ATV

Author: K.B.

  • Koci: Kurti po del armiku më i madh i vetes në politikë mbijeton ai që e mban fjalën

    Koci: Kurti po del armiku më i madh i vetes në politikë mbijeton ai që e mban fjalën

    Avokati Arianti Koci, ka deklaruar se skena politike kosovare është bastarduar, sipas tij, në momentin kur u.d. presidentja Albulena Haxhiu u propozua 54 herë për kryetare të Kuvendit nga ana e kryeministrit në detyrë, Albin Kurti.

    Përmes një postimi në Facebook, Koci thotë se nëse do të ishte propozuar dikush tjetër pas herës së dytë, sot, siç thotë ai, me gjasë do ta kishte një qeveri stabile.

    “Kosova është shtet i konsensusit. Sado vota që fiton një parti, herët a vonë i duhen partnerë koalicioni. Tani, pavarësisht votave, VV-ja ua ka hapur rrugën partive opozitare që në çdo zgjedhje t’i rrisin kërkesat”, ka shkruar ai.
    Ndër të tjera, avokati thotë se Kurti po del të jetë armiku më i madh i vetes.

    “Ironikisht, Albini po del armiku më i madh i Albinit. Mos e bën atë që mundesh, vetëm pse mundesh. Kjo është një sintagmë që më së shumti aplikohet në politikë. Albini e ka bërë. Duke insistuar në një emër, aty ku duhej kompromis, e ka dobësuar aftësinë e vet për të krijuar aleanca. Në politikë nuk mjafton me i fitu zgjedhjet. Duhet edhe me i ndërtu partneritetet që ta bëjnë të mundshme qeverisjen”, thotë Koci.

    Po ashtu, ai shtoi se në momentin që kur humbet besimi, çdo fitore shndërrohet në problem, duke theksuar se kryeministri në detyrë po përsërist të njëjtin gabim.

    “Sado që mendohet se në politikë lejohen rrena e mashtrimi, trikat e manovrat, në fund mbijeton ai që e mban fjalën. Në momentin kur humbet besimi, çdo fitore shndërrohet në problem. Gabimi i opozitës, kur ishte në pushtet, ishte se mendoi se mund t’i mashtrojë vazhdimisht votuesit. Albini po e përsërit të njëjtin gabim”, ka shkruar ai.

  • Mbi 3 mijë vota deri tash – Ku renditet brenda VV-së Agim Bahtiri?

    Mbi 3 mijë vota deri tash – Ku renditet brenda VV-së Agim Bahtiri?

    Kandidati i Lëvizjes Vetëvendosje për deputet, Agim Bahtiri ka marrë 3 mijë e 5 vota.

    Nga numërimi i deritanishëm i votave dhe përditësimi i fundit nga Komisioni Qendror i Zgjedhjeve, që ka arritur në mbi 24 për qind, ai radhitet i 50-ti brenda partisë.

    Kosova ka votuar të dielën në zgjedhjet e parakohshme parlamentare, ndërsa po vazhdon procesi i numërimit të votave për ulëse në Kuvend.

  • Donika Gërvalla veç me një deputet të partisë së vet mund të jenë në Kuvend

    Donika Gërvalla veç me një deputet të partisë së vet mund të jenë në Kuvend

    Komisioni Qendror i Zgjedhjeve është në proces të numërimit të votave të kandidatëve për deputet në zgjedhjet e parakohshme të mbajtura më 7 qershor.

    Nga numërimi i deritashëm, nga 10 kandidatët e partisë Guxo, të cilët garuan në listën e Lëvizjes Vetëvendosje, vetëm dy prej tyre mund të sigurojnë ulëse në Parlament.

    Sipas KQZ-së, Donika Gërvalla deri më tani ka siguruar 18 mijë e 652 vota, ndërsa Blerim Gashi 3 mijë e 496 vota.

    Ndërkohë, kandidatët e tjerë si Fatos Geci, Triera Kasumi-Berisha dhe Haki Huruglica nuk kanë arritur të grumbullojnë vota të mjaftueshme deri në këtë fazë, pasi janë numëruar vetëm rreth 24% e votave.

    Triera Kasumi-Berisha 2.096 vota

    Fatos Geci 1.854 vota

    Haki Huruglica 1.747 vota

    Këtu gjeni linkun ku mund të i përcilleni numërimin nga KQZ – KËTU

  • Plenkoviq uron Kurtin për rezultatin e zgjedhjeve: Presim formim të shpejtë të institucioneve

    Plenkoviq uron Kurtin për rezultatin e zgjedhjeve: Presim formim të shpejtë të institucioneve

    Kryeministri kroat, Andrej Plenkoviw, e ka uruar liderin e LVV-së dhe kryeministrin në detyrë, Albin Kurtin, për rezultatin e zgjedhjeve.

    Plenkoviw ka thënë se Kroacia mbetet përkrahëse e fuqishme e Kosovës drejt rrugës evropiane dhe se Zagrebi zyrtar pret formim të shpejtë të institucioneve për të vazhduar bashkëpunimin mes dy vendeve në të gjitha fushat.

    “Urime kryeministër Albin Kurti për rezultatet e zgjedhjeve. Kroacia mbetet e përkushtuar fuqimisht në mbështetjen e rrugës evropiane të Kosovës dhe ne presim formimin e shpejtë të institucioneve shtetërore për të vazhduar forcimin e bashkëpunimit tonë dypalësh në të gjitha fushat me interes të ndërsjellë”, ka shkruar Plenkoviq.

  • Si ta rregulloni klimën për të përdorur më pak energji elektrike, truke të thjeshta për të kursyer para

    Si ta rregulloni klimën për të përdorur më pak energji elektrike, truke të thjeshta për të kursyer para

    Gjatë temperaturave të larta të verës, kondicionerët bëhen të domosdoshëm, por shumë njerëz janë të shqetësuar për koston e energjisë elektrike kur ata janë vazhdimisht në punë.

    Megjithatë, me disa zakone të thjeshta, është e mundur të reduktohet ndjeshëm konsumi i energjisë elektrike duke ruajtur një temperaturë të rehatshme në dhomë. Një mënyrë për ta përdorur kondicionerin në mënyrë më efikase është të shmangni ndezjen dhe fikjen e vazhdueshme të pajisjes ose mbajtjen e saj në temperatura të ulëta gjatë gjithë ditës.

    Performancë më e mirë dhe konsum më i ulët i energjisë mund të arrihen me funksionim më të shkurtër të kondicionerit në një modalitet më të fortë, krahasuar me përdorimin e tij të vazhdueshëm ose funksionimin me fuqi më të ulët. Rregullimi i saktë i temperaturës luan gjithashtu një rol të rëndësishëm në kursimin e energjisë.

    Një temperaturë prej rreth 26 gradësh konsiderohet optimale, pasi arrin një ekuilibër midis ftohjes së rehatshme dhe konsumit më të ulët të energjisë elektrike. Mirëmbajtja e rregullt e kondicionerit gjithashtu kontribuon në konsum më të ulët.

    Pastrimi i filtrit dhe servisimi i pajisjes i mundësojnë asaj të funksionojë në mënyrë më efikase, ndërsa pjesët e ndyra mund të çojnë në konsum më të lartë të energjisë dhe ftohje më të dobët. Kursime shtesë mund të arrihen edhe me izolim të mirë të dhomave, sepse në këtë mënyrë parandalohet hyrja e ajrit të ngrohtë nga jashtë dhe humbja e të ftohtit nga dhoma. Kjo do të thotë që kondicioneri nuk duhet të punojë me kapacitet të plotë për të ruajtur temperaturën e dëshiruar.

    Duke përdorur dhe mirëmbajtur siç duhet kondicionerin, është e mundur të arrihet një temperaturë e rehatshme në një dhomë me konsum dukshëm më të ulët të energjisë elektrike, gjë që në planin afatgjatë e bën edhe buxhetin familjar më të lehtë.

  • Çorapet e bardha mund të bëhen më të ndritshme pa kimikate dhe pa zierje

    Çorapet e bardha mund të bëhen më të ndritshme pa kimikate dhe pa zierje

    Një mënyrë e vjetër, por efektive, ndihmon që çorapet e bardha të ruajnë bardhësinë dhe freskinë gjatë sezonit të ngrohtë

    Gjatë muajve të ngrohtë, çorapet e bardha janë ndër pjesët më të përdorura të veshjes. Ato janë të rehatshme, të lehta dhe përshtaten mirë me këpucë sportive apo veshje të përditshme. Megjithatë, mirëmbajtja e tyre shpesh bëhet sfidë.

    Për shkak të ngjyrës, çorapet e bardha njollosen lehtë, marrin shpejt nuancë gri dhe humbin pamjen fillestare pas vetëm disa përdorimesh. Për këtë arsye, shumë njerëz kërkojnë mënyra të shpejta për t’ua rikthyer bardhësinë.

    Pse zbardhuesi nuk është gjithmonë zgjidhje e mirë

    Në përpjekje për t’i bërë sërish të bardha, shumë persona përdorin zbardhues. Megjithatë, kjo metodë shpesh mund të jetë e dëmshme për pëlhurën.

    Edhe pse zbardhuesi mund ta ndriçojë përkohësisht materialin dhe vepron si dezinfektues, ai nuk është gjithmonë efektiv ndaj mbetjeve të yndyrshme nga djersa dhe vajrat natyralë të lëkurës, të cilat janë ndër shkaktarët kryesorë të zverdhjes dhe humbjes së bardhësisë.

    Përdorimi i shpeshtë i zbardhuesit mund t’i dobësojë fibrat e pambukut, të ulë elasticitetin dhe t’i bëjë çorapet më të prirura për t’u grisur. Në disa raste, klori mund të reagojë me djersën dhe yndyrat trupore, duke krijuar njolla të verdha që mbeten gjatë në pëlhurë.

    Zgjidhja natyrale dhe falas

    Si alternativë, ekziston një metodë shumë e thjeshtë, falas dhe më miqësore me mjedisin: tharja e çorapeve në dritën e drejtpërdrejtë të diellit.

    Ekspertja Marilee Nelson nga Branch Basics rikujton këtë teknikë tradicionale, e cila përdoret prej kohësh për zbardhjen natyrale të rrobave. Sipas saj, mjafton që rrobat, çarçafët apo çorapet e bardha të ekspozohen në diell për disa orë, që njollat të zbehen ose të bëhen më pak të dukshme.

    Drita e diellit përmban rreze ultravjollcë, të cilat veprojnë si zbardhues natyral. Ato ndihmojnë në shpërbërjen e njollave organike, si ato nga djersa, yndyrat trupore, bari apo ushqimi. Ky proces bën që njollat të humbin ngjyrën dhe pëlhura të duket më e pastër.

    Dielli ka edhe efekt freskues, sepse rrezet ultravjollcë mund të ndihmojnë në uljen e baktereve dhe kërpudhave që shkaktojnë aromë të pakëndshme. Megjithatë, kjo metodë nuk e zëvendëson larjen e zakonshme, por shërben si hap përfundimtar pas larjes.

    Si duhet vepruar

    Pas larjes, çorapet e bardha duhet të varen jashtë, në një vend ku i kap dielli drejtpërdrejt. Për rezultat më të mirë, këshillohet që ato të ekspozohen gjatë kohës kur dielli është më i fortë, zakonisht nga mesdita deri rreth orës 15:00.

    Pas një ose dy orësh, çorapet mund të kthehen nga ana tjetër, që të dyja anët të marrin dritë në mënyrë të barabartë. Nuk rekomandohet të lihen jashtë gjatë gjithë ditës, sidomos në vapë të madhe, sepse ekspozimi i gjatë mund t’i dobësojë fibrat e pëlhurës.

    Nëse njollat janë më të forta, para tharjes në diell çorapet mund të lihen në ujë me pak lëng limoni. Mund të përdoret edhe pastë me sodë bikarbone dhe ujë, e cila vendoset mbi njolla para larjes.

    Edhe uthulla e bardhë mund të ndihmojë në largimin e papastërtive dhe aromave. Megjithatë, kjo metodë duhet përdorur vetëm për rroba të bardha ose shumë të çelura, sepse dielli mund t’i zbehë pëlhurat me ngjyra të errëta.

  • Dogana e Kosovës zbulon mbi 30 mijë euro të padeklaruara në Bërnjak, konfiskon një pjesë të shumës

    Dogana e Kosovës zbulon mbi 30 mijë euro të padeklaruara në Bërnjak, konfiskon një pjesë të shumës

    Dogana e Kosovës ka njoftuar se ka zbuluar mjete monetare të padeklaruara në vlerë prej 30,328 eurosh gjatë kontrolleve të kryera në pikëkalimin kufitar me Serbinë në Bërnjak.

    Sipas njoftimit, zyrtarët doganorë, në bashkëpunim me Policinë e Kosovës, kanë ndaluar për kontroll të detajuar një automjet me targa të huaja, i cili po largohej nga territori i Kosovës dhe drejtohej nga shtetas të huaj.

    Gjatë intervistimit fillestar, personat në automjet kanë deklaruar se nuk posedonin mallra apo mjete monetare për deklarim. Megjithatë, pas kontrollit të hollësishëm të automjetit, bagazhit dhe një çante personale, autoritetet kanë gjetur para të padeklaruara.

    “Gjatë kontrollit janë gjetur mjete monetare të padeklaruara. Pas numërimit dhe verifikimit, është konstatuar se shuma totale e mjeteve monetare tejkalonte kufirin ligjor prej 10,000 euro, i cili obligon deklarimin pranë autoriteteve doganore. Në çantën personale janë gjetur mjete monetare në dy valuta: • 25,515 euro (EUR) • 565,060 dinarë serbë (RSD), me vlerë të përafërt prej 4,813 euro. Vlera totale e mjeteve monetare të padeklaruara: 30,328 euro”, thuhet në komunikatën e Doganës.

    Në përputhje me legjislacionin në fuqi, autoritetet kanë konfiskuar 25 për qind të shumës së përgjithshme, ndërsa 75 për qind e saj është ndaluar përkohësisht deri në verifikimin e burimit dhe ligjshmërisë së prejardhjes së mjeteve monetare.

    “Në përputhje me legjislacionin në fuqi, personi është njoftuar për masat administrative të ndërmarra. Me këtë rast, është konfiskuar 25% e shumës totale, ndërsa 75% e shumës është ndaluar përkohësisht deri në verifikimin e burimit dhe ligjshmërisë së prejardhjes së mjeteve monetare. Rasti do të trajtohet nga sektori kompetent i hetimeve për procedurat e mëtejshme ligjore”, thuhet në komunikatë.

    Dogana e Kosovës theksoi se mbetet e përkushtuar në zbatimin e legjislacionit doganor dhe financiar, si dhe në luftimin e aktiviteteve të paligjshme, përfshirë pastrimin e parave dhe financimin e terrorizmit.

  • Të mërkurën, “Muharrem Fejza” dhe Bregu i Diellit do mbesin pa ujë

    Të mërkurën, “Muharrem Fejza” dhe Bregu i Diellit do mbesin pa ujë

    Kompania Rajonale e Ujësjellësit “Prishtina” ka njoftuar se nesër, 10/06/2026, do të zhvillohen punime në rrugën “Muharrem Fejza”, të cilat do të ndikojnë në furnizimin me ujë të pijes në një pjesë të kryeqytetit.

    Sipas njoftimit zyrtar, për shkak të sanimit të një gypi, e gjithë lagjja Bregu i Diellit do të mbetet pa ujë nga ora 08:00 e mëngjesit deri në përfundimin e punimeve.

    “Ju njoftojmë se nesër do të intervenojmë në rrugën ‘Muharrem Fejza’”, thuhet në njoftimin e KRU Prishtina.

    Nga kompania është bërë e ditur se ndërprerja është e domosdoshme për realizimin e punimeve teknike në rrjetin e ujësjellësit.

    “Për shkak të sanimit të gypit, e gjithë lagjja Bregu i Diellit do të mbetet pa furnizim me ujë nga ora 08:00 e mëngjesit deri në përfundimin e punimeve”, thuhet më tej në njoftim.

  • Përfundon numërimi në pesë Qendra Komunale të Numërimit

    Përfundon numërimi në pesë Qendra Komunale të Numërimit

    Komisioni Qendror i Zgjedhjeve njofton se deri të hënën në mesnatë është përmbyllur numërimi i votave të kandidatëve për deputetë dhe verifikimi i rezultateve të subjekteve politike nga formularët e plotësuar në vendvotime pas numërimit të fletëvotimeve, në pesë Qendra Komunale të Numërimit.

    Qendrat Komunale të Numërimit, të cilat kanë përfunduar këto aktivitete janë: Junik (6/6); Shtërpcë (17/17); Hani i Elezit (11/11); Partesh (7/7); Mamushë (5/5).

    “Procesi i numërimit dhe verifikimit është duke vazhduar në 32 QKN-të tjera: Deçan, Dragash, Ferizaj, Fushë Kosovë, Gjakovë, Gjilan, Drenas (Gllogoc), Graçanicë, Istog, Kaçanik, Kamenicë, Klinë, Kllokot, Leposaviq, Lipjan, Malishevë, Mitrovicë e Jugut, Mitrovicë e Veriut, Novobërdë, Obiliq, Pejë, Podujevë, Prishtinë, Prizren, Rahovec, Ranillug, Skenderaj, Suharekë, Viti, Zubin Potok, Zveçan”, thuhet në njoftim.

    Ndërkaq, në Qendrën Komunale të Numërimit në Vushtrri është zhvilluar procesi i numërimit nga 10 vendvotime, mirëpo rezultatet e numëruara nuk kanë mundur të procesohen sipas procedurave të QKN-së për shkak të disa problemeve teknike me rrjetin e internetit.

    Për rrjedhojë, kutitë e votimit janë mbyllur dhe siguruar sipas procedurave përkatëse, ndërsa procesi do të vazhdojë gjatë ditës. Këto vendvotime do të numërohen sërish për procedim të rregullt të rezultateve.

    Sipas të dhënave deri të hënën në mesnatë (8 qershor 2026, ora 23:59) numri i përgjithshëm i vendvotimeve të procesuara, që i takojnë 37 QKN-ve, është: 486 nga 2,498 vendvotime apo 19.46%.

    Pas përfundimit të numërimit të çdo vendvotimi, të dhënat janë duke u transmetuar në platformën e KQZ-së për rezultate: https://resultsparliamentary2026.kqz-ks.org/

  • Fitore Pacolli as në top 20-she të VV-së, ky është rezultati aktual

    Fitore Pacolli as në top 20-she të VV-së, ky është rezultati aktual

    Ministrja në detyrë e Mjedisit dhe Planifikimit Hapësinor, Fitore Pacolli Dalipi, e cila ishte kandidate e VV-së në zgjedhjet e 7 qershorit, nuk është as në top 20-shen më të votuar të kësaj partie, bazuar në përditësimet e mbi 20% të votave.

    Sipas të dhënave të Komisionit Qendror të Zgjedhjeve, Pacolli ka aktualisht 3 mijë e 199 vota në nivel vendi, duke u renditur e 30-ta.

    Para saj, ka emra që janë futur për herë të parë në garë dhe kanë arritur numër të madh të votave.

    Rezultatet preliminare të KQZ-së e kanë vendosur VV-në të parën me 42.91 për qind, PDK e dyta me 21.08 për qind, LDK me 17.60 për qind, Aleanca me 7.17 për qind.