Author: K.B.

Natyra Kuçi nga Partia Socialdemokrate ka kritikuar ashpër kryeministrin Albin Kurti, duke e akuzuar për një qasje të dëmshme në ushtrimin e pushtetit.

Ajo, gjatë paraqitjes në emisionin DPT te Fidani, deklaroi se mënyra se si Kurti po e ushtron pushtetin është “sëmundje”.

Kuçi theksoi gjithashtu se ata nuk kanë frikë nga Kurti, por shtoi se dikush tjetër ka.

“Sëmundja e pushtetit të Kurtit është sëmundje shumë e dëmshme, e cila duhet sa më shpejt të trajtohet. Ne Kurtit nuk i tutemi, Kurtit i tutet dikush tjetër, krejt opozita parlamentare, sepse janë në rehatinë e vet”, u shpreh ajo.

Një grup hakerësh i lidhur me Rusinë ka komprometuar llogari email të Shtabit të Përgjithshëm të Mbrojtjes Kombëtare të Greqisë, në kuadër të një operacioni më të gjerë spiunazhi që synon Ukrainën dhe vendet e NATO-s.

Sipas ekspertëve të sigurisë kibernetike të grupit Ctrl-Alt-Intel, janë shkelur 28 llogari, ndërsa në disa raste hakerët kanë arritur të ridrejtojnë mesazhet hyrëse dhe të marrin akses të vazhdueshëm, edhe pas ndryshimit të fjalëkalimeve, duke komprometuar edhe sistemet e verifikimit me dy faktorë.

Autoritetet greke theksojnë se të dhënat e vjedhura nuk ishin të klasifikuara dhe se incidente të tilla menaxhohen nga strukturat përkatëse të mbrojtjes kibernetike.

Sulme të ngjashme janë raportuar edhe në Rumani, Bullgari dhe Ukrainë, ku janë shënjestruar institucione ushtarake dhe të drejtësisë.

Ekspertët besojnë se operacioni lidhet me tensionet gjeopolitike dhe bashkëpunimin e vendeve të rajonit me NATO-n dhe Ukrainën.

Analisti Shenoll Muharremi ka reaguar lidhur me zhvillimet rreth projektit të Parkut Solar 100 MW në Kosovë, duke ngritur dyshime për ecurinë e tij.

Në reagimin e tij, Muharremi ka kërkuar që Qeveria e Kosovës të japë sqarime publike për statusin e projektit, duke theksuar rëndësinë e tij në kontekstin e krizave energjetike në vend.

“Kjo nuk është i vetmi dyshim, para pak ditësh, një medium tjeter serioz dhe kredibil, Radio Evuropa e Lirë, ka xhiruar lokacionin ku pritet me u ndërtu parku dhe ka konstatuar aty nuk ka asnjë panel në fushë dhe se asnjë zhvillim real të punimeve nuk është kryer. Qeveria e Kosovës nuk mund të heshtë, derisa kjo situatë kërkon përgjigje të menjëhershme. Ajo duhet pa vonesë të dalë publikisht dhe me i tregu tatimpaguesve kosovarë a ka dështuar ky projekt apo çka po ndodh realisht”, tha ai.

Ai ka kritikuar edhe partinë në pushtet, Lëvizja Vetëvendosje, duke thënë se, në rast të dështimit të projektit, kjo do të përbënte një dështim me ndikim të gjerë në ekonomi dhe sektorin energjetik.

Komanda Qendrore e ShBA-së ka folur sërish lidhur me bllokadën ushtarake amerikane ndaj porteve iraniane.

Në deklarim thuhet se në 48 orët e para të kësaj bllokade, asnjë anije nuk ka kaluar pranë forcave amerikane, raporton BBC.

Kjo Komandë gjithashtu shtoi se gjatë kësaj periudhe, nëntë anije kanë “zbatuar udhëzimet e forcave amerikane për t’u kthyer drejt një porti ose zone bregdetare iraniane”.

Një sulm me të shtëna armësh në një shkollë në Turqinë jugore të mërkurën la katër të vdekur dhe 20 të plagosur, tha një zyrtar lokal, vetëm një ditë pas një incidenti në të cilin një person i armatosur plagosi 16 persona dhe më pas vrau veten.

Guvernatori i provincës Kahramanmaraş, Mükerrem Ünlüer, tha se një mësues dhe tre nxënës u vranë në sulmin në Shkollën e Mesme Ayser Çalık.

“ Një nxënës erdhi në shkollë me armë që ne besojmë se i përkisnin babait të tij – në çantën e shpinës. Ai hyri në dy klasa dhe hapi zjarr rastësisht, duke shkaktuar lëndime dhe vdekje”, u tha Ünlüer gazetarëve, shkruajnë mediat e huaja.

Dëshmitarët e cituar nga media thanë se të shtënat e dëgjuara në shkollë ishin intensive.

Dhe sigurisht, pas kësaj, prindërit që dëgjuan për incidentin nxituan në shkollë.

Policia ka rritur masat e sigurisë rreth ndërtesës, dhe imazhet e publikuara në rrjetet sociale treguan ambulanca të pranishme në zonë.

Ministri i Drejtësisë Akin Gurlek tha se zyra e prokurorit lokal nisi një hetim të menjëhershëm për të shtënat.

Sulmi i së mërkurës vjen një ditë pasi një ish-nxënës hapi zjarr në ish-shkollën e tij të mesme në Siverek në provincën jugore Şanlıurfa, duke plagosur 16 persona përpara se të vriste veten në një përleshje me policinë, thanë zyrtarët.

Sulmi la 10 nxënës, katër mësues, një punonjës mense dhe një oficer policie të plagosur, tha Guvernatori Hasan Şıldak.

“ Individi u rrethua brenda ndërtesës për shkak të ndërhyrjes së policisë dhe vdiq pasi qëlloi veten”, u tha Şıldak gazetarëve, duke shtuar se do të kryhet një hetim “gjithëpërfshirës” për të shtënat.

Forcat ruse kanë intensifikuar operacionet ofensive në pothuajse të gjithë vijën e frontit, ndërsa Forcat Mbrojtëse të Ukrainës po kryejnë mbrojtje aktive dhe rifituan kontrollin e pothuajse 50 kilometrave katrorë territor në mars.

Kjo sipas Ukrinform, kjo u deklarua nga Komandanti i Përgjithshëm i Forcave të Armatosura të Ukrainës, Gjenerali Oleksandr Syrskyi, në një postim në Facebook.

“ Ne duhet të kapim iniciativën strategjike, prandaj po kryejmë mbrojtje aktive. Falë kësaj, në mars trupat tona rifituan kontrollin mbi gati 50 kilometra katrorë territor që ishte pushtuar nga armiku”, ka thënë ai, përcjell Telegrafi.

Sipas Syrskyi, Rusia vazhdon të pësojë humbje të konsiderueshme, por nuk ka braktisur planet për të pushtuar Ukrainën.

“Detyrat tona kryesore janë të shkatërrojmë armikun, të ndalojmë përparimin e tyre, të godasim pozicionet e pasme ruse, duke përfshirë edhe thellë brenda territorit të tij, dhe të mbrojmë qiellin mbi qytetet dhe qytezat tona”, theksoi ai.

Ai vuri në dukje se Rusia ka intensifikuar veprimet ofensive për shkak të ndryshimeve sezonale dhe po i kryen ato përgjatë pothuajse të gjithë vijës së frontit prej 1,200 kilometrash.

Luftimet më intensive në mars u zhvilluan në sektorët Oleksandrivka, Pokrovsk, Kostiantynivka dhe Lyman.

Ai raportoi se në mars, aftësitë ukrainase të Goditjes së Thellë goditën 76 objektiva të tilla, duke përfshirë 15 objekte të rafinimit të naftës.

Syrskyi gjithashtu mori raporte mbi mobilizimin dhe rekrutimin, logjistikën, fortifikimin e linjave mbrojtëse, trajnimin dhe rikuperimin e gatishmërisë luftarake dhe disiplinën ushtarake.

Ai theksoi gjithashtu se një qasje e re në luftën moderne me dronë është ndërtimi i rrugëve nëntokësore për lëvizjen e trupave dhe pajisjeve ushtarake, një qasje e zbatuar në mënyrë efektive nga Forcat e Sulmit Ajror.

Komandanti i Përgjithshëm përshkroi detyrat për periudhën e ardhshme dhe falënderoi ushtarët ukrainas për qëndrueshmërinë dhe përkushtimin e tyre.

Banorë dhe aktivistë nga Peja, Plava, Gucia dhe Andrijevica, kanë paralajmëruar një protestë paqësore më 25 prill me kërkesën kryesore funksionalizimin e rrugës dhe hapjen e pikës kufitare në Çakorr, që do të lidhte më lehtë Kosovën me Malin e Zi.

Tubimi do të mbahet me sloganin “Mjaft me izolim!” dhe do të zhvillohet në zonën Kotlovi – Kuçishtë, në malin e Çakorrit, duke filluar nga ora 12:00.

Organizimi po udhëhiqet nga iniciatorët Muhamet Nikqi, Mehdi Berisha dhe Nedzat Cecunjanin, ndërsa pritet të marrë pjesë një numër i madh qytetarësh, përfaqësues të shoqërisë civile dhe aktivistë nga të dyja anët e kufirit.

Organizatorët i kanë bërë thirrje institucioneve të Malit të Zi dhe Kosovës që hapja e pikës kufitare në Çakorr të trajtohet si prioritet strategjik, duke e lidhur atë me zhvillimin ekonomik dhe turistik të rajonit.

Sipas organizatorëve, mosfunksionalizimi i kësaj pike kufitare për vite me radhë ka sjellë izolim ekonomik dhe rënie të lëvizjes së njerëzve dhe mallrave, ndërsa ka goditur edhe turizmin në zonat malore.

Ata thonë se destinacione si Rugova, Plava dhe Gucia po shmangen nga vizitorët për shkak të mungesës së lidhjes direkte, duke ndikuar negativisht në bizneset lokale, përfshirë bujtinat, restorantet dhe transportuesit.

Në njoftim thuhet se gjatë protestës pritet të nënshkruhet një peticion zyrtar, i cili do t’u dorëzohet qeverive përkatëse si kërkesë për hapjen e kësaj pike kufitare, që organizatorët e quajnë jetike për rajonin.

Organizatorët u kanë bërë thirrje qytetarëve nga të gjitha zonat, përfshirë edhe nga Kosova, që t’i bashkohen protestës.