Author: G.O.

Korporata Energjetike e Kosovës (KEK) ka bërë të ditur se njësia A3 e Termocentralit Kosova A ka dalë nga sistemi në mënyrë të paplanifikuar rreth orës 00:30 të së enjtes.

Sipas njoftimit zyrtar, kjo ndërprerje erdhi si pasojë e luhatjeve në sistemin elektrik, të cilat aktivizuan sistemin mbrojtës të gjeneratorit dhe shkaktuan ndaljen automatike të zgjueses.

Po ashtu, KEK ka njoftuar se më 17 qershor, në njësinë A5 është identifikuar një humbje e ujit në kaldajë. Ekipet teknike e kanë monitoruar situatën dhe e kanë mbajtur njësinë në funksion deri në orën 00:02 të datës 18 qershor, kur është ndalur për të parandaluar ndonjë avari më serioze.

Ndërkohë, njësia A4 mbetet jashtë funksionit për shkak të remontit, i cili ka nisur më 16 maj.

KEK ka theksuar angazhimin për menaxhimin teknik të situatës dhe ka nënvizuar rëndësinë e standardeve të larta të përgjegjësisë dhe llogaridhënies.

“Kjo është thelbësore për garantimin e stabilitetit të sistemit prodhues dhe të besueshmërisë ndaj publikut”, thuhet në komunikatë.

Presidenti ukrainas, Volodymyr Zelensky, tha se sulmet raketore ruse ndaj një ndërtese banimi në Kiev të martën ishin shenjë se duhet të ushtrohet më shumë presion ndaj Moskës, në mënyrë që ajo të pajtohet për një armëpushim.

Rusia së fundmi ka intensifikuar sulmet në luftën kundër Ukrainës, që ka nisur tre vjet më parë.

Sulmet me dronë dhe raketa në Kiev të martën – më vdekjeprurëset ndaj kryeqytetit ukrainas gjatë këtij viti – lanë të vrarë 28 persona dhe plagosën 142 të tjerë.

Zelensky, së bashku me ministrin e tij të Brendshëm, Ihor Klymenko, vizituan vendin ku gjendet ndërtesa e banimit e sulmuar. Ata vendosën kurora me lule dhe nderuan kujtimin e 23 personave që humbën jetën nga sulmi ndaj kësaj ndërtese, raporton REL.

“Ky sulm është përkujtues për botën se Rusia refuzon armëpushimin dhe zgjedh vrasjet”, shkroi Zelensky në Telegram.

Ai falënderoi partnerët e Ukrainës, të cilët, sipas Zelenskyt, janë të gatshëm të rrisin presionin ndaj Rusisë në mënyrë që Moska “të ndiejë koston e vërtetë të luftës”.

Gjatë sulmeve të së martës në Kiev dhe në pjesë të tjera të Ukrainës, sipas zyrtarëve në Kiev, Rusia përdori mbi 440 dronë dhe 32 raketa.

Javët e fundit, Rusia ka intensifikuar sulmet me armë me rreze të gjatë veprimi, duke goditur zona të banuara. Megjithatë, një ditë më parë, presidenti rus, Vladimir Putin, mohoi se shteti i tij sulmon civilët, duke thënë se sulmet “janë kundër industrisë ushtarake, e jo ndaj ndërtesave të banimit”.

Ai tha se është i hapur për të negociuar me Zelenskyn, por përsëriti qëndrimin e tij se udhëheqësi ukrainas nuk ka legjitimitet, pasi i ka përfunduar mandati pesëvjeçar si president – pretendim që vazhdimisht është hedhur poshtë nga Kievi.

Me rastin e Ditës Ndërkombëtare për Eliminimin e Dhunës Seksuale në Konflikt, Qendra Kosovare për Rehabilitimin e të Mbijetuarve të Torturës (QKRMT) organizoi një panel diskutimi, ku u theksua domosdoshmëria e drejtësisë për të mbijetuarit dhe ndaljes së përdorimit të dhunës seksuale si armë lufte.

Drejtoresha ekzekutive e QKRMT-së, Feride Rushiti, tha se dhuna seksuale vazhdon të jetë barrë e rëndë për mijëra gra dhe burra që e kanë përjetuar gjatë luftës në Kosovë.

“Për barrën që ajo vazhdon t’i mbajë të heshtur mijëra gra edhe burra që kanë përjetuar dhunën seksuale gjatë luftës. Fatkeqësisht, edhe në vitin 2025, kur po e shënojmë këtë ditë në këtë situatë të rëndë globale, ku krizat, luftërat dhe konfliktet po zhvillohen, dhuna seksuale si armë e luftës po gjen zbatim në këto vende dhe mijëra gra dhe vajza, por fatkeqësisht edhe burra, po bëhen pre e fushëbetejës duke qenë të pafajshëm dhe duke bartur pasoja afatgjata jo vetëm për veten por edhe për shoqërinë dhe komunitetin në tërësi,” theksoi ajo.

Rushiti shtoi se përmes fushatës “Trauma nuk ka afat,” synohet që të mos heshtet më, të dëgjohen historitë e të mbijetuarve dhe të ndërmerren hapa konkretë.

Në këtë ngjarje u shfaq edhe një video-mesazh nga një e mbijetuar e dhunës seksuale gjatë luftës në Kosovë, autori i së cilës është dënuar me 15 vjet burg gjatë kësaj jave.

Ajo tha se gjatë 26 vjetësh ka ëndërruar për drejtësinë, për të cilën shtoi se ka menduar se kurrë nuk do të vijë.

“Si e mbijetuar e dhunës gjatë luftës kam jetuar prej 26 vjetësh në një plagë që nuk shihet, por që më gërryente çdo ditë nga brenda. Gjatë gjithë këtyre viteve kam ëndërruar për drejtësinë dhe kam menduar se kurrë nuk do të vijë kjo ditë, por kjo ditë erdhi. Nuk kam fjalë me e përshkruar këtë ndjesi, sot drejtësia triumfoi, sot unë po marr frymë lirshëm”, tha ajo.

Ambasadori britanik në Kosovë, Jonathan Hargreaves, u shpreh se Kosova është një udhërrëfyes global në luftën kundër dhunës seksuale në konflikt.

“Teksa të gjithë së bashku shënojmë Ditën Ndërkombëtare për Eliminimin e Dhunës Seksuale në Konflikt, një ditë në të cilën Kosova dhe të gjithë ju keni qenë udhërrëfyes globalë dhe simbole të asaj që është e mundur dhe e domosdoshme. Fatkeqësisht, ende ndodh që në shumë konflikte në mbarë botën, si në të kaluarën ashtu edhe sot, dhuna seksuale të përdoret si armë dhe si një strategji e qëllimshme lufte. Sot është një mundësi për ta pranuar këtë dhe për ta luftuar atë, por gjithashtu është një ditë për të festuar qëndresën dhe për të bërë thirrje për drejtësi. Të mbijetuarit nuk duhet të heshten apo të shpërfillen kurrë më, por duhet gjithmonë të njihen, të mbështeten dhe të fuqizohen. Ju e njihni dhimbjen, por po ashtu e njihni forcën”, tha ai.

Ramadan Nishori, një tjetër i mbijetuar i dhunës seksuale, tha se për shumë kohë kishte heshtur nga frika e paragjykimit, por tani ka zgjedhur të flasë.

“Edhe unë heshta shumë gjatë, duke menduar që heshtja na mbron nga paragjykimet, por ajo veç më shkatërronte nga brenda. Një ditë vendosa që të mos hesht më, të mos fshihem më sepse ajo që më ndodhi nuk e përcakton burrërinë time. Zëri im nuk është turp, turpi nuk është i yni, turpi është i atyre,” tha ai.

Numri i personave të lënduar në valën më të fundit të sulmeve raketore iraniane mbi Izraelin ka arritur në 89, njofton shërbimi emergjent izraelit Magen David Adom (MDA).

Goditjet me raketa në zonat përreth Tel Avivit dhe në jug të vendit kanë shkaktuar tre të lënduar rëndë, ndërsa dy persona të tjerë ndodhen në gjendje të moderuar, raporton BBC.

Mjekët bëjnë me dije se shumica e të plagosurve kanë pësuar dëmtime nga shpërthimet dhe copëzat e raketave.

Deputetja e Lëvizjes Vetëvendosje, Albulena Haxhiu, ka deklaruar se qëndrimi i subjektit të saj lidhur me konstituimin e Kuvendit të Kosovës është i qartë dhe i pandryshueshëm, duke kërkuar nga partitë opozitare të tregojnë vullnet për të ecur përpara në këtë proces.

Haxhiu theksoi se Lëvizja Vetëvendosje e ka ushtruar të drejtën e saj kushtetuese duke propozuar kandidatin për kryetar të Kuvendit. Ajo ka shtuar se nëse ka mungesë të vullnetit për ta bërë këtë, atëherë vendit duhet të shkoj më zgjedhje, porse siç tha ajo, edhe për këtë duhet konsitium i Kuvendit.

“Ne gjatë kësaj kohë për as një moment nuk kemi parë një ndryshim të qëndrimeve nga ana e opozitës, kemi parë mungesë të theksuar të vullnetit për të kontribuar në konstituimin e Kuvendit. Në këto rrethana qëndrojnë ato që kemi thënë, kjo është sjellje e pa përgjegjshme politike po ashtu është shkelje e kushtetuese se Kosovës dhe aktgjykimit të Gjykatës Kushtetuese të vitit 2014… Qëndrimi i VV-së është i qartë, Kuvendi duhet të konstituohet… Nëse në nuk do ta bën propozim për kryetar të Kuvendit kjo do të quhej bllokim, do të quhej mbajtje peng e Kuvendit të Kosovës. Ne jemi në të drejtën tonë kushtetuese, VV ka propozuar emrin. Qytetarët e Kosovë me të drejt presin që të konstituohet Kuvendit, ndonëse në jemi për konstituim të Kuvendit dhe votimin e qeverisë së re, nëse ka mungesë të vullnetit për ta bërë këtë, nëse ka një refuzim të rezultatit të zgjedhjeve të 9 shkurtit, atëherë vendit duhet të shkoj më zgjedhje sepse nuk mund të vazhdojmë më gjatë kështu. Mirëpo edhe për këtë duhet konsitium i Kuvendit duhet marrëveshje për ta bërë këtë dhe pastaj shpërndarja e Kuvendit”, ka thënë Haxhiu.

Deputetja Haxhiu kritikoi gjithashtu vonesën e Gjykatës Kushtetuese për vendimin lidhur me kontestimin e ngritur nga AAK, LDK dhe PDK për çështjen e komisionit të votimit të fshehtë.

“Gjykata Kushtetues është vonuar, duhet ta themi hapur, sepse nuk ka kuptim që një gjë kaq e thjeshtë, sepse AAK- bashkë me LDK-në dhe PDK e kanë kontestuar komisionin për votimin e fshehtë. Ose gjykata e bënë të pranueshme këtë lëndë dhe e trajton nëse kryesuesi ka pasur të drejtë për komisionin për votimin e fshehtë, ne besojmë fuqishëm që ka pasur të drejtë… dhe letra e presidentes thotë që deputetë duhet të gjen mënyra për të konstituar kuvendin. Ose ta shpall të papranueshëm. Gjykata Kushtuese duhet t’i bëjë këto, duke pasur parasysh praktikat se duke mos pasur një objekt Gjykata mund të shpall të papranueshme këtë lënde sepse duhet të kishte një vendim të Kuvendit, presim vendimin por nuk është ne rregull që është vonuar kaq shumë”, ka përfunduar Haxhiu.

Sot, ka dështuar edhe përpjekja e 34 për konstitumin e Kuvendit të Kosovës.

Përveç betimit të deputetëve të zgjedhur, Kuvendi i ri ka mbetur i pa konstituar në mungesë të zgjedhjes së kryetarit të ri dhe nënkryetarëve.

Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës dhe NISMA nuk po i japin votën kandidates së propozuar për kryetare nga Lëvizja Vetëvendosje, Guxo e Alternativa.

Albulena Haxhiu në gjashtë tentime ka dështuar të kalojë provimin dhe në mungesë të kësaj Lëvizja Vetëvendosje, Guxo e Alternativa po kërkojnë komision për votim të fshehtë, për të cilën gjë Aleanca për Ardhmërinë e Kosovës ka kërkuar interpretim nga Gjykata Kushtetuese.

Kujtojmë, zgjedhjet parlamentare janë mbajtur më nëntë (9) shkurt. Mbledhja e parë për konstituimin e Kuvendit të ri është mbajtur më pesëmbëdhjetë (15) prill. Që nga ajo datë çdo dyzetetetë (48) orë po mbahen vazhdime të seancës konstituive pa arritur ndonjë rezultat konkret.