Author: K.B.

Nesër do të mbajë mot i vranët, me intervale kohore me diell. Vranësirat do të jenë kryesisht në pjesën perëndimore dhe veriperëndimore të cilat do të shoqërohen me riga shiu.

Temperaturat minimale do të lëvizin nga 0 deri në 3°C, ndërsa maksimalet e ditës nga 14 deri në 17°C.

Ndërkaq gjatë ditës së diel parashihet mot me diell dhe vranësira të shpërndara.

Temperaturat minimale do të lëvizin nga 0 deri në 3°C, ndërsa maksimalet nga 15 deri në 17°C.

Do të fryjë erë nga veriperëndimi, e lehtë deri mesatare.

Albin Kurti, kryeministër në detyrë, ka emëruar Agon Batushën, zëvendësministër në Ministrinë e Administrimit të Pushtetit Lokal

Siç njofton ZKM’ja, Kurti i ka uruar suksese Batushës në detyrën e re.

Ndryshe, Batusha, më herët ka qenë deputet nga radhët e Lëvizjes Vetëvendosje.

Komunikata e ZKM’së:

Agon Batusha emërohet zëvendësministër në Ministrinë e Administrimit të Pushtetit Lokal

Prishtinë, 1 maj 2026

Kryeministri në detyrë i Republikës së Kosovës, Albin Kurti, ka emëruar z. Agon Batusha në pozitën e zëvendësministrit në Ministrinë e Administrimit të Pushtetit Lokal.

Kryeministri në detyrë Kurti e uroi z. Batusha për detyrën e re dhe i dëshiroi suksese në përmbushjen e përgjegjësive të reja.

Bashkimi Evropian do të fitojë anëtarë të rinj në periudhën e ardhshme, me Malin e Zi të parin në radhë, i ndjekur nga Shqipëria, tha Komisionerja e Zgjerimit të BE-së, Marta Kos.

“Tani është mjaft realiste që Bashkimi Evropian të zgjerohet në vitet e ardhshme. Megjithatë, në shumë pjesë të Ballkanit Perëndimor ende ekziston skepticizëm nëse anëtarësimi në BE është i mundur. Shpresoj që shembulli pozitiv i Malit të Zi dhe Shqipërisë, të cilat janë të radhës, do të frymëzojë vendet e tjera në rajon të ndjekin shembullin”- tha ajo në një konferencë në Freiburg.

Marrëveshjet e pranimit të vendeve të reja në Bashkimin Evropian do të përmbajnë një dispozitë të re që do t’i lejojë Komisionit Evropian të zbatojë sanksione në rast të mosrespektimit të rregullave dhe “vlerave” të Unionit, shtoi Komisionerja Evropiane.

“Marrëveshja e pranimit me Malin e Zi do të jetë e para që do të përfshijë masa mbrojtëse të veçanta, të nxjerra nga përvoja me Hungarinë” – tha Marta Kos.

Kos pretendon se kjo ka të bëjë me parandalimin e shfaqjes së “Kuajve të Trojës” brenda Unionit.

“Nëse do të më kishit pyetur për këtë pesë ose dhjetë vjet më parë, do të kisha thënë se ishte absurde. Por tani e kuptojmë se duhet të jemi në gjendje të mbrojmë veten,” – shtoi Komisioneri Evropian.

Vendi i fundit që iu bashkua BE-së ishte Kroacia, gjë që ndodhi në vitin 2013, dhe vetë procesi zgjati dhjetë vjet.

Avokatët që mbrojnë kriminelin e dënuar serb të luftës në Bosnjë, Ratko Mlladiq, po presin një vendim nga një gjykatë e OKB-së mbi përpjekjen e tyre për ta liruar atë nga burgu në Hagë me arsyetimin se ai është afër fundit të jetës së tij.

Mlladiq, 84 vjeç, u dënua me burgim të përjetshëm në vitin 2017 për gjenocid, krime lufte dhe krime kundër njerëzimit gjatë luftërave në ish-Jugosllavi midis viteve 1992 dhe 1995.

Në një parashtresë të detajuar drejtuar gjykatës të premten, avokatët e tij thanë se Mlladiq kishte qenë në shtrat ose në karrocë me rrota për një kohë të gjatë.

Ata thanë se krimineli kishte pësuar një goditje të dyshuar në tru gjatë një telefonate me të birin, që e la pothuajse të paaftë të fliste.

Sipas tyre, dy mjekë e kishin vlerësuar gjendjen e tij si serioze dhe se “rreziku i vdekjes së menjëhershme është i lartë”, andaj kanë bërë thirrje për lirimin e tij të menjëhershëm të përkohshëm ose me kusht.

Ndryshe, Mlladiq komandoi forcat serbe të Bosnjës në vitet 1990 kundër ushtrive kroate dhe boshnjake, gjatë një lufte në të cilën trupat e tij kryen “spastrim etnik” në Bosnjë-Hercegovinë, rrethoi qytetin kryesor të Sarajevës me vdekjen e më shumë se 10,000 njerëzve dhe kreu masakrën e 8,000 burrave dhe djemve në Srebrenicë.

Mlladiq u zhduk në vitin 1995 dhe u gjurmua në Serbi vetëm në vitin 2011 pas 16 vitesh në arrati.

Ai doli në gjyq në Hagë në vitin 2012 dhe u dënua në vitin 2017.

Presidenti amerikan, Donald Trump ka deklaruar se Shtetet e Bashkuara do të rrisin tarifat për makinat dhe kamionët që importohen nga Bashkimi Evropian në 25%.

Në një postim në platformën Truth Social, Trump tha se vendimi vjen për shkak të mosrespektimit të marrëveshjeve tregtare nga BE-ja, sipas tij, shkruan BBC.

“Kam kënaqësinë të njoftoj se, bazuar në faktin se Bashkimi Evropian nuk po i përmbahet Marrëveshjes sonë të Tregtisë për të cilën jemi plotësisht të dakordësuar, javën tjetër do të rris tarifat e ngarkuara ndaj Bashkimit Evropian për makinat dhe kamionët që hyjnë në Shtetet e Bashkuara. Tarifa do të rritet në 25%. Është plotësisht e kuptueshme dhe e rënë dakord që, nëse ata prodhojnë makina dhe kamionë në fabrikat e SHBA-së, NUK DO TË KETË TARIFË. Shumë fabrika automobilash dhe kamionësh janë aktualisht në ndërtim e sipër, me mbi 100 miliardë dollarë të investuara, NJË REKORD në Historinë e Prodhimit të Makinave dhe Kamionëve. Këto fabrika, të pajisura me punëtorë amerikanë, do të hapen së shpejti – Nuk ka pasur kurrë diçka të ngjashme me atë që po ndodh në Amerikë sot!’, shkroi Trump.

Ka hyrë këtë të premte në fuqi sërish marrëveshja për lëvizjen e lirë kufitare mes Kosovës dhe Shqipërisë.

Kjo marrëveshje do të jetë aktive deri në muajin tetor, ndërsa pritet të ripërtërihet edhe në muajt dhjetor dhe janar, si dhe gjatë fundjavave.

Ajo parashikon shmangien e qëndrimit të automjeteve në radhë në kufi, si dhe lehtësimin e procedurave, ku kalimi bëhet pa kontroll të detajuar të letërnjoftimeve apo pasaportave, përveç rasteve të dyshuara.

Zbatimi i saj ka shmangur pritjet e gjata në kufi.

Sipas të dhënave zyrtare, vetëm gjatë mëngjesit të sotëm kanë hyrë në territorin e Shqipërisë rreth 15 mijë shtetas, pjesa më e madhe e të cilëve vijnë nga Kosova.

Gjykata e Qarkut në Rjekë të Kroacisë, më 29 prill 2026, ka caktuar masën e paraburgimit për një shtetas 25-vjeçar të Serbisë, i cili dyshohet për veprën penale të dëmtimit të pronës së tjetrit dhe nxitjes publike të dhunës dhe urrejtjes.

Paraburgimi ndaj tij u caktua në mungesë pasi i dyshuari është i paarritshëm për organet e drejtësisë kroate dhe, sipas vendimit të gjykatës, ndodhet në arrati.

Sipas përmbajtjes së vendimit, ngjarja ka ndodhur më 31 gusht 2022, midis orës 00:00 dhe 00:30 në Opati, në rrugën ‘Mareshal Tito’.

“Bëhet fjalë për hapësirën e parkimit të hotelit ‘Kristal’, ku ndodhej automjeti i tipit Audi, me ngjyrë të bardhë dhe targa të Kosovës, në pronësi të një shtetasi të Kosovës. I dyshuari akuzohet se me një markues me ngjyrë të zezë, në kapakun e motorit të makinës ka vizatuar një kryq të rrethuar nga katër shkronja ‘S’ cirilike, ndërsa poshtë tij ka shkruar me alfabet cirilik ‘Kosovo je Srbija’ (Kosova është Serbi). Me këtë veprim, sipas pretendimeve nga procesi, pronarit të automjetit i është shkaktuar një dëm material në vlerë prej rreth 398 eurosh”, ka raportuar media kroate “Fiuman”.

Sipas këtij raportimi, një pjesë veçanërisht rënduese e rastit lidhet me faktin se i dyshuari, sipas dyshimeve të prokurorisë së shtetit, e ka filmuar të gjithë aktin me celular dhe më pas videon e ka publikuar në profilin e tij në Instagram.

Prokuroria vlerëson se përmes këtij publikimi, ai ka bërë të disponueshëm për publikun një përmbajtje që bën thirrje për dhunë ose urrejtje ndaj një grupi njerëzish ose një anëtari të grupit për shkak të përkatësisë së tyre fetare, kombëtare dhe etnike, gjuhës dhe origjinës.

Nga vendimi i gjykatës rezulton se dyshimi i bazuar mbështetet në kallëzimin penal të Drejtorisë Policore të rajonit Primorsko-Goranska, përkatësisht Stacionit Policor të Opatisë, si dhe në provat e mbledhura, mes të cilave janë shënimet zyrtare, fotografitë e automjetit të dëmtuar, pamjet e kamerave të vëzhgimit të hotelit “Kristal”, publikimi nga rrjeti social Instagram dhe materiale të tjera të mbledhura gjatë hetimit kriminalistik.

Gjykata po ashtu thekson se i dyshuari nuk është gjetur në vendbanimin e paraqitur në Hotel “Opatija”, se nga data 29 gusht 2022 nuk ka shkuar në punë dhe as nuk e ka njoftuar punëdhënësin për mungesën, dhe se akomodimin e ka lënë më 2 shtator 2022.

Po atë ditë, sipas të dhënave nga shkresat e lëndës, siç raporton “Fiuman”, ai ka lënë territorin e Republikës së Kroacisë me transport publik përmes pikës kufitare Stara Gradishka.

“I dyshuari nuk i është përgjigjur as ftesës së prokurorisë së shtetit për marrjen në pyetje për herë të parë në nëntor të vitit 2022. Organet kroate të drejtësisë më pas tentuan të bien në kontakt me të përmes ndihmës juridike ndërkombëtare, por organi kompetent i Republikës së Serbisë e refuzoi kërkesën. Në shkresat e lëndës thuhet gjithashtu se i dyshuari nuk ka vendbanim të deklaruar në territorin e Serbisë dhe se ndaj tij është lëshuar një urdhër-kërkimi në nivel kombëtar”, u tha në raportimin e medias kroate.

Ndërkaq, masa e paraburgimit mund të zgjasë më së shumti një muaj dhe do të llogaritet nga dita e privimit nga liria.

Gjykata ka përcaktuar gjithashtu se paraburgimi mund të zëvendësohet me një dorëzani prej 5.000 eurosh, me kusht që i dyshuari të premtojë se nuk do të fshihet, nuk do ta lëshojë vendbanimin pa miratim, nuk do ta pengojë procedurën penale dhe nuk do të kryejë vepër të re penale.

Kryeministri në detyrë, Albin Kurti në Ditën Ndërkombëtare të Punëtorëve ka thënë se sot është dita e atyre që kanë ndërtuar gjithçka rreth nesh dhe që vazhdojnë të na zhvillojnë çdo ditë.

Kurti përmes një postimi në rrjetin social në Facebook ka shkruar se qytetarët e Kosovës kanë një kuptim të rëndësishëm të vlerës së punës edhe përtej ekonomisë.

Ai po ashtu përmendi vendimin e Qeverisë për dhënien e pagës së 13-të për punonjësit e sektorit publik duke i bërë thirrjë sektorit privat të ndjekë këtë shembull “sepse kompensimi i drejtë dhe përkujdesja e shtuar për punëtorët nuk duhet të jetë privilegj vetëm i sektorit publik”.

“Vendosëm pagën e 13-të për punëtorët e sektorit publik. Për herë të parë pas shpalljes së pavarësisë së Kosovës, shteti njohu në mënyrë konkrete kontributin e vazhdueshëm të punonjësve të tij. I bëmë e vazhdojmë t’i bëjmë thirrje edhe sektorit privat të ndjekë këtë shembull, sepse kompensimi i drejtë dhe përkujdesja e shtuar për punëtorët nuk duhet të jetë privilegj vetëm i sektorit publik”, ka shkruar Kurti.

Komisioni Qendror i Zgjedhjeve, në mbledhjen e mbajtur sot, ka vendosur që të jenë 12 ditë afat për regjistrimin e mërgatës për zgjedhjet e 7 qershorit

Regjistrimi i votuesve jashtë Kosovës bëhet nga 6 maj deri më 17 maj 2026, ndërsa votimi përmes postës zhvillohet nga 25 maj deri më 6 qershor 2026.

Votimi në përfaqësi diplomatike do të mbahet më 6 qershor 2026, nga ora 07:00 deri 19:00.

Brenda vendit, periudha për kundërshtimin dhe korrigjimin e listës së votuesve zgjat nga 6 maj deri më 18 maj 2026.

Lista e Qendrave të Votimit nëpër përfaqësi diplomatike dhe caktimi i numrit maksimal të votuesve do të bëhet nga 5 deri më 6 maj.