Author: K.B.

Një rast i rëndë është raportuar mbrëmjen e së enjtes në Pejë, ku persona të panjohur dyshohet se kanë vendosur një mjet shpërthyes dhe një letër me përmbajtje kërcënuese në derën e një objekti banimi.

Sipas raportit 24-orësh të Policisë së Kosovës, rasti ka ndodhur rreth orës 23:43.

Menjëherë pas marrjes së informacionit, njësitet policore kanë siguruar vendin e ngjarjes, ndërsa njësia për deminim e Policisë së Kosovës ka bërë largimin e mjetit shpërthyes.

“Pejë / 25.06.2026 – 23:43. Raportohet se është vendosur një mjetë shpërthyes dhe një letër me përmbajtje kërcënuese në derën e një objekti banimi. Është bërë sigurimi i vendit të ngjarjes, ndërsa njësia për deminim e PK-së ka bërë largimin e mjetit eksplodues. Rasti është duke u hetuar”.

Në Ditën Ndërkombëtare Kundër Abuzimit me Droga dhe Trafikimit të Paligjshëm, KOMF dhe Labyrinth kërkojnë adresim urgjent të situatës dhe veprim të koordinuar nga institucionet përgjegjëse për mbrojtjen e fëmijëve dhe të rinjve nga përdorimi i substancave narkotike.

Në reagim thuhet se Kosova po përballet me sfida të shumta në parandalimin dhe trajtimin e fëmijëve viktima të abuzimit me narkotikë.

“Viteve të fundit, vlerësohet se numri i përgjithshëm i përdoruesve ka kaluar shifrën prej 35 000 ndërkohë që fëmijët dhe adoleshentët përdorues vazhdojnë të bëjnë pjesë çdo vit e më shumë në këtë shifër. Bazuar në bazën e të dhënave të Labyrinth, mosha mesatare e fillimit të përdorimit të drogave ka rënë nga 18 vjeç në vitin 2018, në 16 vjeç në periudhën e fundit”, thuhet në reagim.

Më tej bëhet e ditur se marihuana vazhdon të jetë substanca më e përdorur në Kosovë.

Përderisa deri në vitin 2018 ka pasur një ulje të përdorimit të heroinës tek popullata e përgjithshme, gjatë viteve të fundit vërehet një rritje e lehtë e përdorueseve të heroinës në veçanti te komunitetet Rom, Ashkali dhe Egjiptian, ndërsa ka një rritje të shpejtë dhe shumë të madhe të përdorimit të kokainës tek popullata e përgjithshme.

“Arsyet pse fëmijët fillojnë të përdorin droga janë të shumta, përfshirë disponueshmërinë e drogave në treg, traumën e fëmijërisë së hershme, mungesën e informacionit mbi rreziqet e përdorimit të drogave, presionin shoqëror dhe kureshtjen për të provuar gjëra të reja, etj. Përdorimi i drogave sjell pasoja të dëmshme për fëmijën, familjen, duke përfshirë: dëmtimin e shëndetit fizik dhe psikologjik, problemet sociale, kriminalitetin, shpenzimet financiare të mëdha, etj.

Vendi ynë vazhdon të mos sigurojë shërbime dhe programe të strukturuara dhe të qëndrueshme parandaluese dhe rehabilituese të cilat janë më se të nevojshme duke parë trendet në rritje të përdorimit të drogave nga fëmijët dhe adoleshentët. Kosova nuk ofron mjaftueshëm shërbime të qasshme për identifikimin e fëmijëve dhe të rinjve që janë viktima të abuzimit me narkotikë. Ka mungesë të shërbimeve dhe ekipeve mobile në komunitet që do të mundësonin testimin dhe identifikimin e rasteve të mundshme të fëmijëve që përdorin substancat narkotike”, thuhet tutje në reagim.

KOMF dhe Labyrinth theksojnë se profesionistët po ndeshen me sfida të mëdha në trajtimin e fëmijëve që janë viktima të abuzimit me droga.

Ata nuk disponojnë burimet e nevojshme, duke përfshirë ekipe multidisiplinare, reparte të posaçme për fëmijë, për zbatimin e planeve dhe programeve të specializuara për rehabilitim. Profesionistët nuk kanë burimet e nevojshme për të mbështetur prindërit ose kujdestarët në trajtimin dhe mbështetjen e fëmijëve të tyre që janë viktima të abuzimit me droga”.

Sipas këtyre organizatave, për ta adresuar këtë situatë alarmante, është thelbësore që të ndërmerren masa urgjente për rritjen e ndërgjegjësimit mbi rreziqet e përdorimit të drogave.

Gjithashtu, kërkohet zhvillimi i programeve të strukturuara për parandalimin dhe trajtimin e varësisë nga substancat narkotike në Kosovë dhe zhvillimin e shërbimeve të specializuara për trajtimin e fëmijëve dhe të rinjve përdorues të drogave.

“Vëmendja duhet të përqendrohet në të rinj dhe adoleshentë për të shmangur fillimin e tyre të hershëm me përdorimin e drogave. Poashtu, është e rëndësishme të zhvillohen programe për fuqizimin e prindërve të fëmijëve përdorues të drogave për të rritur kapacitetet e tyre për kujdesin ndaj fëmijëve përdorues të drogave”, thuhet tutje.

Pesë raste të dhunës janë raportuar në vendin tonë gjatë periudhës 24-të orësh.

Sipas raportit policor rastet janë raportuar në Graçanicë, Prishtinë, Viti, Pejë e Mitrovicë.

Rastet e raportuara:

Graçanicë / 25.06.2026 – 13:05. Është raportuar se pas një mosmarrëveshje në familje , tre meshkuj kosovarë janë përleshur mes vete. Me vendim të prokurorit tre të dyshuarit janë intervistuar dhe janë liruar në procedurë të rregullt.

Prishtinë / 25.06.2026 – 17:35. Është arrestuar e dyshuara femër kosovare pasi që kishte sulmuar fizikisht viktimën femër kosovare. Viktima ka pranuar tretman mjekësor. Me vendim të prokurorit e dyshuara është dërguar në mbajtje.

Viti / 25.06.2026 – 14:00. Viktima femër kosovare ka raportuar se pas në mosmarrëveshje verbale është sulmuar fizikisht nga i dyshuari mashkull kosovar. Viktima ka pranuar tretman mjekësor, ndërsa i dyshuari është arrestuar dhe me vendim të prokurorit është dërguar në mbajtje.

Pejë/ 25.06.2026 – 09:00. Viktima femër kosovare ka raportuar se i dyshuari mashkull kosovar në vazhdimësi ka ushtruar dhunë fizike dhe psikike ndaj saj, ndërsa sot ka pranuar një telefonat kërcënuese nga i njëjti. Palët janë intervistuar dhe me vendim të prokurorit janë liruar në procedurë të rregullt hetimore.

Mitrovicë / 25.06.2026 – 20:30. Është arrestuar i dyshuari mashkull kosovar pasi që kishte sulmuar fizikisht viktimën femër kosovare. Viktima ka pranuar tretman mjekësor. Me vendim të prokurorit i dyshuari është dërguar në mbajtje.

Instituti Hidrometeorologjik bën të ditur se sot në Kosovë do të mbajë mot me diell.

IHK njofton se temperaturat minimale do të jenë ndërmjet 13 dhe 16 gradë Celsius, ndërkaq ato maksimale nga 27 deri në 33 gradë.

Era do të fryjë nga veriperëndimi me shpejtësi 1–4 m/s.

IHKMK të enjten ka bërë të ditur se gjatë pesë ditëve të ardhshme do të ketë rritje graduale të temperaturave.

Instituti u ka bërë apel qytetarëve për kujdes nga ekspozimi i zgjatur në diell dhe të qëndrojnë të hidratuar.

“Sipas parashikimeve të IHMK-së, nga data 25–29 qershor 2026, temperaturat do të jenë në rritje graduale në të gjithë territorin e Kosovës. Rajoni i Dukagjinit pritet të regjistrojë valë të nxehti të nivelit 2, ndërsa pjesa tjetër e vendit kryesisht nivelin 1.

Sipas IHK të shtunën rajoni i Dukagjinit, Peja, Gjakova, Prizreni kalon në valën mesatare të të nxehtit, (Niveli 2), me temperatura 35–39°C.

Edhe të dielën, më 28 qershor Dukagjini mbetet rajoni më i prekur me temperatura deri në 39°C, ndërsa pjesa tjetër e vendit pritet të ketë 30–34°C.

IHK ka kërkuar kujdes nga ekspozimi i zgjatur në diell, të qëndrojmë të hidratuar dhe t’i ndjekim rekomandimet e IKSHPK-së.

Rekomandimet

Pini sa më shumë ujë dhe qëndroni të hidratuar.

Shmangni ekspozimin në diell nga ora 11:00 deri në 17:00.

Vishni rroba të lehta, përdorni kapelë dhe syze dielli.

Kujdes i veçantë për fëmijët, të moshuarit dhe personat me sëmundje kronike.

Kategoritë e valës së nxehtit

Niveli 0: Nën 30°C.

Niveli 1: 30–34°C (valë e lehtë).

Niveli 2: 35–39°C (valë mesatare).

Niveli 3: Mbi 40°C (valë e fortë).

Kryetari i Aleancës, Ardian Gjini, do të mbajë sot një konferencë për media në selinë qendrore të subjektit politik.

Sipas njoftimit të Aleancës, konferenca është planifikuar të nisë në orën 12:30

Në njoftimin për media nuk janë bërë të ditura temat që do të trajtohen apo arsyet e organizimit të kësaj konference.

Ministrja në detyrë e Ekonomisë, Artane Rizvanolli, ka reaguar ndaj debatit për gazin e lëngëzuar amerikan (LNG), duke mohuar pretendimet se Qeveria e Kosovës ka refuzuar këtë projekt. Ajo ka theksuar se Kosova nuk është kundër LNG-së amerikane, por se zgjidhja më e favorshme për vendin është importi përmes terminalit të Vlorës në Shqipëri, në vend të ndërtimit të një gazsjellësi të ri.

Në një video të publikuar në Facebook, Rizvanolli tha se është e pasaktë të thuhet se institucionet e Kosovës refuzojnë gazin e lëngëzuar nga Shtetet e Bashkuara të Amerikës.

Sipas saj, Qeveria që në vitin 2022 ka nënshkruar një memorandum bashkëpunimi me Shqipërinë për projektin e termocentralit të Vlorës me LNG, duke e konsideruar këtë alternativë si më praktike, më të shpejtë dhe ekonomikisht më të favorshme.

“Ne mund të importojmë LNG-në përmes Vlorës, të prodhojmë energjinë elektrike atje dhe ta transmetojmë në Kosovë përmes linjës së interkoneksionit 400 kV, e cila tashmë ekziston dhe nuk kërkon investime shtesë”, tha ajo.

Rizvanolli hodhi poshtë edhe pretendimet se Kosova ka refuzuar gazin apo gazsjellësin amerikan në vitin 2021, duke theksuar se kjo nuk është e vërtetë dhe se për projektin e asaj kohe do të japë sqarime të detajuara në një adresim tjetër.

Ajo theksoi se strategjia energjetike e Kosovës bazohet në shfrytëzimin e rezervave të qymyrit, burimeve të ripërtëritshme, kogjenerimit për ngrohje qendrore dhe efiçiencës së energjisë.

“Kosova është me fat që ka rezerva të mëdha të qymyrit, gjë që na ka mundësuar të mos krijojmë varësi nga gazi dhe të mbajmë çmimet e energjisë elektrike më të ulëta në rajon”, deklaroi ministrja.

Rizvanolli shtoi se LNG-ja nuk shihet si zëvendësim i burimeve vendore të energjisë, por vetëm si një burim shtesë në periudhat kur prodhimi vendor nuk është i mjaftueshëm.

Ajo theksoi gjithashtu se Kosova mbetet plotësisht e harmonizuar me politikën e jashtme të Shteteve të Bashkuara dhe mbështet përpjekjet amerikane për të zvogëluar ndikimin e Rusisë në rajon përmes sektorit të gazit.

“Kosova nuk importon asnjë metër kub gaz rus. Prandaj, përpjekjet për ta paraqitur këtë debat si zgjedhje mes Rusisë dhe Amerikës janë të pavërteta dhe të palogjikshme”, u shpreh ajo.

Në fund, ministrja tha se çdo vendim afatgjatë për gazin do të merret në mënyrë transparente, në konsultim me ekspertët dhe institucionet relevante, duke pasur për prioritet interesin afatgjatë të qytetarëve të Kosovës.

Reagimi i plotë:

E para: Kosova nuk ka zgjedhur importin nga shtetet e rajonit para prodhimit vendor të energjisë elektrike, ose para gazit amerikan, siç po aludohet. Përkundrazi: Ne kemi zgjedhur thëngjillin, e burimet e ripërtëritshme të energjisë si era e dielli, kogjenerimin për ngrohje qendrore, dhe efiçiencën e energjisë. Ky kombinim mbështetet në burime vendore dhe është më i liri për qytetarët e bizneset tona. E me gazifikim të qymyrit do të shtojmë kapacitete të reja që janë me teknologji më të avancuar e më pak ndotje.

E dyta: Nuk është e vërtetë që Qeveria e Kosovës është “kundër” gazit të lëngëzuar nga ShBA-të (LNG), siç thuhet. Ne qysh në vitin 2022 kemi nënshkruar një Memorandum Bashkëpunimi me Republikën e Shqipërisë me synim bashkëpunimin në termocentralin e Vlorës me LNG. Këtë e kemi konsideruar zgjidhje më të mirë, më praktike, më të shpejtë dhe ekonomikisht më të favorshme. Bashkëpunimi në energji me Republikën e Shqipërisë është shumë i natyrshëm; dhe, në vend të ndërtimit të gazsjellësit e infrastrukturës përcjellëse të gazit që merr kohë e ka kosto financiare, ne mund të importojmë LNG-në përmes Vlorës, të prodhojmë energjinë elektrike atje e ta transmetojmë përmes linjës së interkoneksionit 400 kV që e kemi të gatshme sot dhe nuk kërkon asnjë cent investim shtesë.

Gjithashtu, nuk është e vërtetë që Kosova e ka “refuzuar gazin amerikan” ose “gazsjellësin amerikan” në vitin 2021, siç është bërë shprehi të thuhet. Por për draft-projektin e vitit 2021 do të flasim ndaras, më në detaje një ditë tjetër.

E treta: Përballueshmëria e çmimeve është konsideratë kyçe në politikën tonë energjetike.

Kosova është me fat që ka rezerva të qymyrit, gjë që na ka mundësuar që të mos krijojmë varësi nga gazi, por edhe të mbajmë çmimet më të ulëta në rajon, përkundër krizave globale në vitet e fundit. Sot, familjet në Shqipëri energjinë elektrike e paguajnë 31% më shtrenjtë sesa ne; ato në Maqedoni të Veriut 30% më shtrenjtë e në Serbi 25% më shtrenjtë. Ne synojmë që Kosova të vazhdojë të ketë çmimin më të ulët të energjisë elektrike. Prandaj edhe LNG-në e konsiderojmë jo si zëvendësim të burimeve tona, por vetëm si një burim shtesë për kohët kur burimet vendore nuk mjaftojnë. Nga analizat që kemi bërë, del se mënyra më e shpejtë, e dobishme dhe ekonomikisht e favorshme për inkuadrimin potencial të LNG-së në miksin tonë energjetik është përmes TC në Vlorë.

E katërta: Pavarësisht këtyre diskutimeve, nuk ka asnjë dilemë që Kosova dhe Qeveria e saj kanë qenë dhe mbeten të bashkërenduara me politikën e jashtme të ShBA-ve në mënyrë konsistente dhe parimore. Sigurisht që Kosova e çmon dhe përkrah përpjekjen e ShBA-ve për të eliminuar ndikimin që Rusia ka në rajon përmes furnizimit me gaz.

Shtetet si Serbia, Maqedonia e Veriut ose Bosnja e Hercegovina që kanë infrastrukturë gazi dhe varësi nga gazi rus, patjetër që duhet të zgjedhin mes Rusisë dhe Amerikës. Por, në rastin e Kosovës, shfrytëzimi i temës së gazit për të vendosur etiketime si “anti-amerikan” ose për të shtruar pyetjen “me Rusinë a me Amerikën” është jo vetëm fals, por edhe komplet i palogjikshëm, sepse Kosova nuk importon asnjë m³ gaz rus. Kosova kurrë nuk e ka zgjedhur Rusinë – as në energji e as në asnjë fushë tjetër.

E pesta: Diskutimet e vendimet afatgjata si ky që ka të bëjë me import të gazit për dekadat në vijim, ndërkohë që nuk kemi infrastrukturë e përvojë, e sektori i energjisë në Evropë po ndryshon e modernizohet dita-ditës, janë shumë përtej politikës ditore. Këto diskutime më së paku duhet të hapen në euforinë e fushatës zgjedhore. Si gjithmonë, ne do ta trajtojmë edhe këtë çështje me seriozitetin e përgjegjësinë e më të lartë, bashkë me ekspertët e të gjitha institucionet relevante dhe duke marrë parasysh të gjitha konsideratat, ekonomike e politike. Përfundimisht, vendimet do të jenë transparente dhe në përputhje me interesin afatgjatë të qytetarëve të Republikës së Kosovës.

Kryeministri Edi Rama ka reaguar përmes një postimi në rrjetet sociale, ku ka ironizuar kërkesat për dorëheqjen e tij.

Në një status të gjatë të shoqëruar me tone sarkastike dhe simbolikë të drejtpërdrejtë, Rama i është përgjigjur një mesazhi anonim që i kërkonte largimin nga detyra, duke e kthyer reagimin në një “manifest” të dorëheqjes.

Në postimin e tij, kreu i qeverisë rendit një sërë arritjesh të qeverisjes, duke përmendur zhvillimet në infrastrukturë, turizëm, ekonomi, arsim dhe shëndetësi, si dhe hapjen e negociatave me Bashkimin Europian.

Postimi i plotë:

MIRËMËNGJES

dhe me kërkesën e mëposhtme për dorëheqje nga një numër i panjohur, të cilën e mirëkuptoj plotësisht duke e pranuar përulësisht, ju uroj një ditë të qetë

()ë!

Është ndoshta fjala më e konsumuar në lëmin virtual, ndaj po ta risjell edhe unë si ‘Millennials’ me shpresën që “Gen Z” nuk do më denigrojë me komente.

Para se të vijoj po ju them, (me lehtësinë e një barre që nuk e kam mbi supe, bashkë me +800K vota) se qeverisjen e mundon më së shumti fodullëku dhe shkenca e gjithologjisë, por kjo meriton një hapësirë më të zgjeruar filozofike për diskutim.

Tani lexomë (nëse mundeni dhe natyrisht nëse doni).

Dorëhiqu për transformimet e zonave urbane dhe rurale.

Dorëhiqu për aeroportet!

Dorëhiqu për turizmin që shënon shifra rekord!

Dorëhiqu për negociatat që u hapen!

Dorëhiqu për konferencën e tetë ndërqeveritare.

Dorëhiqu për kthimin në shina të ekonomisë!

Dorëhiqu që sot keni rritur pagat në thuajse të gjithë sektorët e ekonomisë.

Dorëhiqu sepse sot protestohet paqësisht dhe në dritaren tënde nuk ka snajper!

Dorëhiqu për transformimet në arsimin, shëndetësi, infrastrukturë dhe jo vetëm.

Realiteti është bezdisës për ata që jetojnë me nostalgjinë e krizës së përhershme.

Dorëhiqu, sepse e ktheve Shqipërinë në një vend që sot respektohet ndërkombëtarisht.

Ose mendoje kështu: Dorëhiqu…në 2030!

Nuk do të na duhesh atëherë, por do të kujtojmë me siguri.

Komuna e Mitrovicës së Jugut ka njoftuar qytetarët për zbatimin e një kodi të veshjes gjatë vizitave në objektin komunal.

Njoftimi është vendosur në hyrje të ndërtesës komunale nga Drejtoria e Administratës së Përgjithshme, ku qytetarët informohen paraprakisht për rregullat që duhet të respektohen gjatë hyrjes në institucion.

Sipas udhëzimit të publikuar, kodi i veshjes parasheh që vizitorët të paraqiten me veshje të përshtatshme për ambientet zyrtare. Në njoftim janë paraqitur edhe ilustrime që shpjegojnë format e veshjeve që nuk konsiderohen të përshtatshme për hyrje në objektin komunal.

Komuna ka bërë thirrje për mirëkuptim dhe respektim të këtyre rregullave, duke theksuar se ato synojnë të ruajnë seriozitetin dhe standardet institucionale gjatë ofrimit të shërbimeve për qytetarët.

“Ju lutemi të respektoni kodin e veshjes dhe dinjitetin e institucionit”, thuhet në njoftimin e publikuar nga komuna.

Deri në fillim të qershorit 2026, në listën e zezë amerikane ishin vendosur 131 individë dhe subjekte nga gjashtë shtete të Ballkanit Perëndimor.

Numri më i madh i sanksioneve lidhet me Serbinë (49), pasuar nga Kosova (29), Bosnje e Hercegovina (26), Maqedonia e Veriut (12), Shqipëria (8) dhe Mali i Zi (7).

Vendimet për sanksione i merr Zyra për Kontrollin e Pasurive të Huaja, shkurt OFAC, e cila vepron në kuadër të Departamentit amerikan të Thesarit.

Në listën e zezë të OFAC-ut nga Kosova gjenden 14 entitete:

1. FERMA IZVORI B.I.

Lokacioni: Izvore

Programi: GLOMAG (Global Magnitsky)

Veprimtaria: Kultivimi i frutave arrore dhe bërthamore.

Pronarin Sinisha Nedeljkoviq, OFAC-u e ka identifikuar si pjesë të një grupi të organizuar kriminal transnacional dhe e ka vendosur në listën e individëve të sanksionuar. Kompanitë dhe rrjetet e tij lidhen me korrupsion dhe tregti të paligjshme, përfshirë kontrabandën mes Kosovës dhe Serbisë. Ai është i lidhur me Zvonko Veselinoviqin.

Zvonko Veselinoviq në publik njihet si biznesmen nga veriu i Kosovës dhe ish-partner biznesi i Milan Radoiçiqit, organizatorit të sulmit të armatosur ndaj Policisë së Kosovës në Banjskë.

*OFAC-u e ka identifikuar Zvonko Veselinoviqin si udhëheqës të një grupi të organizuar kriminal dhe si një nga figurat më famëkeqe korruptive në veri të Kosovës.

Data e vendosjes së sanksioneve: 8 dhjetor 2021.

P.P. SHTËPIA TREGTARE METAL B.I.

Lokacija: Zveçan

Programi: GLOMAG (Global Magnitsky)

Veprimtaria: Tregti me shumicë e makinerive dhe pajisjeve të tjera.

Kompania është e lidhur me të sanksionuarin Sinisha Nedeljkoviq.

Data e vendosjes së sanksioneve: 8 dhjetor 2021.

3. SHTËPIA TREGTARE METAL SH.P.K.

Lokacioni: Zveçan

Programi: GLOMAG (Global Magnitsky)

Veprimtaria: Tregti me mallra të konsumit të gjerë për ndërtimtari dhe amvisëri.

Kompania është e lidhur me të sanksionuarin Sinisha Nedeljkoviq.

Data e vendosjes së sanksioneve: 8 dhjetor 2021.

4. SINISHA NEDELKOVIQ B.I., P.T.P. METAL

Lokacioni: Zveçan

Lokacioni: Zveçan

Veprimtaria: Tregti dhe tregti me shumicë e pajisjeve.

Data e vendosjes së sanksioneve: 8 dhjetor 2021.

Kompania është e lidhur me të sanksionuarin Sinisha Nedeljkoviq.

5. SINISHA NEDELKOVIQ I.B.

Lokacioni: Zveçan

Programi: GLOMAG (Global Magnitsky)

Veprimtaria: Tregti me shumicë e makinerive dhe pajisjeve.

Kompania është e lidhur me të sanksionuarin Siniša Nedeljkoviq.

Data e vendosjes së sanksioneve: 8 dhjetor 2021.

6. FERARI, NDËRMARRJE PËR SHËRBIME DHE TREGTI ME AUTOMJETE TË PËRDORURA, SH.A.

Lokacioni: Mitrovica

Programi: GLOMAG (Global Magnitsky)

Veprimtaria: Blerje, shitje dhe ndërmjetësim në tregtinë e automjeteve të përdorura dhe të reja.

Kompania është e lidhur me Zvonko Veselinoviqin. OFAC-u e ka identifikuar Veselinoviqin si udhëheqës të një grupi të organizuar kriminal. Sipas Departamentit amerikan të Thesarit, grupi i tij është i përfshirë në skema të ryshfetit në shkallë të gjerë dhe në trafikim të paligjshëm të mallrave, parave, narkotikëve dhe armëve ndërmjet Kosovës dhe Serbisë.

Data e vendosjes së sanksioneve: 8 dhjetor 2021.

7. PRIZMA B.I.

Lokacioni: Mitrovica

Program: GLOMAG (Global Magnitsky)

Veprimtaria: Ndërtimi i objekteve të tjera të infrastrukturës.

Sipas të dhënave të Agjencisë për Regjistrimin e Bizneseve në Kosovë (ARBK), kompania është kaluar zyrtarisht në status pasiv më 9 qershor 2022, vetëm disa muaj pas vendosjes së sanksioneve amerikane.

Kompania është e lidhur me të sanksionuarin Zvonko Veselinoviq.

Data e vendosjes së sanksioneve: 8 dhjetor 2021.

8. ZHARKO VESELINOVIQ B.I., S.T.R. KRISTAL

Lokacija: Mitrovicë e Veriut

Program: GLOMAG (Global Magnitsky)

Veprimtaria: Formësimi dhe përpunimi i xhamit të rrafshët.

Sipas bazës së të dhënave të ARBK-së, kompania është zyrtarisht në status pasiv që nga 9 qershori 2022. Ndryshimi i statusit në pasiv ndodhi rreth gjashtë muaj pasi OFAC-u vendosi sanksione ndaj pronarit dhe vetë kompanisë.

OFAC-i e ka identifikuar Zharko Veselinoviqin si një nga udhëheqësit e grupit të organizuar kriminal të Zvonko Veselinoviqit, vëllait të tij, i cili është thellësisht i përfshirë në tregti të paligjshme dhe kontrabandë.

SHBA-ja, në raportin e saj, ndër të tjera, përmend një aktakuzë në bazën e të dhënave të Kosovës, e cila i lidh anëtarët e këtij grupi me rastin e vrasjes së politikanit serb Oliver Ivanoviq më 2018. Ivanoviq u vra me gjashtë plumba pas shpine, para zyrave të partisë së tij në Mitrovicë të Veriut.

Data e vendosjes së sanksioneve: 8 dhjetor 2021.

9. RAD D.O.O.

Lokacioni: Zveçan

Programi: GLOMAG (Global Magnitsky)

Veprimtaria: Ndërtimtari, ndërtim i objekteve të larta dhe i objekteve infrastrukturore.

Pronari i kompanisë, Radulle Steviq, dhe vetë kompania kanë bashkëpunuar me politikanë dhe pushtetarë lokalë për të siguruar monopol në projektet ndërtimore në veri të Kosovës përmes prokurimeve publike të manipuluara. OFAC-u e ka identifikuar kompaninë si pjesë kyçe të grupit të organizuar kriminal të të sanksionuarit Zvonko Veselinoviq.

Data e vendosjes së sanksioneve: 8 dhjetor 202

10. RADULE STEVIC B.I., P.T.P. RAD

Lokacioni: Zveçan

Programi: GLOMAG (Global Magnitsky)

Veprimtaria: Ndërtimtari.

Pavarësisht sanksioneve amerikane, kompania, përmes degës së regjistruar në Serbi, vazhdoi të lidhte kontrata për punë infrastrukturore në komunat me shumicë serbe në Kosovë.

Kompania është e lidhur me të sanksionuarin Radule Steviq.

Data e vendosjes së sanksioneve: 8 dhjetor 2021.

11. RADOVAN RADIC B.I., P.P. EU RR GRADNJA

Lokacioni: Zupç

Programi: GLOMAG (Global Magnitsky)

Veprimtaria: Građevinarstvo

OFAC e ka identifikuar pronarin e kompanisë, Radovan Radiq, si anëtar të një grupi të organizuar kriminal dhe transnacional, në krye të të cilit është Zvonko Veselinoviqi.

Data e sanksionimit: 8 dhjetor 2021.

12. P.P. BABUDOVAC B.I.

Lokacioni: Jasenovik

Program: GLOMAG (Global Magnitsky)

Veprimtaria: Shitje me shumicë e ushqimit, pijeve dhe duhanit.

OFAC e ka identifikuar kompaninë si në pronësi ose nën kontrollin e Milan Radisavleviqit, i cili është përcaktuar si anëtar i një grupi të organizuar kriminal dhe transnacional, i drejtuar nga Zvonko Veselinoviqi në veri të Kosovës.

Data e sanksionimit: 8 dhjetor 2021.

13. N.P.T.T. DONA-SHELL

Lokacioni: Pejë

Programi: SDNTK (Značajni trgovci narkoticima)

Veprimtaria: Transport dhe logjistikë.

Lidhje me organizatën kriminale të sanksionuar të Naser Kelmendit. Përmes llogarive bankare dhe transaksioneve të kësaj kompanie janë financuar operacionet e familjes Kelmendi. Kompania është e lidhur drejtpërdrejt me Besnik Kelmendin (djalin e Naser Kelmendit), i cili është cilësuar si një nga operativët kryesorë në rrjet dhe ka qenë subjekt i hetimeve të gjera ndërkombëtare financiare dhe policore për dyshime se ka shërbyer si mbulesë për pastrim parash të fituara nga aktivitete kriminale.

Data e sanksionimit: 24 mars 2015.

14. RINGJALLJA E SHOQATËS SË TRASHËGIMISË ISLAME, dega në Kosovë

Statusi: E mbyllur dhe e sanksionuar.

Lokacioni: Prishtinë

*Organizata kishte degë në Bosnje e Hercegovinë dhe në Shqipëri.

Programi: Specially Designated Global Terrorist (SDGT) / Terrorist global i veçuar posaçërisht.

Veprimtaria: Organizatë humanitare.

Data e sanksionimit: 13 qershor 2008