Author: K.B.

Procesi i numërimit të votave të kandidatëve për deputetë që kanë garuar në zgjedhjet e 7 qershorit, po shkon drejt fundit.

Nga 38 Qendra Komunale të Numërimit, ky proces ka përfunduar në 35 prej tyre, derisa është duke vazhduar edhe në tri të tjera.

Ne mësin e komunave që po vazhdon numërimi janë Prishtina, Prizreni dhe Gjilani.

Në Prishtinë nga 262 vendvotime janë numëruar 138 prej tyre, apo 52.67%.

Kurse, në Prizren procesi i numërimit ka shkuar në 75.43%, ku nga 132 kuti, numërimi është kryer në 175 prej tyre.

Edhe në Gjilan janë numëruar mbi 81% të vendvotimeve, ku nga 127 kuti, kanë përfunduar 103.

Gjatë ditës së sotme, ky proces ka përfunduar në Fushë Kosovë, Ferizaj, Suharekë, Vushtrri, Mitrovicë e Jugut dhe Gjakovë, derisa në QKN-të tjera ka përfunduar ditë më parë.

Numërimi i votave të kandidatëve për deputetë po shkon drejt fundit pasi tashmë janë procesuar 91, 39 për qind e vendvotimeve.

Emrat që kryesojnë listat e partive të mëdha dihen, por jo të gjithë kanë pasur fatin që të ngjiten në krye për të siguruar ulëse në Kuvendin e Kosovës.

Nga Lëvizja Vetëvendosje, deri tash dy më pak të votuarit janë Feim Tahirsylaj me 2 mijë e 513 vota, dhe Arijeta Ajeti me një mijë e 948 sosh.

Te Partia Demokratike të Kosovës më së paku vota kanë tubuar, Shaqir Hetemi me 729, dhe Ilir Peci me 649.

Nga kandidatët e Lidhjes Demokratike të Kosovës, Pajtesa Aliu Krasniqi me 854 vota dhe Albulena Bilalli me 825 janë më pak të votuarat.

Ndërsa, nga Aleanca, më së paku vota deri tash kanë marrë Xhelal Krasniqi me 461 dhe Abdylnaser Sefa, 457.

Tashmë janë numëruar mbi 90 për qind e votave të kandidatëve të partive nga zgjedhjet e parakoshme parlamentare të 7 qershorit. Më saktësisht, janë numëruar 90.87 për qind e votave nga KQZ-ja.

Aktualisht, në Lëvizjen Vetëvendosje më së shumti vota ka Albin Kurti, 218, 736 vota, ndërkaq Glauk Konjufca i ka 171,749 vota. Albulena Haxhiu ka 100,153 vota, teksa Hekuran Murati, 86 mijë e 878.

Te PDK-ja, më i votuari është Bedri Hamza, pasi ka 107,537 vota.

Te LDK-ja, Vjosa Osmani ka 72 mijë e 521 vota, teksa te Aleanca, Ardian Gjini, 38 mijë e 189 vota

Prokuroria Themelore e Gjakovës ka njoftuar se personi i dyshuar për sulm me kalash ndaj autobusit me udhëtarë në fshatin Pagarushë të Malishevës, është ndaluar për 48 orë.

I arrestuari është S.M, i cili dyshohet për veprat Vrasja e rëndë në tentativë” dhe “Mbajtja në pronësi, kontroll ose posedim të paautorizuar të armëve” sipas Kodit Penal të Republikës së Kosovës”.

Aty theksohet se do të bëhet kërkesë për caktimin e paraburgimit.

“Prokurori i Shtetit, brenda afatit ligjor, do të paraqesë në gjykatën kompetente kërkesën për caktimin e masës së paraburgimit ndaj të dyshuarit. Prokurori i Shtetit në bashkëpunim të ngushtë me Policinë e Kosovës, është duke i ndërmarrë të gjitha veprimet e nevojshme hetimore dhe duke mbledhur provat relevante lidhur me këtë rast”, thuhet në njoftim.

Gjykata Themelore në Prishtinë ua ka hequr masën e paraburgimit njëmujor drejtorëve të institucioneve arsimore dhe shëndetësore që funksionojnë në Kosovë sipas sistemit të Serbisë, të cilët Prokuroria i ngarkon me veprën e ndikimit në vullnetin e lirë të votuesve.

Kosova mbajti zgjedhjet e parakohshme parlamentare më 7 qershor.

“Ata do të mbrohen në liri”, konfirmoi për Radion Evropa e Lirë (REL) avokatja e njërit prej të dyshuarve, Jovana Fillipoviq.

Gjykata fillimisht ua kishte caktuar masën e paraburgimit më 21 maj, me arsyetimin se ekziston rreziku real që të pandehurit, nëse lirohen, mund t’i shmangen përgjegjësisë penale ose ta përsërisin veprën penale.

Arrestimi i drejtorëve të institucioneve serbe në Kosovë erdhi pasi lideri i partisë për Liri, Drejtësi dhe Mbijetesë, Nenad Rashiq, e akuzoi Listën Serbe se po ushtron presion dhe po shantazhin mbështetësit e tij.

Ai pohoi se rreth 20 persona që e mbështesin janë pushuar nga puna nga këto institucione serbe dhe se në periudhën e ardhshme, rreth 40 persona të tjerë pritet të marrin një vendim për shkarkimin e tyre vetëm në territorin e komunës së Graçanicës.

Ndalimi i paraburgimit u urdhërua për Lubisha Karaxhiq, drejtor i shkollës fillore “Milladin Mitiq” në Lllapna Sellë; Boban Petroviq, drejtor i Shkollës së Mesme Elektroteknike në Sushicë; Millica Dimiq, drejtoreshë e shkollës fillore “Braqa Aksiq” në Lipjan; Nebojsha Rashiq, drejtor i Shkollës së Mesme të Makinerisë në Preoc; Bratisllav Llaziq, drejtor i Qendrës Klinike-Spitalore në Graçanicë; Mirjana Dimitrijeviq, drejtoreshë e Shtëpisë së Shëndetit në Graçanicë; Sasha Mlladenoviq, drejtor i Shtëpisë së Shëndetit në Gushtericën e Ulët.

Radio Evropa e Lirë (REL) ka publikuar gjithashtu rrëfimet e disa personave, të cilët thanë se janë larguar nga puna sepse nuk e mbështesin Listën Serbe, por partinë e Rashiqit. Ata kishin qenë të punësuar për disa dekada në institucionet shëndetësore dhe arsimore të Serbisë në Kosovë, të cilat vitet e fundit kontrollohen kryesisht nga Lista Serbe – partia më e madhe e serbëve në Kosovë që gëzon mbështetjen e Beogradit.

Nga ana tjetër, Lista Serbe i ka mohuar këto akuza, duke thënë se bëhet fjalë për “përndjekje dhe frikësim”.

Ndërkohë, në një përgjigje për Radion Evropa e Lirë, Bashkimi Evropian ka bërë të ditur se misioni i tij për sundimin e ligjit në Kosovë, EULEX, po e monitoron këtë rast në terren dhe se pret një “proces të drejtë ligjor gjatë gjithë procedurës, në përputhje me ligjet e Kosovës dhe standardet ndërkombëtare”.

Autoritetet e Kosovës e kanë mirëpritur reagimin e Prokurorisë së Kosovës, ndërsa zyrtarët e Serbia kanë vlerësuar se arrestimet kanë qenë të motivuara politikisht./REL/

Banka Qendrore Europiane rriti normat e interesit për herë të parë pas gati tre vjetësh të enjten, pasi rritja e çmimeve të energjisë e shkaktuar nga lufta me Iranin po nxit inflacionin në rritje, raporton CNN.

BQE-ja e rriti normën bazë të interesit në zonën euro me një të katërtën e një pike përqindjeje, në 2.25%, duke u bërë banka e parë e madhe qendrore që rrit koston e huamarrjes që nga fillimi i luftës më 28 shkurt.

“Lufta në Lindjen e Mesme po gjeneron presione inflacioniste”, tha banka qendrore në një deklaratë. “Perspektiva mbetet e pasigurt, me rreziqe në rritje për inflacionin dhe rreziqe në rënie për rritjen ekonomike”, shtoi ajo.

Inflacioni në 21 vendet që përdorin euron ishte 3.2% muajin e kaluar, nga 3% sa ishte në prill, ndërsa çmimet e energjisë u rritën. BQE-ja, ashtu si bankat e tjera të mëdha qendrore, synon një normë inflacioni rreth 2%.

Europa varet në masë të madhe nga importet e lëndëve djegëse fosile për të furnizuar ekonominë e saj dhe po shpenzon miliarda dollarë më shumë për importet e energjisë për shkak të luftës. Rritja e vrullshme e kostove të energjisë kërcënon të pengojë një rimëkëmbje ekonomike ende të brishtë në rajon, i cili vetëm së fundmi doli nga kriza energjetike e shkaktuar nga pushtimi rus i Ukrainës në vitin 2022.

Inflacioni total arriti kulmin në 10.6% në zonën euro në tetor të vitit 2022. Ndërkohë, normat e interesit arritën nivelin rekord prej 4% në shtator të vitit 2023, pas një fushate të zgjatur të rritjes së normave për të frenuar rritjen e shpejtë të çmimeve.

Fondi Monetar Ndërkombëtar parashikon që ekonomia e zonës euro të rritet me 1.1% këtë vit, sipas një vlerësimi të prillit, që paraqet një ulje prej 0.2 pikë përqindjeje krahasuar me parashikimin e tij të janarit.

Profesori dhe analisti amerikan, Daniel Serwer, në një intervistë për Gazetën Express ka folur për thirrjen e SHBA-së që Kosova t’i bashkohet projektit të gazit amerikan.

I pyetur nëse bashkëngjitja e Kosovës në këtë projekt duhet parë më shumë si veprim strategjik politik dhe jo si teknikalitet, Serwer ka thënë se një gjë e tillë s’mund të bëhet dhe se të dyja aspektet duhet të përputhen me nevojat dhe dëshirat e Kosovës.

“Nuk mund ta bësh këtë. Kjo do të ishte një sipërmarrje e madhe dhe e kushtueshme. Si dimensioni politik/i sigurisë energjetike ashtu edhe dimensioni ekonomik/teknik duhet të përputhen me nevojat dhe dëshirat e Kosovës”, ka thënë Serwer.

Profesori amerikan ka thënë se vendimi për bashkëngjitje në projekt i takon Qeverisë së Kosovës dhe jo të ngarkuarës me punë në Ambasadën amerikane.

“Nëse të gjitha alternativat e tjera janë të barabarta në kosto dhe fizibilitet, sigurisht që do të doja që Kosova të përdorte LNG-në amerikane. Por jo të gjitha alternativat janë të barabarta dhe teknikisht nuk jam i kualifikuar t’i peshoj ato kundrejt propozimit të SHBA-së. Ky është një vendim që duhet ta marrë qeveria e një Kosove sovrane dhe të pavarur, jo unë apo i Ngarkuari i Ambasadës Amerikane”, është shprehur Serwer.

Sa i përket qëndrimit të kryeministrit Albin Kurti se Kosova mund të lidhet në stacionin e gazit në Vlorë dhe nga aty të marrë energji elektrik pavarësisht thirrjes amerikane për tu bërë pjesë e projektit me LNG, Serëer ka thënë se kryeministri kosovar e ka bërë të qartë qëndrimin e tij dhe ndoshta SHBA-ja duhet ta përmirëosjë ofertën.

“Ai e ka bërë të qartë pikëpamjen e tij. Ndoshta SHBA-të duhet ta përmirësojnë ofertën e tyre”, është shprehur Serwer.

Presidenti amerikan, Donald Trump, ka deklaruar se SHBA-të do ta “godasin” Iranin shumë fort sonte dhe do të marrin “kontroll të plotë” të tregjeve të naftës dhe gazit në vend.

Duke përshkruar se çfarë do të bëjë Uashingtoni, ai tha se “në një të ardhme jo shumë të largët, do të marrim ishullin Kharg dhe pika të tjera të infrastrukturës së naftës”.

Sipas presidentit amerikan, kjo do të jetë e ngjashme me atë që Uashingtoni kreu në Venezuelë, të cilën ai deklaron se po “funksionon shkëlqyeshëm” për të dy vendet.

“Shtetet e Bashkuara do ta godasin Iranin shumë fort sonte. Në një moment në të ardhmen jo shumë të largët, ne do të marrim ishullin Kharg dhe pika të tjera të infrastrukturës së naftës, dhe do të marrim kontrollin e plotë të tregjeve të tyre të naftës dhe gazit, ashtu siç kemi bërë me Venezuelën, e cila po funksionon shkëlqyeshëm si për Venezuelën ashtu edhe për Shtetet e Bashkuara të Amerikës. Faleminderit për vëmendjen tuaj ndaj kësaj çështjeje! Presidenti DONALD J. TRUMP”, shkroi Trump në Truth Social.

Ndryshe, Ishulli Kharg është terminali kryesor i naftës i Iranit në Gjirin Persik dhe Trump më parë ka hedhur idenë e marrjes së ishullit nga Irani, duke thënë se “ne mund ta marrim atë lehtësisht”.

Komisioni Qendror i Zgjedhjeve ka procesuar 89,27% nga numërimi i votave të kandidatëve për deputetë.

Deri tani, kur aktualisht janë numëruar 2,230 vendvotime nga 2,498 sa janë në total, në Partinë Demokratike të Kosovës po zhvillohet garë e ashpër mes dy grave kandidate.

Aktualisht, kandidatja për deputete Vlora Çitaku numëron 34 mijë e 932 vota.

Pas saj, vie kandidatja Sala Jashari me 34 mijë e 921 vota. Pra një diferencë prej 11 votash.

Kjo është 10-shja më e votuar e PDK-së:

1.[1] BEDRI HAMZA 105,755 Vota
2.[4] PËRPARIM GRUDA 64,790 Vota
3.[5] ARIAN TAHIRI 56,511 Vota
4.[2] URAN ISMAILI 50,983 Vota
5.[3] VLORA ÇITAKU 34,932 Vota
6.[9] SALA JASHARI 34,921 Vota
7.[12] GANIMETE MUSLIU 26,931 Vota
8.[8] ARBEN MUSTAFA 24,471 Vota
9.[7] RRAHMAN RAMA 24,246 Vota
10.[10] ENVER HOXHAJ 24,168 Vota