Author: K.B.

Kreu i Qeverisë së Kosovës, Albin Kurti, në konferencë për media ka folur për deklaratën e kryediplomates, Kaja Kallas, se është dakorduar një takim i nivelit të lartë me presidentin serb, Aleksander Vucic.

Kurti pa treguar nëse është dakorduar apo jo, ka renditur tri kushtet e tij për t’u takuar me Vuçiqin, ku përfshihen dorëzimi i Radojiçiqit, tërheqja e letrës së Bërnabiqit dhe nënshkrimit të marrëveshjes Ohër-Bruksel.

“Radojcici duhet t’iu dorëzohet autoriteteve të Kosovës. Ka aktakuzë 160 faqesh bashkë me 44 paramilitarë terroristë që na e vranë Afrim Bunjakun. Radojcic jo vetëm që është i lirë, por edhe aktiv në politikë. Ai atje është pjesë e projektit për ta shkatërruar opozitën demokratike dhe vazhdon kërcënimet ndaj opozitës”, ka deklaruar ai

“Letra që e ka lexuar dhe dorëzuar para 27 -shes së BE-së, Ana Brnabiq, ku thotë se nuk e respekton integritetin territorial, duhet të hiqet”, ka theksuar ai.

“Vazhdoj të insistoj se ajo duhet të nënshkruhet, sepse nënshkrimi nga liderët paraqet kredibilitet, sepse tregon besueshmëri mes palëve. Këto tri masa të mirëbesimit për të vazhduar dialogu, qëndrojnë edhe më tutje”, ka deklaruar Kurti.

Komisioni Qendror i Zgjedhjeve (KQZ) nesër do të mbajë tërheqjen e shortit për përcaktimin e renditjes së subjekteve politike në fletëvotimin e zgjedhjeve të parakohshme për Kuvendin e Kosovës, të cilat do të mbahen më 7 qershor 2026.

Lajmi është konfirmuar për RTK nga zëdhënësi i KQZ-së, Valmir Elezi, i cili ka bërë të ditur se procesi i tërheqjes së shortit për caktimin e numrave rendorë të subjekteve politike është planifikuar të zhvillohet më 16 maj.

Një ditë më parë, KQZ ka mbajtur mbledhjen e radhës, ku është certifikuar pjesëmarrja në zgjedhje e katër prej pesë subjekteve të reja politike që kishin aplikuar gjatë periudhës 2–10 maj 2026. Bëhet fjalë për tri koalicione dhe një kandidat të pavarur.

Subjektet e certifikuara janë: Lëvizja Vetëvendosje, Koalicija Vakat, Ashkalitë e Bashkuar, si dhe kandidati i pavarur Esmir Kasi.

Ndërkohë, KQZ ka refuzuar certifikimin e dy subjekteve politike, Složno Pobeđujemo (nismë qytetare) dhe SDA – Stranka Demokratske Akcije, pasi nuk kanë arritur të plotësojnë kriterin ligjor prej 1000 nënshkrimeve të kërkuara për certifikim.

Pas vendimeve të fundit të KQZ-së, në zgjedhjet e 7 qershorit 2026 do të marrin pjesë gjithsej 3 koalicione, 17 parti politike dhe 1 kandidat i pavarur.

Koalicionet pjesëmarrëse janë: LVV, Ashkalitë e Bashkuar dhe Koalicija Vakat.

Ndërsa partitë politike pjesëmarrëse janë: Partia Demokratike e Kosovës (PDK), Lidhja Demokratike e Kosovës (LDK), Aleanca për Ardhmërinë e Kosovës (AAK), KNRP, PSA, Za Slobodu Pravdu i Opstanak, Srpska Lista, Fjala, Lëvizja Përparimtare e Romëve të Kosovës, Partia Rome e Bashkuar e Kosovës (PREBK), Socijaldemokratska Unija (SDU), Jedinstvena Goranska Partija, Kosova Demokratik Türk Partisi (KDTP), Nova Demokratska Stranka, Partia Liberale Egjiptiane, Iniciativa e Re Demokratike e Kosovës (IRDK) dhe PSD.

Kandidat i pavarur në këto zgjedhje është Esmir Kasi.

Kryeministri në detyrë, Albin Kurti, ka premtuar rritje të shtesave për fëmijë nga 60 deri në 90 euro dhe rritje të mbështetjes për lehonat deri në 500 euro në muaj gjatë mandatit të ardhshëm.

Në tryezën e organizuar nga Ministria për Punë, Familje dhe Vlerat e Luftës Çlirimtare në shënimin e Ditës Ndërkombëtare të Familjes, Kurti tha se mbi 400 mijë fëmijë kanë përfituar nga shtesat për fëmijë, ndërsa mbi 80 mijë nëna nga shtesat për lehona.

“Politika për familjen dhe mirëqenien e saj. Kështu mbase do të ishte përshkrimi më i saktë dhe më i shkurtër i qeverisjes sonë në shënimin e Ditës Ndërkombëtare të Familjes, sepse ajo, pra familja, është trajtuar jo si diçka e ndarë dhe jashtë kontekstit zhvillimor, por në tërësinë e politikave sektoriale dhe në kuadër të gjerë të vendimmarrjes. Për të zbërthyer këtë, më lejoni të përmend disa prej punëve, shumë prej të cilave në sektorë të ndryshëm, por që të gjitha në qendër e kanë familjen”.

“Për herë të parë në Kosovës kemi nisur me aplikimin e shtesave nga të cilat kanë përfituar mbi 400.000 fëmijë. Kur nisem me 10 dhe 20 euro – pati tallje e përqeshje për një politikë të këtillë. E sot çdo familje që plotëson kushtet merr shtesa prej 30 deri 45 euro, varësisht nga numri i fëmijëve. Ndërkaq zotimi ynë është që në mandatin tjetër, të cilin e synojmë edhe një herë, shtesat për fëmijë t’i dyfishojmë 60 deri në 90 euro”, tha ai.

“Paralelisht me këtë kemi filluar me shtesat për lehonat, nga të cilat kanë përfituar më shumë se 80 mijë nëna. Njësoj sikurse për fëmijët, edhe këtu i patëm gjetur zero. Nisi me 170 euro muaj, aktualisht janë 325.9 euro, por me synimin që ato të ngritën në 500 euro në muaj”, tha ai.

Në mbledhjen e 366-të të Këshillit Gjyqësor të Kosovës (KGJK), propozimi i të anëtarit Fahret Vellija që në rend dite të futet shpallja e konkursit për zëvendëskryesues nxiti debat mes anëtarëve.

Fillimisht, anëtari Vellija tha se nuk duhet të përsëritet gabimi që e kanë bërë si Këshilli me pozitën e kryesuesit. Propozoi që të shpallet konkursit për zëvendëskryesues me qëllim që kjo pozitë të mos mbete vakante, raporton “Betimi për Drejtësi”.

“Gabimi që e kemi ba me kryesuesin mos ta bëjmë me zëvendëskryesuesin”, tha Vellija.

Më pas, anëtari tjetër- Artan Abazi tha se duhet të kemi parasysh Rregulloren për zgjedhjen e kryesuesit dhe zëvendëskryesuesit, ku specifikohet se pozitat plotësohen 30 ditë pasi që ato të mbesin të lira.

Abazi bëri thirrje që Këshilli të mos shkel rregulloret e veta, duke thënë se e kanë shkelur tashmë Rregulloren për zgjedhjen e anëtarëve të KGjK-së nga gjykata themelore.

“Nuk duhet për herë të dytë me shkel rregulloren. Rregullorja po thotë 30 ditë pasi të mbetet vakant duhet të hapet e jo 30 ditë para dhe cili e çon dorën me shkel rregulloren, e shkelin rregulloren”, tha Abazi.

Më pas, fjalën e mori anëtari Besnik Bislimaj, duke thënë se nuk mund t’i faturohet shkelja e rregullores për mosshpallje të konkursit për anëtar të KGJK-së dështimit të takimeve, pasi që në rend dite nuk ka qenë asnjëherë në ato takime propozimi për shpalljen e konkursit.

Edhe anëtari tjetër, Rrustem Thaqi tha se pozita e zëvendëskryesuesit është e plotësuar dhe se aktualisht zëvendëskryesuesja ka mandat dhe se nuk ka nguti që kjo pozitë të plotësohet.

Më pas, Vellija pyeti se çka nëse përfundon mandati i zëvendëskryesueses dhe se Këshilli dështon sërish ta zgjedh kryesuesin, duke shtuar se do të mbetet Këshilli i pafunksionalizuar.

Ndërkaq, Thaqi tha se kjo nuk qëndron si arsyetim pasi që mbledhjet udhëhiqen nga anëtari më i vjetër në rast se pozita e zëvendëskryesuesit mbetet e lirë.

Anëtari Abazi gjatë diskutimeve tha se Këshilli është penguar në punën e tij, duke munguar anëtarët vazhdimisht në mbledhje. Tha ase natyrshëm mendon se edhe te pjesa e propozimit për zëvendëskryesues ka diçka mbrapa propozimit.

“Unë gjithëherë flas tu u nis nga faktet, prova dhe provoja, tu e pas faktin e pengesës së mbajtjes së mbledhjes së Këshillit Gjyqësor në vazhdimësi, të një fakti të njëjtë pa ndryshu fakti fare, sëmundje, sëmundje- më çon me mendu se apet ka diçka mbrapa dhe mendoj se ka prapavijë edhe kjo sepse ka prapavijë edhe kjo. Askush s’mundet me thanë se ka diçka të paimagjinueshme”, u shpreh Abazi.

Në anën tjetër, anëtari Fidan Hoxha propozoi që t’i drejtohen Zyrës Ligjore për konsultim lidhur me pikën për shpalljen e konkursit për zëvendëskryesues.

Më pas, anëtari tjetër, Bashkim Hyseni tha se në rast se vazhdimisht diskutohet, do të mbesin tërë ditën duke propozuar që të hidhet direkt në votim propozimi i anëtarit Vellija, propozim ky që mori përkrahje me gjashtë vota për dhe pesë kundër, që në rend dite të jetë shpallja e konkursit për zëvendëskryesues.

Mbledhja po vazhdon me dyer të mbyllura, ndërkaq në orën 12:00 pritet të hapet.

Me dyer të mbyllura po trajtohen rastet disiplinore: Shqyrtimi i raportit mbi faktet dhe provat e mbledhura për rastin disiplinor Nr: AD/KGJK/01/2026/GJKK-AD.GJKK.nr.01/2026; Shqyrtimi i ankesës Nr.01/602, të datës 14 prill 2026; Shqyrtimi i ankesës Nr.01/560, të datës 17 mars 2026; Shqyrtimi i kërkesës të datës 12 maj 2026, si dhe Shqyrtimi i ankesës së datës 5 maj 2026.

Anëtari i LVV’së, Driton Hyseni, ka treguar arsyet se pse nuk është në listën e kandidatëve për deputet për zgjedhjet e 7 qershorit.

Ai ka thënë se ky është një vendim që e ka marrë në koordinim me kreun e partisë, Albin Kurtin, meqë do të angazhohet në kuadër të pushtetit ekzekutiv.

Postimi i plotë:

Të dashur qytetarë të Republikës sonë,

të nderuar bashkatdhetarë në mërgatë,

dhe ju miq që më keni qëndruar pranë në çdo rrugëtim politik,

Ju njoftoj se, në koordinim me Kryeministrin e vendit, z. Albin Kurti, kemi vendosur që angazhimi im të vazhdojë në kuadër të pushtetit ekzekutiv të Republikës së Kosovës, si vijimësi e rrugëtimit dhe betejave tona të përbashkëta për Kosovën, që nga viti 1998, kur ishim bashkë në shërbim të Zyrës së Përfaqësuesit Politik të Ushtrisë Çlirimtare të Kosovës, të Bacës Adem.

Dua të shpreh mirënjohjen time të thellë për secilin prej jush, për mbështetjen, konsideratën, besimin dhe vlerësimin që i keni dhënë Lëvizjes Vetëvendosje dhe mua personalisht gjatë kandidimeve në tri palë zgjedhje. Ju jam përjetësisht mirënjohës!

Jam përpjekur me gjithë dijen dhe mundësitë e mia që, me devotshmëri e besnikëri të ju përfaqësoj në Kuvendin e Republikës. Shpresoj t’ia kem dalë t’i përmbush pritjet tuaja.

Për Republikën tonë, do të jem gjithmonë aty ku kërkohen puna dhe përkushtimi për t’i shërbyer vendit.

Suksese Lëvizjes sonë të madhe dhe të gjithë kandidatëve të saj në zgjedhjet e 7 qershorit.

Pas trajtimit mjekësor në Spitalin e Përgjithshëm të Mitrovicës, kryetari i degës së LVV-së në Skenderaj, Hysni Mehani është liruar në shtëpi.

Lajmin për lirimin e Mehanit e ka bërë të ditur zyra për media e Spitalit të Përgjithshëm të Mitrovicës.

Mehani pranoi trajtim mjekësor në Spitalin e Përgjithshëm në Mitrovicë të enjten si pasojë e plagëve të shkaktuara nga një sulm fizik në qendër të Skenderajt në mesditë.

Dy persona u ndaluan për 48 orë nën dyshimet për sulmin ndaj Mehanit, konfirmoi Prokuroria e Mitrovicës të enjten.

Sipas njoftimit të Prokurorisë, të dyshuari me inicialet E.L dhe B.N janë ndaluar për 48 orë, nën dyshimet për kryerjen e veprës penale “Lëndimi i lehtë trupor”.

“Janë intervistuar në cilësinë e viktimave H.M., dhe B.Z., pesë (5) dëshmitarë si dhe dy (2) të dyshuar me iniciale E.L., dhe B.N., të cilët me vendim të prokurorit janë dërguar në mbajtje për dyzetë e tetë (48) orë, me dyshimin për kryerjen e veprës penale “Lëndimi i lehtë trupor”, thuhet në njoftimin e Prokurorisë.

Nënkryetari i Komunës së Skenderajt, Fadil Nura, ka deklaruar në konferencë për media se kryetari i komunës, Sami Lushtaku, do t’i përgjigjet ftesës së Prokurorisë sapo ajo të pranohet zyrtarisht.

Ai ka theksuar se deri më tani nuk ka pasur ftesë zyrtare për institucionin dhe se janë të gatshëm të bashkëpunojnë me organet e drejtësisë sapo të ndiqen procedurat ligjore.

“Përndryshe ftesë zyrtare ende nuk kemi si institucion. Jemi duke e prit. Në momentin që e kemi ftesën zyrtare, sigurisht që zoti Lushtaku do t’i përgjigjet…”, ka thënë Nura.

Ndërkohë, Prokuroria Themelore e Mitrovicës ka bërë të ditur se disa persona të përfshirë në rast nuk i janë përgjigjur ftesës për intervistim, përfshirë edhe kryetarin e Skenderajt, Sami Lushtaku, sipas njoftimit zyrtar.

Nura ka komentuar gjithashtu edhe reagimet politike pas incidentit, duke thënë se gjuha e përdorur nga përfaqësues të Lëvizja Vetëvendosje është e papranueshme dhe e tensionuar. /RTV Dukagjini/

Kryeministri në detyrë i Republikës së Kosovës, Albin Kurti, ka pritur në takim Komisioneren e Bashkimit Evropian për Zgjerim, Marta Kos, raporton Ekonomia Online.

Takimi është duke u zhvilluar në objektin e qeverisë.

Pas takimit Kurti dhe Kos do të kenë konferencë të përbashkët për media.

Kos sot gjatë ditës është takuar edhe me Ushtruesen e Detyrës së Presidentes së Republikës së Kosovës, Albulena Haxhiu.