Author: K.B.

Pak para se Kuvendi Komunal i Prishtinës të mbajë seancën e jashtëzakonshme për të hyrat vetanake dhe buxhetin, transportuesit publik kanë nisur protestën para objektit të Komunës.

Një pjesë e shiritit të rrugës është e bllokuar nga autobusët.

Trafiku Urban dhe operatorët privatë të transportit kanë pezulluar punën si pasojë e mos pagesës. Situata ka shkaktuar kolona të gjata dhe vështirësi për qytetarët në qarkullimin urban.

Asamblistët e Vetëvendosjes kanë thënë do të marrin pjesë në seancën e jashtëzakonshme të Kuvendit Komunal të Prishtinës, dhe do të votojnë pro bartjes së të hyrave vetanake të kryeqytetit.

Një kontroll rutinë në pikëkalimin kufitar në Vermicë ka zbuluar një tentim të shmangies së detyrimeve doganore, ku janë gjetur të padeklaruara 4 iPhone 17 Pro Max dhe pjesë të tjera për telefona, me vlerë mbi 5 mijë euro.

Mallrat janë konfiskuar dhe ndaj personit të përfshirë janë iniciuar procedurat për kundërvajtje doganore.

Dogana e Kosovës njofton se do të vazhdojë forcimin e kontrolleve për të garantuar konkurrencë të drejtë dhe mbrojtje të tregut.

Njoftimi:

Vermice 27 nentor 2025

Gjatë një kontrollit rutinë në pikëkalim kufitar është zbuluar dhe parandaluar një rast i tentim-shmangies së detyrimeve doganore.

Gjatë inspektimit të detajuar, njësitë doganore kanë gjetur 4 telefona të rinj IPHONE 17 PRO MAX, si dhe pjesë të ndryshme për telefona mobil, të cilat ishin të padeklaruara nga pala përgjegjëse.

Vlera totale e mallit të sekuestruar është mbi 5000 mije euro.

Mallrat e padeklaruara janë konfiskuar, ndërsa ndaj personit të përfshirë janë iniciuar procedurat për kundërvajtje doganore, në përputhje me dispozitat ligjore në fuqi.

Dogana e Kosovës mbetet e përkushtuar në forcimin e kontrolleve, mbrojtjen e tregut dhe garantimin e konkurrencës së drejtë, duke parandaluar çdo tentim të shmangies së detyrimeve doganore.

Pasi KQZ-ja publikoi numrin e votuesve në komunat për zgjedhjet e ardhshme të parakohshme parlamentare, anëtari i kryesisë së Listës Serbe, Igor Simiq ka pretenduar se “ka parregullsi” që, siç thotë ai, “janë inxhinieri e qartë politike”, dhe se në komunën e Graçanicës, sipas të dhënave të KQZ-së, numri i votuesve është zvogëluar për 740.

Simiq ka thënë “se vazhdon inxhinieria zgjedhore e regjimit të kryeministrit të Kosovës në detyrë, Albin Kurtit”.

“Tani pas përfundimit të zgjedhjeve lokale dhe shpalljes së zgjedhjeve të parakohshme parlamentare, për vetëm dy muaj, komuna e Graçanicës ka humbur 740 votues serbë sipas të dhënave të Komisionit Qendror të Zgjedhjeve. Dhe sipas këtij numri është e para nga të gjitha komunat e tjera në Kosovë”, ka shkruar Simiqi në një postim në Facebook.

Simiqi gjithashtu ka pretenduar se komuna e Graçanicës, krahasuar me zgjedhjet parlamentare të mbajtura në shkurt, në zgjedhjet lokale vetëm gjashtë muaj më vonë, ka fituar 2.444 votues.

“Nëntëdhjetë për qind e tyre ishin votues shqiptarë që duhej ta mbështesnin listën unike shqiptare në zgjedhjet lokale. Biologjikisht, juridikisht dhe logjikisht është i pashpjegueshëm numri i madh i njerëzve që kanë fituar të drejtën e votës, pothuajse 11 për qind e numrit të përgjithshëm të votuesve në atë komunë për vetëm gjashtë muaj”, ka thënë ai.

Ai ka shtuar se Lista Serbe për të gjitha këto ka treguar publikisht, i është drejtuar përfaqësuesve ndërkombëtarë, por gjithçka ka mbetur njësoj, si dhe se as vëzhguesit e procesit zgjedhor nuk janë interesuar për këtë “fenomen”.

Ministri në detyrë i Financave, Hekuran Murati, në një konferencë për media, përveç për pagat e RTK-s, është arsyetuar edhe për situatën me Trafikun Urban në Komunën e Prishtinës.

Ai e akuzoi LDK-në se ka bërë fushatë në kurriz të qytetarëve, ndërsa shtoi se VV në kuvendin komunal, sot do të japë votë mbështetëse.

“Kemi pasur të bëjmë më një fushatë të LDK-së, të udhëhequr në kurriz të qytetarëve të Komunës së Prishtinës. Kur ishte seanca, nuk e bëri. Atë që nuk e bëri Lumir Abdixhiku dhe LDK në Kuvendin e Kosovës, për buxhetin e Prishtinës, sot po e bën LVV në Kuvendin Komunal, duke ofruar mbështetjen, përkundër shpifjeve, ofendimeve dhe fyerjeve që po i shohim çdo ditë”, tha Murati.

Por kur u pyet nga gazetarja e Klan Kosovës, Qëndresa Tërshani, a do të takohet me Ramën, Murati refuzoi të përgjigjet.

Ai ia ‘lëshoi’ radhën kolegut të tij, Ejup Maqedonci për t’u përgjigjur në pyetjet e gazetarëve.

Ministri në detyrë i Financave, Hekuran Murati, në konferencën për media pas mbledhjes së Qeverisë, ka uruar Ditën e Forcës dhe ka folur për mbështetjen buxhetore të ushtrisë dhe të RTK-së.

“Mund ta them me krenari, se si qeveri nuk kemi kursyer asnjëherë kur ka ardhur puna për ndarjen e buxhetit dhe për mbështetjen e ushtrisë tonë, e që po besoj që me hapa shumë të shpejtë po merr formën e një ushtrie moderne, ndoshta më moderne në rajon,” u shpreh Murati, duke vlerësuar avancimin e FSK-së.

Ai gjithashtu komentoi ndarjen e mjeteve për punëtorët e RTK-së, duke e cilësuar këtë si një improvizim të detyruar për shkak të mosformimit të Komisionit të Buxhetit nga partitë opozitare.

Ministri në detyrë i Financave, Hekuran Murati, ka deklaruar se ndarja e buxhetit për Radio Televizionin e Kosovës (RTK) ka qenë e pamundur deri më tani për shkak të mungesës së komisioneve parlamentare që duhej të miratonin alokimin.

“Sa i përket ndarjes së mjeteve, ishte pritur që këtë ta kryente Kuvendi. Por PDK, LDK, AAK dhe Nisma kanë refuzuar kategorikisht, dhe nuk ka pasur asnjë pengesë ligjore që të themelohej Komisioni për Buxhet dhe Financa, i cili është përgjegjës për miratimin e alokimit të buxhetit për RTK-në. Për shkak të këtij dështimi, si qeveri na është dashur të sigurojmë mjetet nga burime të tjera buxhetore për të garantuar funksionimin e RTK-së, në vend që të përdorej buxheti i paraparë me ligj,” ka thënë Murati.

Ai ka theksuar se ky veprim ka qenë një masë emergjente, duke u bazuar në situatën aktuale ku Kuvendi nuk ka kryer detyrën e tij ligjore për të miratuar ndarjen buxhetore.

Deputetja e LDK-së, Hykmete Bajrami ka reaguar pasi qeveria në detyrë ndau mjete për pagat e punëtorëve të RTK-së.

Sipas tij, vetë qeveria në detyrë po ka prodhuar këtë krizë, duke i mbajtur qytetarët të varur nga vendimet e pastaj për të dalë si shpëtimtar.

“Qytetarët paguajnë taksa për me marrë shërbime, jo për me u maltretu nga inskenimet e mashtrimet tuaja”, ka shkruar mes tjerash Bajrami.

Reagimi:

I paskan nda mjetet për RTK.

E kemi thënë prej ditës së parë: këta vetë janë prodhues të krizave. I lanë një muaj pa paga punëtorët e RTK-së, me protesta e greva dhe në fund jo Kuvendi po këta uzurpatorët e Qeverisë paskan gjetë zgjidhje, me 28 ditë vonesë.

Albin Kurti me klikën e tij jeton duke shkaktuar kriza, duke i bë njerëzit me vuajtë, duke i mbajtur qytetarët të varur nga vendimet e tij, e pastaj me dalë si shpëtimtar, por ranë maskat.

Ndalni bllokadat, tash uluni me Komunën e Prishtinës dhe gjeni zgjdhje!

Qytetarët paguajnë taksa për me marrë shërbime, jo për me u maltretu nga inskenimet e mashtrimet tuaja.

28 dhjetori do të jetë dita kur do të merrni përgjgijen për krejt këtë keqtrajtimin që po u bëni qytetarëve!

Ish-kryetari i PDK-së, Memli Krasniqi ka uruar “Ditën e Forcës” duke thënë se FSK-ja është besimi se Kosova qëndron e fortë dhe e përgatitur.

Përmes një postimi në Facebook, ai thotë se çdo ushtare e ushtar, është shembulli më i pastër i përkushtimit ndaj atdheut.

“Sot është dita kur urojmë me krenari Forcën që mbron shtëpinë tonë të përbashkët. FSK-ja është besimi ynë se Kosova jonë qëndron e fortë dhe e përgatitur. Çdo ushtare e çdo ushtar është shembulli më i pastër i përkushtimit ndaj atdheut. Me ju, ecim më të sigurt drejt së ardhmes. Urime Dita e Forcës, ushtarë”, ka shkruar Krasniqi.

Kryetari i LDK-së, Lumir Abdixhiku, ka njoftuar aderimin e radhës në partinë e tij para zgjedhjeve të 28 dhjetorit.

Ish-zëvendësministri dhe ish-ambasadori i Kroacisë, Gëzim Kasapolli, i është bashkuar partisë së tij.

“Gëzim Kasapolli i bashkohet sot Lidhjes Demokratike të Kosovës me përvojë të jashtëzakonshme, dije të thellë dhe një angazhim të sinqertë për shtetin. LDK fiton një kuadër të ri që beson në vlerat tona, në vizionin evropian të vendit dhe në forcimin e institucioneve”, shkroi Abdixhiku.

Mirë se vjen, Gëzim!

Gëzim Kasapolli, një prej emrave më të njohur të diplomacisë, integrimit evropian dhe analizës politike në vend, nga sot i bashkohet Lidhjes Demokratike të Kosovës.

Me më shumë se dy dekada përvojë të qëndrueshme në institucione vendore e ndërkombëtare, Gëzimi ka ndërtuar një profil unik profesional, nga shërbimi diplomatik, tek proceset kyçe shtetformuese dhe zhvillimi i politikave evropiane.

Si Ambasador i Republikës së Kosovës në Kroaci, ai ka përfaqësuar vendin me dinjitet, duke forcuar marrëdhëniet bilaterale dhe duke promovuar interesat strategjike të Kosovës në një prej kryeqyteteve më të rëndësishme të BE-së.

Përpara kësaj, Gëzimi ka mbajtur pozitat më të larta në procesin e integrimit evropian: si Zëvendësministër dhe më pas si Ministër në detyrë i Integrimit Evropian. Ai ishte njeriu kyç në nisjen dhe negociimin e Marrëveshjes së Stabilizim-Asociimit (MSA), akti juridik më i rëndësishëm kontraktual mes Kosovës dhe Bashkimit Evropian.

Në rolin e Këshilltarit Politik në Kuvendin e Kosovës dhe më herët në Qeveri, Gëzimi ka qenë lidhja institucionale me vendet anëtare të BE-së, Parlamentin Evropian, si dhe me diplomacinë ndërkombëtare gjatë fazave kyçe të shtetndërtimit, përfshirë komunikimin me të dërguarin special të OKB-së, Kai Eide, në prag të negociatave për pavarësinë e Kosovës.

Gëzim Kasapolli i bashkohet sot Lidhjes Demokratike të Kosovës me përvojë të jashtëzakonshme, dije të thellë dhe një angazhim të sinqertë për shtetin. LDK fiton një kuadër të ri që beson në vlerat tona, në vizionin evropian të vendit dhe në forcimin e institucioneve.

Ardhja e tij, dhe e të tjerëve pas tij, është sinjal i qartë se bashkimi rreth vlerave, seriozitetit dhe profesionalizmit është rruga përpara për të gjithë ata që nuk janë të kënaqur me gjendjen aktuale politike dhe që kërkojnë ndryshim të vërtetë.

Dyert tona janë të hapura.

Mirë se vjen, Gezim Kasapolli!

Paç shëndet, forcë dhe përkushtim në këtë etapë të re të angazhimit tënd për Republikën.