Author: K.B.

Situata e sigurisë në Kosovë ka vazhduar të përmirësohet gjatë viteve të fundit, duke bërë që NATO të nisë optimizimin e misionit të KFOR-it dhe të përshtatë gradualisht praninë e saj gjatë vitit të ardhshëm.

NATO përmes një njoftimi ka bërë të ditur se në janar ka ndërprerë dislokimin e forcave rezervë në kuadër të KFOR-it, pas më shumë se dy vitesh rotacioni të vazhdueshëm.

Sipas njoftimit, që nga viti 1999, prania e KFOR-it është përshtatur vazhdimisht për t’iu përgjigjur zhvillimeve të sigurisë në Kosovë.

Pas tensioneve dhe dhunës së shtuar në vitin 2023, përfshirë sulmet e pajustifikuara ndaj paqeruajtësve të KFOR-it në Zveçan, misioni kishte marrë përforcimin më të madh në më shumë se një dekadë, me dislokimin e gati 1,000 trupave shtesë, thuhet tutje.

“NATO dhe KFOR-i janë plotësisht të përkushtuar për sigurinë në Kosovë”, ka deklaruar gjenerali i Forcave Ajrore të SHBA-së, Alexus G. Grynkewich, Komandant Suprem i Forcave Aleate në Evropë.

Ai ka shtuar se kushtet aktuale krijojnë mundësi për optimizimin e mëtejshëm të madhësisë dhe pranisë së KFOR-it.

NATO ka theksuar se uljet e planifikuara do të jenë graduale, të bazuara në kushtet në terren dhe mund të kthehen prapa nëse zhvillimet e sigurisë e kërkojnë një gjë të tillë.

Aleanca ka ritheksuar se KFOR-i do të vazhdojë të ruajë një mjedis të sigurt për të gjithë qytetarët dhe komunitetet në Kosovë, si dhe lirinë e lëvizjes, në përputhje me mandatin e OKB-së, bazuar në Rezolutën 1244 të Këshillit të Sigurimit.

NATO gjithashtu ka rikonfirmuar mbështetjen për dialogun e ndërmjetësuar nga Bashkimi Evropian ndërmjet Kosovës dhe Serbisë, duke u bërë thirrje të dyja palëve që të angazhohen për zgjidhjen e çështjeve të hapura.

Ambasada e Shteteve të Bashkuara të Amerikës (SHBA) në Prishtinë ka përkujtuar të premten 27-vjetorin e hyrjes së forcave të NATO-s në Kosovë, duke theksuar rëndësinë e këtij momenti historik për paqen dhe stabilitetin në rajon.

Në një postim në rrjetin social Facebook, ambasada riafirmon angazhimin e tyre të përbashkët për paqe, stabilitet dhe prosperitet.

“27 vjet më parë, forcat e NATO-s hynë në Kosovë, duke ndihmuar në hapjen e rrugës për paqe dhe stabilitet. Ne nderojmë qëndrueshmërinë e popullit të Kosovës dhe riafirmojmë angazhimin tonë të përbashkët për paqe, stabilitet dhe prosperitet”, kanë shkruar në rrjetin social në Facebook.

Inspektorët e Komunës së Gjilanit, kanë shqiptuar gjoba për dy subjektet afariste, kamionët e së cilave zhytën rrugët me beton, pas ankesave të qytetarëve.

Drejtoria e Inspekcionit, njofton se bazuar në ankesat e pranuara nga qytetarët, ka ndërmarrë veprime konkrete duke shqiptuar gjoba ndaj dy subjekteve afariste, pasi që automjetet e tyrekanë ndotur rrugët me beton.

“Ftojmë të gjithë shoferët dhe operatorët që të respektojnë detyrimet ligjore dhe të tregojnë kujdes të shtuar në ruajtjen e mjedisit dhe pastërtisë publike. Rrugët dhe hapësirat publike janë pasuri e përbashkët dhe mirëmbajtja e tyre është përgjegjësi e secilit prej nesh”, thonë inspektorët e Komunës së Gjilanit.

Drejtorati për Inspekcion, njofton se inspektorët janë në terren dhe do të vazhdojnë me gjoba ndaj të gjithë atyre që ndotin mjedisin.

Donald Trump deklaroi se Shtetet e Bashkuara të Amerikës “i dhanë fund sot luftës me Iranin” dhe se është arritur një marrëveshje historike, sipas së cilës Teherani zyrtarisht pranon se nuk do të zotërojë kurrë armë bërthamore.

Trump i bëri këto deklarata gjatë një tubimi virtual në mbështetje të kandidatit për Senat, Barry Moore, duke theksuar se negociatat janë përmbyllur me sukses.

“Nuk e di nëse keni dëgjuar, por sot i dhamë fund luftës me Iranin. Ata ranë dakord që të mos kenë kurrë armë bërthamore, gjë për të cilën ne kemi këmbëngulur. Sot i mbyllëm llogaritë me Iranin. Njerëzit do të fillojnë të kthehen në shtëpi shumë shpejt”, u tha ai mbështetësve të tij.

Trump:

I don't know if you heard, but we ended the war with Iran today. And they have agreed never to have a nuclear weapon, something that we insisted on. pic.twitter.com/xiFLpFTVty

— Clash Report (@clashreport) June 12, 2026

Presidenti amerikan theksoi se marrëveshja është praktikisht e përfunduar dhe se përmbush të gjitha kërkesat e Uashingtonit, duke përfshirë edhe kthimin e afërt të ushtarëve amerikanë në shtëpi. Ai veçoi një element të negociatave që lidhet me kufizimet ndaj Teheranit.

“Gjëja më e rëndësishme është se në Iran nuk do të ketë armë bërthamore. Kjo do të thotë se ata jo vetëm që nuk do t’i zhvillojnë, por as nuk do t’i blejnë”, shpjegoi Trump dhe shtoi “kishin një klauzolë sipas së cilës nuk do të zhvillonin armë. I pyeta: ‘Po për blerjen çfarë ndodh?’. Më thanë se kjo nuk ishte përfshirë. Dy ditë më vonë, pranuan edhe këtë. Morëm gjithçka që donim”.

Këto deklarata optimiste pasojnë njoftimet e mëparshme të Trumpit se nënshkrimi zyrtar i marrëveshjes për përfundimin e konfliktit mund të mbahet që këtë fundjavë në Evropë.

Më herët, ai u kishte thënë gazetarëve se marrëveshja do të sjellë përfitime të menjëhershme ekonomike dhe gjeopolitike, veçanërisht sa i përket rrugëve globale të transportit detar.

“Ngushtica e Hormuzit do të hapet zyrtarisht sapo të nënshkruajmë marrëveshjen. Kjo mund të ndodhë shumë shpejt, ndoshta gjatë fundjavës në Evropë. Unë nuk do të mund të jem i pranishëm, por atje do të jetë zëvendëspresidenti JD Vance dhe disa persona të tjerë”, deklaroi Trump.

Megjithatë, ndërsa Uashingtoni po e paraqet këtë si një fitore diplomatike, nga ana iraniane ende nuk ka konfirmim zyrtar për arritjen e një marrëveshjeje përfundimtare apo për pranimin e të gjitha kushteve të përmendura.

Kujtojmë se situata më herët ishte në prag të përshkallëzimit. Trump anuloi në momentin e fundit sulmet ushtarake dhe bombardimet e planifikuara ndaj Iranit, pasi mori konfirmim se negociatat ishin ngritur në nivelin më të lartë të udhëheqjes iraniane.

Në një reagim në rrjetet sociale kryedemokrati Sali Berisha bën me dije se pas një rishqyrtimi të thelluar nga DASH, ai dhe familjarët e tij, nuk janë më të privuar nga mundësia e udhëtimit në SHBA. Berisha falënderon administrën Trump dhe Sekretarin Rubio për korrigjimin sipas tij të një vendimi të padrejtë, që ishte bazuar në lobimin korruptiv të Rmës dhe Sorosit.

REAGIMI

Të dashur miq,

Që nga dita e djeshme, pas një rishqyrtimi të thelluar nga Departamenti i Shtetit të çështjes time, unë dhe familjarët e mi nuk jemi më të privuar nga mundësia e udhëtimit në Shtetet e Bashkuara të Amerikës. Pra, dje u korrigjua një vendim i padrejtë i administratës së mëparshme të SHBA-së ndaj meje dhe familjes sime.

Me këtë rast, dua të falënderoj administratën e Presidentit Trump dhe Sekretarin Rubio për korrigjimin e këtij vendimi të padrejtë, i cili ishte i bazuar fund e krye në lobimin korruptiv të Edi Ramës dhe mentorit të tij, George Soros.

Unë falënderoj gjithashtu familjen time, miqtë e mi shqiptar dhe të huaj, bashkëpunëtorët e mi, anëtarët dhe mbështetësit e PD-së për solidaritetin dhe mbështetjen e tyre të tejet të çmuar, të cilën e dëshmuan ndaj meje në sagen time për të vërtetën dhe dinjitetin njerëzor.

Mirënjohje të veçantë dua t’u shpreh sot mbi gjysmë milioni qytetarëve shqiptarë, të cilët, në kushtet tejet të vështira të një autokracie elektorale dhe një narkoregjimi, votuan për mua dhe Partinë Demokratike.

Duke përfunduar, ftoj anëtarët dhe mbështetësit e Partisë Demokratike të vazhdojmë pa rreshtur përpjekjet tona për rikthimin e votës së lirë dhe të ardhmes së merituar të qytetarëve shqiptarë

Ndihmoi Brazilin të fitonte Kupën e Botës në 1970, vdes në moshën 86-vjeçare Brito
Read more

Duke debatuar për koalicionet e mundshme pas rezultateve të zgjedhjeve të 7 qershorit, analisti Ilir Deda ka deklaruar se zgjidhja më e mirë për vendin do të ishte ndarja e pushtetit ndërmjet forcave politike.

Ai theksoi se Qeveria e ardhshme duhet të formohet përmes një koalicioni, duke vlerësuar se një qeveri e tillë mund të sjellë më shumë rezultate dhe të jetë më funksionale në punën e saj.

“Për këtë vend, më e mira do të ishte që presidenti të zgjidhej drejtpërdrejt nga populli”, tha Deda, duke shtuar se kur të vijë momenti i duhur do të flasë edhe për emra konkretë. /Gazeta10

30 deputetë të legjislaturës së kaluar nuk pritet të jenë pjesë e përbërjes së re të Kuvendit.

Nga numërimi i mbi 90 për qind të votave për kandidatët për deputetë, jashtë Kuvendit nga Lëvizja Vetëvendosje kanë mbetur: Fatmire Kollçaku-Mullhaxha, Naim Bardiqi, Fjolla Ujkani, Ejup Ahmeti, Fitim Haziri, Vigan Qorrolli, Ilir Qeriqi, Salih Zyba, Drita Pajaziti, Arsim Demi, Agon Batusha, Luan Aliu, Egzon Azemi, Shqipe Isufi, Fahrush Rexhepi, Arjeta Rexhyepi, Avdullah Klinaku, Mytaher Haskuka, Bylbyl Sokoli, Bajram Mavriqi, Rozeta Hajdari, Fatos Geci e Enver Dugolli.

Nga PDK-ja vota për t’u bërë sërish deputetë nuk siguruan Ariana Musliu-Shoshi, Arbnore Salihu dhe Nait Hasani.

Ndërkaq, ish-deputetja Adelina Thaqi-Meta është e vetmja nga Lidhja Demokratike që nuk arriti të marrë vota për t’u kthyer edhe njëherë në Kuvend, përkundër që partia e saj rriti numrin e mandateve për 5 sosh.

E jashtë Kuvendit nga Lista Serbe mbetën Milan Kostiq, Verica Cerniq dhe Nemanja Bisevac.
Bazuar në rezultatet preliminare, Lëvizja Vetëvendosje ka siguruar 48 ulëse në Kuvend, PDK-ja 24, LDK-ja 20 dhe AAK-ja 8.

Në përbërjen e re pritet të jenë 29 gra pa ndihmën e kuotës gjinore, ndërsa 3 të tjera mund të hyjnë përmes kuotës.

Kuota gjinore do t’i lërë pa ulëse disa kandidatë burra në PDK dhe AAK.

E në AAK, për t’ia liruar vendin Albana Bytyqit do të mbetet pa mandat Agim Çeku.

Kandidatja për deputete nga Partia Demokratike e Kosovës (PDK), Sala Jashari, ka reaguar me pikëllim të thellë pas ndarjes nga jeta të Sahit Jasharit, duke e kujtuar atë si një figurë të shquar të historisë së Kosovës dhe simbol të dashurisë për atdheun.

Përmes një dedikimi emocional, ajo ka shprehur vështirësinë për të gjetur fjalët e duhura në këto momente dhimbjeje, duke e cilësuar Sahit Jasharin si një njeri të fortë, të formuar nga guximi dhe përkushtimi ndaj lirisë.

“Vështirë të flas. Në raste të tilla, fjalët heshtin dhe qetësia sfidon edhe psherëtimat. Ti, njeri i çeliktë, i farkëtuar nga guximi dhe dashuria për atdheun. Jetove një jetë plot vepra, e emri yt ka peshë të madhe për ne; je pjesë e historisë së Kosovës”, ka shkruar Jashari.

Ajo ka theksuar se kujtimi dhe vepra e Sahit Jasharit do të mbeten trashëgimi e çmuar për brezat e ardhshëm, duke e quajtur atë “qëndistar të lirisë” dhe motiv për të vazhduar dashurinë ndaj vendit.

“Ti do të mbetesh motiv për ne dhe, për shumëkënd, arsyeja që na mban të vazhdojmë ta duam vendin tonë. Lavdi jetës dhe veprës sate! Faleminderit për gjithçka mixhë!”, ka përfunduar ajo.

Mesazhi i Sala Jasharit vjen në kohën kur shumë qytetarë, bashkëluftëtarë dhe personalitete publike po shprehin respektin dhe mirënjohjen e tyre për jetën dhe kontributin e Sahit Jasharit në rrugën e Kosovës drejt lirisë.