Author: G.O.

Kryeministri i Shqipërisë, Edi Kama, ka thënë së Shqipëria së shpejt do të blejë një anije të madhe luftarake, ndonëse nuk dha shumë detaje për këtë.

“Kemi gjetur ferrnaja dhe sot është një bazë taktike e NATO-s. Sot, me flotë helikopterësh dhe së shpejti me një anije të madhe luftarake, veç të voglave. Ky është vetëm fillimi i një transformimi. Industria ushtarake ka nisur të hedhë themelet. Shkollën e aviacionit do ta rilindim. Kemi bërë marrëveshje me një partner shumë të fuqishëm ndërkombëtar”, u shpreh Rama.

Ai shtoi se gjatë qeverisjes së tij, investimet në ushtri janë dhjetëfishuar.

Madje, ai thotë se pagat në ushtri, sot janë më të lartat në rajon.

“Ka qenë 28 milionë euro. Ushtria më e keqpaguar në Evropë dhe e kapur keq nga korrupsioni. Sot është 280 milionë euro. Sot është ushtria më e mirëpaguar e rajonit. Edhe Serbinë e kemi kaluar me pagat në ushtri. Synojmë që brenda mandatit të katërt në Shqipërinë 2030, paga mesatare të jetë në mesataren e pagave të vendeve të NATO-s”, tha kryeministri Rama.

Para Kuvendit të Maqedonisë së Veriut, nisi protesta e qytetarëve në organizimin e Nismës “Kush është i radhës”.

Kjo protestë mbahet pas dy protestave të kaluara për tragjedinë në diskotekën në Koçan, ku mbetën të vdekur 59 persona, raporton Alsat-M.

Në këtë tragjedi të rëndë, po ashtu mbetën të lënduar mbi 150 persona të tjerë, kryesisht të moshës së re.

Që nga arrestimi i kryebashkiakut, Ekrem Imamoglu, mijëra qytetarë janë duke protestuar anembanë Turqisë, shkruan Gazeta Sinjali.

Kryebashkiaku Imamoglu kryeson ndaj Erdogan në disa sondazhe, u burgos në pritje të gjyqit mbi akuzat për korrupsion të dielën që shkoi, duke nxitur protestat më të mëdha antiqeveritare në më shumë se një dekadë, të cilat kanë çuar në arrestime masive në mbarë vendin.

Presidenti i vendit nuk ka dhënë sinjale për të dëgjuar zërin e manifestuesve, por u zotua të shtypte çdo përpjekje, siç tha ai, për prishjen e qetësisë publike.

“Për një javë, ata kanë bërë gjithçka për të mbuluar korrupsionin, për të fshehur vjedhjet, për të fshehur grabitjen dhe për të mbrojtur mashtrimin. Me pretekstin e kërkimit të drejtësisë, ata tentuan një provokim shumë të rrezikshëm që nuk kishte të bënte me demokracinë, ligjin apo mjetet legjitime të kërkimit të drejtësisë. Megjithatë, falë qëndrimit të ftohtë dhe të vendosur të policisë sonë, qëndrimit të arsyeshëm të kombit tonë dhe qëndrimit të qetë të të rinjve tanë që ruajtën dinjitetin e tyre edhe pse iu nënshtruan provokimit, nuk arritën dot politikën e bullizmit. Sigurisht që ne nuk do të mbyllim sytë ndaj prishjes së rendit publik gjatë këtij procesi. Njësitë tona të sigurisë do të ndërmarrin veprimet e nevojshme kundër kujtdo që mbulon fytyrën, sulmon policinë apo ngacmon njerëzit tanë ndërsa ata janë duke bërë detyrën e tyre”, tha Erdogan .

Imamgolu është arrestuar për akuza ndaj korrupsionit, dhe qytetarët e Turqisë janë duke e konsideruar këtë me qëllime politike.

Autoritetet kanë shpallur gjendje të jashtëzakonshme në pjesën perëndimore të Bosnje e Hercegovinës të shtunën, për shkak të rritjes së nivelit të ujit të lumenjve.

Si pasojë e reshjeve të shiut për disa ditë radhazi këtë javë, në pjesën më të madhe të Bosnje e Hercegovinës lumenjtë dolën nga shtrati.

Në komunën e Kostajnicës, në perëndim të vendit, niveli i ujit të lumit Una i kaloi 450 centimetra.

Gjendje e jashtëzakonshme u shpallë si masë parandaluese për t’u mbrojtur nga përmbytjet edhe në Prijedor, raporton Radio Televizioni i Republikës Sërpska, entitetit serb të Bosnjës.

Administrata e qytetit njoftoi të shtunën se rreth 350 ndërtesa, banimi dhe ndihmëse, u prekën nga përmbytjet gjatë natës.

Gjendje e jashtëzakonshme është shpallur edhe në Laktash, Gradishka dhe Çelinaq për shkak të rritjes së nivelit të ujit të lumenjve.

Niveli i ujit të lumit Ukrina në Derventa aktualisht është në rënie të lehtë. Masat emergjente të mbrojtjes nga përmbytjet janë ende në fuqi në qytet.

Gjendje më e rënduar raportohet në pjesën veriore dhe veriperëndimore të vendit, ku janë mbyllur disa rrugë kryesore.

Mësimet janë pezulluar në shumicën e shkollave në atë pjesë vendit.

Në fund të vitit të kaluar, Bosnja u përballë më vërshime vdekjeprurëse, kur 27 njerëz humbën jetën nga përmbytjet dhe rrëshqitjet e dheut më 4 tetor.

Shirat e rrëmbyeshëm dhe erërat e fuqishme goditën pjesë të Bosnjës jugore dhe qendrore më 4 tetor, duke shkatërruar shtëpi, rrugë dhe duke ndërprerë rrymën dhe bllokuar qasjen në disa fshatra.

Me rastin e shënimit të 26 vjetorit të masakrës në Beleg të Deçanit, ku forca të shumta policore, ushtarake dhe paramilitare vranë dhe masakruan 49 shqiptarë, presidentja e Kosovës, Vjosa Osmani, ka bërë një kujtim, raporton Gazeta Sinjali.

Osmani ka shprehur dhimbjen për viktimat dhe duke theksuar se, “Një çerek shekulli më parë, në oborrin e një shtëpie në Beleg të Deçanit, forcat policore, ushtarake dhe paramilitare të regjimit gjenocidal të Serbisë ndanë burrat dhe të miturit nga gratë dhe më pas ekzekutuan e masakruan 46 shqiptarë. Kjo ishte një nga masakrat më të mëdha të kryera nga forcat paramilitare serbe, të cilat në vitin 1999 nisën një ofensivë të egër ndaj popullatës civile.”

Tutje, presidentja e vendit tha se edhe sot, pas kaq vitesh, fati i disa banorëve të zhdukur me dhunë nuk është zbardhur, ndaj plagët mbeten të hapura për familjet dhe për gjithë Kosovën.

“Drejtësia mbetet borxh ndaj tyre dhe ndaj historisë sonë”, ka shkruar Osmani.

Katër persona kanë humbur jetën dhe 21 të tjerë janë lënduar pas një sulmi masiv me dronë në qendër të qytetit ukrainas, Dnipro.

Kreu i Dnipros, Serhiy Lysak, njoftoi se një kompleks dhe disa ndërtesa banimi janë shkatërruar si pasojë e sulmit, ndërsa shtoi se “armiku ka dërguar mbi 20 dronë” në qytet.

Gjatë natës, sirenat janë lëshuar në disa rajone në Ukrainë, përfshirë në kryeqytet, dhe nuk dihet ende nëse ka pasur sulme të tjera, raportoi BBC.

Ndërkohë, Ministria e Mbrojtjes e Rusisë ka thënë se tre dronë ukrainas janë penguar dhe rrëzuar në rajonin e Belgorodit.

Në një video të premten, presidenti ukrainas, Volodymyr Zelensky ka akuzuar Rusinë për shënjestrimin e infrastrukturës energjetike ukrainase – një akt që shkel një memorandum të përkohshëm të nënshkruar në fillim të muajit.

Moska gjithashtu ka akuzuar vazhdimisht Ukrainën për sulmet ndaj sektorit energjetik të Rusisë.