Author: K.B.

Sallamë me mish derri iu shërbye pasagjerëve në një fluturim deportimi nga Irlanda për në Pakistan, është bërë e ditur.

Burrave, nga ky vend me shumicë myslimane, iu ofrua një mëngjes tradicional irlandez gjatë fluturimit nga Dublini në Islamabad vitin e kaluar, gjë që u përshkrua si “e papërshtatshme” në raportin e një monitoruesi të të drejtave të njeriut.

Disa nga pasagjerët gjithashtu u ankuan se po filmoheshin nga policia dhe se bagazhet e tyre kishin humbur.

24 burrat u mbajtën në tre burgje të ndryshme në Irlandë natën para fluturimit. Dy prej tyre u konsideruan me rrezik të lartë për shkak të shkeljeve të mëparshme, raporton The Telegraph.

Sipas monitorit të të drejtave të njeriut për fluturimin, i emëruar nga qeveria irlandeze, “cilësia e ushqimit ishte e ulët” dhe servirja e “sallameve të mishit të derrit si pjesë e një mëngjesi të plotë irlandez ishte e papërshtatshme”.

Megjithatë, raporti i tyre gjeti se operacioni “në përgjithësi” ishte kryer në mënyrë humane, me respekt për “të drejtat dhe dinjitetin e të deportuarve”.

Megjithatë, kompania e aviacionit Air Partner, që organizon fluturimet në emër të qeverisë irlandeze, e ndryshoi menunë pas raportit.

Fluturimi kushtoi më shumë se 400 mijë paund.

Fluturimi charter, që kushtoi 473 mijë euro (410 mijë paund), ishte pjesë e goditjes më të gjerë të Irlandës kundër emigracionit të paligjshëm.

Qeveria e vendit gjithashtu organizoi tre fluturime deportimi – drejt Gjeorgjisë, Nigerisë dhe Rumanisë – në vitin 2025, me një kosto totale për taksapaguesit irlandezë prej afërsisht 1.1 milion eurosh.

Të paktën 205 emigrantë të paligjshëm dhe kriminelë u deportuan me këto fluturime, sipas departamentit irlandez të drejtësisë.

Sipas ligjit irlandez për emigracionin, azilkërkuesve u ofrohen deri në 10 mijë euro për t’u kthyer vullnetarisht në vendin e tyre të origjinës.

Nëse një person ose familje nuk largohet pasi i është lëshuar një urdhër deportimi, ata mund të largohen me forcë, përfshirë edhe me fluturime charter.

Jim O’Callaghan, ministri irlandez i drejtësisë, la të kuptohej se do të ishte i hapur për transferimin e azilkërkuesve të refuzuar në qendra jashtë BE-së për përpunim.

Kryeministri i Shqipërisë, Edi Rama, është takuar me homologun e tij të Koresë së Jugut, Kim Minseok.

Përmes një postimi në Facebook, Rama tha se në këtë takim u fol për 35-vjetorin e vendosjes së marrëdhënieve diplomatike ndërmjet dy vendeve.

Pos tjerash, sipas kryeministrit shqiptar, në takim u diskutua edhe për ngjashmëritë e historive të dy vendeve dhe bashkëpunimin e mëtejshëm, me fokus teknologjinë, Inteligjencën Artificiale dhe turizmin.

Instituti i Kosovës për Drejtësi (IKD) ka dorëzuar padi në Gjykatën Administrative të Republikës së Kosovës kundër Kuvendit të Republikës së Kosovës, përmes së cilës ka kërkuar anulimin e Vendimit Nr.10-V-276/1, të datës 27 prill 2026, lidhur me ndërprerjen para kohe të mandatit të Komisionit për dhënien e Provimit të Jurisprudencës.

Përmes kësaj padie, IKD kundërshton mënyrën se si Kuvendi ka ndërprerë mandatin e Komisionit për Provimin e Jurisprudencës, i cili sipas Ligjit Nr. 08/L-033 për Provimin e Jurisprudencës kishte mandat trevjeçar deri më 15 dhjetor 2026.

Në padi thuhet se vendimi i Kuvendit është i kundërligjshëm dhe arbitrar, pasi që përmes tij është shfuqizuar vendimi paraprak për emërimin e Komisionit dhe është zëvendësuar e tërë përbërja e tij pa asnjë bazë të qartë ligjore, pa procedurë të rregullt dhe pa arsyetim juridik.

Sipas IKD-së, Ligji për Provimin e Jurisprudencës i jep Kuvendit kompetencë vetëm për emërimin e anëtarëve të Komisionit, por nuk parasheh kompetencë për ndërprerjen e mandatit të tyre para kohe. Në padi theksohet se mungesa e dispozitave ligjore për shkarkim apo ndërprerje të mandatit nuk mund të interpretohet si autorizim për ndërhyrje arbitrare në mandatin e një organi të pavarur profesional.

Specifikisht, në padi ndër të tjera potencohet se “kompetenca për emërim nuk e përfshin automatikisht edhe kompetencën për ndërprerje të mandatit para kohe. Sikur ligjvënësi të kishte synuar t’i jepte Kuvendit të drejtën për shkarkimin apo zëvendësimin e përbërjes së Komisionit gjatë mandatit, këtë do ta kishte përcaktuar shprehimisht në ligj duke përcaktuar bazat, procedurën dhe standardet për ushtrimin e kësaj kompetence. Kjo qasje është ndjekur në legjislacionin që rregullon organe të tjera të pavarura”.

Po ashtu, IKD në padi ka theksuar se vendimi i kontestuar nuk përmban asnjë arsyetim lidhur me nevojën për ndërprerjen e mandatit të Komisionit ekzistues, nuk identifikon asnjë shkelje konkrete nga ana e anëtarëve të Komisionit dhe nuk jep asnjë shpjegim mbi bazën ligjore që ka shërbyer për zëvendësimin e tij para përfundimit të mandatit ligjor.

Në këtë drejtim, IKD konsideron se vendimi i Kuvendit është nxjerrë edhe në kundërshtim me Ligjin për Procedurën e Përgjithshme Administrative, pasi mungon arsyetimi juridik dhe faktik i aktit administrativ, duke cenuar parimet e ligjshmërisë, sigurisë juridike dhe pritshmërive legjitime.

Për më tepër, IKD në padi ka theksuar se kjo mënyrë e veprimit krijon precedent të rrezikshëm institucional, pasi nënkupton se mandatet e organeve profesionale të emëruara me ligj mund të ndërpriten në çdo kohë pa kritere të qarta ligjore dhe pa procedurë të rregullt.

IKD gjithashtu ka rikujtuar standardin e vendosur nga Gjykata Kushtetuese në rastin KO127/21, lidhur me shkarkimin e anëtarëve të Këshillit të Pavarur Mbikëqyrës për Shërbimin Civil të Kosovës, sipas të cilit mandatet e organeve të pavarura nuk mund të ndërpriten në mënyrë kolektive dhe pa arsyetim konkret individual.

Në padi, IKD ka vlerësuar se Provimi i Jurisprudencës paraqet mekanizëm me rëndësi të veçantë për sistemin e drejtësisë, pasi ndikon drejtpërdrejt në vlerësimin profesional të juristëve që synojnë ushtrimin e funksioneve kyçe në sistemin gjyqësor dhe juridik në Republikën e Kosovës. Për këtë arsye, sipas IKD-së, përbërja dhe funksionimi i Komisionit duhet të mbështeten në parimet e pavarësisë, stabilitetit institucional dhe ligjshmërisë.

Përmes kësaj padie, IKD i ka propozuar Gjykatës Administrative që ta aprovojë padinë si të bazuar dhe ta anulojë Vendimin Nr.10-V-276/1 të Kuvendit të Republikës së Kosovës si të kundërligjshëm.

Kryetari i Partisë Demokratike të Kosovës dhe kandidati për Kryeministër, Bedri Hamza, gjatë vizitës në familjen Hyseni në Vushtrri, tha se qytetarët e Kosovës po përballen me vështirësi të mëdha ekonomike dhe sociale, pavarësisht vullnetit të tyre për punë dhe jetë me dinjitet.

Hamza theksoi se vizitat nëpër familje anekënd Kosovës po nxjerrin në pah të njëjtat shqetësime: rritjen e çmimeve, tatimet e larta, pagat e pamjaftueshme dhe shpenzimet e mëdha për shëndetësinë që paguhen nga vetë qytetarët.

“Edhe në familjen Hyseni në Vushtrri dëgjova të njëjtat halle që sot i kanë shumë qytetarë: çmime dhe tatime të larta, paga të pamjaftueshme dhe shpenzime të mëdha për shëndetësinë që paguhen nga xhepi i tyre”, deklaroi Hamza.

Ai shtoi se Kosova nuk mund të ecë përpara kur shumë familje mezi arrijnë ta përballojnë muajin dhe kur qytetarët ndihen të lënë pas dore nga institucionet.

Sipas Hamzës, qytetarët kanë nevojë për një shtet që merret me jetën reale të njerëzve, me mirëqenien, zhvillimin ekonomik dhe sigurinë sociale, e jo me propagandë dhe kriza të pafundme politike.

“Me qeverinë tonë, ndryshimi i shumëkërkuar do të vijë për çdo familje të Kosovës”, theksoi Hamza.

Kosova është tronditur nga një video-investigim i publikuar nga emisioni “Piranjat”, ku pretendohet për ngacmim seksual ndaj një të miture 17-vjeçare nga drejtori i shkollës “Pjetër Bogdani” në Demjan të Gjakovës, Nazmi Pnishi. Rasti ka nxitur reagime të ashpra nga organizata dhe qytetarë, ndërsa Rrjeti i Prindërve Edukues të Kosovës ka kërkuar veprime urgjente nga institucionet përgjegjëse.

Në reagimin publik të kësaj organizate thuhet se veprimet e pretenduara të drejtorit përbëjnë “një akt të turpshëm dhe kriminal”, duke theksuar se një person i ngarkuar me edukimin dhe sigurinë e nxënësve nuk mund të abuzojë me pozitën e tij në dëm të fëmijëve.

Sipas deklaratës, shqetësues mbetet edhe fakti se ngjarja dyshohet të ketë ndodhur brenda ambienteve të shkollës, ndërsa organizata kritikon mungesën e reagimit institucional nga niveli lokal dhe qendror.

“Heshtja e institucioneve është bashkëfajësi”, thuhet në reagim, ku përmendet edhe pretendimi se personi në fjalë mburret me mbështetje politike. Rrjeti i Prindërve Edukues e konsideron të papranueshme mosndërmarrjen e masave të menjëhershme për largimin e tij nga sistemi arsimor dhe hetimin e rastit, transmeton Klankosova.tv

Organizata i ka bërë thirrje Prokurorisë së Shtetit që të nisë menjëherë hetimet dhe procedurat penale ndaj drejtorit, ndërsa nga Komuna e Gjakovës është kërkuar shkarkimi i tij i menjëhershëm nga çdo funksion publik dhe edukativ.

Po ashtu, janë paraqitur disa kërkesa konkrete për rritjen e sigurisë në shkolla, përfshirë vendosjen e kutive anonime të ankesave në çdo shkollë, krijimin e një platforme digjitale kombëtare për raportimin e abuzimeve dhe kryerjen e vlerësimeve psikologjike e etike periodike për mësimdhënësit dhe drejtuesit e institucioneve arsimore.

Në fund të reagimit, organizata u ka bërë thirrje prindërve që të flasin hapur me fëmijët e tyre për raste të mundshme abuzimi, ndërsa nxënësit janë inkurajuar të raportojnë çdo sjellje të papërshtatshme apo kërcënuese.

“Shkolla duhet të jetë vendi më i sigurt për një fëmijë pas shtëpisë së tij. Ne nuk do të lejojmë që politika apo indiferenca institucionale të mbrojë predatorët. Kërkojmë drejtësi, tani”, përfundon reagimi i Rrjetit të Prindërve Edukues të Kosovës.

Kryetari i Prizrenit, Shaqir Totaj ka kritikuar kryeministrin në detyrë, Albin Kurtin si dhe Lëvizjen Vetëvendosje, për mënyrën se si kanë ardhur në pushtet.

Përmes një postimi në Facebook, Totaj tha se pavarësisht premtimeve të mëdha që VV premtoi për ardhjen në pushtet, sipas kreut të Prizrenit, Kosova vazhdon të mbetet pothuajse vendi më i varfër në Evropë.

“Kosova sot nuk po kalon vetëm një krizë politike. Po kalon një krizë të besimit, të shpresës dhe të perspektivës. Qytetarët që dikur besuan se do të vinte një qeverisje ndryshe, sot përballen me një realitet krejt tjetër. Me varfëri më të madhe, me rritje të kostos së jetesës, me izolim politik dhe me një atmosferë të rëndë sociale ku gjithnjë e më shumë familje po humbin besimin se gjërat mund të ndryshojnë për mirë”.

“Kosova vazhdon të mbetet pothuajse vendi më i varfër në Evropë. Të rinjtë vazhdojnë ta shohin largimin si zgjidhje, bizneset po përballen me pasiguri, ndërsa qytetari i zakonshëm po e ndjen çdo ditë më shumë barrën ekonomike. Në mungesë të rezultateve konkrete, kjo qeveri ka zgjedhur propagandën si mënyrë mbijetese politike. Çdo kritik shpallet armik, çdo mendim ndryshe sulmohet, ndërsa dështimet tentohen të mbulohen me tensione dhe përçarje të vazhdueshme”, ka shkruar ai.

Pos tjerash, Totaj thotë se më e dhimbshmja është se janë luftuar pothuajse të gjitha proceset nëpër të cilat ka kaluar Kosova.

“Janë sulmuar njerëz, institucione dhe aleanca që kanë kontribuar në ndërtimin e shtetit tonë. Në vend të bashkimit dhe ndërtimit të besimit, është kultivuar fryma e konfliktit dhe arrogancës politike. Por shteti nuk ndërtohet me mllef dhe propagandë. Shteti ndërtohet me vizion, me përgjegjësi dhe me punë konkrete për qytetarin”.

“Kosova nuk ka nevojë për spektakël politik. Ka nevojë për lidership serioz, për zhvillim real, për partneritet me aleatët tanë strategjikë dhe për institucione që e vendosin interesin e qytetarit mbi interesin partiak. Qytetarët e Kosovës meritojnë më shumë se zhgënjim, stagnim dhe premtime të pambajtura”, tha ai.

Ambasadori britanik në Kosovë, Jonathan Hargreaves ka folur rreth takimit që pati të martën me kreun e Aleancës për Ardhmërinë e Kosovës, Ramush Haradinaj.

Ai përmes një postimi në Facebook ka deklaruar se pati një diskutim të mirë me të para zgjedhjeve të 7 qershorit.

“Ramush Haradinaj ka luajtur një rol të rëndësishëm në jetën politike të Kosovës gjatë shumë viteve, duke kontribuar në zhvillimin demokratik dhe institucionet e vendit.

Ndërsa Kosova ecën drejt zgjedhjeve, do të jetë e rëndësishme që partitë politike të angazhohen në mënyrë konstruktive dhe të punojnë së bashku më pas për të formuar një qeveri të qëndrueshme dhe për të siguruar zgjedhjen në kohë të një Presidenti. Progresi demokratik i Kosovës varet nga bashkëpunimi, dialogu dhe një angazhim i përbashkët për të ardhmen e vendit”, tha diplomati britanik.

Pesë vende të BE-së i kanë bërë thirrje Komisionit Evropian të rishqyrtojë mënyrën se si i përfshin anëtarët e mundshëm nga Ballkani Perëndimor në tregun e vetëm të bllokut, duke e paraqitur këtë si një mënyrë për t’i mbajtur aspirantët për anëtarësim larg sferës së ndikimit të Rusisë.

“Për të ruajtur vrullin e zgjerimit dhe për të çuar përpara integrimin evropian, nevojiten stimuj të fortë dhe tërheqës”, shkruan Austria, Republika Çeke, Italia, Sllovakia dhe Sllovenia në një dokument konfidencial që u qarkullua midis 27 vendeve të BE-së në Bruksel të premten e kaluar dhe u raportua për herë të parë nga Raportuesi

“Qasja e bazuar në meritë – nëse është e nevojshme, hap pas hapi – në tregun e vetëm evropian përfaqëson një nxitje të tillë”, shkruan vendet, të cilat janë pjesë e një klubi informal që mbështet politikisht aspiratat e Ballkanit Perëndimor për në BE.

Vendet e përshkruan modelin e tyre të propozuar si “integrim sistematik sektorial”. Ai do të përfshinte zgjerimin e gamës së programeve të BE-së në të cilat vende si Mali i Zi, Shqipëria, Maqedonia e Veriut dhe Serbia mund të marrin pjesë ndërsa ato përputhen, kapitull pas kapitulli, me rregulloren e Brukselit.

“Integrimi gradual … duhet të ndiqet në mënyrë aktive dhe sistematike pasi një kandidat demonstron një nivel të lartë përputhjeje me rregullat e BE-së në sektorin përkatës”, thuhet në dokument.

Gjithashtu, thuhet se duhet të përfshihen masa mbrojtëse në rast se një vend që gëzon akses të veçantë në tregun e BE-së rrëshqet prapa.

Dokumenti paraqet disa sektorë të rinj që mund të përfshihen, siç janë tregjet e transportit, energjisë dhe energjisë elektrike, tregu i vetëm dixhital, strategjitë e konkurrencës dhe politikat kritike të lëndëve të para. Ai gjithashtu citon marrëveshjen e lëvizshmërisë së të rinjve midis Mbretërisë së Bashkuar dhe BE-së si një shembull të një avantazhi që mund t’u ofrohet edhe vendeve të Ballkanit Perëndimor.

Megjithatë, për sa i përket ambicies, dokumenti nuk i plotëson idetë e propozuara nga Ferit Hoxha, ministri i jashtëm i Shqipërisë, në një intervistë me Euractiv javën e kaluar, në të cilën ai sugjeroi që vendet kandidate duhet të fitojnë statusin e vëzhguesit në organet e BE-së ndërsa mbyllin kapitujt.

Milan Nič, një bashkëpunëtor i lartë kërkimor në Këshillin Gjerman për Marrëdhëniet me Jashtë, nuk u impresionua nga përmbajtja e dokumentit, duke thënë se nuk largohej shumë nga konceptet e mëparshme.

“Tingëllon si një version pak më i sofistikuar i shtytjes së mëparshme për integrim gradual”, tha ai.

Autorët e dokumentit i bënë thirrje Marta Kos, komisioneres për zgjerimin, të dalë me ide të reja përgjatë këtyre linjave.

“Kjo qasje do të zgjeronte dhe forconte tregun e vetëm, duke kontribuar në rëndësinë gjeoekonomike dhe autonominë strategjike të BE-së, ndërkohë që do t’i afronte kandidatët dhe do të ndihmonte në kundërshtimin e ndikimit të vendeve të treta”, thuhet në dokument.

Në Pikën Kufitare në Jarinje është zbuluar një rasti i mosdeklarimit të mjeteve monetare.

Siç njofton Dogana e Kosovës, gjatë kontrollit të një automjeti të udhëtarëve janë gjetur mjete monetare të padeklaruara në vlerë totale prej 10,173.60 euro, përfshirë euro dhe dinarë serbë, të shpërndara në pjesë të ndryshme të automjetit dhe tek një person.

Në përputhje me dispozitat ligjore në fuqi, rasti është proceduar tek njësitë kompetente dhe është shqiptuar gjobë administrative.

Për rastin në fjalë është njoftuar hetuesia e doganës përmes të cilëve është njoftuar edhe Prokurori i shtetit, derisa shuma tjetër e mjeteve mbetet e ndaluar deri në përfundimin e hetimeve.