ATV

Author: K.B.

  • Franca nis hetimet ndaj Muskut për pornografi të fëmijëve në X

    Franca nis hetimet ndaj Muskut për pornografi të fëmijëve në X

    Prokuroria franceze ka nisur një hetim ndaj Elon Muskut dhe platformës së tij “X” (ish-Twitter) lidhur me dyshime për shpërndarje të materialeve të abuzimit seksual ndaj fëmijëve në rrjetin social.

    Sipas mediave, hetimi përfshin akuza serioze që lidhen me përfshirje të mundshme në posedimin dhe shpërndarjen e imazheve me përmbajtje pornografike për fëmijë, si dhe me përmbajtje të tjera të paligjshme të shpërndara në platformë.

    Autoritetet franceze po shqyrtojnë gjithashtu edhe rolin e platformës në menaxhimin e përmbajtjeve të krijuara nga inteligjenca artificiale dhe në masat e sigurisë për mbrojtjen e përdoruesve.

    Hetimi vjen në kuadër të rritjes së shqetësimeve në Evropë për mënyrën se si rrjetet sociale menaxhojnë përmbajtjet e ndjeshme dhe të paligjshme, veçanërisht ato që përfshijnë fëmijët.

    Elon Musk dhe përfaqësuesit e platformës “X” nuk kanë dhënë ende një koment të detajuar mbi rastin.

  • 28 vjet nga Beteja e Llapushnikut

    28 vjet nga Beteja e Llapushnikut

    28 vjet më parë në Llapushnik të Drenasit u zhvillua beteja e ashpër ndërmjet forcave të Ushtrisë Çlirimtare të Kosovës dhe pushtuesve serbë, betejë kjo e njohur si Beteja e Grykës së Llapushnikut.

    Beteja u zhvillua për tri ditë me radhë, 7 deri më 9 maj 1998, dhe ishte njëra ndër betejat më të lavdishme të UÇK-së.

    Lufta e zhvilluar në Grykës së Llapushnikut për kontrollin e kësaj zone, ka qenë më e rëndësishmja për Ushtrinë Çlirimtare të Kosovës, pasi e bënte të pakalueshme për forcat serbe rrugën Prishtinë – Pejë.

    Gryka e Llapushnikut u mbajt e bllokuar për muaj me radhë, duke u mundësuar luftëtarëve të UÇK-së që të lëvizin të lirë në një pjesë të madhe të territorit të Kosovës dhe kjo ua mundësoi që të organizohej dhe të furnizohej me armatime./KP

  • 50 aksidente për 24 orë në Kosovë

    50 aksidente për 24 orë në Kosovë

    50 aksidente kanë ndodhur në 24 orët e fundit në vendin tonë.

    21 prej këtyre aksidenteve kanë qenë me të lënduar, ndërsa 29 me dëme materiale.

    Gjatë kësaj periudhe janë shqiptuar edhe 1 mijë e 829 gjoba trafiku.

    Sipas statistikave të përgjithshme të policisë, për 24 orë janë arrestuar 33 persona dhe 19 janë dërguar në mbajtje.

  • Osmani dhe Abdixhiku sot mbajnë tubimin ku prezantohen si kandidatë për presidente dhe kryeministër nga LDK

    Osmani dhe Abdixhiku sot mbajnë tubimin ku prezantohen si kandidatë për presidente dhe kryeministër nga LDK

    Lidhja Demokratike e Kosovës (LDK), do të mbajë sot tubim në AMC Hall Prishtina.

    Aty do të prezantohet edhe kandidatja për presidente Vjosa Osmani dhe kandidati për kryeministër Lumir Abdixhiku nga kjo parti politike.

    Ngjarje zhvillohet në ora 18:00, të dielën.

    Të shtunën, Abdixhiku ka ftuar qytetarët që të marrin pjesë, pasi kumtoi kandidaturat.

  • Çmimini i naftës për sot do jetë 1.61 euro për litër

    Çmimini i naftës për sot do jetë 1.61 euro për litër

    Ministria Industrisë, Ndërmarrësisë, Tregtisē dhe Inovacionit (MINTI) ka caktuar çmimet e reja të derivateve për dy ditët e ardhshme, 10 dhe 11 maj.

    Sipas vendimit bazuar në marzhë tregtare, nafta do të shitet me çmim prej 1.61 euro për litër.

    Ndërsa benzina është përcaktuar të shitet me 1.50 euro për litër.

    Po ashtu, çmimi i gazit do të jetë 0.79 euro për litër, sipas MINTI-t.

  • Çifti fitues i giveaway-t të Interex udhëton sot drejt Vjenës për koncertin e Yll Limanit

    Çifti fitues i giveaway-t të Interex udhëton sot drejt Vjenës për koncertin e Yll Limanit

    Loja shpërblyese “Viti i Ëndrrave të Mëdha” e organizuar nga Interex në Instagram ka përfunduar me sukses, duke shpallur çiftin fitues që sot do të udhëtojë drejt Vjenës për të ndjekur nga afër koncertin e shumëpritur të Yll Limanit.

    Përmes këtij giveaway-je, Interex i ka dhuruar fituesve një eksperiencë të plotë VIP, e cila premton emocione të paharrueshme dhe momente unike, duke i çuar fituesit drejt një aventure speciale në Vjenë, aty ku do të përjetojnë nga afër atmosferën magjike të koncertit të shumëpritur të Yll Limanit.

    Loja u zhvillua nga data 6 deri më 30 Prill në faqen zyrtare të Interex në Instagram dhe arriti të tërheqë interesim të madh nga ndjekësit dhe konsumatorët në të gjithë Kosovën. Mijëra persona u bënë pjesë e giveaway-t duke ndjekur hapat e pjesëmarrjes dhe duke shpërndarë energji pozitive në rrjetet sociale.

    Ky organizim ishte menduar si një mënyrë për të shpërblyer besnikërinë e konsumatorëve të Interex dhe për t’u ofruar atyre eksperienca ndryshe, përtej përfitimeve të zakonshme. Për çiftin fitues, ky udhëtim do të jetë një mundësi unike për të krijuar kujtime të paharrueshme në një nga koncertet më të komentuara të momentit.

    Nga Interex u shprehën të lumtur për interesimin dhe reagimet shumë pozitive që kjo lojë shpërblyese ka marrë gjatë gjithë periudhës së zhvillimit. Sipas tyre, surpriza dhe aktivitete të ngjashme do të vazhdojnë edhe në të ardhmen, si pjesë e angazhimit për të qenë sa më afër konsumatorëve.

    “Viti i Ëndrrave të Mëdha” rezultoi të jetë më shumë se një giveaway, ishte një eksperiencë që bashkoi emocionin, muzikën dhe mundësinë për të jetuar një aventurë unike.

    Screenshot
  • Policia: Kurti u kërcënua me jetë nga një adresë nga Kraleva e Serbisë

    Policia: Kurti u kërcënua me jetë nga një adresë nga Kraleva e Serbisë

    Policia e Kosovës ka bërë të ditur se Drejtoria për Hetimin e Krimit të Organizuar dhe Krimeve të Rënda ka pranuar në trajtim një informacion lidhur me një kanosje të drejtuar ndaj Kryeministrit në detyrë, Albin Kurti, e publikuar në rrjete sociale.

    Sipas njoftimit të Policisë, kanosja është adresuar përmes profilit të quajtur “Severna Brigada”, e njohur edhe si “Brigada e Veriut”, organizatë e shpallur terroriste nga institucionet e Republikës së Kosovës.

    “Drejtoria për Hetimin e Krimit të Organizuar dhe Krimeve të Rënda, më datë 08 maj 2026, ka pranuar në trajtim një informacion lidhur me një kanosje të adresuar ndaj Kryeministrit të Republikës së Kosovës, z. Albin Kurti, në rrjetet sociale nga profili i quajtur ‘Severna Brigada’”, thuhet në njoftim.

    Policia ka bërë të ditur se, në koordinim me Prokurorinë Speciale të Republikës së Kosovës (PSRK), janë ndërmarrë menjëherë veprime intensive hetimore, me mbështetjen edhe të Drejtorisë për Hetimin e Krimeve Kibernetike.

    “Në koordinim me Prokurorinë Speciale të Republikës së Kosovës (PSRK), menjëherë janë ndërmarrë veprime intensive hetimore, me mbështetjen edhe të Drejtorisë për Hetimin e Krimeve Kibernetike”, thuhet më tej.

    Nga hetimet e deritanishme është konstatuar se kanosja është publikuar përmes llogarisë në Facebook “facebook.com/severna.brigada.2025”, ndërsa sipas të dhënave të siguruara, postimi dyshohet se është bërë nga territori i Republikës së Serbisë, konkretisht nga qyteti i Kralevës.

    “Bazuar në të dhënat e siguruara, postimi është bërë nga territori i Republikës së Serbisë, konkretisht nga qyteti i Kralevës në Republikën e Serbisë. Me këtë rast janë identifikuar IP-adresa e përdorur dhe të dhënat personale të përdorura gjatë regjistrimit”, thuhet në njoftim.

    Policia e Kosovës thekson se hetimet po vazhdojnë dhe janë siguruar të dhëna shtesë që do të ndihmojnë në zbardhjen e plotë të rastit.

    “Nga analizat e kryera nga njësitë kompetente janë identifikuar të dhëna shtesë që mund të ndihmojnë në hetimin intensiv të mëtejshëm nga Policia e Kosovës dhe PSRK”, përfundon njoftimi.

  • Fundjavë me diell dhe vranësira të pjesshme

    Fundjavë me diell dhe vranësira të pjesshme

    Të shtunën mbi vendin tonë do të mbajë mot kryesisht i vranët, por me intervale të herëpashershme me diell.

    Gjatë orëve të ditës, siç ka njoftuar IHMK, vranësirat konvektive pritet që lokalisht të shoqërohen me riga shiu dhe shkarkime rrufesh, kryesisht në disa zona të kufizuara.

    Temperaturat minimale do të lëvizin ndërmjet 7–10°C, ndërsa maksimalet e ditës parashihen të lëvizin ndërmjet 16–19°C.

    Do të fryjë erë nga drejtimi i verilindjes dhe veriperëndimit me shpejtësi prej 1–11 m/s.

    Të dielën parashihet mot me vranësira të ndryshueshme dhe intervale më të gjata me diell, si pasojë e stabilizimit gradual të kushteve atmosferike.

    Temperaturat minimale do të lëvizin ndërmjet 6–9°C, ndërsa maksimalet e ditës pritet të arrijnë nga 19 deri në 22°C.

    Era do të fryjë e lehtë deri mesatare nga drejtimi i juglindjes.

    Kushtet agrometeorologjike gjatë fundjavës paraqiten përgjithësisht të favorshme për zhvillimin e kulturave bujqësore pranverore, sidomos për perimet dhe drithërat në fazat intensive të vegjetacionit.

  • Trump shpall armëpushim tre-ditor midis Ukrainës dhe Rusisë

    Trump shpall armëpushim tre-ditor midis Ukrainës dhe Rusisë

    Presidenti i ShBA-së, Donald Trump, njoftoi të premten në rrjetet sociale se do të ketë një armëpushim tre-ditor në luftën midis Rusisë dhe Ukrainës nga 9 maji deri më 11 maj për të shënuar fundin e Luftës së Dytë Botërore për rusët.

    Trump kishte thënë pas një telefonate me Putinin më 29 prill se një armëpushim i përkohshëm ishte në proces, shkruan Reuters.

    Putin njoftoi një armëpushim të ngjashëm vitin e kaluar që zgjati tre ditë, por nuk u ra dakord me Kievin.

  • Deklarata e Pavarësisë pas kauçit, OVL i reagon Bashës: Akt i poshtër, të nisin hetimet, u normalizua armiqësia ndaj themeleve të shtetit

    Deklarata e Pavarësisë pas kauçit, OVL i reagon Bashës: Akt i poshtër, të nisin hetimet, u normalizua armiqësia ndaj themeleve të shtetit

    Ish-deputetja e Vetëvendosjes, Adelina Grainca, ka publikuar sot një fotografi me ministrin në detyrë të Infrastrukturës, Dimal Basha, ku vëmendje ka marrë fakti se prapa kauçit në zyrën e Bashës shihet se është lënë për tokë Deklarata e Pavarësisë së Kosovës.

    Lidhur me këtë ka reaguar OVL-UÇK. Këta të fundit kanë thënë se fotografia e lënë mbrapa divanit, është ‘’rrëfim politik’’ dhe se, Deklarata e Pavarësisë ‘’përdhoset nga ministri i Qeverisë Kurti’’, përcjell Gazeta Express.

    ‘‘Albin Kurti dhe LVV-ja nuk mund t’i lajnë duart nga kjo. Lartësuan figura të tilla dhe normalizuan armiqësinë ndaj themeleve të Republikës, duke e kthyer pushtetin institucional në strehë për ata që nuk u pajtuan kurrë me pavarësinë e Kosovës. Arroganca e tyre ndaj Luftës Çlirimtare është kthyer në arrogancë ndaj vetë shtetit’’, ka thënë mes tjerash OVL-UÇK.

    Postimi:

    Fotografia nga zyra e Dimal Bashës është rrëfim politik. Deklarata e Pavarësisë, e vulosur me sakrificë, gjak, burgime, mërgim dhe luftë, përdhoset nga ministri i Qeverisë Kurti.

    Basha nuk ka bërë thjesht një gabim protokollar. Ka shpërfaqur një vazhdimësi. Një njeri që dikur u vinte firmën shkrimeve që shpifnin kundër UÇK-së duke e quajtur kriminale, nuk mund të fshihet sot pas pakujdesisë kur simboli i shtetësisë së Kosovës nëpërkëmbet nën autoritetin e tij. I njëjti përçmim, veçse i inskenuar brenda institucioneve që ekzistojnë falë atyre që ai ka fyer.

    Albin Kurti dhe LVV-ja nuk mund t’i lajnë duart nga kjo. Lartësuan figura të tilla dhe normalizuan armiqësinë ndaj themeleve të Republikës, duke e kthyer pushtetin institucional në strehë për ata që nuk u pajtuan kurrë me pavarësinë e Kosovës. Arroganca e tyre ndaj Luftës Çlirimtare është kthyer në arrogancë ndaj vetë shtetit.

    Organizata e Veteranëve të Luftës së UÇK-së, duke e dënuar këtë akt të poshtër, i kujton Qeverisë se pavarësia e Kosovës nuk është dekor. UÇK-ja nuk është material shpifjesh për oportunistët politikë që ndërtuan karrierë mbi varret e atyre që vetë i dënuan. Prokuroria e Shtetit duhet të nis hetimet. Basha duhet të sqarojë se në llogari të kujt i përdhos dokumentet me vlerë të posaçme shtetërore, e Kurti duhet të përgjigjet për kulturën antishtetërore që ka instaluar qëllimisht në qeveri.