Author: G.O.

Këngëtarja me famë botërore, Rita Ora, ka marrë vëmendjen e të gjithëve duke mbuluar ballinën e revistës prestigjioze “Marie Claire” në edicionin spanjoll.

Lajmin e gëzueshëm e kanë bërë të ditur drejtuesit e revistës, të cilët përmes një postimi të përbashkët me yllin në rrjetin social Instagram, ndanë këtë arritje të re të këngëtares shqiptare.

Në postimin e revistës, Ora shprehet se gjithmonë ka ëndërruar të bëhet këngëtare. “U bëra e obsesionuar me modën, muzikën dhe çdo lloj argëtimi. Gjëja e vetme që doja të bëja ishte të argëtoja”, ka thënë këngëtarja, duke përshkruar pasionin dhe dedikimin e saj për artin dhe argëtimin.

Intervista ekskluzive e revistës “Marie Claire” për numrin e muajit gusht sjell një pasqyrë të thellë të karrierës së Rita Orës dhe rëndësinë e shëndetit mendor. Në një tjetër postim në Instagram, Ora falënderoi revistën për këtë nderim të veçantë.

“Faleminderit ‘Marie Claire Espana’ që më vendosët mua në ballinën më të fundit. Shikoni fotografitë për të parë lëvizjet e mia të stilit flamenco”, shkroi ajo, duke e theksuar rolin e modës dhe stilit në jetën e saj artistike.

Megjithëse data e saktë e publikimit të intervistës së plotë ende nuk është bërë e ditur, fansat e Rita Orës presin me padurim të mësojnë më shumë rreth rrëfimeve dhe mendimeve të saj.

Kjo paraqitje në “Marie Claire” shënon një tjetër moment të rëndësishëm në karrierën e saj, duke konfirmuar pozicionin e saj si një nga figurat më të njohura dhe të vlerësuara në skenën ndërkombëtare të muzikës dhe modës. /Telegrafi/

Kryeministri i Kosovës, Albin Kurti është shprehur se pas takimit me ministren e Jashtme të Japonisë, Yoko Kamikawa, diskutuan edhe më tej në një darkë miqësore.

Po ashtu, shefi i ekzekutivit, përmes një postimi në X, u shpreh se ndërtesa e qeverisë u ndriçua në nder të 15-vjetorit të marrëdhënieve diplomatike mes Kosovës dhe Japonisë.

“Ne e zhvendosëm diskutimin tonë miqësor me ministren e Punëve të Jashtme të Japonisë, Yoko Kamikawa në një darkë, ndërsa ndërtesa e qeverisë sonë u ndriçua në festimin e 15-vjetorit të marrëdhënieve tona diplomatike”, shkroi Kurti në X.

“Urime për një partneritet dhe aleancë gjithnjë e më të ngushtë dhe më të fortë”.

Policia e Kosovës njoftoi se është arrestuar dje një burrë në Prishtinë, nën dyshimin se e ka sulmuar seksualisht një të mitur.

Pas intervistimit me vendim të prokurorit kujdestar, i dyshuari është dërguar në mbajtje.

“Prishtinë,19.07.2024-21:15. Është arrestuar i dyshuari mashkull kosovar, pasi që i njëjti e kishte sulmuar seksualisht viktimën femër të mitur. Pas intervistimit me vendim të prokurorit kujdestar, i dyshuari është dërguar në mbajtje”, thuhet në njoftim.

Një sulm ajror rus në qytetin jugor ukrainas të Mikolajivit goditi një këndë lojërash, duke vrarë të paktën tre persona, përfshirë një fëmijë.

Kështu njoftoi presidenti ukrainas, Volodymyr Zelensky më 19 korrik. Në sulm u plagosën edhe pesë persona, tha Zelensky përmes Telegramit, duke i bërë thirrje botës që të ndihmojë në ndaljen e “terrorit” rus.

Kryetari i Mikolajivit, Oleksandr Sienkovych, konfirmoi se tre persona, përshirë një fëmijë, u vranë në sulm.

Zelensky publikoi fotografi ku shfaqeshin të paktën dy trupa të pajetë pranë hyrjes së një ndërtese.

“Ky shkatërrim i jetës duhet të ndalet”, tha Zelensky. “Duhen zgjidhje të reja për të mbështetur mbrojtjen tonë. Rusia duhet të ndiejë fuqinë e botës”.

Udhëheqësi ukrainas përsëriti thirrjet drejtuar mbështetësve perëndimorë të Kievit që t’i dërgojnë shtetit më shumë sisteme të mbrojtjes ajrore, në mënyrë që Ukraina të mbrojë qiejt e saj nga sulmet ajrore të Rusisë.

Qyteti-port i Mikolajivit dhe rajoni përreth shpesh janë cak i sulmeve ruse. Guvernatori rajonal, Vitaliy Kim, tha se edhe një raketë tjetër goditi një zonë tjetër në këtë rajon më 19 korrik.

Rusia mohon se shënjestron civilët apo infrastrukturën civile, pavarësisht provave që dëshmojnë të kundërtën. Që kur ka nisur pushtimi rus i Ukrainës më 2022, në Ukrainë janë dokumentuar më shumë se 10.000 persona të vrarë.

Rusia më herët gjatë 19 korrikut sulmoi edhe në rajonin e Hersonit, duke vrarë një grua të moshuar.

Po ashtu, në rajonin e Harkivit, si pasojë e sulmeve ruse u plagosën të paktën shtatë persona, ndërkaq në rajonin Sumi – afër kufirit me Rusinë – u plagos edhe një civil, sipas zyrtarëve rajonalë.

Ndërkaq, Ministria ruse e Mbrojtjes tha se mbrojtja e saj ajrore ka rrëzuar 19 dronë të Ukrainës mbi rajonet e Kurskut dhe Belgorodit, si dhe në Krimenë e pushtuar./REL

Zjarret në sipërfaqet pyjore prej disa javësh vazhdojnë të djegin me qindra hektarë me pyje dhe kullota në një pjesë të territorit të Shqipërisë. Sipas Agjencisë Kombëtare të Mbrojtjes Civile, zonat më të prekura deri tani janë Njësitë Administrative të Qarqeve Dibër, Gjirokastër, Vlorë dhe Shkodër.

Prej disa javësh forca dhe mjete të shumta të njësive zjarrfikëse, të mbështetura edhe nga forcat e ushtrisë dhe dy helikopterë po luftojnë për shuarjen e vatrave të zjarrit, të cilat, në disa raste, i janë afruar edhe zonave të banuara.

Në pjesën më të madhe, vatrat e zjarreve janë shuar, por aktualisht situata është përqendruar në Qarkun e Dibrës, ku temperaturat e ditëve të fundit arritën nivelin maksimal, me 43 gradë, duke rritur rrezikun e shfaqjes së vatrave të reja të zjarrit.

Qendra Kombëtare Operacionale e Emergjencave Civile njoftoi sot se, në të gjithë territorin e vendit janë aktive 7 vatra zjarri. Situata është më problematike në fshatin Pregj-Lurë të bashkisë Dibër, ku helikopteri i Forcave të Armatosura i është bashkuar operacionit për të penguar përhapjen e flakëve në drejtim të fshatit.

Në bashkinë Pukë pati sot dy vatra zjarri të reja, në fshatin Rras dhe një tjetër në fshatin Kuzhnen, ndërsa në bashkinë Fushë-Arrës forcat zjarrfikëse u përfshinë sot në shuarjen e një vatre zjarri në fshatin Sakat. Vatra zjarri u regjistruan sot edhe në bashkinë e Kolonjës, atë të Gjirokastrës dhe Tepelenës.

Zjarret e shfaqura tre javët e fundit, në sipërfaqet pyjore, paraqitën vështirësi për shuarjen e tyre, ndaj më 13 korrik Shqipëria kërkoi aktivizimin e Mekanizmit të Mbrojtjes Civile të BE-së, i cili dërgoi dy avionë zjarrfikës për luftimin e vatrave të zjarreve kryesisht në zonën e Gjirokastrës.

Shqipëria ka rreth 36 për qind të territorit të saj me pyje dhe kullota dhe ndryshimet klimatike të viteve të fundit kanë rritur rrezikun e shtimit të zjarreve në pyje. Çdo vit regjistrohen më shumë se 200 vatra zjarri në pyje dhe kullota, duke i sjellë një dëm të konsiderueshëm ekonomisë së vendit dhe mjedisit natyror.

Kapacitetet e Shqipërisë për shuarjen e zjarreve në sipërfaqet pyjore, sidomos në zonat e thella malore, janë të kufizuara. Shërbimi zjarrfikës ka vetëm 147 automjete zjarrfikëse, pjesa më e madhe të vjetruara, dhe rreth 1300 punonjës, por asnjë avion zjarrfikës./VOA

Të paktën 11 persona humbën jetën dhe 30 të tjerë rezultuan të zhdukur pasi një urë u shemb mes shirave të rrëmbyeshëm në Kinën veriperëndimore, tha media shtetërore të shtunën.

“Afro 20 automjete dhe më shumë se 30 njerëz janë të zhdukur pas shembjes së urës së autostradës”, tha transmetuesi lokal CCTV.

Ura në qarkun Zhashui, në provincën Shaanxi, u shemb në orën 20:40 të premten për shkak të rrebeshve të papritura dhe përmbytjeve, njoftoi agjencia shtetërore e lajmeve Xinhua, duke cituar autoritetet.

Operacionet e shpëtimit janë duke vazhduar, me pesë automjete të nxjerra nga uji deri më tani.