Author: K.B.

Kandidati i Lëvizjes Vetëvendosje për kryetar të Prishtinës, Hajrulla Çeku, zhvilloi një takim me të rinjtë e kryeqytetit, ku theksoi se rinia është në qendër të platformës së tij. Ai prezantoi planet për përmirësimin e sigurisë në shkolla dhe lagje, zhvillimin e hapësirave për art, kulturë dhe sport, si dhe mbështetjen për sektorin e teknologjisë informative dhe shërbimet psikologjike në shkolla.

Kandidati i Lëvizjes Vetëvendosje për kryetar të Vushtrrisë, Sylejman Meholli, ka zhvilluar takime me qytetarët në Stanoc të Epërm, duke premtuar mbështetje për fermerët dhe zgjidhje për furnizimin me ujë, ndriçimin dhe rrugët.

Në Gjilan, kryetari aktual dhe kandidati për kryetar të Gjilanit, Alban Hyseni, zhvilloi takim me banorët e Perlepnicës dhe premtoi vazhdimësi të projekteve me mbështetjen e qeverisë.

Shpëtim Bulliqi, kryetar aktual i Podujevës, kandidat për mandat të dytë, u takua me persona me dëgjim dhe të folur të kufizuar. Bulliqi ju premtoi mbështetje kësaj kategorie duke ju garantuar gjithëpërfshirje.

Në Viti, kandidati Arsim Ademi, kërkoi mbështetje nga banorët dhe premtoi të sjellë modelin e qeverisjes qëndrore në nivel lokal.

Kandidati i Lëvizjes Vetëvendosje për kryetar të Fushë Kosovës, Valon Prebreza, premtoi se gratë dhe të rinjtë do të jenë në fokus, me fonde për start-up, programin “Rinia punon” dhe bursat për vajzat në STEM.

Kurse takim me gratë dhe vajzat, mbajti kandidati për kryetar të Mitrovicës Jugore, Faton Peci. Peci u zotua se do të krijoë barazi dhe Mitovica në drejtim e tij do të jetë qytet i barabartë për të gjithë.

Kandidati i Lëvizjes Vetëvendosje për kryetar të Prizrenit, Artan Abrashi, takoi përfaqësuesit e shoqatave të dala nga lufta e UÇK-së. Në këtë takim ai ka pranuar shqetësim e tyre duke ju ofruar mbështetje dhe duke e vlerësuar kontributin e tyre të madh për liri.

Kandidati i PDK-së për kryetar të Prishtinës, Uran Ismajli, ka prezantuar një sërë projektesh konkrete për lagjen Barilevë, përfshirë rregullimin e lumit me shtigje vrapimi, ndriçim publik dhe përmirësim të stadiumit.

Kurse gjatë vizitës në Mramor, Ismajli prezantoi zgjidhje për ujë të pijshëm, rrugë moderne dhe hapësira publike që i japin jetë komunitetit.

Në Istog, kandidati i PDK-së, Ali Nimanaj, ka zhvilluar takime me qytetarët në Llukafc të Begut, ku tha se programi i tij është i ndërtuar mbi nevojat specifike të çdo fshati të komunës.

Kandidati për kryetar të Mitrovicës, Arian Tahiri, ka prezantuar projektin për transformimin e lumit “Trepça”.

Në Lipjan, kandidati i PDK-së, Shukri Buja ditën e 16-të e ka shfrytëzuar për të nderuar figurat historike të luftës së UÇK-së në këtë komunë dhe ka falënderuar qytetarët për pjesëmarrjen masive në tubimet zgjedhore.

Në Artanë, kandidati i PDK-së, Selatin Nuhiu, u ka bërë thirrje qytetarëve që ta mbështesin atë dhe listën për Kuvendin Komunal, teksa është zotuar për transparencë.

Në Prizren, kandidati dhe kryetari aktual, Shaqir Totaj, ka përuruar projektin infrastrukturore dhe atë të ujësjellësit në zonat rurale të Medvecit, Zojzit, Piranës dhe Mamushës.

Totaj mori pjesë edhe në manifestimin qendror për Ditën e Boshnjakëve në fshatin Reçan të Zhupës, ku u bë hapja solemne e Sebiljit – simbol i unitetit dhe trashëgimisë boshnjake.

Në Viti, kandidati i PDK-së, Bekim Azizi, ka organizuar takime me gra dhe vajza të kësaj komune, duke premtuar mbështetje të fuqishme për fuqizimin e tyre në të gjitha fushat.

Në Vushtrri, kryetari aktual dhe kandidati për mandat të dytë, Ferit Idrizi, ka takuar zejtarët dhe bizneset lokale, duke prezantuar projektet për mandatin e ardhshëm.Ai gjithashtu ka vizituar banorët e një lagjeje të prekur nga zjarri, ku tha se ndihma e shpejtë e komunës është dëshmi e një qeverisjeje përgjegjëse.

Në kuadër të fushatës për zgjedhjet lokale të 12 tetorit, kandidatja për kryetare në Prizren, Albulena Balaj Halimaj, e shoqëruar nga kryetari i partisë Fatmir Limaj, ka zhvilluar një takim mobilizues në lagjen Kurillë, ku është theksuar mbështetja në rritje për platformën e saj “Përjetë Prizreni”.

Ajo ka theksuar nevojën për zhvillim të qëndrueshëm urban dhe rural, ruajtje të trashëgimisë kulturore, modernizim të transportit publik, mbështetje për gratë, të rinjtë dhe sipërmarrësit lokalë, si dhe qeverisje transparente e gjithëpërfshirëse.

Në Vushtrri, kandidatja për kryetare, Xhevahire Izmaku, është pritur ngrohtësisht nga qytetarët nëpër lagje e fshatra, ku ka theksuar përkushtimin për reformë në administratë, investime në arsim profesional, mbështetje për bujqësinë, si dhe rritje të rolit të grave në qeverisje. Gjatë një vizite në Akrashticë, ajo ka shprehur krenarinë për bashkëpunimin me Hatiqe Bunjaku Shalën, kandidate për Asamblenë Komunale nga kjo familje.

Ndërkaq, në Malishevë, kryetari aktual dhe kandidat për një mandat të ri, Ekrem Kastrati gjatë një tubimi ME banorët e Gurbardhit ka theksuar se mbështetja e qytetarëve është dëshmi e qartë e vlerësimit për punën e deritashme dhe ka premtuar vazhdimin e projekteve infrastrukturore, përmirësim të shërbimeve shëndetësore dhe arsimore, si dhe krijimin e kushteve për të rinjtë që të ndërtojnë të ardhmen në vendlindje.

Kandidati për kryetar të Prishtinës nga radhët e Lidhjes Demokratike të Kosovës Përparim Rama, i cili kandidon edhe për një mandat të dytë ka vënë theksin në rigjenerimin urban të lagjeve. Sipas tij, për herë të parë, lagjet e kryeqytetit po marrin formë përmes planeve të mirëfillta urbane.

Me fokus të veçantë në rininë dhe sportin, kandidati për kryetar në Gjilan, Arbër Ismajli premtoi mbështetje të madhe për klubet sportive.

Mbështetja për sportin, sidomos për klubet lokale që përballen me mungesë përkrahjeje premtoi edhe Gëzim Plakolli,kandidat për kryetar në Mitrovicë.

Kurse në Istog, kandidati për mandat të dytë, Ilir Ferati teksa ka zhvilluar takime me të rinjtë istogas ka shprehur përkushtimin për të ndërtuar një Istog që ofron hapësira për zhvillim dhe përfshirje.

Në Lipjan, Imri Ahmeti, kryetar aktual dhe kandidat për mandat të ri, ka theksuar intensifikimin e punës në terren dhe angazhimin e pandalshëm për zhvillimin e komunës. Ai gjithashtu ka nderuar dëshmorët, me homazhe pranë shtatores së Arsim Zeqirit.

Në Prizren, kandidati Driton Selmanaj ka prezantuar një vizion për zhvillim kulturor. Ai ka premtuar hapësira të reja për art, muzikë, teatër, biblioteka dhe qendra rinore në çdo lagje.

Visar Azemi, kandidat për kryetar të komunës së Ferizajt teksa ka zhvilluar takim me banorët, ai u ka premtuar zgjidhje për problemet infrastrukturore.

Ndërsa në Viti, Sokol Haliti, kryetar aktual dhe kandidat për mandat të ri, ka shprehur mirënjohjen për mbështetjen që po merr nga qytetarët, sidomos nga të rinjtë. Ai ka premtuar vazhdimin e projekteve transformuese që, sipas tij, e kanë ngritur Vitinë dhe do ta ngrejnë edhe më lart në mandatin e ardhshëm.

Në kuadër të fushatës zgjedhore të Kosova Demokratik Türk Partisi, dy kandidatët për kryetar komune, Furkan Bütüç në Prizren dhe Abdulahadi Krasniç në Mamushë kanë intensifikuar takimet me qytetarë duke shpalosur vizionin dhe angazhimet e tyre.

Në Prizren, kandidati Furkan Bütüç është zotuar për një përfaqësim të fuqishëm të komunitetit turk në institucionet lokale, duke theksuar rëndësinë e unitetit, bashkëpunimit dhe pjesëmarrjes aktive të qytetarëve në vendimmarrje teksa ka zhvilluar takime të shumta në lagje të ndryshme, ku ka dëgjuar nga afër shqetësimet dhe nevojat e banorëve.

Bütüç ka premtuar se me përkrahjen e qytetarëve, më 12 tetor do të sigurojnë tre ulëse në këshillin komunal, duke rikthyer ndikimin e munguar në institucionet vendore. Ai ka deklaruar se do të punojë për një qytet më të zhvilluar ekonomikisht, për më shumë mbështetje për bizneset e vogla dhe zejtarët, si dhe për shërbime më cilësore për qytetarët.

Ndërkohë në Mamushë, kryetari aktual dhe kandidati për një mandat të ri, Abdulahadi Krasniç, ka vënë theksin në vazhdimësinë e projekteve të mëdha që kanë filluar gjatë mandatit të tij.

Ai ka prezantuar ndërtimin e Qendrës Kulturore si projektin më të rëndësishëm që po realizohet aktualisht në këtë komunë, një investim që është cilësuar si më i madhi në historinë e Mamushës. Me një mbështetje shtesë prej 900 mijë eurosh nga Ministria e Kulturës, ky projekt pritet të përfundojë në vitin 2026 dhe synon të bëhet zemra e jetës kulturore, arsimore dhe shoqërore të qytetit.

Gjatë fushatës, Krasniç ka zhvilluar takime të përditshme me qytetarë në lagje e fshatra, ku ka diskutuar për shërbimet që janë ofruar deri tani dhe projektet që do të realizohen në të ardhmen.

Kandidati për kryetar të Prishtinës nga radhët e Aleancës për Ardhmërinë e Kosovës, Bekë Berisha, gjatë fushatës së tij zgjedhore ka prezantuar programin për lagjet Ulpiana dhe Dardania, të cilat i ka quajtur themelet e lashta të Prishtinës.

Sipas Berishës, ky program është hartuar bashkë me qytetarët teksa premton përmirësim të infrastrukturës, rritje të cilësisë së jetës dhe ruajtjen e trashëgimisë historike të kryeqytetit.

Në Rahovec, Smajl Latifi, i cili kërkon një mandat të ri si kryetar komune, ka vendosur shëndetësinë si prioritet kryesor të qeverisjes së tij. Ai premton aparatura moderne, digjitalizim, trajnime për mjekë dhe punësim të të diplomuarve të rinj.

Kandidati për kryetar të Pejës, Ali Berisha, ka kritikuar politizimin e sistemit arsimor premton transport falas për nxënësit, mbështetje për bujqit dhe shëndetësi më funksionale.

Në Suharekë, Bali Muharremaj, aktualisht në krye të komunës dhe kandidat për një mandat të ri, ka zhvilluar takime me biznese vendore dhe ka nderuar dëshmorët lokalë. Ai ka premtuar vazhdim të zhvillimit dhe bashkëpunim të ngushtë me qytetarët dhe sektorin privat.

Në Ferizaj, kandidatja e AAK-së Xhemile Murati Shabani premton një qeverisje më të drejtë dhe më afër qytetarëve, me synim zhvillimin e komunës.

Me banorët e Lagjes Bajram Curri në Prizren, u takua në ditën e 11 të fushtës zgjedhore i pari i Lëvizjes Vetvendosje, Albin Kurti dhe kandidati për kryetar Artan Abrashi.

Në një tubim tjetër në Kobaj, të vetëm nuk e lanë Abrashin, as nënkryetari i partisë Glauk Konjufca dhe ministri i brendshëm në detyrë, Xhelal Sveçla. Sipas Arbashit entuziazmi i banorëve në takimet që po mbahen në Prizren është dëshmi e qartë se fitorja e 12 tetorit po bëhet e pandalshme.

Kurti gjatë ditës ishte i pranishëm edhe në Podujevë, ku aktualisht kryetar i komunës është anëtari i partisë së tij Shpejtim Bulliqi. Arsye e vizitës ishte shtimi i 15 shërbimeve të reja specialisitike në Poliklinikën e qyteti.

Rrugës për tu takuar me banorët e lagjes së Bregut të Diellit, kandidati për kryetar të kryeqytetit, Hajrulla Çeku pati edhe një mesazh për kryetarin aktual, Përparim Rama.

Kandidati për Kamenicën, Kadri Rahimaj në vlerë prej 9400 euro dhuroi lodra të reja për të gjithë parashkollorët si dhe të vegjëlit në çerdhe.

Takim me personat me nevoja të veçanta mbajti në ditën e 11 të fushatës zgjedhore, Sylejman Meholli kandidati për kryetar të Vushtrrisë nga subjekti politik Lëvizja Vetvendosje.

Meholli u zotua se me qeverisjen e tij në të gjitha projektet intensive do të sigurojnë qasje për personat me nevoja të veçanta.

Ndihmë dhe lehtësim për biznese premtoi kandidati për Ferizajin, Enver Haliti.Ai u zotu se me qeverisjen e tij do të ndërtohet një zonë e re industrial e cila do të vendoset mes unazës së jashtme dhe të mesme.

Mbështetje për bizneset e vogla premtoi kandidati për kryetar të Pejës, Taulant Kelmendi. Kelmendi tha se komuna nuk duhet të jetë pengesa por mbështjetja.

Kandidati i PDK-së për kryetar të Prishtinës, Uran Ismajli në Prishtinë ka prezantuar një plan të detajuar për rigjallërimin e lagjes Tophane, që përfshin ndërtimin e një çerdheje, qendre komunitare, restaurim të klubit të boksit, legalizim pronash, si dhe krijimin e një bulevardi modern përgjatë rrugës “Lidhja e Prizrenit”.

Sami Lushtaku në Skenderaj ka zhvilluar takime me qytetarë, duke premtuar mbështetje për ekonominë lokale, arsim dhe pensionistët.

Bekim Azizi në Viti ka premtuar ndërtimin e një tregu të gjelbër modern, me kushte të denja për tregtarët dhe qytetarët, dhe zbatim të projekteve konkrete.

Ferit Idrizi në Vushtrri ka njoftuar për investime në aftësim profesional dhe premton 1 milion euro për programe rinore në mandatin e dytë.

Kandidati Ali Nimanaj në Istog është përqendruar në shëndetësi, duke marrë pjesë në fushata vetëdijesuese dhe duke premtuar investime në parandalim dhe konsultim mjekësor.

Sabedin Vishi në Kaçanik ka vendosur në qendër të programit gratë, me premtime për 200 euro për lehonat, rritje të shërbimeve në QKMF, subvencione për biznese dhe bursa për shkollim.

Arian Tahiri në Mitrovicë ka premtuar revitalizimin e lumit Ibër dhe krijimin e një Inkubatori Biznesi për të rinjtë, duke u fokusuar në hapësira publike dhe zhvillim ekonomik.

Në Lipjan, kandidati Shukri Buja ka shpallur marrëveshje me Nismën Socialdemokrate për mbështetje të ndërsjellë dhe qeverisje të bashkuar mbi vlera të përbashkëta.

Në Podujevë, kandidati Isak Shabani në Podujevë ka kritikuar keqmenaxhimin në infrastrukturë sportive dhe është zotuar për kushte më të mira për të rinjtë dhe sportin.

Shaqir Totaj në Prizren, që kërkon mandatin e dytë, ka prezantuar projektet e realizuara në fshatin Kobaj dhe investimet infrastrukturore në lagje dhe fshatra.

Kandidatja për kryetare të Prizrenit nga radhët e partisë “Nisma Socialdemokrate”, Albulena Balaj – Halimaj, ka premtuar që një nga prioritetet e saj kryesore do të jetë përmirësimi i kushteve në shkolla. Ajo është zotuar që komuna do të siguroj dollapë për nxënësit në çdo klasë, në mënyrë që fëmijët të mos kenë më nevojë të mbajnë çanta të rënda.

Në Vushtrri, kandidatja për kryetare Xhevahire Izmaku, teksa ka shprehur shqetësimin e saj për fontanën kryesore të qytetit ka premtuar se nëse zgjidhet kryetare do të krijojë hapësira publike më relaksuese dhe miqësore për të rinjtë dhe familjet.

Nga ana tjetër, në Malishevë, kryetari aktual dhe kandidat për mandat të ri, Ekrem Kastrati, gjatë tubimit të fundit u përkrahu nga kryetari i Nismës Socialdemokrate, Fatmir Limaj.

Besa Shahini kandidate për kryetare të Prishtinës nga Partia Socilademokrate ka vazhduar që në kuadër të fushatës të ilustroi sfidat ekonomike të qytetarëve të kryeqytetit.

Kandidatja për të parën e Prishtinës gjatë ditës vizitoi çerdhen dhe kopshtin “Ardhmënia”. Gjatë vizitës, u diskutua për rëndësinë e edukimit në fëmijërinë e hershme dhe nevojën për investime në çerdhe dhe kopshte publike.

Ndërkaq kandidatja për kryetare të Deçanit, Natyra Kuçi ka akuzuar kryetarin aktual Bashkim Ramosajn dhe vëllaun e tij për keqpërdorim të pronës komunale.

Kandidati nga PSD, për kryetar të Kamenicës Qëndron Kastrati në ditën e 11 të fushtës zgjodhi të vizitoj një biznes familjar, ku sipas tij është shembull i një ndërmarrjeje që, përmes përkushtimit dhe punës së ndershme, po sjell risi në industrinë e prodhimit të kapakëve dhe elementeve plastike për ujin e ambalazhuar.