Author: K.B.

Komuna e Prishtinës fton qytetarët të marrin pjesë në aktivitetet përkujtimore të 28-vjetorit të Epopesë së Ushtrisë Çlirimtare të Kosovës, të cilat do të zhvillohen sipas programit të përcaktuar nga autoritetet lokale.

Sipas njoftimit zyrtar, aktivitetet fillojnë më 5 mars 2026 me orën ligjërate për Epopenë e UÇK-së në Shkollën e Mesme “Xhevdet Doda”. Ligjëratën do ta mbajnë kryetari i Komunës, Përparim Rama, udhëheqësi i Sektorit për Çështjet e Kategorive të Dala nga Lufta e UÇK-së, Sylë Vitia, si dhe kryetari i OVL të UÇK-së, dega në Prishtinë, Fatmir Sopi. Pas ligjëratës, në orën 10:00 do të mbahet seancë përkujtimore në Kuvendin Komunal të Prishtinës.

Më 6 mars, aktivitetet përfshijnë nderime pranë varrezave të dëshmorëve në Velani në orën 10:00, ndjekur nga homazhet pranë shtatores së heroit Zahir Pajaziti në orën 10:30, dhe në orën 13:00 homazhe në Kompleksin Memorial “Adem Jashari” në Prekaz.

Programi përmbyllet më 7 mars në orën 18:00 me ndezjen e flakadanëve në amfiteatrin e sheshit “Zahir Pajaziti”, ku do të shfaqet edhe një ekspozitë me punime të nxënësve të shkollave të qytetit.

Komuna e Prishtinës i bën thirrje qytetarëve të përfshihen në aktivitetet përkujtimore për të nderuar kujtimin e dëshmorëve dhe kontributin e Ushtrisë Çlirimtare të Kosovës në lirinë e vendit.

Sot po zhvillohet një ditë intensive për procesin e zgjedhjes së presidentit në Kosovë, ndërsa Grupi Parlamentar i Lëvizja Vetëvendosje kanë filluar të mbledhje për çështjen e kandidaturave. Megjithatë, deputetët nuk zbuluan nëse do të propozojnë Andin Hoti për president.

Mefail Bajqinofci nuk dha asnjë koment lidhur me këtë. Po ashtu, as Arjeta Fejza e as Hysen Durmishi nuk konfirmuan nëse Hoti është në garë për postin e presidentit.

“Do ta shihni në njoftimet zyrtare, çdo gjë do të jetë publike,” tha Fejza, kur u pyet për kandidaturën e Hotit, duke shtuar: “Nuk e di.”

Edhe Hysen Durmishi nuk dha deklarata për këtë çështje.

Ndërsa Abdulla Klinaku u pyet nëse sot do të ketë seancë për zgjedhjen e presidentit dhe për kandidaturën e Andin Hotit. Ai tha:
“Unë e di, a do të ketë seancë, do ta shohim se çka do të flitet sot në mbledhje.”

Po ashtu, deputetja Fatmirë Kollqaku, gjatë hyrjes në mbledhje, tha:

“Do ta shpallim se çka do të ndodhë dhe në kohën e duhur do t’i emërtojmë të gjitha informacionet.”

Qeveria e Mbretërisë së Bashkuar do të ndalojë lëshimin e vizave studentore për persona nga Afganistani, Kameruni, Mianmari dhe Sudani duke filluar nga ky muaj, ka deklaruar Sekretarja e Brendshme, Shabana Mahmood, si dhe do të ndalojë vizat e punës së kualifikuar për afganët, raporton BBC.

Ministria e Brendshme tha se ky veprim po merret për shkak të abuzimeve.

Sipas shifrave zyrtare, personat nga këto katër vende kishin më shumë gjasa të paraqisnin kërkesë për azil pasi kishin ardhur fillimisht në Mbretërinë e Bashkuar për studime.

“Qeveria po godet abuzimin me vizat në mënyrë që Mbretëria e Bashkuar të mund të ruajë aftësinë dhe traditën e saj krenare për të ndihmuar ata që janë vërtet në nevojë,” shtoi një zëdhënës i qeverisë.

Në njoftimin e saj, qeveria tha se kërkesat për azil nga persona që ishin nisur fillimisht në Mbretërinë e Bashkuar në mënyrë të ligjshme, për të studiuar, u trefishuan midis vitit 2021 dhe 2025.

Të dhënat e Ministrisë së Brendshme treguan se personat që kërkonin azil bazuar në vizat studentore përbëjnë 13% të të gjitha kërkesave aktualisht në sistem.

Mahmood tha se po merrte “vendimin e pa precedent për të refuzuar vizat për ata shtetas që kërkojnë të shfrytëzojnë bujarinë tonë”.

“Unë do të rivendos rendin dhe kontrollin në kufijtë tanë.”

Ministria e Brendshme tha se një përqindje më e lartë se mesatarja e personave nga katër vendet e specifikuara përmendën varfërinë ekstreme si pjesë të kërkesës së tyre për azil, dhe aktualisht po mbështeten 16,000 persona nga këto katër vende.

Rreth 95% e afganëve që mbërritën në Mbretërinë e Bashkuar me vizë studimi kanë aplikuar më pas për azil që nga viti 2021, ndërsa aplikimet nga studentët nga Mianmari u rritën 16 herë dhe kërkesat nga studentët nga Kameruni dhe Sudani u katërfishuan e më shumë.

Turqia neutralizon raketë iraniane drejt hapësirës së saj ajrore.

Ministria e Mbrojtjes e Turqisë njoftoi se një municion balistik i nisur nga Irani, i cili kaloi hapësirën ajrore të Irakut dhe Sirisë dhe më pas u drejtua drejt Turqisë, u neutralizua në kohë nga forcat ajrore dhe raketore të NATO-s në Detin Mesdhe Lindor.

Sipas ministrisë, pjesa e municionit që ra në qarkun Dortyol të provincës Hatay i përkiste raketës mbrojtëse që kishte ndërhyrë dhe nuk pati asnjë viktimë ose të lënduar.

“Niveli ynë i kapacitetit dhe vendosmëria për të mbrojtur sigurinë e vendit dhe qytetarëve tanë është i lartë. Turqia është e aftë të mbrojë territorin dhe qytetarët e saj, pavarësisht nga burimi i kërcënimit. Çdo hap për mbrojtjen e hapësirës ajrore do të ndërmerret me vendosmëri dhe pa hezitim”, thuhet në njoftim.

Ministria bëri thirrje që të gjitha palët të shmangin veprime që mund të përshkallëzojnë konfliktin në rajon dhe konfirmoi se do të vazhdojë koordinimin me NATO-n dhe aleatët e tjerë.

Ky incident vjen në një moment tensioni ndërkombëtar dhe shton vëmendjen mbi sigurinë rajonale, duke treguar gatishmërinë e Turqisë për të vepruar shpejt dhe vendosmërisht për të mbrojtur hapësirën e saj ajrore.

Kreu i Organizatës Botërore të Shëndetësisë, Tedros Adhanom Ghebreyesus pas një incidenti vdekjeprurës që përfshinte punonjësit shëndetësorë në Libanin jugor, paralajmëroi se konflikti në zgjerim në Lindjen e Mesme po ndikon gjithnjë e më shumë në shërbimet shëndetësore në të gjithë rajonin.

Drejtori i përgjithshëm i OBSH-së, Ghebreyesus në një deklaratë të martën tha se “Zgjerimi i konfliktit në Lindjen e Mesme po ndikon gjithnjë e më shumë në shërbimet shëndetësore në të gjithë rajonin”.

Ai tha se është “i trishtuar” nga zhvillimet në Liban ku tre punonjës shëndetësorë u vranë dhe gjashtë të tjerë u plagosën ndërsa përpiqeshin të rikuperonin njerëzit e plagosur në shpërthimet në rrethin jugor të Tiros.

Ghebreyesus paralajmëroi se situata paraqet rreziqe në rritje për personelin mjekësor që vepron në zonat e konfliktit.

“Rreziku që më shumë punonjës shëndetësorë të numërohen midis viktimave është i lartë. Kjo duhet të shmanget me çdo kusht”, tha ai duke shtuar se punonjësve shëndetësorë, mjekëve dhe infermierëve duhet t’u lejohet të kryejnë punën e tyre shpëtimtare, veçanërisht gjatë krizave.

Ghebreyesus u kërkoi të gjitha palëve të përfshira në luftime të respektojnë ligjin ndërkombëtar humanitar dhe të sigurojnë mbrojtjen e stafit mjekësor, objekteve dhe pacientëve. “Palët ndërluftuese duhet t’i përmbahen ligjit ndërkombëtar humanitar dhe të mbrojnë punonjësit e shëndetësisë, institucionet dhe pacientët”, tha ai.

Duke bërë thirrje për përmbajtje mes tensioneve rajonale në rritje, ai tha: “Unë bëj thirrje për përmbajtje maksimale dhe që zërat e mençurisë dhe paqes të ngrihen mbi zhurmën e bombardimeve”.

Tensionet janë përshkallëzuar në të gjithë rajonin që kur SHBA-ja dhe Izraeli nisën sulme në shkallë të gjerë ndaj Iranit të shtunën dhe që atëherë kanë vrarë gati 800 njerëz, përfshirë udhëheqësin suprem Ali Khamenei dhe zyrtarë të lartë ushtarakë. Irani është përgjigjur me sulme me dronë dhe raketa që synojnë Izraelin si dhe vendet e Gjirit, të cilat janë shtëpi e aseteve ushtarake amerikane.

Deputeti i Partia Demokratike e Kosovës (PDK), Artan Behrami, ka drejtuar akuza ndaj kryeministrit Albin Kurti, duke e akuzuar për, siç ka thënë ai, “keqpërdorim të familjeve për qëllime politike”.

Përmes një reagimi në Facebook, Behrami ka renditur disa familje për të cilat pretendon se janë shfrytëzuar politikisht nga Kurti ndër vite.

“Fillimisht e keqpërdori familjen Balaj dhe Xheladini. Më pas e keqpërdori familjen Dehari. E keqpërdori edhe familjen Zymberaj. Më pas e keqpërdori edhe familjen Bunjaku. E keqpërdori edhe familjen Konjufca. Më pas e keqpërdori familjen Haxhiu. Së fundmi e keqpërdori familjen e shenjtë Jashari! Cila familje e ka radhën?”, ka shkruar Behrami.

Zëvendësimi i Udhëheqësit Suprem të vrarë të Iranit, Ajatollah Ali Khamenei, me djalin e tij të dytë, Mojtaba Khamenei, do të thoshte vazhdimi i regjimit, kështu ka thënë për CNN një eksperte për zhvillimet në Lindjes së Mesme.

Duke folur CNN-së në lidhje me rëndësinë e emërimit të mundshëm të Mojtaba Khamenei-t në pozicionin e lartë, Maha Yahya, drejtoreshë e Qendrës Carnegie për Lindjen e Mesme me seli në Bejrut, ka thënë se “Sinjali që do të dërgonte është një vazhdim i regjimit.”

“Regjimi ende po mbahet i bashkuar dhe ne e shohim këtë,” shtoi ajo.

“Ne shohim se shumë qartë nuk ka pasur çarje, asnjë rrjedhje, asgjë. Po mbahet i bashkuar dhe po mbahet mjaft mirë.”, ka potencuar Yahya.

Yahya shpjegoi se si pasardhës, Mojtaba Khamenei ka të ngjarë të intensifikojë regjimin, pasi ai konsiderohet më shumë si një “i vijës së ashpër” sesa babai i tij, i cili u vra në sulmet amerikane-izraelite të shtunën.

Nëse ai emërohet, shtoi ajo, ky veprim do të konsiderohej një sinjal nga regjimi se presioni ushtarak SHBA-Izrael “nuk do të na bëjë të ndryshojmë qëndrim”.

Yahya vuri në dukje se strategjia e Iranit ka qenë të godasë ekonomikisht kërcënimet e mundshme për regjimin e tij, diçka që ajo tha se e ka ruajtur që nga fillimi i konfliktit të shtunën.

“Strategjia e Iranit, që nga dita e parë, ka qenë të rrisë vërtet koston për të gjithë,” shpjegoi Yahya,

“Po synon infrastrukturën energjetike, e cila po ndikon në Evropë dhe pjesë të tjera të botës. Po synon infrastrukturën civile.”

Aleksandar Vuçiq ka bërë një krahasim absurd mes bombardimeve të NATO ndaj Serbi në vitin 1999 dhe sulmit të fundit të Izrael dhe Shtetet e Bashkuara ndaj Iran, duke pretenduar se për Serbinë ishin bërë përgatitje më të mëdha sesa për operacionin kundër Teheranit.

Në një deklaratë për media, pas vizitës në Qendrën Kombëtare të Dispeçerisë së Elektromrezhës serbe, Vuçiq tentoi të ironizojë qasjen amerikane në konflikt, duke lënë të kuptohet se Uashingtoni ka vepruar pa plan të qartë dhe me pasoja potencialisht katastrofale për rendin global.

Ai një krahasim të drejtpërdrejtë me bombardimet e Serbi nga NATO në vitin 1999, të cilat ndalën luftën serbe në Kosovë. Sipas tij, në atë kohë ishin bërë përgatitje shumë më të mëdha sesa në rastin e sulmit ndaj Iranit.

“Për Serbinë bënë përgatitje më të mëdha sesa për Iranin. Gjithçka është bërë sipërfaqësisht. Pasojat janë katastrofale”, deklaroi ai, duke shtuar se nuk e kupton “kush e planifikoi këtë” dhe çfarë është menduar me idenë se “me vrasjen e Hameneit gjithçka përfundon”.

Vuçiq tha se prej një muaji kishte paralajmëruar për një sulm amerikan ndaj Iranit dhe se, sipas tij, shumë aktorë ndërkombëtarë kanë hyrë të papërgatitur në krizë – “përveç Iranit”.

Ai paralajmëroi se Serbia do të ndërmarrë masa në lidhje me zhvillimet e fundit dhe se publiku do të informohet më hollësisht gjatë fundjavës. /Klix

Në një lidhje live nga Doha për Euronews Albania, regjisori producenti Eki Rrahmani foli mbi situatën e tensioneve që ka përfshirë gjithë Lindjen e Mesme.

Sipas tij, situata mbetet për momentin e qetë në Katar, por siç e theksoi edhe ai, qytetarët jetojnë me frikën se mos sulmet mund të shënjestrojnë ndërtesat e tyre. Sakaq, ai theksoi se shqiptarët që ndodhen në Katar kanë një komunikim të vazhdueshëm dhe se janë në pritje të zhvillimeve që mund sjell kjo luftë.

“Vendet e Gjirit Persik kanë qenë oaze për luftëra të tjera që kanë ndodhur këtu në rajon. Oaze që ju kanë dhënë siguri investitorëve, por në një farë mënyre u është prishur ai imazh pasi tani nuk është më ai vend i sigurt me zhvillimin e luftës.

Çdo ditë është dhe duke shkuar më lart tensioni, nuk ka nivele më të larta. Nuk është ndjenjë e mirë kur çdo ditë dëgjon se po gjuajnë me bomba, ku çdo herë mendojmë se mund të jetë shtëpia apo godina jonë në shënjestër.

Megjithatë është një tension i menaxhueshëm, kur shikoj një pamje më të gjerë se çfarë po ndodh në të gjithë rajonin krahasuar me këtu, mendoj se është ok.

Kemi qenë një komunitet më i madh para pandemisë, ndërkohë gjatë pandemisë shumica nuk u kthyen më. Jemi një komunitet me qindra, le të themi, jemi një komunitet i vogël, por jemi në kontakt me njëri-tjetrin, është komunitet i vogël, por kemi lidhje të ngushta.

Tani hapësira ajrore është e mbyllur, po presim për njoftime edhe nga shtetet e tjera se çfarë ka për të ndodhur. Jemi në kontakt me ambasadën e Kosovës, të Shqipërisë, të Anglisë, por pak a shumë të gjithë jemi në të njëjtën situatë.

Po presim mos po bëhet ndonjë korridor që shtetet t’i tërheqin shtetasit e tyre prej Katarit dhe prej vendeve të tjera të Lindjes.

Nga informatat që kam marrë, në Katar janë 8000 mijë udhëtarë që kanë mbetur, sepse aeroporti i Katarit është një nga aeroportet më të ngarkuara.

Vendet e ndryshme duan të evakuojnë qytetarët e tyre dhe kjo është problem i Presidentit Trump dhe Netanyahut, të cilët nuk kanë një plan se çfarë do të ndodhë më pas”, u shpreh ai.