Author: K.B.

Në Dhomat e Specializuara të Kosovës (DhSK) në Hagë, është vendosur që njërit prej 11 personave që iu është ndaluar vizita pa kufizime tek ish-Presidenti Hashim Thaçi t’i hiqet kjo masë. Ndërsa, kufizimet për vizitorët e tjerë mbeten në fuqi.

Kjo u vendos nga gjyqtari i vetëm në çështjen gjyqësore ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit, më 16 janar 2026, por që u bë publike dy muaj pas, pra saktësisht më 16 mars 2026, raporton “Betimi për Drejtësi“.

Personit të cilit iu hoqën kufizimet, më parë kishte mundësinë ta vizitonte Thaçin, por nën monitorim të rrept.

Sipas vendimit, mbrojtja e Thaçit argumentoi se kufizimet nuk janë më të nevojshme dhe as proporcionale. Ajo theksoi se faza e paraqitjes së provave në rastin për krime lufte ka përfunduar dhe se ka ndryshuar rrjedhimisht rrethana që vizitorët rrezikohen që të nxiten që të ndikojnë në dëshminë e dëshmitarëve në këtë çështje.

Mbrojtja gjithashtu theksoi se që nga vendosja e kufizimeve në dhjetor 2023 nuk është raportuar asnjë incident gjatë vizitave në paraburgim dhe Thaçi i ka respektuar të gjitha kushtet e vendosura.

“Mbrojtja e Thaçit argumenton se çdo rrezik i mundshëm për publikimin e ardhshëm të informacionit konfidencial ose për pengimin e ecurisë së procedurave të Dhomave të Specializuara “është pothuajse inekzistent për sa kohë që z. Thaçi mbetet i ndaluar nën regjimin e rreptë të vendosur nga Trupi Gjykues II”, thuhet në vendim.

Sipas vendimit, gjyqtari i vetëm Christoph Gosnell ka thënë se ky person emri i të cilit është i redaktuar, ndryshe nga personat e tjerë që në mesin e shumë kufizimeve iu janë ndaluar edhe vizitat, ky ka marrë pjesë në vizita të monitoruara në mënyrë aktive me Thaçin pas ngjarjeve që përbëjnë objektin e këtij rasti.

Aty thuhet se ky person ka marrë pjesë në jo më pak se shtatë vizita të tilla, pa u konstatuar nga Regjistruesja ndonjë përpjekje për të komunikuar informacion konfidencial.

“Për më tepër, transkripti i vizitës jo-privilegjuese gjatë së cilës z. Thaçi është konstatuar se dyshohet se ka zbuluar informacion konfidencial nuk tregon ndonjë qëllim nga ana e [REDAKTUAR] për të ndërmarrë ndonjë hap mbi bazën e këtij informacioni konfidencial, as ndonjë nxitje nga ana e tij që ai të zbulohej”, thuhet në vendim.

Megjithatë, gjyqtari vlerësoi se për shumicën e vizitorëve të kufizuar, ndalimi i vizitave jo-privilegjuese mbetet i nevojshëm dhe proporcional. Sipas vendimit, këta persona ishin të pranishëm ose të përfshirë në vizita gjatë të cilave dyshohet se u ndanë informacione konfidenciale për dëshmitarët ose u dhanë udhëzime lidhur me dëshmitë.

Gjykata theksoi se kufizimet synojnë të parandalojnë zbulimin e mëtejshëm të informacionit konfidencial dhe të mbrojnë sigurinë e dëshmitarëve, si dhe integritetin e procesit gjyqësor.

Në përfundim, Specialja vendosi të heq menjëherë ndalimin e vizitave jo-privilegjuese për këtë person, ndërsa ndalimi për dhjetë vizitorët e tjerë mbetet në fuqi.

Gjykatësi gjithashtu theksoi se këto masa do të rishikohen sërish në një fazë të mëvonshme të procesit gjyqësor ose nëse paraqiten rrethana të reja që mund të ndikojnë në kushtet e paraburgimit.

Zyra e Prokurorit të Specializuar (ZPS) ka mbyllur paraqitjen e provave të saj në çështjen gjyqësore ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit, në rastin lidhur me administrimin e drejtësisë.

Ndryshe, gjyqtari i vetëm në këtë çështje gjyqësore, Christoph Gosnell ka vendosur 23 marsin 2026 si datë që mbrojtja mund të dorëzojë mocionet për rrëzimin e akuzave. Ndërsa, kundërpërgjigjet e saj, Prokuroria duhet t’i dorëzojë deri më 25 mars 2026.

Varësisht prej vendimeve të gjyqtarit në mocionet e mbrojtjes për rrëzimin e akuzave, mbrojtja është obliguar që të tregojë në rast se do paraqesin prova. Dhe nëse po, 7 prill është caktuar si datë për deklaratat hyrëse të mbrojtjes, e që më pas do të dëgjohen dëshmitarët e tyre, proces ky i planifikuar të zgjasë deri më 24 prill 2026.

Në seancën fillestare më 27 shkurt 2026, Hashim Thaçi, Bashkim Smakaj, Fadil Fazliu, Isni Klilaj dhe Hajredin Kuçi, u deklaruan të pafajshëm për veprat penale që iu vihen në barrë.

Po atë ditë (27 shkurt 2026), nisi dëshminë edhe dëshmitari i parë në këtë çështje gjyqësore, i cili ishte me masa mbrojtëse. Dëshmia e tij përfundoi më 2 mars 2026.

Më 3 dhe 4 mars 2026 dëshmoi dëshmitari i dytë Koen Herlaar- ekspert i kriminalistikës në Institutin e Kriminalistikës së Holandës. Po më 4 mars nisi dëshminë dëshmitari i tretë, Chrisopher Kelly- hetues i forenzikës digjitale. Ky dëshmitar e përfundoi dëshminë më 5 mars.

Ndryshe, Hashim Thaçi ndodhet në Qendrën e Paraburgimit në Hagë që nga nëntori i vitit 2020. Ai është duke u gjykuar për krime lufte, si dhe më 2024 i është ngritur aktakuza kundër administrimit të drejtësisë.

Lidhur me rastin kundër administrimit të drejtësisë, Bashkim Smakaj, Fadil Fazliu dhe Isni Kilaj u arrestuan më 5 dhjetor 2024 në Kosovë dhe u transferuan në objektin e paraburgimit në DhSK, më 6 dhjetor 2024 në bazë të aktakuzës së konfirmuar dhe fletarrestimeve të lëshuara nga Haga.

Ndërsa, Thaçit i është dorëzuar fletarrestimi në objektin e paraburgimit në Hagë më 5 dhjetor 2024, gjithnjë sipas njoftimit të DhSK-së.

Kurse, Hajredin Kuçit i është dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake për paraqitjen e parë, e cila u mbajt 9 dhjetor.

Sipas aktakuzës, Thaçi individualisht dhe përmes veprimeve të përbashkëta me grupet; Grupi Fazliu (Fadil Fazliu dhe FahriFazliu), Grupin Smakaj (Bashkim Smakaj, Blerim Shala dhe Artan Behrami) si dhe Grupin Kilaj (Isni Kilaj dhe VllaznimKryeziu), kanë ndjekur një model të sjelljes për të penguar personat zyrtarë në kryerjen e detyrave zyrtare.

Në aktakuzë thuhet se Thaçi ka udhëhequr dhe marrë pjesë në këto përpjekje përmes vizitave të tij në objektet e paraburgimit gjatë kohës sa ishte i paraburgosur në kuadër të gjykimit të tij për krime lufte dhe krime kundër njerëzimit.

Aty thuhet se anëtarët e Grupit Fazliu, Grupit Smakaj dhe Grupit Kilaj u koordinuan për të ndikuar në dëshmitarët e ZPS-së gjatë vizitave jo të priveligjuara të datave 2 korrik, 9 shtator dhe 6 tetor 2023.

Si rrjedhojë, ndaj Thaçit rëndojnë tri akuza për pengim të personit zyrtar në kryerjen e detyrave zyrtare, tri për shkelje të fshehtësisë së procedurës dhe katër akuza për mosbindje ndaj gjykatës./BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.

Kryetari i Skenderajt, Sami Lushtaku, ka njoftuar se sot në këtë qytet është përuruar stacioni i ri i autobusëve.

Lushtaku ka thënë se ky projekt, është projekt drejt një qyteti më modern, të rregullt dhe më funksional.

Postimi:

Sot përuruam stacionin e ri të autobusëve, një projekt konkret drejt një qyteti më modern, më të rregullt dhe më funksional.

Një hapësirë dinjitoze për qytetarët dhe një standard i ri për transportin publik.

Vazhdojmë përpara me projekte që bëjnë ndryshimin!

NATO ka vendosur një njësi të re të mbrojtjes ajrore amerikane “Patriot” në Adana, në jug të Turqisë mes shqetësimeve të shtuara në lidhje me kërcënimet me raketa nga lufta me Iranin.

Lajmi u konfirmua nga Ministria turke e Mbrojtjes.

Vendosja e re ka të bëjë me një zonë ku ndodhet baza Incirlik, e cila strehon personel ushtarak të Shteteve të Bashkuara, si dhe forca nga Katari, Spanja dhe Polonia, përveç trupave turke.

Turqia, e cila ka ushtrinë e dytë më të madhe në NATO dhe kufizohet me Iranin, kishte njoftuar javën e kaluar instalimin e një sistemi Patriot në provincën e Malatya-s, pranë një radari të Aleancës, si pjesë e masave për të forcuar mbrojtjen ajrore.

Ministria e Diasporës ka njoftuar se është në kontakt të vazhdueshëm me familjet e viktimave të aksidentit tragjik që ndodhi në Vjenë të Austrisë.

Sipas reagimit zyrtar, ngjarja ka ndodhur dje rreth orës 14:15 në distriktin Alsergrund, ku gjatë punimeve në një kantier ndërtimi është shembur një pjesë e konstruksionit, duke lënë disa punëtorë të bllokuar nën rrënoja.

Autoritetet austriake kanë konfirmuar se në mesin e viktimave janë edhe tre shtetas me prejardhje nga Kosova: Pajtim Bajrami, Asllan Musliu dhe Istref Zekaj.

Ministria ka bërë të ditur se përmes kanaleve diplomatike dhe konsullore po ofron mbështetjen e nevojshme për familjarët, si dhe po punon për lehtësimin e procedurave për kthimin e trupave të viktimave në Kosovë.

“Që nga marrja e informacionit, institucionet e Republikës së Kosovës, përmes kanaleve diplomatike dhe konsullore, kanë qenë dhe vazhdojnë të jenë në koordinim të ngushtë me familjarët e viktimave, për të ofruar mbështetjen e nevojshme dhe për të lehtësuar procedurat përkatëse për kthimin e trupave të tyrë në Kosovë”.

Ajo ka shprehur ngushëllimet më të sinqerta për familjet dhe të afërmit e viktimave, si dhe për të gjithë të prekurit nga kjo tragjedi.

Prokuroria Themelore në Pejë ka pranuar nëntë kallëzime penale ndaj 49 personave për manipulim të votave në procesin zgjedhor të 28 dhjetorit 2025, ndërsa pritet që numri i kallëzimeve të arrijë në 31 ndaj rreth 200 personave, kryesisht kryesues dhe komisionerë të vendvotimeve në komunën e Pejës.

Zëdhënësi i Prokurorisë Themelore në Pejë, Shkodran Nikçi, në një intervistë për Ekonomia Online, ka bërë të ditur se hetimet janë në zhvillim dhe po realizohen në koordinim të plotë me Policinë e Kosovës.

“Në kuadër të hetimeve që jemi duke ndërmarrë për procesin zgjedhor të manipulimit të votave përkatësisht të numërimit të kandidatëve të subjekteve politike. Prokuroria Themelore në Pejë, për komunën e Pejës deri më tani ka pranuar nëntë kallëzime penale ndaj 49 personave. Ndërkaq për këtë komunë priten të pranohen gjithsej 31 kallëzime penale ndaj 200 personave, kryesisht kryesues dhe komisionerë të vendvotimeve. Ndërkaq më pas Prokurori i Shtetit në koordinim të plotë me Policinë e Kosovës do t’i ndërmarrë të gjitha veprimet e nevojshme ligjore”, tha ai.

Ai bëri të ditur se deri tani janë intervistuar 49 persona si të dyshuar për manipulim të votave në zgjedhjet e mbajtura më 28 dhjetor 2025, ndërsa pritet që të intervistohen mbi 200 persona të tjerë vetëm për komunën e Pejës.

“Deri më tani janë intervistuar 49 persona dhe kemi pranuar nëntë kallëzime penale. Priten të intervistohen vetëm për komunën e Pejës mbi 200 persona dhe të pranohen mbi 31 kallëzime penale ndaj tyre. Pasi të pranohen këto, besoj që Prokurori i Shtetit do t’i analizojë dhe njëkohësisht në shumicën e rasteve kemi ndërmarrë edhe veprime të tjera ligjore që kjo fazë është konfidenciale, mirëpo pasi që të përfundojë i gjithë procesi do të njoftohet opinioni publik”, tha ai.

Në seancën e sotme në Gjykatën Themelore të Prishtinës, Dushan Maksimoviq ka vazhduar dëshminë e tij lidhur me aktakuzën për sulmin e 24 shtatorit 2023 në Banjskë.

Gjatë dëshmisë, ai ka folur edhe për ditën e arrestimit.

“E pashë që policia e Kosovës ndodhej tek komshikja Suzana. U afrova dhe pyeta nëse mund të shkoja në Zveçan. Një nga policët më pyeti se kush isha dhe ku ndodheshim. Ai më tha se mund të vazhdoja rrugën. Rreth 40 metra larg shtëpisë, policia më ndaloi dhe kërkoi letërnjoftimin. Një tjetër polici më pyeti nëse kisha telefonin me vete; i thashë se po dhe ia dhashë. Kur panë incizimin ku dëgjoheshin krismat, unë thashë se ai ishte tek ndërtesa pas nesh dhe më thanë të mos e përdorja.

Pas kësaj hyra në veturë; nuk isha i lidhur dhe nuk kisha pranga. Mendova se po më dërgonin drejt Banjskës. Pyeta çfarë po ndodhte dhe më thanë se po shkonim deri në Mitrovicë të Jugut. Kur arritëm, më pyetën përsëri për telefonin dhe më thanë të prisja veturën. Nuk kisha pranga. Pas një kohe hyra në ndërtesën e policisë, ku prisja disa orë, më dhanë të drejtën të lexoja një letër dhe më thanë se po vinte avokati. Asnjëherë nuk më sqaruan pse.”

Dëshmia e tij vijon, ndërsa trupi gjykues shqyrton rrethanat e arrestimit dhe akuzat lidhur me incidentin në Banjska.

Klinika e Pediatrisë ka njoftuar se 5 vjeçari nga Lipjani që dyshohet se është keqtrajtuar nga prindërit e tij, i është nënshtruar intervenimit të nevojshëm kirurgjik në nivel të shputave nga ekipet specialistike të Ortopedisë dhe Kirurgjisë Plastike.

Përmes këtij njoftimi, ata kanë thënë se intervenimi sapo ka përfunduar dhe është realizuar sipas indikacioneve mjekësore.

“Gjatë procedurës kirurgjikale, gjendja e pacientit ka qenë stabile. Pas përfundimit të intervenimit, pacienti është transferuar në Kujdesin Intensiv Pediatrik, ku po vazhdon trajtimin, mbikëqyrjen dhe përkujdesjen e mëtejme postoperatore”, ka njoftuar Klinika e Pediatrisë.

Autoritetet shëndetësore bëjnë të ditur se, për shkak të ndjeshmërisë së rastit, aktualisht nuk mund të ofrohen më shumë detaje. Çdo informacion i mëtejmë për gjendjen e pacientit do të bëhet publik vetëm përmes Zyrës për Informim pranë SHSKUK-së.

Me vendim të Ministrisë së Punëve të Brendshme të Kosovës është thjeshtuar procedura për marrjen e dokumenteve kosovare, njoftoi Shërbimi i Gjendjes Civile i Komunës së Graçanicës.

Siç thuhet, qytetarëve nga Kosova që posedojnë dokumente të lëshuara nga Serbia u mundësohet paraqitja e kërkesës për regjistrim, përkatësisht regjistrimin në Regjistrin Qendror të Gjendjes Civile të Kosovës, shkruan mediumi lokal serb, Radio Kontakt Plus.

Kjo mundësi u referohet të gjithë qytetarëve në territorin e Kosovës, të cilëve strukturat ilegale të Serbisë u kanë lëshuar dokumente në bazë të vendbanimit në Kosovë në periudhën nga 10 qershori 1999 deri më 15 mars 2026.

Qytetarët që i plotësojnë këto kushte mund të paraqesin kërkesa për transkriptim, përkatësisht regjistrim në Regjistrin Qendror të Gjendjes Civile të Kosovës, për të marrë dokumente – ekstrakte nga librat amë të lindjeve, martesave dhe vdekjeve, njoftoi Komuna e Graçanicës.

Afati për paraqitjen e kërkesave për regjistrim në Regjistrin Qendror të Gjendjes Civile të Kosovës është deri më 16 qershor 2026.

I akuzuari për sulmin terrorist në Banjskë, Dushan Maksimoviq gjatë dhënies së mbrojtjes tha se fotografia ku shihet ai me uniformë ishte realizuar në vitin 2022.

Maksimoviq tha se mbetet pranë deklaratës së dhënë më 25 prill 2024, raporton “Betimi për Drejtësi“.

Por, i akuzuari tha se në procesverbal mungon një pjesë e përgjigjes së tij kur ishte pyetur nga Prokuroria lidhur me një fotografi në aktakuzë rreth asaj se si e kishte siguruar uniformën dhe në çfarë detyre ka qenë i angazhuar.

“Unë nuk kam qenë i angazhuar nga askush dhe për asgjë. Fotografia është bërë në shtëpinë ttime, jam fotografuar si për argëtim dhe ka qenë hera e parë që kam pasur uniformë të tillë, dhe po ta kisha më herët, nuk do të ishte interesant për mua të bëj foto”, tha Maksimoviq, duke shtuar se fotografia është realizuar më 2022.

Në Gjykatën Themelore në Prishtinë, po mbahet seanca e radhës ndaj të tre akuzuarve lidhur me sulmin terrorist të 24 shtatorit 2023 në fshatin Banjskë të Zveçanit: Vladimir Toliq, Dushan Maksimoviq dhe Blagoje Spasojeviq,.

Në këtë seancë pritet të japë mbrojtjen i akuzuari Maksimoviq, ndërkaq dy të akuzuarit tjerë Toliq dhe Spasojeviq ishin mbrojtur në heshtje seancën e kaluar. /BetimipërDrejtësi/