Author: K.B.

Kandidati për kryetar të Prishtinës, nga radhët e Lëvizjes Vetëvendosje, Hajrulla Çeku në programin e tij qeverisës synon të fuqizojë sektorin kreativ dhe digjital, duke e bërë atë shtyllë të zhvillimit dhe punësimit.

Çeku gjatë ditës së enjte ishte në takime me gratë e Prishtinës nga ku theksoi rëndësinë e rritjes së pjesëmarrjes së grave në pozita vendimmarrëse, duke u angazhuar për mbështetje në punësim dhe sipërmarrje.

Në Gjakovë, kandidati Ardian Gola premtoi mbështetje ndaj personave me nevoja të veçanta dhe krijimin e kushteve të barabarta për të gjithë qytetarët.

Në Gjilan, Alban Hyseni, që kërkon mandat të dytë, përmes një video-incizimi theksoi menaxhimin e përgjegjshëm financiar ku janë shlyer mbi 17 milionë euro borxhe të trashëguara.

Kandidati, Filiz Mustafa në Dragash fokusohet në ringjalljen e objektit të shkollës “Sezai Surroi” për ta kthyer në çerdhe për fëmijë, duke kritikuar shkatërrimin e mëparshëm nga pushteti aktual.

Kadri Rahimaj që kërkon mandat të dytë në Kamenicë premton përmirësimin e shërbimeve shëndetësore, duke sjellë autoambulancë të re si pjesë të kujdesit më të shpejtë për qytetarët.

Kandidati, Artan Abrashi në Prizren kritikon keqpërdorimet dhe kontratat e fryra nga pushteti aktual, duke premtuar mbrojtjen e biznesit të vogël dhe zhvillimin në dobi të qytetarëve.

Qemajl Aliu, kryetar aktual i Shtimes që kërkon edhe një mandat, ka prezantuar pamjet nga transformimi i infrastrukturës sportive në komunë. Ai rikujton gjendjen në të cilën ishte stadiumi më 2 tetor 2021 dhe prezanton pamjen e 2 tetorit 2025.

Kandidati, Hamdi Bytyçi në Suharekë prezantoi programin qeverisës për Therandën 2025 – 2029.

Kurse, kandidati Valon Hoti në Malishevë denonconi menaxhimin e keq të mbrojtjes së mjedisit, duke premtuar kujdes dhe mbrojtje për lumin Mirusha.

Kandidati për kryetar të Prishtinës nga Partia Demokratike e Kosovës, Uran Ismajli, ka prezantuar projektin për lagjen Arbëria.

Ai premton gjithashtu përmirësimin e infrastrukturës në qytet me 1,000 rrugë të ndriçuara dhe 450 km trotuare të reja.

Petrit Hajdari kandidat për kryetar në Drenasi tha se është i përkushtuar për zhvillimin e lagjes Komoran, duke theksuar nevojën për ndryshim dhe zhvillim në këtë zonë që sipas tij është lënë pas dore.

Rrahim Tërnava, kandidati për Fushë Kosovën, premton përmirësimin e banesave përmes izolimit termik dhe rregullimin e ngrohtores së qytetit, si dhe trefishimin e buxhetit për bujqësinë.

Në Mitrovicë, Arian Tahiri mbështet fuqishëm bizneset lokale, duke i cilësuar si shtyllë të zhvillimit ekonomik të qytetit dhe premton përkrahje të vazhdueshme

Në Lipjan, kandidati Shukri Buja gjatë vizitës në Janjevë u premtoi banorëve për zgjidhjen e problemit me furnizimin me ujë të pijshëm në të gjitha vendbanimet, jo vetëm për Janjevën.

Kandidati Edon Cana në Rahovec synon rigjallërimin e qendrës historike dhe kulturore të qytetit me një projekt afatgjatë për ta kthyer këtë zonë në një hapësirë aktive dhe ikonike.

Në Prizren, Shaqir Totaj premton rritjen e bursave për studentët, duke përmendur rastin konkret të një studenteje përfituesi dhe duke garantuar përmirësimin e mbështetjes financiare në vitet e ardhshme.

Në Ferizaj, Agim Aliu premtoi mbështet fuqimisht zhvillimin e sportit, duke promovuar nismën për ringritjen e basketbollit lokal me klubin “Ferizaj Wolves” dhe duke ofruar përkrahje për sportistët dhe iniciativat sportive.

Kandidatja e NISMA Socialdemokrate për kryetare të Vushtrrisë, Xhevahire Izmaku gjatë takimit me Bashkësinë Islame në këtë komunë, u zotua se do të punojë me dinjitet, humanitet dhe respekt për të gjithë qytetarët, duke theksuar se pjesëmarrja aktive e grave është një vlerë që do të mbështetet fuqishëm gjatë mandatit të saj.

Në Prizren, kandidatja Albulena Balaj – Halimaj ka prezantuar një ndër zotimet kryesore të saj në fushën e shëndetësisë dhe sigurisë publike: krijimin e një qendre të veçantë paramedike. Sipas saj, kjo qendër do të funksionojë në bashkëpunim ndërinstitucional mes shërbimeve emergjente shëndetësore, policisë dhe zjarrfikësve.

Në Malishevë, kryetari aktual Ekrem Kastrati, i cili garon për një mandat të dytë, ka vënë në pah rëndësinë e bashkëpunimit ndërkombëtar dhe mbështetjes për përmirësimin e shërbimeve komunale. Ai ka bërë të ditur pranimin e një donacioni nga Komuna e Meyrinit në Zvicër, në vlerë prej mbi 250 mijë eurosh në pajisje moderne për mirëmbajtjen e ambientit.

Përndryshe Kastrati ka vazhduar fushatën në lagje dhe fshatra të Malishevës teksa është shprehur se mobilizim i tillë është shenjë e qartë e një fitoreje të thellë më 12 tetor.

Kandidati për kryetar të Prishtinës nga radhët e Aleancës për Ardhmërinë e Kosovës, Bekë Berisha, ditën e 20 të fushatës e nisi me me moton “AJ HEV GRADUEJTED n’PRISHTINË!”, duke theksuar se më shumë se diploma, rëndësi ka lidhja dhe njohja me qytetin.

Ardian Gjini, që kërkon një mandat të ri në Gjakovë, duke vlerësuar arritjet e deritanishme, përmes një mesazhi të shkurtër, ai ka shprehur bindjen se “të gjitha regjionet janë TOP”, si tregues i barazisë zhvillimore dhe përparimit të qëndrueshëm në nivel lokal.

Smajl Latifi, që garon për një mandat të ri në Rahovec ka takuar përfaqësuesit e Handikos dhe Kryqit të Kuq në objektin e rinovuar të tyre. Ai ka premtuar se në mandatin e ardhshëm do të jetë më aktiv me përkrahje për këto grupe dhe do të forcojë bashkëpunimin me organizatat në shërbim të komunitetit.

Në Pejë, kandidati Ali Berisha bën thirrje për të krahasuar Pejën e dikurshme me atë të sotme, nga ekonomia, sporti, gjelbërimi dhe infrastruktura. Ai premton kthimin e qytetit në pozicionin që i takon si lidere në nivel vendi.

Kandidati i AAK-së për Viti, Labinot Bislimi paraqiti një projekt ekologjik dhe urbanistik për Sllatinën e Poshtme me qëllim krijimin e një zone të pastër, të gjelbër dhe funksionale për qytetarët.

Në Vushtrri, Mensut Ademi ka vendosur theksin te përfaqësimi i brezit të ri dhe përfshirja e grave në vendimmarrje, duke prezantuar kandidaturat për Asamblenë Komunale si zë i ndryshimit, transparencës dhe bashkëpunimit qytetar.

Kandidati për kryetar të Prishtinës, nga radhët e Lëvizjes Vetëvendosje, Hajrulla Çeku e ka vendosur zhvillimin ekonomik si një nga shtyllat kryesore të platformës së tij.

Çeku tha se bizneset janë motor i rëndësishëm i rritjes dhe mirëqenies në kryeqytet duke shtuar se platforma e tij ofron zgjidhje të bazuara në realitet.

Në Gjilan, kryetari aktual Alban Hyseni, që kërkon mandatin e dytë, është zotuar për vazhdimin e mbështetjes për ndërmarrësinë, veçanërisht për të rinjtë dhe gratë, si dhe për ndërtimin e një Qendre për të Moshuarit me standarde moderne.

Kryetari aktual i Kamenicës, Kadri Rahimaj, ka prezantuar projektin e parkut në Kopërnicë me investim prej 288 mijë eurosh, si pjesë e vizionit për përmirësim të jetës në çdo lokalitet të komunës.

Në Mitrovicë, kandidati Faton Peci ka premtuar rigjallërimin e zonave të Vinarcit e Luginës së Ibrit me zhvillimin e infrastrukturës, ujësjellësit dhe mirëmbajtjes së liqenit.

Në Lipjan, kandidati Ilir Qeriqi ka denoncuar ndërtime të egra që rrezikojnë jetën e qytetarëve dhe është zotuar për një qasje të re në planifikimin urban dhe sigurinë publike.

Kryetari i Podujevës, Shpejtim Bulliqi, është zotuar për vazhdimin e mbështetjes për fermerët, përmes dhënies së pajisjeve moderne dhe përkrahjes në prodhim bujqësor.

Në Suharekë, kandidati Hamdi Bytyçi ka bërë një zotim se 100% e pagës së tij, gjatë mandatit, do të dedikohet për bursa për studentët.

Në Ferizaj, kandidati Enver Haliti ka premtuar ndërtimin e ngrohtores qendrore afër Kazermës së Ferizajit, me impiantin e kombinuar solar të fuqisë 50 MW.

Në Vushtrri, Sylejman Meholli ka shpalosur një plan për ringjalljen e sektorit të bujqësisë duke përfshirë subvencione për qumështin, kultivimin e patates, shpezëtarinë dhe ndërtimin e një tregu të gjelbër funksional.

Në Malishevë, Valon Hoti është zotuar për mbështetje të madhe për bujqësinë, përmes subvencioneve, mekanizimit modern dhe politikave që favorizojnë prodhuesin vendor.

Kandidati i PDK-së për kryetar të Prishtinës, Uran Ismajli, premton një qytet funksional me theks në infrastrukturë, ndriçim publik, legalizim të pronave dhe transport të përmirësuar, veçanërisht në lagjen Kolovica.

Në Gjilan, kandidati Riad Rashiti ka vendosur shëndetësinë primare në qendër të programit të tij, duke premtuar investime prej 4.7 milionë eurosh.

Rrahim Tërnava në Fushë Kosovë ka premtuar transformimin urban përmes ndërtimit të sheshit përgjatë rrugës “Nëna Terezë”, përmirësime në infrastrukturë, ujësjellës dhe kanalizim, si dhe digjitalizim të shërbimeve komunale.

Përparim Ramusa në Shtime ka vendosur zhvillimin ekonomik si prioritet, duke premtuar mbështetje për bizneset lokale dhe krijim të vendeve të reja të punës.

Ferit Idrizi në Vushtrri premton vazhdimin e investimeve edukative në bashkëpunim me sektorin privat për aftësimin profesional të nxënësve.

Arian Tahiri në Mitrovicë është fokusuar në përkujdesjen për të moshuarit, duke premtuar ndërtimin e një shtëpie të dinjitetshme për ta dhe aktivitete sociale për këtë kategori.

Në Pejë, Arta Vokshi – Nallbani ka vënë theksin në ekonominë lokale, duke dëgjuar bizneset dhe qytetarët me qëllim ndërtimin e një Peje më të drejtë dhe më të fortë.

Shaqir Totaj në Prizren, që synon mandatin e dytë, ka përqendruar fushatën në shëndetësi, me investime të reja në QKMF.

Totaj bashkë me kryetarin e PDK-së, Memli Krasniqi, ka zhvilluar takim edhe me studentët e Prizrenit ku është zotuar për bashkëpunim të ngushtë me të rinjtë dhe i ka inkurajuar ata të angazhohen aktivisht në ndërtimin e së ardhmes së qytetit.

Por si kandidate për kryetaren e Prizrenit, Albulena Balaj Halimaj nga Nisma Socilademokrate ka premtuar subvencionim nga komuna për çdo grua që merr rekomandim nga gjinekologu për të bërë këtë test.

Kandidatja e Nismës gjatë së mërkurës ishte në vizitë edhe në Shoqatën e e Bjeshkatarëve “Sharri”.

E mbështes fuqishëm çdo iniciativë që nxit zhvillimin e qëndrueshëm dhe i inkurajoj bjeshkatarët të vazhdojnë me pasion në misionin e tyre për ta bërë Prizrenin një destinacion të veçantë për turistët vendas e të huaj deklaroi Albulena Balaj Halimaj.

Balaj Halimaj vazhdoi aktivitet zgjedhore gjatë ditës.

Ajo priti në takim ekipin e Misionit të Vëzhgimit të Zgjedhjeve të Bashkimit Evropian. Gjatë takimit u ndanë përvojat nga fushata zgjedhore, sfidat dhe rëndësinë e një procesi transparent e gjithëpërfshirës. Aty u theksua po ashtu edhe roli i grave në garën për udhëheqje komunale.

Kryetari aktual i Malishevës, Ekrem Kastrati, kandidat edhe për një mandat në krye të komunës ka zhvilluar takime me banorët e Mleqanit dhe Tërpezës.

Kastrati më pas vazhdoi edhe në fshatin Temeqin dhe Bardh. Sipas kryetarit aktual këto fshatra janë të vendosur për fitoren e madhe të Nismës në Malishevë.

Kurse kandidatja tjetër grua e Nismës për Vushtrrinë Xhevahire Izmaku vazhdoi takimet me gratë e qytetit.

Kandidati për kryetar të Prishtinës nga radhët e Lidhjes Demokratike të Kosovës Përparim Rama, i cili kandidon edhe për një mandat të dytë promovoi projektet e realizuara, si transformimi i hapësirave publike në Postën e Kosovës, dhe theksoi se në Qendrat e Mjekësisë Familjare po ofrohen kontrolle mamografie falas.

Në Deçan, kandidati Jeton Mushkolaj premton bashkëpunim të ngushtë me sektorin privat, duke e konsideruar partner strategjik për zhvillim të qëndrueshëm.

Arbër Ismajli kandidat për kryetar të Gjilani, ka prezantuar tri projekte për lagjen Pogragjë ndër to edhe shndërrimin e Kalasë së Pogragjës në destinacion turistik.

Ndërsa në Fushë Kosovë, kandidati Besnik Osmani është zotuar për mbështetje të vazhdueshme për bizneset artizanale dhe fuqizimin ekonomik të grave.

Mbështetje për bizneset e vogla e familjare premtoi Gëzim Plakolli nëse arrit të bëhet I pari I komunës së Mitrovicës.

Në Rahovec, kandidati Burim Krasniqi ka prezantuar projektin SOS Butoni, aplikacion synon t’u vijë në ndihmë qytetarëve në raste urgjente shëndetësore. Krasniqi ka theksuar se ky projekt do të realizohet brenda vitit të parë të mandatit.

Driton Selmanaj, kandidati për Prizren, ka prezantuar konceptin e “One-stop-shop” për bizneset e qytetit, një platformë që synon të lehtësojë ofrimin e shërbimeve financiare e tatimore.

Sokol Haliti, aktualisht në krye të komunës së Vitisë, kërkon votën për një mandat tjetër, duke prezantuar rezultatet e arritura në vendbanime si Radivojci dhe duke u zotuar për vazhdimin e projekteve zhvillimore në të gjitha fushat jetike.

Ditën e 19-të të fushatës, kandidati për kryetar të Ferizajt, Visar Azemi, ka kritikuar pushtetin aktual për mungesë të realizimit të projekteve të premtuara.

Kandidati për kryetar të Prishtinës, Bekë Berisha nga radhët e Aleancës për Ardhmërinë e Kosovës, zhvilloi takim me Shoqatën e të Verbërve, ku premtoi angazhim konkret për renovimin e objektit, rritjen e të hyrave, sigurimin e syzeve të mençura, si dhe zbatim të Ligjit për të Verbërit.

Mbështetje të përhershme për Ansamblin dhe Korin e Qytetit të Gjilanit premtoi kandidati, Nazmi Gagica, I cili e ka vendosur kulturën në epiqendër të programit të tij.

Kryetari aktual dhe kandidati për një mandat të ri në Rahovec, Smajl Latifi, theksoi rezultatet konkrete në sektorin e bujqësisë. Ai premton vazhdimësi të investimeve në bujqësi dhe zhvillim rural.

Në Pejë, kandidati Ali Berisha u zotua për kapacitete të reja grumbulluese të ujit, eliminimin e gropave septike, dhe investime në impiante për ujërat e zeza në çdo lokalitet.

Besnik Krasniqi, kandidat në Prizren, premtoi mbështetje për prodhuesit vendor. Ai tha se brenda 6 muajve të parë të qeverisjes, zona industriale do të funksionalizohet, duke krijuar kushte për investime, punësim dhe zhvillim ekonomik.

Në Viti, kandidati Labinot Bislimi paraqiti projektin për rehabilitimin e prroit në fshatin Gërmovë, që do të shndërrohet nga një kanal ndotës në një aset natyror me ujëra të pastra dhe të kontrolluara përmes digave të vogla.

Në Vushtrri, kandidati Mensut Ademi premtoi se bizneset vendore do të jenë prioritet i qeverisjes së tij.

Kandidati i Alternativës për kryetar të Pejës, Reshat Nurboja ka premtuar se me qeverisjen e tij, do tju garantoj qytetarëve se nuk do të pyesim me cilën parti apo me kënd je. Por çfarë problemi ke?

Zgjidhje për kolonat në trafik në kryeqytet, ka premtuar kandidati për Prishtinën nga radhët e subjektit politik, “Alterantiva” , Mërkur Beqiri.

Për të zgjidhur këtë problem Beqiri tregoi prioritetet e tij.

Transport publik i shpejt e i sigurt, rrugë me hapësira për këmbësorë e biçikleta, planifikim urban që respekton qytetarët, jo tenderët.

Me votën tuaj, kjo katrahurë nuk do të jetë më e ardhmja jonë.Do të kthejmë kaosin në rend, abuzimin në përgjegjësi,dhe Prishtinën në një qytet të jetueshëm shtoi Beqiri.

Mbrojtja e ambientit është prioritet tjetër i Mërkur Beqirit nga Alternativa.