Author: K.B.

Shtetas të Serbisë, si dhe disa nga Maqedonia e Veriut, Bosnja dhe Hercegovina, Mali i Zi dhe Kroacia, të cilët u evakuuan nga Izraeli, mbërritën rreth orës dy pas mesnate në Beograd me një fluturim special të Air Serbia nga Sharm el-Sheikh, i organizuar nga Qeveria e Serbisë dhe Ministria e Punëve të Jashtme.

Fluturimi special, i cili u nis nga Beogradi dje rreth orës 17:00, mbërriti në Sharm el-Sheikh rreth orës 21:00 sipas kohës lokale dhe u kthye me 67 shtetas të Serbisë të evakuuar nga Izraeli, mes tyre edhe fëmijë të vegjël, raportoi “RTS”.

Fillimisht ishte organizuar kalimi tokësor përmes kufirit egjiptian, përkatësisht transporti deri në aeroportin egjiptian.

Përveç qytetarëve serbë, në aeroplan ndodheshin edhe shtetas të Maqedonisë, Bosnjës dhe Hercegovinës, Sllovenisë, Malit të Zi dhe Kroacisë.

Sekretari shtetëror në Ministrinë e Punëve të Jashtme, Damjan Joviq, i cili u dërgua në Egjipt për të koordinuar aksionin, tha se përveç faktit që bëhet fjalë për një çështje humanitare, kjo është edhe një mesazh që Republika e Serbisë dëshiron të dërgojë: “duam marrëdhëniet më të mira dhe më të afërta, të mbushura me solidaritet me vendet tona fqinje – Malin e Zi, Maqedoninë e Veriut dhe Bosnjën e Hercegovinën”.

Avioni i parë nga Dubai me shtetas serbë zbarkoi në Beograd dje.

Sipas të dhënave të fundit nga Ministria e Punëve të Jashtme dhe Tregtisë së Jashtme e Maqedonisë së Veriut, që nga fillimi i konfliktit deri më sot, gjithsej 473 shtetas maqedonas kanë kontaktuar përfaqësitë tona diplomatiko-konsullore në Tel Aviv, Doha dhe Abu Dhabi.

“Prej tyre, 19 persona janë paraqitur nga Izraeli, 106 nga Katari, ndërsa 348 shtetas i janë drejtuar DKP-së në Abu Dhabi. Në këtë numër përfshihen edhe 18 persona nga Kuvajti, si dhe 12 persona nga Bahreini”, njoftoi Ministria.

Deputeti i Partisë Demokratike të Kosovës, Mergim Lushtaku, është deklaruar lidhur me çështjen e presidentit duke thënë se nga kjo parti kanë qenë të vullnetshëm që të arrihet një zgjidhje e kësaj situate.

Lushtaku ka thënë se po vëren një ‘’lloj arrogance’’ nga LVV’ja, dhe se, përgjegjësia kryesore bie mbi këtë parti, përcjell Express.

‘’Kemi qenë të vullnetshëm që të bëjmë një zgjidhje të situatës aktuale politike që rrjedh me zgjedhjen e presidentit, kemi qenë pro një kandidati konsensual, por ja që nuk është arrit ajo figurë që të realizohet dhe propozohet, dhe kemi dhanë edhe propozimet tona si PDK. Fatkeqësisht shohim një lloj arrogance tek shumica parlamentare që është fituese e zgjedhjeve. Përgjegjësia kryesore i mbetet LVV’së’’, ka thënë ai për media.

Tutje, deputeti i PDK’së deklaroi ‘’me keqardhje’’ se vendi po ‘’sheh’’ zgjedhje të reja, dhe se, lideri i VV’së, Albin Kurti, sipas tij, më shumë ka qenë i angazhuar të fajësoj opozitën se sa të zgjidh probleme reale.

‘’Me keqardhje po shohim që jemi drejt zgjedhjeve të reja, dhe po shohim që Kurti ka qenë me shumë i angazhuar se si t’ia lë fajin opozitës, se sa t’i zgjedh problemet reale të qytetarëve. Ne çdo iniciativë e shohim të mirëseardhur, por duhet t’i kuptojmë edhe numrat që janë në Kuvendin e Kosovës. PDK nuk ardh deri të propozimi i asnjë kandidature, ne kemi kandidat të mjaftueshëm, por derisa nuk ka një pajtueshmëri me partinë në pushteti, sigurisht që nuk ka as hapësira as me kandidu, sepse e shohim se është vetëm lojë’’, ka thënë ai.

Ministri i Brendshëm Xhelal Sveçla, ka reaguar ndaj deklarimit të ish-shefit të Inteligjencës serbe Aleksandar Vulin, duke e cilësuar si atë si thellësisht kërcënuese dhe të papranueshme.

Sveçla ka deklaruar se nuk zmbrapsen përballë këtyre kërcënimeve.

“Institucionet e Republikës së Kosovës, në nivel të lartë profesionalizmi, po e përmbushin mandatin e tyre kushtetues dhe ligjor. Ato janë të gatshme të përballen me çdo lloj kërcënimi në mënyrë profesionale dhe në përputhje me ligjin. Njëkohësisht, ne si bartës të institucioneve nuk zbrapsemi përballë këtyre kërcënimeve dhe do të vazhdojmë rrugën tonë drejt forcimit të Republikës sonë të pavarur dhe sovrane”, ka deklaruar Sveçla.

“Përpjekjet e Rusisë dhe Serbisë për destabilizimin e rajonit duhet të kenë vëmendjen e plotë të faktorëve relevantë ndërkombëtarë. E as Vulin, as Vuçiq, as nuk mund të na frikësojnë e as të na ndalin”, theksoi ai.

Deklarimet e Vulinit vijnë duke komentuar sulmin e ShBA-së e Izraelit mbi Iranin.

Ai deklaroi se “kur mundet MOSSAD-i pse nuk mundemi ne?”.

Policia e Kosovës, ka njoftuar se gjatë 24-orëve të fundit janë shqiptuar 2380 gjoba trafiku.

Në raportin e PK’së shtohet edhe se, gjatë kësaj kohe janë raportuar të kenë ndodhur 28 aksidente me dëme materiale, dhe, 20 me të lënduar.

Aty theksohet edhe se janë arrestuar 16 persona.

KESCO, në cilësinë e Furnizuesit të Shërbimit Universal, njofton se në përputhje me Ligjin për Energjinë Elektrike dhe me kërkesë të Zyrës së Rregullatorit për Energji (ZRrE), nga data 1 prill 2026 do të vazhdojë faza e dytë e daljes së konsumatorëve komercialë në tregun e hapur. Sipas kornizës ligjore dhe rregullative në fuqi, konsumatorët komercialë që kanë mbi 50 punonjës ose realizojnë qarkullim vjetor mbi 10 milionë euro nuk do të furnizohen më në kuadër të shërbimit universal me tarifa të rregulluara, por do të jenë të obliguar të zgjedhin vetë furnizuesin e tyre.

Bazuar në të dhënat zyrtare të Administratës Tatimore të Kosovës, një numër biznesesh nuk i plotësojnë më kriteret për furnizim në kuadër të shërbimit universal. Për këtë arsye, duke filluar nga 01 prill 2026, KESCO në rolin e Furnizuesit të Shërbimit Universal nuk do të mund t’i furnizojë këto biznese me tarifa të rregulluara.

Bizneset përkatëse duhet që deri më 01 prill 2026 të zgjedhin një furnizues të licencuar në tregun e hapur dhe të fillojnë procedurën e ndërrimit të furnizuesit të paktën 21 ditë pune para hyrjes në fuqi të kontratës së re. Lista e furnizuesve të licencuar është e publikuar në faqen zyrtare të ZRrE-së (ERO)www.ero-ks.org.

Në rast se një biznes nuk zgjedh furnizues me kohë, nga 01 prill 2026 do të furnizohet përkohësisht nga Furnizuesi i Mundësisë së Fundit për një periudhë deri në 60 ditë, gjatë së cilës duhet të lidhë kontratë me një furnizues të licencuar. Në mungesë të një kontrate brenda këtij afati, furnizimi me energji elektrike do të ndërpritet në përputhje me legjislacionin në fuqi.

Gjithashtu, bizneset që janë vet-konsumatorë (prosumatorë) njoftohen se nga kjo datë përfundon marrëveshja ekzistuese për vet-konsum në kuadër të skemës me tarifa të rregulluara, ndërsa trajtimi i energjisë së prodhuar dhe të injektuar në rrjet do të rregullohet sipas kushteve të kontratës me furnizuesin e zgjedhur.

KESCO fton bizneset që të konfirmojnë pranë kompanisë numrin e punonjësve, qarkullimin vjetor dhe njësitë/matësit në shfrytëzim, në mënyrë që të sigurohet trajtimi korrekt gjatë procesit të kalimit në tregun e hapur.

Për informata shtesë:
[email protected]
038 501 701 2020
038 79 20 20

Zgjedhjet presidenciale të vitit 2009 në Iran u kthyen në një masakër. Votimi u manipuluar në favor të konservatorit Mahmud Ahmadinejad dhe njerëzit dolën në rrugë për të protestuar me miliona. Kujtoj një rrugë me dymbëdhjetë korsi dhe dhjetë kilometra e gjatë, plot iranianë që brohorisnin emrin që kishin zgjedhur në kutitë e votimit: «Moussavi, Moussavi».

Nga turma ngjitej një energji e fuqishme, por paqësore. Ishte si të ngjante një gulçim në fyt. Nuk kisha parë kurrë diçka kaq masive as më parë, as më pas. Vetëm atë ditë mund të ishin të paktën dy milionë njerëz. E quajtën protestën «Valë e Gjelbër», në nder të ngjyrës së Islamit, dhe ishte momenti i fundit kur Republika Islamike mund të kishte ruajtur legjitimitetin popullor. Demonstruesit nuk kërkonin të bëheshin proamerikanë apo të heqnin dorë nga pavarësia. Shumë prej tyre mbështetnin madje një hierarki civile-religjioze. Por ata donin të kishin zë në të ardhmen e vendit dhe të respektoheshin.

Megjithatë, sistemi i ajatollahëve i shtypi. Marshimet u sulmuan nga banda me motorë. Mijëra u vranë dhe u arrestuan. Dënimet me vdekje ishin të tmerrshme. Influencerët që sot e mbushin internetin e diasporës u larguan nga vendi në ato javë. Moussavi, i cili gjithmonë kishte përulur turbantin, është ende i burgosur në shtëpi.

Organizimin e manipulimeve dhe koordinimin e shtypjes e bëri një klerik rreth të dyzetave. Ai e transformoi degën rinore të Gardës Revolucionare në makinën e represionit të brendshëm që sot njihet si Basij. Mbante turbantin e zi, të lejuar vetëm për ata që mund të pretendojnë prejardhje të gjakut (të vërtetë ose të trilluar) nga Profeti. Quhej Mojtaba Hosseini Khamenei. Ishte djali i dytë i Udhëheqësit Suprem Ali Khamenei.

Shtatëmbëdhjetë vjet më vonë, mbrëmë, ai mori vendin e babait si udhëheqës i Republikës Islamike. Ai është pasardhësi. Dhe, si i tillë, tashmë është në shënjestër të Izraelit. Këtë e tha qartë ministri i Mbrojtjes, Katz, në orët e para të mëngjesit të 4 marsit: «Çdo lider i emëruar do të jetë një objektiv i pashmangshëm për eliminim».

Me këtë emërim, Republika humb edhe hipokrizinë e emrit të saj. Njeriu që ndihmoi ta shndërrojë Republikën në një diktaturë, tani e bën atë trashëgimore. Babai ka punuar mirë për t’i hapur rrugën. Ka grumbulluar pushtetin, i ka dhënë kontroll mbi konglomerate të mëdha ekonomike. Mojtaba Khamenei thuhet se kontrollon 40% të ekonomisë kombëtare. Gardistët e Revolucionit i janë besnikë. Basij mbeten një bastion. Nëse Donald Trump shpresonte se pas vdekjes së ajatollahut të vjetër do të vinte dikush më i butë në pushtet, mbeti i zhgënjyer. Me Mojtaban, asgjë në Iran nuk mund të ndryshojë.

Si babai në kohën e tij, edhe trashëgimtari 56-vjeçar duhet të promovojë zyrtarisht në gradën e ajatollahut për të marrë vendin e babait. Ka studiuar teologji në seminaret e Qom-it, por ende nuk ka aftësitë e nevojshme fetare. Nuk ka rëndësi. Është mësuar të injorojë rregullat. Ka sfida më të mëdha përpara: lufta, opozita e brendshme, kriza ekonomike dhe rreziku për t’u vrarë.

Vetë procedura e emërimit mbetet ende mister. Presidenti Masoud Pezeshkian kishte njoftuar të dielën se pasardhësi do të shpallej «edhe brenda dy-tre ditësh». E mbajti fjalën. Arriti të japë ndjesinë se sistemi vazhdon të funksionojë, pavarësisht se nuk ka mbrojtje ajrore dhe spiunët kanë infiltruar rrjetin. SHBA dhe Izraeli u përpoqën të pengonin zgjedhjen. Të hënën u shkatërrua në Teheran selia e Asamblesë së Ekspertëve, një lloj Gjykate Kushtetuese që duhej të zgjidhte pasardhësin. Mbrëmë u shkatërrua një zyrë e Asamblesë në Qom dhe më pas një pallat në Teheran, ku sipas izraelitëve «po mbahej mbledhja për të zgjedhur pasuesin e Ali Khamenei». Kishin gabuar. Por ndjekja e Mojtabës, ka të ngjarë, vazhdon./CorrieredellaSera

Kompania Rajonale e Ujësjellësit “Prishtina” ka njoftuar se nga java e ardhshme do të nisë procesi i nënshkrimit të kontratave për shërbime, me të gjithë konsumatorët e kyçur në sistemin e rrjetit të ujësjellësit.

Sipas KRU-së, me kontratën e shërbimeve të ujit rregullohen marrëdhëniet juridike ndërmjet palëve kontraktuese, përkatësisht të drejtat dhe obligimet e ndërsjella.

“Kontrata përmban: të drejtat dhe obligimet e palëve për shërbimet e ofruara; të drejtat dhe obligimet e konsumatorit; mënyrën e faturimit për shërbimet e ofruara; procedurat për ankesa, kërkesa dhe shqetësime të konsumatorëve; si dhe dispozita të tjera të bazuara në legjislacionin në fuqi” thuhet në njoftimin e KRU-së.

Me këtë rast, KRU “Prishtina” ka apeluar te qytetarët që të mos hezitojnë të nënshkruajnë kontratën për shërbime.

Mos-nënshkrimi i saj mund të rezultojë në pengesa në realizimin e të drejtave dhe obligimeve të dyanshme, sipas KRU-së.

Kompania do të japë afat ligjor deri në nënshkrim të kontratës, përndryshe konsumatorët do të shkyçen nga shërbimet e ujësjellësit.

Deputeti i Kosovës, Xhavit Haliti, ka komentuar rreth çështjes së zgjedhjes së presidentit të Kosovës, duke theksuar se koalicioni politik me Lëvizjen Vetëvendosje nuk mund të formohet për këtë post.

Sipas tij, një marrëveshje politike është thelbësore për të siguruar një president që do të përfaqësojë të gjithë interesat e Kosovës dhe që do të jetë i paanshëm.

Haliti theksoi se nuk është praktike që partitë të propozojnë emrat e tyre për president, duke nënvizuar se zgjedhja e kreut të shtetit duhet të jetë rezultat i një konsensusi mes partive, e jo një vendim i vetëm i një partie.

Për kandidaturën e mundshme të Glauk Konjufcës, Haliti theksoi se megjithëse ka pasur përvojë të shërbimit publik, një president duhet të ketë një përvojë më të thellë politike dhe të jetë i njohur për rolin e tij brenda institucioneve.

Ai gjithashtu shprehu dyshime për interesin e Kurtit në zgjidhjen presidentit të vendit, duke thënë se nuk beson që Kurti është i interesuar që të arrihet një marrëveshje për presidentin.

“Për çështjen e presidentit, ne nuk mund të hyjmë në koalicion me LVV-në sepse koalicioni hidhet për qeveri jo për president, ne jemi të interesuar që presidenti të zgjidhet dhe të jetë i pranuar dhe i përshtatshëm për të qenë president i Kosovës dhe të jetë në shërbim të gjithë interesave të Kosovës dhe të jetë i paanshëm.

Politikisht dhe si praktikë nuk do të ishte e mirë që VV t’i kishte të gjitha pushtetet, mendoj që partitë nuk duhet me shkua me emrat e vet për president sepse mendoj që asnjëra s’mund me zgjedh presidentin, por duhet me u bë një marrëveshje politike për presidentin e Kosovës. S’kemi folur për emra për president me Partinë Demokratike të Kosovës, nuk e di kush mund me qenë, ka shumë figura në PDK që mund ta kryejnë këtë detyrë. Mendoj që nuk do të ishte e shëndetshme që ai kandidat që propozohet për president të mos jetë politikan, që të mos ketë përvojë politike brenda institucioneve. Vjosën e kemi provuar 5 vite, Glauku ka qenë katër vjet kryetar parlamenti, unë kam kaluar mirë gjithmonë me ta, politikisht s’mendoj si ata. Unë mendoj personalisht që Kurti s’është i interesuar që ta zgjedhim presidentin”, ka deklaruar Haliti në tëvë1.