Author: K.B.

Kryediplomati shqiptar, Ferit Hoxha, tha se Shqipëria mirëpret vendimin e Komisionit Europian për heqjen e plotë të masave ndëshkuese ndaj Kosovës.

Hoxha që tha se ndodhi “më në fund” ky vendim, kritikoi për vonesë BE’në.

“Ky hap ishte vonuar prej kohësh dhe konfirmon përkushtimin e Kosovës ndaj vlerave europiane, sundimit të ligjit dhe bashkëpunimit konstruktiv rajonal”.

Megjithatë, Hoxha tha se vendimi “i hap rrugën për qasje të plotë dhe të papenguar në fondet e BE-së, ndihmën dhe bashkëpunimin e përgjithshëm”.

“Ai ndihmon në rindërtimin e besimit dhe forcon besueshmërinë e procesit të integrimit europian. Avancimi i rrugës europiane të Kosovës — përfshirë shqyrtimin pa vonesë të aplikimit të saj për statusin e vendit kandidat në BE — do të kontribuojë për një rajon më të qëndrueshëm dhe më të sigurt. Ai gjithashtu do të rikonfirmojë dhe forcojë perspektivën evropiane të të gjitha vendeve të Ballkanit Perëndimor”, shkroi ai.

BE kishte ndëshkuar Kosovën për shkak të tensioneve që shpërthyen në veri të vendit me vendosjen e kryetarëve shqiptarë në katër komunat me shumicë serbe.

Kryetari i PDK-së, Bedri Hamza, është shprehur i pikëlluar më tragjedinë në Vjenë, ku kanë humbur jetën tre punëtorë kosovarë në vendin e tyre të punës.

Ai u ka shprehur ngushëllimet me të sinqerta familjeve të viktimave.

“I pikëlluar thellë nga tragjedia në Austri, ku humbën jetën disa persona, mes tyre tre të rinj nga Kosova. Ngushëllime të sinqerta për familjet dhe të afërmit e tyre. Në këto momente të vështira, me mendje e zemër jemi pranë tyre”, ka shkruar Hamza në profilin e tij në Facebook.

Gjykata Themelore në Gjakovë ka aprovuar kërkesën e Prokurorisë Themelore, duke i caktuar masën e paraburgimit prej një muaji të pandehurit N.Z., i dyshuar për vrasjen e rëndë në Gjakovë.

I dyshuari akuzohet për veprat penale “vrasje e rëndë” dhe “mbajtje në pronësi, kontroll ose posedim të paautorizuar të armëve”.

“Gjykata Themelore në Gjakovë ka aprovuar kërkesën e Prokurorisë Themelore, duke i caktuar masën e paraburgimit një (1) muaj të pandehurit N.Z.”, thuhet në njoftim.

Sipas Prokurorisë, ngjarja ka ndodhur më 16 mars rreth orës 05:20, në një lokal në rrugën “Vëllezërit Frashëri” në Gjakovë, pas një mosmarrëveshjeje mes palëve.

“I pandehuri me dashje ka privuar nga jeta tani të ndjerin R.B., duke vënë në rrezik edhe jetën e personave të tjerë që kanë qenë prezent në vendin e ngjarjes”, thuhet në njoftim.

Si pasojë e të shtënave me armë zjarri, viktima ka ndërruar jetë në afërsi të vendit të ngjarjes, ndërsa një person tjetër ka mbetur i plagosur dhe është dërguar për trajtim në Spitalin Rajonal “Isa Grezda” në Gjakovë.

“Si pasojë e të shtënave, i dëmtuari E.M. pëson lëndime trupore dhe dërgohet për trajtim mjekësor, ndërsa i pandehuri largohet nga vendi i ngjarjes”, thuhet më tej.

Gjyqtari i procedurës paraprake, Samedin Cena, pas mbajtjes së seancës dëgjimore ka vlerësuar se janë përmbushur kushtet ligjore për caktimin e paraburgimit.

“Janë përmbushur kushtet ligjore për caktimin e masës së paraburgimit ndaj të pandehurit”, thuhet në vendim.

Me këtë vendim, i pandehuri do të qëndrojë në paraburgim për një muaj, nga data 16 mars deri më 16 prill 2026.

Në Gjykatën Themelore në Prishtinë, po mbahet seanca e radhës ndaj të tre akuzuarve lidhur me sulmin terrorist të 24 shtatorit 2023 në fshatin Banjskë të Zveçanit: Vladimir Toliq, Dushan Maksimoviq dhe Blagoje Spasojeviq,.

Në këtë seancë pritet të japë mbrojtjen i akuzuari Maksimoviq, ndërkaq dy të akuzuarit tjerë Toliq dhe Spasojeviq ishin mbrojtur në heshtje seancën e kaluar, raporton “Betimi për Drejtësi“.

Gjykata Themelore në Prishtinë pas propozimit të prokurorit special Naim Abazi që gjykimi të vazhhdojë në mungesë, i ishte drejtuar Gjykatës Supreme për të kërkuar opinion nëse në rastin “Banjska” mund të aplikohet gjykimi në mungesë. Por, Supremja, pas shqyrtimit të kërkesës “për dhënie të mendimit juridik përkitazi me nenin 303 par.7 të Kodit Procedurës Penale në rastin “Banjska”, kishte sqaruar se nuk jep mendime juridike për dilemat që ka shkalla e parë gjatë procedimit të rastit.

Kështu, Gjykata Themelore në Prishtinë ka marrë vendim, me të cilin ka refuzuar propozimin që gjykimi për 42 të akuzuarit tjerë (41 persona fizikë dhe një person juridik) të akuzuar për sulmin terrorist në “Banjskë” të vazhdojë në mungesë. Gjykata po ashtu kishte bërë të ditur që për këta të pandehur është lëshuar letërreshtim ndërkombëtar dhe pritet ndalimi dhe ekstradimi i tyre për zhvillimin e procedurës ndaj tyre.

Seanca e shqyrtimit gjyqësor ndaj të tre akuzuarve në rastin “Banjska”: Vladimir Toliq, Dushan Maksimoviq dhe Blagoje Spasojeviq, u mbajt më 17 prill 2025, në të cilën tre të akuzuarit u deklaruan të pafajshëm. Ndërsa, prokurori special Naim Abazi, mbrojtja e të akuzuarve dhe pala e dëmtuar, kanë dhënë fjalën hyrëse.

Edhe në shqyrtimin fillestar të mbajtur më 9 tetor 2024, tre të pandehurit janë deklaruar të pafajshëm.

Ndryshe, Gjykata Themelore në Prishtinë – Departamenti Special, me aktvendimin e 6 dhjetorit 2024, i kishte refuzuar si të pabazuara kërkesat për hudhje të aktakuzës dhe kundërshtimet ndaj provave, të paraqitura nga mbrojtësit e të akuzuarve të lartpëmendur kundër aktakuzës së Prokurorisë Speciale të Republikës së Kosovës.

Kurse, Gjykata e Apelit më 13 mars 2025 njoftoi se ka marrë vendim, me të cilin e ka vërtetuar aktvendimin e Gjykatës Themelore në Prishtinë me të cilën u konfirmua aktakuza ndaj të akuzuarve në rastin “Bajska”.

Deri tani, të arrestuar dhe nën masën e paraburgimit për këtë rast janë: Blagoje Spasojeviq, Vladimir Toliq dhe Dushan Maksimoviq, për të cilët është veçuar procedura penale.

Aktakuza e Prokurorisë Speciale ngarkon 44 persona fizikë dhe një person juridik “RAD D.O.O”. Listës së të akuzuarve i prin Milan Radoiçiq.

Prokuroria Speciale e Republikës së Kosovës (PSRK) më 11 shtator 2024 ka ngritur aktakuzë kundër Milan Radoiçiqit dhe 44 të tjerëve për sulmin terrorist të 24 shtatorit 2023 në Banjskë të Zveçanit. Të akuzuarit ngarkohen se përmes përdorimit të dhunës me armatim të rëndë, tentuan ta shkëpusin pjesën veriore të territorit të Republikës së Kosovës e t’ia bashkojnë Republikës së Serbisë, me ç’rast si rezultat i dhunës së përdorur ka mbetur i vdekur zyrtari policor Afrim Bunjaku e u rrezikua jeta e zyrtarëve tjerë policorë dhe popullatës civile. Aktakuzën e plotë mund ta gjeni: KËTU.

Në Bajsnkë të Zveçanit, në orët e hershme të 24 shtatorit 2023, ishte vrarë rreshteri Afrim Bunjaku si dhe ishin plagosur dy të tjerë. Pastaj, të vrarë kishin mbetur edhe tre sulmues, kurse të tjerët ishin larguar pasi ishin strehuar për disa orë në Manastirin e Bajnskës. Milan Radoiçiq e kishte marrë përsipër përgjegjësinë për sulmin terrorist.

Kryetarja e Kuvendit të Kosovës, Albulena Haxhiu është shprehur e tronditur pas lajmit për vdekjen tragjike të Pajtim Bajramit, Asllan Musliut dhe Istref Zekajt në një kantier ndërtimi në Vjenë.

Ajo u shprehi ngushëllime familjarëve të viktimave, ndërsa shtoi se humbja e jetëve të bashkëkombasve në vendin e punës është dhimbje që prek të gjithë.

“Lajmi për vdekjen tragjike të Pajtim Bajramit, Asllan Musliut dhe Istref Zekajt në një kantier ndërtimi në Vjenë më tronditi thellë. Humbja e jetëve të bashkëkombasve tanë në vendin e punës është një dhimbje që na prek të gjithëve. Në këto çaste të vështira, shpreh ngushëllimet më të sinqerta për familjet dhe të afërmit e tyre. Ndajmë dhimbjen me ta dhe qëndrojmë pranë tyre në këtë humbje të madhe”, ka shkruar kryeparlamentarja në Facebook.

Ambasada e Republikës së Kosovës në Emiratet e Bashkuara Arabe, ka dal me një njoftim të ri për qytetarët e Kosovës që ndodhen atje.

Përmes një postimi në Facebook, nga kjo Ambasadë ka thënë se në përputhje me legjislacionin dhe rregullat e brendshme në fuqi në vendi pritës, ndalohet rreptësisht fotografimi, incizimi apo shpërndarja e pamjeve dhe informacioneve nga vendet ku ndodhin incidente të lidhura me raketa apo dronë, si dhe publikimi i vendndodhjeve të këtyre incidenteve në rrjete sociale apo platforma të tjera.

“Autoritetet e Emirateve të Bashkuara Arabe zbatojnë masa të rrepta ligjore ndaj çdo shkeljeje, përfshirë:

*gjoba të larta financiare,

*dënime me burg,

*konfiskim të pajisjeve elektronike,

*si dhe deportim të shoqëruar me ndalim të rikthimit në vend”, thuhet në njoftim.

Ambasada u ka bërë thirrje të gjithë qytetarëve të Republikës së Kosovës që të respektojnë me përpikëri ligjet dhe rregullat në fuqi dhe të kontribuojnë në ruajtjen e sigurisë dhe rendit publik në vendin ku jetojnë dhe veprojnë.