Author: K.B.

Kryetari i Aleancës, Ardian Gjini, ka kërkuar heqjen e Testit të Arritshmërisë, duke vlerësuar se ai ka dështuar ta përmbushë qëllimin për të cilin është krijuar dhe se nuk jep një pasqyrë reale të cilësisë së arsimit në vend.

Përmes profilit zyrtar në Facebook, Gjini tha se Testi i Arritshmërisë është konceptuar si një instrument për të matur performancën e sistemit arsimor, e jo për t’i testuar individualisht nxënësit.

Sipas tij, mënyra se si zhvillohet testi prej vitesh vetëm sa rrit presionin mbi nxënësit dhe prindërit, duke krijuar një situatë të padrejtë mes atyre që i nënshtrohen rregullave dhe atyre që arrijnë rezultate përmes kopjimit.

“Testi është duke dështuar tash e sa vite, sepse është mekanizëm që streson fëmijët dhe prindërit, i streson ata nxënës që dinë e nuk kopjojnë, ndërsa në të njëjtën kohë i faktorizon ata që nuk dinë dhe kopjojnë”, është shprehur Gjini.

Ai ka theksuar se testi nuk prodhon rezultate reale për nivelin e dijes dhe cilësinë e arsimit, por krijon statistika të rreme.

“Ky test është falsifikim i plotë”, ka deklaruar ai.

Gjini ka përmendur edhe rezultatet e këtij viti, duke theksuar se shkalla e arritshmërisë ka rënë në 48.35 për qind, çka sipas tij dëshmon edhe një herë se ky mekanizëm nuk po e përmbush funksionin e vet.

Në përfundim, kryetari i Aleancës ka kërkuar që Testi i Arritshmërisë të hiqet sa më shpejt dhe të zëvendësohet me forma të tjera vlerësimi që matin në mënyrë të besueshme cilësinë e sistemit arsimor.

“Ky test duhet të hiqet krejt, sa më shpejt që të jetë e mundur dhe të mos përsëritet më, sepse nuk prodhon asnjë rezultat pozitiv”, ka përfunduar Gjini.

Kryeministri në detyrë i Kosovës, Albin Kurti, është lajmëruar nga Greqia, ku po merr pjesë në edicionin e 28-të të Simpoziumit SYMI, i cili këtë vit po zhvillohet me temën “Zemërimi i Akilit dhe paralajmërimi i Kasandrës – Fuqizimi i demokracisë dhe zbutja e pushtetit”.

Kurti tha përmes një postimi në Facebook se në këtë ngjarje po marrin pjesë diplomatë, aktivistë progresistë, zyrtarë shtetesh, akademikë, drejtues të organizatave ndërkombëtare dhe studiues të instituteve kërkimore, të cilët po diskutojnë për zhvillimet aktuale gjeopolitike globale.

“Diplomatë të shquar e aktivistë progresistë, zyrtarë shtetesh e akademikë intelektualë, drejtues të organizatave ndërkombëtare e studiues të instituteve kërkimore, diskutojnë së bashku sipas modelit Chatham House Rule për tema të ndryshme të aktualitetit (gjeo)politik global, nga paqja e siguria teksa forcohet mulipolariteti dhe dobësohet multilateralizmi te sulmet e shtuara mbi demokracinë dhe të drejtat e njeriut, nga krizat e shumëfishta e luftërat e reja pa përfunduar të vjetrat te pritjet dhe efektet e inteligjencës artificiale”, shkroi ai.

Kurti tha se vetë mori pjesë në panelin “Demokracitë në vijën e parë të frontit – Ballkani, Ukraina dhe më shumë: Çfarë duhet të mësojnë demokracitë e vjetra të vetëkënaqura nga shoqëritë që ende luftojnë, çdo ditë, për hapësirë demokratike evropiane”.

“Përveç tjerash aty theksova që: – Evropa fillon në shtëpi për secilin shtet dhe përfundon në vijat e frontit të luftës në Ukrainë, dhe se pikërisht zgjerimi i mëtejshëm i Bashkimit Evropian dëshmon që periferia nuk është aty për t’u grabitur. – Në zhvillimet botërore realisht nuk kemi përplasje të jashtme të civilizimeve por sot jetojmë në kohërat e përplasjeve të brendshme të ndërgjegjes me reaksionin. – Autokratët duhen konsideruar si njerëz të lindur në shekullin e gabuar dhe se tendencat paramoderne për monarki merkantiliste nuk mund të triumfojnë mbi republikën demokratike”, shkroi ai.

Kryetari i Partisë Demokratike të Kosovës, Bedri Hamza, ka pritur në takim raportuesin për Kosovën në Parlamentin Evropian, eurodeputetin Riho Terras, me të cilin ka biseduar për zhvillimet politike në vend, procesin e integrimit evropian dhe nevojën për tejkalimin e ngërçit institucional.

Gjatë takimit, Hamza shprehu mirënjohje për angazhimin e vazhdueshëm të Terras dhe për raportin e fundit të Parlamentit Evropian për Kosovën, duke vlerësuar faktin se ai riafirmon perspektivën evropiane të vendit dhe mbështet aplikimin e Kosovës për anëtarësim në Bashkimin Evropian.

Sipas njoftimit, të dy bashkëbiseduesit vlerësuan se raporti i Parlamentit Evropian përbën një sinjal të rëndësishëm mbështetjeje për Kosovën, por njëkohësisht edhe një thirrje që institucionet të tejkalojnë krizën politike dhe të mos lejojnë vonesa të mëtejshme në funksionalizimin e tyre.

Hamza theksoi se PDK-ja ndan shqetësimet e ngritura në raport lidhur me mungesën e institucioneve plotësisht funksionale për një periudhë të gjatë, duke nënvizuar se vendit i nevojiten institucione që marrin vendime, zbatojnë reforma dhe forcojnë besimin me partnerët ndërkombëtarë.

Ai shtoi se stabiliteti nuk duhet të kufizohet vetëm në krijimin e institucioneve, por duhet të mbështetet edhe në qeverisje demokratike, dialog politik dhe respektim të Kushtetutës.

Në përmbyllje, kreu i PDK-së shprehu vlerësimin për rolin e eurodeputetit Riho Terras dhe të Parlamentit Evropian si mbështetës të rëndësishëm të Kosovës dhe të aspiratës së saj për anëtarësim në Bashkimin Evropian.

Presidenti i Ukrainës, Volodymyr Zelensky, edhe pse vendi i tij nuk është anëtar i NATO-s, është bërë një pjesëmarrës i rregullt në samitet e aleancës, ndërsa Ukraina vazhdon të mbrohet nga agresioni rus.

Me të mbërritur në Ankara të martën, Zelensky deklaroi se objektivi i tij kryesor në samit është sigurimi i më shumë sistemeve të mbrojtjes ajrore për Ukrainën.

“Do të vazhdojmë të punojmë për forcimin e mbrojtjes ajrore të Ukrainës. Sisteme të reja, raketa për to dhe çështja e licencave të prodhimit – të gjitha këto janë prioriteti ynë”, shkroi ai në X.

Gjatë muajve të fundit, Ukraina ka arritur kryesisht t’i zmbrapsë sulmet masive ajrore ruse ndaj qyteteve të saj dhe të shpëtojë jetë njerëzish, duke rrëzuar dronët dhe raketat ruse përmes një kombinimi të teknologjisë së avancuar, taktikave ushtarake dhe armëve të furnizuara nga Perëndimi.

Megjithatë, kjo situatë ka ndryshuar këtë muaj. Një sulm rus ndaj Kievit javën e kaluar vrau 30 persona, ndërsa vetëm katër ditë më vonë një tjetër sulm ndaj kryeqytetit ukrainas la të vdekur edhe 19 persona.

Numri i lartë i viktimave besohet të jetë pasojë e mungesës së theksuar të raketave Patriot, të vetmet sisteme të mbrojtjes ajrore të afta për të rrëzuar këtë lloj raketash.

Zelensky dhe zyrtarë të tjerë ukrainas kanë bërë të ditur se vendi po përballet me një “mungesë kritike” të raketave Patriot. Ministria e Mbrojtjes e Ukrainës njoftoi javën e kaluar se u ka dërguar letra pothuajse 40 vendeve, duke u kërkuar që t’i furnizojnë sa më shpejt me raketa Patriot nga rezervat e tyre ekzistuese, në këmbim të dërgesave të ardhshme që janë kontraktuar tashmë për Ukrainën, shkruan CNN.

Deputetja e zgjedhur e AAK-së, Albana Bytyqi ka komentuar deklaratat e djeshme që erdhën nga LVV-ja se i kanë se i votat për formimin e Qeverisë dhe zgjedhjen e kryetarit të Kuvendit, por kërkojnë konsensus për Presidentin.

Sipas Bytyqit, një qasje e tillë e LVV-së e ka dërguar vendin në zgjedhje edhe në dhjetor si pasojë e mungesës së një marrëveshjeje që do ta përfshinte edhe zgjedhjen e presidentit.

“Kjo qasje është shumë e gabuar, sepse po shkon pikërisht si në muajin dhjetor, kur shkuam në zgjedhje me këtë qasje se ne i formojmë institucionet, njëherë zgjedhet Qeveria e më pas Presidenti. Kështu ka shkuar si procedurë jo e rregullt. Edhe tani, nëse vazhdon kjo lojë e LVV-së, vendi do të shkojë në zgjedhje. Prandaj, paraprakisht duhet të bëhet një marrëveshje politike. Mirëpo, ne e dimë të gjithë se partia e parë fituese është dashur qysh moti t’i fillojë negociatat për zgjedhjen e presidentit, në mënyrë që të mos vijë deri te dita e fundit, kur nuk mund të gjendet asnjë zgjidhje dhe vendi të shkojë sërish në zgjedhje. Nuk kemi ndonjë rezultat pozitiv.”, tha ajo për RTV21.

Lideri i Partisë Demokratike të Shqipërisë, Sali Berisha, ka publikuar një video nga protesta e fermerëve të Kosovës, duke pretenduar se kjo ngjarje ka ndodhur në Shqipëri.

Berisha pas publikimit të videos ka shkruar në mbishkrimin, “Fermerët derdhin qumështin para Ministrisë së Bujqësisë si protestë për politikat qeveritare të falimentimit të tyre.”

Berisha megjithatë në postim nuk e ka sqaruar se ky aksion simbolik është zhvilluar në Prishtinë e jo Tiranë.

Postimi më pas është hequr.

Berisha edhe në të kaluarën ka bërë huqje të tilla.

Organizata Botërore e Shëndetësisë, OBSH paralajmëroi të martën se Evropa mund të përballet me “javë më vdekjeprurëse”, me një tjetër valë të nxehtë intensive që po formohet mbi Atlantik.

Temperaturat në Portugali dhe Spanjën jugore pritet të rriten në 43 gradë Celsius në ditët në vijim. Drejtori Rajonal i OBSH-së për Evropën, Hans Kluge zhvilloi një telefonatë emergjente të hënën me përfaqësues nga 41 vende të rajonit, Komisionin Evropian dhe grupet e shoqërisë civile për të diskutuar mësimet nga vala e fundit e të nxehtit dhe përgatitjet për atë të radhës.

Kluge tha në një deklaratë se vendet me plane veprimi për shëndetin me nxehtësinë reaguan më shpejt dhe mbrojtën më mirë popullsinë e tyre gjatë valës së të nxehtit të qershorit.

Megjithatë, ai tha se më pak se gjysma e shteteve anëtare evropiane të OBSH-së kishin një plan të tillë në vend.

Ekspertët kanë thënë se vala e të nxehtit e 20-28 qershorit ishte më e rënda e regjistruar në Evropë, duke shkaktuar ndërprerje në prodhimin e energjisë, duke dëmtuar infrastrukturën dhe duke mbingarkuar sistemet e kujdesit shëndetësor.

Nxehtësia ekstreme pothuajse me siguri u shkaktua nga ndryshimet klimatike, thanë shkencëtarët. Franca, Holanda dhe Belgjika regjistruan 3,700 vdekje shtesë, me autoritetet që paralajmërojnë se numrat janë paraprakë dhe mund të rriten.

Temperaturat arritën 40 gradë Celsius në disa pjesë të Evropës gjatë valës së të nxehtit. Kluge tha se banorët e azileve të kujdesit, personat e pastrehë dhe të moshuarit e izoluar socialisht ende nuk po arriheshin në mënyrë të vazhdueshme në të gjithë Evropën.

“Puna tani është në dy fronte: duke rregulluar atë që dështoi në javët e fundit para se të godasë vala e ardhshme e të nxehtit dhe duke ndërtuar llojin e sistemeve shëndetësore që jo vetëm i përgjigjen nxehtësisë ekstreme, por janë të gatshme për të”, tha Kluge.

Institucioni i Avokatit të Popullit ka nisur hetime sipas detyrës zyrtare lidhur me pretendimet për keqtrajtim të disa personave të arrestuar gjatë festimit të Vidovdanit në Gazimestan, më 28 qershor 2026.

Sipas njoftimit të Avokatit të Popullit, vendimi për hapjen e hetimeve është marrë pas ankesave të pranuara nga qytetarë, informatave të dërguara nga organizata të shoqërisë civile, si dhe raportimeve të publikuara në media.

Pretendimet e ngritura lidhen me trajtimin e personave të arrestuar nga Policia e Kosovës, të cilët kanë deklaruar se janë ekspozuar ndaj dhunës fizike dhe psikike gjatë transportimit të tyre në stacion policor, si dhe ndaj cenimit të të drejtave të tjera të garantuara me Kushtetutë dhe ligjet në fuqi.

Avokati i Popullit ka bërë të ditur se qëllimi i hetimeve është verifikimi i fakteve dhe rrethanave të rastit, si dhe vlerësimi nëse gjatë trajtimit të të arrestuarve janë respektuar standardet kushtetuese, ligjore dhe ndërkombëtare për mbrojtjen e të drejtave dhe lirive themelore të njeriut.

Institucioni ka theksuar se çdo person i privuar nga liria duhet të trajtohet me dinjitet dhe në përputhje me ndalimin absolut të keqtrajtimit, trajtimit çnjerëzor apo poshtërues.

“Çdo pretendim për përdorim të tepruar të forcës ose për shkelje të të drejtave të personave të privuar nga liria kërkon një hetim të pavarur, të paanshëm, efektiv dhe të shpejtë”, thuhet në njoftim.

Gjatë procesit hetimor, Avokati i Popullit pritet të mbledhë informacione dhe dokumentacion nga institucionet përgjegjëse, në përputhje me mandatin e tij kushtetues dhe ligjor.

Pas përfundimit të hetimeve, institucioni ka bërë të ditur se do t’i publikojë gjetjet dhe rekomandimet përkatëse për opinionin publik dhe palët e interesuara.

Punëtorët e kompanisë hekurudhore Trainkos ende nuk i kanë marrë pagat për muajin e kaluar, ndonëse, sipas Sindikatës së Hekurudhave, ato zakonisht ekzekutohen para datës 1 të çdo muaji.

Kryetari i Sindikatës së Hekurudhave, Florim Gjyrevci, ka deklaruar për Telegrafin se vonesa ka kaluar tashmë pesë ditë, ndërsa rreth 160 punëtorë vazhdojnë të presin pagat e tyre.

“Gjithmonë pagat i kemi marrë para datës 1. Sot është data 7 dhe afati është tejkaluar për pesë ditë. Ende nuk janë realizuar pagat për rreth 160 punëtorë,” tha Gjyrevci.

Ai bëri të ditur se të hënën është zhvilluar një takim me kryeshefin ekzekutiv të Trainkos, ku është diskutuar çështja e vonesës së pagave.

“Dje kemi pasur takim me kryeshefin e Trainkos dhe kemi diskutuar për këtë çështje, por deri më tani pagat ende nuk janë ekzekutuar,” u shpreh ai.

Sipas Gjyrevcit, problemi qëndron te mosekzekutimi i mjeteve nga Ministria e Financave.

“Ministria e Financave ende nuk i ka ekzekutuar mjetet dhe për këtë arsye punëtorët nuk i kanë marrë pagat. Nuk e dimë ku qëndron problemi,” deklaroi ai.

Sindikata ka kërkuar që pagat të ekzekutohen sa më shpejt, duke theksuar se vonesat po krijojnë vështirësi për punëtorët dhe familjet e tyre dhe se në rast se kjo vonesë vazhdon atëherë do të shqyrtojnë mundësinë e veprimeve sindikale.

Ish-kryetari i Aleancës për Ardhmërinë e Kosovës, Ramush Haradinaj, ka përkujtuar Betejën e Morinës, e cila u zhvillua më 7 korrik 1998, duke e cilësuar atë si një kapitull të ri në historinë e luftës çlirimtare në Zonën Operative të Dukagjinit.

Përmes një postimi në Facebook, Haradinaj ka bërë të ditur se së bashku me familjarë të dëshmorëve dhe bashkëluftëtarë ka nderuar kujtimin e të rënëve në këtë betejë.

Sot, së bashku me familjarë të dëshmorëve dhe bashkëluftëtarë, nderuam kujtimin për trimat që u përjetësuan atë ditë: Muhamet Ukshini, Shkëlzen Syla, Blerim Ukshini, Ahmet Pulatini, Fisnik Salihu, Nezir Elezaj, Ymer Bytyqi, Arben Ukshini dhe Sylejmon Abdyli. Në përvjetorin e rënies, nderuam gjithashtu kujtimin për dëshmorin Agim Mazrekaj. Ai ishte luftëtar i dalluar, i vendosur dhe gjithmonë i gatshëm për betejë dhe për çdo detyrë ushtarake. Rënia e tyre ishte një goditje e rëndë për rrjedhën e luftës, por njëkohësisht u bë frymëzim për mijëra të rinj që iu bashkuan radhëve të Ushtrisë Çlirimtare të Kosovës, duke e çuar më tej idealin e shenjtë të lirisë. Nderim i përjetshëm për luftëtarët e lirisë”, shkroi ai.