Category: KULTURË

Në 90-vjetorin e lindjes së Bekim Fehmiu, rikthehet kujtimi për një nga figurat më të mëdha të kinematografisë shqiptare dhe asaj botërore. I lindur më 1 qershor 1936 në Sarajevë, Fehmiu u rrit mes Shkodrës dhe Prizrenit, qytet me të cilin lidhi një pjesë të madhe të jetës dhe kujtimeve të tij.

Hapat e parë në aktrim i bëri që në rini, ndërsa më vonë u bë aktori i parë shqiptar i diplomuar në Akademinë për Teatër dhe Film në Beograd. Talentin e tij e dëshmoi shpejt në teatër dhe film, duke arritur të depërtojë në skenën ndërkombëtare në një kohë kur kjo ishte pothuajse e pamundur për një aktor shqiptar.

Roli i tij në Mbledhësit e Puplave dhe seriali Odiseu e kthyen në një emër të njohur ndërkombëtarisht. Ai luajti në shumë vende të botës dhe përkrah emrave më të mëdhenj të filmit, duke u bërë një nga aktorët shqiptarë me përmasa globale.

Megjithatë, pavarësisht suksesit të madh, Bekim Fehmiu mbeti një figurë që shpesh u la në heshtje në vendin e tij. Ai u nda nga jeta në vitin 2010, por emri dhe vepra e tij vazhdojnë të mbeten simbol i talentit, dinjitetit dhe artit shqiptar.

Sepse artistë si Bekim Fehmiu nuk largohen kurrë plotësisht — ata mbeten të gjallë në çdo skenë, film dhe kujtim që vazhdon t’i duartrokasë koha.

Rita Ora është pjesë e ekipit të producentëve ekzekutivë të dokumentarit Jail Time Records, i cili do të ketë premierën botërore në kuadër të Tribeca Festival.

Dokumentari sjell një histori të veçantë nga Burgu Qendror i Doualës në Kamerun, ku një grup të burgosurish krijojnë muzikë brenda një studioje regjistrimi të ndërtuar në ambientet e burgut. Filmi ndjek rrugëtimin e tyre artistik dhe mënyrën se si muzika shndërrohet në shpresë dhe motivim edhe në kushte të vështira jetese.

Përveç Rita Orës, në mesin e producentëve ekzekutivë është edhe Taika Waititi. Dokumentari është realizuar nga regjisorët Dione Roach dhe Steve Happi, të cilët fokusohen te fuqia që muzika ka për të ndryshuar dhe bashkuar njerëzit.

“Jail Time Records” do të shfaqet në disa seanca gjatë Tribeca Festival në New York, duke sjellë para publikut një histori ndryshe për artin, shpresën dhe jetën pas mureve të burgut.

Robert De Niro ka zbuluar disa nga filmat që kanë ndikuar më së shumti në rrugëtimin e tij artistik gjatë një vizite në “Criterion Closet”, hapësira e njohur e koleksionit filmik të “The Criterion Collection”.

Mes filmave që ai përzgjodhi ishin klasikë të njohur italianë si Big Deal on Madonna Street, Mafioso dhe Divorce Italian Style, për të cilët foli me shumë admirim. De Niro tregoi gjithashtu se kishte biseduar me Martin Scorsese për mundësinë e realizimit të një versioni të ri të filmit “Mafioso”.

Aktori ndau kujtime edhe nga përvoja e tij në filmin One Hundred and One Nights të regjisores Agnès Varda, ku një nga sfidat më të mëdha për të kishte qenë të fliste frëngjisht përkrah aktores Catherine Deneuve.

Në fund, De Niro zbuloi se filmi i tij i preferuar nga regjisori legjendar Federico Fellini mbetet La Dolce Vita, duke kujtuar emocionet kur pati rastin ta shihte vetë Fellinin në premierën e filmit në Nju Jork.

“Criterion Closet” vazhdon të mbetet një nga formatet më të dashura për adhuruesit e kinemasë, ku emra të mëdhenj të industrisë ndajnë filmat që kanë ndikuar në jetën dhe karrierën e tyre.

Prizreni do të mirëpresë edhe këtë verë edicionin e katërt të festivalit “Prizren Rock n Blues Fest”, i cili do të mbahet më 3, 4 dhe 5 korrik, me premtimin për një program më të madh dhe plot befasi për publikun.

Në tri net magjike, në dy skena gjigante, në lokacionin përballë kompleksit sportiv Sezai Surroi, ngjiten virtuozët vendorë dhe ndërkombëtarë të skenës së rock-ut dhe blues-it.

Dire Straits Legacy vjen me ritmet e paharruara të rock-ut botëror.

Telex, gjigantët e rock-ut dhe funk-ut nga Shkupi, rikthejnë hitet evergreen në skenë pas shumë vitesh.

Rock-bendi i njohur turk Kolpa vjen për herë të parë për një performancë të paharruar në vendin më të bukur, në Prizren.

Jo vetëm kaq.

Në skenë rikthehen ritmet e kolosëve të muzikës rock, me performancat e Led Zeppelin 2 dhe Attitude Guns N’ Roses Band.

Bombastik si asnjëherë më parë, grupi i njohur TNT sjell muzikën autentike.

BB Poqi, në jubileun e tij të 40-të, do të sjellë performanca të paharruara.

3 Mosketjerët do të dëshmojnë simbiozën fantastike të tri legjendave të muzikës shqiptare rock.

Në skenën e madhe të Prizren Rock n Blues ngjiten edhe Zwada, Hawolf, Rool, Urban Band, Flawia Zere, Beska and All Star Band dhe Dolludizgin.

Më 3, 4 dhe 5 korrik, tri net energjike, në lokacionin përballë sallës Sezai Surroi, nën qiellin e hapur, në vendin më të bukur, në Prizren.

Emily in Paris do të përfundojë zyrtarisht pas sezonit të gjashtë, duke i dhënë fund një prej serialeve më të ndjekura dhe më të komentuara të viteve të fundit në Netflix.

Lajmi është konfirmuar nga krijuesi i serialit, Darren Star, i cili falënderoi publikun për mbështetjen dhe dashurinë që i kanë dhënë historisë së Emily Cooper ndër vite.

Seriali ndjek jetën e Emily-t, një vajzë amerikane nga Çikago, e interpretuar nga Lily Collins, e cila zhvendoset në Paris për punë dhe përballet me sfida të ndryshme mes karrierës, dashurisë dhe jetës sociale në kryeqytetin francez.

Sipas Netflix, xhirimet për sezonin final tashmë kanë nisur në Greqi, ndërsa një pjesë e skenave do të realizohen edhe në Paris dhe Monako. Sezoni i ri pritet të vazhdojë historinë e lënë pezull në fund të sezonit të pestë, ku Gabriel, personazhi i luajtur nga Lucas Bravo, e fton Emily-n në një udhëtim romantik në Greqi.

Që nga publikimi në vitin 2020, “Emily in Paris” është kthyer në një fenomen global, duke frymëzuar trende mode, meme dhe interes të madh për Parisin. Megjithatë, seriali është përballur edhe me kritika për mënyrën e idealizuar dhe stereotipike me të cilën e paraqet jetën në Francë.