Author: K.B.

Bedri Hamza tha se “tash, pas qëndrimit të fundi të LDK-së, rruga është e hapur” për formimin e institucioneve.

“I kanë numrat, i kanë votat”, tha kryetari i Partisë Demokratike të Kosovës në një konferencë për media në hollin e Kuvendit, dhe shtoi se Lëvizja Vetëvendosje s’duhet ta mbajë vendin “në vakum institucional, me mungesë stabiliteti politik, e mbi të gjitha, me shkelje të vazhdueshme të ligjit dhe suspendim të Kushtetuës.

“Nuk ka situatë më serioze, nuk mund të ketë situatë më serioze sesa suspendimi irendit kushtetues, sesa mosrespektimi i rregullores së punës së Kuvendit, sesa mosrepsektimi i vendimeve të gjykatave, përfshirë edhe vendimin e Gjykatës Supreme”, tha ai.

Hamza tha se ai nuk ka mundur të ketë rezultate produktive me kryeministrin në detyrë, Albin Kurti, për shkak se, siç tha, ai “nuk do bashkëpunim”, po “nënshtrim”.

Ai tha se PDK-ja s’ka vendosur “vija të kuqe të bashkëpunimit” dhe “nuk u ka ikur takimeve.

“Jemi taku. Nuk kanë qenë takime produktive, me rezultat. Zoti Kurti nuk do bashkëpunim, nuk do partneritet – do nënshtrim. Partia Demokratike e Kosovës, bazuar në të gjitha këto fakte, ka ardhur në qëndrimin e saj, i cili është i qartë, është publik, është zyrtar: ne do ta luajmë rolin tonë në Kuvendin e Republikës së Kosovës si parti opozitare, me kritika, me alternativa, por edhe me përkrahje të çështjeve të rëndësishme për interesin e vendit”, tha ai.

Ka përfunduar konferenca e kreut të Partisë Demokratike të Kosovës, Bedri Hamza, në foltoren e Kuvendit.

Nga aty Hamza i bëri thirrje kreut të Vetëvendosjes, Albin Kurti, që të thërrasë seancën konstituive, ndërsa tha se me PDK’në nuk do të mund të komunikohet pa u kthye rendi kushtetues.

Fjalë mbajti edhe deputeti i AAK’së, Burim Ramadani.

Deputeti i Aleancës për Ardhmërinë e Kosovës (AAK), Burim Ramadani, ka kërkuar nga Lëvizja Vetëvendosje që t’i japë fund vakumit institucional dhe të mundësojë funksionalizimin e Kuvendit të Kosovës.

Ramadani, në një konferencë për media nga foltorja e Kuvendit, tha se është “totalisht e paimagjinueshme” që vakumi institucional të mos konsiderohet si çështje e sigurisë kombëtare.

“Ajo që e besoj dhe që e kemi shqetësim të gjithë është fakti se Kosova dhe Kuvendi duhet të jenë funksionalë. Për shembull, edhe kërcënimin me rrjedhjen e Ibër-Lepencit, sepse nuk ka kush e trajton. Edhe për çmimet e larta”, tha Ramadani.

Ai theksoi se askush nuk po e konteston fitoren e Vetëvendosjes në zgjedhjet e qershorit, por sipas tij, është vetë kryeministri në detyrë, Albin Kurti, që po e konteston situatën politike.

“Askush nuk po ia konteston fitoren e qershorit. Bindja jonë është që ajo do të jetë fitorja e fundit. Nuk po i kontestojmë në asnjë gjë, është vetë Kurti që po konteston”, u shpreh ai.

Ramadani akuzoi pushtetin se po shmang përgjegjësitë dhe paralajmëroi se AAK-ja nuk do të lejojë që Kosova të mbetet në vakum institucional.

“Gjithçka që po bëjnë është që po ikin nga përgjegjësitë. Këtë nuk do ta lejojmë. E kemi për obligim që të mos e lejojmë Kosovën të futet në vakum institucional”, deklaroi ai.

Ai shtoi se nëse pas kësaj situate fshihen qëllime të tjera, “do ta shohim”, duke e cilësuar vakumin institucional si çështje thelbësore për funksionimin dhe sigurinë e vendit.

Aleanca Kosovare e Bizneseve (AKB) ka shprehur shqetësim të thellë për krizën institucionale dhe përplasjet e fundit në Kuvendin e Kosovës ndërmjet mazhorancës dhe opozitës.

Sipas AKB-së, moskonstituimi i Kuvendit, mungesa e dialogut politik dhe pamundësia për të gjetur një zgjidhje institucionale po e thellojnë krizën dhe po dëmtojnë besimin e qytetarëve, bizneseve dhe investitorëve në institucionet e Kosovës.

“Partia fituese ka përgjegjësinë e parë për krijimin e institucioneve, ndërsa opozita ka përgjegjësinë demokratike të marrë pjesë në funksionimin e Kuvendit, të kontrollojë, kritikojë dhe votojë sipas mandatit të saj. Opozita nuk është e obliguar të hyjë në Qeveri, por është e obliguar të ushtrojë mandatin e saj parlamentar”, thuhet në reagimin e AKB-së.

“Kur dialogu politik mungon, kur rregullat kushtetuese dhe parlamentare nuk respektohen dhe kur debati politik kalon në përplasje fizike, atëherë cenohet vetë demokracia dhe funksionimi institucional i shtetit.

Kuvendi është vendi i debatit, argumentit dhe votës – jo i konfrontimit fizik.

Kosova nuk mund të mbahet peng nga inatet partiake. Institucionet nuk mund të funksionojnë pa dialog, ndërsa ekonomia nuk mund të presë.

Çdo ditë e bllokimit institucional rrit pasigurinë për bizneset dhe investitorët, frenon vendimmarrjen ekonomike dhe dëmton imazhin e Kosovës si destinacion për investime”, thuhet më tutje në reagim.

AKB u bën thirrje të gjitha partive politike që të ulen në dialog, të respektojnë Kushtetutën dhe rregullat demokratike, ta konstituojnë Kuvendin dhe të krijojnë institucione funksionale.

“Kosova ka nevojë për vota, jo për përleshje; për dialog, jo për bllokadë; për institucione, jo për krizë të përhershme. Interesi i shtetit, qytetarëve dhe ekonomisë duhet të jetë mbi çdo interes partiak”.

Një veturë është djegur në orët e para të mëngjesit në magjistralen Prishtinë – Ferizaj.

Në pamjet e siguruara nga IndeksOnline shihet se vetura është bërë “shkrumb e hi”.

Portali po ashtu ka siguruar edhe videot e momentit kur vetura merr flakë.

Kryeministri në detyrë, Albin Kurti, sot u shfaq në ceremoninë e diplomimit të kadetëve të Shërbimit Korrektues ku mbajti edhe një fjalë rasti.

Ngjarja vjen pasi deputetë të PDK’së qëndruan sot para ndërtesës së Qeverisë për t’i kërkuar Kurtit nisjen e formimit të institucioneve, duke e quajtur uzurpator të Zyrës së Kryeministrit.

Kurti në këtë ceremoni foli për përgjegjësinë e detyrat që kanë zyrtarët korrektues pas diplomimit.

Aktualisht, Kuvendi i Kosovës ka mbetur i pakonstituuar pas kërkesës së Kurtit për “kohë shtesë” për bisedime me partitë politike.

Ndërkaq, nga LDK dje u deklaruan se qëndrojnë në opozitë dhe i bënë thirrje Kurtit që të gjejnë bashkërisht partitë shqiptare një President jopartiak, i cili duhet ta mbrojë “Republikën dhe kushtetueshmërinë”.

Prokuroria Speciale ka kërkuar caktimin e masës së paraburgimit ndaj Fehim Salit, i dyshuar për spiunazh.

Prokurori i rastit, Bekim Kodraliu, ka deklaruar se nga provat e siguruara në bashkëpunim me Policinë e Kosovës dhe Agjencinë Kosovare për Inteligjencë (AKI), është vërtetuar dyshimi i bazuar se Sali ka qenë i rekrutuar nga Shërbimi Inteligjent Serb – BIA.

“Sot, Prokuroria Speciale ka paraqitur kërkesë për caktimin e masës së paraburgimit ndaj të pandehurit Fehmi Sali.

Nga provat që kemi siguruar nga Policia e Kosovës, në bashkëpunim të ngushtë edhe me Agjencinë Kosovare për Inteligjencë, kemi vërtetuar dyshimin e bazuar se i njëjti ka qenë i rekrutuar në Shërbimin Inteligjent Serb – BIA, më konkretisht nga zyrtari i saj, Zheljko Matoviq, dhe se i njëjti ka ofruar informacione këtij shërbimi në dëm të interesave të shtetit tonë.

Konsiderojmë se nga provat që kemi siguruar kemi vërtetuar dyshimin e bazuar mirë. Me rastin e paraqitjes së kërkesës për caktimin e paraburgimit, i pandehuri edhe vetë deklaroi se ka qenë i rekrutuar dhe ka pasur kontakte të vazhdueshme me zyrtarë të BIA-s.

Siç jeni të informuar, edhe dje kemi kryer një bastisje në bashkëpunim me Policinë e Kosovës dhe kemi siguruar prova materiale, më konkretisht telefona dhe një shumë të caktuar parash, të cilat ne konsiderojmë se janë dobi pasurore e përfituar përmes kryerjes së veprës penale. Pas përfundimit të hetimeve, konsiderojmë se ndaj të njëjtit do të ngremë edhe aktakuzë për veprën penale për të cilën tashmë kemi vërtetuar dyshimin e bazuar”, tha ai.

Prokurori Kodraliu ka thënë se Fehim Sali është duke u hetuar për më shumë se një vit, mirëpo, për shkak të ndjeshmërisë së rastit, ai u shpreh se nuk mund të japin më shumë informacione.

“I njëjti ka qenë duke u hetuar për më shumë se një vit. Ndaj tij kemi zbatuar masat e veçanta hetimore dhe, nga hetimet që kemi zhvilluar, i njëjti ka pasur kontakte të ndryshme me zyrtarë të tjerë vendorë dhe me autoritete të Serbisë.

Për shkak të hetimit që jemi duke zhvilluar dhe ndjeshmërisë së rastit, kërkojmë mirëkuptim nga ju që në këtë fazë nuk mund të japim më shumë informacione”, përfundoi ai. /Ekonomiaonline