Author: K.B.

Policia e Tiranës ka proceduar penalisht 11 shtetas, në lidhje me tubimet e zhvilluara në kryeqytet më 22 dhe 23 qershor 2026, të dyshuar për përfshirje në veprime që kanë penguar rendin dhe qetësinë publike.

Sipas njoftimit zyrtar, personat e proceduar në gjendje të lirë akuzohen për veprën penale “Pengimi i qarkullimit të mjeteve të transportit”. Ata janë: D. G., 50 vjeç; I. D., 55 vjeç; E. E., 32 vjeç; E. B., 29 vjeç; V. D., 30 vjeç; E. Z., 26 vjeç; Xh. P., 27 vjeç; B. K., 36 vjeç; D. B., 32 vjeç; Sh. B., 34 vjeç dhe I. M., 28 vjeç.

Nga veprimet hetimore dyshohet se këta shtetas kanë orientuar dhe zhvilluar tubimin në zona të ndryshme nga ato të njoftuara zyrtarisht, konkretisht në kryqëzimin e rrugës “Urani Pano” me bulevardin “Zogu I”, në kryqëzimin e rrugës “Ibrahim Rugova” me Rrugën e Kavajës, si dhe në kryqëzimin e rrugës “Ibrahim Rugova” me bulevardin “Gjergj Fishta”.

Si pasojë, në këto akse me fluks të lartë qarkullimi, është penguar lëvizja e lirë e automjeteve dhe qytetarëve.

Materialet procedurale i janë referuar Prokurorisë së Tiranës për veprime të mëtejshme. /euronews.al/

Ambasada britanike në Kosovë ka lansuar UK-Kosovo Tech Hub, një platformë e re e vendosur në Tech Park Prishtina, me synimin për të lidhur sektorin e teknologjisë informative dhe komunikimit (TIK) të Kosovës me partnerë dhe mundësi biznesi në Mbretërinë e Bashkuar.

Në ceremoninë e lansimit, ambasadori britanik Jonathan Hargreaves tha se niveli i tregtisë dhe investimeve ndërmjet dy vendeve mbetet shumë i ulët dhe nuk pasqyron potencialin e bashkëpunimit ekonomik, raporton Ekonomia Online

Ai theksoi se disa kompani britanike kanë shqyrtuar investimet në Kosovë, por janë tërhequr për shkak të mungesës së qartësisë, përgjigjeve të ngadalta institucionale dhe moszbatimit të zotimeve.

“Ne jemi krenarë për marrëdhënien që kemi pasur gjatë kaq shumë viteve, por e dimë se ajo nuk mund të qëndrojë në vend. Marrëdhëniet tona duhet të rriten dhe të ndryshojnë në përgjigje të asaj që po ndodh në botë. Nuk duhet shumë për të kuptuar se jetojmë në një botë ku duhet të garojmë edhe më shumë për talentin dhe investimet, si dhe të mbështetemi në besim. Për vëmendje. Dhe, në të vërtetë, për besim. Ju e dini se besimi në biznes ka shumë rëndësi dhe kjo është arsyeja pse mendoj se kjo qendër do të ketë kaq shumë rëndësi”, tha Hargreaves.

Duke folur për potencialin e Kosovës, ai vlerësoi fuqinë punëtore të re dhe sektorin në zhvillim të teknologjisë.

“Dhe mendoj se për Kosovën, për marrëdhënien tonë, kjo tregon përmasat dhe potencialin e këtij partneriteti. Sepse vetë Kosova ka gjithashtu diçka jashtëzakonisht të fuqishme. Krahasuar, mendoj se mund ta them me siguri, me pjesën tjetër të rajonit, ju keni një fuqi punëtore të re, të aftë dhe shumëgjuhëshe, si dhe një brez të tërë, shumë prej të cilëve janë të përfaqësuar këtu sot, që përshtatet shpejt, mëson shpejt dhe do të ndërtojë një ekonomi të re. Një sektor teknologjik që tashmë punon përtej kufijve dhe me klientë në gjithë Evropën dhe më gjerë. Pra, nuk ka asnjë dyshim për këtë potencial. Pyetja është nëse mund të gjejmë mjetet, energjinë dhe lidhjet për ta shndërruar këtë potencial në partneritete reale, vende pune, eksporte dhe inovacion të përbashkët”, tha ai.

Ambasadori britanik tha se shkëmbimet tregtare dhe investimet mes Kosovës dhe Mbretërisë së Bashkuar mbeten nën nivelin e pritshëm.

“Kjo më çon te një pikë pak më sfiduese, që lidhet me tregtinë dhe investimet ndërmjet Mbretërisë së Bashkuar dhe Kosovës në përgjithësi. Mendoj se tregtia dhe investimet ndërmjet Kosovës dhe Mbretërisë së Bashkuar janë shumë, shumë të ulëta. Dhe kjo është një problem. Nuk pasqyron thellësinë e marrëdhënies sonë, nuk pasqyron besimin që kemi dhe nuk pasqyron potencialin real që ekziston në teknologji, shërbime digjitale, energji, arsim dhe inovacion. Dhe nuk është sepse njerëzit në Mbretërinë e Bashkuar nuk janë të interesuar. E di gjithashtu se nuk është sepse njerëzit në Kosovë nuk janë të interesuar për Mbretërinë e Bashkuar”, tha ai.

Sipas tij, investitorët seriozë kërkojnë institucione funksionale dhe siguri për zbatimin e zotimeve.

“E di se shumë kompani britanike e kanë shqyrtuar seriozisht Kosovën. Disa prej tyre kanë gjetur një mjedis të gatshëm për investime dhe ndërtim marrëdhëniesh. Por e di gjithashtu se bizneset kanë nevojë për rregulla të qarta, përgjigje në kohë, institucione që janë të përgjegjshme, mbështetëse dhe që ofrojnë siguri se zotimet do të përmbushen. Dhe kur nuk e marrin këtë, kur nuk e marrin këtë, ata vendosin të shkojnë diku tjetër”, tha ai.

Ai shtoi se ka pasur kompani britanike që kanë hequr dorë nga investimet në Kosovë për shkak të pengesave administrative.

“Unë e di se ka pasur kompani britanike që kanë ardhur në Kosovë, e kanë shqyrtuar Kosovën dhe kanë vendosur se nuk ishte vendi i duhur për to. Sepse rruga ishte e paqartë, përgjigjet ishin të ngadalta dhe mungonte zbatimi i zotimeve. Dhe kjo ka një kosto. Sepse mendoj se investitorët seriozë dhe bizneset serioze kanë nevojë për mjedise ku besimi dhe realizimi i premtimeve janë në qendër të gjithçkaje. Dhe mendoj se ky është një mesazh që duhet ta kemi parasysh në pozicionin tonë në tregun më të gjerë dhe është një mesazh që ia vlen të dëgjohet”, tha ai.

Sipas Hargreaves, UK-Kosovo Tech Hub synon të krijojë kushtet që potenciali i Kosovës të shndërrohet në investime dhe partneritete konkrete.

“Sepse nuk është vetëm potenciali ai që tërheq investimet ndërkombëtare. Janë qartësia, shpejtësia, besimi, marrëdhëniet dhe lidhjet. Dhe pikërisht këtë po bëjmë këtu sot. Pra, ne nuk duam vetëm të flasim për potencialin. Duam të krijojmë një hapësirë që krijon kushtet për ta bërë atë realitet. Kjo është arsyeja pse e krijuam këtë Qendër të jashtëzakonshme Teknologjike Kosovë–Mbretëri e Bashkuar (UK Kosovo Tech Hub), për të cilën jam jashtëzakonisht krenar”, tha ai.

Në këtë ngjarje foli edhe drejtori ekzekutiv i ProCredit Bank në Kosovë, Visar Paqarada, i cili tha se qendra e re do të shërbejë si urë lidhëse ndërmjet talenteve, investimeve dhe inovacionit në të dy vendet.

“Mbretëria e Bashkuar dhe Kosova ndajnë lidhje të forta dhe kjo qendër krijon një urë të hapur që lidh talentin, dijen, investimet dhe inovacionin ndërmjet dy vendeve tona. Ajo do t’i ndihmojë sipërmarrësit të kenë qasje në rrjete të reja, të zhvillojnë aftësitë e tyre dhe t’i sjellin idetë e tyre në tregjet ndërkombëtare”, tha Paqarada.

Ai theksoi se Kosova nuk ka mungesë talentesh, por ka nevojë për më shumë mbështetje dhe qasje në financim.

“Kosova ka një nga popullsitë më të reja në Evropë, një sektor të gjallë të teknologjisë informative dhe një ekosistem në rritje të start-up-eve. Sfida para nesh nuk është mungesa e talentit – unë mund të shoh shumë talent vetëm në këtë sallë. Por sfida është të sigurohemi që ky talent të ketë mbështetjen e duhur, mentorimin e nevojshëm dhe, pse jo, qasje në financim për të lulëzuar. Shpresojmë që kjo qendër të bëhet një vend ku lindin ide ambicioze, krijohen partneritete dhe fillojnë historitë e ardhshme të suksesit”, tha Paqarada.

Shoqëria “SORI-AL” e cila kryen shërbimin e kateringut në Akademinë e Sigurisë, ku dje janë helmuar nga ushqimi 60 kursantë, ka reaguar përmes një deklarate për mediat.

Shoqëria thekson se hetimi në lidhje me rastin duhet të përfshijë jo vetëm shpërndarjen e ushqimit, por mënyrën dhe kushtet në të cilat ruhet dhe konsumohet.

“SORI-AL”, thekson se në kuadër të monitorimit “ janë konstatuar dhe dokumentuar raste të futjes dhe konsumimit në ambientet e Akademisë të produkteve ushqimore të porositura nga jashtë sistemit të furnizimit të kontraktuar”.

“Ky është një element faktik, i dokumentuar nga ana jonë, i cili, sipas vlerësimit tonë, duhet të jetë pjesë e hetimit objektiv të institucioneve kompetente, pasi çdo ushqim i konsumuar jashtë zinxhirit të kontrolluar të furnizimit mund të përbëjë një faktor që duhet të verifikohet”, thuhet në deklaratë.

Duke iu referuar Akademisë së Sigurisë, shoqëria “SORI-AL” vë në dukje se gjatë ofrimit të shërbimit dhe konsumimit të ushqimit mungojnë kushtet higjeno-sanitare para konsumimit të vakteve.

“Po ashtu, nga monitorimet dhe verifikimet e kryera nga stafi ynë gjatë ofrimit të shërbimit është konstatuar se procesi i konsumimit të ushqimit zhvillohet në kushte ku mungojnë disa elementë bazë të kushteve higjieno-sanitare, si mundësia për larjen e duarve me ujë të ngrohtë dhe detergjent përpara konsumimit të vakteve. Gjithashtu, është vërejtur se në shumë raste studentët paraqiten për konsumimin e ushqimit menjëherë pas përfundimit të stërvitjes. Këto rrethana nuk paraqiten për të shmangur apo transferuar përgjegjësi, por për të evidentuar se siguria ushqimore është rezultat i funksionimit të të gjithë zinxhirit të sigurisë, duke përfshirë jo vetëm prodhimin dhe shpërndarjen e ushqimit, por edhe mënyrën dhe kushtet në të cilat ai ruhet dhe konsumohet”.

“Për këtë arsye, vlerësojmë se edhe këta faktorë duhet të jenë pjesë e hetimit dhe analizës objektive të institucioneve kompetente. Shoqëria “SORI-AL” mbetet e gatshme të bashkëpunojë me të gjitha institucionet kompetente dhe kërkon që edhe kjo ngjarje të hetohet mbi bazën e provave shkencore, epidemiologjike dhe laboratorike, pa nxjerrë përfundime të parakohshme dhe pa dëmtuar padrejtësisht reputacionin e një kompanie që prej më shumë se dy dekadash operon në këtë sektor. Shoqëria “SORI-AL” mbetet në pritje të rezultateve të analizave laboratorike të kampioneve të marra nga Autoriteti Kombëtar i Ushqimit, si dhe të analizave të kryera, me iniciativën e saj dhe në mënyrë të pavarur, pranë një laboratori tjetër të akredituar, në kuadër të sistemit të autokontrollit”, vijon deklarata./A2CNN

Prokuroria Speciale e Kosovës ka ngritur aktakuzë ndaj E.H., nën dyshimin për kryerjen e veprës penale “Përgatitja e veprës penale Vrasje e Rëndë”.

Sipas njoftimit të Prokurorisë, aktakuza është dorëzuar në Gjykatën Themelore në Prishtinë, ndërsa i pandehuri dyshohet se kishte planifikuar privimin nga jeta të personit me inicialet M.D., pas një mosmarrëveshjeje të mëhershme ndërmjet tyre.

Në aktakuzë thuhet se E.H. kishte ndërmarrë veprime konkrete për realizimin e planit, duke përfshirë marrëveshje për shpërblim financiar, koordinim lidhur me mënyrën, kohën dhe vendin e kryerjes së veprës, si dhe sigurimin e armës që dyshohet se do të përdorej për kryerjen e saj.

Prokurori i rastit ka kërkuar që, pas zhvillimit të procedurës gjyqësore dhe administrimit të provave, gjykata ta shpallë fajtor të pandehurin dhe ndaj tij të shqiptohen sanksionet e parapara me legjislacionin në fuqi.

Vlora Çitaku nga Partia Demokratike e Kosovës, ka reaguar lidhur me çështjen e gazit amerikan, duke thënë se ky debat s’është për një tubacion, porse, ‘’për sigurinë kombëtare’’ të vendit.

Çitaku, ka shtuar edhe se, pavarësia energjetike është pjesë e pavarësisë shtetërore, dhe se, kur flitet për gazin, flitet për siguri, ekonomi, diplomaci, partneritet strategjik dhe të ardhmen e Kosovës.

‘’ Fatkeqësisht, për vite me radhë, Lëvizja Vetëvendosje ka kundërshtuar pothuajse çdo projekt që do t’i siguronte Kosovës më shumë pavarësi energjetike. Fillimisht si opozitë, e më pas si qeveri. E shpeshherë edhe përmes formave të dhunshme’’, ka shkruar ajo mes tjerash.

Postimi:

Debati për gazin amerikan nuk është debat për një projekt teknik. Nuk është debat për një tubacion apo për një central energjetik. Ky është debat për sigurinë kombëtare të Kosovës.

Kosova po përballet me një nga momentet më të rëndësishme strategjike që nga shpallja e pavarësisë.

Në një botë ku siguria energjetike po bëhet po aq e rëndësishme sa siguria ushtarake, vendimet që marrim sot do të përcaktojnë jo vetëm mirëqenien e qytetarëve tanë, por edhe pozitën e Kosovës në hartën gjeopolitike të dekadave që vijnë.

Në botën e sotme, e cila po ndryshon vazhdimisht, pavarësia energjetike është pjesë e pavarësisë shtetërore. Luftërat moderne nuk zhvillohen vetëm me tanke dhe armë.

Ato zhvillohen me energji, me zinxhirë furnizimi, me kontroll mbi burimet strategjike dhe me aftësinë e një shteti për t’i mbrojtur qytetarët e vet nga krizat.

Prandaj, kur flasim për gazin amerikan, ne nuk flasim vetëm për energji. Ne flasim për siguri. Për ekonomi. Për diplomaci. Për partneritet strategjik. Për të ardhmen e Kosovës.

Fatkeqësisht, për vite me radhë, Lëvizja Vetëvendosje ka kundërshtuar pothuajse çdo projekt që do t’i siguronte Kosovës më shumë pavarësi energjetike. Fillimisht si opozitë, e më pas si qeveri. E shpeshherë edhe përmes formave të dhunshme.

Sot po e shohim rezultatin e kësaj politike.

Kosova po paguan energjinë më shtrenjtë se kurrë më parë. Importet e energjisë po rriten nga viti në vit. Bizneset po dëmtohen. Familjet po përballen me fatura gjithnjë e më të larta dhe gjithnjë e më të papërballueshme.

Ndërkohë, të gjitha vendet e rajonit po ndërtojnë lidhje të reja energjetike, po diversifikojnë furnizimin dhe po forcojnë sigurinë e tyre.

Vetëm Kosova ka mbetur jashtë.

Vetëm Kosova vazhdon të refuzojë një mundësi që aleati ynë më i madh strategjik, Shtetet e Bashkuara të Amerikës, e ka mbështetur vazhdimisht.

Partneriteti me SHBA-në nuk matet vetëm me deklarata. Ai matet me vendime konkrete. Me projekte konkrete.

Koha e izolimit duhet të marrë fund.

Kosova duhet të jetë pjesë e projekteve strategjike të Perëndimit, jo spektatore e tyre.

Prokuroria ka kërkuar dënim me burgim të përjetshëm ndaj të akuzuarve për vrasjen e trefishtë në vitin 2021 në Gllogjan të Deçanit.

Të akuzuar për këtë rast janë Halil Mehmetaj, Kastriot Mehmetaj dhe Kreshnik Mehmetaj.

“Pas administrimit të gjithë kësaj prove, pas rrëzimit të çdo alibie dhe pas ballafaqimit të të akuzuarve me vërtetën shkencore, nuk ka mbetur asnjë dyshim. Prokuroria kërkon që të pandehurit Halil Mehmetaj, Kastriot Mehmetaj dhe Kreshnik Mehmetaj të shpallen fajtorë dhe të dënohen me dënimin maksimal të paraparë me ligj. Kjo nuk është vetëm kërkesë e Prokurorisë; kjo është kërkesa e vetme për të rivendosur besimin te ligji dhe për t’u dhënë sadopak paqe shpirtrave të viktimave”, u tha nga ana e prokurorisë.

Sipas aktakuzës së ngritur më 5 maj 2023 nga Prokuroria Themelore në Pejë, të pandehurit Halil, Kastriot dhe Kreshnik Mehmetaj, ngarkohen se më 26 nëntor 2021, në fshatin Gllogjan, Komuna e Deçanit, saktësisht në rrugën “Ismajl Haradinaj”, të shtyrë nga hakmarrja e paskrupullt, në marrëveshje e bashkëveprim me njëri-tjetrin, privojnë nga jeta tre persona, dy prej tyre të cilët ishin fëmijë. Pra, të vdekur mbetën shoferi i autobusit G.Gj, si dhe nxënësit L.H (17 vjeçar) dhe G.M (17 vjeçare).

Ministri i Punëve të Brendshme, Besfort Lamallari, ka nxjerrë urdhrin për shpalljen “person i padëshiruar në Republikën e Shqipërisë”, për një periudhë 15-vjeçare, për Ikballe Huduti (Berisha).

Mësohet se motivi i këtij vendimi bazohet në informacionet e grumbulluara, sipas së cilave, veprimtaria e Hudutit vlerësohet si kërcënim për vendin, sigurinë kombëtare, si dhe rendin e sigurinë publike.

Urdhri i Ministrit të Brendshëm Lamallari i është dërguar për zbatim Policisë së Shtetit dhe strukturave të Drejtorisë së Kufirit dhe Migracionit.

Ikballe Berisha Huduti ka lindur dhe shkolluar në qytetin e Prizrenit. Ka mbaruar Medresenë dhe më pas ka studiuar letërsi. Për publikun në Kosovë njihet si mbështetëse e islamit shiit që kryesisht është i shtrirë në Iran e Irak. /abcnews.al

Qeveria e Kosovës nuk e ka refuzuar mundësinë e përfshirjes në projektet që lidhen me gazin amerikan, por konsideron se vendimet për çështje të tilla duhet të merren pas diskutimeve dhe vlerësimeve të institucioneve përgjegjëse dhe ekspertëve të fushës.

Kështu deklaroi ushtruesja e detyrës së Presidentes, Albulena Haxhiu, e pyetur se si i përgjigjet Qeveria e Kosovës thirrjeve të Shteteve të Bashkuara të Amerikës dhe Odave Ekonomike që Kosova të bëhet pjesë e marrëveshjeve për gazin amerikan.

Haxhiu tha se çështja e gazit nuk mund të reduktohet në përgjigje të thjeshta me “po” ose “jo”, pasi sipas saj kërkon analizë të plotë të kostove dhe përfitimeve për qytetarët e Kosovës.

“Shihni, sa i përket kësaj çështje, unë mendoj që a duhet Kosova ta pranojë apo jo gazin, nuk është çështje e përgjigjeve me ‘po’ ose ‘jo’. Mendoj që është shumë e rëndësishme që të ketë diskutime në nivel të institucioneve përgjegjëse, në nivel të ekspertëve, në mënyrë që të diskutohet për përfitimet, për koston që ndërlidhet në raport me qytetarët e Republikës së Kosovës dhe për aspekte të tjera të cilat i takojnë ekspertëve të fushës që të merren me këto”, tha ajo.

Sipas Haxhiut, institucionet e Kosovës janë të hapura për diskutime serioze lidhur me këtë projekt dhe nuk kanë refuzuar iniciativa që konsiderohen në interes të qytetarëve.

“Kosova asnjëherë nuk ka thënë jo projekteve që janë në të mirën e interesit publik, në të mirën e Republikës së Kosovës dhe qytetarëve të saj. Mirëpo, për tema të tilla duhet që të ketë diskutime serioze. Ne nuk ia kemi mbyllur derën diskutimeve serioze, jemi të hapur që të diskutojmë për këtë. Ministrja Rizvanolli ka diskutuar për këtë çështje dhe po punon në këtë drejtim. Prandaj, le t’ia japim mundësinë institucioneve përgjegjëse që të japin përgjigjen finale për këtë”, tha ajo.

Ajo kundërshtoi vlerësimet se mospajtimi eventual me projekte të caktuara energjetike mund të interpretohet si qëndrim antiamerikan, duke theksuar se institucionet vendimmarrëse duhet të veprojnë bazuar në interesin e qytetarëve të Kosovës.

“Në qoftë se Kosova, Republika e Kosovës, sheh një zgjidhje tjetër si një zgjidhje më të mirë, atëherë pse duhet që të kritikohet dhe pse duhet që qeveria apo institucionet e Republikës së Kosovës të konsiderohen antiamerikane? Institucionet e Republikës së Kosovës punojnë për interesat e qytetarëve dhe natyrisht mbështesin projekte që janë në favor të Republikës së Kosovës dhe qytetarëve, mirëpo kjo nuk do të duhej të shihej si antiamerikanizëm. Dhe mendoj që me këtë qasje nuk po e ndihmojmë as Republikën e Kosovës, por as partneritetin”, tha ajo.

Kreu i Grupit Parlamentar të PS-së, Taulant Balla, ka vijuar me qëndrimin që sipas tij, lexuesi i 5 kërkesave në protestë, Dritan Goxhaj, punon për Iranin. Sipas Ballës, prokuroria duhet ta hetojë këtë çështje.

“Nuk ka asnjë dyshim që Dritan Goxhaj punon për regjimin iranian. Unë nuk arrestoj askënd. Arrestimet në demokraci i bën prokuroria. Një person që e quan presidentin amerikan terrorist, që i quan SHBA-të terroriste, mbron Iranin dhe sulmon SHBA-të, është një person që ka lidhje me agjenturën iraniane”, tha Balla.

I pyetur nga gazetarët për një nga kërkesat e protestuesve lidhur me kufizimin e mandateve për Kryeministrin, Balla tha se mandatet i kufizon populli sipas tij me votë.

“Libri themelor i Republikës së Shqipërisë, i cili është Kushtetuta, është i qartë në këtë pikë. Ne jemi një vend që mund të quhemi Republikë e Re, në kuptimin e viteve që kemi me Kushtetutën. Ju e dini gjithmonë që unë jam një partizan i faktit se kemi marrë modelin e një republike të pastër parlamentare. Modeli është ai gjerman. As në Gjermani që njoh unë, nuk ka kufizim mandatesh. Sepse në demokraci dhe në republika parlamentare nuk ka kufizim mandatesh. Kufizimin e mandateve e bën vetëm vota e popullit. Kështu që mos u lodhni kot, Kushtetutën e kemi të re.”-tha Balla. /Euronews/

Ish-shefja e Grupit Parlamentar të Lëvizjes Vetëvendosje, Arbërie Nagavci, ka deklaruar se diskutimet për çështjen e presidentit do të intensifikohen pas certifikimit të rezultateve zgjedhore, duke bërë thirrje për përgjegjësi nga të gjithë deputetët dhe për gjetjen e një kandidati konsensual, raporton Ekonomia Online

E pyetur lidhur me deklaratat e LDK-së se marrëveshja për presidentin mund të arrihet nëse kjo pozitë i takon kësaj partie, Nagavci u shpreh se presin një kandidat jopartiak.

“Presim certifikimin e rezultateve edhe pastaj zhvillojmë me intensitet të shtuar diskutimet. Bëj thirrje te të gjithë deputetët që kanë marrë besimin e qytetarëve për të qenë pjesë e Kuvendit, që të sillen me përgjegjësi ndaj Kuvendit, ndaj institucioneve, ndaj qytetarëve që i kanë besuar që të jenë pjesë e Kuvendit dhe të mundësojmë kuorumin prej 80 deputetëve, në mënyrë që të zgjidhet presidenti apo presidentja e vendit. Kemi parë disa deklarata të emrave të përveçëm të kandidatëve të cilët kanë dëshirë të jenë presidentë apo presidente. Gjithsesi, ne presim të kemi një kandidat apo kandidate konsensuale, jo partiak, jo partiake, të cilët do të gëzojnë besoj edhe me kompetencë e përgjegjësi pozitën e tillë dhe rolin unifikues”, tha ajo.

E pyetur nëse Lëvizja Vetëvendosje do të propozojë një kandidat partiak për president, Nagavci tha se kjo mbetet çështje për diskutim, duke rikujtuar përpjekjet e mëhershme të subjektit për të arritur marrëveshje me partitë e tjera.

“Kjo gjë duhet të diskutohet. Ju e dini që edhe para zgjedhjeve të 7 qershorit, ne kemi kërkuar nga partitë e opozitës në atë kohë, edhe nga LDK-ja e PDK-ja, që të propozojnë emra konkretë. Ne kemi qenë të gatshëm që t’i japim nënshkrimet për të mandatuar kandidatët për president. Kemi qenë të gatshëm të bashkëqeverisim med LDK-në. Kemi qenë të gatshëm të lirojmë pozitën e kryetares së Kuvendit. Pra, kemi dhënë gjithçka që është në mandatin tonë, përkundër që numrat dhe forcat në Kuvend kanë qenë dukshëm në favorin tonë.

Por, jemi munduar që të shmangim një palë zgjedhje të reja edhe të funksionalizojmë institucionet e të vazhdojmë me punë të shumta, të cilat janë me rëndësi për qytetarët. Por ndodhja që ndodhi… ju e patë që nuk pati gatishmëri të deputetëve të partive të tjera, të cilët ishin në Kuvend, për të zgjedhur presidentin. Shkuam në zgjedhje, të cilat e rikonfirmuan edhe një herë se Lëvizja Vetëvendosje është subjekti i cili është më i madh, ka numrin më të madh të votave sesa të gjitha partitë e tjera bashkë, partitë shqiptare, përfshirë subjektin e dytë, të tretë e kështu me radhë. Andaj, unë besoj që deputetët do të respektojnë vullnetin e qytetarëve edhe do të angazhohen maksimalisht, sepse kemi shumë kohë të humbur e shumë prej ligjeve, marrëveshjeve ndërkombëtare e projekteve presin të shqyrtohen me prioritet. Ju faleminderit shumë.”

Nagavci shmangu komentet për emra të përveçëm, saktësisht për Ramush Haradinajn duke thënë se procesi duhet të fokusohet te interesi institucional dhe jo tek ambiciet personale.

“Po e them edhe një herë, unë nuk do të kisha dashur të flisja me emra të përveçëm. Është për mua, personalisht, pak absurde që një person — cilido qoftë ai — i cili ka folur fjalë të pavërteta dhe gjëra të cilat e di edhe vetë që nuk qëndrojnë për kryeministrin Kurti, tashmë të kërkojë që të marrë mbështetjen e kryeministrit Kurti. Dhe kjo tregon shumë edhe për atë që ka ndodhur përpara, por edhe për atë ku jemi tani.

Kështu që unë besoj dhe bëj thirrje që të gjenden disa emra konsensualë, sepse besoj që Kosova ka mjaftueshëm burra e gra me integritet, me etikë të lartë edhe personale, edhe profesionale, të cilët do ta ushtronin në mënyrë shumë të mirë pozitën e presidentit apo presidentes.

Ndaj duhet larguar, unë nuk po flas sot në emër të Lëvizjes me emra të përveçëm, por ajo që mund të them është që është koha që të mendojmë për institucionet, të mendojmë se si dalim prej këtij ngërçi politik edhe të lëmë anash vetëm ambiciet dhe interesat personale”, shtoi ajo