Author: K.B.

Me kërkesë të Inspektoratit Sanitar, Pishina e Gërmisë do të jetë përkohësisht e mbyllur deri në marrjen e mostrave dhe përfundimin e analizave nga Instituti Kombëtar i Shëndetësisë Publike të Kosovës.

NPL “Sport Marketing” Sh.A., përmes një njoftimit në Facebook ka theksuar se rregullisht kontrollon cilësinë e ujit dhe bën matjen e vlerave përkatëse, në përputhje me standardet dhe procedurat e brendshme të mirëmbajtjes.

“Gjendja e përgjithshme e Pishinës së Gërmisë është e mirë, si në aspektin e cilësisë së ujit, ashtu edhe të ambienteve brenda saj”, thuhet në njoftim.

“Megjithatë, duke marrë parasysh rregullat dhe procedurat e IKSHPK-së për pishinat publike, si dhe për hir të transparencës dhe korrektësisë ndaj qytetarëve, do të presim rezultatet zyrtare nga Instituti para vazhdimit të punës. Si ndërmarrje, respektojmë dhe zbatojmë vendimet e organeve përgjegjëse, duke pasur si prioritet kryesor sigurinë dhe shëndetin e qytetarëve. Pas përfundimit të procedurave dhe marrjes së rezultateve zyrtare, do t’ju informojmë me kohë për vazhdimin e punës së Pishinës së Gërmisë”.

Dogana e Kosovës, ka njoftuar se në pikën kufitare në Han të Elezit, ka ndaluar mallra të dyshuar për cenim të të drejtave të pronësisë.

Gjatë kontrollit të një automjeti, ka theksuar dogana, janë zbuluar 128 palë këpucë të markave të mbrojtura, për të cilat personi nuk ka poseduar dokumentacion që dëshmon origjinën, importin e rregullt apo të drejtën për përdorimin dhe qarkullimin e këtyre produkteve.

Njoftimi:

Hani i Elezit, 03 korrik 2026 – Gjatë mbrëmjes, rreth orës 22:00, zyrtarët doganorë të Doganës së Kosovës, në Pikën e Kalimit Kufitar Hani i Elezit, kanë ndaluar për kontroll një automjet me targa vendore, në kuadër të zbatimit të kontrolleve të bazuara në analizën e riskut dhe kompetencave ligjore.

Në përputhje me procedurat doganore, drejtuesi i automjetit është pyetur fillimisht nëse posedonte mallra për deklarim. Pas deklarimit se nuk kishte asgjë për të paraqitur, zyrtarët doganorë, bazuar në dyshime të arsyeshme dhe në autorizimet e përcaktuara me Kodin Doganor dhe të Akcizave Nr. 08/L-247, kanë ushtruar kontroll fizik të automjetit.

Gjatë kontrollit në bagazhin e automjetit janë zbuluar 128 palë këpucë të markave të mbrojtura, për të cilat personi nuk ka poseduar dokumentacion që dëshmon origjinën, importin e rregullt apo të drejtën për përdorimin dhe qarkullimin e këtyre produkteve.

Në përputhje me dispozitat e Kodit Doganor dhe të Akcizave Nr. 08/L-247, Dogana e Kosovës ka kompetencë të ndalojë mallrat për të cilat ekziston dyshimi se cenojnë të drejtat e pronësisë intelektuale, si dhe të ndërmarrë masat e nevojshme administrative dhe kundërvajtëse ndaj personave që tentojnë t’i fusin ose t’i qarkullojnë ato në kundërshtim me legjislacionin në fuqi.

Lidhur me rastin është iniciuar procedura për kundërvajtje doganore, ndërsa malli është ndaluar për procedura të mëtejshme, në përputhje me legjislacionin doganor dhe dispozitat që rregullojnë mbrojtjen e të drejtave të pronësisë intelektuale.

Dogana e Kosovës mbetet e përkushtuar në luftimin e kontrabandës, parandalimin e tregtisë së paligjshme dhe qarkullimit të mallrave që cenojnë të drejtat e pronësisë intelektuale, duke kontribuar në mbrojtjen e konsumatorëve, garantimin e konkurrencës së ndershme në treg dhe mbrojtjen e interesave fiskale të Republikës së Kosovës.

Deputeti i Aleancës për Ardhmërinë e Kosovës, Besnik Tahiri, ka bërë të ditur se mundësia që Ramush Haradinaj të jetë kandidat për president nuk është më në tavolinë, pasi, sipas tij, nuk ka pasur mbështetje dhe mirëkuptim politik.

Tahiri tha se kjo kishte qenë një ide e paraqitur më herët, por zhvillimet politike e kanë bërë atë të mos konsiderohet më si alternativë.

“Ky ka qenë një pozicion para propozimit të gjashtë pikave. Siç shihet, nuk ka gjetur mirëkuptim dhe tashmë nuk është opsion. Jo, nuk është opsion. S’mundet me ndodhë, nuk është më opsion ideja”, tha ai në Rubikon të Klan Kosova.

Ai shtoi se edhe qëndrimi publik i Haradinajt ka qenë i qartë, duke theksuar se lideri i AAK-së nuk e kishte shpallur veten kandidat për president, por vetëm kishte shprehur gatishmëri, e cila, sipas Tahirit, tashmë nuk ekziston.

“Ky është pozicion publik. Një politikan, kur jep një pozicion publik, në këtë rast kryetari Haradinaj, ish-kryeministër dy herë, nuk ka pasur asnjë reflektim. Mendoj që pozicioni i z.Haradinaj ishte bukur i qartë. Ai nuk tha që unë jam kandidat, as që po vetëpropozohem, por që ka gatishmëri. Gatishmëria nuk ekziston më, që nënkupton se kjo çështje tashmë është e mbyllur”, deklaroi deputeti Tahiri.

Deputetja e zgjedhur e Partisë Demokratike të Kosovës (PDK), Eliza Hoxha, ka deklaruar se kjo parti nuk do të japë votë pa kushte për cilindo kandidat që mund të propozohet nga kryeministri në detyrë dhe kreu i Lëvizjes Vetëvendosje, Albin Kurti, për postin e presidentit të vendit.

Hoxha, ka thënë se beson që as partitë e tjera opozitare nuk do të mbështesin një kandidat vetëm si rezultat i presionit politik.

Ajo ka theksuar se opozita nuk është, siç u shpreh ajo, “makinë e lëvizjeve të dorës së dëshirave të Kurtit në Kuvend”, duke shtuar se partitë opozitare kanë përgjegjësi ndaj votuesve të tyre dhe vizione të ndryshme për zhvillimin e shtetit

“Një gjë është e qartë: votë blanko vetëm për shkak të presionit që partitë opozitare duhet patjetër ta votojnë këdo që dëshiron Kurti, nuk do të ketë. Ta dini që jo vetëm PDK-ja, por besoj asnjë parti opozitare nuk do ta bëjë këtë, sepse ne nuk jemi makina të lëvizjeve të dorës së dëshirave të Kurtit në Kuvend. Ne kemi një besueshmëri ndaj njerëzve që kanë bindje dhe ide të tjera për shtetin, kanë një vizion tjetër zhvillimor, dhe ne duhet t’i përfaqësojmë ato në Kuvendin e Kosovës”, ka deklaruar Hoxha në tëvë1.

Sipas saj, për arritjen e një marrëveshjeje politike nevojitet gatishmëri për dialog, veçanërisht nga subjekti që ka fituar zgjedhjet.

Hoxha ka vlerësuar se demokracia kërkon balancim të pushtetit dhe përfshirje të të gjitha palëve politike, duke kundërshtuar, siç tha ajo, përqendrimin e pushtetit në duart e një subjekti të vetëm.

“Maturimi, si në aspektin njerëzor ashtu edhe në atë politik, vjen kur palët janë të gatshme. Sidomos pala fituese, qoftë edhe nëse i nevojitet vetëm një votë e vetme, duhet të ulet në tavolinë dhe të krijojë mundësi për të ecur përpara. Këto mundësi që në të kaluarën janë krijuar nga partitë e tjera, zakonisht janë cilësuar si ‘pazare’ dhe janë demonizuar, por në fakt demokracia është ajo që i jep mundësi të voglit, i jep mundësi palëve të padëgjuara dhe u jep mundësi partive opozitare për ta balancuar pushtetin, në mënyrë që të mos krijohet një përqendrim total i pushtetit te një subjekt politik, nëse dëshirojmë të jetojmë në demokraci”, ka përfunduar ajo.

Policia e Kosovës, përmes raportit të saj ka njoftuar se në Prishtinë është arrestuar një person, pasi që i njëjti kishte kanosur ministrin në detyrë të Punëve të Brendshme, Xhelal Sveçlën.

Në raport, bëhet e ditur se rasti kishte ndodhur në nëntor të vitit të kaluar, dhe se, i dyshuari pas arrestimit është dërguar në mbajtje, përcjell Gazeta Express.

‘’KANOSJE

Prishtinë 09.11.2025 – 16:56. Në lidhje me rastin, më 07.07.2026 është arrestuar i dyshuari, pasi i njëjti përmes rrjeteve sociale kishte kanosur Ministrin e Punëve të Brendshme të Republikës së Kosovës. Me vendim të prokurorit i dyshuari është dërguar në mbajtje’’, thuhet në raport.

Policia e Kosovës, ka njoftuar se në Gjilan është zhdukur një person.

Në raportin e policisë shtohet edhe se, rastin e ka paraqitur gruaja i të zhdukurit.

‘’PERSON I ZHDUKUR

Rr. Nëna Terezë, Gjilan 05.07.2026-17:00. Ankuesja me 07.07.2026 ka raportuar se bashkëshorti i saj, me datën e cekur ka dalë nga shtëpia dhe nuk dihet vendndodhja e tij. Lidhur me rastin, është informuar edhe prokurori, ndërsa njësitet policore janë duke hetuar rastin’’, thuhet në raport.

Policia e Kosovës ka njoftuar se sot do të ndërmerren masa të veçanta sigurie me rastin e kalimit transit nëpër Kosovë të presidentit të Shqipërisë, Bajram Begaj.

Sipas njoftimit, Policia ka kryer paraprakisht të gjitha veprimet e nevojshme operative dhe ka angazhuar njësitë përkatëse policore për të garantuar sigurinë dhe rrjedhën e lirë të komunikacionit përgjatë itinerarit të eskortës presidenciale.

“Me datën 08.07.2026, Policia e Kosovës, me rastin e kalimit transit nëpër Kosovë të Presidentit të Republikës së Shqipërisë z. Bajram Begaj, ka ndërmarrë paraprakisht të gjitha veprimet e nevojshme operative duke angazhuar njësitë përkatëse policore, me qëllim të ofrimit të sigurisë dhe rrjedhës së lirë të komunikacionit rrugor përgjatë rrugëve lëvizëse të eskortës”, thuhet në njoftim.

Për këtë arsye, Policia tha se gjatë ditës së sotme do të ketë ndërprerje të përkohshme të qarkullimit të trafikut, në intervale të shkurtra kohore në disa segmente rrugore.

“Për të mundësuar qarkullim të lirë sipas itinerarit të lëvizjes, me datën 08.07.2026, Policia e Kosovës do të bëjë ndërprerje të përkohshme të qarkullimit të trafikut (në intervale të shkurtra kohore) të disa segmenteve rrugore nga Pika e Kalimit Kufitar Vërmicë deri në Pikën e Kalimit Kufitar Dheu i Bardhë dhe anasjelltas, gjatë kthimit po ashtu me të njëjtën datë, ku edhe mund të ketë riorientim të trafikut në rrugë alternative”, thuhet në njoftim.

Në fund, Policia e Kosovës i ka falënderuar qytetarët dhe të gjithë pjesëmarrësit në komunikacion për mirëkuptimin e tyre.

Policia e Kosovës, përmes raportit të saj 24-orësh, ka njoftuar për një raste të dhunës në familje në Pejë.

Në raport bëhet e ditur se, një person, raportuar se pas një mos marrëveshje është sulmuar fizikisht nga njerka e tij.

‘’DHUNË NË FAMILJE

Pejë 07.07.2026, 22:10. Ankuesi mashkull kosovar, ka raportuar se pas një mos marrëveshje është sulmuar fizikisht nga njerka e tij. Viktima nuk ka pranuar tretman mjekësor, ndërsa e dyshuara është shoqëruar në stacionin policor dhe pas intervistimit me vendim të prokurorit është liruar në procedurë të rregullt’’, thuhet në raport.