Author: K.B.

Të huajt do mund të blejnë tokë bujqësore në Shqipëri, 7 vite pasi vendi të jetë anëtarësuar në Bashkimin Evropian.

Ministria e Bujqësisë dhe Zhvillimit Rural ka hedhur për konsultim publik projektligjin “Për kalimin në pronësi të tokës bujqësore tek personat fizikë dhe juridikë të huaj”: “Me miratimin e këtij projektligji synohet të krijohet një kuadër i qartë dhe i qëndrueshëm ligjor për kalimin në pronësi të tokës bujqësore te personat fizikë dhe juridikë të huaj, në mënyrë që të sigurohet përdorimi racional, zhvillimi i qëndrueshëm dhe rritja e investimeve në sektorin bujqësor të Republikës së Shqipërisë. Ky ligj synon të garantojë balancë mes interesit publik kombëtar dhe nxitjes së investimeve të huaja në bujqësi, duke mbrojtur tokën si pasuri dhe burim strategjik kombëtar”.

Veç qytetarëve, tokë bujqësore në Shqipëri do mund të blejnë edhe kompanitë e huaja:

“Filialet dhe degët e shoqërive komunitare gëzojnë gjithashtu të drejtën për të fituar dhe fituar të drejta pronësie mbi pasuritë e patundshme ashtu si shoqëritë shqiptare, si edhe për sa u përket të mirave publike me interes të përbashkët, kur këto të drejta konsiderohen të nevojshme për kryerjen e veprimtarive ekonomike për të cilat ato janë themeluar, duke përjashtuar burimet natyrore, tokat bujqësore, pyjet, tokat pyjore. Shtatë vjet pas hyrjes në fuqi të kësaj marrëveshje, Këshilli i Stabilizim-Asociimit do të vendosë modalitete për shtrirjen e te drejtave sipas këtij paragrafi dhe në sektorët e përjashtuar”.

Pas fitimit të pronësisë, projektligji përcakton se subjektet e huaja janë të detyruara “ta përdorin tokën vetëm për veprimtari bujqësore dhe blegtorale” dhe “të mos ndryshojnë kategorinë ose destinacionin e përdorimit të tokës bujqësore”:

“Sipas legjislacionit për ndarjen e tokës janë trajtuar me tokë bujqësore në pronësi rreth 445 mijë familje bujqësore. Relacion shpjegues për projektligjin “Për kalimin në pronësi të tokës bujqësore tek personat fizikë dhe juridikë të huaj. Në draftligjin e hartuar është parashikuar dhe kalimi i se drejtës së pronësisë për personat fizike dhe juridike të huaj për tokën bujqësore të emërtuar si “ tokë bujqësore e pandarë”, që aktualisht në vendin tonë shtrihen në një sipërfaqe prej rreth 100 mije ha, kaluar në administrim të njësive të pushtetit vendor”.

Në rast të mosrespektimit të detyrimeve, autoritetet kompetente “kanë të drejtë të marrin masa sipas legjislacionit në fuqi, përfshirë revokimin e së drejtës së pronësisë ose vendosjen e sanksioneve administrative”.

Projektligji përcakton se procedurat, afatet dhe dokumentacioni për trajtimin e kërkesave do të përcaktohen me vendim të Këshillit të Ministrave./A2CNN

Mekanizmi Ndërkombëtar për Gjykatat Penale (ish-Tribunali i Hagës) ia ka hedhur poshtë përsëri kërkesën Ratko Mlladiqit për lirimin të përkohshëm nga burgu për arsye shëndetësore, ku ai po e vuan dënimin për krime të luftës.

Mlladiq, ish-komandant i Ushtrisë së Republikës Sërpska-entiteti serb i Bosnjës-u dënua në vitin 2021 me burgim të përjetshëm për gjenocid dhe krime lufte në Bosnje e Hercegovinë.

Mekanizmi tha të enjten se ekspertët e pavarur mjekësorë kanë konstatuar se Shërbimi Mjekësor i Njësisë së Paraburgimit të Kombeve të Bashkuara dhe spitali i burgut po e vëzhgojnë dhe trajtojnë në mënyrë adekuate gjendjen shëndetësore të Mlladiqit.

Shkëmb Manaj nga Lidhja Demokratike e Kosovës (LDK) ka bërë të ditur se për herë të dytë i janë drejtuar Njësisë për Hetimin e Krimeve Kibernitike të Policisë së Kosovës, për ndërmarrjen e veprimeve hetimore për ndërhyrjet në faqen e kryetarit të LDK-së dhe zyrtarëve tjerë të Lidhjes Demokratike të Kosovës!

Ndërsa ka thënë se këto sulme e cenojnë integritetin e procesit zgjedhor.

“Këto sulme e cenojnë integritetin e procesit zgjedhor sepse kanë për qëllim manipulimin e komunikimit publik, deformimin e përceptimit publik si dhe cenimin e sigurisë dhe të integritetit institucional. Ftojmë policinë dhe prokurorinë që të marrin masa të mënjehershme që të parandalojnë sulmet e koordinuara në komunikimin publik digjital”, ka thënë Manaj.

Kandidati për deputet nga radhët e PDK-së, Bekim Haxhiu, ka reaguar lidhur me ngjarjet e mbrëmshme në Skenderaj.

Përmes, një postimi në profilin e tij në rrjetin social Facebook, Haxhiu ka shkruar se ajo që ndodhi mbrëmë krijoi shqetësim të madh te qytetarët dhe hapi shumë pikëpyetje për kohën, mënyrën dhe motivet e veprimit të këtij pushteti në ikje, sidomos në prag të fushatës zgjedhore.

Sipas, tij dërgimi i forcave speciale atje nuk u pa thjesht si një aksion policor.

Postimi i plotë:

Mbrëmë në Skenderaj nuk u pa thjesht një aksion policor.

Ajo që ndodhi mbrëmë krijoi shqetësim të madh te qytetarët dhe hapi shumë pikëpyetje për kohën, mënyrën dhe motivet e veprimit të këtij pushteti në ikje, sidomos në prag të fushatës zgjedhore.

Pamjet e forcave speciale në zemër të Drenicës rikthyen kujtime të rënda për shumë qytetarë, kujtime që lidhen me periudhat më të dhimbshme të historisë sonë. Për këtë arsye, çdo veprim institucional duhet të jetë i matur, transparent dhe në shërbim të sigurisë së qytetarëve, e jo të perceptohet si presion politik apo demonstrim force.

Ofendimet, provokimet dhe tensionet e krijuara janë të dirigjuara nga mendësia përçarëse dhe diktatoriale e Albin Kurtit dhe Dejona Mihajlit.

Policia e Kosovës duhet të mbetet institucion profesional, i paanshëm dhe larg interesave partiake te pushtetit.

Drenica ka qenë dhe mbetet simbol i qëndresës dhe dinjitetit kombëtar. Historia ka treguar se çdo përpjekje për ta nënshtruar apo përçarë atë ka dështuar.

Organizata e Veteranëve të Luftës së UÇK-së ka mbajtur një takim urgjent ku, sipas tyre, aty u diskutua për “përkeqësimin e klimës së sigurisë” pas angazhimit të njësive speciale në një incident që e cilësuan si “zënkë të zakonshme e pa pasoja të rënda”.

OVL-UÇK tha se strukturat e sigurisë së Kosovës “ekzistojnë për të mbrojtur qytetarët dhe rendin kushtetues, e jo të marrin pjesë në shtetrrethime e ngjallje të frikës”.

Ata u bënë thirrje pjesëtarëve të Policisë së Kosovës që “të mos harrojnë se mandati i tyre buron nga Kushtetuta dhe ligjet, e jo nga urdhrat qeveritare në dobi të zbatimit të skenarëve të porositur nga Albini Kurti dhe banda e tij”.

“Të jemi të qartë. Strukturat e sigurisë së Republikës ekzistojnë për të mbrojtur qytetarët dhe rendin kushtetues, e jo të marrin pjesë në shtetrrethime e ngjallje të frikës. Me këtë rast u drejtohemi pjesëtarëve të Policisë të mos harrojnë se mandati i tyre buron nga Kushtetuta dhe ligjet, e jo nga urdhrat qeveritare në dobi të zbatimit të skenareve të porositura nga Albini Kurti dhe banda e tij”, thuhet në komunikatë.

Sipas komunikatës, “nëse uniforma e Kosovës kthehet në instrument për të vendosur tiraninë e regjimit, atëherë përpos urdhërdhënësve, përgjegjësia bëhet edhe personale”.

OVL-UÇK deklaroi gjithashtu se “në mbrojtje të lirisë, demokracisë e rendit kushtetues, me çdo mjet do të pengojmë secilin individ apo organizim politik që tenton të vendos diktaturën”.

Organizata theksoi se “diktatura mori fund në qershor të vitit 1999” dhe shtoi se janë “të gatshëm gjithmonë të sakrifikohen në mbrojtje të lirisë dhe shtetit”.

“Kushdo që tenton ta vë këtë realitet në provë, le të urdhërojë. Këtu jemi. Të gatshëm gjithmonë të sakrifikohemi në mbrojtje të lirisë dhe shtetit që ka në themele mundin e luftëtarëve e gjakun e Dëshmorëve të UÇK-së”.

Komisionarja për Zgjerim e Bashkimit Europian, Marta Kos, shfrytëzoi vizitën e saj në Kosovë për t’i bërë thirrje spektrit politikë për të dalë nga ngërçi institucional dhe formimi i institucioneve stabile në mënyrë që vendi të ecë drejt BE’së.

“Thirrja ime e qartë në këtë vizitë është për të gjithë aktorët politikë për ta gjetur një mënyrë për ta kthyer stabilitetin institucional”, tha Kos në një konferencë të përbashkët për media me kryeministrin në detyrë, Albin Kurti.

Kos erdhi për herë të parë në Kosovë që nga marrja e postit më 2024. Ajo kishte planifikuar disa herë të vinte, por për shkak të zhvillimeve politike në vend, kishte shtyrë vizitën.

Por, sërish Kos erdhi në kohën kur vendi s’ka Kuvend, ndërsa Qeveria e Presidenca janë në detyrë. Ndërsa zgjedhjet e jashtëzakonshme do të mbahen në qershor.

Kos tha se shumë reforma kanë ngecur për shkak të përsëritjes së zgjedhjeve dhe Kosova duhet ta zërë hapin pas një vitit të humbur më 2025.

“Është e rëndësishme që pasi të bëhet Kuvendi i ri, liderët politikë në Kosovë të bashkohen dhe t’i themelojnë të gjitha institucionet, përfshirë zgjedhjen e presidentit të ri përmes kompromisit dhe t’i japin fund këtij ngërçi të gjatë institucional”, tha ajo.

Kos në konferencë tha se në Europë s’ka siguri pa Kosovën dhe tha se vendi ka perspektivë europiane, por se duhet të tregohet e suksesshme në zbatimin e reformave dhe në dialogun me Serbinë.

Një sistem i fuqishëm atmosferik po shkakton ndryshime të mëdha në motin mbi Evropë, duke sjellë ajër të ftohtë nga veriu drejt jugut që krijon kushte për një periudhë me mot ekstrem në disa rajone, paralajmëron shërbimi meteorologjik Severe Weather Europe.

Sipas parashikimeve, përplasja e masës së ftohtë me ajrin e ngrohtë dhe të lagësht mbi Mesdhe po krijon kushte të favorshme për stuhi të forta, përfshirë edhe supercelulare, breshër të madh dhe përmbytje lokale.

Zonat më të rrezikuara përfshijnë Italinë veriore, bregdetin e Adriatikut dhe pjesë të Ballkanit perëndimor, ku priten stuhi të organizuara dhe reshje intensive shiu, sidomos në zonat malore.

Meteorologët theksojnë se ndryshimet janë nxitur nga një sistem me presion të lartë mbi Atlantikun e Veriut, i cili ka lejuar depërtimin e masave të ftohta drejt Europës qendrore dhe jugore.

Kjo ka sjellë formimin e një cikloni të fuqishëm që po ndikon në uljen e ndjeshme të temperaturave.

Në disa rajone të Evropës perëndimore dhe jugperëndimore, temperaturat pritet të bien deri në 10–14°C nën mesataren sezonale, ndërsa mëngjeset mund të sjellin temperatura pranë zeros dhe rrezik ngricash. Edhe gjatë ditës, vlerat termike do të mbeten dukshëm më të ulëta se normalja.

Sipas parashikimeve, në Alpe priten edhe reshje dëbore deri në 50 centimetra, ndërsa në disa zona të Ballkanit dhe Italisë mund të regjistrohen mbi 100–150 mm reshje shiu brenda disa ditësh.

Megjithatë, meteorologët parashikojnë se situata do të fillojë të ndryshojë gjatë javës së ardhshme, kur pritet dobësimi i sistemit të ftohtë dhe rikthimi gradual i temperaturave më të larta, madje edhe mundësia e një vale të re të motit të ngrohtë drejt fundit të muajit. /Telegrafi

Kreu i LVV’së, Albin Kurti, në konferencën e sotme për media ka folur edhe për incidentin e ndodhur në Skenderaj ku ka mbetur i lënduar zv.ministri Hysni Mehani.

Kurti në konferencën e përbashkët me Marta Kos ka kritikuar Prokurorinë dhe policinë se janë vonuar në reagim.

Ai gjithashtu ka pasur paralajmërime ndaj Prokurorisë e Gjykatës, duke thënë se do të presë e të shoh se çfarë ndëshkimi do të kërkohet e çfarë dënimi do të jepet për rastin në Skenderaj, meqë për aktivistë të VV-së për statuse në fejsbuk janë shqiptuar dënime me burgim nga një vit e gjysmë.

“S’mund të ketë asnjë individ e asnjë grup që sfidon suksesshëm shtetin, e shteti është tërësia e ligjit.

“Në lokalin në Skenderaj, ku është rrahur e përgjakur Hysni Mehani, kandidat për deputet, ka kamera dhe ka shumë dëshmitarë. Meqë mora vesh dy veta janë arrestuar. Për përshtypjen time, reagimi i policisë dhe prokurorisë është i vonuar. S’e di çfarë ka ndodhur pas mesnatës, por e di që reagimi është dashur të jetë më i shpejt. Aktivistët e VV-së për statusa në fejsbuk janë dënuar me nga një vit burg, ta shohim tash Prokuroria për ata që marrin gotë e përgjakin zv.minsitra, çfarë ndëshkimi do të kërkojë e çfarë dënimi do të japë gjyqësori”, ka thënë Kurti.

Ish-deputeti i Lidhjes Demokratike të Kosovës, Arben Gashi, ka reaguar pas zhvillimeve të mbrëmshme në Skenderaj.

Ai ka kritikuar qasjen e pushtetit ndaj institucioneve të drejtësisë dhe përdorimin e njësive speciale policore në Skenderaj.

“Kjo nuk është politika që i duhet Kosovës. Nuk është lidership kur Kryeministri refuzon të paraqitet para drejtësisë. Nuk është lidership kur një kryetar komune shmang përgjegjësinë për të dëshmuar mbi një incident. Mbi çdo funksion, mbi çdo pozitë dhe mbi çdo emër politik, duhet të qëndrojë Republika dhe ligji i saj”, u shpreh ai.

Komisionerja për Zgjerim e BE’së, Marta Kos, tha se Kosova është pjesë e një tabloje më të madhe dhe se s’mund të ketë siguri në Europë pa të.

Në një konferencë të përbashkët për media me kryeministrin në detyrë, Albin Kurti, ajo tha se kanë folur për procesin e zgjerimit.

“Jeni sot në një moment kritik. E para, jeni para zgjedhjeve. E dyta është se, kur kemi folur sot për procesin e zgjerimit nga një perspektivë më e gjerë, ajo që po përjetojmë sot në procesin e zgjerimit është përparimi dhe, për herë të parë pas zgjerimit të fundit në vitin 2013 me Kroacinë, ekzistojnë perspektiva reale që në vitet e ardhshme do të kemi shtete të reja anëtare. Ky proces i anëtarësimit është shtyrë përpara edhe për shkak të aspektit të sigurisë. Dhe kur kemi diskutuar për rolin e Kosovës në këtë, nuk mund të ketë siguri në Evropë pa Kosovën. Kosova është pjesë integrale e një tabloje më të madhe, arsye pse zgjerimi sot është shumë më tepër sesa thjesht zgjerim. Ka të bëjë me kujdesin për sigurinë në Evropë, me të qenit bashkë, me bashkëpunimin rajonal që e përmendët edhe ju, dhe sigurisht edhe përmes integrimit në Bashkimin Evropian”, tha ajo.

Prandaj, Kos tha se një nga detyrat e saj më të mëdha është të kujdeset për një integrim “shumë më të fuqishëm” të Kosovës në Bashkimin Europian.