Author: K.B.

Brenda hapësirave të Pallatit të Drejtësisë shumë shpejt do nisë së funksionuari edhe një institucion tjetër gjyqësor, Gjykata Administrative.

Ligji për këtë gjykatë që do të trajtojë vetëm rastet administrative, ka hyrë në fuqi nga janari i këtij viti dhe parasheh që funksionimi i Gjykatës të nisë jo më vonë se tre muaj pas hyrjes në fuqi.

Në Këshillin Gjyqësor të Kosovës, kanë thënë se janë në fazën përfundimtare të finalizimit të planit për funksionalizimin e kësaj gjykate.

“Këshilli Gjyqësor i Kosovës (KGJK) është në fazën përfundimtare të finalizimit të planit për funksionalizimin e Gjykatës Administrative, brenda afateve kohore të parashikuara me ligj, duke u përpjekur që procesi të realizohet sa më shpejt. Plani për funksionalizimin e gjykatës përfshin disa veprime kryesore: Transferimin e gjyqtarëve; Plotësimin e pozicioneve menaxheriale dhe të stafit mbështetës; Transferimin e lëndëve; Miratimin e legjislacionit dytësor; Sigurimin e hapësirave të gjykatës. Përveç këtyre, KGJK ka bërë përgatitjet në kohë për themelimin e Gjykatës Administrative, duke miratuar organogramin e saj, i cili përmban 80 pozita, prej të cilave 23 janë për gjyqtarë. Po ashtu, janë ndërmarrë të gjitha masat për të siguruar funksionimin efikas dhe të rregullt të gjykatës. Gjithashtu, ju informojmë se puna në këtë gjykatë do të zhvillohet në objektin e Pallatit të Drejtësisë”.

Sipas Vullnet Bugqkut, nga Instituti Demokratik i Kosovës, formimi i kësaj gjykate do ta lehtësojë punën për gjykatat e tjera.

“Marrë për bazë edhe vëllimin e madh të lëndëve që janë mbledh dhe që janë shkaktuar shumë vonesa në departamentin për çështje administrative unë mendoj që themelimi i kësaj Gjykate ka edhe një aspekt pozitiv sa i përket zgjidhjes efikase dhe të shpejtë të rasteve dhe konteksteve të natyrës administrative dhe besoj që kanë me i korrektu më mirë ligjshmërinë e vendimeve dhe veprimeve të organeve administrative në Kosovë”, ka theksuar Vullnet Bugaqku- Hulumtues në KDI pë Dukagjinin.

Ish-kryetari i Gjykatës së Apelit, Hasan Shala shpreson se kjo gjykatë do jetë më efikase në përfundimin e rasteve.

“Besoj që pasi të fillojë punën Gjykata Administrative do jetë shumë më lehtë edhe për qytetarët edhe lëndët do kryhen në një kohë më të arsyeshme ngase edhe do të zbrasen nga gjykatat themelore që janë departamenti administrativ kështu që shpresoj që do kemi një punë të mbarë për qytetarët që kanë probleme me çështje administrative ngase në këtë gjykatë do themelohen edhe departamentet e veçanta, një ndër to do jetë edhe departamenti i punës që i liron gjykatat”, ka deklaruar Hasan Shala – Ish kryetar i Gjykatës së Apelit.

Sipas ligjit, Gjykata Administrative do ketë katër departamente – Departamentin Fiskal, për Konteste të Punës, për Skemat Sociale dhe Pensionale si dhe Departamentin e Përgjithshëm.

Seanca e lënë në gjysmë vitin e kaluar, në rastin kundër të akuzuarve për sulmin terrorist në Ibër Lepenc do vazhdojë sot.

Në këtë rast janë tre të akuzuar për sulmin terrorist që ndodhi në nëntor të 2024.

Jovan Viqentijeviq i cili është i akuzuar për spiunazh, së bashku me vëlluan Dragisha Viqentijeviq akuzohen edhe për rrezikim të rendit kushtetues e armëmbajtje pa leje.

Për veprën e fundit i akuzuar është edhe Igor Dimoviç.

Pas refuzimit të kërkësës së avokatit të Jovan Viqentijeviq, që të përjashtohet prokurori që hetoi këtë rast, Bekim Kodraliu, seaca e shqyrtimit fillestar është caktuar për të hënën e 16 shkurtit.

“E di se ndoshta nuk u pëlqen hetimi që unë kam zhvilluar në këtë rast por i njoftojë palët që sulmi terrorist ka qenë sulm profesional, dhe ka qenë i koordinuar në mënyrë të përsosur”, ka theksuar Bekim Kodraliu – Prokuror

Në fillim të këtij viti, kryeprokurori i Prokurorisë Speciale të Kosovës, Blerim Isufaj ka refuzuar kërkesën e avokatit, për përjashtim nga rasti penal.

“Prokuroria Speciale e Republikës së Kosovës ju njofton se kërkesa e mbrojtjes për përjashtimin e prokurorit special nga rasti penal në fjalë është refuzuar”.

Në seancën që pritet të mbahet nesër, do të lexohet aktakuza ndaj të akuzuarve, e më pas secili ka të drejtë të deklarohet rreth fajësisë nëse e pranon apo jo. Për shpërthimin që ka ndodhur më 29 nëntor të 2024 në fshatin Varagë të Zubin-Potokut Prokuroria speciale e Kosovës, ka ngritur aktakuzë për këtë rast në më 9 dhjetor të 2025 ndaj tre personave.

Për këtë aktakuzë, ekspertizë është kryer edhe nga Byroja Federale amerikane e Hetimit, FBI, duke dhënë prova të forta që lidhin të akuzuarit me sulmin terrorist.

Ky ishtë sulmi i dytë terrorist në Kosovë, pas atij që ndodhi në Banjskë të Zveçanit, më 24 shtator të 2023.

Edhe për atë rast tre persona janë duke u gjykuar, por që shumë të tjerë përfshirë edhe kreun e grupit, Milan Radoiciq vazhdojnë të jenë në arrati e të pa kapshëm nga institucionet e drejtësisë.

Të dhënat e Klinikës së Neonatologjisë të Qendrës Klinike e Universitare të vendit, tregojnë që po rriten rastet e foshnjave të braktisura. Vetëm në janar u braktisën tri foshnje përderisa vitin e kaluar pati gjithsejtë 32 braktisje të foshnjave që përfunduan në familjet strehuese.

Drejtori i Klinikës së Neonatologjisë, Luan Morina, për Radio Kosovën tregon për kujdesin ndaj foshnjave të braktisura.

“Aktualisht në Klinikë i kemi dy foshnja të lëna pa përkujdesje prindërore”, thotë Morina.

Nga fillimi i këtij viti aty janë regjistruar tri raste ku foshnjat u braktisën.

“Njëra foshnjë është dërguar në një familje strehuese përmes ndërmjetësimit me Qendrën për Punë Sociale të komunës”, shpjegon ai.

Si arsye më të shpeshta të braktisjes së foshnjave nga prindërit biologjikë, sidomos nënat, mjekët përmendin të qenit fëmijë jashtëmartesor, varfërinë apo rrethanat e tjera të rënda sociale, neglizhencën prindërore, e në disa raste edhe dhunën në familje.

Por jo vetëm këto, foshnjat sipas mjekëve po braktisen edhe për shkak të anomalive të lindura apo sëmundjeve të pashërueshme.

Në këtë situatë për këta fëmijë janë dy adresa strehimi e përkujdesjeje: familjet adoptuese apo familjet strehuese që u ofrojnë kujdes prindëror.

Drejtoresha e Mirëqenies Sociale në Komunën e Prishtinës, Adelina Sahiti, thotë se aktualisht në kryeqytet janë vetëm tri familje strehuese, ndërsa nevojat janë shumë më të mëdha.

“Nevojat janë shumë të mëdha për familje strehuese në kryeqytet, sepse kemi fëmijë nga Komuna e Prishtinës që qëndrojnë në komuna të tjera”, thotë Sahiti duke shtuar se “synimi është që këtë cikël ta përmbyllim duke pasur së paku gjashtë familje strehuese në kryeqytet”.

Fata Rexhepi, nga Organizata për Fëmijët pa Kujdes Prindëror, shpjegon praktikat e kujdesit që kërkohet të ndiqen në këto lloj familjesh strehuese.

“Një familje potenciale strehuese, përveç vullnetit, duhet të jetë mbi moshën 25-vjeçare, të ketë zotësi veprimi, të mos jetë e ndjekur penalisht, të ketë hapësirë të mjaftueshme banimi dhe të jetë në gjendje të mirë psikike dhe fizike”.

Sipas të dhënave të Klinikës së Neonatologjisë në QKUK vitin e kaluar janë braktisur gjithsej 32 foshnja. Prej tyre, 12 fëmijë janë sistemuar në familje strehuese përmes qendrave për punë sociale, 19 janë ribashkuar me familjet e tyre biologjike, përderisa janë adoptuar 7 të tjerë të braktisur më herët.

Anita Haradinaj ka folur së fundmi për shëndetin e bashkëshortit të saj, ish-kreut të AAK-së, Ramush Haradinaj, duke sqaruar se ai është në gjendje shumë të mirë fizike dhe nuk ka asnjë problem shëndetësor.

Në një intervistë për emisionin “Weekend”, Anita tha se është kontaktuar nga shumë familjarë dhe miq të shqetësuar për shëndetin e Ramushit, por sqaroi se arsyeja e ndryshimeve në peshë ka qenë thjesht për një sfidë sportive.

“Jo, s’ka asnjë problem. Gëzon shëndet të plotë. Ka humbur peshë sepse ka pasur plan të ngjitet në një maje shumë të lartë diku në botë. E di që për të ecur duhet të jetë me peshë më të vogël. Dietë e zakonshme. Me mu s’mu, Ramushi? S’kisha qesh kështu. M’u kish ni zani sa atje t’u kajtë”, tha Anita.

Ajo foli edhe për mungesën e tij në jetën familjare për shkak të angazhimeve politike, duke theksuar se shpesh e ka ndjerë mungesën e Ramushit në momentet e përditshme me fëmijët. Megjithatë, Anita vlerësoi rolin aktiv të tij në politikë dhe arritjet që ka lënë pas.

“Planet nuk ia di, por e di që më në fund e bona një burrë. Deri sot e kam nda me të tjerët, tash ka me mbajt veç për veti. Më ka mungu në gjithçka. Secili gura mundet ta kuptojë drejt, e dimë sa e vështirë është me rritë fëmijë, me i çu te mjeku, në pushime, në mbledhje. Në secilin element të jetës më ka mungu. Në drekën nuk e kemi hangar kurrë bashkë. Në deti s’ka ardh kurrë me neve. Ai prap s’rrin. Diçka ka me bo. Ramushi është shumë aktiv. Kurgjo mos boft del në mal hec. Më bëhet qejfi që e ka përmbyll mirë. Është një figurë politike që historia do ta mbajë mend. Ka lënë gjurmë, edhe që nuk do të harrohet ndër breza, pavarësisht se çfarë thonë komentuesit”, tha Anita.

Instituti Hidrometerologjik i Kosovës ka bërë të ditur temeperaturat që do të mbizotërojnë për gjatë pesë ditëve të javës.

Sipas Institutit gjatë javës së ardhshme do të mbajë mot i ndryshueshëm, i vranët, intervale me diell dhe me reshje shiu dhe bore.

E hënë

Moti i vranët dhe me intervale me diell.

Temperaturat minimale: -2 deri 0°C

Temperaturat maksimale: 7 deri 9°C

Era: Kryesisht nga juglindja me shpejtësi 1-4m/s.

E martë

Mot i vranët dhe me reshje shiu dhe bore.

Temperaturat minimale: -1 deri 1°C

Temperaturat maksimale: 2-4°C

Era: nga verilindja me shpejtësi 1-7m/s

E mërkurë

Moti i vranët dhe me interval me diell.

Temperaturat minimale: -1 deri 1°C

Temperaturat maksimale: 5-8°C

Era: kryesisht nga verilindja me shpejtësi 1-5m/s.

E enjte

Mot kryesisht i vranët.

Temperaturat minimale:-4 deri -2°C

Temperaturat maksimale: 7deri 10°C

Era: nga verilindja 1-7m/s.

E premte

Mot i vranët dhe me shi.

Temperaturat minimale: -2 deri 0°C

Tmperaturat maksimale: 5 deri 8°C

Era: nga drejtimi i veriperendimit 1-6m/s.

Ambasada e Kosovës në Washington ka njoftuar se shteti i Arizonas e ka njohur 17 shkurtin si Ditën e Pavarësisë së Kosovës.

“Duke marrë parasysh se Shteti i Arizona-s ndihet i nderuar të qëndrojë pranë komunitetit shqiptaro-amerikan në të gjithë shtetin në përkujtimin e 17 shkurtit 2008 si Dita e Pavarësisë së Kosovës; dhe duke marrë parasysh se më 17 shkurt 2008, Republika e Kosovës, duke treguar vendosmëri të palëkundur, shpalli zyrtarisht pavarësinë e saj në Prishtinë. Ky akt historik, i bazuar në parimet e sovranitetit dhe vetëvendosjes, shënoi një moment kyç në rrugëtimin drejt lirisë dhe konfirmoi statusin e Kosovës si një shtet i pavarur, i lirë nga dominimi i jashtëm”, thuhet në aktin e guvernatores Katie Hobbs të publikuar nga ambasada.

Ajo shkruan se mori parasysh kontributin e komunitetit shqiptaro amerikan në Arizona dhe bizneset shqiptare atje.

“ Duke marrë parasysh se këtë vit shënohet përvjetori i 18-të i pavarësisë së Kosovës, një moment që Shteti i Arizona-s e njeh me krenari; dhe Duke marrë parasysh se komuniteti shqiptaro-amerikan në Arizona ka dhënë kontribute të rëndësishme për shtetin, duke pasuruar komunitetet me trashëgiminë kulturore, shpirtin sipërmarrës dhe angazhimin e fortë qytetar”

“Nga bizneset që lulëzojnë deri te arritjet profesionale, shqiptaro-amerikanët vazhdojnë të formësojnë strukturën sociale dhe ekonomike të larmishme të Arizona-s; dhe Duke marrë parasysh se Shtetet e Bashkuara, përfshirë edhe Shtetin e Arizona-s, kanë mbështetur rrugëtimin e Kosovës drejt ndërtimit të shtetit dhe paqes, dhe qytetarët e Kosovës dhe pasardhësit e tyre vazhdojnë të kontribuojnë në mënyrë domethënëse në zhvillimin kulturor dhe ekonomik të shtetit tonë. TANI, PRANDAJ, unë, Katie Hobbs, Guvernatore e Shtetit të Arizona-s, shpall këtu me këtë akt, 17 shkurt 2026, si DITËN E PAVARËSISË SË KOSOVËS NË ARIZONA”, thuhet në vendim që në fund mban nënshkrimin e guvernatores.

Kryetari i Prishtinës, Përparim Rama, ka thënë se mospërfshirja e buxhetit të Prishtinës në Projektligjin për Ndarjet Buxhetore të Republikës së Kosovës është cenim i rendit kushtetues.

Ai në një konferencë për media ka thënë se kjo është bërë pa arsyetim, duke e quajtur neglizhencë administrative dhe cenim të drejtpërdrejt të rendit kushtetues.

Ka shtuar se buxheti i Komunës së Prishtinës është i vetmi dokument financiar që i jep Kryeqytetit fuqinë për të ushtruar kompetencat e tij kushtetuese.

“Çdo ndërhyrje apo përjashtim arbitrar është shkelje flagrante e autonomisë lokale dhe e ligjeve për financat publike. Pasojat nuk janë teorike. Ato janë reale dhe të menjëhershme: bllokohen shërbimet publike për qytetarët, ndalen projektet kapitale, paralizohet funksionimi institucional i Kryeqytetit”, ka thënë ai.

Rama ka deklaruar se askush nuk ka të drejtë ta marrë peng Prishtinën.

“Asnjë institucion nuk ka mandat ta vendosë Kryeqytetin jashtë sistemit buxhetor të Republikës. Për këtë arsye, menjëherë i jemi drejtuar zyrtarisht Komisionit për Buxhet, Punë dhe Transfere të Kuvendit të Republikës së Kosovës dhe kryetares dhe Kryesisë së Kuvendit duke kërkuar përfshirjen e menjëhershme dhe të plotë të buxhetit të miratuar të Komunës së Prishtinës para votimit final të Ligjit për Buxhetin 2026. Po ashtu, i jemi drejtuar Ministrisë së Financave me kërkesë të qartë: të paraqesë me shkrim bazën ligjore të kësaj mos-përfshirjeje, të korrigjojë menjëherë këtë shkelje, dhe të japë përgjigje brenda afatit ligjor”, ka thënë ai.

Sipas tij, nëse Ligji për Buxhetin 2026 miratohet duke injoruar buxhetin e miratuar të Kryeqytetit, “atëherë ky ligj do të dërgohet në Gjykatën Kushtetuese, si dhe do kërkohet përgjegjësi nga secili autoritet i nivelit qendror i cili duke keqpërdorur detyrën dhe autorizimet ligjore synon ta sabotojë kryeqytetin”.

Ai ka thënë se ligji nuk është çështje vullneti.