Category: KULTURË

Festivali Ndërkombëtar ‘Prizren Rock and Blues Music Festival’, i cili tashmë është gati për të nisur edicionin e 3-të do të mbahet nga data 11-13 korrik 2025.

Festivali mëton që të ruajë elementet e përbashkëta të muzikës ‘rock and blues’, historisë, ndjenjës sublime të dashurisë dhe revoltës.

Kujtojmë se në programin e edicionit të dytë kishte emra të dalluar, si Frank Gambale dhe All Star Band, pastaj “Dirty Loops”, “Metal de Facto”, Maya Band, Vlatko Stefanovski Trio Band, Samuli Federley, etj.

Sot, përkujtohet 60-vjetori i ndarjes nga jeta i njërit prej personaliteteve më të rrallë kombëtarë Fan Stilian Noli.

Ai lindi më datën 6 janar të vitit 1882 në Ibrik Tepe në Edrene Turqi me emrin Theofanes StylianosMavromatis dhe u nda nga jeta më datën 13 mars të vitit 1965 në Ford Laurderdale, Florida të SHBA.

Noli gjithmonë e konsideronte veten shqiptar dhe shpesh përmendte me krenari prejardhjen e familjes së tij që vinte nga qyteza e Kolonjës. Noli gjatë jetës së tij ka pasur një aktivitet intelektual të jashtëzakonshëm dhe identifikohet nga historia jonë si një poet, publicist, përkthyes, dijetar, klerik i lartë, atdhetar demokrat, burrë shteti, historian e muzikolog, raporton KosovaPress.

Fan Noli është një nga figurat më të ndritura të kombit tonë. Fan Noli shkollën e mesme e përfundoi në vendin e tij të lindjes ndërsa më 1903 shkoi në Egjipt, ku punoi si mësues e gjatë kësaj kohe u njoh me patriotë të shquar të tjerë të kolonisë shqiptare të Egjiptit. Në këtë kohë përktheu në greqisht veprën e Sami Frashërit “Shqipëria ç`ka qenë, ç`është e ç’do të bëhet”. Më 1907, pas vajtjes së tij në Amerikë, krijoi shoqërinë “Besa-besë” në Boston.

Më 9 shkurt 1908, Fan Noli u dorëzua dhjak dhe në mars 1908, kryeprifti ortodoks i Nju Jorkut. Disa ditë më pas, Noli mbajti liturgji në gjuhën shqipe për herë të parë në Boston . Në korrik 1919, Noli u zgjodh Peshkop i Kishës Ortodokse Shqiptare në Amerikë. Përpjekjet e Nolit për një kishë kombëtare shqiptare, u përmbushën më 1937, kur Patriarkana e Stambollit njohu zyrtarisht Kishën Ortodokse Shqiptare Autoqefale.

Nga viti 1909 deri më 1911 botoi gazetën “Dielli” dhe së bashkë me Faik Konicën themeloi më 1912” Federatën Panshqiptare Vatra të Amerikës”.

Në vitin 1912 përfundoi studimet e larta në fakultetin e filozofisë në Universitetin e Harvardit dhe vite më vonë, më 1938 mbaroi studimet e larta në Konservatorin e Muzikës së Bostonit. Në vitin 1920 Noli u zgjodh kryetar i delegacionit shqiptar në Lidhjen e Kombeve në Gjenevë, ku nëpërmjet anëtarësimit të Shqipërisë në këtë lidhje, Shqipëria mori një njohje ndërkombëtare . Në 1921 ai botoi veprën e rëndësishme “Historia e Skënderbeut”. Në qershor 1924 , Fan Noli u bë kryeministër.

Përveç veprimtarisë shumë të rëndësishme politike, poetike e publicistike, gjatë këtij dhjetëvjeçari Noli përktheu tragjeditë e Shekspirit, Rubairat Omar Khajamit, romanin Don Kishoti të Servantesit etj.

Në shkurt, kinematë portugeze regjistruan një humbje prej 1.9 milionë eurosh dhe rreth 296 mijë spektatorësh krahasuar me janarin, zbuloi sot Instituti i Kinemasë dhe Audiovizualit (ICA) në Portugali.

Statistikat mujore të ICA-së mbi konsumin e kinemasë në qarkun komercial tregojnë se në 28 ditët e shkurtit, filmat u panë nga 781,809 spektatorë, duke gjeneruar 4.9 milionë euro në të ardhura bruto nga biletat.

Krahasuar me 31 ditët e janarit, këto vlera përfaqësojnë një rënie prej 1.9 milionë eurosh dhe 296,246 hyrjesh, shkruan agjencia e lajmeve LUSA.

Duke krahasuar shkurtin e kaluar me të njëjtin muaj të vitit 2024, shifrat tregojnë gjithashtu një humbje prej 8.7% në audiencë dhe 4.1% në të ardhurat nga biletat.

Megjithatë, shuma e të dhënave të shfaqjeve për janarin dhe shkurtin e këtij viti tejkalon atë të së njëjtës periudhë në 2024, me një rritje prej 1.3 milionë euro në të ardhura (duke arritur në 11.8 milionë euro) dhe 123 mijë bileta të shitura (për një total prej 1,859,864 spektatorësh), përcjell KosovaPress.

Nga filmat e shfaqur dhe premierat në janar dhe shkurt, më i ndjekuri ishte “I’m Still Here”, nga regjisori brazilian Walter Salles, i cili tërhoqi 293,267 spektatorë dhe gjeneroi 1.8 milionë euro në arkat e kinemave.

Gjatë kësaj periudhe, filmi që i dha Fernanda Torres një Golden Globe dhe fitoi një Oscar për Filmin më të Mirë Ndërkombëtar tejkaloi “Mufasa: The Lion King” të Barry Jenkins dhe “Sonic 3: The Movie” të Jeff Fowler, si në audiencë ashtu edhe në të ardhura.

“Banzo”, nga regjisorja Margarida Cardoso, ishte filmi portugez më i ndjekur këtë vit në kinema, me 2,264 spektatorë dhe 12,326 euro të ardhura.

Nga gjithsej 1.8 milionë hyrjet e regjistruara në janar dhe shkurt, çdo seancë kinemaje kishte mesatarisht 22 spektatorë.

Në shkurt, qarku i shfaqjeve komerciale të kinemasë kishte 512 ekrane, nga të cilat 218 (42.6%) menaxhohen nga NOS Lusomundo Cinemas dhe 58 (11.3%) i përkasin ekspozuesit Cineplace.

Qendra Muzeore e Krujës në dy muajt e parë të vitit ka tërhequr një numër të lartë turistësh vendas e të huaj.

Muzeu Kombëtar “Gjergj Kastrioti Skënderbeu”, Muzeu Etnografik dhe Pazari karakteristik ka shënuar një rritje në krahasim me të njëjtën periudhë të vitit të kaluar, shkruan ATSH.

Drejtori i Muzeut Kombëtar “Gjergj Kastrioti Skënderbeu” dhe Muzeut Etnografik Krujë, Mehdi Hafizi tha për Agjencinë Telegrafike Shqiptare se “9307 vizitorë është totali i vizitorëve në qendrën muzeore Krujë, ku numrin më të lartë të turistëve të huaj gjatë muajit janar dhe shkurt 2025 e përbëjnë vizitorët nga Kina, Italia, Spanja dhe SHBA”, përcjell KP.

“Ndërsa në Muzeun Gjergj Kastrioti Skënderbeu në Krujë ka një rritje me 20% krahasuar me 2-mujorin e parë të vitit 2024. Konkretisht në janar dhe shkurt ky muze u vizitua nga 8176 vizitorë”, tha Hafizi.

Hafizi tha se “gjatë kësaj periudhe ka pasur një interes të shtuar edhe të studentëve nga Kanadaja dhe Danimarka për Muzeun “Gjergj Kastrioti Skënderbeu”, të cilët kanë mësuar më shumë për historinë e vendit tonë dhe të heroit tonë Kombëtar. Por nuk kanë munguar edhe nxënësit dhe studentët nga Shqipëria dhe Kosova”.

Kruja njihet për turizmin historik njëditor, por me shtimin e strukturave akomoduese turistët po qëndrojnë më gjatë në këtë qytet historik. Pazari karakteristik i Krujës me rrugicat e ngushta me kalldrëm, ku ofrohen punime artizanale tradicionale është një ndër të preferuarit e turistëve. Por turistët nuk ikin nga Kruja pa vizituar edhe Muzeun Kombëtar “Gjergj Kastrioti Skënderbeu” dhe Muzeun Etnografik Krujë.

Sot bëhen 33 vjet nga vdekja e shkrimtarit dhe albanologut shqiptar, Martin Camaj në Munih. Kërkimet akademike të Camajt u përqendruan në gjuhën shqipe dhe dialektet, në veçanti të atyre në Italinë jugore.

Veprimtaria e tij letrare në harkun 45 vjeçar ka disa shkallë zhvillimi. Ai e nisi me poezinë, zhanër mbas të cilit i mbeti besnik gjithë jetën, kurse gjatë viteve të fundit u përqendrua shumë te proza, raporton KosovaPress.

Martini u lind në Dushman të Dukagjinit më 13 korrik 1927 në vendin e quajtur Telumë. Datëlindja 1925 duket të jetë një gabim shtypi. Vendlindja e tij është “… në një vis të egër, ‘ku s’ka shkelë kurrë kamba e kalit’, kaq i thyeshëm ashtë ky vend”, sipas vetë Martinit.

Në vendlindje kaloi dhjetë vitet e para të jetës së tij. Nis të fitojë në mënyrë autodidakte njohuritë e para në shkrim e lexim shqip dhe matematikë. Kjo gjë do t’i binte në sy ish-pagëzuesit P. David Pepës OFM, duke e nxitur të ndërmjetësojë pranë instancave eprore në Shkodër që të ndërmerrnin përpjekje për arsimimin dhe përgatitjen – pse jo – për meshtari.

Në vitin 1935 vendoset përfundimisht në Shkodër dhe fillon të marrë arsim të rregullt pranë kolegjit jezuit “Xaverianum”, ku do kalonte edhe tuberkulozin. Rektor i kolegjit atëbotë qe P. Giuseppe Valentini SJ, prej të cilit mësojmë se arsimin fillor 5 vjeçar e kishte përfunduar në 4 vjet.

Pesë vitet në vijim ai ndoqi rregullisht gjimnazin, gjë që i dha të drejtën për të vijuar studimet në liceun klasik të kolegjit. I ati vdes pak vite pasi Martini i vogël u fut në kolegj.

Studimet detyrohet t’i ndërpresë në vitin e tretë, më 1946 – mbas mbylljes së instituteve fetare të Shkodrës. Ai themeloi në Prekal shkollën ku veproi si mësues i vetëm deri më 1948.

Camaj merrte pjesë në rezistencën kundër partizanëve komunistë me çetën e kapiten Gjon Destanishtës dhe në gusht qe i detyruar me jetuar në ilegalitet derisa ia arriti me ikë në Jugosllavi bashkë me At Daniel Gjeçajn OFM dhe grupin e përbërë prej 36 vetash. Kështu nuk pati më rast të kontaktojë me familjen, një vëlla i tij bëri 30 vjet burg. Kryen për tre muaj një kurs intensiv për mësuesinë në Pejë (1 korrik – 30 shtator 1949), mandej punon një vit (1949-’50) mësues në Tuz në shkollën “Mahmut Lekiq”.

Viti 1950 e gjen Martinin në Beograd ku u regjistrua në universitetin e kryeqytetit jugosllav. Diplomohet pas pesë vitesh më 2 korrik 1955 duke dhënë provime diplome në degën e filologjisë romane me fusha kryesore gjuhë dhe letërsi italiane. Në qershor 1951 martohet në fillim ne bashki, mandej ne kishën ortodokse e më pas atë katolike me mësuesen Nina Bogdanoviq.

Pas mbylljes së studimeve në Beograd, Camaj përgatitet për formimin pasuniversitar në albanologji pranë fakultetit filozofik të Univ. të Sarajevës, i udhëhequr nga albanologu prof. Henrik Bariç – kryetar i Institutit Albanologjik në Sarajevë.

Në bashkëpunim me të dhe me mentorin e dytë prof. Rikard Kuzhmiç vendos të promovojë në filologji duke përzgjedhur si temë doktorate “Gjuha e Gjon Buzukut”. Kërkesa përkatëse e mentorëve të tij miratohet prej këshillit shkencor të atij fakultet në mbledhjen që u mbajt më 16 shkurt 1956.

Po atë vit, duke parë shëndetin në rënie të profesorit dhe gjendjen e rënduar në Republikën Federale, vajti në Itali (të paktën qysh më 20 shtator të ’56s) ku e shoqja nga sëmundja detyrohet të heqë një veshkë.

Nën mentoratin e Koliqit më 15 mars 1960 mbron me vlerësime maksimale pranë Universitetit te Romës, tezën e doktoratës mbi “Mesharin” e Gjon Buzukut, e cila u botua po atë vit si botim i revistës “Shêjzat” (që e redaktonte tash tre vite dhe do ta bënte deri më 1971) nën titullin: Il Mesale di Gjon Buzuku. Contributi linguistici allo studio della genesi.

Ndarja përfundimtare me Martinin ndodh në vitin 1968, dhe mbas kësaj date Nina kthehet në Milano ku do të jetojë deri në nëntor të vitit 1987. Prej 1965 deri në 1971 qenë vitet vendimtare për konsolidimin e vatrës albanologjike duke e vështruar si fushë komplekse të kërkimit shkencor.

Më 1969 martohet me Erikën, me të cilën nuk do kishte fëmijë. Më dt. 16 korrik 1971 merr emërimin si profesor joordinar në albanologji, ndërsa më 14 shtator 1978 emërohet ordinar me marrëdhënie punësimi të përhershëm, më 30 shtator 1990 lirohet nga detyra si profesor i merituar. Jetoi në Lenggries, vend që i kujtonte trojet ku kishte lindë. Vdes më 12 mars të vitit 1992 në Munih.

Është përfshirë thuajse në të gjitha antologjitë dhe veprat ku flitet për shkrimtarët shqiptarë. Kërkimet akademike të Camajt u përqendruan në gjuhën shqipe dhe dialektet, në veçanti të atyre në Italinë jugore. Veprimtaria e tij letrare në harkun 45 vjeçar ka disa shkallë zhvillimi. Ai e nisi me poezinë, zhanër mbas të cilit i mbeti besnik gjithë jetën, kurse gjatë viteve të fundit u përqendrua shumë tek proza.

Vëllimi i tij i parë me varg klasik “Nji fyell ndër male”, Prishtinë 1953 (Një fyell ndër male), dhe “Kânga e vërrinit”, Prishtinë 1954 (Kënga e lëndinave), u frymëzuan nga banorët e zonave ku lindi, malësorët e veriut, mbas të cilëve qëndroj shumë i afërt shpirtërisht edhe mbas shumë e shumë viteve në mërgim dhe pamundësia për t’u kthyer.

Këto u ndoqën nga “Djella”, Romë 1958, një novelë me disa vargje mbi dashurinë e një mësuesi me një vajzë të re. Përmbledhja e poezive “Legjenda”, Romë 1964 dhe “Lirika mes dy moteve”, Munich 1967, kishte disa poezi nga “Kânga e vërrinit”, që u ribotuan në “Poezi” 1953-1967, Munich 1981.

Vargu i pjekur i Camajt reflekton ndikimin e lëvizjes hermetike të poetit italian Giuseppe Ungaretti. Karakteret metaforike dhe simbolike të gjuhës së tij rriten me kohën, siç ndodh edhe me rangun e temave poetike të tij.

Një përzgjedhje e poezive të tij u përkthye në gjuhën angleze nga Leonard Fox në vëllimet “Selected Poetry”, New York 1990 (Poezi të zgjedhura), dhe “Palimpsest”, Munich & New York 1991./KosovaPress/

Me rastin e festës së 8 Marsit, në Shtëpinë e Pleqve në Prishtinë, u dha shfaqja “Vitet e Rinisë”, një dramë prekëse e autorës dhe regjisores Blerina Racaj. Kjo shfaqje ka sjellë emocionet e thella tek të moshuarit, të cilët shprehën lumturinë e tyre që, sidomos në ditë të veçanta, nuk po ndihen të harruar.

“Vitet e Rinisë” është një histori që prek shpirtin dhe fton shikuesit të reflektojnë mbi fuqinë e kujtimeve dhe bukurinë e dashurisë së pashuar. Në qendër të dramës janë dy të moshuar, të cilët, përmes dialogjeve të sinqerta dhe të thella, rikthehen pas në kohë, duke risjellë në mendje momentet më të bukura të rinisë së tyre. E kaluara ringjallet në zemrat e tyre dhe ata përjetojnë sërish ndjenjat e dikurshme, duke na kujtuar se dashuria dhe kujtimet nuk shuhen kurrë.

Shfaqja është një rrëfim për forcën, shpresën dhe mosdorëzimin, duke na mësuar të vlerësojmë çdo çast të jetës. Valmira Hoti dhe Alban Goranci interpretojnë me mjeshtëri rolet e personazheve kryesorë, ndërsa Miftar Raci ka realizuar një muzikë emocionuese që shton thellësinë e dramës. Arbnora Pajaziti është përgjegjëse për kostumografinë, duke kontribuar në sjelljen e atmosferës autentike të asaj periudhe.

Kjo shfaqje ka marrë mbështetje nga Ministria e Kulturës, Rinisë dhe Sporteve e Kosovës dhe pritet të ketë një rrugëtim të mëtejshëm artistik, duke pasuruar kulturën dhe jetën shoqërore me mesazhe të fuqishme dhe universale.

Kompania e transmetimit Netflix pritet të shpenzojë 16.7 miliardë euro për përmbajtje në vitin 2025, një rritje prej 11% krahasuar me vitin e kaluar, por kjo “nuk është as afër tavanit”, tha Drejtori i Financave i platformës, Spencer Neumann.

Kjo është një rritje prej rreth 11% krahasuar me shpenzimet për përmbajtje në vitin 2024, shtoi ai, duke folur në Konferencën e Teknologjisë, Media dhe Telekomunikacioneve të Morgan Stanley në San Francisco, Kaliforni, raporton LUSA.

Netflix shtoi 19 milionë abonetë në tremujorin e fundit të vitit 2024 dhe e mbylli vitin me një total prej 301 milionë anëtarësh në mbarë botën, por Neumann theksoi se platforma mbetet “e vogël” sipas të gjitha masave kyçe, duke thënë se ka kapur vetëm 6% të tregut të saj të mundshëm, përcjell KosovaPress.

Dretori gjithashtu deklaroi se kompania ka “mundësi rritjeje” në të gjitha zhanret, përfshirë sportet, dhe se pjesë e strategjisë është të identifikojë “ku është mundësia më e madhe për të rritur dhe investuar”.

Neumann tha se tre nga seritë e saj më të suksesshme origjinale do të kthehen me përmbajtje të re në ekran, konkretisht “Wednesday”, “Stranger Things” dhe “Squid Game”, kështu që investimi në përmbajtje të licencuar po rritet gjithashtu.

Platforma filloi të investojë në përmbajtje të drejtpërdrejtë, siç janë ndeshjet e mundjes WWE ose transmetimi i drejtpërdrejtë i Çmimeve të Sindikatës së Aktorëve të Hollywoodit (SAG Awards).

“Nën një qiell me pupla”, tani është para lexuesve kosovarë edhe në gjuhën shqipe. Ish-oficeri britanik, Ade Clewlow ka përmbledhur në një libër historinë e tij në Kosovë mbi ngjarjet e rëndësishme të viteve 2008-2009. Britaniku në atë kohë ishte me një mision operacional në Kosovë.

Ish-ushtaraku në atë kohë ishte dëshmitar i një prej proceseve më të rëndësishme – shpërbërjes së Trupave Mbrojtëse të Kosovës, dhe krijimit të Forcës së Sigurisë së Kosovës.

Pasi përfundoi misionin e tij më 2009 në Kosovë, Clewlow u kthye në Britaninë e Madhe dhe gjashtë vjet më vonë e nxori librin “Under A Feathered Sky”.

Në Prishtinë, u kthye sërish pas disa vjetësh, që lexuesve kosovarë t’ua sjellë librin edhe në gjuhën shqipe.

Ade Clewlow tha të enjten se libri iu dedikohet qytetarëve të Kosovës.

“Unë besoj me pasion se është një libër i rëndësishëm për njerëzit që ta lexojnë, të cilët ndoshta normalisht nuk do të kishin mundësinë që të dinë se çfarë ndodh “prapa telave” ose “prapa vellos” të një organizate multinacionale. Pra, tani mendoj se kam ardhur rreth e qark, gjysma e rrethit ishte të publikoja librin në gjuhën angleze dhe tani kemi bërë një rreth të plotë, libri është publikuar në shqip. Libri është i dedikuar për njerëzit e Kosovës, dhe tani jam shumë shumë i lumtur, që njerëzit e Kosovës mund ta lexojnë atë”, tha ai.

Ai pati edhe një mesazh për institucionet vendore, për çka tha se është momenti që të rivendosen marrëdhëniet me Bashkimin Evropian.

“Në këtë moment jemi në një kohë shumë të vështirë në aspektin gjeopolitik, çfarë besuam para gjashtë muajve nuk është realiteti sot. Pra, mendoj se në shumë mënyra është koha që të rivendosim marrëdhëniet dhe është momenti që të lidhemi me Evropën dhe me Mbretërinë e Bashkuar, që ata të njohin rëndësinë e ruajtjes së një Ballkani të qëndrueshëm, pra një Kosove të qëndrueshme. Dhe ky është mendimi im personal, duhet të bëhet një BE e bashkuar, në mënyrë që të ketë ndonjë shpresë për një mjedis më të qëndrueshëm në Kosovë dhe Ballkanin Perëndimor”, shtoi ai.

Zëvendëskomandanti i Forcës së Sigurisë së Kosovës, Enver Cikaqi foli për kontributin e ish-ushtarakut britanik gjatë kohës sa ka shërbyer në Kosovë.

“Edhe sot e kujtojmë me shumë pietet kontributin e Ade. Ajo çfarë është më e rëndësishme që do ta them në perspektiven time dhe nga detyra dhe pozita ime që jam sot duhet që të falënderojë shumë Ade për kontributin e tij dhe në të njëjtën kohë edhe për librin ngase kjo tregon se historia e bashkëpunimit edhe komunikimit të përbashkët mes dy forcave tona daton që prej luftës, para gjeneral Çekut dhe gjeneral Haradinajt, në këtë rast që marrë këtë të drejtë për të thënë se sa e rëndësishme ka qenë bashkëpunimi i të dy forcave tona që nga koha e luftës”, u shpreh Cikaqi.

Ish-shefi i AKI-së, Burim Ramadani tha se ky libër është unik dhe dëshmi e gjallë, të cilin duhet ta lexojnë të gjithë.

“Ato javë të themelimit të FSK-së, menjëherë pas pavarësisë së Kosovës nuk kanë qenë të zakonshme. Dhe në atë periudhë historia është bërë ose të paktën një pjesë e historisë së Kosovës është bërë dhe autori Ade Clewlow i ka përshkruar jo vetëm nuancat e atyre momenteve por e ka përshkruar edhe rrjedhën se si për të arritur suksesin duhet të ketë jashtëzakonisht dedikim ose përshkrim. Siç e përshkruan autori Ade, jo të gjithë ishin të lumtur në ato momente lumturie të themelimit të Forcës. Ishin shumë aktorë të involvuar. Besoj që ky libër është dëshmi e gjallë që secili duhet ta lexojë dhe veçanërisht oficerët e rinj, politikanët e rinj, diplomatët në Kosovë dhe profesionistët e angazhuar”, tha ai.

Në promovimin e këtij libri mori pjesë ambasadori i Britanisë së Madhe në Kosovë, Jonathan Hargreaves, ish-kryeministri Ramush Haradinaj, udhëheqësi i parë i TMK-së Agim Çeku dhe gjeneral Xhavit Gashi.

Ade Cloëloë, i ngarkuar me misione në shumë vende të botës, u gjend në Kosovë si kolonel-lejtënant në vitin 2008 – pak pas shpalljes së pavarësisë.

Ai ishte i ngarkuar me detyra operacionale për gjashtë muaj dhe pa prej afër procesin e shpërbërjes së Trupave Mbrojtëse të Kosovës, si dhe krijimin e Forcës së Sigurisë së Kosovë që u bë në janar të vitit 2009.

Përvojën e tij në Kosovë e ruajti edhe të shkruar, të cilën më vonë do ta titullonte “Under a Feathered Sky: Role in the Neëly Independent Kosovo” (Nën një qiell me pupla: Historia e parrëfyer e rolit të NATO-s në Kosovën e pavarësuar rishtas)./kp

Mësohet se Ulqini do të jetë vendi nikoqir i shtatores së Gjergj Kastriotit Skenderbeut, dhe kjo shtatore do të vendoset pikërisht në bulevardin që mban edhe emrin e figurës më të rëndësishme të kombit shqiptar, përcjell albinfo.ch.

Për krijimin e kësaj shtatoreje, Komuna e Ulqinit tashmë ka hapë thirrjen ndërkombëtare për skulptorët, thirrje nëpërmjet të cilës është bërë e ditur se po kërkojnë skulptorët me ide sa më kreative për realizimin e kësaj shtatoreje.

Konkursi tashmë është shpallë dhe do të rri i hapur deri më 29 prill të këtij viti, dhe organizatorët bëjnë të ditur se ky konkurs do të vlerësohet më pas nga pesë anëtarë profesionistë të jurisë, të cilët do të përzgjedhin tre punimet më të mira të konkursit, ku vendi i parë do të merr të drejtën e realizimit final të shtatores.

Ndërkohë bëhet e ditur se vendi i parë do të shpërblehet me 3 mijë euro, përderisa vendi i dytë me 2 mijë e 500 euro, kurse i treti me 2 mijë sosh.

“Pjesëmarrësit në Konkurs janë të obliguar që punimet e tyre t’i dorëzojnë brenda afatit të caktuar në Sekretariatin për kulturë dhe veprimtari shoqërore përmes Byrosë së qytetarëve të Komunës së Ulqinit, adresa Bulevardi Gj.K.Skenderbeu pn, Ulqin. Dokumentat e konkursit janë të publikuara në faqen zyrtare të Komunës së Ulqinit www.ul-gov.me ku mund të shkarkohen nga të gjithë të interesuarit për pjesëmarrje në konkurs”, thuhet mes të tjerash në thirrjen për skulptorët.

Një shtatore e heroit legjendar, Adem Jashari, gjendet edhe në Turqi.

Pos shtatores, katër parqe atje në tri komuna, Bayrampasha, Pendik dhe Eyup të Stambollit dhe në Manisa-Turgutlu, mbajnë emrin e tij.

Kjo u bë e ditur nga një postim i “Historia e Shqiptarëve” në Facebook, profil që shpërndau fotografitë e Kamil Bitish.

Sipas këtij të fundit, statuja u punua nga Mehmet Yarar dhe Huseyin Kaptan.