ATV

Author: K.B.

  • Frika në javët e para të shtatzënisë: Çfarë nënkuptojnë dhimbja dhe gjakderdhja?

    Frika në javët e para të shtatzënisë: Çfarë nënkuptojnë dhimbja dhe gjakderdhja?

    Nga analizat e para dhe ndjekja e beta HCG, te kontrolli me ultratinguj dhe testet e skriningut – cilat janë shenjat normale dhe kur nevojitet mbikëqyrje e shtuar në javët e para të shtatzënisë

    Në javët e para të shtatzënisë, përveç gëzimit për një fazë të re të jetës, tek shumica e grave shfaqen edhe dilema, pyetje dhe frikëra të shumta. Çfarë është normale dhe çfarë është shenjë për shqetësim? Cilat analiza janë të domosdoshme dhe kur nevojitet vetëm pak durim?

    Edhe pse tremujori i parë është periudhë me ndryshime intensive, me informacionin e duhur shumë paqartësi mund të zgjidhen në kohë.

    Cilat analiza janë të rëndësishme në fillim të shtatzënisë?

    Një nga dilemat e para të grave shtatzëna është se cilat kontrolle dhe analiza duhet të bëhen sapo të konfirmohet shtatzënia.

    – Një nga gjërat bazë që duhet të kontrollojë gruaja shtatzënë në javët e para është funksioni i gjëndrës tiroide. Përveç kësaj, të rëndësishme janë analiza e gjakut (parametrat që mund të tregojnë anemi) dhe niveli i sheqerit në gjak në mëngjes. Është e dëshirueshme që gruaja të ketë rezultate të rregullta të analizave mikrobiologjike, ndërsa i detyrueshëm është edhe kontrolli kolposkopik me testi PAPA, nëse nuk është kryer gjatë vitit të fundit.

    A duhet ndjekur beta HCG?

    Testi pozitiv nga gjaku shpesh është shenja e parë konkrete e shtatzënisë, por pikërisht vlerat e beta HCG mund të jenë burim shqetësimi shtesë.

    – Përcaktimi i hormonit hCG në gjak është për shumicën e grave “prova” e parë e shtatzënisë, sepse del pozitiv shumë më herët sesa mund të konfirmohet shtatzënia me ultratinguj. Ndjekjen e dinamikës së beta HCG e rekomandojmë në rastet kur rrjedha e shtatzënisë devijon nga e zakonshmja, për shembull, kur shfaqen simptoma si dhimbje dhe gjakderdhje, ose kur gruaja ndihet mirë, por kontrolli me ultratinguj tregon devijime.

    Siç shton ajo, ndjekja e dinamikës nënkupton përsëritjen e analizës pas 48 orësh.

    – Në një shtatzëni normale, vlerat përafërsisht dyfishohen çdo 48 orë. Shqetësuese konsiderohet rritja e pamjaftueshme e vlerave, mbajtja në të njëjtin nivel ose rënia e tyre. Është shumë e rëndësishme që analiza të përsëritet në të njëjtin laborator, në mënyrë që rezultatet të jenë të krahasueshme.

    Çfarë duhet të tregojë ultratingulli në shtatzëninë e hershme?

    Një nga pyetjet e shpeshta është çfarë shihet në kontrollin e parë me ultratinguj.

    – Kontrolli bazë me ultratinguj në shtatzëninë e hershme duhet të përcaktojë: formën dhe pozicionin e mitrës, gjendjen e vezoreve, praninë e shtatzënisë në mitër, numrin e embrioneve, madhësinë e tyre, konfirmimin e rrahjeve të zemrës së embrionit dhe mungesën e hematomës.

    Vend të veçantë në ndjekjen e shtatzënisë ka edhe kontrolli i parë më i detajuar me ultratinguj.

    – Ky kontroll kryhet në kohën e testit të dyfishtë dhe ka rëndësi të veçantë në monitorimin e shtatzënisë.

    Testet e skriningut dhe dilema e zgjedhjes

    Shumë gra shtatzëna ndihen të hutuar nga numri i madh i testeve për zbulimin e anomalive kromozomale.

    – Ekzistojnë dy grupe kryesore testesh skriningu për anomalitë kromozomale. Grupi i parë përfshin teste statistikore si testi i dyfishtë, i trefishtë dhe i katërfishtë, ndërsa sot më i përdoruri është testi i dyfishtë, me besueshmëri rreth 85%.

    Grupi i dytë përfshin teste më moderne.

    – Bëhet fjalë për testet jo-invazive prenatale (NIPT), me të cilat analizohet ADN-ja e fetusit nga gjaku i nënës, me besueshmëri rreth 99%. Testi i dyfishtë rekomandohet për të gjitha shtatzënat, ndërsa NIPT për ato që kanë rezultat normal të testit të dyfishtë, por dëshirojnë një shkallë shtesë sigurie.

    Kur gjetjet e ultratingullit nuk përputhen me mungesën e menstruacioneve

    Një dilemë e shpeshtë në tremujorin e parë lind kur mosha e shtatzënisë nuk përputhet me pritshmëritë.

    – Një nga situatat më të zakonshme është mospërputhja midis periudhës së mungesës së menstruacioneve dhe moshës reale të shtatzënisë, veçanërisht tek gratë me cikël të parregullt.

    Në këto raste, është e rëndësishme të ruhet qetësia.

    – Mund të ndodhë që në kohën e pritur embrioni të mos shihet ende ose rrahjet e zemrës të mos jenë shfaqur. Është e rëndësishme të jemi të durueshëm dhe t’i japim kohë shtatzënisë të zhvillohet me ritmin e saj, nëse gruaja nuk ka shqetësime, thekson ajo.

    Megjithatë, ekzistojnë edhe përfundime të pafavorshme si shtatzënia pa embrion, ndërprerja e heshtur e shtatzënisë apo sëmundjet trofoblastike që mund të ndikojnë në pamjen e hershme të saj.

    Kur nevojitet mbikëqyrje e shtuar?

    Edhe pse shumë ndryshime në tremujorin e parë janë fiziologjike, ka situata që kërkojnë vëmendje të veçantë.

    – Mbikëqyrje e shtuar dhe terapi shtesë kërkojnë dhimbjet dhe gjakderdhja në shtatzëninë e hershme, të vjellat e tepërta ose sëmundjet kronike për të cilat gruaja është në dijeni dhe që mund të ndikojnë në rrjedhën e shtatzënisë, si diabeti, tensioni i lartë, funksioni i ulët i tiroides, skleroza multiple, lupusi dhe të tjera.

    Tremujori i parë është periudhë pasigurie, por me kontrolle të rregullta, analiza në kohë dhe komunikim të mirë me mjekun, shumica e dilemave marrin përgjigje të qarta dhe qetësuese.

  • Si t’i hiqni njollat a kafesë nga tapeti

    Si t’i hiqni njollat a kafesë nga tapeti

    Njollat e kafesë njihen si shumë të vështira për t’u hequr për shkak të përbërjes së tyre të veçantë.

    Të kuptuarit pse janë kaq kokëforta ju ndihmon t’i trajtoni më me efektivitet dhe të parandaloni dëmtime afatgjata në tapete, mobilje të veshura me pëlhurë apo dyshekë.

    Ja pse njollat e kafesë janë sfiduese:

    Taninet: Këto përbërës natyralë bimorë i japin kafesë ngjyrën e saj të thellë dhe lidhen shpejt me fijet e pëlhurës, duke e bërë njollën të vështirë për t’u larguar.

    Pigmentet: Pigmentet e errëta të kafesë depërtojnë thellë në pëlhura, duke lënë shenja të dukshme, veçanërisht në sipërfaqe me ngjyra të çelëta.

    Përthithja e shpejtë: Lëngjet si kafeja përthithen shpejt nga fijet e tapetit dhe mobiljeve, duke rritur mundësinë që njolla të fiksohet.

    Përbërës shtesë: Qumështi dhe sheqeri në kafe mund të lënë mbetje ngjitëse, të cilat tërheqin papastërti dhe shkaktojnë aroma të pakëndshme me kalimin e kohës.

    Hapat për heqjen e njollës në shtëpi (DIY)

    Heqja e njollave të kafesë në shtëpi mund të jetë e thjeshtë nëse veproni shpejt dhe ndiqni hapat e duhur. Ja si të pastroni në mënyrë efektive tapetet, mobiljet apo dyshekët:

    Thithni lëngun: Përdorni një leckë të pastër dhe të thatë për të thithur sa më shumë kafe që të jetë e mundur. Mos e fërkoni, pasi kjo e shtyn njollën më thellë.

    Aplikoni një solucion pastrimi: Përzieni 1 lugë gjelle detergjent enësh, 1 lugë gjelle uthull të bardhë dhe 2 gota ujë të ngrohtë. Vendoseni solucionin mbi njollë duke e tamponuar me një leckë të pastër.

    Thithni përsëri: Përdorni një leckë të thatë për të ngritur njollën dhe për të hequr lëngun e tepërt. Përsëriteni procesin derisa njolla të zbehet.

    Shpëlani me ujë: Shpëlajeni lehtë zonën me ujë të ftohtë dhe thajeni duke e tamponuar me një peshqir.

    Thajeni zonën: Vendosni një peshqir të pastër mbi vendin e njollës dhe shtypeni lehtë për të përthithur lagështinë e mbetur. Lëreni të thahet plotësisht në ajër.

    Për njolla më kokëforta, mund të konsideroni metoda pastrimi të thatë për tapete, të cilat ofrojnë alternativa efektive pa e lagur tepër tapetin.

  • Gjëja e parë që duhet të bëni sapo të sistemoheni në një dhomë hoteli

    Gjëja e parë që duhet të bëni sapo të sistemoheni në një dhomë hoteli

    Nuk ka gjë më mirë sesa të hysh në një dhomë hoteli të pastër pas një dite të gjatë udhëtimi.

    Megjithatë, para se të hedhësh valixhen në krevat dhe të heqësh këpucët, është mirë të kontrollosh dhomën.

    Nga siguria te pastërtia, ekspertët e hotelerisë këshillojnë të ndjekësh disa hapa të thjeshtë për një qëndrim më të qetë dhe pa stres.

    Fillo me sigurinë

    Para pastërtisë, siguria duhet të jetë prioriteti yt kryesor.

    “Kur hyn për herë të parë në dhomën e hotelit, fillo me sigurinë,” thotë Afi Anifrani, drejtuese e shërbimit të pastrimit në Thompson Savannah.

    “Sigurohu që dera mbyllet dhe kyçet mirë, dhe nëse planifikon të përdorësh kasafortën, kontrollo që funksionon si duhet”.

    Kontrollo funksionet kryesore

    Pasi të jesh siguruar për masat e sigurisë, kontrollo nëse gjithçka funksionon si duhet.

    Anifrani këshillon të shikosh nëse “gjërat bazë janë në rregull — prizat, termostati, televizori, pajisjet e banjës dhe aparati i kafesë — që të mos kesh surpriza më vonë”.

    Pastro sipërfaqet apo pajisjet që preken shpesh nga njerëzit

    Anifrani thekson se sipërfaqet që preken shpesh, si telekomanda, termostati dhe aparati i kafesë, dezinfektohen çdo ditë.

    Megjithatë, është mirë që edhe vetë mysafirët të jenë të kujdesshëm.

    Laura Asilis, këshilltare udhëtimi, thotë se gjithmonë i fshin disa objekte, edhe në hotele luksoze.

    “Telekomanda e televizorit është një nga objektet më të pista në dhomat e hotelit — nëse je i kujdesshëm, një pecetë dezinfektuese bën shumë punë,” thotë ajo. “Edhe çelësat e dritave dhe telefoni pranë krevatit janë sipërfaqe që preken shpesh dhe jo gjithmonë pastrohen mirë”.

    Ajo gjithashtu fshin shpejt dorezat e rubinetit dhe butonin e shkarkimit të tualetit. Nëse ka një divan ose kolltuk prej pëlhure, shpesh vendos një shall ose shami mbi të para se të ulesh.

  • Vedat Muriqi më i miri në Evropë për gola me kokë, barazon një rekord që s’ishte arritur prej vitit 2010 te Mallorca

    Vedat Muriqi më i miri në Evropë për gola me kokë, barazon një rekord që s’ishte arritur prej vitit 2010 te Mallorca

    Ylli i Kosovës Vedat Muriqi po vazhdon të shkëlqejë këtë edicion te Mallorca.

    Pas supergolit ndaj Real Betisit, Muriqi është bërë golashënuesi më i mirë në Evropë për gola me kokë, plot gjashtë sosh.

    Përpos kësaj, ai ka barazuar rekordin e legjendës së Mallorcas Pierre Webo për më së shumti gola me kokë në një sezon, rekord që s’ishte prekur që nga sezoni 2010/11.

    “ 6 – Vedat Muriqi është golashënuesi më i mirë me kokë në top pesë ligat evropiane këtë edicion dhe është bërë lojtari i parë i Mallorcas që shënon gjashtë gola me kokë në një sezon të vetëm që prej Pierre Webo në sezonin 2010/11”, raporton “OptaJose”.

    Këtë edicion, Muriqi po kalon sezonin më të mirë të karrierës, për të qenë golashënuesi i dytë më mirë në La Liga me 16 gola, shtatë më pak se ylli i Real Madridit Kylian Mbappe.

    Megjithatë, në anën tjetër – Mallorca po vuan për rezultate pasi renditen në pozitën e 18-të me 24 pikë.

  • Shpuan murin dhe morën me vete deri në 100 milionë euro – Si ndodhi grabitja më “spektakolare” e bankave në Gjermani?

    Shpuan murin dhe morën me vete deri në 100 milionë euro – Si ndodhi grabitja më “spektakolare” e bankave në Gjermani?

    Është përshkruar si grabitja më “spektakolare” e bankave në Gjermani ndër vite.

    Në një fundjavë të qetë menjëherë pas Krishtlindjeve, një grup hajdutësh hynë me forcë në një bankë në High Street në qytetin perëndimor të Gelsenkirchen të Gjermanisë duke shpuar një mur.

    Ata plaçkitën më shumë se 3,000 kasaforta dhe vodhën me miliona euro.

    Më shumë se një muaj më vonë, policia ende nuk ka bërë asnjë arrestim.

    Për klientët e bankës, disa prej të cilëve thonë se kanë humbur kursimet e jetës dhe bizhuteritë e çmuara familjare dhe sendet me vlerë, kjo është një kohë zemërimi, konfuzioni dhe tronditjeje.

    Ekziston një ndjenjë e fortë se besimi në institucione është zbehur, shkruan BBC.

    Rasti ka ngritur të gjitha llojet e pyetjeve dhe disa prej tyre janë sqaruar nga Herbert Reul, ministri i brendshëm në shtetin perëndimor të North Rhine-Westphalia.

    Pse askush nuk e vuri re se çfarë po ndodhte? A ishte një punë e brendshme?

    Pse askush nuk e dëgjoi shpimin dhe si e dinin hajdutët saktësisht se ku ishte kasaforta?

    A ishin sistemet e sigurisë së bankës shumë të dobëta?

    Policia po u bën thirrje dëshmitarëve të paraqiten dhe beson se hajdutët kanë hyrë në ndërtesë përmes një parkingu fqinj.

    Nga aty, policia beson se ata kapërcyen disa sisteme sigurie dhe hynë në një dhomë arkivi pranë kasafortës, në bodrumin e bankës.

    Ata vendosën makinën e shpimit dhe hapën një vrimë 40 cm të gjerë në mur që të çonte në dhomën ku mbaheshin kasafortat.

    Bëhet e ditur se grabitja duhet të ketë ndodhur diku midis të shtunës, 27-29 dhjetorit, sipas zyrtarëve, të cilët mendojnë se hajdutët pothuajse mund të jenë kapur pak para se të arrinin në kasafortë.

    Menjëherë pas orës 06:00 të mëngjesit më 27 dhjetor, brigada e zjarrfikësve në Gelsenkirchen dhe një kompani private sigurie morën një paralajmërim për alarm zjarri nga banka, i cili mund të jetë aktivizuar nga hajdutët.

    Policia dhe 20 zjarrfikës mbërritën në bankë në orën 06:15, “por nuk gjetën asgjë që tregonte dëme”, tha policia në një deklaratë.

    Alarmi i zjarrit kishte ardhur nga kasaforta, zbuloi Reul.

    Por zjarrfikësit nuk mundën të hynin brenda sepse ishte e mbyllur.

    Reul tha se ata nuk panë “as tym, as erë zjarri apo dëme”, kështu që ata “menduan se ishte një alarm i rremë”, gjë që ai tha se nuk ishte e pazakontë.

    Ai i tha një komisioni parlamentar shtetëror se policia nuk kishte të drejtë të kontrollonte bankën në atë kohë, pasi kjo ishte një çështje që i përkiste zjarrfikësve. Ata do të kishin nevojë për leje.

    Raportohet se pasi hynë brenda, hajdutët hapën pothuajse të 3,250 kasafortat duke marrë para të gatshme, ar dhe bizhuteri.

    Reul theksoi se sistemet kompjuterike në bankë tregojnë se kutia e parë u hap në orën 10:45 më 27 dhjetor dhe e fundit në orën 14:44. Nuk është e qartë nëse ata arritën të hapnin shumicën e kutive në katër orë apo nëse teknologjia ndaloi regjistrimin e të dhënave.

    Autoritetet thonë se nuk e dinë saktësisht se sa është vjedhur, por mediat gjermane vlerësojnë se hajdutët duhet të kenë ikur me deri në 100 milionë euro.

    Policia më pas publikoi foto dhe pamje video nga kamerat e sigurisë së parkingut, të cilat tregonin burra me fytyrat e mbuluara, dhe dy vetura, një Audi RS 6 i zi dhe një Mercedes Citan i bardhë. Të dyja kishin targa të falsifikuara.

    Por, vjedhja nuk u zbulua deri më 29 dhjetor, kur një tjetër alarm zjarri u aktivizua në orën 03:58 dhe zjarrfikësit u kthyen në bankë për të gjetur një skenë kaosi.

    Reul tregoi se dukej si “një vendgrumbullim mbeturinash”, me sende të shpërndara në dysheme – përmbajtja e kasafortave që hajdutët kishin lënë pas.

    Policia ka zbuluar se shumë sende u dëmtuan pasi hajdutët hodhën ujë dhe kimikate mbi to. Që atëherë ata kanë qenë duke kërkuar me kujdes nëpër rrënoja – duke kërkuar të dhëna dhe duke u përpjekur të përcaktojnë se çfarë i përket kujt.

    Ndërsa detajet e grabitjes dolën në dritë, rreth 200 klientë u mblodhën jashtë Sparkasse, duke kërkuar të lejoheshin të hynin.

    Policia mbërriti me disa vetura patrullimi dhe siguroi hyrjen.

    Joachim Alfred Wagner, 63 vjeç, bëri të ditur se kishte humbur jo vetëm ar me vlerë dhjetëra mijëra euro, por edhe bizhuteri që i përkisnin babait dhe gjyshërve të tij.

    Ai e kishte marrë me qira kasafortën pas disa vjedhjeve në apartamentin e tij, duke menduar se sendet e tij me vlerë do të ishin të sigurta atje.

    “Qava nga tërbimi”, kujton ai.

    Wagner është një nga të parët që ngriti padi kundër bankës, duke kërkuar dëmshpërblim për atë që avokati i tij, Daniel Kuhlmann, e ka quajtur siguri të dobët.

    Një tjetër kishte depozituar 400,000 euro në para të gatshme nga shitja e një apartamenti – para të cilat i kishe ndarë për pension.

    Megjithatë, banka ka deklaruar se ishte vetë viktimë e krimit dhe se ambientet e saj ishin “të siguruara në përputhje me teknologjinë më të fundit të njohur”.

    Ndërsa disa klientë kishin fatura zyrtare për përmbajtjen e kasafortave të tyre, të tjerë jo.

    Sipas Reul, as dëmi psikologjik nuk duhet nënvlerësuar.

    “Ne duhet t’i ndihmojmë viktimat”, mendon ai.

    Sipas tij, “për shumë njerëz, kjo është më shumë sesa thjesht humbje e pronës, kjo mund të ndikojë gjithashtu në besimin e tyre në ndjenjën e tyre të sigurisë dhe… besimin e tyre në rendin tonë”.

    Menjëherë pasi u zbulua vjedhja, partia e ekstremit të djathtë, Alternativa për Gjermaninë (AfD) e Gjermanisë mbajti një tubim jashtë bankës, duke bërë që disa ta akuzonin partinë se po përpiqej të shkaktonte telashe.

    Revista gjermane Der Spiegel tha se grabitja ishte bërë një çështje politike dhe një simbol i diçkaje më të madhe se vetë krimi: “Ndjenja se premtimet për siguri janë të zbrazëta, se institucionet po dështojnë, se në fund të fundit askush nuk po mbahet përgjegjës”. /Telegrafi/

  • Ymeri për qeverinë e re: Janë shtuar ministri pa pasur nevojë

    Ymeri për qeverinë e re: Janë shtuar ministri pa pasur nevojë

    Analisti politik Visar Ymeri ka komentuar formimin e qeverisë së re duke vënë theksin te zgjerimi i kabinetit dhe mospërputhja me premtimet elektorale të kryeministrit Albin Kurti.

    Sipas Ymerit, gjëja e parë që bie në sy është numri i madh i anëtarëve të qeverisë.

    Ai theksoi se kjo nuk lidhet me nevojën për mbikëqyrje më të madhe të dikastereve, por me qëndrimet e mëhershme të Kurtit për një numër më të vogël ministrish, të cilat ishin të lidhura me dy aspekte kryesore: rritjen e efikasitetit qeveritar dhe zvogëlimin e mundësive për korrupsion.

    “Vetëvendosje ka nisur nga parimi se qytetarëve u duhen më shumë shërbime sociale, pra më shumë gjëra që qeveria i ofron drejtpërdrejt, por kjo nuk nënkupton rritjen e numrit të ministrave dhe pagesën e më shumë pagave,” tha Ymeri në “VV Show”.

    Ai sqaroi se qeveria e re përbëhet nga gjithsej 21 anëtarë, përfshirë kryeministrin, dhe vetëm njëri prej tyre është pa portofol, konkretisht Fitim Damka, ndërsa të gjithë ministrat e tjerë kanë resorte të caktuara.

    Megjithatë, Ymeri vlerësoi se janë bërë edhe disa riorganizime pozitive në strukturën e qeverisë.

    “Mendoj se janë bërë disa riorganizime të mira,” përfundoi ai.

  • Zbulohet koncepti i pamjes së re të “NEWBORN” për 18 vjetorin e Pavarsisë së Kosovës

    Zbulohet koncepti i pamjes së re të “NEWBORN” për 18 vjetorin e Pavarsisë së Kosovës

    Ideatori i monumentit simbolik të pavarësisë NEWBORN, Fisnik Ismajli, ka njoftuar konceptin e ri artistik për përvjetorin e 18-të të Pavarësisë së Kosovës.

    Përmes një postimi në rrjete sociale, Ismajli ka shpërndarë një referencë për “Kintsugi”, artin japonez të riparimit të objekteve të thyera me ar, një filozofi që simbolizon shërimin, forcimin dhe vlerën e shtuar pas përballjes me sfida.

    Ky mesazh është interpretuar si një paralajmërim për transformimin e monumentit NEWBORN këtë vit, duke pasqyruar rrugëtimin dhe forcimin e Kosovës përmes vështirësive. Monumenti ndryshon çdo vit për të shënuar pavarësinë, duke përcjellë mesazhe artistike dhe shoqërore.

  • Flet ambasadorja e Shqipërisë në Turqi: Ja si e nxorrëm Eva Dumanin nga “kampi i ferrit”

    Flet ambasadorja e Shqipërisë në Turqi: Ja si e nxorrëm Eva Dumanin nga “kampi i ferrit”

    Blerta Kadzadej, ambasadorja e Shqipërisë në Turqi, ka folur për riatdhesimin e Eva Dumanit pas 12 vitesh nga kampi Al-Hol në Siri.

    Ambasadorja ndau detaje nga operacioni i vështirë për ta nxjerrë të renë, e cila rrinte atje prej 12 vitesh.

    “Ju keni shumë të drejtë, ky ishte një rast njerëzor fundi i një kalvari të gjatë të dy fëmijëve, të cilët duhet të jetonin jetën fëmijërore sic i takon të gjithëve, por që patën një fatkeqësi. Kemi nisur në datën 5 për riatdhesimin e Evës nga Kampi Al-Hol dhe i kemi marrë nga Ministria për Evropën e Jashtme, e cila ishte përgjegjëse. Ky ishte një rast kompleks. Kërkoi bashkëpunimin me shumë institucione dhe me diplomatët e Turqisë. Gjithashtu koordinimi me autoritetet turke, që ishte i përkryer, kërkonte një trajtim më të përmbledhur nga mediatizimi i tepërt dhe nga ana njerëzore.

    Ju e nisët emisionin duke thënë se ajo u fut në Turqi nga kampet e Sirisë. Kryem procedurat dhe protokollet dhe rastet, që të bëhet gjithçka me koordinim, kërkon kohën e duhur dhe trajtimin e duhur nga autoritetet vendore. Ne duhet të respektojmë rregullat e shtetit pritës. Autoritetet turke e kanë bërë pa dyshuar”, tha ambasadorja për Review në Euronews Albania.

  • Shkencëtarët gjejnë një vrimë të kaltër aq të thellë sa nuk mund të arrijnë fundin

    Shkencëtarët gjejnë një vrimë të kaltër aq të thellë sa nuk mund të arrijnë fundin

    Në brigjet e Belizes ndodhet një gropë nënujore aq e thellë sa shkencëtarët nuk janë të sigurt se sa thellë shkon.

    Në Gjirin Chetumal, gropa Taam ja’, një ‘vrimë e kaltër’, ka rezultuar një sfidë për studiuesit që përpiqen të matin thellësinë e saj, transmeton Telegrafi.

    Duke përdorur sonarin për të hartuar vrimën, ata zbuluan se Taam ja’ është afërsisht 274 metra e thellë – por këto matje mund të jenë të pasakta, për shkak të ndryshimeve të temperaturës dhe kripësisë në secilën shtresë uji.

    Zhytësit u dërguan në vrimë, afërsisht 30 metra thellë, dhe zbuluan se muret e vrimës ishin të buta dhe të pabarabarta, përpara se të shndërroheshin në shkëmb më të fortë.

    Pasi ankoruan një varkë mbi hapjen e vrimës, një ekip kërkimor uli një kabllo masive, me gjatësi 500 metra, në vrimë, por nuk ishte mjaftueshëm e gjatë për të arritur në fund.

    Studiuesit vunë re se instrumenti mund të ishte shtyrë anash nga rrymat dhe të ishte hedhur jashtë matjeve, por misteri mbetet: sa e thellë është Taam ja’?

    Pavarësisht përpjekjeve të përsëritura për të matur vrimën me kabllo të gjata, nuk ka pasur një matje përfundimtare të thellësisë së saj.

    Për vite me radhë, vrima e kaltër Sansha Yongle, në Detin e Kinës Jugore, besohej të ishte vrima e kaltër më e thellë në oqean.

    Nëse shkencëtarët mund të matin thellësinë e Taam ja’, ajo mund të zëvendësojë vrimën Sansha Yongle si gropa më e thellë e matur në oqean.

    Besohet se Taam ja’ mund të ketë një rrjet shpellash dhe tunelesh nënujore, duke e bërë matjen e saj edhe më të vështirë.

    Më parë këtë vit, shkencëtarët ishin në gjendje të nxirrnin një bërthamë sedimentesh nga fundi i gropës detare që siguroi një arkiv stuhish 5,700-vjeçar.

    Shtresat e sedimenteve treguan se gjatë gjashtë mijëvjeçarëve të fundit, mesatarisht, midis katër dhe 16 stuhi tropikale kalojnë mbi vrimë për 100 vjet.

    Vrima e madhe e kaltër ndodhet rreth 60 milje larg bregdetit të qytetit të Belizes dhe është pjesë e Koraleve të Belizes, një vend i trashëgimisë botërore të UNESCO-s.

    U formua në fund të Epokës së fundit të Akullnajave, kur ujërat e detit që u ngritën përmbytën një sërë shpellash gjigante.

    Mendohet se shpellat u formuan rreth 153,000 vjet më parë dhe u zhytën plotësisht rreth 15,000 vjet më parë.

    Vrima është e populluar nga disa lloje peshkaqenësh, duke përfshirë peshkaqenë të shkëmbinjve të Karaibeve, peshkaqenë kokë-çekiç, peshkaqenë dem dhe peshkaqenë me majë të zezë.

  • 30 ditë kufizime – Mësuesja kosovare e cila po tenton të largoi nxënësit nga telefoni

    30 ditë kufizime – Mësuesja kosovare e cila po tenton të largoi nxënësit nga telefoni

    Së fundmi 30 nxënës në shkollën fillore “Elena Gjika” në Prishtinë, morën përsipër edhe një aktivitet tjetër.

    Aktiviteti 30-ditorë, u propozua nga mësuesja e tyre, Arietë Bajrami.

    Qëllimi i tij është përdorimi i duhur i pajisjeve digjitale gjatë qëndrimit në shtëpi.

    “Ky aktivitet ka nisur në klasën time, ku kanë qenë prezentë 30 nxënës e mijë të cilët i quaj edhe bletët punëtore, projekti i tillë quhet 30 ditë për vetëdijesim digjital, qëllimi i këtij projekti është se si ata të mësohen të përdorin në mënyrë të duhur teknologjinë dhe të arrijnë në atë nivel që ata të jenë të vetëdijshëm se si kohë që e kanë shfrytëzuar në teknologji me gjerë të cilat nuk ka qenë produktive ta shndërrojnë në një kohë produktive dhe të arrijnë rezultate më të mira për ta”, thotë mësimdhënësja Arietë Bajrami.

    Mësimdhënësja, ka treguar arsyet se pse aktiviteti e parasheh vetëm kufizimin, e jo ndalimin në tersi të përdorimit të telefonave.

    “Fëmijët janë shumë më të vëmendshëm në klasë, është bëre pak largimi nga harresa nga detyrat e shtëpisë, pastaj po gjejnë edhe ide kreative të cilat mund të bëjnë në shtëpi, poashtu mund të bëjnë gjëra me teknologji që më parë nuk i kanë realizuar”, tregon ajo.

    Projekti që nisi brenda kësaj klasës, shpejt mund të aplikohet edhe në shkollat e tjera të vendit.

    “Tani jemi në procesin e krijimit të pilot projektit pedagogjik i cili synon që synon të përfshi edhe klasat e tjera dhe shkollat e tjera, sigurisht që jemi të hapur për bashkëpunimet që vijnë në këtë rast, pasi gjithë ata që janë të interesuar mund të realizojmë projektin deri në fund. Do të doja që të jetë i strukturuar dhe të ketë efekte të prekshme dhe të matshme që të realizohet edhe në shkollat e tjera”, shprehet Bajrami.

    Ndonëse në shtëpi mund të kenë kufizime të pjesshme në përdorimin e telefonave, kjo pajisje është e ndaluar në shkollë.

    “Telefonat i kanë të ndaluar të përdorin gjatë orëve mësimore, përveç në raste të ndonjë punimi teknologjik, por përgjithësisht është e ndaluar telefoni gjatë orëve mësimore. Të hyrja e derës tek secila klasë është një dollap i vogël i cili është i mbyllur me qelës dhe aty i vendosin telefonat në fillim të procesit mësimore dhe i marrin pas orës së gjashtë”, Albana Zekaj – Kelmendi- kryetare e ciklit të lartë.

    Projekti i nisur për vetëdije digjitale, është mbështetur edhe nga prindërit e nxënësve.