Author: G.O.

Pesë shoferë janë ndëshkuar nga Policia në Ferizaj pasi kanë kryer tejkalim të automjeteve në kolonë duke përdorur shiritin emergjent në dalje të autostradës në fshatin Bibaj.

Për këtë kundërvajtje të rëndë në trafik, katër shoferëve me patentë shoferi vendore u është shqiptuar gjobë prej 300 eurosh, 3 pikë negative dhe masa mbrojtëse e heqjes së lejes së drejtimit për një vit.

Ndërsa shoferit me patentë shoferi të huaj i është shqiptuar gjobë prej 300 eurosh dhe ndalim i drejtimit të automjetit në territorin e Kosovës për një vit.

Sipas Policisë, të ndëshkuarit janë:

S.TH., 27 vjeç, me veturë Opel Astra;
M.M., 22 vjeç, me veturë Mercedes me targa të huaja;
SH.I., 26 vjeç, me veturë Mercedes;
G.A., 30 vjeç, me veturë BMW;
A.SH., 67 vjeç, me veturë Audi Q5.
Rasti ka ndodhur më të premten, kur zyrtarët policorë të Njësisë së Komunikacionit Rrugor në Ferizaj kanë ndaluar shoferët që kishin kaluar kolonën përmes shiritit emergjent në drejtim të rrethrrotullimit.

Policia Rajonale e Ferizajt ka bërë të ditur se do të vazhdojë kontrollet dhe aktivitetet e shtuara për zbatimin e rregullave të trafikut dhe rritjen e sigurisë në rrugë.

Më shumë se 270 mijë persona janë detyruar të largohen nga shtëpitë e tyre pasi zjarret e mëdha kanë përfshirë zona të Francës jugperëndimore dhe Spanjës qendrore.

Në Francë, zjarret në rajonet Gironde dhe Landes kanë bërë që rreth 197 mijë njerëz të evakuohen, sipas ministrit të Brendshëm francez, Laurent Nunez.

Ndërkohë, në Spanjë, rreth 73 mijë persona janë evakuuar për shkak të zjarreve, ka bërë të ditur presidentja e komunitetit të Madridit, Isabel Diaz Ayuso.

Autoritetet në të dyja vendet po vazhdojnë përpjekjet për vënien nën kontroll të flakëve, ndërsa temperaturat e larta dhe kushtet e thata kanë vështirësuar përballjen me zjarret.

Shefi ekzekutiv i Teslas, Elon Musk, ka bërë një parashikim të guximshëm për të ardhmen e ekonomisë, duke thënë se paraja mund të humbasë rëndësinë e saj deri në vitin 2036.

Sipas Musk, zhvillimi i shpejtë i inteligjencës artificiale dhe robotëve humanoidë mund të ndryshojë rrënjësisht mënyrën se si funksionon shoqëria dhe ekonomia.

“Për çfarë ju duhet paraja? Ju nevojitet për mallra dhe shërbime: ushqim, strehim, transport dhe argëtim”, tha Musk, duke argumentuar se nëse robotët dhe sistemet e inteligjencës artificiale arrijnë të prodhojnë më shumë mallra dhe shërbime sesa njerëzit mund të konsumojnë, atëherë nevoja për para mund të zvogëlohet ndjeshëm.

Musk ka deklaruar vazhdimisht se robotët dhe AI do të luajnë një rol kryesor në të ardhmen. Ai beson se makinat autonome dhe robotët humanoidë mund të kryejnë një pjesë të madhe të punëve fizike dhe industriale, duke rritur ndjeshëm prodhimin global.

Megjithatë, ekspertë të ekonomisë dhe teknologjisë kanë pikëpamje të ndryshme për këtë skenar. Shumë prej tyre theksojnë se edhe në një botë me automatizim të lartë do të mbeten çështje si shpërndarja e pasurisë, pronësia e teknologjisë dhe mënyra se si njerëzit do të kenë qasje në burime.

Deklarata e Musk ka rihapur debatin mbi ndikimin afatgjatë të inteligjencës artificiale dhe nëse përparimi teknologjik mund të sjellë një ekonomi ku roli tradicional i parasë ndryshon.

Presidenti amerikan Donald Trump pritet ta presë në Uashington homologun ukrainas, Volodymyr Zelensky, të martën, më 28 korrik.

Sipas raportimeve të mediave amerikane dhe ukrainase, takimi vlerësohet si një moment i rëndësishëm diplomatik në marrëdhëniet ndërmjet Shteteve të Bashkuara të Amerikës dhe Ukrainës.

Burime diplomatike të cituara nga Radio Liberty bëjnë të ditur se Trump dhe Zelensky pritet të diskutojnë për zhvillimet e fundit në luftën në Ukrainë dhe mbështetjen amerikane për Kievin.

Dy presidentët janë takuar së fundmi edhe në Francë dhe Turqi.

Gjatë qëndrimit në SHBA, Zelensky pritet të marrë pjesë edhe në ceremoninë mortore të senatorit amerikan Lindsey Graham.

Sipas raportimeve, presidenti ukrainas synon ta rikthejë çështjen e Ukrainës në qendër të agjendës së administratës Trump, e cila javët e fundit është fokusuar kryesisht te zhvillimet në Lindjen e Mesme.

Ndërkohë, Senati amerikan mund të votojë gjatë javës së ardhshme një paketë dypartiake me sanksione të reja ndaj Rusisë.

Në frontin e luftës, mediat ruse kanë raportuar se dy depo të kompanisë së tregtisë elektronike “Wildberries”, në zonën e Shën Petersburgut dhe në rajonin e Leningradit, janë goditur nga dronë ukrainas.

Si pasojë e sulmeve janë shkaktuar zjarre, ndërsa autoritetet ruse kanë deklaruar se mbrojtja ajrore ka rrëzuar disa dronë. Deri më tani nuk janë raportuar viktima.

Një shtetas kosovar i kërkuar me letër rreshtim ndërkombëtar, është ekstraduar nga Kroacia në Kosovë.

“I dyshuari ishte arrestuar nga autoritetet kroate pasi që i njëjti kërkohej përmes INTERPOL-it me letër rreshtim ndërkombëtar lëshuar nga institucionet e drejtësisë së Kosovës dhe se i njëjti i ishte shmangur drejtësisë”, tha policia, përcjell Sinjali.

“Ekstradimi u realizua bazuar në ligjet në fuqi dhe bashkëpunimit të ngushtë mes institucioneve të Republikës së Kosovës dhe atyre të Kroacisë”.

Një i ri nga Kosova është ndaluar sot nga autoritetet serbe në pikën kufitare Horgosh, në kufirin mes Hungarisë dhe Serbisë, derisa po udhëtonte nga Gjermania drejt Kosovës.

Lajmin e ka bërë të ditur avokati Arianit Koci përmes një postimi në facebook, ku ka thënë se informacionin e ka marrë nga një burim, identitetin e të cilit e ka konfirmuar.

Sipas Kocit, i riu, i lindur në vitin 1997, ende ndodhet në ambientet e policisë në pikën kufitare, ndërsa deri më tani nuk ka informacione të konfirmuara lidhur me statusin e tij procedural.

Ai ka bërë të ditur se gjatë kontrollit të automjetit, policia serbe ka gjetur një emblemë të UÇK-së nën ulëse, ndërsa sipas burimit të tij, i riu nuk ka qenë në dijeni se ajo ndodhej aty.

Në automjet janë gjetur gjithashtu edhe disa monedha të argjendta.

Koci ka shtuar se, sipas informacioneve që posedon deri më tani, sjellja e policisë serbe ndaj të riut ka qenë korrekte.

Të shtëna me armë zjarri kanë alarmuar mbrëmjen e së premtes banorët në Suharekë, duke bërë që në vendin e ngjarjes të dalin njësitë e Policisë së Kosovës, raporton Sinjali.

Rasti është raportuar rreth orës 19:30, në rrugën “Milaim Bajrami”, pasi një qytetar njoftoi se kishte dëgjuar të shtëna nga një zonë e mbuluar me lisa, ku nuk ishte e mundur të identifikoheshin personat e përfshirë.

Pas daljes në terren, patrullat policore nuk kanë hasur në asnjë person të dyshuar.

Megjithatë, gjatë kontrollit të lokacionit, njësia e Krimteknikës ka gjetur dhe sekuestruar tre gëzhoja të një arme të shkurtër, me kalibër ende të panjohur.

Lidhur me rastin është njoftuar Prokurori Kujdestar, i cili ka urdhëruar inicimin e rastit për veprën penale “Shkaktimi i rrezikut të përgjithshëm”. Policia po vazhdon hetimet për identifikimin e personit apo personave që dyshohet se kanë shtënë me armë.