Author: K.B.

Bashkimi Evropian pezulloi mbështetjen financiare për Serbinë pas paralajmërimeve që lëshoi ndaj Beogradit për ndërhyrjet në sistemin gjyqësor. Komisionerja për Zgjerim, Marta Kos theksoi se vendi nuk do të jetë në gjendje të marrë mbështetje financiare nga Plani i Rritjes, derisa të adresojë të gjithë shqetësimet e raportuara në gjyqësor.

Në një konferencë për shtyp, Marta Kos vuri në dukje se një vend që është kandidat për anëtarësim në Bashkimin Evropian “nuk mund të ulet në dy karrige dhe se në një moment Serbia do të duhet të bëjë një zgjedhje”.

Komisioni Evropian, në përgjigje të interesit të Euronews Serbia në lidhje me deklaratën e Kos, deklaroi se Serbia duhet që të zbatojë të gjithë rekomandimet e Komisionit të Venecias në kohën më të shkurtër me një proces konsultimi transparent dhe gjithëpërfshirës me të gjithë aktorët përkatës.

“Për momentin, i kemi pezulluar vendimet që ndikojnë në pagesat për Serbinë dhe kjo mbetet ende në fuqi. Komisioni vlerëson vazhdimisht nëse janë përmbushur të gjitha kushtet përkatëse për mbështetje për vende si Serbia dhe në këtë kontekst do të shqyrtojmë nëse rekomandimet e Komisionit të Venedikut po zbatohen”, thuhej në përgjigjen e KE-së.

Komisioni Qendror Zgjedhor është duke zhvilluar sot mbledhjen e radhës, por e cila lidhet me shpalljen e zgjedhjeve të jashtëzakonshme.

Në vazhdim të mbledhjes, KQZ mori vendim për miratimin e planit të buxhetit për organizimin e zgjedhjeve të parakohshme për Kuvendin e Kosovës, të cilat do të mbahen më 7 qershor 2026.

Buxheti i planifikuar dhe miratuar për organizimin e këtyre zgjedhjeve është në vlerën: 10,887,186.445 Euro.

Në Ditën Ndërkombëtare të Punëtorëve, Ibrahim Januzi, kryetar i Sindikatës së Pavarur të Minatorëve të “Trepçës” ka kërkuar nga ministri i Punës Andin Hoti që inspektimet që ka nisur në vendpunishte t’i vazhdojë edhe në ndërmarrjet shtetërore.

“Është mirë që po kontrollohen se shumë punëtorë po vdesin por inspektorët duhet të vijnë edhe në ndërmarrje publike, aty ku është dora e shtetit e ku përballemi me shkelje të të drejtave për çdo ditë”, ka thënë Januzi në emisionin”tre8tre” në KTV.

Ai ka folur për largimet nga puna të minatorëve që bëhen me direktiva nga udhëheqësit e “Trepçës” dhe që sipas tij janë të padrejta.

“Video e dy punëtorëve që kinse bëjnë check-in e largohen nga puna nuk është e vërtetë. Pas lajmërimit në punë ata kanë shkuar me veturë të tyre te vendi i punës që është 30 metra nën tokë. Këta minatorë mbi 40 vjet kanë punuar, kanë qenë krenaria e Kosovës e sot janë larguar si asgjë” ka thënë Januzi.

Hoti, më 13 prill mori vendim për aksion të jashtëzakonshëm të inspektimeve në vendpunishte.

Inspektorati Qendror i Punës po vazhdon inspektimet në sektorët me rrezikshmëri të lartë në territorin e Kosovës.

Në 48-orëshin e fundit Inspektorati ka realizuar aksione vetëm në sektorin e ndërtimtarisë.
Sipas raportit, nga gjithsej 32 inspektime, në 14 vendpunishte janë ndaluar punimet dhe katër janë proceduar në Polici. Po ashtu, në 21 vende janë shqiptuar vërejtje.

Punëtorët e sektorit privat në Ditën e Punëtorëve kanë shprehur pakënaqësitë e tyre lidhur me pagat, që po i marrin.

Ata kanë kërkuar që paga minimale për ta të jetë 600 euro.

Blerim Rrustolli, punëtor i sigurimit në Fakultetin Teknik, ka thënë për Ekonomia Online se nuk është aspak i kënaqur me pagën që e merr.

Madje, ka shtuar se është zhgënjyer edhe nga politikanët, duke shtuar se nuk do të dalë më për të votuar.

“ I knaqt kurrqysh hiq, këta për veti janë të knaqt a na jo, na totalisht jo. 380 euro çka me bo, ku dalin, muji- mujin s’ma nzen. A me ju pagua fëmijëve kombin, a vetit, a me ble harxh për shpi, a çka…Paga minimale duhet me u kon 500 a 600 qaty se tjetër zgjidhje s’ka as me 200 as me 300 s’ka zgjidhje. Unë jam totalisht i zhgënjyer me zgjedhje edhe s’ka me dal, s’ki kon e voton, ata i provum, këta po, kështu që hiq mo”, ka thënë ai.

Edhe një punëtorë tjetër ka thënë se kanë dalë në protestë për të kërkuar të drejtat e tyre.

“Sikur të tjerët, edhe ne jemi dal po dihet për të drejtat tona, për rroga. Me na u plotësu kushtet, për stazhin e punës e këto tjerat, sikur tjerët edhe na qashtu…ne po i kërkojmë pagën minimale 600 euro, sikur shteti që i ka edhe na”, ka thënë ajo.

Federata Sindikale e Punëtorëve të Sektorit Privat, në shënim të Ditës Ndërkombëtare të Punëtorëve ka mbajtur sot protestë në Prishtinë.

Nga aty u tha se te drejtat e punëtorëve të sektorit privat po shkelen çdo ditë, derisa u kërkua edhe drejtësi për këta punëtorë.

Tre përfaqësues të të ashtuquajturës “Asamblesë Anti – Kapitaliste” janë arrestuar nga Policia afër Kuvendit të Kuvendit të Kosovës.

Disa prej tyre kanë deklaruar se arrestimi ndodhi në fund të protestës.

Mësohet se arsyeja e arrestimit të tyre ka ndodhur pasi që të njëjtit nuk kanë dashur të tregojnë se cilës organizatë i përkasin, madje nuk kanë njoftuar as që do të mbajnë protestë./EO/

Kongresisti amerikan, Keith Self, së bashku me dy kolegë tjerë, Ritchie Torres dhe Mike Lawler, kanë paraqitur një rezolutë në Dhomën e Përfaqësuesve në ShBA për të shprehur mbështetje të fortë për integrimin e Kosovës në NATO.

Por, këtë iniciativë po zotohet se do ta luftojë presidenti i Serbisë, Aleksandar Vuçiq.

“Ne së shpejti do të kemi ushtrime të rëndësishme me ta (NATO). Po bisedojmë me ta, shpresojmë që kjo të mos ndodhë. Do të luftojmë që diçka e tillë të mos ndodhë. Mos harroni se ekzistojnë katër vende që janë anëtare të NATO-s, siç janë edhe pesë anëtare në BE, që nuk e kanë njohur Kosovën. Nuk e shoh se si kjo mund të kalojë lehtë, por të presim e të shohim”, tha Vuçiq për gazetarët, raporton agjencia serbe e lajmeve “Tanjug“, transmeton Klankosova.

Në rezolutën e propozuar nga kongresistët amerikanë, përmenden disa prej arsyeve që Kosova meriton anëtarësimin në NATO.

“Për më tepër, ndërsa forcat kundërshtare vazhdojnë të destabilizojnë rajonin, shtimi i Kosovës në aleancën e NATO do të shërbente si një kundërpeshë e domosdoshme për t’i dekurajuar përpjekje të tilla armiqësore dhe për të parandaluar një katastrofë tjetër globale në Ballkan”, thuhet në rezolutë.

Katër shtete anëtare të NATO-s , Greqia, Rumania, Sllovakia e Spanja, ende nuk e kanë njohur Kosovën shtet.

Rezoluta bën thirrje këtyre katër aleatëve t’i rishqyrtojnë qëndrimet e tyre, duke theksuar se njohja më e gjerë e Kosovës është thelbësore për ta zhbllokuar rrugën e saj drejt integrimit në NATO dhe për të mbyllur një boshllëk strategjik në Evropën Juglindore që kundërshtarët kërkojnë ta shfrytëzojnë.

“Kosova ka demonstruar një përkushtim të qartë ndaj stabilitetit rajonal dhe përafrimit strategjik me vendet e NATO, por progresi i saj drejt anëtarësimit në aleancë po pengohet nga mungesa e njohjes nga një numër i vogël aleatësh”, ka thënë kongresisti Self.

Ai ka shtuar se shtimi i Kosovës në aleancë është thelbësor për ta kundërshtuar ndikimin në rritje të kundërshtarëve në Evropë.

“Shtetet e Bashkuara duhet t’i inkurajojnë Greqinë, Rumaninë, Sllovakinë dhe Spanjën t’i rishqyrtojnë qëndrimet e tyre dhe të sigurojnë që Kosova të ketë një rrugë të besueshme dhe të arritshme drejt anëtarësimit”, ka thënë Self.

Në rezolutë thuhet se shtimi i Kosovës në aleancën e NATO është thelbësor për të mbrojtur interesat e sigurisë kombëtare të Shtetet e Bashkuara në Evropën Juglindore.

Luan Haradinaj, djali i Shkëlzen Haradinajt, është martuar sot.

Dasma është zhvilluar në Gllogjan në kullën e familjes Haradinaj.

Disa nga të pranishmit kanë publikuar fotografi nga dasma, duke uruar Luan Haradinajn për martesën.