Nën patronatin e kryetarit të Lidhjes Demokratike të Kosovës, Lumir Abdixhiku, të enjten do të organizohet mbledhje komemorative në nderim të jetës dhe veprës së veprimtarit të shquar, anëtarit të Kryesisë, një prej themeluesve të LDK-së e bashkëpunëtorit të Presidentit Rugova, Alush Gashi.
Në njoftimin zyrtar theksohet se mbledhja komemorative mbahet nga ora 11:00, në Amfiteatrin e Pallatit të Rinisë (ish-ASK).
Gashi vdiq më 15 maj në moshën 75-vjeçare.
Filharmonia e Kosovës, në bashkëpunim me Korin dhe Orkestrën e Fakultetit të Arteve, do të mbajë një koncert në Mitrovicë më 21 maj 2026, në orën 19:30, në Qendrën e Kulturës “Rexhep Mitrovica”.
Koncerti, i titulluar “Skena Iuvenis”, do të realizohet nën dirigjimin e studentëve të drejtimit të dirigjimit dhe sjell në program vepra të rëndësishme të repertorit artistik. Në mbrëmje do të interpretohet premiera e veprës “Suite shqiptare” nga Landi Surdulli, si dhe “Mesha në D-dur” e kompozitorit Antonín Dvořák.
Ngjarja organizohet me mbështetjen e Ministrisë së Kulturës dhe Turizmit të Republikës së Kosovës dhe Komunës së Mitrovicës së Jugut.
Google prezantoi modelin e syzeve të reja inteligjente, duke u rikthyer në një treg ku gjiganti teknologjik ishte përpjekur, por pa sukses, të hynte më shumë se një dekadë më parë.
Syzet, që pritet të dalin në shitje më vonë gjatë këtij viti, do të konkurrojnë me Meta-n, e cila ka krijuar një epërsi të fortë me syzet e saj inteligjente Ray-Ban, që kanë shitur të paktën shtatë milionë njësi.
Të ashtuquajturat “syze audio” të Google do të pajisen me mikrofon, kamerë dhe altoparlant të vogël, dhe do t’u lejojnë përdoruesve të bëjnë telefonata, të dëgjojnë muzikë, të bëjnë fotografi dhe të komunikojnë me asistentin e inteligjencës artificiale Gemini.
Kompania, e cila nuk dha një datë të saktë publikimi apo detaje për çmimin, prezantoi dy koleksione në konferencën e saj vjetore për zhvilluesit Google I/O pranë selisë në MountainView, Kaliforni: një nga marka amerikane e syzeve WarbyParker dhe një tjetër nga stilisti koreano-jugor GentleMonster.
Samsung u mor me zhvillimin teknik. Syzet do të jenë të pajtueshme si me telefonat Android, ashtu edhe me ata të Apple.
Për Google, ky prezantim shënon një rikthim të shumëpritur në një sektor ku kompania pësoi një nga dështimet më të njohura: GoogleGlass, dalë në vitin 2013 me një kamerë të integruar, i cili u hoq nga tregu pasi shkaktoi shqetësime të mëdha për privatësinë dhe mbikëqyrjen.
Këtë herë, kompania po mbështetet te dizajni për të fituar konsumatorët.
Modeli i Google me kamerë ka të ngjarë të përballet me të njëjtat pyetje për privatësinë që kanë ndjekur Meta-n.
Google po punon gjithashtu për syze me ekran të integruar, të ngjashme me modelin më të fundit që Meta nxori në treg në vjeshtën e vitit 2025. Ky version, i prezantuar më parë si prototip vitin e kaluar, tashmë ka avancuar më tej në testimet për zhvilluesit, njoftoi Google, pa dhënë detaje shtesë.
Kryetari i Bashkisë së Tiranës, Erion Veliaj kërkoi shfuqizim të masës së sigurisë ‘arrest në burg’ në Gjykatën Kushtetuese.
Top Channel raporton se seanca në Kushtetuese ka përfunduar, por sot nuk ka një vendimmarrje nga gjykata.
Gjykimi u bë me prova shkresore, pra ishin vetëm gjykatësit, pa prezencën e vetë kryebashkiakut apo SPAK.
Më herët të dyja palët kanë depozituar prapësimet e tyre, Veliaj përmes avokatit ku argumenton se përse duhet shfuqizuar masa dhe SPAK ka depozituar qëndrimet e vetë.
Mërgimtari Naser Xhylani, militant i Lëvizjes Vetëvendosje, ka lëshuar deklarata të rënda dhe kërcënuese në drejtim të ish-komandantit të Ushtrisë Çlirimtare të Kosovës, Daut Haradinaj. Në një video të publikuar në Facebook, Xhylani e ka krahasuar Haradinajn me kryeterroristin Milan Radoiçiq, i cili është përgjegjës për sulmin në Banjskë, duke iu referuar me mbiemrin e tij, “Daut Radoiçiq”.
Në fund të videos, ai ka përdorur edhe gjuhë të drejtpërdrejtë kërcënuese, duke përmendur “kanunin” dhe persona që, sipas tij, janë “të gatshëm për sakrificë”.
Në emisionin “Ora Shtatë”, kandidati për deputet nga radhët e AAK-së, Avni Arifi tha se ka dyshime që këtë narracion e ka krijuar vetë Lëvizja Vetëvendosje.
“Një familje, njerëz, që e kanë oborrin plotë me varre heronjsh, jo vetëm të vrarë nga regjimi, por luftëtarësh, njerëz që i kanë pri procesit për çlirimin e Kosovës. Ramush Haradinaj akuzohet nga qeveria serbe se është fajtor për vrasjen e 3000 ushtarëve të saj që janë ardh këtu për me na vra”, tha Arifi në Klan Kosova.
“Përderisa të ekzistojnë Haradinajt, përderisa të ekzistojnë Jasharajt, gjithmonë Serbia do t’i luftojë, Serbia me çdo instrument po i lufton. Fatkeqësisht, Lëvizja Vetëvendosje ka dalë me apo pavetëdije, në krah të kësaj propagande, dhe jo Haradinajve, por të të gjithë njerëzve të lirisë”, u shpreh Arifi.
Është mbajtur mbledhja e radhës e Këshillit për Mbrojtjen e Konsumatorit, ku është prezantuar edhe Draft Programi për Mbrojtjen e Konsumatorit 2026–2030, si dhe janë diskutuar masat për mbikëqyrjen e tregut.
Në këtë takim janë prezantuar edhe informata lidhur me aksionet e Inspektoratit Qendror të Mbikëqyrjes së Tregut, të fokusuara në monitorimin e çmimeve të derivateve, njehsorëve elektrikë dhe produkteve të qumështit me bazë bimore në treg.
Sipas njoftimit, procesi i verifikimit të njehsorëve elektrikë për konsumatorët që kanë paraqitur ankesa po vazhdon.
“Vlen të theksohet se po vazhdon procesi i verifikimit të njehsorëve elektrikë të konsumatorëve që kanë paraqitur ankesa. Vetëm gjatë dy ditëve të fundit, në laboratorin e Agjencisë së Metrologjisë janë verifikuar 19 njehsorë, prej të cilëve 7 kanë rezultuar pa afat të vlefshmërisë, ndërsa një njehsor është konstatuar pa lejim tipi,” thuhet në njoftim.
Raportet e laboratorit janë proceduar për masa ligjore dhe gjoba ndaj KEDS-it.
“Raportet zyrtare të laboratorit janë proceduar në Inspektoratin Qendror të Mbikëqyrjes së Tregut për ndërmarrjen e masave ligjore dhe shqiptimin e gjobave ndaj KEDS-it, në vlerë prej 40,000 eurosh,” theksohet në komunikatë.
Në mbledhje është diskutuar edhe për kompensimin e dëmeve ndaj konsumatorëve.
“Këshilli për Mbrojtjen e Konsumatorit gjithashtu ka diskutuar për adresimin sa më të shpejtë të rasteve dhe mënyrat e kompensimit të dëmit ndaj konsumatorëve,” thuhet më tej.
Ministria e Industrisë, Ndërmarrësisë, Tregtisë dhe Inovacionit ka theksuar se gjatë tre muajve të fundit janë ndërmarrë masa proaktive për trajtimin e ankesave të konsumatorëve.
“Ministria e Industrisë, Ndërmarrësisë, Tregtisë dhe Inovacionit gjatë tre muajve të fundit ka ndërmarrë një sërë masash proaktive për trajtimin e ankesave të konsumatorëve,” thuhet në njoftim.
Po ashtu, sipas ministrisë, është rritur edhe numri i ankesave të qytetarëve.
“Si tregues i rritjes së besimit institucional të qytetarëve konsiderohet edhe rritja prej 35% e numrit të ankesave, krahasuar me të njëjtën periudhë të vitit të kaluar,” përfundon njoftimi.
Kryeministri në detyrë, Albin Kurti, ka ndarë një video nga takimi që ka pasur me qytetarë në Vushtrri.
Kurti, ka kërkuar që VV’ja të fitojë në zgjedhjet e 7 qershorit, si në Vushtrri.
‘’Vushtrria duhet me mbet qysh është, a Kosova duhet me u bo si Vushtrria. 116 me 7 qershor, veç ky numri tjetër 51.1%, ose 487 mijë vota sa i patëm, le ti tejkalojmë 500 mijë vota e le të mbërrijmë 60%’’, ka thënë ai mes tjerash.
Postimi i tij:
61% ishte rezultati i VETËVENDOSJE!-s me partnerë në zgjedhjet e 28 dhjetorit në Vushtrri. Më 7 qershor krejt Vushtrria edhe një herë 116, e gjithë Kosova si VVushtrria.
Në kuadër të punëve tona të mira për këtë qytet të vjetër me traditë në sport e kulturë, javën e kaluar nënshkruam kontratën për rindërtimin e stadiumit “Ferki Aliu”. Klubit të Futbollit “Vushtrria” i urojmë suksese në rrugën drejt rikthimit në Superligë.
Ju faleminderit për mikpritjen e ngrohtë mbrëmë dhe mbështetjen e vazhdueshme.
Ambasada e Gjermanisë në Kosovë thotë se është thelbësore që Serbia të mos ndërhyjë në zgjedhjet e jashtëzakonshme paralemntare në Kosovë.
Pas thirrjeve të Beogradit ndaj serbëve të Kosovës që në zgjedhjet e 7 qershorit të votojnë për Listën Serbe, Ambasada tha se është thelbësore që të mos ketë këso ndërhyrje.
“Zgjedhjet e ardhshme parlamentare më 7 qershor janë një mundësi për të gjithë qytetarët e Kosovës që të shprehin vullnetin e tyre duke përdorur të drejtën e tyre për të votuar në një mënyrë të informuar dhe të vetëdijshme. Është thelbësore të mos ndërhyhet në procesin e formimit të vullnetit (qytetar)”, tha për RTV21 Payam Ghalehdar, zëdhënës i Ambasadës së Gjermanisë në Prishtinë.
Përveç thirrjeve për votim të Listës Serbe së fundmi një numër zyrtarësh serb u shkarkuan nga puna në institucionet ku udhëheq Lista Serbe.
Një pronë është gjëja e parë që duhet ta sigurojë dikush kur vendos të investojë në Kosovë. Por, kur ajo është e shtetit, situata bëhet e ndërlikuar.
Një përplasje mes Ligjit për pyjet dhe Ligjit për pronën publike ka krijuar një ngërç institucional në Kosovë, duke e bërë të vështirë marrjen në shfrytëzim të pronave shtetërore – dhe duke vonuar projektet investuese.
Të dy ligjet u miratuan nga legjislatura e tetë e Kuvendit të Kosovës në vitin 2023, me një diferencë prej rreth shtatë muajsh.
Si është problemi?
Ligji për pyjet, i miratuar më 9 mars 2023, i jep Agjencisë Pyjore të Kosovës (APK) kompetencën për menaxhimin e kullotave dhe të tokave pyjore shtetërore, rrjedhimisht të shqyrtojë edhe kërkesat për të marrë tokat shtetërore me qira.
Sipas këtij ligji, deri në 20 hektarë të tokës pyjore jepen me qira me miratim të vet Agjencisë. Për 20 deri në 50 hektarë vendos Ministria e Bujqësisë, Pylltarisë dhe Zhvillimit Rural (MBPZHR), kurse mbi 50 hektarë jepen vetëm me vendim të Qeverisë së Kosovës.
Por, pas miratimit të Ligjit për pronën publike, më 26 tetor të po atij viti, situata u bë e paqartë.
Ky ligj parasheh që pëlqimin paraprak për ta marrë një pronë në shfrytëzim ta japë Zyra për Administrimin e Pronës Publike (ZAPP).
Ky organ tashmë është krijuar si zyrë e veçantë në kuadër të Zyrës së Kryeministrit.
Vetëm pasi ZAPP-ja të jetë siguruar se prona që po kërkohet nga një investitor potencial nuk është në interes për t’u përdorur nga asnjë institucion publik, i vazhdon procedurat e dhënies me qira të saj.
Këto procedura përfundojnë me miratimin final nga institucionet e larta të shtetit.
Sipas këtij ligji, prona shtetërore mund të jepet me qira deri në 15 vjet, me vendim në mbledhjen e Qeverisë apo të kuvendeve komunale.
Kurse për dhënien me qira për 99 vjet të një prone publike duhet të vendosë Kuvendi i Kosovës.
Çka shkaktoi kjo?
Për shkak të mungesës së harmonizimit ligjor, APK-ja ka pezulluar shqyrtimin e kërkesave për shfrytëzim të përkohshëm të tokave publike.
Në një përgjigje zyrtare të Agjencisë për kërkesën e një investitori të huaj të interesuar – të cilën e ka siguruar Radio Evropa e Lirë – thuhet se pa u bërë një qartësim ligjor rreth kompetencave, ajo nuk mund të vazhdojë me procedurat.
“E kemi të pamundur të vazhdojmë me procedura të mëtejme pa u marrë veprimet për plotësimin/ndryshimin dhe harmonizimin ligjor, dhe cilat mund të jenë kompetencat që ka Agjencia Pyjore e Kosovës lidhur me menaxhimin dhe administrimin e pyjeve, kullotave, dhe tokave pyjore publike në Republikën e Kosovës”, thuhet në përgjigjen e APK-së, të datës 19 mars 2025.
Tash e një vit, investitori potencial nuk ka arritur të marrë me qira pronën shtetërore të kërkuar.
Disa investitorë të huaj të interesuar, me të cilët bisedoi Radio Evropa e Lirë, u ankuan për pritje të gjata në shqyrtimin e kërkesave për marrje me qira të pronave publike, por hezituan të flasin publikisht për rastet e tyre, nga frika se kjo mund t’u krijojë probleme në procesin e marrjes së pronës në shfrytëzim.
APK-ja i tha Radios Evropa e Lirë se në lidhje me atë se si po veprohet me kërkesat në pritje të investitorëve duhet të pyetet MBPRZH-ja.
Por, as kjo e fundit nuk u përgjigj.
Ndërkaq, Zyra e Kryeministrit i tha Radios Evropa e Lirë se ZAPP-ja, si njësi e re e krijuar, ka trajtuar secilën kërkesë që i është përcjellë nga APK-ja, duke shtuar se “involvimi i Agjencisë së Pyjeve brenda kësaj teme është i pashmangshëm”.
Në përgjigje thuhet edhe se Qeveria ka zhvilluar takime mes institucioneve, përfshirë APK-në dhe bizneset që shfrytëzojnë tokë pyjore me qira, për të sqaruar paqartësitë ligjore dhe për të mbrojtur interesin publik.
Dekurajim për investitorët e huaj
Në praktikë, kjo situatë ka krijuar vonesa të mëdha për bizneset që synojnë investime në prona publike.
Kryetari i Odës Ekonomike të Kosovës, Lulzim Rafuna, thotë se pezullimi i shqyrtimit të kërkesave po i lë investitorët në pasiguri.
“Nuk ka ndonjë kufi që është i vendosur brenda të cilit kthehet përgjigja. Ka biznese që po presin që shtatë muaj e deri në një vit, dhe nuk kanë ende përgjigje, për shkak të këtyre paqartësive”, tregon ai për Radion Evropa e Lirë.
Sipas tij, kjo situatë po i dekurajon investitorët e huaj të zhvillojnë biznes në Kosovë.
“Kemi investitorë të huaj që kanë ardhur ta bëjnë një studim për investim potencial dhe menjëherë kanë hasur në këtë sfidë ligjore. Dhe, në njëfarë forme, kjo i ka bërë të pasigurt që ata të investojnë në Kosovë”, thotë Rafuna.
Shembulli i Shqipërisë
Nikolin Jaka, kryetar i Dhomës së Tregtisë dhe Industrisë në Tiranë, thotë për Radion Evropa e Lirë se edhe në Shqipëri ka pasur raste kur investimet vendëse dhe të huaja janë shtyrë për shkak të moskoordinimit institucional, por që është punuar në mënjanimin e pengesave përmes digjitalizimit të shërbimeve.
Pavarësisht kuadrit ligjor të konsoliduar, bizneset në Shqipëri vazhdojnë të kërkojnë më shumë qartësi rreth konceptit “one-stop authority” për dhënien në përdorim të pronës publike, tregon ai.
Sipas këtij koncepti, një investitor në Shqipëri mund të kryejë disa procedura administrative në një zyrë të vetme, pa pasur nevojë të shkojë në shumë institucione.
Jaka pohon se Shqipëria sot është vend i favorshëm për investime, teksa përmend se “nuk ka kufizime të mëdha për kapitalin e huaj”.
“Kostot konkurruese të punës dhe procedurat më të avancuara digjitale për regjistrimin e biznesit dhe licencimet”, por edhe “pozicionin strategjik” të Shqipërisë dhe “afërsinë me tregun e Bashkimit Evropian” ai i numëron si lehtësira të tjera.
“Në terma praktikë, investitori në Shqipëri sot mund të regjistrojë biznesin relativisht shpejt edhe online”, shprehet Jaka.
Ndërkohë, investitorët në Kosovë duhet të presin edhe më tutje një qartësim ligjor për të shfrytëzuar pronat publike – vendi aktualisht nuk ka një qeveri me kompetenca të plota, dhe as Kuvend që mund të miratojë ndryshime të ligjeve./REL/
Analiza e më shumë se 25 milionë shtatzënive tregon se shumica e antidepresivëve modernë nuk lidhen drejtpërdrejt me autizmin dhe ADHD-në te fëmijët, ndërsa ekspertët paralajmërojnë për rreziqet serioze të depresionit të patrajtuar gjatë shtatzënisë
Antidepresivët përgjithësisht konsiderohen të sigurt dhe efektivë në trajtimin e depresionit, ankthit dhe çrregullimeve të tjera mendore. Megjithatë, vitet e fundit është rritur shqetësimi lidhur me ndikimin e mundshëm të këtyre barnave në zhvillimin e fetusit, sidomos për sa i përket çrregullimeve neurologjike dhe zhvillimore te fëmijët.
Një analizë e re dhe shumë e gjerë shkencore sjell deri më tani dëshmitë më të besueshme mbi lidhjen ndërmjet përdorimit të antidepresivëve nga të dy prindërit, para dhe gjatë shtatzënisë, dhe shfaqjes së autizmit apo çrregullimit të deficitit të vëmendjes me hiperaktivitet (ADHD) te fëmijët. Rezultatet tregojnë se, për shumicën e antidepresivëve, ekziston lidhje shumë e vogël ose aspak lidhje me këto çrregullime kur merren parasysh faktorë të tjerë të rëndësishëm.
Studimi, i publikuar në revistën shkencore “The Lancet Psychiatry”, përfshiu analizën e 37 hulumtimeve të mëhershme me mbi 600 mijë shtatzëna që kishin përdorur antidepresivë dhe pothuajse 25 milionë shtatzëni pa përdorim të tyre.
Fillimisht, rezultatet tregonin rrezik më të lartë:
– 35 për qind më shumë rrezik për ADHD;
– 69 për qind më shumë rrezik për autizëm pa vështirësi intelektuale.
Te baballarët që kishin përdorur antidepresivë u regjistrua:
– 46 për qind rrezik më i lartë për ADHD;
– 28 për qind rrezik më i lartë për autizëm te fëmijët.
Megjithatë, pasi studiuesit korrigjuan rezultatet duke marrë parasysh faktorë të tjerë, si gjenetika, historia familjare dhe arsyet pse prindërit përdornin antidepresivë, shumica e këtyre lidhjeve u dobësuan ndjeshëm ose u zhdukën krejtësisht. Rreziku për autizëm ra në rreth 15 për qind.
Profesori i psikiatrisë në Universitetin e Hong Kongut, dr. Wing Chung Chang, një nga autorët e studimit, deklaroi se këto rezultate tregojnë fuqishëm se normat më të larta të ADHD-së dhe autizmit lidhen kryesisht me cenueshmërinë familjare dhe shëndetin mendor të prindërve, e jo drejtpërdrejt me barnat.
Pse është ky studim i rëndësishëm?
Depresioni prek më shumë se 10 për qind të grave shtatzëna në mbarë botën, ndërsa antidepresivët janë pjesë kyçe e trajtimit. Vëmendje e veçantë viteve të fundit u është kushtuar antidepresivëve SSRI, grupit më të përdorur të këtyre barnave.
Debati për sigurinë e tyre u intensifikua sidomos gjatë vitit 2025, pas diskutimeve në kuadër të Agjencisë Amerikane për Ushqim dhe Barna (FDA), ku u ngritën dyshime për lidhje të mundshme me autizmin, abortin spontan dhe anomalitë kongjenitale. Shumë shoqata profesionale i kritikuan këto pretendime, duke theksuar se shpesh neglizhohen rreziqet e depresionit të patrajtuar gjatë shtatzënisë.
Autorët e studimit të ri theksojnë se shumë hulumtime të mëhershme kishin mostra të vogla dhe nuk merrnin mjaftueshëm parasysh faktorët e tjerë që mund të ndikonin në rezultatet përfundimtare.
Trajtimi kërkon qasje individuale
Ekspertët theksojnë se vendimi për vazhdimin ose ndërprerjen e terapisë duhet të merret me kujdes dhe individualisht. Sipas autorëve të studimit, rezultatet mbështesin udhëzimet aktuale mjekësore, të cilat zakonisht rekomandojnë vazhdimin e terapisë me antidepresivë gjatë shtatzënisë kur ajo është e domosdoshme.
“Gjetjet tona nuk ofrojnë dëshmi të forta se ekspozimi ndaj antidepresivëve gjatë shtatzënisë shkakton çrregullime neurorozhvillimore”, tha dr. Chang.
Mjekët dhe pacientet duhet së bashku të vlerësojnë rreziqet potencialisht të vogla të vazhdimit të terapisë krahasuar me pasojat serioze të depresionit të patrajtuar.
Rreziqet e depresionit të patrajtuar
Depresioni i patrajtuar gjatë shtatzënisë mund të ketë pasoja si për nënën, ashtu edhe për foshnjën. Ai lidhet me:
– lindje të parakohshme;
– peshë më të ulët të foshnjës në lindje;
– rrezik më të madh për probleme emocionale dhe të sjelljes te fëmijët;
– vështirësi në socializim dhe kontroll të impulsivitetit.
Psikiatrja perinatale dr. Nancy Byatt thekson se çrregullimet mendore gjatë shtatzënisë mund të ndikojnë në metabolizmin e serotoninës, funksionin e placentës, proceset inflamatore dhe zhvillimin e trurit të fetusit. Ajo shton se çrregullimet mendore lidhen edhe me rreth 23 për qind të vdekjeve të lidhura me shtatzëninë te nënat.
Ekspertët paralajmërojnë se terapia me antidepresivë nuk duhet ndërprerë kurrë papritur dhe pa mbikëqyrje mjekësore, pasi simptomat e ndërprerjes së menjëhershme mund të jenë shumë të pakëndshme, veçanërisht gjatë shtatzënisë.
I rëndësishëm edhe shëndeti mendor i babait
Autorët e studimit nënvizojnë se edhe shëndeti mendor i baballarëve mund të ketë ndikim të rëndësishëm në zhvillimin e fëmijës, megjithëse kjo fushë mbetet ende e pamjaftueshme e studiuar.
“Psikiatria perinatale sot shihet si fushë që përfshin nënën, fëmijën dhe babain. Përmirësimi i shëndetit mendor të të dy prindërve është i rëndësishëm jo vetëm për mirëqenien e tyre, por edhe për zhvillimin afatgjatë të fëmijës”, thuhet në studim.
Antidepresivët më të vjetër kërkojnë kujdes shtesë
Studimi tregoi se antidepresivët më të vjetër triciklikë, edhe pas korrigjimit të faktorëve të tjerë, mbetën të lidhur me një rrezik disi më të lartë për ADHD te fëmijët. Ekspertët thonë se ende nuk dihet nëse kjo lidhet me vetë barnat apo me faktin se këta antidepresivë zakonisht përdoren në forma më të rënda të depresionit.
Për këtë arsye, grave shtatzëna që përdorin ose planifikojnë të përdorin këto barna u rekomandohet konsultim i detajuar me mjekun për përfitimet dhe rreziqet e mundshme.
Në përgjithësi, rezultatet e studimit sjellin një mesazh inkurajues për sigurinë e antidepresivëve modernë gjatë shtatzënisë. Ekspertët theksojnë se vendimet për trajtim duhet të bazohen në informacione të verifikuara dhe në këshillimin profesional mjekësor, e jo në frikë apo të dhëna të pjesshme.