Author: K.B.

Ministrja në detyrë e Drejtësisë, Donika Gërvalla, ka njoftuar se Qeveria e Kosovës ka miratuar 3 milionë euro për mbulimin e kostos së Kartonit të Gjelbër për bashkatdhetarët gjatë sezonit veror.

Sipas njoftimit, nga muaji korrik e tutje, mërgimtarët që hyjnë në Kosovë me vetura nuk do të përballen me këtë shpenzim shtesë, pasi kostoja do të mbulohet nga shteti në kuadër të masës 4.5 të Pakos së Ringjalljes Ekonomike, e cila synon mbështetjen e mërgatës.

Në deklaratën e saj, Gërvalla theksoi rëndësinë historike të diasporës në shtetndërtimin e Kosovës, duke e cilësuar atë si një shtyllë të vazhdueshme të zhvillimit të vendit.

“3 milionë euro për mbulimin e Kartonit të Gjelbër për mërgatën gjatë sezonit veror. Qeveria miratoi 3 milionë euro për mbulimin e Kartonit të Gjelbër për mërgatën gjatë sezonit veror. Nga korriku e tutje, mërgimtarët që hyjnë në Kosovë me vetura nuk do të përballen me këtë kosto shtesë, pasi ajo do mbulohet nga shteti në kuadër të zbatimit të masës 4.5, mbështetja e mërgatës nga Pakoja e Ringjalljes Ekonomike”, ka shkruar ministrja në detyrë.

Gërvalla ka shtuar se mërgata jonë ka qenë pjesë e pandashme e çdo etape të shtetndërtimit të Kosovës, nga sakrifica për liri, te shpallja e pavarësisë, e deri te forcimi i institucioneve dhe zhvillimi ekonomik e shoqëror i vendit.

“Kjo masë është shprehje e respektit të jashtëzakonshëm të shtetit ndaj këtij roli historik dhe të vazhdueshëm tuajin. Është një mënyrë për t’ua lehtësuar rrugën drejt shtëpisë dhe për t’ua thënë qartë, Kosova ju pret gjithmonë si pjesë të pandashme të saj. Bashkatdhetarë, mirë se vini në shtëpinë tuaj. Kosova do t’ju mbajë gjithmonë ngrohtësisht në zemër”, ka shkruar Gërvalla.

Lidhja Demokratike e Kosovës (LDK) mund të unifikohet dhe t’i ofrojë votat e 18 deputetëve të saj të zgjedhur në Kuvendin e Kosovës, në rast se Lëvizjen Vetëvendosje, si partia e parë fituese e zgjedhjeve të parakohshme parlamentare të 7 qershorit, i ofron postin e presidentit të vendit në një marrëveshje eventuale.

Kështu tha për Radion Evropa e Lirë, nënkryetari i LDK-së, Lutfi Haziri.

Sipas tij, votat e LDK-së mund të unifikohen në rast se emri i presidentit del nga radhët e LDK-së dhe jo përtej kësaj partie.

“Në rast se ky emër është Lumiri Abdixhiku, kryetar i partisë ose emri im, atëherë mund të unifikohemi. Lumirit i bie të jetë i pari, sipas detyrës zyrtare, sepse është kryetar. Pas Lumirit, konsensus më të madh brenda LDK-së kam unë”, theksoi Haziri.

Në zgjedhjet e 7 qershorit, LDK-ja garoi me emrat e Vjosa Osmanit si kandidate për presidente dhe të Lumir Abdixhikut si kandidat për kryeministër.

jo parti siguroi 18 ulëse në Kuvendin e Kosovës, por sipas Hazirit, për emrin e Osmanit, LDK-ja nuk do të mund të sigurojë mbështetjen e të gjithë deputetëve të saj.

“Mund të jetë sikur herën e kaluar, pra, dy-tri vota, mund të ndahen, por në rastin e Lumirit ose rastin tim, mund të unifikohemi”, sqaroi Haziri.

Osmani më herët ka deklaruar se emri i saj “nuk ka qenë, as nuk është e as nuk do të bëhet pengesë në krijimin e institucioneve”.

Haziri theksoi se LDK-ja aktualisht “ka vetëm një adresë kryesore”, të cilës mund t’i drejtohet Lëvizjen Vetëvendosje, për ndonjë marrëveshje eventuale.

“Vetëm me Lumir Abdixhikun. Ai është kryetar. Ne nuk kemi mbledhur Kuvendin [e LDK-së]. Nëse mblidhet Kuvendi ose ka akt të dorëheqjes, atëherë kemi situatë të re. Deri atëherë është vetëm një adresë dhe nuk ka adresë të dytë”, tha Haziri për Radion Evropa e Lirë.

Kjo është përgjigja e tij ndaj deklaratave të Donika Gërvallës, ministre në detyrë e Drejtësisë në Qeverinë e Albin Kurtit, kryetarit të LVV-së.

Gërvalla në një intervistë për televizionin vendor KTV, duke komentuar zhvillimet brenda LDK-së, tha se brenda saj “janë disa rryma të ndryshme”.

Sipas saj, LVV-ja e ka problem të flasë me LDK-në, sepse “nuk e dimë me cilën rrymë je duke folur”, për ndonjë marrëveshje eventuale për konsolidimin e institucioneve të vendit, pas zgjedhjeve të 7 qershorit.

“Unë po kërkoj që ai që potencialisht ulet për të negociuar me ne, të jetë edhe personi që e përfaqëson këtë parti. Ne nuk mund të ulemi me pesë veta të ndryshëm në LDK. Sepse nëse LDK-ja dëshiron të jetë faktor në zgjedhjen e presidentit, atëherë ata duhet të garantojnë edhe votat e grupit të vetë parlamentar”, theksoi Gërvalla.

Në anën tjetër, nënkryetari i LDK-së, Haziri shpjegoi se deri më tash në adresë të LDK-së “nuk ka ardhur nga LVV-ja ndonjë ftesë” për të biseduar për ndonjë marrëveshje eventuale.

Sipas tij, në rast se një ftesë e tillë arrin në adresë të partisë, atë do ta shqyrtojnë organet e LDK-së dhe vendimmarrja do të jetë e brendshme varësisht se cila do të jetë oferta e LVV-së.

Zgjedhjet e parakohshme të 7 qershorit u mbajtën pasi legjislatura paraprake dështoi të votonte një president të ri brenda afatit kushtetues, pasi Vjosa Osmanit i skadoi mandati pesëvjeçar në prill.

Nga LVV-ja kanë thënë se janë të gatshëm të bisedojnë për çështjen e krijimit të institucioneve të reja, pasi të certifikohet rezultati i zgjedhjeve të 7 qershorit.

Sipas Kushtetutës, për themelimin e Kuvendit dhe zgjedhjen e Qeverisë kërkohet vota e së paku 61 deputetëve.

Fituesja e zgjedhjeve, LVV-ja e Kurtit pritet të ketë 53 mandate në Kuvendin prej 120 vendesh dhe ajo mund t’i bëjë numrat, së bashku me pakicat joserbe, për Kuvendin dhe Qeverinë.

Por, për çështjen e presidentit kërkohen të paktën 80 vota – apo dy e treta e deputetëve – në dy rundet e para, dhe presidenti i ri do të mund të zgjidhej me 61 vota në rundin e tretë.

Gjykata Themelore në Prizren, Departamenti i Përgjithshëm Gjyqtarja e procedurës paraprake, ka caktuar masën e paraburgimit në kohëzgjatje prej një muaji, për të pandehurin A.G., , e cila mund të zgjasë deri më datën 22.07.2026, për shkak të dyshimi të bazuar se ka kryer veprën penale, “Asgjësimi, dëmtimi, ose heqja e pajisjeve mbrojtëse dhe rrezikimi i sigurisë në vendin e punës.

Sipas një njoftimi për media thuhet se gjykata me rastin e caktimit të paraburgimit, ndaj të pandehurit ka vlerësuar se ekzistojnë arsyet ligjore për caktimin e kësaj mase, dhe nga provat e mbledhura deri në këtë fazë, rrjedh dyshimi i bazuar se: “Me datë 22 qershor, rreth orës 08:15 minuta, në lagjen Arbanë, në Prizren, në objektin banesor, i pandehuri A.G., si person përgjegjës për sigurinë dhe shëndetin në vendin e punës, nga pakujdesia nuk i instalon pajisjet mbrojtëse, nuk siguron përdorimin e tyre kur është e nevojshme dhe nuk vepron në pajtim me dispozitat apo rregullat teknike mbi masat për sigurinë në vendin e punës dhe me këtë rrezikon jetën e njerëzve, në atë mënyrë që ditën kritike i pandehuri si shofer dhe përgjegjës i pompës së betonit, nuk e vendos në mënyrë të sigurt pompën e betonit, ku gjatë zbrazjes së betonit nga mikseri i betonit për një moment rrëshqet pompa e betonit, ku nga rrëshqitja shkëputet një gyp nga pompa dhe e godet viktimën V.M., në kokë duke i shkaktuar vdekjen. Kurse a do të argumentohen këto fakte do të vlerësohet në fazat e mëtejme të procedurës penale”.

Tutje thuhet se gjyqtarja e procedurës paraprake, në bazë të provave materiale të mbledhura deri në këtë fazë, duke gjetur si të bazuar dyshimin e bazuar për kryerjen e veprës penale nga i pandehuri, vlerëson se me masën e paraburgimit do të arrihet të sigurohet prezenca e të pandehurit dhe se do të mund të zhvillohen normalisht dhe pa pengesa procedura penale.

“Duke pasur parasysh se faza hetimore është në procesin fillestar, duhet të dëgjohen dëshmitarët e rastit, të merret në pyetje i pandehurit, dhe të merren edhe prova tjera materiale, gjithashtu duke vlerësuar edhe peshën e rëndë të pasojave që janë shkaktuar në vendin e punës, Gjyqtarja e procedurës ka vlerësuar se caktimi i paraburgimit tani për tani është mase adekuate dhe e domosdoshme. Gjykata po ashtu pret zhvillim të shpejtë dhe efikas të rastit nga Prokurori i Shtetit, me qëllim të zbardhjes së rastit”, thuhet në njoftim.

Këshilli Prorokurorial i Kosovës ka njoftuar se intervistat për Kryeprokuror të Shtetit do të mbahen me datë një korrik.

Në njoftim shtohet edhe se, hartimi i pyetjeve do të fillojë në ora 08:00, ndërsa intervistat do të fillojnë nga ora 11:00, në objektin e Këshillit Prokurorial të Kosovës, salla e takimeve kati VI.

Postimi:

Bazuar në nenin 3 (6A) të Rregullores 07/2026 për ndryshimin dhe plotësimin e Rregullores 07/2024 për emërimin e Kryeprokurorit të Shtetit dhe Kryeprokurorëve të Prokurorive të Republikës se Kosovës, Këshilli Prorokurorial i Kosovës njofton palët e interesuara për monitorim, se intervistat për Kryeprokuror të Shtetit do të mbahen me datë 01 korrik 2026.

Hartimi i pyetjeve do të filloj në ora 08:00, ndërsa intervistat do të fillojnë nga ora 11:00, në objektin e Këshillit Prokurorial të Kosovës, salla e takimeve kati VI.

Njoftohen të gjithë të interesuarit që t’u përmbahet të gjitha rregullave dhe orareve të përcaktuara nga KPK-ja dhe me mirëkuptim luten që për shkak të hapësirës së kufizuar, të konfirmojnë emrin e një përfaqësuesi/monitoruesi duke kontaktuar Zyrën pёr Komunikim Publik në adresën: [email protected] deri më datë 26 qershor 2026.

ORARI I INTERVISTAVE -KANDIDATËT PËR KRYEPROKURORË TË SHTETIT

E mërkurë, 01 korrik 2026

Takimi i Panelit Vlerësues për hartimin e pyetjeve standarde (tre orë para fillimit të intervistave) 08:00

1. z. Atdhe Dema nga ora 11:00

PAUZA 12:00-13:00

2. z. Naim Abazi nga ora 13:00

3. z. Rafet Halimi nga ora 14:15

4. z. Shqipdon Fazliu nga ora 15:30

5. z. Zejnulla Gashi nga ora 16:45

Janë zbardhur detaje të reja lidhur me aksidentin tragjik që ndodhi në orët e para të mëngjesit të sotëm në Lezhë, ku humbi jetën shtetasi kosovar, Kadri Behluli.

Sipas raportimit të Top Channel, dyshohet se viktima ka humbur kontrollin e automjetit si pasojë e përgjumjes gjatë drejtimit të mjetit.

“Familja po udhëtonte me automjet në aksin rrugor Lezhë–Milot. Burime nga policia bëjnë me dije se dyshohet që drejtuesi i automjetit humbi kontrollin si pasojë e përgjumjes dhe u përplas me një kamion. Si pasojë e goditjes së fortë, drejtuesi i automjetit, shtetas nga Kosova, humbi jetën”, raportoi gazetarja e Top Channel nga Lezha.

Nga aksidenti mbetën të lënduar edhe djali i viktimës dhe motra e tij, të cilët po marrin trajtim mjekësor.

Ndërkohë, autoritetet vijojnë hetimet për të zbardhur plotësisht rrethanat e ngjarjes.

Ndërmarrja publike “Trepça” ka rikthyer në menaxhim një lokal afarist në zemër të Prishtinës, më shumë se 27 vite pas përfundimit të luftës.

Prona ndodhet në një nga zonat më strategjike të kryeqytetit, në rrugën “Johan V. Hahn”, pranë Hotel Grand, Sheshit “Zahir Pajaziti” dhe bulevardit “Xhorxh Bush”, duke e bërë atë një prej hapësirave më të kërkuara komerciale në qendër të qytetit.

Lokali, i njohur për publikun si “Tuneli”, përfshin një sipërfaqe prej 190.75 m², me hapësirë kryesore afariste, zyra, nyje sanitare dhe hyrje, si dhe një terasë prej 47 m².

Sipas vlerësimeve të bëra, duke u bazuar në lokacionin dhe potencialin afarist, prona kap vlerën e tregut mbi 900 mijë euro. Në këtë zonë, qiratë për metër katror variojnë nga 15 deri në 17 euro, çka e bën objektin një aset me rëndësi të veçantë ekonomike për ndërmarrjen.

Rikthimi i këtij lokali në menaxhim nga Trepça vlerësohet si hap që rrit të hyrat e qëndrueshme dhe përmirëson performancën financiare të ndërmarrjes.

Ky veprim, sipas njoftimit, është pjesë e përpjekjeve për identifikimin, mbrojtjen dhe funksionalizimin e pronave të Trepçës, duke synuar forcimin e bazës së saj ekonomike për të ardhmen.

“Trepça vazhdon të rikthejë atë që i takon dhe ta shndërrojë pasurinë e saj në vlerë të prekshme ekonomike”, thuhet në fund të njoftimit.

Dy kandidatët për deputetë nga radhët e Partisë Demokratike të Kosovës në zgjedhjet parlamentare të 7 qershorit, Bekim Haxhiu e Qëndrim Kryeziu kanë dorëzuar ankesë në Gjykatën Supreme, me kërkesë për rinumërimin e plotë të votave të kandidatëve të kësaj partie, raporton EO.

Pas dorëzimit të ankesës, Haxhiu ka thënë se procesi i rinumërimit të votave i urdhëruar nga Komisioni Qendror i Zgjedhjeve (KQZ), ka treguar që ka pasaktësi në numërimin që është bërë në qendrat komunale.

“Sot kemi dorëzuar në Gjykatën Supreme ankesën me arsyetimin tani më të njohur, që procesi i rinumërimit i urdhëruar nga KQZ, ka treguar që ka pasaktësi në numërimin që është bërë nëpër qendrat komunale të numërimit dhe kjo marzhë e gabimit në numërimin fillestar nuk është e vogël, sepse në këtë rinumërimin e urdhëruar nga KQZ janë numëruar vetëm 5201 vota të Partisë Demokratike dhe në këtë rinumërim janë 220 vota të cilat janë shtuar ose i janë hequr kandidatëve vota preferenciale. Prandaj, për të pasur një rezultat të saktë, kërkojmë që Gjykata Supreme të miratojë kërkesën tonë dhe të urdhërojë KQZ për numërimin e votave preferenciale për kandidatë dhe deputetë të Partisë Demokratike, sepse edhe ligji e obligon që procedura e numërimit të fletëvotimeve të udhëhiqet nga saktësia dhe e jep edhe mundësinë e rinumërimit në rast se evidentohen pasaktësi në numërimin fillestar”, ka thënë ai.

Haxhiu, ka deklaruar se po kërkojnë rinumërim të votave të Partisë Demokratike të Kosovës.

“Përtej dyshimeve tona, tani kemi një proces të urdhëruar nga KQZ, që është procesi i rinumërimit të 185 kutive, apo vendvotimeve. Ky proces i urdhëruar nga KQZ ka vërtetuar pasaktësi në numërimin fillestar dhe kjo tanimë është fakt i provuar nga vetë KQZ, prandaj edhe po kërkojmë që të ketë një rinumërim të votave të Partisë Demokratike, sepse sipas rregullativit të KQZ, votat e subjekteve politike nuk numërohen nga komisionerët e atij subjekti politik, por numërohen nga komisionerë ose numërues të subjekteve tjera politike. Tani a kanë qenë gabime të qëllimshme apo të paqëllimshme, Kushtetuta e Kosovës, neni 45 në të drejtën zgjedhore, garanton që përveç të drejtës për votim, ekziston edhe e drejta që saktësia e rezultatit duhet të jetë dhe vota e njehur, ashtu siç e ka hedhur votuesi, nuk ka të drejtë askush sipas Kushtetutës dhe ligjit të Kosovës të devijojë votën e qytetarit, qoftë edhe 2, 3, 5, 6, 500 vota rezultati zgjedhor duhet të jetë i saktë, ashtu siç e ka hedhur votuesi në kuti të votimit”, ka shtuar Haxhiu.

Ndërsa, Qëndrim Kryeziu, ka deklaruar se do të shfrytëzojnë të drejtat e tyre deri në fund.

“Ne kur i kemi tërhjekë dokumentet bashkë, na kanë thënë që gabimet e vogla janë minimale, kështu që tha s’keni nevojë me u anku, po ua themi shoqërisht, por nuk janë këto gabime të vogla minimale, as gabime teknike, sepse është thjeshtë numri shumë i ngushtë që të jesh deputet, si për kolegun, si për mua, me një marzhë gabimi prej 589 që ka ndodhur në sistemin e KQZ, pastaj thanë jo vetëm dy ti kemi shtu, po ne e kemi pa atë vetë prezent, na thanë që është gabim teknik i vogël, po duhet tha me vazhdu.

Ne i kemi të drejtat tona me i shfrytëzu deri në maksimum, edhe të drejtën e fundit në rinumërim kemi me bë ankesë edhe aty dhe do të kërkojmë çdo mundësi të mundshmë që është në të drejtën tonë dhe në të drejtën e Zotit që ne ta shfrytëzojmë maksimalisht, sepse çdo votë ka rëndësi, ka vlerë dhe s’ka nevojë askush të bëhet deputet me votat tona. Kështu që ne do t’i shfrytëzojmë të gjitha mundësitë që na takojnë me ligj.

Dyshojmë sepse unë vetë kam qenë duke përcjellur në telefon faqen zyrtare të KQZ dhe 589 më janë shtuar dhe më është thënë që është gabim teknik, ndërsa në përgjigjen e ankesës më kanë thënë vetëm 2 vota, si 2 vota si 589 vota, quhet vjedhje.

Kështu që ai që i ka vjedhur le ta bajë barrën dhe le të mësohet të punojë një herë e përgjithmonë pa vjedhje, pa asnjë gjë”, ka thënë Kryeziu.

Paneli Zgjedhor për Ankesa dhe Parashtresa (PZAP) të hënën ka refuzuar si të pabazuara ankesat e kandidatëve për deputet nga Partia Demokratike e Kosovës (PDK), Bekim Haxhiu dhe Qëndrim Kryeziu, të cilët kishin kërkuar rinumërimin e plotë të votave preferenciale të kandidatëve të këtij subjekti politik pas rinumërimit të 185 vendvotimeve të rregullta.

Policia në Hungari ka arrestuar një punëtor spitali, i dyshuar se në mënyrë “obsesive” ka mbledhur dhe konsumuar pjesë të trupave të njeriut.

Shërbimi Kombëtar i Policisë së Hungarisë njoftoi se gjatë hetimeve janë sekuestruar kafka, eshtra dhe “lëkurë e përgatitur e fytyrës së njeriut” nga një 30-vjeçar nga Budapesti, i cili ishte ndaluar javën e kaluar.

Sipas policisë, i dyshuari dyshohet se ka siguruar pjesë trupash si përmes punës së tij në një spital në Budapest, ashtu edhe duke gërmuar varreza të braktisura në Hungari dhe Sllovaki.

Gjatë kontrollit në pronat e tij, autoritetet kanë gjetur një sërë pjesësh trupi, përfshirë një fytyrë të ruajtur njerëzore, eshtra në një valixhe, një këmbë të plotë, një tru, një dorë, kafka dhe një zemër në një kavanoz. Policia tha se zemra është ende duke u ekzaminuar për të përcaktuar nëse i përket njeriut apo kafshës.

Autoritetet bëjnë të ditur se i dyshuari ka pranuar përdorimin e paligjshëm të trupave njerëzorë dhe ka deklaruar se kishte interes të veçantë për pjesët e trupit, të cilat, sipas tij, i kishte përgatitur dhe konsumuar.

Po ashtu, ai është përshkruar si person me interes për anatominë dhe patologjinë, ndërsa dyshohet se kishte ndarë me të afërm dhe miq pasionin e tij dhe fotografi të koleksionit.

Hetimet po vazhdojnë për të përcaktuar origjinën e saktë të pjesëve të trupave, ndërsa autoritetet nuk përjashtojnë ngritjen e akuzave të tjera ndaj tij.