucioneve të reja.

“Rezultati i zgjedhjeve më ka bërë që të vazhdoj të jem skeptik për mundësinë e një zgjidhjeje, pra të ngërçit të cilin e kemi kaluar. Dhe po ashtu, bisedimet në njëfarë forme më shtuan këtë, ta them, pesimizëm për shkak të faktit se si u zhvilluan dhe çfarë prodhuan ato. Ishte e natyrshme që takimi mes Partisë Demokratike të Kosovës të përfundojë ashtu siç përfundoi, me një mundësi për të diskutuar për presidentin dhe jo për qeverinë. Kjo është krejtësisht e natyrshme sepse nuk ka kuptim që të ketë një koalicion qeveritar në këtë fazë mes zotit Kurti dhe PDK-së, ajo është ndërtuar si figurë politike mbi dikotominë kundër PDK-së dhe asaj fryme”, tha ai.

Sipas Muratit, as takimi ndërmjet Lëvizjes Vetëvendosje dhe LDK-së, dhe tani situata në të cilën ndodhet LDK-ja, nuk ka shpresa për një marrëveshje eventuale politike.

“Në anën tjetër, edhe takimi me LDK-në nuk ishte shumë shpresëdhënës, sepse vetë situata në të cilën ndodhet Lidhja Demokratike e Kosovës nuk jep shumë shpresë që aty ka një unitet dhe kohezion që të vazhdohet me ndonjë koalicion. Pra, edhe po të ketë kohezion, edhe po të ketë unitet, numrat janë shumë të brishtë, ta them ashtu, e për më tepër zoti Kurti prapë i vë kushtet e veta mbi 84-85 deputetë, të cilat pastaj me Lidhjen Demokratike të Kosovës asesi nuk i zhvilluan. Dhe e kishim situatën me Aleancën, e cila i kishte kushtet e veta dhe nuk shkoi në takim duke thënë që ‘ne vijmë në seancë nëse ato plotësohen’”, tha ai.

Murati tha se zgjidhja e vetme do të ishte një marrëveshje për një kandidat për president që do të ishte i pranueshëm për të gjitha palët.

“Kjo është një situatë e cila nuk jep, për mendimin tim, shumë shpresë se do të kemi një dalje nga ky ngërç. Daljen e shoh në një mënyrë të thjeshtë: nëse thjesht partitë opozitare pranojnë një kandidat që mund të jetë nga Vetëvendosja, apo një kandidat që do të jetë jo një kandidat i fortë politik. Për aq sa e njoh mendësinë politike të zotit Kurti, atë që e tregoi tash edhe ndaj presidentes Osmani, nuk është se ai do të pranojë ndonjë figurë të fuqishme, qoftë politike apo qoftë nga bota akademike dhe nga shoqëria civile, i cili mund t’i mbushë, ta them, ‘këpucët’ e presidentit. Të cilat realisht në sistemin tonë politik, juridik e kushtetues, nuk janë të lehta. Presidenti, ashtu siç po tregon edhe krejt ky ngërç politik, ka kompetenca. Është një balancues i pushteteve, por që ka kompetenca në disa fusha, sidomos në fushën e politikës së jashtme – ku mund ta hijezojë zotin Kurti, aty ku ky dëshiron të shkëlqejë – dhe po ashtu në fushën e sigurisë, e pamë edhe tash me emërimet në AKI, Agjencinë Kosovare të Inteligjencës. Pra, janë dy fusha në të cilat presidenti ka forcë reale. Natyrisht që ka dhe të tjera, e pastaj varet edhe prej personazhit dhe prej personalitetit politik”, tha ai.

Profesori i shkencave politike ngriti edhe mundësinë e një situate të paprovuar më parë në Kosovë, ku do të zgjidhej qeveria pa u zgjedhur paraprakisht presidenti.

“Kështu që, duke pasur parasysh këtë situatë, nuk jam shumë optimist që në këtë kontekst mund të vijmë te një situatë ku do të kemi një zgjidhje të kënaqshme për të gjithë. Kurti është në një pozicion komod, është kryeministër në detyrë, këtë situatë ai mund ta vazhdojë. Mund të futemi në një terren tjetër të pashkelur deri tash, ku partia në krye me Kurtin mund të vazhdojë të procedojë me zgjedhjen e kryeministrit pa zgjedhjen e presidentit, që jemi në një situatë të pashkelur, ku tash kryetarja e re e Kuvendit bëhet e para ushtruese e detyrës së presidentit, një situatë që nuk kemi qenë më herët. Edhe kjo mund të na fusë në një tjetër ngërç juridik-kushtetues, sepse partitë opozitare mund ta dërgojnë lëndën në Kushtetuese, se a do të duhej të zgjidhej së pari presidenti apo jo. Në këtë kontekst është vështirë të parashikohet, nuk jam optimisti më i madh se do të kemi ndonjë zgjidhje, mund të ketë gjasa se mund të shkojmë prapë në zgjedhje. Në anën tjetër, kjo situatë neve po na kushton, sepse këtë duhet ta themi. Po na kushton në planin financiar, të integrimeve, të zhvillimeve, të politikave. Ne nuk po e shohim që jemi duke jetuar në status quo dhe duke jetuar në status quo ne po shkojmë mbrapa. Shqipëria i mbylli tre kapituj dhe ne tash, në vend se të futemi në lokomotivën e Shqipërisë, po mbesim fatkeqësisht me Serbinë, e cila po e shohim çfarë ministrash pati në këtë deklaratën fashiste të fundit. Pra, edhe në këtë procesin e integrimeve jemi mbrapa, e kjo po them, do të na kushtojë shumë edhe në jetën e përditshme”, tha ai për Ekonomia Online.

Mbi 500 persona dyshohet se kanë humbur jetën pasi anijet me refugjatë u mbytën pranë Mianmarit
Read more

Policia e Shtetit ka finalizuar operacionin e koduar “Mekanizmi” në Sarandë, ku është arrestuar një 31-vjeçar i dyshuar për transportimin e armëve të zjarrit.

Sipas njoftimit të Policisë, operacioni u zhvillua si rezultat i një hetimi me metoda speciale, në drejtimin e Prokurorisë, me qëllim identifikimin dhe ndalimin e personave që dyshohet se përbëjnë rrezik për sigurinë publike.

Gjatë operacionit është arrestuar në flagrancë shtetasi me inicialet K. B., 31 vjeç, banues në Tiranë.

Policia bëri të ditur se automjeti që drejtonte i riu ishte mbajtur nën vëzhgim dhe ndalimi i tij u krye në tunelin e Skërficës.

“Nga kontrollet në automjet u gjetën të fshehura në dysheme 4 armë zjarri (pistoleta), që dyshohet se janë trafikuar në Shqipëri në pjesë dhe janë montuar më pas, me qëllim shitjen te një grup kriminal në Sarandë”, thuhet në njoftimin e Policisë së Shtetit.

Sipas hetimeve paraprake, armët dyshohet se ishin destinuar për t’u shitur te një grup kriminal në zonën e Sarandës.

Gjatë operacionit janë sekuestruar armët e zjarrit dhe automjeti i të arrestuarit, ndërsa hetimet vijojnë për identifikimin dhe nxjerrjen përpara përgjegjësisë penale të personave të tjerë të dyshuar si të përfshirë.

Materialet procedurale i janë referuar Prokurorisë për veprime të mëtejshme. /Telegrafi/