Ministria e Industrisë, Ndërmarrësisë, Tregtisë dhe Inovacionit, ka publikuar çmimet tavan për derivate për sot.
MINT njofton nafta do jetë me çmim 1.43 euro për litër.
Benzina 1.36 euro për litër.
Gazi 0.61 cent për litër.
Nga MINT shtohet se këto çmime hyjnë në fuqi nga ora 10:00.
Policia e Kosovës, ka njoftuar se vetëm gjatë ditës së djeshme në Prishtinë, janë shqiptuar 57 gjoba ndaj drejtuesve të motoçikletave për kundërvajtje të ndryshme në trafik, përfshirë edhe gjoba për prishje të rendit dhe qetësisë publike.
Po ashtu shtohet edhe se, policia ka sekuestruar 10 motoçikleta.
Komunikata:
Prishtinë, 08 korrik 2026 – Në kuadër të planit operativ “Kontrolli i Motoçikletave”, njësitet policore të Drejtorisë së Kryeqytetit po vazhdojnë zbatimin e aktiviteteve të shtuara me qëllim të rritjes së sigurisë në trafik dhe garantimit të rendit e qetësisë publike.
Vetëm gjatë ditës së djeshme, zyrtarët policorë kanë shqiptuar 57 gjoba ndaj drejtuesve të motoçikletave për kundërvajtje të ndryshme në trafik, përfshirë edhe gjoba për prishje të rendit dhe qetësisë publike. Po ashtu, gjatë së njëjtës periudhë janë sekuestruar 10 motoçikleta.
Policia e Kryeqytetit do të vazhdojë zbatimin e këtij plani operativ edhe në ditët në vijim, me fokus parandalimin e kundërvajtjeve, rritjen e sigurisë rrugore dhe garantimin e rendit e qetësisë publike. Ajo u bën thirrje të gjithë drejtuesve të motoçikletave që të respektojnë rregullat e trafikut dhe legjislacionin në fuqi.
Disa mijëra pjesëmarrës u nisën në këmbë nga Nezuku, pranë Tuzllës, për “Marshin e Paqes” prej rreth 100 kilometrash drejt Srebrenicës, për të bërë homazhe për viktimat e gjenocidit të kryer në vitin 1995 në zonën e mbrojtur të Organizata e Kombeve të Bashkuara.
Ata do të ecin për tri ditë përgjatë të njëjtave shtigje nëpër të cilat banorët e Srebrenicës, në korrik të vitit 1995, u përpoqën të shkonin drejt territorit të lirë në Tuzllë ose Klladanj.
Është planifikuar që ata të mbërrijnë në Potoçari në mbrëmjen e 10 korrikut, ndërsa më 11 korrik të marrin pjesë në shënimin e përvjetorit dhe në ceremoninë e varrimit kolektiv në varrezat e Qendrës Memoriale të Srebrenicës në Potoçari.
“Marshi i Paqes” organizohet që nga viti 2005 dhe numri i pjesëmarrësve rritet çdo vit.
Qëllimi i kësaj ngjarjeje është ndërtimi, forcimi dhe ruajtja e kulturës së kujtesës për gjenocidin e kryer ndaj boshnjakëve në Srebrenicë.
Këtë vit, në Qendrën Memoriale të Srebrenicës në Potoçari do të varrosen 10 viktima të gjenocidit të Srebrenicës.
Viktima më e re është Senad Jusiq, i lindur në vitin 1975. Ai u zhduk në korrik të vitit 1995 në zonën e Bratuncit, ndërsa mbetjet e tij mortore u zhvarrosën në vitin 2022.
Viktima më e moshuar është Ramo Dautoviq, i lindur në vitin 1939, i cili u zhduk në zonën e Zvornikut.
Deri më tani, në Qendrën Memoriale të Srebrenicës në Potoçari janë varrosur 6.772 viktima të gjenocidit të Srebrenicës, ndërsa rreth 250 të vrarë janë varrosur në vende të tjera, sipas kërkesës së familjeve të tyre. Mbi 1.000 persona nga Srebrenica dhe komunat përreth vazhdojnë të figurojnë të zhdukur.
Në Srebrenicë dhe zonat përreth, në korrik të vitit 1995, forcat e Ushtrisë së Republikës Sërpska vranë më shumë se 8.300 boshnjakë.
Gjykata Ndërkombëtare e Drejtësisë në vitin 2007 nxori një aktgjykim, në të cilin konstatoi se në korrik të vitit 1995, në Srebrenicë, e cila atëherë ishte zonë e mbrojtur e OKB-së, Ushtria e Republikës Sërpska kreu gjenocid.
E njëjta gjykatë e shpalli Serbinë përgjegjëse për mosparandalimin e gjenocidit dhe konstatoi se ajo kishte shkelur detyrimin për të ndëshkuar autorët e gjenocidit.
Para gjykatave të ndryshme, deri më tani më shumë se 50 persona janë dënuar me rreth 700 vjet burgim për gjenocid dhe krime lufte në Srebrenicë.
Me burgim të përjetshëm janë dënuar, ndër të tjerë, ish-presidenti i Republikës Sërpska, Radovan Karaxhiq, dhe komandanti i ushtrisë së këtij entiteti, Ratko Mlladiq. /REL
Policia e Kosovës, përmes një komunikate për media ka bërë të ditur se gjatë gjashtëmujorit të parë të këtij viti, në Pejë, janë shqiptuar 35,265 gjoba për shkelje në komunikacion.
Policia shton edhe se, janë shqiptuar 1,632 gjoba me masa mbrojtëse të ndalimit të drejtimit të automjetit, në kohëzgjatje prej tre muajsh deri në një vit, dhe se, janë shqiptuar 3,047 gjoba me pikë negative, në përputhje me dispozitat ligjore në fuqi.
Komunikata:
Gjatë gjashtëmujorit të parë të vitit 2026 ne DRP Pejë janë shqiptuar 35,265 gjoba për shkelje në komunikacion
Pejë, 7 Korrik 2026
Drejtoria Rajonale e Policisë në Pejë, përmes stacioneve policore dhe Njësitit Rajonal të Komunikacionit Rrugor, në kuadër të zbatimit të aktiviteteve operative dhe masave për rritjen e sigurisë në trafikun rrugor, gjatë periudhës 01.01.2026 – 30.06.2026, duke zbatuar legjislacionin në fuqi në fushën e komunikacionit rrugor, ka ndërmarrë masa ndaj shkelësve të rregullave të trafikut si në vijim:
– Janë shqiptuar 35,265 gjoba për kundërvajtje në komunikacion.
– Janë shqiptuar 1,632 gjoba me masa mbrojtëse të ndalimit të drejtimit të automjetit, në kohëzgjatje prej tre (3) muajsh deri në një (1) vit.
– Janë shqiptuar 3,047 gjoba me pikë negative, në përputhje me dispozitat ligjore në fuqi.
Këto rezultate pasqyrojnë angazhimin e vazhdueshëm të Policisë për zbatimin e ligjit, parandalimin e aksidenteve dhe rritjen e sigurisë për të gjithë pjesëmarrësit në komunikacion.
Meqenëse ndodhemi në sezonin veror, kur shënohet rritje e ndjeshme e qarkullimit të automjeteve dhe e numrit të pjesëmarrësve në trafik, Policia u bën thirrje të gjithë drejtuesve të automjeteve, motoçiklistëve, çiklistëve dhe këmbësorëve që të respektojnë rregullat e komunikacionit, të përshtatin shpejtësinë me kushtet e rrugës, të shmangin drejtimin e automjetit nën ndikimin e alkoolit apo substancave të tjera dhe të tregojnë kujdes të shtuar gjatë lëvizjes.
Siguria në komunikacion është përgjegjësi e përbashkët. Prandaj, ftojmë të gjithë qytetarët të bashkëpunojnë me Policinë, të respektojnë ligjin dhe të raportojnë çdo shkelje apo sjellje që rrezikon sigurinë në rrugë.
Liderja e së djathtës ekstreme franceze, Marine Le Pen, ka thënë se do të kandidojë për presidenciale në vitin 2027 dhe do të apelojë në gjykatën më të lartë të vendit kundër një dënimi për përvetësim që kërkon që ajo të mbajë një etiketë elektronike për një vit, ka raportuar BBC, transmeton Gazeta Express.
“Nuk mund të bëj fushatë me një etiketë,” i tha ajo televizionit francez. “Dua të ndjek të gjitha rrugët ligjore për të mbrojtur pafajësinë time në këtë rast.”
Orë më parë, një gjykatë apeli në Paris e shpalli fajtore për keqpërdorim të 2.8 milionë eurove (2.4 milionë paund) nga fondet e BE-së në një skemë të rreme punësimi, por vendosi që ajo mund të kandidojë për presidencën ndërsa mbante një etiketë.
Ajo tani do ta çojë çështjen në gjykatën më të lartë civile të Francës, Gjykatën e Kasacionit.
Vendimi i jep fund muajve të spekulimeve se Le Pen do t’ia dorëzonte kandidaturën presidentit 30-vjeçar të partisë së saj, Tubimi Kombëtar, Jordan Bardella.
E pyetur nëse kishte një skenar në të cilin ajo mund të mos kandidonte, ajo tha: “Jo, nuk ka. Jam këtu sonte për t’ju thënë se jam kandidate për zgjedhjet e vitit 2027.”
Lionel Messi përjetoi një tjetër moment zhgënjyes nga pika e bardhë gjatë përballjes së Argjentinës ndaj Egjiptit, duke vendosur një rekord të padëshiruar në historinë e Kupës së Botës.
Kapiteni argjentinas nuk arriti ta shndërrojë në gol penalltinë e fituar nga skuadra e tij, pasi portieri egjiptian Mostafa Shobeir lexoi saktë drejtimin e goditjes dhe e priti topin me një pritje të shkëlqyer.
Penalltia u akordua pasi Haissem Hassan ndërhyri në mënyrë të parregullt ndaj Nicolas Tagliafico brenda zonës, duke i dhënë Argjentinës mundësinë ideale për të barazuar rezultatin në minutat e para të takimit.
Megjithatë, Messi nuk arriti ta shfrytëzonte rastin. Me këtë penallti të humbur, ai ka dështuar të realizojë katër nga tetë penalltitë që ka ekzekutuar në historinë e Botërorit, duke regjistruar një përqindje realizimi prej vetëm 50 për qind.
Ky është një rekord negativ për një futbollist të kalibrit të tij, pasi asnjë lojtar tjetër me kaq shumë tentativa nga pika e bardhë në Kupën e Botës nuk ka humbur kaq shumë penallti.
Pavarësisht këtij momenti të vështirë, kjo nuk e zbeh aspak ndikimin e Messit në historinë e kompeticionit.
Tetë herë fituesi i Topi i Artë vazhdon të jetë golashënuesi më i mirë në historinë e Botërorit dhe një nga lojtarët më vendimtarë të turneut.
Presidenti i Shteteve të Bashkuara të Amerikës, Donald Trump e quajti të martën kryeministren italiane, Giorgia Meloni, një “person të mirë”, por e kritikoi sërish për faktin se nuk ndihmoi në konfliktin me Iranin.
Meloni dikur shihej si një aleate e ngushtë e Trump, por marrëdhënia e tyre u prish muajin e kaluar kur ai i tha kanalit televiziv italian La7 se ajo i ishte “lutur” të bënte një foto me të në një samit të G7 në Francë.
Meloni e mohoi këtë pretendim duke theksuar se Italia dhe ajo nuk do të luteshin kurrë.
Nga Turqia, ku po merr pjesë në samitin e NATO-s në Ankara, Trump tha se marrëdhënia e tij me Melonin “u përkeqësua sepse ajo refuzoi të ndihmonte” me Iranin.
“Ajo refuzoi të përfshihej, kështu që kjo e prishi pak marrëdhënien time me të. Por më pëlqen. Mendoj se është një person i mirë, në fakt. Por mendoj se bëri një gabim”, u tha Trump gazetarëve në Turqi. /Panorama
Donald Trump ka thënë përsëri se do të donte të merrte kontrollin e Grenlandës dhe paralajmëroi se “mund” të tërhiqte të gjitha trupat amerikane nga Evropa, ndërsa ndodhet në Turqi për një Samit me udhëheqësit e NATO-s.
Presidenti amerikan kritikoi gjithashtu politikat e aleatëve evropianë mbi energjinë dhe imigracionin.
Ai i bëri komentet ndërsa fliste me gazetarët, bashkë me presidentin turk, Recep Tayyip Erdogan, në Ankara, shkruan skynews.
Trump u pyet në lidhje me Grenlandën.
Ai tha se një mosmarrëveshje mbi pronësinë e territorit – i cili është pjesë e Mbretërisë së Danimarkës, një anëtare tjetër e NATO-s – kishte “dëmtuar marrëdhënien e tij me NATO-n”.
“Danimarka nuk shpenzon para për të ndihmuar vërtet Grenlandën, por është një pjesë e rëndësishme për Shtetet e Bashkuara dhe është e rrethuar nga anije kineze dhe anije ruse”, deklaroi Trump.
“Ishte Grenlanda ajo që, sipas mendimit tim – dhe vazhdon të jetë – që duhet të kontrollohet nga Shtetet e Bashkuara, jo nga Danimarka. Dhe kur ata nuk do të pajtoheshin me këtë, dhe me të gjitha paratë që shpenzojmë për t’i ndihmuar ata me Rusinë, nuk kemi nevojë të shpenzojmë asnjë para, ne mund t’i largojmë të gjithë ushtarët tanë nga Evropa, sepse, siç ndoshta e keni vënë re, Evropa është një vend shumë i ndryshëm nga sa ishte 20 vjet më parë, shumë i ndryshëm, shumë i ndryshëm, shumë i ndryshëm, dhe ata më mirë të jenë të kujdesshëm me imigracionin dhe energjinë. Nëse ata nuk janë të kujdesshëm me këto dy gjëra, nuk do të keni më një Evropë”, shtoi ai.
Policisë së Shtetit në Shqipëri i janë shtuar dhjetëra motoçikleta të reja, të financuara nga pasuritë e konfiskuara nga krimi.
Ministri i Brendshëm, Besfort Lamallari, si dhe Kreu i Policisë së Shtetit, Skënder Hita, dhanë më shumë informacione lidhur me këto motoçikleta, duke theksuar që nuk janë nga paratë e taksapaguesve.
Lamallari theksoi ky lloj financimi për motorët, është një mënyrë për ta kthyer pasurinë e krimit në investim për sigurinë e qytetarëve.
“Flota e mjeteve të Policisë së Shtetit, sot pasurohet me 23 motorë të rinj, të destinuar për Policinë Rrugore dhe forcat Shqiponja. Por, përtej numrit, këto mjete në fakt mbartin një kuptim të veçantë. Drejtësia nuk duhet vetëm të ndëshkojë krimin, por edhe ta kthejë atë kundër vetes së tij. Asnjë lek i taksapaguesve nuk është prekur për këtë investim. Financimi vjen nga konfiskimi i pasurive të sekuestruara të krimit të organizuar, kryesisht. Nga vetë burime që dikur ushqenin pandëshkueshmërinë, sot ushqehet siguria e qytetarëve“, tha ai.
Sipas ministrit, goditja e bazës ekonomike të grupeve kriminale mbetet një nga instrumentet më efektive në luftën kundër krimit.
“Lufta kundër krimit nuk matet vetëm me arrestime apo procedime. Ajo matet me aftësinë e shtetit për të goditur grupet kriminale aty ku dhembin më shumë, në themelet e tyre ekonomike, dhe për ta rikthyer atë në investim publik”, u shpreh Lamallari.
Më tej, Lamallari falenderoi efektivët e Policisë së Shtetit për profesionalizmin dhe vetëpërmbajtjen e treguar gjatë protestave të ditëve të fundit.
“Ju dhe kolegët tuaj keni kaluar një periudhë të ngarkuar dhe sfiduese, jo vetëm në terren, por edhe në sheshin e pamëshirshëm të opinionit publik. Keni përballuar provokime, akuza dhe gjykime të nxituara, aty ku shpesh rrjetet sociale flasin para se të flasin vetë faktet dhe të shpallin dhe gjyqet publike. Mendoni se çfarë do të thotë të përballesh me një urrejtje të pafiltruar, ku ‘heroi’ apo deliranti revolucionar, ju akuzon publikisht për dhunë, një teatro-realitet të inskenuar, me qëllimin e vetëm për t’u bërë viral. Në skena të tilla, të vetmit pa faj mbeten dy palë, punonjësi i policisë, i cili duhet të ruajë me çdo kusht dinjitetin me durim, sepse kështu e kërkon pozicioni i tij, dhe vetë akuzuesi, në disa raste, i cili, në çdo rast që kemi dëshmuar së fundmi, ka më shumë nevojë për kujdes, ekzaminime dhe mundësisht për trajtim sesa për përgjegjësi ligjore. Vazhdoni kështu, pa e humbur kurrë durimin dhe pa rënë kurrë pre e provokimeve. Uniforma që mbani kërkon vetëpërmbajtje përballë atyre që nuk respektojnë as ligjin dhe as institucionet. Policia nuk duhet të përgjigjet me emocion, ajo përgjigjet me ligj. Ky është dallimi mes shtetit dhe kaosit”, tha Lamallari.
Në fjalën e tij, Kryepolici theksoi rëndësinë e mjeteve të reja të Policisë së Shtetit për reagim më të shpejtë në terren, parandalimin e ngjarjeve kriminale dhe rritjen e sigurisë për qytetarët.
“Në një realitet ku ritmi i ngjarjeve dhe fluksi i lartë i qarkullimit rrugor kërkojnë ndërhyrje në sekonda, mjetet e shpejta e të manovrueshme janë një domosdoshmëri operacionale. Ato na japin mundësinë të thyejmë kohën, të jemi më pranë qytetarit në çdo emergjencë, të parandalojmë ngjarjet kriminale në kohë dhe të garantojmë kontroll të plotë mbi territorin. Ky investim dëshmon angazhimin e palëkundur të qeverisë shqiptare dhe të Ministrisë së Punëve të Brendshme për Policinë e Shtetit. Kjo mbështetje po përkthehet përditë në projekte konkrete dhe të prekshme”, u shpreh Hita.
Turqia ka tërhequr vëmendjen në Samitin e NATO-s duke prezantuar dronin e saj më të ri luftarak, “Molla e Kuqe” (Kızılelma).
Mjeti ajror pa pilot është projektuar për të kryer misione sulmuese ajër-ajër dhe ajër-tokë, duke përfaqësuar një nga projektet më të avancuara të industrisë turke të mbrojtjes.
Ekspozimi i tij në samit vlerësohet si një demonstrim i aftësive teknologjike dhe ambicieve të Ankarasë për të forcuar rolin e saj në fushën e mbrojtjes dhe aviacionit ushtarak.