Author: K.B.

Prokuroria Speciale e Kosovës, në bashkëpunim me Njësinë e Veçantë Hetimore të Policisë së Kosovës, ka ndërmarrë një aksion hetimor që ka rezultuar me arrestimin e një gjyqtari të Gjykatës Themelore në Prishtinë, me inicialet A.G.

Sipas Prokurorisë Speciale, gjyqtari dyshohet për kryerjen e veprës penale “Keqpërdorimi i detyrës zyrtare”.

Hetimi ndaj tij është zhvilluar në mënyrë intensive dhe të vazhdueshme për disa muaj.

Prokuroria thotë se gjatë kësaj periudhe, organet e hetuesisë kanë siguruar të dhëna dhe prova mbi bazën e të cilave Specialja ka vlerësuar se ekziston dyshimi i arsyeshëm për përfshirjen e tij në veprën penale.

Për këtë arsye, është ndërmarrë masa e arrestimit.

“Me qëllim të respektimit të integritetit të procesit hetimor dhe parimit të prezumimit të pafajësisë,nuk mund të ndahen detaje të tjera në këtë fazë. Prokuroria Speciale dhe Policia e Kosovës mbeten të përkushtuara në luftimin e korrupsionit, keqpërdorimit të detyrës zyrtare dhe veprave të tjera penale, duke vepruar në përputhje me ligjin dhe me standardet e drejtësisë penale”, thotë Prokuroria.

Kryeministri në detyrë, Albin Kurti, ka komentuar sot qëndrimin e LDK’së që e prezantoi dje se do të mbesë në opozitë dhe se Presidenti duhet të jetë jopartiak dhe që e mbron “Kushtetutën e Republikën”.

Ai iu referua si “mik” kreut të LDK’së, Lumir Abdixhiku, ndërsa për të tha se s’do të “kishte qenë pak po të bëhej” zëvendës i tij në qeveri.

Gjithashtu, Kurti insistoi se pak s’është për LDK edhe po ta merrte postin e kryeparlamentarit.

“E ndoqa edhe mbrëmë qëndrimin e deklaratën publike të mikut tim, kryetarit të LDK-së, Lumir Abdixihiku, i cili tha se LDK-ja do të qëndrojë në opozitë. Unë besoj që LDK-ja është dashur të vijë në bashkëqeverisje. Ta kemi një marrëveshje politike. Nuk është e thënë të jetë identike me rezultatin e zgjedhjeve – 53 me 18 – por edhe deformim i rezultatit nuk mund të jetë. Pra, me 18 deputetë ta marrësh kryetarin e Kuvendit nuk është pak”.

Tre mërgimtarët nga Kosova që humbën jetën tragjikisht në një aksident trafiku në Gjermani do të varrosen sot.

Tahir Tahiri, Gentian Tahiri dhe Laurent Aliu do të përcillen për në banesën e fundit në një ceremoni mortore që do të mbahet në orën 17:00, në lagjen Nuhaj të fshatit Komogllavë të Ferizajt.

Tre të rinjtë humbën jetën në aksidentin tragjik teksa po ktheheshin nga Kosova drejt Gjermanisë, ku jetonin dhe vepronin.

Familjarë, miq dhe të afërm pritet të mblidhen sot për t’u dhënë lamtumirën e fundit tre mërgimtarëve.

Policia e Kosovës ka reaguar lidhur me largimin nga puna të togerit policor Arben Visoqi, një ditë pasi ai bëri të ditur se pas 26 vitesh shërbim është larguar nga Policia e Kosovës.

Ai kishte deklaruar po ashtu se ndaj tij ishte iniciuar një procedurë disiplinore pas një ankese anonime dhe kishte pretenduar edhe për hakmarrje për shkak të raporteve sinjalizuese që, sipas tij, kishte bërë ndaj zyrtarëve brenda Policisë.

Por Policia e Kosovës, përmes një komunikate, ka treguar për arsyet e largimit të tij.

Sipas Policisë, ndaj Visoqit janë iniciuar gjithsej 15 raste disiplinore, prej të cilave 13 janë trajtuar në nivel qendror dhe dy në nivel rajonal.

Policia thotë se tri prej këtyre rasteve kanë të bëjnë me shkrime dhe komente në rrjete sociale, ku në total janë shqiptuar gjashtë masa disiplinore.

“Nga 15 raste të iniciuara, 3 prej tyre kanë pasur të bëjë me shkrime dhe komente në rrjete sociale, ku në total janë shqiptuar 6 masa disiplinore ,duke përfshirë edhe rastin e fundit në gusht 2026, Ndërprerje e Marrëdhënies së Punës me vendim të PK-së. Në 3 rastet e trajtuara që kanë të bëjnë me rrjetet sociale, janë shqiptuar masat;

– Ndalesë në pagë 30% për 2 muaj, e iniciuar në vitin 2016 dhe shqiptuar masa po ashtu në vitin 2016.

– Ndalesë në pagë 30% për 6 muaj, e iniciuar në vitin 2025 dhe shqiptuar masa në vitin 2026.

-“Ndërprerje e marrëdhënies së punës”, e iniciuar në vitin 2026 dhe shqiptuar masa po ashtu në vitin 2026”, thotë Policia, transmeton Klankosova.tv.

Policia thotë se Visoqi, sipas tyre, ka vazhduar me të njëjtat shkelje, duke vepruar në kundërshtim me procedurat disiplinore.

Sipas komunikatës, shkeljet lidhen me sjellje të rëndë diskredituese, mosbindje të rëndë dhe shkelje të rëndë të autorizimit, përfshirë publikimin, shpërndarjen apo komentimin e postimeve, fotografive, videove dhe incizimeve që, sipas Policisë, dëmtojnë imazhin e institucionit.

“Mirëpo meqë zyrtari ka vazhduar me shkeljet e njëjta duke rënë në kundërshtim me procedurat e parapara ligjore, Udhëzimin Administrativ me nr. 04/2019, për Shkeljet, Masat dhe Procedurat Disiplinore në Policinë e Kosovës, Neni 20. Sjellja e rëndë diskredituese, paragrafi 1, pika 1.14. Sillet në mënyrë të tillë duke dëmtuar imazhin e Policisë së Kosovës gjatë kryerjes së detyrës apo jashtë saj; Neni 21 Mosbindja e rëndë, paragrafi 1, nen. par. 1.13. Me veprim apo mosveprim, nuk zbaton apo nënvlerëson urdhrat apo udhëzimet nga autoriteti i nivelit qendror; dhe Neni 24 Shkelja e rëndë e autorizimit paragrafi 1, nen. para. 1.17 Publikon, shfaq, shpërndan apo komenton postime, fotografi, video dhe incizime që dëmtojnë imazhin e Policisë”, thuhet tutje në komunikatë.

Ndërkohë, lidhur me vendimin për largimin nga puna, Policia bën të ditur se palëve u është dhënë mundësia për ankesë në gjykatën kompetente.

“Lidhur me vendimet PK-së, palëve iu jepet këshillë juridike për të drejtë të ankesës në gjykatën kompetente”.

Visoqi, në reagimin e tij të djeshëm, kishte deklaruar se do t’i adresojë pretendimet e tij në rrugë ligjore, duke thënë se tani i mbetet ta mbrojë të drejtën e tij në gjykatë dhe në instanca të tjera.

Arben Visoqi është po ashtu dhëndër i ish-presidentit të Kosovës, Hashim Thaçi, lidhje familjare të cilën ai vetë e përmendi në reagimin e tij.

Deputeti i Lidhjes Demokratike të Kosovës, Armend Zemaj, ka thënë se Kosova ka nevojë për institucione funksionale, teksa i ka bërë thirrje Lëvizjes Vetëvendosje që ta thërrasë seancën konstituive.

“Lëvizja Vetëvendosje duhet ta thërrasë seancën! Konstituimi i Kuvendit duhet të ndodhë. Askush nuk guxon t’i mbajë peng institucionet e vendit dhe ta thellojë krizën politike. Provokimi i situatës nuk është në interes të Kosovës. Pushtetet shkojnë e vijnë, por Kosova është mbi të gjitha. Mjaft me këto lojëra politike. Pushteti fitohet dhe mbahet në mënyrë demokratike, përmes rregullave, ligjeve dhe Kushtetutës. Askush nuk është mbi institucionet dhe askush nuk ka të drejtë ta mbajë peng shtetin”, ka shkruar ai në Facebook.

Të enjten, kryetari i LDK-së, Lumir Abdixhiku, njoftoi se partia e tij ka vendosur ta japë votën për kandidat konsensual për president duke hequr dorë nga përcaktimi paraprak se çdo marrëveshje me LVV-në duhet të nënkuptojë që ky post t’i takojë LDK-së.

“Le t’i ketë të gjitha LVV-ja”, ka thënë Abdixhiku pas mbledhjes së deputetëve të LDK-së të enjten.

Kryeministri në detyrë, Albin Kurti, tha se po kërkon të takohet “sa më parë” me kryetarët e tri partive të tjera të mëdha parlamentare.

Kryetari i Lëvizjes Vetëvendosje, tha se tani duhet të kalojnë “tek emrat e përveçëm” për Presidentin.

“Unë e përshëndes thirrjen e kryetarit Abdixhiku që edhe partitë e tjera… gjithpërfshirës të jetë Presidenti. Pra, të mos jenë vetëm dy subjekte: vetëm Vetëvendosja dhe vetëm LDK-ja. Të jenë edhe të tjerët. Dhe me këtë ide unë mbrëmë iu kam shkruar të tre kryetarëve të partive. I kam shkruar edhe kryetarit të PDK-së, Bedri Hamza, edhe kryetarit të AAK-së, Ardian Gjini, edhe kryetarit të LDK-së, Lumir Abdixhiku që sa më parë të takohemi dhe të merremi vesh për Presidentin”, tha ai.

“Duhet të takohemi, njëmend të flasim për karakteristikat e figurës presidenciale, por për besë duhet të fillojmë të flasim edhe me emra, sepse po humbim shumë kohë. A më së shumti humbim kohë duke shkuar në zgjedhje”, tha Kurti.

Ai tha se ka “dhjetëra të tillë” të denjë për pozitën e Presidentit të vendit.

“Unë mendoj që ka me dhjetëra të tillë në shoqërinë tonë, në univeristetet tona, në akademinë tonë, në jetën politike. Ata që kanë kontribuar në rezistencë paqësore, ata që kanë kontribuar në luftë çlirimtare, ata që kanë kontribuar në shtetndërtim demokratik. Kemi me dhjetëra figura që mund të jenë President”, tha ai.

Kurti u tha gazetarëve se nuk dëshiron t’i thotë para tyre emrat që i ka në mendje.

“Tash më kurseni që unë t’ua them juve emrat, sepse, siç e dini, emrin që e përmendi unë, po ia vënë vulën time, ndërkohë që ato personalitete janë të shquara në shoqërinë tonë. në popullin tonë, dhe unë kërkoj që sa më parë të ulemi me Bedri Hamzën, Lumir Abdixhikun dhe Ardian Gjinin”, tha ai.

Kurti tha se President duhet të jetë “dikush që është jashtë skenës aktuale politike, jashtë polemikave ditore partiake dhe që është figurë unifikuese”.

Ai tregoi se kryetarit të LDK-së, Lumir Abdixhiku i kishte ofruar një “President konsensual” dhe që LDK-ja ta merrte pozitën e zëvendëskryeministrit dhe tri ministri, apo që president të bëhej nënkryetari i LVV-së, Glauk Konjufca dhe që LDK-ja ta merrte pozitën e zëvendëskryeministrit dhe katër ministri.

Kompania Rajonale e Ujësjellësit “Prishtina” ka zhvilluar sot aksione në zonën e Prishtinës, ku janë realizuar disa shkyçje të konsumatorëve që kanë borxhe për shërbimet e ujësjellësit.

Sipas KRU “Prishtina”, shkyçjet janë bërë ndaj konsumatorëve me borxhe që variojnë nga 500 deri në 3 mijë euro.

Gjatë aksionit, ekipet e kompanisë kanë identifikuar edhe një numër të lidhjeve ilegale të ujit, ndaj të cilave janë ndërmarrë masat përkatëse.

KRU “Prishtina” ka paralajmëruar se aksionet do të vazhdojnë gjatë gjithë muajit, në kuadër të përpjekjeve për të parandaluar keqpërdorimin e ujit dhe për të rritur pagesat për shërbimet e ofruara.

Kompania u ka bërë thirrje konsumatorëve që t’i përmbushin obligimet e tyre dhe të mos përdorin lidhje të paligjshme në rrjetin e ujësjellësit.

Shtatë anëtarë të një bande të njohur për falsifikimin e dokumenteve, e cila ndihmonte migrantët e paligjshëm të udhëtonin nëpër Evropë, janë arrestuar ose janë dorëzuar vetë, pas përpjekjeve të Britanisë së Madhe dhe Kosovës për të penguar aktivitetin e saj.

Ambasada britanike në Kosovë bën me dije se “Rrjeti Krasniqi”, me bazë në Ballkanin Perëndimor, drejtonte një operacion të sofistikuar të falsifikimit, duke prodhuar dokumente identiteti, pasaporta dhe patenta shoferi, të cilat u mundësonin migrantëve të paligjshëm dhe trafikantëve të qenieve njerëzore të pretendonin në mënyrë të rreme shtetësinë e më shumë se 50 vendeve, përfshirë Britaninë e Madhe.

Personat që aktualisht janë nën masën e arrestit janë:

Flamur Krasniqi

Valon Krasniqi

Arif Krasniqi

Nexhmije Selmani

Shkembim Emerllahu

Sami Duriqi

Granit Avdyli

Sipas medias së madhe britanike, “The Telegraph”, Flamur Krasniqi, ka qenë anëtar i grupit që dyshohet se u gjet në posedim të dokumenteve të falsifikuara; Valon Krasniqi dyshohet se është i përfshirë në prodhimin e dokumenteve të falsifikuara; kurse Arif Krasniqi pretendohet të jetë ndërmjetës i grupit që siguronte klientë për shërbimet e tyre.

Grupi përfshinte edhe Nexhmije Selmanin, e akuzuar për ofrimin e lokaleve të përdorura nga grupi për falsifikim dokumentesh dhe për përfshirje në sigurimin e pajisjeve të falsifikimit; Shkëmbim Ermellahun, i akuzuar se u gjet në posedim të dokumenteve të falsifikuara; Sami Duriqin, i akuzuar për përfshirje në prodhimin e dokumenteve të falsifikuara; dhe Granit Avdylin, i cili thuhet se ka qenë i përfshirë në prodhimin e dokumenteve dhe reklamimin e shërbimeve të grupit.

Në tetor të vitit të kaluar, pas veprimeve fillestare të organeve të rendit në Kosovë kundër tre anëtarëve të bandës, Britania e Madhe vendosi sanksione të synuara ndaj rrjetit, si pjesë e regjimit të parë në botë të sanksioneve të qeverisë kundër migracionit të parregullt.

Në muajt në vijim, pasi identitetet e tyre u bënë publike përmes sanksioneve dhe nën presionin e autoriteteve britanike dhe kosovare, shtatë nga nëntë anëtarët e njohur të bandës janë arrestuar ose janë dorëzuar te autoritetet kosovare – i fundit prej tyre u dorëzua në maj të këtij viti.

 

Deputetja e Aleancës, Albana Bytyqi, i ka bërë thirrje Lëvizjes Vetëvendosje që të thërrasë seancën konstituive të Kuvendit të Kosovës.

Bytyqi, në konferencën për media në hollin e Kuvendit, tha se pas qëndrimit të LDK-së se do të votojnë një president konsensual, nuk ka asnjë arsye të vonohet formimi i institucioneve të reja.

“E di që Serbia nuk e njeh Kushtetutën, por që nuk e njeh as pushteti, nuk e kemi ditur. Pavarësisht gjithë asaj, ne do të bëjmë përpjekje që ta thërrasin LVV-në dhe ta bëjë konstituimin e Kuvendit. Mbrëmë e pamë LDK-në që thanë se nuk kanë asnjë arsye që të vonojnë konstituimin e Kuvendit. Ne i bëjmë thirrje LVV-së që ta bëjë konstituimin e Kuvendit dhe të vazhdojë me procedurat tutje”, tha ajo.

Ministria e Punëve të Brendshme ka njoftuar qytetarët e Republikës së Kosovës për ndryshimin e lokacionit të zyrës për pranimin e vendimeve për fitim, ri-fitim dhe humbje të shtetësisë me lirim.

Sipas njoftimit, nga e hëna, 17 gusht 2026, tërheqja e dokumentit të shtetësisë do të bëhet në objektin e Agjencisë për Regjistrim Civil, në katin e parë.

Objekti ndodhet në rrugën “Luan Haradinaj”.

MPB-ja u ka bërë thirrje qytetarëve që nga kjo datë të drejtohen në lokacionin e ri për kryerjen e këtyre shërbimeve.