ATV

Author: G.O.

  • Gjendet pa shenja jete një zyrtar i Policisë së Kosovës në Morinë

    Gjendet pa shenja jete një zyrtar i Policisë së Kosovës në Morinë

    Një efektiv i Policisë së Kosovës është gjetur pa shenja jete mëngjesin e kësaj të marte në varrezat e fshatit Morinë, në Kukës.

    Sipas informacionit paraprak të Policisë së Shtetit, rreth orës 08:25 është konstatuar i pajetë shtetasi 35 vjeç, banues në Prizren, punonjës policie në Njësinë e Reagimit të Shpejtë në Prizren.

    Nga veprimet e para hetimore dyshohet se 35-vjeçari ka humbur jetën si pasojë e një vetëvrasjeje me armë zjarri pistoletë. Arma është sekuestruar në cilësinë e provës materiale.

    Një grup i posaçëm hetimor, nën drejtimin e Prokurorisë, po vijon veprimet për zbardhjen e plotë të rrethanave të ngjarjes.

    Policia e Shtetit bëri të ditur se po bashkëpunon me Policinë e Kosovës për të verifikuar nëse arma e sekuestruar është arma e shërbimit të efektivit, si dhe për sigurimin e të gjitha të dhënave që do t’i shërbejnë dokumentimit të plotë ligjor të rastit. /Abcnews.al/

  • Rubio thotë se Irani ‘nuk është serioz në lidhje me bisedimet’ – dhe paralajmëron për kërcënim për ekonominë globale

    Rubio thotë se Irani ‘nuk është serioz në lidhje me bisedimet’ – dhe paralajmëron për kërcënim për ekonominë globale

    Marco Rubio, Sekretari i Shtetit i SHBA-së, ka thënë se Irani “nuk është serioz në lidhje me bisedimet” dhe paralajmëroi për një “precedent të rrezikshëm” që po krijohet në Ngushticën e Hormuzit.

    Duke folur në një takim të ministrave të jashtëm të Shoqatës së Kombeve të Azisë Juglindore (ASEAN) në Filipine, Rubio sugjeroi që SHBA-të ishin të hapura për negociata dhe akuzoi Teheranin se kërcënonte “lirinë e lundrimit” me veprimet e tyre në rrugën ujore kyçe.

    “Problemi që po kemi tani është se ata nuk janë seriozë në lidhje me bisedimet. Nëse jeni seriozë, edhe ne jemi seriozë. Nëse nuk jeni, ne do të bëjmë atë që është e nevojshme për të mbrojtur interesat tona dhe interesat e aleatëve tanë”, tha ai.

    Komentet e tij vijnë ndërsa ushtria amerikane përfundoi një natë të 11-të radhazi sulmesh ndaj Iranit të martën, me raportime për shpërthime të shumta në vend, transmeton Telegrafi.

    Rubio këmbënguli se, sipas asnjë “mekanizmi ligjor ekzistues”, Irani nuk kishte të drejtë të kontrollonte trafikun përmes Ngushticës së Hormuzit dhe paralajmëroi se kjo mund të kishte pasoja më të gjera në të gjithë botën.

    Sulmet në ngushticë kanë qenë një dukuri e rregullt pas rifillimit të armiqësive në rajon.

    Që nga fillimi i konfliktit në shkurt, Irani ka pretenduar kontrollin mbi ngushticën, pavarësisht se rruga i nënshtrohet lirisë së lundrimit sipas ligjit ndërkombëtar.

    “Nëse krijojmë një precedent në Lindjen e Mesme ku një shtet komb mund të vendosë se do të kontrollojë një rrugë ujore ndërkombëtare… ne kemi krijuar një precedent shumë të rrezikshëm që do të përsëritet në pjesë të tjera të botës. Pra, ajo që është në rrezik këtu nuk është thjesht Ngushtica e Hormuzit, por një parim shumë themelor në lidhje me lirinë e lundrimit. Nëse kjo kërcënohet, atëherë mendoj se ekonomia globale është e kërcënuar”, shtoi ai. /Telegrafi/

  • Spitali i Përgjithshëm në Pejë kërkon urgjentisht largimin e mbeturinave brenda hapësirave

    Spitali i Përgjithshëm në Pejë kërkon urgjentisht largimin e mbeturinave brenda hapësirave

    Spitali i Përgjithshëm në Pejë ka bërë një apel publik drejtuar institucioneve përgjegjëse, duke kërkuar ndërhyrje urgjente për zgjidhjen e problemit të largimit të mbeturinave, situatë që, sipas këtij institucioni, po rrezikon funksionimin normal të spitalit dhe sigurinë e pacientëve, stafit shëndetësor dhe qytetarëve.

    Nga spitali bëhet e ditur se, si institucion që ofron shërbime shëndetësore pa ndërprerje 24 orë në ditë, çdo ditë prodhohen sasi të konsiderueshme mbeturinash, të cilat nuk mund të ruhen për periudha të gjata brenda hapësirave të spitalit.

    Sipas njoftimit, grumbullimi i mbeturinave krijon rrezik për përkeqësimin e kushteve higjieno-sanitare dhe rrit mundësinë e përhapjes së infeksioneve, duke cenuar shëndetin e pacientëve, stafit dhe qytetarëve që marrin shërbime në këtë institucion.

    Spitali thekson se e kupton situatën e krijuar lidhur me deponinë, por u bën thirrje institucioneve kompetente në nivel lokal dhe qendror që të ndërmarrin masa urgjente për të siguruar largimin e rregullt të mbeturinave.

    “Nuk kërkojmë trajtim të privilegjuar, por trajtim prioritar për një institucion që ofron shërbime jetike dhe që, për shkak të natyrës së veprimtarisë së tij, nuk mund të funksionojë në kushte ku largimi i mbeturinave ndërpritet”, thuhet në reagimin e spitalit.

    Po ashtu, Spitali i Përgjithshëm në Pejë thekson se i ka përmbushur me rregull të gjitha obligimet kontraktuale dhe financiare ndaj kompanisë që ofron shërbimin e grumbullimit dhe largimit të mbeturinave, duke nënvizuar se situata e krijuar nuk është pasojë e veprimeve apo mosveprimeve të institucionit.

    Në fund, spitali u bën thirrje institucioneve përgjegjëse që ta trajtojnë këtë çështje me urgjencën e nevojshme, në funksion të mbrojtjes së shëndetit publik dhe garantimit të vazhdimësisë së shërbimeve shëndetësore.

  • Komuna e Suharekës formon komisionet për vlerësimin e dëmeve të shkaktuara nga stuhia dhe shiu

    Komuna e Suharekës formon komisionet për vlerësimin e dëmeve të shkaktuara nga stuhia dhe shiu

    Komuna e Suharekës ka formuar komisionet për vlerësimin dhe evidentimin e dëmeve që janë shkaktuar nga stuhia dhe shiu në bujqësi, institucione publike, arsimore, biznese e hapësira publike.

    Nga Komuna e Suharekës thanë se këto komisione në kontakt me kryetarët e fshatrave, do të dalin në teren dhe do ta bëjnë vlerësimin e gjendjes dhe dëmeve të shkaktuara.

    “Sipas njoftimit nga Instituti Hidrometeorologjik i Kosovës, stuhi dhe të reshura mund të ketë edhe gjatë ditë së sotme, andaj veproni me qetësi dhe në harmoni me rregullat e publikuara nga institucionet përkatëse”, ka paralajmëruar kryetari i kësaj Komunë, Bali Muharremaj.

    Në Suharekë, stuhia e djeshme ka dëmtuar shkollën fillore në Gjinoc, ka dëmtuar vetura të parkuara e shumë toka bujqësore. Fatmirësisht nuk ka pasur persona të lënduar.

  • Kosova i kërkon BE-së të bëjë më shumë për ta dënuar deklaratën e ministres serbe për “spastrim etnik”

    Kosova i kërkon BE-së të bëjë më shumë për ta dënuar deklaratën e ministres serbe për “spastrim etnik”

    Qeveria e Kosovës i ka kërkuar Bashkimit Evropian (BE) të bëjë më shumë për ta dënuar deklaratën e ministres serbe Snezhana Paunoviq për “spastrim etnik” në Kosovë, duke thënë se përgjigja fillestare e bllokut evropian ishte e “kufizuar dhe e vonuar”.

    Paunoviq – ministres serbe për Administratë Publike dhe Vetëqeverisje Lokale – tha fundjavën e kaluar për televizionin serb Kurir se, po të ishte në vend të ish-lideri serb Sllobodan Millosheviqit në vitin 1998, “do ta kishte spastruar etnikisht Kosovën”.

    Kjo deklaratë nxiti reagime të shumta dhe Kosova tashmë ka ngritur padi ndaj saj dhe ia ka ndaluar përherë hyrjen në vend.

    Të shtunën, Qeveria e Kosovës njoftoi se zëvendëskryeministri i parë dhe ministri Jashtëm, Glauk Konjufca, i dërgoi letër përfaqësueses së lartë të BE-së, Kaja Kallas, për të kërkuar reagim më të fuqishëm nga klubi evropian pjesë e të cilit synojnë të bëhen si Kosova, ashtu edhe Serbia.

    Në ketë letër, e cila mban datën 16 korrik, Qeveria e Kosovës kërkon nga BE-ja “që t’i dënojë qartë dhe publikisht deklaratat e ministres Paunoviq, t’ua bëjë të qartë autoriteteve serbe se një retorikë e tillë është e papranueshme dhe në kundërshtim me vlerat evropiane, si dhe ta trajtojë këtë çështje seriozisht në kuadër të dialogut politik dhe procesit të anëtarësimit të Serbisë në BE”.

    Deklarata e Paunoviqit është dënuar tashmë nga BE-ja dhe dënimin e përsëriti të enjten komisionarja për Zgjerim, Marta Kos, duke thënë se ishte e habitur se si ajo vazhdon të mbetet ministre në Qeverinë serbe.

    “Nuk do ta përsëris as atë që ajo tha. Ishte vërtet tronditëse të dëgjohej një deklaratë e tillë. Nuk mund ta imagjinoj që një ministre, pas një deklarate të tillë publike, të mund të vazhdojë të ushtrojë detyrën e saj”, tha Kos të enjten.

    Ndërkohë, në Serbi, presidenti i vendit, Aleksandar Vuçiq, th se deklarata e Paunoviqit “nuk pasqyron vullnetin tim, e as të Qeverisë së Serbisë”, duke shtuar se “politika e shtetit serb është dialogu, e jo kurrë spastrimi etnik”.

    Paunoviq – nënkryetare e Partisë Socialiste të Serbisë, partisë së dikurshme të Millosheviqit – nuk i tërhoqi fjalët e saj, por tha më 16 korrik se ato “janë nxjerrë jashtë kontekstit” dhe i kërkoi falje Vuçiqit dhe Qeverisë së Serbisë për reagimet që ka shkaktuar.

    Në anën tjetër, deputeti i vetëm shqiptar në Kuvendin e Serbisë, Shaip Kamberi, njoftoi të enjten se 53 deputetë opozitarë ia kanë dorëzuar një kërkesë kryeministrit serb, Gjuro Macut, për shkarkimin e Paunoviqit.

    Ata i kërkuan kryeministrit Macut që, “pa asnjë vonesë”, t’i propozojë Kuvendit të Serbisë shkarkimin e saj

    Nuk është e qartë nëse Macut do ta bëjë një propozim të tillë në Kuvendin serb me 250 vende.

    Vëzhgues nga Kosova dhe Serbia thanë për Radion Evropa e Lirë se deklarata e Paunoviqit është pjesë e një modeli politik të Serbisë karshi Kosovës, duke kërkuar që bashkësia ndërkombëtare të mos mjaftohet vetëm me reagime, por të ndërmarrë veprime konkrete ndaj Serbisë.

    Deklaratat e saj prekin plagë të vjetra në Kosovë, pasi qindra mijëra civilë shqiptarë u dëbuan nga Kosova gjatë luftës së viteve 1998-1999.

    Ajo luftë ua mori jetën mbi 13.000 civilëve, kryesisht shqiptarë, ndërsa mijëra të tjerë mbetën të zhdukur.

    Mbi 1.500 persona, shumica shqiptarë, vazhdojnë të jenë ende të zhdukur.

    Tribunali Penal Ndërkombëtar për ish-Jugosllavinë në Hagë i cilësoi drejtuesit e atëhershëm të RFJ-së si pjesëmarrës kyç në një “ndërmarrje të përbashkët kriminale”, që synonte dëbimin me forcë të qindra mijëra civilëve shqiptarë nga Kosova në vitin 1999.

    Sipas aktgjykimeve, qëllimi ishte “ndryshimi i balancës etnike për të ruajtur kontrollin serb mbi Kosovën”.

    I akuzuari kryesor, Sllobodan Millosheviq, vdiq në paraburgim para përfundimit të gjykimit, ndërsa ish-presidenti i Serbisë, Millan Millutinoviq, u shpall i pafajshëm./REL

  • I gjenden 42 qese me kokainë, arrestohet i dyshuari në Isniq të Deçanit

    I gjenden 42 qese me kokainë, arrestohet i dyshuari në Isniq të Deçanit

    Policia e Kosovës ka bërë të ditur një personi në Isniq të Deçanit i janë gjetur 42 substanca me kokainë.

    Rasti ka ndodhur të premten.

    “Fsh.Isniq, Deçan 17.07.2026-00:05. Është arrestuar i dyshuari mashkull kosovar, pasi që gjatë kontrollit tek i njëjti janë gjetur dhe konfiskuar 42 qese me substance narkotike të llojit kokainë me peshë prej 23.3 gram, 375 euro dhe një telefon”, thuhet në raport.

    Pas intervistimit, me vendim të prokurorit i dyshuari dërgohet në mbajtje.

  • Jeni djegur nga dielli? Këto janë hapat që duhet t’i ndërmerrni menjëherë

    Jeni djegur nga dielli? Këto janë hapat që duhet t’i ndërmerrni menjëherë

    Nga ftohja e lëkurës dhe hidratimi, deri te aloe vera dhe kujdesi me flluskat – dermatologët tregojnë çfarë ndihmon vërtet dhe çfarë duhet shmangu

    Edhe pse dihet mirë se kremi me faktor mbrojtës SPF është mbrojtja më e mirë kundër rrezatimit të dëmshëm UV, i cili në rastet më të rënda mund ta rrisë rrezikun e kancerit të lëkurës, ndodh që edhe personat më të kujdesshëm të harrojnë të mbrojnë pjesë të caktuara të trupit.

    Çfarë është djegia nga dielli?

    Djegia nga dielli është një reaksion inflamator në shtresat e jashtme të lëkurës, i shkaktuar nga rrezet UV. Ajo shfaqet me skuqje, zhveshje të lëkurës, ënjtje dhe flluska.

    Edhe pse djegia mund të shërohet, në disa qeliza mund të ndodhin mutacione të përhershme, të cilat potencialisht mund t’i bëjnë ato kancerogjene.

    “Dielli lëshon rrezatim ultravjollcë, i cili arrin në lëkurë dhe i dëmton qelizat e saj. Kjo ndodh sepse rrezatimi shkakton ndryshime në ADN, duke çuar në skuqjen karakteristike të djegies nga dielli”, shpjegon dermatologia e certifikuar, dr. Ranella Hirsch.

    Melanina është pigmenti që e mbron lëkurën nga dëmtimi duke e errësuar atë. Disa njerëz kanë më shumë melaninë, prandaj lëkura e tyre nxihet, ndërsa të tjerët digjen më lehtë nga dielli.

    “Megjithatë, pavarësisht llojit të lëkurës, është e rëndësishme të theksohet se si nxirja, ashtu edhe djegia nga dielli janë shenja të dëmtimit të qelizave të lëkurës”, thekson Hirsch.

    Fatmirësisht, ka disa hapa që mund të ndërmerrni për ta lehtësuar djegien dhe për ta përshpejtuar shërimin, transmeton Telegrafi.

    Largohuni menjëherë nga dielli

    Sapo ta vini re djegien, kaloni në hije dhe shmangeni diellin derisa lëkura të shërohet plotësisht.

    Dr. Hirsch këshillon të mos ekspozoheni në diell për sa kohë lëkura është e kuqe, rozë ose po zhvishet.

    “Kur lëkura tashmë po përballet me një djegie, ajo është shumë më e ndjeshme ndaj dëmtimeve të mëtejshme dhe potencialisht më serioze”, paralajmëron dermatologia dr. Michelle Henry.

    Ftoheni lëkurën

    Lëkura duhet ftohur sa më shpejt. Sipas dr. Henry, i ftohti ndihmon në zbutjen e inflamacionit, dhimbjes, ndjesisë së djegies dhe kruajtjes që shoqërojnë djegien nga dielli.

    Megjithatë, mos vendosni akull ose kompresë shumë të ftohtë drejtpërdrejt mbi lëkurë.

    “Mbështilleni kompresën e ftohtë me një peshqir dhe mbajeni për 15 deri në 20 minuta, në mënyrë që të shmangni dëmtimin nga të ftohtit”, thotë ajo, duke shtuar se duhet të prisni një ose dy orë para se ta vendosni sërish.

    Rekomandohet edhe një dush i freskët, pasi mund të ndihmojë në largimin e mbetjeve të klorit ose kripës, të cilat mund ta irritojnë më tej lëkurën.

    Megjithatë, shmangni dushin e zgjatur, sepse mund ta thajë lëkurën, si dhe sapunët e fortë dhe pilingun.

    Përgatitni një banjë me tërshërë ose qumësht

    Një banjë qetësuese mund të ndihmojë në lehtësimin e simptomave. Një nga opsionet është banja me tërshërë të bluar imët.

    “Ajo ka veti antiinflamatore dhe mund të ndihmojë në kontrollimin e inflamacionit dhe kruajtjes që lidhen me djegiet. Kjo falë përbërjeve të quajtura avenantramide, të cilat e pengojnë inflamacionin”, shpjegon dr. Henry.

    Tërshëra koloidale mund të jetë veçanërisht e dobishme në lehtësimin e të ashtuquajturës “kruajtje e ferrit” – një kruajtje jashtëzakonisht e dhimbshme dhe e pandalshme, e cila ndonjëherë mund të shfaqet disa ditë pas djegies.

    Një përparësi tjetër është se kjo banjë e hidraton lëkurën dhe e ndihmon rikuperimin e saj.

    Nëse nuk keni tërshërë, dr. Hirsch rekomandon një banjë me sasi të barabarta qumështi dhe uji të ftohtë.

    “Proteinat e qumështit dhe acidi laktik natyral kanë efekt shumë qetësues”, shpjegon ajo.

    Hidratohuni nga brenda

    Lëkura e djegur ka nevojë për shumë më tepër ujë gjatë rikuperimit.

    “Kur lëkura po përballet me dëmtimin e shkaktuar nga rrezet UV, asaj i nevojitet hidratim shtesë për ta zëvendësuar lëngun e humbur gjatë qëndrimit në diell”, shpjegon dr. Henry.

    Sapo ta kuptoni se jeni djegur, rriteni konsumimin e ujit.

    Dr. Hirsch thekson se hidratimin mund ta shtoni edhe me pije izotonike ose me fruta dhe perime të pasura me ujë, si shalqiri dhe kastraveci.

    Hidratoni lëkurën edhe nga jashtë

    Pas dushit, aplikoni një krem të butë hidratues për ta ruajtur lagështinë në lëkurë.

    Thajeni lëkurën me kujdes, pa e fërkuar, dhe vendoseni kremin ndërsa ajo është ende pak e lagësht.

    Kjo ndihmon në zbutjen e tharjes që shpesh shoqëron djegiet nga dielli.

    “Vazhdoni ta hidratoni lëkurën edhe gjatë fazës së zhveshjes”, këshillon dr. Henry.

    Vishni rroba të gjera

    Mund të duket e vetëkuptueshme, por shmangni veshjet e ngushta dhe zgjidhni rroba të gjera.

    Preferoni materiale të buta dhe ajrosëse, të cilat mbulojnë sa më shumë sipërfaqe të lëkurës.

    Aplikoni aloe vera

    Djegiet nga dielli dhe aloe vera shpesh shkojnë së bashku.

    “Efekti qetësues i xhelit të kësaj bime mund të ndihmojë në shërimin e djegieve të shkallës së parë dhe të dytë dhe ta përshpejtojë rikuperimin”, shpjegon dr. Henry.

    Përdorni aloe vera të pastër.

    “Shmangni produktet që përmbajnë alkool, sepse ai mund t’i neutralizojë vetitë hidratuese dhe qetësuese të bimës”, thotë ajo.

    Nëse keni mundësi të përdorni xhelin nga një bimë e freskët, aq më mirë.

    Kërkoni produkte që përmbajnë peptide

    Peptidet, të njohura për përdorimin në produktet kundër plakjes, kanë gjithashtu veti që ndihmojnë në shërimin e plagëve.

    “Peptidet janë zinxhirë të shkurtër aminoacidesh, të cilët shërbejnë si blloqe ndërtuese të qelizave dhe ndihmojnë në riparimin e qelizave të dëmtuara. Dihet se mund të depërtojnë në dermë dhe ta nxisin prodhimin e kolagjenit”, shpjegon dr. Rabach, e cila u rekomandon pacientëve produkte me peptide pas ekspozimit të tepërt në diell.

    Mos e prekni lëkurën që po zhvishet dhe mos i çani flluskat

    Lëreni lëkurën të shërohet vetë.

    “Kur djegia arrin fazën e zhveshjes, lejojeni lëkurën të bjerë natyrshëm”, thotë dr. Henry.

    “Nëse keni flluska, mos i prekni dhe mos i çani, sepse kjo e rrit rrezikun e infeksionit.”

    Nëse flluskat çahen vetë, dr. Henry rekomandon që zona të pastrohet me sapun të butë antibakterial dhe ujë të freskët, pastaj të vendoset një sasi e vogël vazeline dhe të mbulohet me fashë sterile që nuk ngjitet në lëkurë.

    Parandaloni djegiet e përsëritura

    Tregohuni të kujdesshëm para se të ekspozoheni sërish në diell.

    Dr. Henry thekson se masa më e rëndësishme parandaluese është veshja e rrobave që mbrojnë nga dielli, duke përfshirë mëngët e gjata, pantallonat dhe kapelën me strehë të gjerë.

    Natyrisht, kjo duhet të shoqërohet me përdorimin e një kremi mbrojtës me spektër të gjerë dhe SPF 30 ose më të lartë.

    Mos harroni ta riaplikoni kremin çdo dy orë, sidomos pas notit ose djersitjes. /Telegrafi/

  • Aksion antidrogë në Podujevë, arrestohet një i dyshuar, konfiskohet marihuanë

    Aksion antidrogë në Podujevë, arrestohet një i dyshuar, konfiskohet marihuanë

    Një person është arrestuar në Podujevë nën dyshimin për përfshirje në veprën penale “blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.

    Sipas njoftimit të Policisë së Kosovës, aksioni është zhvilluar nga hetuesit e Drejtorisë për Hetimin e Trafikimit me Narkotikë – Njësia në Prishtinë, në kuadër të Planit Operativ “Vera 2026”, pas pranimit të informatave se një person dyshohej se merrej me shitblerje të lëndëve narkotike.

    I dyshuari është lokalizuar në një lokal në qytetin e Podujevës, ku gjatë kontrollit policia ka gjetur dhe konfiskuar gjashtë paketime me lëndë narkotike, që dyshohet të jetë marihuanë, si dhe dëshmi të tjera që lidhen me rastin.

    Personi i arrestuar, me inicialet F.S., mashkull kosovar, është intervistuar nga hetuesit, ndërsa ndaj tij është iniciuar rasti për veprën penale “blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.

    Me vendim të prokurorit kujdestar, i dyshuari është dërguar në mbajtje për 48 orë, ndërsa hetimet lidhur me rastin janë duke vazhduar.

  • Hoxhaj: Kosova po izolohet ndërsa Serbia po thellon bashkëpunimin strategjik me ShBA-në

    Hoxhaj: Kosova po izolohet ndërsa Serbia po thellon bashkëpunimin strategjik me ShBA-në

    Ish-ministri i Jashtëm i Kosovës, Enver Hoxhaj, ka deklaruar se Kosova po përballet me izolim ndërkombëtar, duke kritikuar politikat e Qeverisë Kurti dhe duke kërkuar rikthimin e besimit me Shtetet e Bashkuara të Amerikës.

    Hoxhaj ka thënë se dështimet e Qeverisë, sipas tij, janë shndërruar në një model qeverisjeje, ndërsa aleatët strategjikë po thellojnë bashkëpunimin me Serbinë.

    “Dështimet që po sjellin pasoja serioze për Kosovën nuk janë më lajme të reja. Ato janë bërë një model qeverisjeje. Ndërsa vendi mbahet peng nga politika konfrontuese e Qeverisë Kurti, aleatët tanë strategjikë po thellojnë bashkëpunimin me Serbinë”, ka shkruar Hoxhaj.

    Ai ka përmendur Dialogun Strategjik me Shtetet e Bashkuara, duke thënë se Kosova e ka humbur atë, ndërsa Serbia është duke e nisur një të tillë.

    “Kosova ka humbur Dialogun Strategjik me Shtetet e Bashkuara, ndërsa Serbia po e nis të vetin. Ky është një hap prapa me pasoja serioze për interesin tonë shtetëror”, ka deklaruar Hoxhaj.

    Sipas tij, pasojat e këtyre zhvillimeve nuk do të kufizohen vetëm në diplomaci, por do të ndikojnë edhe në siguri, ekonomi, investime të huaja, energji dhe procesin e integrimit euroatlantik.

    “Pasojat e këtyre dështimeve nuk do të mbeten vetëm në diplomaci. Ato do të reflektohen në sigurinë tonë, në zhvillimin ekonomik, në investimet e huaja, në sektorin e energjisë dhe në aftësinë e Kosovës për të avancuar drejt integrimit euroatlantik”, ka shkruar ai.

    Hoxhaj ka theksuar se Kosova duhet të rikthejë marrëdhëniet me aleatët perëndimorë dhe ta ketë prioritet rivendosjen e Dialogut Strategjik me SHBA-në.

    “Kosova nuk mund ta lejojë luksin e izolimit. Ne jemi shtet që kemi ndërtuar lirinë dhe pavarësinë në partneritet me Shtetet e Bashkuara dhe me aleatët tanë perëndimorë. Prandaj, rikthimi i besimit me SHBA-në dhe rivendosja e Dialogut Strategjik duhet të jetë prioritet kombëtar”, ka përfunduar Hoxhaj.

  • IKShPK-ja del me rekomandime për mbrojtje nga vapa: Pini ujë shpesh

    IKShPK-ja del me rekomandime për mbrojtje nga vapa: Pini ujë shpesh

    Instituti Kombëtar i Shëndetit Publik ka dalë me rekomandime për mbrojtje nga vapa për kategoritë e ndjeshme, si fëmijët, të moshuarit dhe personat me sëmundje kronike.

    Pirja e ujit, qëndrimi nën hije e veshja e rrobave të lehta janë disa prej këshillave.

    Gjithashtu kërkohet që të mos lihen fëmijët brenda makinave.

    “Temperaturat e ngritura mund të paraqesin rrezik për shëndetin, veçanërisht për fëmijët, të moshuarit dhe personat me sëmundje kronike.

    Instituti Kombëtar i Shëndetësisë Publike të Kosovës ju fton të ndiqni rekomandimet për mbrojtje nga efektet e vapës dhe të kujdeseni për veten dhe të afërmit tuaj”, shkruan IKSHPK.