Kuvendi i Kosovës ka njoftuar se nesër do të vazhdojë seanca konstituive, duke filluar nga ora 12:00.
Seanca e së shtunës do të jetë vazhdimi i tretë i seancës konstituive, e cila dy herë radhazi dështoi të finalizohet pasi raporti i Komisionit për Verifikim mandatesh herën e parë s’ka marrë vota mjaftueshëm dhe herën e dytë s’është hedhur fare në votim.
Kryesues në këto seanca është deputeti më i vjetër, ai i Vetëvendosjes, Avni Dehari.
Kryeministri në detyrë, Albin Kurti, nuk ka dhënë përgjigje të qartë për media lidhur me vazhdimin e seancës konstituive të Kuvendit të Kosovës, që pritet të mbahet nesër.
I pyetur nga gazetarët nëse Lëvizja Vetëvendosje i ka siguruar votat për miratimin e raportit të Komisionit për Verifikimin e Mandateve dhe për zgjedhjen e kryetarit të Kuvendit, Kurti u përgjigj shkurt:
“Ajo është nesër, a po?” – tha ai, pa dhënë më shumë detaje.
Këto deklarime Kurti i bëri gjatë pjesëmarrjes në aktivitetin për nder të Ditës së Dëshmorëve të Komunës së Prishtinës, ku edhe dhuroi gjak në sheshin “Zahir Pajaziti”.
Lionel Messi ka komentuar situatën aktuale të FC Barcelonës dhe ngritjen e shpejtë të talentit të ri Lamine Yamal, gjatë një interviste për kanalin në YouTube, Simplemente Futbol, raporton Gazeta Sinjali.
Ylli argjentinas, i cili vetë shpërtheu në skenën ndërkombëtare në moshë shumë të re, e cilësoi Yamal-in si një nga lojtarët më të mirë të momentit, duke nënvizuar ndikimin e tij të menjëhershëm në futbollin profesionist.
“Fëmijët shikojnë dhe imitojnë gjithçka, i njohin të gjithë dhe i ndjekin të gjithë, sepse flasin për lojtarët aktualë si Mbappe, Vinicius, Haaland, Lewandowski dhe Lamine Yamal, të jesh kaq i ri është shumë mirë. Seriozisht, është e pabesueshme”, u shpreh Messi.
I pyetur për talentin nga Rocafonda, Messi pati fjalë shumë të mira, duke vlerësuar arritjet e hershme të Lamine Yamal dhe kontributin e tij te përfaqësuesja spanjolle.
“Është mbresëlënëse ajo që Lamine Yamal po tregon, çfarë po bën dhe çfarë ka bërë tashmë. Ai tashmë ka qenë kampion i Evropës me Spanjën”, shtoi ai.
Ambasadori i Bashkimit Evropian në Kosovë, Aivo Orav, është shprehur se ende nuk ka një përgjigje përfundimtare lidhur me fatin e masave ndëshkuese që BE-ja ka vendosur ndaj Kosovës.
Ai ka rikujtuar se ish-Përfaqësuesi i Lartë i BE-së, Josep Borrell, kishte rekomanduar heqjen e këtyre masave, ndërsa diskutimet në Këshillin Evropian po vazhdojnë.
“Kam frikë se nuk mund t’i jap një përgjigje përfundimtare kësaj pyetjeje. Siç e dini, ish-Përfaqësuesi i Lartë i rekomandoi Këshillit në qershor 2024 heqjen e masave. Më pas, në dhjetor 2024, Këshilli në konkluzionet e tij për zgjerimin deklaroi se BE-ja gradualisht do t’i heqë masat paralelisht me hapat e mëtejshëm të Kosovës për të de-përshkallëzuar tensionet në veri. Diskutimet brenda Këshillit vazhdojnë dhe vendimi nëse masat do të hiqen përfundimisht i takon 27 vendeve anëtare të BE-së, pasi një vendim i tillë kërkon konsensus”, deklaroi Orav për Kosovo Online.
“Kusht thelbësor për rrugën drejt BE-së si për Kosovën ashtu edhe për Serbinë është normalizimi i marrëdhënieve dhe zbatimi i zotimeve të dialogut”, shtoi ai, duke përsëritur qëndrimin e Unionit ndaj procesit të dialogut ndërmjet dy vendeve.
Një ngjarje e rëndë ka ndodhur mbrëmjen e së enjtes në zonën e Lundrës në Tiranë, ku një atentat me armë zjarri ka lënë të plagosur katër persona. Ngjarja ka shkaktuar panik në zonë, ndërsa forcat e policisë kanë rrethuar menjëherë perimetrin dhe kanë nisur hetimet për zbardhjen e rrethanave.
Të plagosurit janë transportuar menjëherë në Spitalin e Traumës për ndihmë mjekësore. Mes tyre ndodhen edhe dy të mitur.
Raportohet se një nga të plagosurit, një 11-vjeçar, ndodhet në gjendje të rëndë dhe po trajtohet në repartin e reanimacionit.
Ndërkohë, edhe tre të tjerët, një 19-vjeçar, një 34-vjeçar dhe një 17 vjeçar, ndodhen ende në Spitalin e Traumës, por janë jashtë rrezikut për jetën.
Sipas asaj që A2 CNN ka mësuar, hetuesit kanë dyshime të forta se autorët mund të kenë ngatërruar objektiv. Burime thonë se objektivi i atentatorëve ka qenë një grua e një personi me precedentë të theksuar kriminal, identiteti i së cilës ende nuk është bërë i ditur.
Një ngjarje e rëndë ka ndodhur dje në Drenas, ku si pasojë e një aksidenti të rëndë mes një veture dhe një motoçiklete, një person ka humbur jetën, raporton Gazeta Sinjali.
Sinjali mëson se viktima e këtij aksidenti është Aldion Mulaj, i cili ishte në motoçikletë.
Vdekja e viktimës është konstatuar nga ekipet mjekësore në QKMF-në e Drenasit.
Ndërkaq, nga ky aksident i lënduar ka mbetur edhe një person tjetër.
Lidhur me rastin, Policia ka konfirmuar se i dyshauri është arrestuar dhe intervistimit është dërguar në mbajtje.
Policia ka nisur hetimet për zbardhjen e rrethanave që kanë quar deri te ky aksident trafiku.
Sekretari amerikan i Shtetit, Marco Rubio, deklaroi se në rast se nuk është më e mundur të arrihet një përfundim përfundimtar i konfliktit në Ukrainë, Shtetet e Bashkuara duhet të ndalojnë përpjekjet për ndërmjetësim dhe të përqendrohen në çështje të tjera strategjike, raporton Gazeta Sinjali.
“Nëse nuk është e mundur të përfundojmë luftën në Ukrainë, ne duhet të vazhdojmë përpara”, tha Rubio përpara nisjes nga Parisi, ku zhvilloi një sërë takimesh diplomatike.
Duke komentuar rolin e SHBA-së në këtë konflikt, ai theksoi se angazhimi amerikan nuk duhet të zgjatet pafundësisht.
“Presidenti (Donald Trump) ka kaluar 87 ditë në nivelin më të lartë të kësaj qeverie duke bërë vazhdimisht përpjekje për ta çuar dhe përfunduar këtë luftë. Tani po arrijmë në një pikë kur duhet të vendosim dhe të përcaktojmë nëse kjo është e mundur apo jo. Kjo është arsyeja pse ne po angazhojmë të dyja palët”, tha ai mes të tjerash.
Rubio, së bashku me të dërguarin special Steve Witkoff, u takuan dje me zyrtarë të lartë evropianë dhe ukrainas, në kuadër të përpjekjeve të vazhdueshme të Uashingtonit për të ndërmjetësuar një zgjidhje për luftën mes Rusisë dhe Ukrainës.
Volodymyr Zelenskyy thotë se Ukraina ka prova se Kina e furnizon Rusinë me artileri dhe barut.
Duke folur në një konferencë shtypi sot, presidenti i Ukrainës pohoi gjithashtu se Pekini po ndihmon me prodhimin e armëve të caktuara në territorin rus, raporton skynews, transmeton Gazeta Sinjali.
“Ne besojmë se përfaqësuesit kinezë janë të angazhuar në prodhimin e disa armëve në territorin e Rusisë,” tha ai në një konferencë shtypi në Kiev.
Ai nuk specifikoi nëse kishte parasysh sistemet e artilerisë apo predha.
Kjo vjen pasi Ukraina thotë se ka kapur dy shtetas kinezë që luftonin në Ukrainën lindore në fillim të prillit.
Ai tha se forcat e tij kishin luftuar gjashtë ushtarë kinezë dhe dy prej tyre ishin zënë rob. Ai shtoi se kishte urdhëruar zyrtarët të merrnin një shpjegim nga Pekini.
Sot bëhen 26 vjet nga beteja e lavdishme te Shkëmbi i Gradinës, ku luftëtarët e Ushtrisë Çlirimtare të Kosovës luftuan për të ndalur avancimin e forcave serbe drejt rrafshnaltës së Berishës – një zonë me rëndësi të jashtëzakonshme strategjike, ku ndodheshin Shtabi i Përgjithshëm i UÇK-së, Spitali Ushtarak, Qeveria e Përkohshme e Kosovës, Agjencia e Lajmeve KosovaPress, Radio Kosova e Lirë dhe rreth 100 mijë civilë të strehuar në grykat e maleve.
Më 18 prill të vitit 1999, në këtë betejë ranë heroikisht pesë dëshmorë:
Islam Kastrati nga Kishnareka,
Halim Bajraktari nga Drenasi,
Mentor Morina nga Bushati,
Ramadan Bytyqi nga Gjergjica
dhe Mentor Gashi nga Llapushniku.
Luftimet e prillit të atij viti në këtë zonë u shndërruan në një prej përballjeve më të rëndësishme të luftës çlirimtare – jo vetëm për rrjedhën ushtarake të saj, por edhe për shpëtimin e mijëra civilëve që kishin gjetur strehim në ato male.
Luftëtarët që qëndruan në këtë betejë ishin muri i gjallë që ndaloi me çdo kusht depërtimin e ushtrisë dhe policisë serbe drejt popullatës civile – një sakrificë që mbetet përjetësisht në kujtesën kombëtare.
PËRGATITI: KRENARE MULLIQI
Vlera e depozitave të qytetarëve në bankat komerciale të Kosovës arrin në gati 7 miliardë euro.
Megjithatë në dy muaj e parë të këtij viti pati rënie të depozitave për më shumë se 37 milionë euro krahasuar me muajin dhjetor të vitit të kaluar.
Por sipas të dhënave të Bankës Qendrore të Kosovës në muajin janar dhe shkurt u shënua rritje për 82 milionë euro nga ekonomitë familjare e që përbëjnë edhe pjesën më të madhe të depozitimit me afro 4.6 miliardë euro.
Ekspertët e ekonomisë shifrën e vlerësojnë të lartë ndonëse vërehet hezitimi i qytetarëve për të investuar në Kosovë.
Sipas Skender Krasniqit, një treg më i avancuar i aksioneve dhe investimeve do t’u ofronte qytetarëve mundësi më të mëdha për përfitim financiar.
Por ish-kryetari i odës ekonomike, Safet Gërxhaliut, thotë se për të shmangur varësinë e tepruar nga depozitat bankare kosova duhet të krijojë mekanizma që stimulojnë investimet e qytetarëve në fusha më produktive.
Ndërsa sipas BQK-së norma mesatare e depozitave është 3.0%.