Category: KULTURË

Festivali i Filmit në Kanë ka mbyllur siparin, por vëmendja tashmë është zhvendosur te filmat që mund të dominojnë sezonin e ardhshëm të çmimeve Oscar. Shumë prej produksioneve që patën premierën në Kanë po konsiderohen si favoritë të hershëm, falë temave të forta, interpretimeve të vlerësuara dhe reagimeve pozitive nga kritika ndërkombëtare.

Ja disa nga filmat që po përfliten më së shumti:

“Fjord”
Fituesi i Palmës së Artë këtë vit, “Fjord”, me regji të Cristian Mungiu, trajton përplasjen mes konservatorizmit fetar dhe shoqërisë moderne. Filmi ndjek historinë e një çifti rumun që zhvendoset në Norvegji dhe përballet me akuza për abuzim ndaj fëmijëve. Në role kryesore luajnë Sebastian Stan dhe Renate Reinsve.

“Club Kid”
Një nga surprizat e festivalit ishte “Club Kid”, film i shkruar dhe drejtuar nga Jordan Firstman. Historia ndjek jetën e një djali të fiksuar pas festave, i cili zbulon papritur se ka një djalë 10-vjeçar. Kritikët e kanë krahasuar me suksesin “Anora” për shkak të humorit dhe emocionit që përcjell.

“La Bola Negra / The Black Ball”
Saga spanjolle me përmasa epike sjell tri histori të vendosura në periudha të ndryshme kohore dhe trajton mënyrën se si marrëdhëniet homoseksuale janë fshirë nga historia spanjolle. Në film luajnë Penélope Cruz dhe Glenn Close.

“Soudain / All of a Sudden”
Regjisori Ryusuke Hamaguchi rikthehet me një dramë emocionale që zhvillohet në Paris. Filmi trajton lidhjen mes një drejtoreshe azili dhe një dramaturgu japonez me kancer terminal. Edhe pse sfidues për publikun, kritikët e kanë cilësuar si një nga filmat më prekës të vitit.

“The Man I Love”
Rami Malek konsiderohet kandidat serioz për nominim, falë rolit të tij si këngëtar homoseksual me AIDS në Nju Jorkun e viteve ’80. Drama indie e Ira Sachs sjell një histori të ndjeshme për artin, sëmundjen dhe jetën.

“Notre Salut / A Man of His Time”
Kjo dramë historike e Emmanuel Marre fokusohet te bashkëpunimi i një burokrati francez me regjimin e Vichy-t gjatë Luftës së Dytë Botërore, duke sjellë reflektime të forta mbi diktaturën dhe moralin njerëzor.

“El ser querido / The Beloved”
Javier Bardem interpreton një regjisor të famshëm që zgjedh vajzën e tij për rolin kryesor në filmin e tij më të ri. Kritika e ka vlerësuar si një nga performancat më të mira të karrierës së aktorit spanjoll.

“Moulin”
Regjisori László Nemes rikthehet me një thriller historik mbi Jean Moulin, liderin e Rezistencës Franceze gjatë Luftës së Dytë Botërore. Filmi përshkruhet si një kombinim mes dramës së luftës dhe thrillerit psikologjik.

“Minotaur”
Andrey Zvyagintsev sjell një thriller kriminal të vendosur në Rusinë moderne. Filmi ndjek historinë e një oligarku që zbulon tradhtinë e bashkëshortes, ndërsa në sfond trajtohen edhe temat politike dhe lufta në Ukrainë.

Pas përfundimit të Festivalit të Kanës, këta filma po konsiderohen si pretendentët më seriozë për të qenë pjesë e garës së madhe në Oscar, ndërsa sezoni i çmimeve sapo ka filluar.

Në një ceremoni solemne të organizuar nga Bashkia e Përmetit, shkrimtari i njohur shqiptar me renome ndërkombëtare, Prof. Dr. Jeton Kelmendi, është nderuar me titullin “Qytetar Nderi” i qytetit të Përmetit.

Ky vlerësim i lartë i është dhënë në shenjë mirënjohjeje për kontributin e tij të jashtëzakonshëm në letërsinë bashkëkohore dhe për përfaqësimin dinjitoz të kulturës shqiptare në arenën ndërkombëtare.

Në motivacionin e dhënies së këtij titulli u theksua se Jeton Kelmendi është një ndër shkrimtarët më të njohur të Evropës, i përkthyer në 42 gjuhë të botës dhe laureat i dhjetëra çmimeve prestigjioze ndërkombëtare, duke u shndërruar kështu në një ambasador të shquar të kulturës shqiptare.

Akademik Jeton Kelmendi është gjithashtu profesor universitar, i cili ligjëron në Kolegji AAB në Prishtinë, si dhe ka mbajtur ligjërata në disa universitete në Shtetet e Bashkuara të Amerikës.

Ceremonia u zhvillua në një atmosferë festive, me pjesëmarrjen e personaliteteve të kulturës, institucioneve vendore dhe dashamirësve të letërsisë.

Në Bibliotekën Kombëtare të Kosovës “Pjetër Bogdani” në Prishtinë, sot nga ora 12:00 bëhet prezantimi i poemës së parë epike femërore evropiane, “La Scanderbeida” e Margherita Sarrocchi-t (1623), botuar për herë të parë e plotë nga prof. Olimpia Gargano dhe inaugurimi i ekspozitës “Këndo, o Muzë, Trimërinë” – Shqipëria, Italia dhe Perandoria Osmane në Poemën e Parë Epike Femërore Evropiane.

Gjithashtu, prof. Giuseppe Gargano do të prezantojë edhe “Itineraret Kastriotiane” në Amalfi.

Kjo ngjarje realizohet në bashkëpunim mes Institutit të Gjuhës dhe Kulturës Italiane të Universitetit të Prishtinës, Bibliotekës Kombëtare të Kosovës, Ambasadës së Italisë në Prishtinë dhe Ministrisë së Kulturës dhe Turizmit.

Produksioni i serialit turk “Eşref Rüya” ka dalë me një njoftim zyrtar, duke konfirmuar se rrugëtimi i këtij projekti televiziv po shkon drejt fundit.

Përmes një postimi në faqen zyrtare, TİMSBİ Productions bëri të ditur se seriali, që ka mbajtur të mbërthyer publikun para ekranit të Kanal D, do të mbyllet shumë shpejt. Njoftimi, i titulluar “Vetëm edhe 3 episode deri në Finalen e Madhe”, paralajmëron se historia po përgatitet për përfundimin e saj përfundimtar.

Në deklaratën e tyre, produksioni thekson se: “Disa histori nuk bëhen të paharrueshme sepse zgjasin shumë, por sepse prekin zemrën”. Sipas tyre, seriali do të përfundojë në një mënyrë që i përshtatet “shpirtit” të tij, duke lënë pas personazhe dhe momente që do të mbeten gjatë në kujtesën e shikuesve.

View this post on Instagram

A post shared by Eşref Rüya (@esrefruyadizitv)

Produksioni shfrytëzoi këtë moment për të shprehur mirënjohje për të gjithë ata që kontribuan në këtë “udhëtim të bukur” – nga aktorët dhe ekipi prapa kamerave, deri te audienca që e ka ndjekur me besnikëri gjatë gjithë transmetimit.

Menjëherë pas publikimit të njoftimit, rrjetet sociale u mbushën me reagime nga fansat, të cilët shprehën keqardhje për këtë vendim. Shumë e konsideruan mbylljen të parakohshme, duke theksuar se historia kishte ende hapësirë për t’u zhvilluar më tej, sidomos rreth personazheve kryesore dhe marrëdhënieve mes tyre.

Tashmë pritet që tri episodet e fundit të sjellin një mbyllje emocionale dhe vendimtare për publikun që e ka ndjekur serialin nga fillimi.

Prizreni këtë verë do të shndërrohet në qendrën më të madhe të muzikës rock dhe blues në rajon. Më 3, 4 dhe 5 korrik 2026, “Rock & Blues Fest Prizren” sjell tri net të mbushura me energji, emocione dhe performanca spektakolare nga artistë dhe bende të njohura shqiptare e ndërkombëtare. Në një atmosferë unike, mes tingujve klasikë të rock-ut dhe ritmeve të fuqishme blues, festivali premton të bashkojë mijëra adhurues të muzikës në zemër të Prizrenit historik.

Line-up-i i festivalit përfshin emra legjendarë dhe artistë të dashur të skenës alternative: Led Zeppelin 2, Telex, Kolpa, Dire Straits Legacy, TNT, Attitude GNR Band, 3 Musketeret, BB Poqi, Zwada, Hawolf, Dhjetori, Rool, Urban Band, Flavia Zere, Beska & All Stars Band dhe Doludizgin.

Led Zeppelin 2
Një nga tributet më të famshme të grupit legjendar Led Zeppelin. Banda rikthen atmosferën autentike të viteve të arta të rock-ut klasik me performanca energjike dhe interpretim besnik të hiteve ikonike si “Whole Lotta Love” dhe “Stairway to Heaven”.

Telex
Një nga grupet më të dashura të rock-ut shqiptar ndër vite. Telex ka lënë gjurmë në muzikën shqiptare me stilin e tyre melodik dhe tekstet që kanë prekur breza të tërë.

Dire Straits Legacy
I formuar nga ish-anëtarë të Dire Straits, ky projekt muzikor sjell magjinë e një prej grupeve më të mëdha rock në histori. Publiku do të ketë mundësinë të dëgjojë live klasikët si “Sultans of Swing”, “Money for Nothing” dhe “Brothers in Arms”.

BB Poqi
Artist i njohur shqiptar me stil unik dhe energji të veçantë në skenë. BB Poqi sjell kombinim të rock-ut urban dhe elementeve alternative që e bëjnë performancën e tij gjithmonë të paharrueshme.

Dhjetori
Grup alternativ shqiptar që ka fituar popullaritet me tingullin modern dhe atmosferik. Muzika e tyre kombinon emocione introspektive me elemente indie dhe alternative rock.

Beska & All Stars Band
Një projekt muzikor që bashkon muzikantë të talentuar në një performancë dinamike me influenca rock, blues dhe funk, duke krijuar atmosferë festive për publikun.

Këto janë vetem disa nga bendet në mesin e shumë te tjerave qe do të performojnë këtë vit.

Përgatituni për tri net të paharrueshme me muzikë live, atmosferë elektrizuese dhe emocione që vetëm rock-u mund t’i sjellë. “Rock & Blues Fest Prizren 2026” premton të jetë një nga ngjarjet më të mëdha muzikore të vitit në Kosovë dhe rajon!

Në ambientet e Konsullatës së Përgjithshme të Republikës së Kosovës në New York do të mbahet promovimi i romanit “Një fije shprese, Një fije shkrepëse” të autorit Ag Apolloni.

Ngjarja organizohet nën kujdesin e ambasadorit Blerim Reka dhe do të ketë si folës profesorin David Damrosch.

Promovimi do të mbahet sot më 21 maj 2026, në ora 17:30, në adresën 801 2nd Ave, Suite 301, New York.

“Një fije shprese, Një fije shkrepëse” është një roman dokumentar (dokuroman) i botuar në vitin 2020. Libri trajton pasojat rrëqethëse të luftës në Kosovë përmes përshkrimit të tragjedisë së nënave shqiptare, veçanërisht historisë së Ferdonije Qerkezit nga Gjakova dhe Pashke Markut nga Zllakuqani, të cilat humbën djemtë dhe familjarët e tyre.

Romani sjell një reflektim të fuqishëm mbi dhimbjen, kujtesën dhe qëndresën njerëzore, ndërsa aktiviteti pritet të mbledhë komunitetin shqiptar dhe dashamirësit e letërsisë në SHBA.

Filmi “Dua” me skenar nga regjisorja Blerta Basholli dhe Nicole Borgeat ka shënuar një hap të rëndësishëm në rrugëtimin e tij ndërkombëtar, duke u vlerësuar me çmimin “SACD” në Festivalin e Kanës, në kuadër të programit paralel “Semaine de la Critique” apo Java e Kritikës.

Çmimi “SACD” jepet nga Shoqata e Autorëve dhe Kompozitorëve Dramaturgjikë në Francë dhe synon të vlerësojë filma që dallohen për skenar të fortë, origjinalitet dhe qasje të veçantë artistike.

Ky çmim ndahet gjatë programit paralel të Kanës, i cili i dedikohet kryesisht zbulimit të regjisorëve të rinj dhe filmave me stil autorial.

Filmi Dua flet për fundin e viteve 90-ta në Kosovë. Derisa lufta po afrohet dhe tensionet etnike po rriten, 13-vjeçarja Dua përpiqet të gjejë vendin e saj mes bashkëmoshatarëve dhe brenda trupit të saj që po ndryshon.

Pas një incidenti që trondit komunitetin e saj, ajo vetë bëhet shënjestër dhe krijon një shoqëri me një vajzë të guximshme, Maki, e cila e çon drejt një forme të papritur rezistence.

Mes dhunës së përditshme dhe kërcënimit gjithnjë e më të madh të dëbimit, mbetet pak hapësirë për zgjime të qeta.

Kasti i filmit përbëhet prej aktorëve sikurse: Pinea Matoshi, Vlera Bilalli, Kaona Matoshi, Yllka Gashi, Kushtrim Hoxha dhe Andi Bajgora, të cilët sjellin në jetë personazhet e këtij rrëfimi.

Filmi vetëm para pak ditësh e kishte pasur premierën botërore në festivalin e Kanës.

Filharmonia e Kosovës, në bashkëpunim me Korin dhe Orkestrën e Fakultetit të Arteve, do të mbajë një koncert në Mitrovicë më 21 maj 2026, në orën 19:30, në Qendrën e Kulturës “Rexhep Mitrovica”.

Koncerti, i titulluar “Skena Iuvenis”, do të realizohet nën dirigjimin e studentëve të drejtimit të dirigjimit dhe sjell në program vepra të rëndësishme të repertorit artistik. Në mbrëmje do të interpretohet premiera e veprës “Suite shqiptare” nga Landi Surdulli, si dhe “Mesha në D-dur” e kompozitorit Antonín Dvořák.

Ngjarja organizohet me mbështetjen e Ministrisë së Kulturës dhe Turizmit të Republikës së Kosovës dhe Komunës së Mitrovicës së Jugut.

Filmi biografik “Michael” ka kaluar shifrën prej rreth 646 milionë euro në arkëtimet globale.

Vetëm gjatë fundjavës së fundit fitoi rreth 53 milionë euro në 83 tregje ndërkombëtare dhe u rikthye në vendin e parë në ‘box office’.

Në ShBA ka fituar afërsisht 259 milionë euro, ndërsa jashtë SHBA-së rreth 387 milionë euro.

Meqë filmi ende nuk është shfaqur në Japoni, pritet që të tejkalojë edhe “Bohemian Rhapsody”, i cili kishte arkëtuar rreth 838 milionë euro globalisht.

Një tjetër sukses i madh është “The Devil Wears Prada 2”, që deri tani ka fituar rreth 500 milionë euro globalisht.

Nga këto, rreth 162 milionë euro janë nga Amerika e Veriut dhe 340 milionë euro nga tregjet ndërkombëtare.

Filmi ka pasur sukses të madh sidomos në Mbretërinë e Bashkuar, Itali, Brazil dhe Meksikë.

Disney investoi rreth 92 milionë euro për prodhimin e tij.Ndërkohë, “Mortal Kombat 2” pati rezultate më të dobëta.

Filmi fitoi vetëm rreth 9.2 milionë euro gjatë fundjavës së fundit jashtë ShBA-së dhe ka arritur gjithsej rreth 93 milionë euro globalisht, ndërsa buxheti i prodhimit ishte afërsisht 74 milionë euro.

Edhe “Sheep Detective” vazhdon të jetë në kinema, me fitime totale prej rreth 54 milionë euro globalisht.

Filmi me Hugh Jackman kushtoi rreth 69 milionë euro për t’u realizuar dhe ende ka nevojë për më shumë sukses në kinema për të justifikuar investimin.

Në Akademinë e Shkencave dhe Arteve të Kosovës, sot nga ora 11:00 do të bëhet promovimi i librit “Reflections on Seismic Design”, i autorit Mentor Llunji, inxhinier konstruktor me mbi 20 vite përvojë profesionale.

Libri është përmbledhje mendimesh personale mbi të tashmen dhe të ardhmen e projektimit sizmik dhe trajton pyetjet dhe çështjet me të cilat autori është përballur gjatë më shumë se dy dekadave të projektimit të strukturave në zona sizmike.

Në këtë libër pasqyrohen këndvështrimet mbi filozofinë bashkëkohore të projektimit sizmik, te metat dhe përparësit e saj, duke ofruar një vështrim kritik mbi kodet e ndërtimit dhe rëndesinë e përgatitjes përmbajtesore të inxhinierëve që pretendojnë të projektojnë në zona sizmike.

Mesazhi kryesor i librit është që projektimi sizmik nuk ka të bëjë me saktësinë, por me kuptimin që synon t’u kujtojë inxhinierëve se asgjë në këtë fushë nuk është e pakontestueshme.

“Reflections on Seismic Design”, bën thirrje për një rikthim te bazat e profesionit, te mendimi i pavarur dhe kritik, me qëllimin kryesor për të mbështetur inxhinierët në formimin e qasjes së tyre personale ndaj projektimit të strukturave rezistente ndaj tërmeteve.

Libri i është dedikuar viktimave të tërmeteve të Kahramanmaraşit të vitit 2023.