Category: KULTURË

Piramida e Tiranës ka marrë një tjetër çmim nga juria e “WAN Awards EMEA”, vlerësuese e projekteve arkitekturore më novatore nga e gjithë bota.

Kryeministri Edi Rama bëri sot të ditur se juria e “WAN Awards EMEA”, e cilëson Piramidën e Tiranës si një “projekt të guximshëm”, të hapur për publikun, dhe e rrethuar nga një ansambël kutish shumëngjyrëshe, të shpërndara brenda dhe përreth ndërtesës origjinale.

Juria e “WAN Awards EMEA” vlerëson se transformimi i Piramidës tregon se si një ndërtesë mund të përshtatet për një “erë të re”, duke ruajtur historinë e saj komplekse.

“Në vend që struktura të shembej më kot, guaska e saj e fortë prej betoni është përshtatur sipas parimeve të “ekonomisë qarkulluese”. Fletë të mëdha xhami me nivele zëvendësojnë xhamat midis trarëve të betonit të Piramidës, duke mbrojtur brendinë nga shiu, ndërsa njëkohësisht e mbajnë atë të hapur ndaj elementëve të natyrës”, vlerëson juria.

Arkitektja e njohur Eva Jiricna, kryetare e jurisë së “WAN Awards EMEA” vlerësoi projektuesit për këtë zgjidhje kaq të mirë, “për t’i treguar publikut se pak humor mund të shërojë edhe plagët më të thella”./ATSH/

Në nderim të 25-vjetorit të çlirimit të Kosovës, u mbajt “Mbrëmje poetike me poetët e Simfonisë”, me ç’rast u lexuan vargje poezish.

Në mesin e poetëve ishin edhe Lulzim Tafa, Bujar Tafa, Ibrahim Berisha, Milazim Krasniqi, Sali Bashota, Binak Kelmendi, Osman Gashi, Naime Beqiraj, Aziz Mustafa, Xhevahire Izmaku, Isuf Hoxha e Arben Veselaj.

Ndryshe, ky ishte edicioni i dytë “Mbrëmje poetike me poetët e Simfonisë”, i cili ka për qëllim t’i mbledhë poetët më të mirë.

Agjencia Shtetërore e Arkivave të Kosovës në bashkëpunim me Drejtorinë e Përgjithshme të Arkivave të Shqipërisë, kanë hapur ekspozitën “Rizgjimi në vlerat Kombëtare, Kosova Republikë”, në të cilën janë prezantuar dokumente të demonstratave nga viti 1981.

Drejtori ekzekutiv i Agjencisë Shtetërore të Arkivave të Kosovës, Bislim Bislimi derisa ka treguar më shumë për këtë ngjarje, ka theksuar se këtu paraqiten edhe materiale që lidhen me relacionin e shtypit amerikan të vendit tonë.

“Sot Agjencia Shtetërore e Arkivave të Kosovës bashkë me arkivin e Shqipërisë në kuadër të shënimit të përvjetorit jubilar të çerekshekullit të parë të lirisë së Kosovës, sjell para publikut ekspozitën e radhës me titull “Rizgjimi në vlerat Kombëtare, Kosova Republikë”, që përmes materialeve e fakteve dokumentare që gjenden në institucionet tona arkivore, që d.m.th të vërtetat burimore të pakontestueshme rikthejmë për kujtim, vlerësim e rivlerësim një pjesë të shkëmbimeve e aktiviteteve politike, mediatike, kulturore, që paraprin epokës së rizgjimit tonë që nga demonstratat e vitit 1981 e tutje deri në arritjen e lirisë sonë. Po ashtu, paraqiten materiale që lidhen me relacionin e shtypit amerikan të vendit tonë, shkrime e artikuj të botuar, dokumente të ambasadës shqiptare në Beograd dhe takimet që ndodhen ”, tha ai.

Ndërsa, Lorenc Agalliu nga drejtoria e përgjithshme e Arkivave të Shqipërisë, ka thënë se kjo ekspozitë që po prezantojnë së bashku është vetëm një copëz e gjithë sasisë të madhe dokumentare që arkivat disponojnë për historinë e Kosovës.

“Kjo ekspozitë që po prezantojmë së bashku është vetëm një copëz e gjithë sasisë të madhe dokumentare që arkivat disponojnë për historinë e Kosovës. Çlirimi i Kosovës nuk do të ishte iniciuar pa këtë ngjarje që po ekspozojmë sot, sepse pikërisht në këto data në vitet 70-81 janë nisur nder revoltat e para të popullit shqiptar të Kosovës për shpalljen e Kosovës të pavarësuar në masë”, tha ai.

Presidentja e Kosovës, Vjosa Osmani, ka ndarë pamje nga koncerti për Ditën e Çlirimit, që është mbajtur të shtunën në Prishtinë, teksa ka komentuar edhe prezencën e këngëtares Shkurte Fejza në koncert, duke i uruar edhe për 50 vite karrierë.

Osmani, ka thënë se zëri i këngëtares së muzikës popullore jeton në çdo cep të hapësirës shqiptare, raporton Ekonomia Online.

“Në kohët më të vështira kur synohej shfarosja jonë, ajo i dha gjithë popullit të Kosovës zë nëpërmjet këngës. U shndërrua në zërin e lirisë”, ka thënë presidentja Osmani.

Postimi i plotë:

Zëri i Shkurte Fejzës për gjysmë shekulli jehon cep më cep hapësirës shqiptare. “Xhamadani vija-vija” dhe “Mora fjalë”, janë himnet tona të përbotshme, të përjetësuara nga zëri magjik i të madhes sonë.

Në kohët më të vështira kur synohej shfarosja jonë, ajo i dha gjithë popullit të Kosovës zë nëpërmjet këngës.

U shndërrua në zërin e lirisë!

Urime për 50 vite të arta Shkurte Fejza! Të këndoftë zemra përgjithmonë!

Në nderim të jetës dhe veprës së akademik Rexhep Ferrit, është mbajtur mbledhja komemorative në Akademinë e Shkencave dhe Arteve të Kosovës, në të cilën është kujtuar vepra e tij, ndërsa të pranishmit kanë bërë edhe homazhe.

Kryetari i Akademisë së Shkencave dhe Arteve të Kosovës, Mehmet Kraja ka theksuar se Republika jonë është e artit dhe veprave si shkak i artistëve siç është Rexhep Ferri.

Kraja ka thënë se Ferri ka zënë një vend nderi në historinë e artit të Kosovës.

Ndërsa, kryeministri i vendit, Albin Kurti ka derisa ka kujtuar figurën e tij, ka thënë se nga veprat e intelektualit Ferri do të mësojnë të gjithë brezat, ndërsa ka shtuar se i njëjti do të kujtohet përherë si artisti më i veçantë.

“Kreshnik e patriot, Rexhep Ferri nuk do të na lë dot. Vepra e tij është shumë e madhe, do t’i përcjellë gjitha brezat e rinj që kanë shumë për të mësuar nga ai. Sot nuk jemi mbledhur vetëm për të kujtuar një artist, por për një intelektual i shquar që do të vazhdojë të na ndriçojë rrugën, do të kujtohet përherë si artisti modernist, si artisti më i veçantë. Figura e tij do të flet panumërta dekada për të”, tha Kurti.

Përfaqësuesi i familjes Ferri, Naser Ferri ka thënë se sot përveç familjes edhe për mbarë shqiptarinë është ditë e dhimbshme, pasi vendi ka humbur një intelektual të shquar.

Ai është shprehur se piktori Ferri pas vetes ka lënë një veprimtari të pastër artistike për të gjitha gjeneratat.

Kryeministri i Kosovës, Albin Kurti, përmes një letre e ka ngushëlluar familjen e profesorit të ndjerë, Rexhep Ferri.

Duke shprehur ngushëllime në emër të popullit dhe Qeverisë së Kosovës, kryeministri tha se Rexhep Ferri, piktor, profesor dhe shkrimtar, ishte një figurë e ndritur e kulturës dhe artit tonë kombëtar e cila nuk do të harrohet kurrë.

“Me dhimbje të thellë morëm lajmin për ndarjen nga jeta të Rexhep Ferrit. Ju shpreh ngushëllimet më të sinqerta në emër të popullit dhe Qeverisë së Kosovës. Rexhep Ferri, piktor, profesor dhe shkrimtar, ishte një figurë e ndritur e kulturës dhe artit tonë kombëtar e cila nuk do të harrohet kurrë”, shkroi Kurti.

“Profesori jonë i nderuar, doajeni i shquar Rexhep Ferri që nga fillimet e tij në Pejë, deri te kontributet e tij si pedagog dhe anëtar i Akademisë së Shkencave dhe Arteve të Kosovës la një trashëgimi të pasur artistike dhe edukative. Veprat e tij janë vlerësuar lart nga kritika dhe ai ka ndihmuar në formimin dhe ngritjen e shumë artistëve të rinj. Republika e Kosovës do të përkujdeset që vepra e tij të dokumentohet, të mbrohet dhe që çdo gjeneratë e re ta njoh veprën e tij”.

“Kosova humbi një nga figurat më të rëndësishme të artit dhe kulturës. Ngushëllimet tona më të sinqerta për familjen, miqtë dhe të gjithë ata që patën nderin ta njohin dhe të punojnë me të. Le ta kujtojmë dhe nderojmë gjithmonë jetën dhe veprën e Rexhep Ferrit”.

Përgatiti: Kastriot Tahiri

Për pesë ditë radhazi, Pallati i Rinisë në Kryeqytet do të jetë vendtakim për shumë dashamirë të librit.

Edicioni i 24-t i Panairit të Librit nisi të mërkurën, me moton “Përgjigjja është libri”.

Sivjet marrin pjesë rreth 100 shtëpi botuese, me mbi dy mijë tituj.

Organizatorët sivjet i presin rreth 40 mijë vizitorë.

“Sot puna e netëve të vona e redaktorëve e mundi i madh i botuesve është materializuar në mjetin magjik të quajtur libër afrohet te lexuesi”, tha kryetari i Shoqatës së Botuesve të Kosovës, Edon Zeneli.

Ky organizim tradicional, u cilësua si nga më të bukurit në Kosovën e pasluftës.

“Ne pas pak ditësh e festojmë 25-vjetorin e çlirimit të vendit tonë, ndërsa 24 vjet panairi i librit një përkushtim i jashtëzakonshëm edhe po besoj që titujt e rinj që i janë shtuar tregut të librit në vendin tonë, janë një mundësi shtesë jo vetëm sa është panairi i hapur por edhe për lexuesin që të kenë mundësi të reja dhe të lexojnë edhe autorë të vendit, por edhe të njohur nga bota të përkthyer”, tha Hajrulla Çeku, ministër i Kulturës.

“Është një mundësi për të mbështetur talentet e rinj ta shfrytëzojmë këtë moment për të lexuar më shumë dhe ndarë njohuritë tona”, tha drejtoresha e Kulturës në Prishtinë, Sibel Halimi.

Edhe sivjet, sikur në 21 edicione radhazi, vend në panair zunë edhe botimet akademike të shtëpisë botuese të Kolegjit AAB, me rreth 120 tituj.

Për vizitë këtu erdhi ish-presidenti Fatmir Sejdiu, që ndau dedikime për librin e tij “Ora e Kosovës”, që prezantohet në tezgën e AAB-së.

“Shtëpia botuese këtë vit ka 120 tituj librash, 80 prej tyre i kemi të ekspozuara…”, tha Urim Sallauka, përfaqësues i Shtëpisë Botuese të Kolegjit AAB.

I ftuari i nderit i këtij edicioni ishte shkrimtari francez Éric Faye, fitues i Çmimit të Madh për roman të Akademisë Franceze dhe i Çmimit Deux-Margots.

Panairi i Librit organizohet në bashkëpunim nga Ministria e Kulturës, Komuna e Prishtinës dhe Pallati i Rinisë.

PËRGATITI: ARIAN HAJDARAJ

Kjo këngë për Skenderbeun, prej qindra vitesh këndohej në shtëpitë e arbëreshëve të Kroacisë.

Muzikologia, Dina Busic, këngën për heroin e kombit shqiptar e gjeti gjatë hulumtimeve në kuadër të studimeve në akademinë e muzikës në Zagreb.

Tani, para publikut shqiptar në Teatrin Kamertal të Kolegjit AAB për herë të parë, e interpretoi bashkë me kitaristen Melita Ivkovic, krahas dhjetëra këngëve tjera arbëreshe, pjesë e albumit “Bërbili”.

Studimin dhe kultivimin e këngëve arbëreshe, të cilin e quan “’thesar i harruar”, Busiç, e kishte nisur rastësisht, për t’ia kushtuar pastaj tërë angazhimin profesional.

Angazhimi i muzikologes Busic, ka ndikuar që këngët e vjetra arbreshe të këndohen sërish në Zarë.

Sipas prorektores së kolegjit AAB, Venera Llunji, ruajtja e këngëve arbëreshe është i rëndësishëm për kulturën e kombit shqiptar.

Me këtë koncert në teatrin kamertal të kolegjit AAB, edhe u mbyll java e kulturës kroate.

Paraprakisht, në këtë institucion arsimor, për dialektin abresh dhe për arritjen e tij në Zarë të Kroacisë në shekullin e 18, ligjëroi linguistja arbreshe, Maximiliana Barançiq./atvlive.tv/

Për më shumë klikoni në linkun e mëposhtëm:

https://youtu.be/WJd-6Ffuxl8?si=fAXmED2bNJYuFMaA