Author: K.B.

Sekretari organizativ i Lidhjes Demokratike të Kosovës, Visar Azemi ka thënë se nuk ka besim se mekanizmat e Ministrisë së Industrisë, Ndërmarrësisë, Tregtisë dhe Inovacionit (MINTI), do të ndërmarrin masat e nevojshme për çështjen e njehsorëve elektrikë.

Në emisionin “Konfront” në KTV ai i ka thënë këshilltarit në MINTI, Ali Tafarshiku, se për këtë arsye dëshmitë që njehsorët kanë pasur orë në shpërputhje me orën reale, i ka dërguar në Prokurori e në Drejtorinë e krimeve ekonomike në Policinë e Kosovës.

“Shteti e ka për obligim ta mbrojë qytetarin, unë po them që ty nuk po të besoj se ti ke qenë në gjumë, ti nuk ke bërë asgjë, për këtë kam shkuar në Prokurori, kam shkuar te krimet ekonomike, kam thënë ja ku i keni dëshmitë”, është shprehur Azemi.

Ai ka thënë se edhe Ministria obligohet të ju dërgojë të gjitha dëshmitë organeve të drejtësisë.

Tafarshiku, ka thënë se nga data 31 mars e deri më tani kanë pranuar gjithsej 664 ankesa nga qytetarët për shpërputhje të orës që figuron në njehsorë me atë reale.

Tafarshiku ka bërë të ditur po ashtu se pesë gjoba janë shqiptuar sot ndërsa shtatë të tjera janë në proces.

“Njehsorët e skaduar i kemi verifikuar dhe menjëherë inspektorati ka vijuar të shqiptojë gjoba, pesë sot, shtatë janë në proces. Nga data 31 mars deri në këtë moment i kemi 664 ankesa, prej tyre 444 janë në formën elektronike që i kanë bashkëngjitur edhe argumentet me foto ndërsa 220 tjera kanë qenë thirrje telefonike për të cilat komisioni verifikues është duke dalur çdo ditë në teren. Në bazë të rezultateve të deritanishme rezulton që 90 për qind rezulton që koha reale nuk përputhet me kohën që figuron në njehsorë”, ka thënë Tafarshiku.

Mospërputhje në njehsorë siç potencoi Tafarshiku ka edhe në datë dhe se 90% e njehsorëve për të cilët janë adresuar ankesa kanë datë ose orë të gabuar.

“Kemi diferencë prej 12 orësh, kemi diferencë prej 4-5 ditëve në përputhje të datave”, deklaroi këshilltari i MINTI-t.

Deputeti i Partisë Demokratike të Kosovës, Mërgim Lushtaku në Politiko tha se partia e tij pritet të mbajë një mbledhje të rëndësishme të hënën, ku do të diskutohen zhvillimet e fundit politike në vend, përfshirë edhe çështjen e zgjedhjes së presidentit.

Sipas Lushtakut, Partia Demokratike e Kosovës ka dhënë deri më tani “kontributin maksimal” në proceset politike, por ai ka shprehur shqetësimin për qasjen e kryeministrit dhe subjektit të tij politik.

Ai theksoi se, sipas vlerësimit të PDK-së, veprimet e Albin Kurti dhe të Lëvizjes Vetëvendosje po interpretohen si një pozicionim më shumë opozitar sesa si përgjegjësi qeverisëse.

Lushtaku shtoi se në mbledhjen e paralajmëruar do të analizohen të gjitha këto zhvillime dhe do të përcaktohen hapat e mëtejmë të PDK-së në raport me situatën politike në vend.

Deputeti nga Partia Liberale Egjiptiane, Veton Berisha, ka deklaruar se zgjedhjet e reja nuk do ta zgjidhnin krizën politike në vend dhe se zgjidhja duhet të gjendet përmes një marrëveshjeje për presidentin.

Ai tha se asnjë parti nuk duket e gatshme për zgjedhje dhe se, sipas tij, edhe nëse ato mbahen, nuk do të sjellin rezultat për daljen nga situata aktuale.

“Nuk mendoj se do të dalim nga situata me zgjedhje. Edhe nëse shkojmë në zgjedhje, nuk do të kemi zgjidhje”, ka deklaruar Berisha në emisionin FIVE.

Berisha i bëri thirrje Murat Jasharit që të konsiderojë mundësinë për të qenë kandidat konsensual për president, duke e cilësuar si një figurë që mund të ndihmojë në tejkalimin e krizës.

“Të kemi një mundësi të daljes nga kjo situatë me rikthy qëndrimin e Murat Jasharit, edhe besoj që ne nuk presim të kemi ndonjë luftë në Kosovë por situatë është shumë e rëndë. Në një situatë të tillë nëse nuk kemi zgjidhje tjetër mendoj se është momenti i duhur… do të hyjmë në procese të cilat janë të errëta dhe normalisht zoti Jashari mendoj se e ka menduar një moment të tillë kur ne nuk kemi asnjë zgjidhje dhe ai moment sigurisht brenda këtyre 12 ditëve do të vijë”, ka theksuar ai.

Berisha theksoi se partitë duhet të arrijnë dakordim për një emër të unifikuar për president, duke shtuar se qytetarët presin veprime.

“Nuk ka kuptim të mos kemi një emër të unifikuar. Qytetari nuk i do zgjedhjet, ata duan të shohin punë dhe ndryshim”, u shpreh ai.

Ai gjithashtu tha se partitë politike nuk përfitojnë nga bartja e përgjegjësive nga njëra-tjetra.

Ekspertja e politikës së jashtme, Donika Emini, ka thënë se zgjedhjet e reja nuk i konvenojnë asnjë partie politike dhe se beson që do të ketë një marrëveshje për çështjen e presidentit.

Ajo ka thënë se nuk ka qenë kurrë çështja te emri për presidentin, por se janë dinamikat e fuqia politike që mund ta zgjidhin këtë çështje në fund.

“Në momentin e fundit do të kemi një marrëveshje, sepse partitë edhe pse normalisht po përgatitet për zgjedhje, janë në fushatë, ish-presidentja Osmani është në fushatë politike, edhe partitë e tjera, mirëpo të gjitha partitë i druhen një procesi të ri zgjedhor”, ka deklaruar Emini në emisionin “Interaktiv” në KTV.

Sipas saj edhe Vetëvendosja ka shumë për të humbur nëse vendi shkon në zgjedhje.

“E para Vetëvendosja ka shumë për të humbur, ajo normalisht se është një hap para në lojë, sepse nuk i ka pritur partitë e tjera dhe nuk ka bërë asnjë marrëveshje për qeverisje, i ka vazhduar ato që mund t’i vazhdojë e vetme dhe i ka lënë çështjet për të cilat i duhet opozita deri në momentin e fundit sepse normalisht ka avantazh në lojë dhe gjatë kësaj kohe Vetëvendosja është duke menaxhuar me buxhetin e shtetit, është buxhet mjaft gjeneroz, ka skema sociale, ka rrogën e 13-të, diçka që aplikohet për herë të parë”, ka deklaruar Emini

“Të tjerat edhe pse normalisht e kanë të vetëm levë në dorë ndaj Vetëvendosjes, numrat për presidentin, sepse nuk kanë fuqi tjetër politike, po e shtyjnë deri në fund lojën … që të dyja (PDK dhe LDK) sepse e treta AAK-ja ka gjasa të mos e kalojë pragun, sidomos nëse Vjosa Osmani futet në lojë partiake politike, këto të dyja do të jenë të rrezikuara”, ka shtuar ajo.

Emini ka thënë se do të ishte e udhës që të mos kishte zgjedhje të reja, pasi sipas saj, një proces i ri zgjedhor nuk do të prodhonte asnjë ndryshim dhe asnjë përfitim për Kosovën.

Emini ka theksuar se e udhës do të ishte të vazhdonte puna e Qeverisë pasi sipas saj ka procese jetike si dialogu e integrimet për të cilat ka thënë se duhet të punohet.

Kosova ka hyrë në dy javët e fundit të afatit kushtetues për zgjedhjen e presidentit. Nëse deri më 28 prill nuk zgjidhet presidenti, vendi shkon detyrimisht në zgjedhje që duhet të mbahen brenda 45 ditësh.

Të mërkurën ministri i Punëve të Jashtme, Glauk Konjufca, ka thënë të mërkurën se është i gatshëm ta tërheqë kandidaturën për president, në rast se opozita ofron një kandidaturë.

Por, ka theksuar se “nga aeroplani” shihet mungesa e vullnetit të opozitës për të zgjedhur presidentin.

Pas zgjedhjeve të 28 dhjetorit, subjektet politike nuk kanë arritur të gjejnë konsensus për presidentin.

E, në seancën për zgjedhjen e kreut të shtetit, e cila u bojkotua nga opozita, fillimisht Konjufca u propozua nga Vetëvendosje, e më pas edhe Fatmire Kollçaku-Mulhaxha. Seanca nuk u zhvillua, meqë në momentin kur duhej të zhvillohej votimi në sallë nuk ishin së paku 80 deputetë, sa kërkohen në raundin e parë e të dytë të zgjedhjes.

Kushtetuta kërkon që presidenti i ri të zgjidhet jo më larg se një muaj përpara se t’i përfundojë mandati atij aktual. Seanca për zgjedhjen e presidentit u zhvillua më 5 mars, një muaj para se Vjosa Osmani ta përmbyllte mandatin. Të nesërmen, Osmani nxori dekretin, me të cilin e shpërndau Kuvendin.

Por, Kushtetuesja e shpalli të paefektshëm dekretin dhe vendosi që t’u japë kohë deputetëve deri më 28 prill, meqë konstatoi se nga nisja e mandatit ata nuk i patën në dispozicion 60 ditë për ta zgjedhur kreun e shtetit. E, sipas Kushtetutës, nëse zgjedhja dështon pas 60 ditësh, Kuvendi shpërndahet dhe shpallen zgjedhjet e parakohshme.

Sot shënohet 27-vjetori i rënies së luftëtarit të Ushtrisë Çlirimtare të Kosovës, gjeneralit Shkëlzen Haradinaj, i cili ishte komandant për Operacione Luftarake në Zonën Operative të Dukagjinit.

Në të njëjtën betejë në Maznik ranë edhe tre eprorë të lartë të Brigadës 131 “Jusuf Gërvalla”: Hasim Halilaj, Fatmir Nimanaj dhe Luan Nimanaj.

Me këtë rast, Komuna e Deçanit, në bashkëpunim me OVL-UÇK, ka organizuar një sërë aktivitetesh përkujtimore në nder të jetës dhe veprës së tyre, si dhe të dëshmorëve të tjerë, Agim Selmanaj dhe Enver Haradinaj.

Aktivitetet përfshijnë homazhe në Kompleksin Memorial në Gllogjan duke filluar nga ora 11:00, pasuar nga një ecje simbolike në “Shtegun e Lirisë” nga Gllogjani deri në vendin e rënies në Maznik

Në orën 13:30 do të mbahen homazhe edhe pranë lapidarit të dëshmorëve në Maznik, në Deçan.

Sot shënohet 27-vjetori i eksodit të shqiptarëve të Kosovës, kur gjatë luftës më 1998-1999, rreth një milion shqiptarë u detyruan nga forcat paramilitare serbe të shpërngulen në Shqipëri dhe Maqedoni.

Përveç të shpërngulurve në këto dy shtete, mijëra shqiptarë kaluan kufirin edhe me Malin e Zi, ndërsa qindra mijëra ishin zhvendosur nga shtëpitë e tyre për të gjetur strehim në malet e Kosovës.

Ata ishin fëmijë, gra dhe të moshuar, të dhunuar, të torturuar dhe të masakruar. Në çdo përvjetor të eksodit të vitit 1999, që mori përmasa biblike, në Kukës përkujtohet, e në dy vitet e fundit edhe simbolikisht prej pandemisë, kjo dramë vuajtjesh nga më të tmerrshmet që kanë përjetuar njerëzit e kësaj toke.

Eksodi, apo dëbimi shqiptarëve me dhunë nga vatrat e tyre, arriti kulmin pas fillimit të bombardimeve të NATO-s kundër pikave ushtarake dhe policore të ish-Jugosllavisë (Serbisë dhe Malit të Zi), shkruan KosovaPress.

Me datë 27 mars, në orën 13:20, në pikëkalimin doganorë të Morinës hynë 187 refugjatët e parë nga Kosova ku shumica ishin fëmijë dhe gra, të cilët ishin në gjendje të mjerueshme fizike dhe mendore dhe të plagosur me mjete të forta si: qyta pushke, shkopinj gome etj. U morën masa të menjëhershme për transportimin e tyre me mjete të transportit civil dhe ushtrisë nga Drejtuesit e Prefekturës së Kukësit. Ata ishin kryesisht banorë të fshatrave të Prizrenit, Krushë e Madhe dhe Zym. Si fillim këto refugjatë u strehuan në pallatin e kulturës “Hasan Prishtina”.

Deri në orën 24:00 të 27.03.1999 ne Kukës mbërritën 12.721 kosovarë. Ndihmat e para ushqimore erdhën nga Ministria e Bujqësisë ku me datë 27 mars në Kukës, u dërguan kontingjente me ushqime (vaj, miell, sheqer, makarona, oriz, sapuna etj) për 2500 persona në muaj.

Me datë 28 mars vazhdoi fluksi i të ardhurve kosovarë, të dëbuar me forcë prej trojeve të tyre nga pushtuesit serbë. Numri i tyre ishte 13.000 banorë. Refugjatët kosovarë kishin hyrë nga pikëkalimi i Morinit ku edhe ishin dhunuar, torturuar, masakruar dhe zhveshur nga policët serbë, duke u marrë paratë, bizhuteritë dhe çdo send me vlerë që ato kishin.

Vendstrehimi i tyre përkohshëm ishte Pallati i kulturës “Hasan Prishtina”. Më pas pushteti lokal në Kukës hapi dyert e disa mjediseve shkollore, çerdhesh, kopshtesh, magazinash dhe deposh për strehimin e të dëbuarve. Refugjatët e tjerë u strehuan në familje kuksiane ku edhe u mikpritën nga to. Mesatarisht çdo familje në qytetin e Kukësit kishte rreth 14 kosovarë. Ata flinin në çdo pjesë të shtëpisë.

Në krye të javës mbërriti karvani i dytë i të dëbuarve me rreth 70.000 kosovarë. Nga këto 40.000 u sistemuan pranë familjeve qytetare, 10.000 në mjedise të ndryshme publike të qytetit, 6.000 në komunat Bicaj, Kolsh, Tërthore dhe Shtiqën, 12.000 në qytetin e Krumës dhe 300 në komunën Golaj. Në Kukës mbërritën 16 automjete për të evakuuar një pjesë të kosovarëve në qytete te tjera. Dita-ditës numri i të dëbuarve rritej. Pavarësisht strehimit në shtëpitë e banorëve kuksianë, një numër i madh kosovarësh strehoheshin në kampe

16 prilli është data kur në Kukës shënohet Dita e Eksodit, si shenjë falënderimi dhe respekti për të gjithë ata që hapen dyert e veta për të pritur vëllezërit e tyre shqiptarë nga Kosova.

Sot në Kosovë pritet të mbajë mot me vranësira e intervale kohore me diell. Herë pas here lokalisht priten riga shiu e në Dukagjin mund të ketë edhe ndonjë rrebesh lokal shiu me vetëtima e bubullimë.

Reshjet do të jenë kryesisht të pakta në Rrafshin e Kosovës e pak më intensive në Dukagjin sidomos pasdite vonë dhe në mbrëmje.

Temperaturat pritet të lëvizin nga 7 minimalja deri në 22 gradë Celsius ajo maksimale.