Author: K.B.

Në vazhdën e fushatës zgjedhore, Kandidati i Lëvizjes Vetëvendosje për kryetar të Prishtinës, Hajrulla Çeku ka zhvilluar sërë takimesh në bizneset lokale ku atyre u ka premtuar infrastrukturë dhe krijim të kushteve të punës për zhvillim të qëndrueshëm ekonomik.

Në Vushtrri, kandidati për kryetar nga radhët e Lëvizjes Vetëvendosje, Sylejman Meholli, banorëve të fshatit Samadrexh u premtoi ujë të pijshëm në çdo lagje, rrugë e trotuare, kanalizim funksional, mbështetje për bujqit e fermerët, e transport falas për nxënësit e shkollave të mesme.

Ndërkohë në Malishevë, kandidati Valon Hoti u zotua për përmirësimin e infrastrukturës, duke theksuar nevojën për kushte më të mira jetese për banorët e këtij lokaliteti.

Shpejtim Bulliqi kryetari aktual dhe kandidati për një mandat të ri në Podujevë ndau pamje nga vendosia e gurthemelin për ndërtimin e dy anekseve të reja shkollore, një investim në vlerë prej 1.2 milionë euro.

Fushatën të mërkurën në Skënderaj, Hysni Mehani e nisi duke kritikuar qeverisjen e pushtetit lokal për shkatërrimin e shkollës së Polacit, një pjesë të rëndësishme të trashëgimisë lokale, dhe u zotua ta mbrojë atë me çdo çmim.

Kurse kandidati për kryetar të Mitrovicë së Jugut, Faton Peci në takim me banorët e fshatit Zhabar u premtoi investime në çerdhe, ndërtim të nënkalimit për nxënësit në rrugën “Adriatiku”, vendosjen e ndriçimit publik, dhe rregullimin e trotuareve.

Qemajl Aliu, kryetari i komunës së Shtimës sot përurojë rrugën në fshatin Gllavicë, ku premtoi se vitin e ardhshëm do t’a funksionalizojë zonën e dytë ekonomike në Gllavicë.

Një trajektore e re prej 3.2 kilometrash është tashmë në dispozicion për qytetarët, sportistët e dashamirët e natyrës, në Parkun e Gërmisë.

Përmes shtegut të ri “Panorama” qytetarët do të lidhen me shtegun ekzistues të Ariut.

Mirëpo, sipas kryetarit aktual e që pretendon edhe një mandat tjetër, Përparim Rama, plan është shtimi i shtigjeve tjera.

“Për dy vitet e ardhshme kemi plan që të gjitha fshatrat e Gollakut, të gjitha pjesët, të jenë të ndërlidhura nëpërmjet shtigjeve si ky që po e përurojmë sot, në mënyrë që të zhvillojmë turizmin dhe të krijojmë mundësin për krijimin të atraksione të reja.”

Për qëllimin e shtimeve të shtigjeve foli Nazmi Hasanramaj nga klubi Alpin Prishtina.

“Jemi duke u përpjekur që qytetarët të dalin më shumë në natyrë, të jenë më kreativë kur bëhet fjalë për ecjen, dhe të kuptojnë që Prishtina ka potencial dhe njerëz që dinë, munden dhe duan.”

Aktualisht, në malet e Gërmisë janë të shënuara dhe të definuara 16 shtigje malore, me një gjatësi totale prej 65 kilometrash.

Revitalizimi i “Shtegu Panorama” u mundësua nga Komuna e Prishtinës, Korporata Rugove, Klubi Alpin Prishtina dhe subjekti “edhe”.

Kandidati për kryetar të Prishtinës nga radhët e Lidhjes Demokratike të Kosovës Përparim Rama, kandidat për një mandat të dytë, ka promovuar projektet e realizuara, si transformimi i një hapësire të braktisur në lagjen Kalabria dhe rregullimin e hapësirave publike në lagjen Arbëria.

Në Gjilan, kandidati Arbër Ismajli premtuar përfundimin e stadiumit dhe palestrave, si dhe krijimin e kushteve të përshtatshme për zhvillimin e sportit në komunë.

Ilir Ferati, kryetar aktual i Istogut dhe kandidat për një mandat të ri, ka paraqitur një program të strukturuar në gjashtë shtylla kryesore që, sipas tij, do të transformojnë qytetin.

Në Mitrovicë, kandidati Gëzim Plakolli ka vendosur në fokus të programit të tij mbështetjen për bizneset lokale, duke i quajtur ato gjeneratorë të vendeve të reja të punës dhe garanci për një të ardhme më të mirë.

Driton Selmanaj, kandidat për kryetar të Prizrenit, ka premtuar ruajtjen e trashëgimisë kulturore, me theks të veçantë te Kalaja e Prizrenit.

Në Shtime, kandidati Kastriot Shabani ka premtuar mbështetje të vazhdueshme për sportin dhe krijimin e hapësirave të përshtatshme për të rinjtë, si pjesë e përkushtimit ndaj gjeneratës së re.

Visar Azemi, kandidat për kryetar të Ferizajt gjatë takimit me rininë u premtoi atyre një qytet të gjelbër me më shumë parqe, furnizim të qëndrueshëm me ujë të pijshëm dhe përmirësim të infrastrukturës urbane.

Në Viti, kryetari aktual Sokol Haliti, i cili kandidon për një mandat të ri, ka ndarë projektet e realizuara në fshatin Kabash e Gërmovë, duke i vendosur si bazë për angazhimet e tij të mëtejme.

Kurse Xhafer Tahiri, kandidat për kryetar të Vushtrrisë, ka premtuar grante dhe trajnime për gratë me qëllim fuqizimin e tyre ekonomik.

Kandidati i Lëvizjes Vetëvendosje për kryetar të Prishtinës, Hajrulla Çeku premton mbështetje të qëndrueshme për artin dhe kulturën përmes platformës “Prishtina 2035”, që parasheh hapësira komunitare në çdo lagje, rezidenca vjetore për artistë, si dhe fonde për përkrahje sociale të tyre.

Në Gjakovë, kandidati Ardian Gola teksa kritikoi keqqeverisjen premtoi rindërtimin dhe funksionalizimin e Muzeut të Muzikës.

Alban Hyseni në Gjilan shpalosi arritjet e mandatit të tij të parë, përfshirë ndërtimin e tetë parqeve të reja dhe premtoi për katër të tjera.

Në Dragash, kandidati Filiz Mustafa u zotua për përmirësimin e infrastrukturës në fshatin Kosavë, përfshirë ndriçimin publik, kanalizimin, trotuaret, shtratin e lumit, sistemin e ngrohjes në shkollë dhe mbylljen e një deponie ilegale.

Valon Prebreza në Fushë Kosovë premtoi kushte të mira jetese, qasje në arsim e shëndetësi, dhe mundësi ekonomike për të gjithë, me moton se ndryshimi fillon nga dera e çdo shtëpie.

Kadri Rahimaj, kryetar aktual i Kamenicës, premton vazhdimin e investimeve në infrastrukturë rrugore në disa fshatra të komunës, duke theksuar se ritmi i zhvillimit nuk do të ndalet.

Në Mitrovicë, kandidat për kryetar, Faton Peci është zotuar për transformimin e hyrjeve të qytetit.

Artan Abrashi në Prizren ka prezantuar një plan për infrastrukturë moderne, me përfundimin e rrugëve në fshatra, unazës së dytë, nënkalimeve dhe urave të rëndësishme, si dhe një administratë transparente dhe të qasshme për qytetarët.

Në Skenderaj, Hysni Mehani vuri në pah përkrahjen që gëzon nga Qeveria e Kosovës dhe kryeministri Kurti, duke e cilësuar këtë si garanci për realizimin e programit të tij dhe për ndryshimin e shumëpritur në këtë komunë.

Sylejman Meholli në Vushtrri u premtoi banorëve të Studimes së Epërme ndërtimin e një muzeu për historinë e masakrës, duke u zotuar për kthimin e dinjitetit të këtij fshati të lënë pas dore.

Kurse Valon Hoti në Malishevë, gjatë një vizite në Pagarushë, premtoi zgjidhje për kanalizimet e dëmtuara dhe rrjetin e vjetër elektrik.

Kandidati për kryetar të Prishtinës, Bekë Berisha nga radhët e Aleancës për Ardhmërinë e Kosovës, zhvilloi takim me përfaqësues të Shoqatës së të shurdhërve, ku premtoi pjesëmarrjen e plotë të tyre në jetën shoqërore dhe krijimin e mundësive reale për punësim në profesionet e dëshiruara.

Në Viti, kandidati Labinot Bislimi, nga Binqa, premtoi ndërtimin e kanalit të lumit Morava, dhe investime tjera anash kësaj rrjedhe ujore.

Edhe nga fshati turistik, Stublla, premtoi investime në krijimin e kushteve që ndikojnë në rritjen e turizmit.

Ndërkaq Vildane Latifi në Fushë-Kosovë, premtoi kryesisht investime ne fushën e shëndetësisë si krijimin e një qendre moderne shëndetësore, orarin e zgjeruar ne QMF dhe pajisje moderne e furnizime shëndetësore e të tjera.

Mensut Ademi që synon ulësen e kryetarit në Vushtrri, nga fshati Reznik premtoi infrastrukturë më të mirë për këtë fshat përfshirë; Ndriçimi publik, sinjalistikë, kanalizim e ujë të pijshëm.

Takime me qytetar gjatë së dielës kishte zhvilluar edhe Enver Hoti në Malishevë.

Mbrëmë, vota për Besnik Krasniqin kryetar të Prizrenit kishte kërkuar edhe kryetari i Aleancës për Ardhmërinë e Kosovës, Ramush Haradinaj.

Kryetari i Nismës Socialdemokrate, Fatmir Limaj, ka nisur sot fushatën zgjedhore në Gjilan, së bashku me Kryesinë dhe Shtabin Zgjedhor të partisë.

Limaj theksoi se kryetari i degës, Ismet Hajdini, së bashku me ekipin e tij do të jetë një alternativë reale për qytetarët, duke adresuar problemet e tyre dhe duke sjellë zhvillim e përmirësim në shërbimet publike dhe infrastrukturë.

Kandidati për kryetar komune nga Nisma Socialdemokrate, Xhemajl Hasani, ka kritikuar ashpër menaxhimin e deritanishëm të komunës së Podujevës për gjendjen e keqe të infrastrukturës rrugore, veçanërisht në lagjen Makoll të fshatit Herticë.

Hasani ka premtuar se, në rast të zgjedhjes së tij si kryetar, përmirësimi i këtyre rrugëve do të jetë një nga prioritetet kryesore të qeverisjes së tij.

Kurse, Shefki Salihu, kandidati për Obiliqin ka prezantuar projektin e ndërtimit të një Qendre Ditore për Personat me Aftësi të Kufizuara, e cila do të ofronte shërbime psikologjike, logopedi, fizioterapi për mbi 300 qytetarë, duke përmirësuar cilësinë e jetës së tyre.

Xhevahire Izmaku, e cila aspiron të bëhet kryetarja e parë grua në këtë komunë, ka prezantuar kandidati në listën e Nismës, Arbënor Mustafa I cili ka fokus zhvillimin ekonomik dhe mbështetjen e bizneseve lokale për krijimin e vendeve të reja të punës.

Në Prizren, kandidatja e NISMËS, Albulena Balaj Halimaj në ditën e 23-të fushatës, premtoi komuna do të financojë idetë inovative në fushat e teknologjisë, artit, kulturës dhe turizmit, duke nxitur kreativitetin dhe zhvillimin lokal.

Kandidati i PDK-së për kryetar të Prishtinës, Uran Ismajli premtoi çerdhe, ndriçimi, ujësjellës e rrugë në zona rurale të kryeqytetit nga fshati Llukar. Ismajli tha se këto premtime i bënë duke qenë i sigurt se do ti realizojë vetë pasi nuk presin miratim nga qeveria por punë nga komuna.

Agim Aliu në Ferizaj, i cili kërkon edhe një mandat, u takua me drejtuesit e anëtarët e Shoqatës së Pedagogëve të Kulturës Fizike dhe Sportit Shkollor. Me ta, Aliu thotë se diskutoi mbi vizionin për fuqizimin e sportit shkollor dhe investimet në infrastrukturën sportive siç është Kompleksi Sportiv Shkollor.

Një mori premtimesh në fushën e arsimit I beri kandidati për kryetar në Mitrovicë, Arian Tahiri.

Ndërsa Ali Nimanaj në Istog, fokusin e kishte tek bujqësia teksa vizitoi një fermë, ai premtoi pesëfishimin e subvencioneve për bujqësi, hapjen e 666 bunarëve për ujitje jashtë zonave aluvionale, Subvencione për sera nga 1 deri në 5 ari e mbështetje për blegtorët me gjedhe dhe kafshë të imëta.

Shaqir Totaj në Prizren premtoi rreth 2 mijë vendparkingje në 4 lokacione të qytetit, siç tha, për ta zbutur kërkesën e madhe për shkak të numrit të vizitorëve

Ndërkaq, Petrit Hajdari në Drenas, premtoi hapjen e disa rrugëve të këtij qyteti, siç tha për ti dhënë frymëmarrje ekonomisë lokale dhe qasje më të lehtë për çdo qytetar.

Votë doli të kërkoj edhe Shukri Buja në Lipjan, tek disa bashkëluftëtarë të tij.

Bizneset, premtoi se do ti mbështesë edhe Bekim Azizi në Viti teksa vizitoi një të tillë, ai tha se do të krijojmë mundësi të reja pune për të rinjtë.

Në kuadër të fushatës zgjedhore të Kosova Demokratik Türk Partisi, kandidati Furkan Bütüç për kryetar komune në Prizren, ka zhvilluar takime me qytetarë dhe zejtarët e lagjes Terzimahale, me të cilët ndau shqetësimet dhe vizionin për një Prizren më të fortë dhe më të jetueshëm.

Ai ka bërë të ditur se në mandatin e tij do të angazhohet për krijimin e mekanizmave mbështetës për zejtarët, përfshirë subvencione, promovim të produkteve lokale dhe organizimin e aktiviteteve që lidhin traditën me zhvillimin turistik të qytetit.

Në një tjetër takim me Shoqatën ESNAF, së bashku me zyrtarë të lartë të KDTP-së, Bütüç prezantoi programin e qeverisjes lokale me fokus në fuqizimin ekonomik dhe social të komunitetit.

Ai theksoi rëndësinë e bashkëpunimit institucional dhe shoqëror për të ndërtuar një Prizren modern dhe gjithëpërfshirës.

Ndërkohë në Mamushë, kryetari aktual dhe kandidati për një mandat të ri, Abdulahadi Krasniç, ka rikujtuar projektet kulturore dhe edukative të realizuara gjatë 4 viteve të fundit teksa ka prezantuar një sërë zotimesh që lidhen me investimin në rininë dhe arsimimin e saj.

Ai ka premtuar zgjerimin e projekteve kulturore dhe edukative për të rinjtë, përfshirë organizimin e udhëtimeve kulturore.

Në programin e tij për mandatin e ardhshëm, Krasniç, synon vazhdimin e bashkëpunimit me universitetet dhe qendrat kërkimore, për të forcuar kapacitetet zhvillimore të Mamushës në sektorë kyç si bujqësia, arsimi dhe shëndetësia.

Kandidati për kryetar të Prishtinës nga radhët e Lidhjes Demokratike të Kosovës Përparim Rama, në ditën e 20 të fushatës ka prezantuar punët e realizuara në rrugën “Jim Xhema”.

Rama ka adresuar gjithashtu edhe kritika ndaj kundërkandidatit nga radhët e Vetëvendosjes, Hajrullah Çeku.

Në Gjilan, kandidati Arbër Ismajli gjatë vizitës në një biznes privat në Livoç të Ulët u zotua për mbështetje më të madhe të bizneseve lokale dhe zhvillim të ekonomisë së qytetit.

Në Istog, kryetari aktual Ilir Ferati, i cili garon për një mandat të ri, premtoi vazhdimin e skemës së bursave për çdo maturant, duke ofruar 650 euro për studimet e tyre.

Në Mitrovicë, kandidati Gëzim Plakolli u takua me sportistë të klubeve të judos dhe karatesë “Trepça”, duke premtuar mbështetje institucionale për sportin dhe rininë.

Në Rahovec, kandidati Burim Krasniqi prezantoi projektin e transportit publik “TUR”, në të cilën cili do të mundësojë lidhjen e fshatrave me qytetin përmes autobusëve elektrikë. Projekti I cili parashehit transport falas për nxënësit dhe pensionistët.

Në Prizren, kandidati Driton Selmanaj paraqiti vizionin e tij për kthimin e lagjeve Nënkalaja dhe Kurilla në atraksione turistike.

Në Suharekë, kandidati Ardian Shala premtoi mbështetje për institucionet kulturore, festivalet dhe përfshirjen e të rinjve në art e krijimtari.

Në Vushtrri, kandidati Xhafer Tahiri vizitoi lagjen “Pandeli Sotiri”, kritikoi keqqeverisjen e deritashme. Ai premtoi premtoi investime në ndriçim publik, mbështetje për bizneset dhe projekte për rigjallërimin e qytetit.

Në kryeqytet, kandidatja për kryetare të PrishtinëS nga Partia Social Demokrate, Besa Shahini premton që do të krijojë 30 kopshte dhe 30 çerdhe publike në të gjitha lagjet e qytetit, investim që do të zvogëlojë shpenzimet mujore të familjeve për kujdesin dhe edukimin e fëmijëve.

Natyra Kuçi, kandidate për kryetare të Deçanit, fokusohet në zhvillimin e tregut publik. Ajo premton kushte të përshtatshme gjatë gjithë stinëve të vitit duke bërë tregun një vend më funksional dhe atraktiv për qytetarët dhe tregtarët.

Kurse, Qëndron Kastrati, kandidat për kryetar të Kamenicës nga PSD, i kushton vëmendje fuqizimit të grave dhe bashkëpunimit të vazhdueshëm me komunitetin teksa përmendi rëndësinë e Handikos si shembull të përkushtimit njerëzor dhe mbështetjes ndaj atyre në nevojë.