ATV

Author: K.B.

  • Rihapet për vetura rruga Pejë–Kullë–Rozhajë, kamionët ende të ndaluar

    Rihapet për vetura rruga Pejë–Kullë–Rozhajë, kamionët ende të ndaluar

    Qendra Kombëtare për Menaxhim Kufitar ka njoftuar se rruga Pejë–PKK Kullë–Rozhajë është tashmë e kalueshme për automjete të vogla në të dy drejtimet.

    Vendimi vjen pas koordinimit me autoritetet përkatëse dhe Policia e Malit të Zi në pikën kufitare Kullë.

    Megjithatë, sipas njoftimit, qarkullimi për automjetet transportuese, përfshirë kamionët, mbetet i ndaluar deri në një vendim të ri nga autoritetet.

    Autoritetet gjithashtu kanë bërë të ditur se për shkak të reshjeve të vazhdueshme, përdorimi i pajisjeve dimërore është i domosdoshëm për të gjithë drejtuesit e automjeteve.

  • Sulmi me armë në shtëpinë e saj, Rihanna rrëfen çdo detaj dramatik

    Sulmi me armë në shtëpinë e saj, Rihanna rrëfen çdo detaj dramatik

    Një ngjarje e rëndë ka tronditur shtëpinë e këngëtares së famshme Rihanna në Beverly Hills, ndërsa vetë artistja ka dhënë një dëshmi të detajuar për momentet e frikshme që përjetoi gjatë një sulmi me armë zjarri në fillim të muajit mars. Sipas saj, ajo ndodhej në një rimorkio në oborrin e rezidencës në Los Angeles kur dëgjoi një seri shpërthimesh të forta metalike.

    “Fillimisht nuk e kuptova çfarë po ndodhte, por shumë shpejt e kuptova që ishin të shtëna dhe që ishim në vijën e zjarrit,” ka rrëfyer ajo.

    Në një reagim të menjëhershëm, Rihanna zgjoi partnerin e saj, A$AP Rocky, duke bërtitur: “po na qëllojnë”. Më pas ajo e tërhoqi atë përtokë dhe u shtri edhe vetë, në përpjekje për të shmangur plumbat.

    Ngjarja ndodhi ndërsa brenda shtëpisë ndodheshin tre fëmijët e çiftit, nëna e Rihannës dhe disa anëtarë të stafit, çka e bën situatën edhe më të rëndë. Pas incidentit, këngëtarja ka marrë masa shtesë sigurie, ndërsa raportohet se është larguar nga rezidenca e saj në Beverly Hills.

    Sipas dokumenteve gjyqësore të publikuara nga “Daily Mail”, Rihanna kishte marrë më herët kërcënime me vdekje në rrjetet sociale, megjithatë nuk është konfirmuar nëse ato lidhen drejtpërdrejt me sulmin.

    E dyshuara për ngjarjen është Ivana Lisette Ortiz, e cila akuzohet për hapjen e zjarrit me armë gjysmëautomatike drejt rezidencës. Ajo përballet me disa akuza të rënda, përfshirë 10 akuza për sulm me armë dhe tre për të shtëna në zonë banimi.

    Ngjarja ka shkaktuar reagime të shumta, ndërsa hetimet vijojnë për të zbardhur plotësisht motivet dhe rrethanat e sulmit. Dëshmia e Rihannës mbetet një nga rrëfimet më të forta për momentet e frikshme që mund të përjetohen edhe në mes të luksit dhe sigurisë së Hollywood-it.

  • A hahen vezët çdo ditë?

    A hahen vezët çdo ditë?

    Vezët janë një ushqim i preferuar për shumë njerëz, të njohura për përmbajtjen e lartë të proteinave, vitaminave dhe mineraleve. Megjithatë, ato shpesh kanë pasur një reputacion të keq për shkak të kolesterolit të tyre. Megjithatë, hulumtimet e fundit shkencore dhe udhëzimet dietike po e ndryshojnë këtë pikëpamje, duke nxjerrë në pah shumë përfitime të vezëve dhe duke sqaruar nëse ato janë të sigurta për konsum të përditshëm.

    A është në rregull të hash vezë çdo ditë?

    Për shumicën e njerëzve – po, është. Një vezë përmban rreth 180 deri në 200 miligramë kolesterol. Megjithëse rekomandimet e mëparshme e kufizonin marrjen ditore të kolesterolit në 300 miligramë dhe këshillonin konsumimin e jo më shumë se tre vezëve në javë, hulumtimet e fundit tregojnë se kolesteroli nga ushqimi, siç është ai nga të verdhat e vezëve, ka shumë pak efekt në nivelin e kolesterolit “të keq” LDL në gjak.

    Një studim i madh tregoi se konsumimi i një deri në gjashtë vezë në javë mund të zvogëlojë edhe rrezikun e vdekjes së shkaktuar nga sëmundjet e zemrës dhe goditja në tru. Shoqata Amerikane e Zemrës (AHA) gjithashtu mbështet konsumin e moderuar, një deri në dy vezë në ditë, si pjesë e një diete të shëndetshme për zemrën.

    Vlera ushqyese e vezëve

    Vezët janë jashtëzakonisht ushqyese. Përveçse janë të pasura me proteina, ato përmbajnë gjithashtu yndyrna të shëndetshme, minerale të rëndësishme (si seleni, kolina, folati dhe hekuri) dhe vitamina të shumta, duke përfshirë biotinën, vitaminat B12, A, D, E dhe K. Ato janë gjithashtu të pasura me antioksidantët luteinë dhe zeaksantinë, të cilët janë të rëndësishëm për shëndetin e syve, raporton Index.hr, transmeton Klankosova.tv.

    E bardha dhe e verdha e vezës ndryshojnë në përbërjen e tyre:

    E bardha e vezës është burimi kryesor i proteinave dhe vitaminës B5

    E verdha e vezës përmban shumicën e vitaminave, kolinës, yndyrnave të shëndetshme, hekurit dhe antioksidantëve

    A ka ndonjë rrezik?

    Shqetësimi më i madh që lidhet me vezët është kolesteroli, por shkencëtarët theksojnë se yndyra e ngopur në dietë është një problem më i madh. Edhe pse vezët përmbajnë yndyra të ngopura, sasia nuk është e madhe – rreth 1.5 gramë për vezë. Për krahasim, një porcion prej 3 ons mish viçi përmban më shumë se 5 gramë yndyra të ngopura.

    Nutricionistja Nikki Fata thekson: “E vetmja gjë për të cilën duhet të keni kujdes kur hani vezë çdo ditë është se ato nuk zëvendësojnë ushqime të tjera të vlefshme. Një dietë e larmishme është e rëndësishme për të siguruar që të merrni të gjitha lëndët ushqyese që ju nevojiten”, transmeton Klankosova.tv.

    Vezët e ziera kanë më pak kalori dhe janë një zgjedhje më e shëndetshme

    Nutricionistja Kristen Lorenz thekson se shumica e të rriturve të shëndetshëm mund të hanë vezë në mënyrë të sigurt çdo ditë: “Vezët vetë nuk janë të rrezikshme. Problemi është shpesh ajo që shoqëron ato – si proshuta, djathi ose gjalpi. Një zgjedhje më e mirë është të kombinoni vezët me perime dhe drithëra të plota”

    Kush duhet të jetë i kujdesshëm?

    Ndërsa përfitimet e ngrënies së vezëve janë të dokumentuara mirë, disa grupe duhet të jenë më të kujdesshëm. Njerëzit me kolesterol të lartë, sëmundje të zemrës ose diabet duhet të konsultohen me një mjek ose dietolog, pasi disa kërkime vazhdojnë të sugjerojnë një lidhje të mundshme midis konsumit të vezëve dhe rrezikut kardiovaskular.

    Sa vezë në javë rekomandohen?

    Shoqata Amerikane e Zemrës rekomandon një deri në dy vezë në ditë. Nutricionistja Rachel Dyckman shpjegon: “Nuk ka një kufi, por kërkimet sugjerojnë se shtatë të verdha vezësh në javë nuk janë të dëmshme për personin mesatar”.

  • Takim dhe ekspozitë për Qarshinë e Madhe në Gjakovë

    Takim dhe ekspozitë për Qarshinë e Madhe në Gjakovë

    Në Galerinë e Arteve në Pallatin e Kulturës në Gjakovë, sot nga ora 10:00 – 16:00, mbahet takim dhe ekspozitë, në kuadër të projektit për hartimin e Planit të Konservimit të Tërësisë Urbanistike “Çarshia e Madhe” në Gjakovë.

    Takimi synon të identifikojë vendet dhe shënjuesit me të rëndësishëm në qytet, në lagjet dhe komunitete, si dhe të mbledhë kujtimet dhe përvojat që lidhen me to.

    Në të njejtën kohë, ekspozita e fotografive do të pasqyrojë zhvillimin e qytetit ndër vite, shpërndarjen hapësinore sipas funksioneve kryesore në periudha të ndryshme, si dhe marrëdhënien e njerëzve me mjedisin fizik.

  • Nis seanca për vrasjen e Liridona Ademajt, jep mbrojtjen i akuzuari Kushtrim Kokalla

    Nis seanca për vrasjen e Liridona Ademajt, jep mbrojtjen i akuzuari Kushtrim Kokalla

    Sot në Gjykatën Themelore në Prishtinë, paraqitjen e mbrojtjes së tij do ta japë i akuzuari i tretë për vrasjen e Liridona Ademajt, Kushtrim Kokalla

    Sipas aktakuzës, Kokalla ngarkohet se në bashkëkryerje me të pandehurit Naim Murseli dhe Granit Plava ka kryer veprën penale “Vrasje e rëndë”.

    Sipas aktakuzës, pasi që Naim Murseli, ka kërkuar nga Kushtrim Kokalla që të gjejë mundësi për vrasjen e Liridona Ademajt dhe ai ka refuzuar, Kushtrimi ka gjetur të pandehurin e dytë, Granit Plava, me të cilin e ka njoftuar Naim Murselin. Të tre akuzohen se janë dakorduar që Graniti ta kryejë vrasjen me marrëveshje që Naimi t’i paguajë kompensim në shumë prej 30 mijë euro. Dyshimet janë se Murseli me datë 29 nëntor 2023 ka siguruar armën e zjarrit, të cilën ia ka dhënë Plavës, e që armën e ka përdorur për vrasjen e të ndjerës Liridona Ademajt.

    Gjithashtu, i akuzuari Kushtrim Kokalla ngarkohet edhe për veprën penale “Moslajmërimi i veprave penale apo kryesve të tyre”.

    Në deklaratën e dhënë në polici më 1 dhjetor 2023, i pandehuri Kokalla kishte deklaruar se nga viti 2019 është pjesëtar i FSK-së. Ai ka thënë se Naim Murselin e ka djalë të dajës dhe të hallës, ndërsa Granit Plavën e ka bashkëfshatar dhe se njihen qysh kur kanë qenë të vegjël.

    Kokalla kishte deklaruar se një javë para ngjarjes kishte qenë te Murseli në shtëpi dhe më pas ishin takuar me Granit Plavën. Atë natë, tha se i kishte shkruar Murseli dhe ia kishte kërkuar numrin e Plavës dhe se pas 2-3 ditësh ishin takuar, ku Murseli ia kishte dhënë Kokallës 300 euro për këstin e kredisë për të cilën thotë se ka hyrë për Murselin, ndërsa Plavës ia kishte dhënë 500 euro. Për këto të fundit, ka thënë se nuk kishte ide pse iu dhanë atij.

    Sipas aktakuzës, Kokalla më 29 nëntor 2023 kishte biseduar me të akuzuarin Murseli dhe sipas tij në atë bisedë Murseli i ka kërkuar të takohen dhe u takuan rreth orës 9:30, ku i kishte thënë “sot duhet të kryhet kjo punë”, që sipas Kokallës kishte të bënte me vrasjen e Liridonës. Ai tha se rreth një vit i akuzuari Murseli e kishte lutur që ta kryente vrasjen.

    “Naimi që afër një vit mua më ka lutur që ta kryej këtë vrasje unë. Atëherë unë i kam thënë nuk vjen në shprehje që ta bëjë këtë punë unë dhe mos më thuaj më asnjëherë”, pati deklaruar ai.

    Sipas Kokallës, Murseli i kishte thënë se do ta thërrasë Granitin dhe do të takohej me të dhe se sipas tij më pas nuk ka pasur më asnjë kontakt. Vetëm në mbrëmje, kur e kishte thirrur një shok për ta pyetur nëse i kishte parë lajmet, e kishte kuptuar për vrasjen e Liridonës.

    Kokalla kishte thënë se, pasi e kishte kuptuar lajmin, kishte marrë familjen dhe kishin ardhur në Prishtinë në stacion policor dhe se pas përfundimit të procedurave policore, për të mos e lënë vetëm, kishte shkuar në hotel me Murselin.

    Kokalla ka deklaruar se me t’u futur në dhomën e hotelit, i akuzuari Murseli i është drejtuar me fjalët: “e kreva këtë punë”.

    Kokalla pati deklaruar në polici se e ka menduar ta lajmërojë rastin, por se ka qenë i shokuar dhe i frikësuar për familjen e vet nga Murseli.

    Sipas aktakuzës, Kokalla pati deklaruar se Murseli i ka ofruar para për këtë rast, por se nuk ka pranuar asnjëherë as para dhe as pas rastit.

    Gjithashtu, Kokalla më 24 janar 2024 ka qenë i ftuar në Prokurori për të dhënë deklaratë, por ka shfrytëzuar të drejtën që të mbrohet në heshtje.

    Në seancën fillestare më 31 janar 2025, Murseli është deklaruar i pafajshëm. Plava nuk është deklaruar rreth fajësisë, ndërsa Kokalla ka kërkuar kohë për t’u konsultuar me mbrojtjen.

    Një ditë më herët, në Gjykatë, i akuzuari Granit Plava tha se kishte marrëveshje me të akuzuarin Naim Murseli për ta marrë përgjegjësinë për këtë krim. Ai tha se Murseli i kishte premtuar veturë, pagë e punë të sigurt dhe se do të lirohej për dy vjet nga burgu. /Ekonomiaonline

  • “Fitore historike”, Ambasada e ShBA’së uron Kosovën për ndeshjen e mbrëmshme

    “Fitore historike”, Ambasada e ShBA’së uron Kosovën për ndeshjen e mbrëmshme

    Ambasada e Shteteve të Bashkuara të Amerikës në Kosovë e ka uruar Kosovën për fitoren e mbrëmshme ndaj Sllovakisë dhe kualifikimin për finale në play-off për Kupën e Botës.

    Në urimin e saj, Ambasada e ka cilësuar këtë si fitore historike.

    “Përgëzime Kosovë për këtë fitore historike”, thuhet në urimin e ambasadës.

  • Mbretëria e Bashkuar paralajmëron: NATO duhet të jetë gati pa Amerikën

    Mbretëria e Bashkuar paralajmëron: NATO duhet të jetë gati pa Amerikën

    Britania e Madhe dhe aleatët evropianë të NATO duhet të përgatiten për një skenar ku ShBA mund të mos i mbrojë në rast krize, ka paralajmëruar një komitet i përbashkët parlamentar.

    Raporti vjen në sfondin e tensioneve me administratën e presidentit Donald Trump dhe pasigurive mbi përkushtimin amerikan ndaj mbrojtjes kolektive, shkruan SkyNews.

    Komiteti thekson se Londra duhet të zvogëlojë varësinë nga ShBA në fusha kyçe si armët bërthamore Trident, shkëmbimi i inteligjencës dhe programet ushtarake si avionët F-35 Lightning II.

    Ai gjithashtu rekomandon forcimin e rolit të Evropës brenda NATO-s dhe investime më të mëdha në kapacitete mbrojtëse.

    Deklaratat e fundit të Trump, ku kritikoi aleatët dhe vuri në dyshim rëndësinë e NATO-s, kanë shtuar shqetësimet se mbështetja amerikane sipas nenit 5 nuk është më e garantuar.

    Ekspertët paralajmërojnë se një NATO pa ShBA do të ishte dukshëm më pak e aftë ushtarakisht, duke e bërë të domosdoshme rritjen e autonomisë strategjike evropiane.

  • LDK-ja mban sot një konferencë para KEDS-it për tarifat e rrymës

    LDK-ja mban sot një konferencë para KEDS-it për tarifat e rrymës

    Lidhja Demokratike e Kosovës (LDK) ka njoftuar se do të mbajë konferencë për media të premten në orën 11:30, para objektit të KEDS-it dhe KESCO-s.

    Kjo konferencë vjen pas deklaratave të zyrtarit të LDK-së, Visar Azemi, i cili ka ngritur shqetësime për mënyrën se si po maten tarifat e energjisë elektrike në Kosovë.

    Sipas Azemit, një hulumtim i realizuar nga kjo parti, ku janë testuar mbi 800 njehsorë në Prishtinë dhe Ferizaj, ka treguar se 87 për qind e tyre nuk e matin kohën në mënyrë të saktë, duke bërë që qytetarët të paguajnë më shumë, përkatësisht me tarifë të shtrenjtë edhe gjatë orëve kur duhet të aplikohet tarifa e lirë.

    Ai e ka cilësuar këtë si mashtrim dhe ka kërkuar dorëheqjen e bordit të ZRRE-së, si dhe nisjen e hetimeve penale.

    Nga ana tjetër, KEDS-i ka reaguar duke theksuar se njehsorët elektrikë janë të besueshëm dhe të sinkronizuar sipas standardeve zyrtare, duke mohuar çdo pretendim për matje të gabuar të energjisë elektrike.

  • 70-vjeçari gjendet i vdekur në Prizren, Policia kërkon ndihmë për identifikimin e tij

    70-vjeçari gjendet i vdekur në Prizren, Policia kërkon ndihmë për identifikimin e tij

    Policia e Kosovës ka kërkuar ndihmën e qytetarëve për identifikimin e një personi të moshuar, rreth 70-vjeçar, i cili është gjetur pa shenja jete në rrugën “Edit Durham” në Prizren.

    Sipas njoftimit zyrtar, viktima dyshohet se ka ndërruar jetë të paktën 2 deri në 3 orë para mbërritjes së ekipit mjekësor në vendin e ngjarjes.

    “Patrulla policore, së bashku me ekipin kujdestar të hetuesisë dhe ekipin e krim-teknikës, kanë dalë në vendin e ngjarjes, tek banesat e ish-TMK-së. Sipas informatave fillestare, viktima është mashkull i moshuar, rreth 70-vjeçar, ende i paidentifikuar. Ekipi i Urgjencës ka konstatuar se ai ka ndërruar jetë të paktën 2–3 orë para mbërritjes së mjekëve. Nuk janë vërejtur shenja të një vdekjeje të dhunshme”, thuhet në njoftim.

    Në vendin e ngjarjes kanë dalë edhe hetuesit rajonalë, të cilët në koordinim me prokurorin e shtetit e kanë iniciuar rastin si “hetim i vdekjes”.

  • “Qiti paret kryeministër”, Murati lajmërohet: Shpërblimi 500K miratohet të hënën në mbledhje të qeverisë

    “Qiti paret kryeministër”, Murati lajmërohet: Shpërblimi 500K miratohet të hënën në mbledhje të qeverisë

    Kombëtarja e Kosovës e mori fitoren më të madhe në historinë e saj mbrëmë, duke e mposhtur Sllovakinë.

    “Dardanët” fituan 4-3 dhe kështu siguruan kualifikimin në finalen e “play-offit” të Botërorit 2026.

    Pas kësaj humbje të rëndë për ta, sllovakët kanë reaguar të dëshpëruar pas ndeshjes.

    Ministri i Financave, Hekuran Murati njoftoi se shpërblimi për ndarjen e 500 mijë euro për Kombëtaren e Kosovës do të miratohet të hënën në mbledhjen e qeverisë.

    “Mirëmëngjes fitues! Me kërkesë të Kryeministrit, vendimin për ndarjen e shpërblimit prej 500k euro për fitoren e mbrëmshme të Dardanëve do ta kemi gati për miratim të hënën në mbledhje të Qeverisë”, shkroi Murati.

    Kryeministri i Kosovës, Albin Kurti kishte premtuar 500 mijë euro nëse “Dardanët” e kalojnë Sllovakinë dhe 1 milion të tjera nëse e mposhtin Sllovakinë.

    E ishte kryetari i Prishtinës, Përparim Rama që dje postoi një fotografi nga stadiumi në Bratisllavë me mbishkrimin “Qiti paret kryeministër”.