Babë e bir që vdiqën tragjikisht pasi u goditën nga rryma, do të varrosen sot në fshatin Maznik të Deçanit.
Ceremonia mortore për Xhemajl e Hasan Mustafaj, do të mbahet në ora 14:00.
Ngjarja e rëndë ndodhi derisa ata po e pastronin veturën e tyre.
Fillimisht nga rryma u godit babai, e më pas edhe i biri i cili ishte munduar t’i ndihmonte atij.
Ata fillimisht u dërguan në QKMF-në e Deçanit e më pas edhe në spitalin e Pejës, ku edhe u konstatua vdekja e tyre.
E Ngarkuara me Punë e Shteteve të Bashkuara të Amerikës në Kosovë, Anu Prattipati, do të organizojë një pritje me rastin e shënimit të 250-vjetorit të Pavarësisë së SHBA-së.
Pritja organizohet në kuadër të aktiviteteve për shënimin e 250-vjetorit të shpalljes së pavarësisë së Shteteve të Bashkuara të Amerikës.
Ditë më parë, në prag të shënimit të 250 vjetorit të lindjes së shtetit amerikan, Ambasada e Shteteve të Bashkuara të Amerikës në Prishtinë ka vendosur një flamur të madh të Amerikës në një prej hapësirave të objektit të ambasadës.
Vendosja e flamurit ishte pjesë e aktiviteteve simbolike që i paraprijnë kremtimit të këtij jubileu të rëndësishëm për shtetin amerikan.
Do të ketë edhe aktivitete të tjera në Prishtinë.
Kryetari i Komunës së Prishtinës, Perparim Rama, ka njoftuar se më 2 korrik, nën patronatin e Kryeqytetit, do të organizohet ngjarja “America and Kosova – A Freedom Story for the Next 250 Years”.
Përmes një postimi në Facebook, Rama ka njoftuar se aktiviteti do të mbahet në nder të 250-vjetorit të pavarësisë së Shtetet e Bashkuara të Amerikës dhe synon të vërë në pah partneritetin e veçantë ndërmjet SHBA-së dhe Kosovës.
Sipas tij, ngjarja do të zhvillohet më 2 korrik, duke filluar nga ora 10:00, në Emerald në Prishtinë, dhe do t’i kushtohet historisë së lirisë dhe miqësisë mes dy vendeve, si dhe bashkëpunimit që, sipas Ramës, vazhdon të frymëzojë dhe të ndërtojë të ardhmen.
Organizata e Kombeve të Bashkuara (OKB) kanë bërë të ditur se po sigurojnë rreth 10,000 qese për trupat e viktimave, si pjesë e operacionit të gjerë të shpëtimit në Venezuelë, pas tërmeteve të fuqishme që kanë goditur vendin.
Koordinatori rezident humanitar i OKB-së, Gianluca Rampolla Del Tindaro, në një konferencë për media ka deklaruar se, sipas përditësimit të fundit deri të dielën mbrëma, numri i viktimave ka arritur në 1,450, por pritet që ky shifër “të rritet në mënyrë të pashmangshme dhe të trishtueshme” me vazhdimin e operacioneve të kërkim-shpëtimit, raporton BBC.
Ai ka theksuar se OKB-ja, në koordinim me autoritetet lokale, po punon mbi supozimin se nevojiten rreth 10 mijë qese për trupat e pajetë, duke e cilësuar situatën si shumë të rëndë dhe të dhimbshme.
“Shpresojmë që numri të jetë më i ulët, prandaj jemi të përqendruar aktualisht në operacionet e shpëtimit”, ka deklaruar Del Tindaro.
Ndërkohë, Shërbimi Gjeologjik i Shteteve të Bashkuara (USGS) kishte vlerësuar në orët pas tërmeteve se ekziston një mundësi prej 44% që numri i viktimave të arrijë deri në 10,000, si dhe 30% mundësi që ai të shkojë deri në 100,000.
Babë e bir që vdiqën tragjikisht pasi u goditën nga rryma, do të varrosen nesër në fshatin Maznik të Deçanit.
Ceremonia mortore për Xhemajl e Hasan Mustafaj, do të mbahet në ora 14:00.
Ngjarja e rëndë ndodhi derisa ata po e pastronin veturën e tyre.
Fillimisht nga rryma u godit babai, e më pas edhe i biri i cili ishte munduar t’i ndihmonte atij.
Ata fillimisht u dërguan në QKMF-në e Deçanit e më pas edhe në spitalin e Pejës, ku edhe u konstatua vdekja e tyre.
Presidenti i Serbisë, Aleksandar Vuçiq, ka dalë sërish në mbrojtje të Milan Radoiçiqit dhe Zvonko Veselinoviqit, duke minimizuar akuzat ndaj tyre dhe duke vënë në dyshim bazën e ndjekjes penale ndaj tyre.
I pyetur për pretendimet se dy pjesëtarë aktivë të Xhandarmërisë serbe po ofrojnë siguri për Radoiçiqin dhe Veselinoviqin, Vuçiq tha se nuk ka informacione për një gjë të tillë, por njëkohësisht mbrojti Radoiçiqin, duke pretenduar se ai nuk ndiqet penalisht për vepra kriminale.
“Nuk kam asnjë informacion të tillë”, tha Vuçiq, duke shtuar se Milan Radoiçiq ndodhet në listën e kuqe të Interpolit “jo për shkak të krimit, por për shkak të Kosovës”.
“Dikush po e ndjek penalisht për shkak të Kosovës, jo për shkak të asaj që thoni ju”, deklaroi presidenti serb, duke hedhur poshtë pretendimet se Radoiçiq kërkohet për aktivitete kriminale.
Edhe kur u pyet për Zvonko Veselinoviqin, Vuçiq zgjodhi ta relativizojë çështjen, duke pyetur: “Për çfarë u ndoq penalisht Veselinoviq?”, pa komentuar akuzat dhe raportimet që e lidhin atë me krimin e organizuar.
Megjithatë, Vuçiq përsëriti se pjesëtarët aktivë të Xhandarmërisë nuk duhet të ushtrojnë një punë të dytë si sigurim privat.
“Nëse më pyesni nëse anëtarët aktivë të Xhandarmërisë mund të bëjnë dy punë, unë do të bëj çmos që kjo të mos ndodhë. Ke një rrogë të mirë në Xhandarmëri, bëje atë punë. Nëse nuk do të punosh, puno për një kompani private”, deklaroi ai.
Milan Radoiçiq, i cili ka marrë përgjegjësinë për organizimin e grupit të armatosur e terrorist që kreu sulmin në Banjskë në shtator të vitit 2023, vazhdon të jetë i lirë në Serbi, ndërsa autoritetet në Beograd kanë refuzuar ta ekstradojnë në Kosovë.
Në të njëjtën kohë, Zvonko Veselinoviq vazhdon të jetë një nga figurat më të përfolura të veriut të Kosovës, i përmendur prej vitesh në raportime dhe sanksione ndërkombëtare për dyshime mbi lidhje me krimin e organizuar.
Prokuroria Themelore në Ferizaj ka paraqitur në Gjykatën Themelore në Ferizaj kërkesë për caktimin e masës së paraburgimit ndaj Arjeta Roshajt, e dyshuar për vrasjen në Ferizaj më 28 qershor 2026.
Sipas kërkesës së siguruar nga “Betimi për Drejtësi” më 28 qershor 2026, rreth orës 22:40, në Ferizaj, rruga “Sejdi Sejdiu”, përkatësisht në objektin banesor, të marrë me qira nga babai i të pandehurës M.B., e pandehura ka privuar nga jeta tani të ndjerin F.H.
Tutje, në kërkesë thuhet se tani i ndjeri kishte shkuar në banesën në të cilën ndodhej e pandehura, dhe gjatë qëndrimit në banesë, pas një mosmarrëveshje dhe përleshjeje fizike në mes tyre, e pandehura merr armën e zjarrit nga tani i ndjeri dhe shtie një herë në drejtim të tij, duke i shkaktuar plagë vdekjeprurëse, si pasojë e të cilave ka ndërruar jetë në vend ngjarje
Me këto veprime, ajo dyshohet se ka kryer veprën penale “Vrasje” nga neni 172 i Kodit Penal të Republikës së Kosovës.
Prokuroria ka vlerësuar se janë përmbushur kushtet për caktimin e paraburgimit dhe se ekzistojnë prova të mjaftueshme që e mbështesin dyshimin e bazuar, përfshirë raportin mbi sekuestrimin e përkohshëm të sendeve, i datës 29.06.2026, me anë të së cilit është sekuestruar arma e zjarrit, e cila është përdorur në kryerjen e veprës penale. Si dhe deklarata e dëshmitarëve H.R., dhe M.N. ,të cilët vërtetojnë në tërësi gjendjen faktike të paraqitur në dispozitiv të kësaj kërkese.
Sipas Prokurorisë, rezulton se e pandehura jeton dhe vepron në Francë, ndërsa në Republikën e Kosovës ka ardhur për qëndrim të përkohshëm, rrethanë kjo që tregon se ekziston rreziku real dhe serioz se po që se lihet në liri, mund të arratiset për t’iu shmangur përgjegjësisë penale, e që me këtë rast do të pengohet zhvillimi i suksesshëm i procedurës penale.
Po ashtu, thuhet se ekziston rreziku që e pandehura nëse lihet në liri, mund të ndikojnë tek të dëshmitarët, me qëllim të ndryshimit të deklarimeve të tyre në favor të saj.
Prokuroria vlerëson se paraburgimi duhet të caktohet duke marrë për bazë peshën e rëndë të veprës penale, si dhe dënueshmërinë e veprës penale, po ashtu rrethanat në të cilat është kryer vepra penale.
“…fakti se pas një mosmarrëveshje dhe përleshje fizike me tani të ndjerin F.H., e pandehura ka marr armën e zjarrit nga tani i ndjeri, dhe ka shtënë njëherë në drejtim të tij, duke e privuar nga jeta, mënyra e kryerjes së veprës penale, përdorimi i armës së zjarri dhe pasoja e shkaktuar, respektivisht humbja e jetës së një personi, tregojnë shkallë të lartë të rrezikshmërisë shoqërore”, thuhet në kërkesë.
Andaj, Prokuroria vlerëson se masat alternative janë të pamjaftueshme për zhvillimin e suksesshëm të procedurës penale.
Para Gjykatës Themelore në Prishtinë, të akuzuarit për veprën “shkaktim i trazirave dhe rrezikim i rendit dhe qetësisë publike” u deklaruan të pafajshëm, ndërsa vendimi në rastin e tyre do të merret më 1 korrik.
Gjatë shënimit të Vidovdanit në Gazimestan, afër Prishtinës, më 28 qershor, Policia e Kosovës ndaloi 37 persona, me arsyetimin se ata “provokuan masën duke brohoritur parulla provokuese me elemente të nxitjes së urrejtjes”.
Një personi iu shqiptua gjobë, ndërsa 36 të tjerët u proceduan para gjykatës, por nuk u mbajtën në paraburgim.
Avokati Nikolla Todoroviq tha se të akuzuarve u janë konfiskuar dokumentet personale të identifikimit, si dhe se në mesin e të ndaluarve ka kryesisht serbë nga Serbia dhe vendet e rajonit.
“Ka mjaft shtetas të huaj që nuk mund të kthehen në shtëpitë e tyre dhe njerëzit janë në vështirësi. Ata duhet të presin shpalljen e vendimit”, tha ai.
Serbët nga Kosova, nga Serbia dhe vendet e rajonit tradicionalisht mblidhen çdo 28 qershor në Gazimestan, për të përkujtuar Betejën e Kosovës, përkatësisht betejën kundër osmanëve më 1389.
Në hyrje të Gazimestanit, Policia e Kosovës u shpërndau vizitorëve një njoftim ku thuhej se nuk do të tolerohet “mbajtja dhe shfaqja e simboleve të ndryshme që përfaqësojnë ose nxisin urrejtje ndëretnike, fetare apo politike”.
Disa nga të pranishmit brohoritën “Kosova është Serbi” dhe kënduan këngë kushtuar Kosovës dhe Vidovdanit.
Dioqeza e Rashkës dhe Prizrenit e Kishës Ortodokse Serbe deklaroi se nuk e arsyeton dhe as nuk do ta arsyetojë kurrë çfarëdo thirrjeje për urrejtje, dhunë apo cenim të rendit publik, por se “këngët popullore, kujtimi i të parëve, veshja tradicionale dhe shprehja paqësore e identitetit fetar dhe kombëtar nuk mund të trajtohen, në vetvete, si rrezik për rendin publik”.
Kisha shprehu gjithashtu shqetësim për, siç tha, pretendimet se disa nga të ndaluarit ishin ekspozuar ndaj “keqtrajtimit fizik dhe psikologjik, shuplakave, goditjeve, fyerjeve, kërcënimeve, poshtërimit, si dhe pretendimeve se atyre u ishte kërkuar të brohorisnin ‘Kosova Republikë’, nën kërcënimin e rrahjes”.
“Këto pretendime duhet të hetohen dhe të verifikohen seriozisht. Edhe më shqetësuese janë pretendimet se një pjesë e veshjes tradicionale të njërit prej të ndaluarve ishte përdhosur dhe se disa personave u është ofruar ndihmë mjekësore”, thuhet në njoftim.
Radio Evropa e Lirë nuk ka arritur t’i konfirmojë në mënyrë të pavarur pretendimet për keqtrajtim fizik dhe psikologjik të të ndaluarve. REL-i i është drejtuar Inspektoratit Policor të Kosovës me pyetje nëse ka pasur ankesa ndaj policisë gjatë shënimit të Vidovdanit në Gazimestan dhe nëse është iniciuar ndonjë hetim, por nga ky institucion ende nuk kanë kthyer përgjigje.
Gazimestani në Kosovë njihet gjithashtu për fjalimin që udhëheqësi i atëhershëm serb, Sllobodan Millosheviq, mbajti atje në vitin 1989.
Ky fjalim shpesh përmendet si hyrje në konfliktet e armatosura që pasuan shpërbërjen e ish-Jugosllavisë.
Zyra për Kosovën e Qeverisë së Serbisë dënoi ndalimet gjatë shënimit të Vidovdanit në Gazimestan, duke vlerësuar se bëhet fjalë për “një akt të turpshëm dhe të padenjë represioni”.
Lista Serbe, partia kryesore e serbëve në Kosovë që gëzon mbështetjen e Beogradit, njoftoi se ndalimet i konsideron si një përpjekje për frikësim dhe si dëshmi të “represionit të regjimit në Prishtinë”, duke shtuar se për rastin është njoftuar bashkësia ndërkombëtare./Radio Evropa e Lirë
Nënkryetari i LDK-së Lutfi Haziri, ka folur pas mbledhjes që kryesia e kësaj partie e ka mbajtur me kryetarët e degëve.
Ai para mediave u shpreh se nuk ka pasur asnjë takim me liderin e VV-së njëherësh kryeministrin në detyrë Albin Kurti.
“Më lejoni ta konfirmoi edhe njëherë. As nuk kemi pasur ftesë as nuk iu kemi ofruar askujt. Parimet gjithëpërfshirëse sipas rezultatit të fundit e njohin të drejtën e partisë së parë dhe i njohin të drejtat tona lidhur me peshën që na e kanë dhënë qytetarët. Takime nuk ka pasur deri në momentin që po flasim sepse nuk ka pasur asnjë ftesë”, u shpreh Haziri.
Haziri dha edhe detaje lidhur me atë se çka është diskutuar në mbledhje e LDK-së.
“Debati i brendshëm i LDK-së në situata paszgjedhore ka filluar sot. Natyrisht që disa degë dhe kolegë tonë kanë bërë veprime paszgjedhore që kanë shkaktuar edhe procese. Por, sot në kolegjiumin e degëve, diskutuam çështjet, analizuam numrat, vlerësimet e para që dalin nga rezultati zgjedhor. Numrat janë ata që LDK-së i kanë dhënë këtë peshë politike, ne jemi në një grup parlamentar prej 18 deputetësh. Pak a shumë në një situatë paszgjedhore në të cilën besojmë shumë që do të arrijmë ta mbyllim këtë proces pas certifikimit të rezultateve zgjedhore”, u shpreh Haziri.
Ish-deputeti i Aleancës, Daut Haradinaj ka vizituar Bekim Metajn, veteran i Ushtrisë së Kosovës, duke e cilësuar atë si “simbol të dinjitetit kombëtar e historik”.
Haradinaj tha se Metaj, pas 25 vitesh shërbim në uniformë, u përball në Magurë të Lipjanit me 21 persona të ardhur nga Serbia, për të cilët përdori termin “kriminelë”, duke pretenduar se tre prej tyre kishin qenë pjesë e formacioneve paramilitare serbe gjatë regjimit të Slobodan Millosheviqit.
” Siç edhe e do tradita ai nuk u ligështua për asnjë moment, i përkrahur nga familja dhe fshati i tij arriti t’i neutralizojë këto mbeturina, tre prej të cilëve ishin pjesë e paramilitarëve serbë të kohës së Millosheviqit”, ka shkruar Haradinaj.
Ai bëri të ditur se gjatë vizitës, së bashku me Gazin, Binakun dhe Kushtrimin, i shprehën Bekim Metajt dhe familjes së tij mbështetje dhe konsideratë.
Haradinaj gjithashtu kritikoi institucionet, duke deklaruar se “shteti nuk duhet të heshtë përballë këtij fenomeni që vetë e krijoi”.
Ngjarja në Magurë të Lipjanit ka nxitur reagime të shumta ditët e fundit, ndërsa autoritetet janë duke trajtuar rastin sipas procedurave ligjore.
Dje, banorët e Magurës së Lipjanit kanë nënshkruar një peticion, përmes të cilit kërkojnë që personat e përfshirë në incidentin e fundit në fshat të mos lejohen të kthehen më në Magurë.
Peticioni u nënshkrua gjatë një takimi të mbajtur me banorët, ku u diskutuan zhvillimet e fundit lidhur me incidentin në të cilin mbeti i lënduar veterani i UÇK-së, Bekim Meta. Në përfundim të takimit u vendos që peticioni t’i dorëzohet Policisë së Kosovës dhe Prokurorisë.
Incidenti kishte ndodhur katër ditë më parë, kur, sipas dyshimeve, një grup personash nga komuniteti rom sulmuan Skënder Shahinin para shtëpisë së tij, si dhe veteranin e luftës së UÇK-së, Bekim Meta.
Gjykata në Lipjan vendosi masë të arrestit shtëpiak për veteranin dhe invalidin e luftës së UÇK-së, Bekim Meta dhe për Skendër Shahinin, palë të përfshira në incident.
Xhuli Nura ka reaguar pas kritikave të shumta që ka marrë për zgjedhjen e saj për t’u bërë nënë e vetme përmes IVF-së.
Në një intervistë për “Kosova Live”, ajo foli për arsyet që e kanë çuar drejt këtij vendimi, duke theksuar se prioriteti kryesor për një fëmijë është të rritet në një ambient të mbushur me dashuri dhe përkujdesje.
“E vetmja gjë që i nevojitet fëmijës është një fëmijëri e lumtur edhe një nënë e lumtur që është e përmbushur, që i jep të gjitha gjërat që i nevojiten. Nuk po them që babai nuk është i rëndësishëm, është shumë i rëndësishëm, por nuk do të thotë që nuk vjen nesër një prind që do të jetë prind. Jo gjithmonë prindi biologjik është prindi ideal, adekuat për fëmijën e vet, kemi raste të ndryshme”, u shpreh ajo.
Nura shtoi se, sipas saj, në shumë raste është më mirë që një fëmijë të rritet larg një ambienti toksik sesa në një familje ku ka dhunë, tradhti apo trauma.
“Shpeshherë më mirë me qenë vetëm se me njerëz të gabuar që lënë trauma në familje, në shoqërinë tonë e në fëmijët e tyre”, tha ajo.
Duke iu përgjigjur edhe komenteve që e kanë cilësuar vendimin e saj si egoist, Xhuli theksoi se egoizmi nuk lidhet me dëshirën për t’i ofruar një fëmije dashuri dhe kushte të mira për t’u rritur.
“Sa i përket fjalës egoizmi, egoizmi është kur ti krijon një familje dhe e lë nëpër spitale, bërllok, jetimore. Nuk është kur një prind i jep çmos fëmijës së vet të rritet me të gjitha të mirat”, përfundoi tutje.
Vendimi i Xhulit për t’u bërë nënë e vetme me IVF ka nxitur reagime të shumta në publik, duke hapur diskutime mbi prindërimin, zgjedhjet personale dhe paragjykimet që vazhdojnë të shoqërojnë tema të tilla.